Friday, January 19, 2007

كل عام وانتم بخيـر


كل سنة وانتوا طيبين .. او زى ما الصورة بتقول .. وقلوبكم بيضاء

إن الواحد يبقى قلبه ابيض شئ جميل اوى ونعمة كبيرة اوى انك ماتشلش من حد وانك تنسى وتحب كل الناس

المهم انا كنت ناوية احط الصورة بس فى البوست وخلاص على كدة

لاقيت انه ماينفعش الناس كلها اول ما السنة الميلادية تيجى الكل يهتم بالحدث ده ولما السنة الهجرية تيجى يبقى شئ عادى واهى ايام وبتعدى

بداية سنة هجرية بتفكر كل مسلم بهجرة سيدنا محمد عليه الصلاة والسلام من مكة الى المدينة

ساب بيته وبلده وتعب اوى عشان الدين ده يوصلنا يا جماعة

لو الواحد بس يستشعر قد ايه سيدنا محمد تعب وضحى عشان الدين ده يوصلى ويوصلك ويوصلنا كلنا

ايوة تعب عشانك إنت بالتحديد

تخيل إنه بكى من شوقه لينا قبل وفاته

.

فى أخر ايامه خرج صلى الله عليه وسلم ليزور شهداء أحد و يقول: "( السلام عليكم و رحمه الله و بركاته ، أنتم السابقون و نحن بكم لاحقون إن شاء الله ) ثم يرجع النبى بين الصحابة رضى الله عنهم و يبكى ،فيقولون : ما يبكيك يا رسول الله ؟ فيقول لهم : إشتقت إلى إخوانى ، فيقولون : أولسنا بإخوانك يا رسول الله ؟ قال : لا أنتم أصحابى ، أما اخوانى فهم قوم يأتون من بعدى يؤمنون بى و لم يرونى " صلى الله عليك يا رسول الله

بتحبه زى ما حبك واشتقالك وبكى من شوقه ليك قبل وفاته؟

اكيد بتحبه

إشتقت إليه زى ماكان مشتاق لك عليه الصلاة والسلام

تيجى نفتكر آخر خطبة ليه قبل وفاته صلى الله عليه وسلم ونفتكر وصانا بإيه

..

بدأ خبر وجع رسول الله ينتشر بين الناس و بين الصحابة حتى أن صوتهم بلغ مسمع النبى صلى الله عليه وسلم فقال : إحملونى إليهم ... فحملوا النبى إلى المسجد و ألقى أخر خطبة له و قال : (( ايها الناس، كأنكم تخافون علي ؟ ايها الناس موعدى معكم ليس الدنيا ، موعدى معكم عند الحوض ، والله لكأنى أنظر أليه من مقامى هذا ، أيها الناس والله ما الفقر أخشى عليكم ولكن أخشى عليكم الدنيا ان تتنافسوها كما تنافسها الذين من قبلكم فتهلككم كما أهلكتهم ، ايها الناس إن عبداً خيره الله بين الدنيا وبين لقاء الله فأختار لقاء الله .... ففهم ابو بكر المراد و عرف أن الرسول قد خُير بين الدنيا و لقاء ربه فأختار لقاء ربه ، فعلى صوت ابى بكر بالبكاء و قال : فديناك بأموالنا ، فديناك بأبائنا ، فيديناك بأمهاتنا ، فنظر إليه الناس شجراً ، فقال لهم الرسول صلى الله عليه وسلم : ايها الناس دعوا ابا بكر فوالله ما من أحد كانت له يد إلا كافئناه بها إلا ابا بكر لم استطع مكافئتة فتركت مكافئتة لله عز و جل ... و بدأ الرسول صلى الله عليه وسلم يوصى الناس و يقول : ايها الناس أوصيكم بالنساء خيراً و قال عليه الصلاة والسلام : الصلاه الصلاه ، الصلاه الصلاه ، الله الله فى النساء ، و ظل يرددها و بدأ يدعى و يقول : اواكم الله ، نصركم الله ، ثبتكم الله ، ثم ختم و قال صلى الله عليه وسلم : ايها الناس ابلغوا منى السلام كل من تبعنى إلى يوم القيامة )) ... وصل السلام وعليك السلام ورحمة الله وبركاته يا رسول الله .. اللهم بلغ رسولك منا السلام الآن يارب

مـات رسول الله صلى الله عليه وسلم ... بس لسة عايش فى قلب كل واحد فينا

عايزين السنة دى تبقى احسن من السنة اللى قبلها إن شاء الله

نبقى اقرب لربنا ونصلح اخطائنا

فاكرين الروحانيات العالية اللى كانت فى رمضان .. ياريت السنة كلها رمضان

عاوزين نرجعها تانى يا جماعة .. رب رمضان هو رب كل الشهور

ياريت نرجع تانى لقيام الليل ولو ركعتين وللقرآن تانى ولو صفحة فى اليوم

بجد ماننساش ربنا فى الدنيا عشان ماينساناش فى الاخرة

قال كذلك اتتك آياتنا فنسيتها وكذلك اليوم تنسى "(126) سورة طه "

