Saturday, March 12, 2011

هو مين راح فين بكام؟

بيقولك فى إستفتاء على التعديلات الدستورية يوم 19 مارس الحالى ، فتلاقي اللى بيسألك: هو يعني ايه دستور أصلا؟ .. طب هو إتعدل ليه وإتعدل إزاي؟ طب لما أروح الإستفتاء أكتب نعم ولا لأ؟ 

ثم يظهر لك شوية ناس فاهمة التعديلات ويقولوا آه ولا لأ بس عايزين يعرفوا هما لو قالوا لأ هيحصل ايه؟ .. هنطلع الدستور القديم من الفريزر ونعمل عليه شوربة وفتة ولا هنشتري جاهز من برا؟ 

وبعدين يجي لك البرنامج المحبب بتاعك اللى بيفهمك كل حاجة تقريبا يستضيف ضيفين .. واحد يقولك التعديلات دي حاجة حلوة والمفروض نقول نعم ، والتاني يقولك التعديلات دي حاجة وحشة والمفروض نقول لأ .. في حين تترك أنت فى حالة حول نافوخي مزمن بدون بورشامة صداع واحدة يا مؤمن 

شوية وتسأل نفسك نعمل الإنتخابات الرئاسية الأول ولا البرلمانية؟ ولا البرطمانية عشان نلحق نحط ملفات أمن الدولة المفرومة في التلاجة عشان اهي تنفع فى العصاج 

طب نسيب البلد دي فى ايد الجيش ولا نعمل مجلس رئاسي كدة حلو ومحندق صالة وخمس مطارح فورفورشيه والنيش على العريس؟

وبعدين يقولولك ده المسلمين والمسيحين مية مية .. بعد شوية .. لأ مش مية مية ولا حاجة دول نص نص .. شوية تانين .. يالهوي لأ دول مش طايقين بعض خالص .. لالالالا ده احنا كلنا ايد واحدة يا بهجت كلنا بنكمل بعض 

وبعد كدة تظهر الحكومة على الساحة فيجتمع البعض على بعض رموزها فى حين يعترض البعض الآخر على البعض الآخر برضه ، فتجد نفسك أمام بدلة سمير غانم فى المتزوجون .. تظبط الجاكتة البنطلون يضرب .. تعدل البنطلون الجاكتة تضرب 

ثم يظهر قانون مكافحة البلطجة أبو عقوبة قد تصل للإعدام فتجد منظمات حقوق الإنسان ترفضه شكلاً وموضوعاً .. ثم يحاول الجيش تطبيق القانون فيلقى القبض على اتنين أبرياء مالهومش فى حوار البلطجة مثل علي صبحي وعمرو عبد الله البحيري 

ويجيبولك العادلي فى الصورة وتقول يتحاكم محاكمة عسكرية فيقولولك لأ ده من حقه محاكمة مدنية عادية !!! .. فى حين ان الشباب المعتصمين اللى اتاخدوا على انهم بلطجية بيتحاكموا محاكمة عسكرية عادي خالص

وهوبا تظهر الطامة الكبرى متمثلة فى مرتضى منصور اللى بيقولك ان الثورة دي ثورة شادي ووائل!!!! .. طب مافي ناس إسمها احمد وجرجس وكانوا فى الثورة عادي يعني يا كابتن وماحدش طلعلهم كارت أحمر ولا حاجة 

وبعدين شوية تلاقيه بيقولك احنا عايزين مبارك يرجع تاني ، وبعد كدة يقول لأ ده الشفيق أحمد فريق هيترشح وهعمله حملة إنتخابية بالمهلبية والمكسرات وانتوا لأة ، وبعد شوية يطمع هو فى المهلبية ويصرح ان لو الشفيق ما أكلهاش هأكلها انا كلها لوحدي ومش هديكوا حتة يا جرذاااااااان 

4 comments:

  1. هههه... عندك حق , احنا فعلا مش فاهمين حاجه , الجيش بيتصرف تصرفات غير مفهومة , مع انه ممكن ياخد طرق اسهل واوفر للجهد , بس نقول ايه , انا حاسس ان في لسه أطارات معينه وحدود لسه محبوسين جواها ., غريبة مع ان المفروض ان احنا في عصر جديد والنظام القديم بيتلاشى ,, الناس متعذبة على ايد الجيش من يومين ,, والوحشية المفرطة في فض معتصمي التحرير ,, والتعديلات الدستورية ,,, وبقاء سيد مشعل في الوزارة ... في حاجات كده محتاجه تركيز .. عشان توصلنا لنهاية واحدة ونتيجة واحدة ..هي اللي انت بتحاولي بشتى الطرق انك تبعدي عنها
    معقولة الجيش كدة؟؟
    ليه لاء اشمعنا هو ..جات عليه

    ReplyDelete
  2. هدي نفسك كده مش كويس على صحتك
    :-)

    ده طبيعي جدا مع شعب كان في قمقم وطلع ومش عارف يعمل ايه والا ايه

    ما تستغربيش

    لكن في نفس الوقت خدي بالك كويس من اللي بيركبوا الموجة واللي بيحولوا كل حاجة لمصالحهم من بعيد لبعيد

    ReplyDelete
  3. هههههههه
    خخخخخخخخخخخ
    و الله حاجه تلخبط اكبر مخ في البلد
    انا فعلا كل ما افتح مدونة الاقي حد بيقول نعم و بيقول المزايا و التاني بيقول لا و بيقول مزايا لا

    ReplyDelete

الكلمـة نـور .. وبعـض الكلمـات قبـور