بذكركم وبذكر نفسى قبلكم والله .. انا شر الناس إن لم يعفوا عنى وهو اعلى واعلم ... اللهم إنى اعوذ بك أن اذكر بك وانساك

وكل عام وانتم الى الله اقرب وعن المعاصى ابعد وعلى طاعته احرص وادوم بإذن الله

20 comments:

  1. ربنا يكرمك

    أجمل حاجة في أسلوبك بساطته
    من القلب و مفيش كلكعة

    وصلي سلامي للكائن العجيب صديقك اللي مش عارف اكتب اسمه .. بس حاسس كده و الله اعلم انه لذيذ

    كل سنة و انتي بخير

    ReplyDelete
  2. شوفى انا مش عارف أهزر زى كل مرة مع الكلام الجميل الروحانى الرائع ده .. ربنا يجازيكى خير على كلامك ويهديكى ويهدى بيكى .. آمين..

    ReplyDelete
  3. كل سنة وأنت طيبة .. وياريت كلنا نفهم المناسبات الإسلامية زي ما انت كده فهمتيها مش مجرد احتفاليات وأكل وخلاص .. اعرف ناس عندها السنة الهجرية يعني لازم نفتح فطير عشان ربنا يفتحها في وشنا وعاشوراء عشان نعمل عاشورا ونلهطها وعيد الفطر عشان الكحك وعيد الأضحى عشان اللحمة .. وهكذا
    ربنا يثبتنا ويهدينا وإياكم

    ReplyDelete
  4. السلام عليكم
    ربنا يكرمك بوست جميل و في وقته

    كل سنة و أنت طيبة
    و يارب تكون السنة دي بداية الخير لينا كلنا يارب
    و نبدأ فيها الرجوع لله تاني علي طول

    ReplyDelete
  5. كل عام و المسلمين كلهم بخير و هدى و ان شاء الله العام القادم يأتى و الإسلام منتصر و عزيز

    ReplyDelete
  6. كل سنة وانتى طيبة


    :)

    ReplyDelete
  7. عليك افضل صلوات الله وسلامه يا حبيبى يا رسول الله


    كل عام هجرى وانتم طيبين جميعا
    اسعدتنى جدا مدونتك

    ReplyDelete
  8. كل سنه وانتي طيبه يا انسانه و عام جميل عليكي و علينا كلنا و بجد انا نفسي نرجع نفتخر بالعام الهجري بتاعنا بس مش علي المستوي العائلي او المحدودي لا نفسي يبقي في العالم كله عام طيب عليكوا ان شاء الله

    ReplyDelete
  9. كل سنة وأنتم طيبين

    عام هجرى جديد وسعيد
    علينا كلنا ان شاء الله


    تحياتى

    ReplyDelete
  10. ربنا يكرمك ويعزك
    بجد البوست أكتر من رائع
    وفعلا بداية السنه الهجريه دي حاجه مهمه جدااااااااااااا.
    وياراب ربنا يجمعنا كله في زياره لبيته ورسوله ان شاء الله.

    ReplyDelete
  11. :)
    ببساطة وزى اسلوبك البسيط

    كـــل ســــــــنه وانتى طيبــه

    ReplyDelete
  12. الهم صلي وسلم وبارك على محمد
    ربنا يكرمك ويجازيكي خير
    وكل سنة وانتي طيبة

    ReplyDelete
  13. كل سنه وانت طيب بوست جميل وفى وقته بالظبط
    اريد منك خدمه اريد معرفه كيفيه اضافه اغنيه مع المدونه لانى مش عارفه اعملها نهائى وشكرا ليكى مقدما

    ReplyDelete
  14. كل سنة وانتي طيبة

    وصلي اللهم علي سيدنا محمد وعلي اله وصحبه وسلم

    ReplyDelete
  15. وانتوا طيبين ياجماعة وربنا يكرمكم ويجازيكم كل خير يارب

    رفقة عمر
    البقاء لله ياحبيبتى وربنا يصبرك
    بالنسبة للأغنية انا تحت امرك
    إن شاء الله هخلص الامتحانات يوم الاربع يعنى كمان يومين بإذن الله
    إيملي موجود فى البروفايل ضفينى وعلى يوم الاربع إن كان لينا عمر اشرحلك إزاى تحطى اغنية إن شاء الله

    وادعولنا عشان الامتحانات بالله عليكم ياجماعة
    سلام عليكم

    ReplyDelete
  16. كل سنة و انتي طيبة و جميع المسلمين يارب
    مدونتك جميلة

    ReplyDelete
  17. كل عام وأنتِ بخير والأمة الإسلامية كلها بحال أفضل من هذا الحال
    !!

    ReplyDelete
  18. ما عرفتش امسك نفسى و بكيت
    بجد بلوجك يستحق ان الواحد يحطه اول حاجة فى مفضلته بدل مواقع الهيافة و الكلام الفاضى
    بشكرك جدا على احلى كلام
    و انا ضفتك فى مفضلتى و اتنمى زيارتك

    ReplyDelete
  19. bsm elah masha2 2alah 3aleky blog gameel

    ReplyDelete

الكلمـة نـور .. وبعـض الكلمـات قبـور