إنــســـــانـة

بل أحياء

2011-12-19T13:21:00.001-08:00

وَلاَ تَحْسَبَنَّ الَّذِينَ قُتِلُواْ فِى سَبِيلِ اللَّهِ أَمْوَتاً بَلْ أَحْيَاءٌ عِندَ رَبِّهِمْ يُرْزَقُونَ * فَرِحِينَ بِمَآ ءَاتَهُمُ اللَّهُ مِن فَضْلِهِ وَيَسْتَبْشِرُونَ بِالَّذِينَ لَمْ يَلْحَقُواْ بِهِم مِّنْ خَلْفِهِمْ أَلاَّ خَوْفٌ عَلَيْهِمْ وَلاَ هُمْ يَحْزَنُونَ

ولادة

2011-10-10T12:35:00.000-07:00

الحرية لسة ماشافتش النور

الولادة متعسرة

والأم بتصرخ من الألم

والأب ندل مش راضي يوديها المستشفى

وقتلها كام عيل عشان تحترم نفسها وتبطل دوشة ويعرف ينام

لؤي نجاتي .. مُغرد من أجل الحرية

2011-06-30T05:06:00.000-07:00

بالله عليكم كيف أكتب وهو ينظر لي هذه النظرة الصافية الواثقة بالحرية؟ .. لؤي نجاتي .. عرفته يغرد معنا على تويتر .. يكتب فى تعرفيه عبارة " العقول تتحكم بالأفكار، لا العكس. سأكون يوما ما أريد " وصورته لا تقول إلا هذا المعنى

لؤي لم يقتل .. لم يسرق .. لم يخن شعباً بأكمله .. لم يأذي .. فقط يغرد لينقل الحقيقة .. فقط ناشط وسط كثير من الكسالى

هل قمنا بالثورة لنظل بعدها بشهور نغرد ونصرخ ونحتج ونعتصم ونتظاهر لمحاكمة المجرمين والقتلة ، ثم - وياللعجب - نستمر فى الإحتجاج حتى يتم الإفراج عن الأبرياء؟ .. عن أي ثورة تتكلمون؟

لم نقم بثورة ليتم القبض على النشطاء السياسيين على أي حال .. النمرة غلط .. نريد القبض على المجرمين والقتلة ومحاكمتهم محاكمة عادلة و .... عفواً عفواً ، نسيت قواعد اللعبة .. معذرة

قواعد اللعبة تنص على أن المحاكمات العسكرية لنا ( هدية من الثورة ) والمحاكمات المدنية اللانهائية لهم ( مع أوشن التأجيل المستمر ) بالإضافة إلى إقامة كاملة وشاملة فى شرم لزوم راحة البال .. والله الموفق

بلطجي من التحرير

2011-06-29T05:19:00.000-07:00

بلطجي من التحرير على كرسي عجل .. رايح يبلطج بلسانه مثلا؟ ولا هيتف على عربيات الأمن المركزي وبكدة يبقى إرتكب خرق واضح وقوى لمعاهدة عدم التفافة الدولية؟

ده بلطجي من التحرير .. مصاب ثورة يا سيادة المشير

راح بعجزه وهمه وخيبة أمله يجيب حقه بنفسه .. لأن ماحدش فكر يجيبهوله .. كل اللى حصل عليه من المحاولة دي لقب جديد ورتبة جديدة .. إترقى من لقب ( مصاب ثورة ) لـ ( بلطجي ) بعد الثورة

الروايات كترت من إمبارح بالليل للنهاردة الصبح .. ناس مع وناس ضد .. إعلام بيقول كلام وشهود عيان بتقول كلام تاني .. بس انا قررت أغمض عيني واسد وداني ومش عايزة أعرف حاجة .. كفاية أوي اللى عرفته من الشهور اللى فاتت

اللى عرفته كويس وإتأكدت منه هو إن مبارك لسة فى شرم الشيخ ولم يحاكم ومش ناويين يحاكموه ، ولا ناويين يحاكموا الظباط اللى قتلوا شبابنا وإخواتنا .. ومش قادرين على الحمار فبيتشطروا على الشعب

ياللي بتضربنا بالنار .. روح إتشطر ع الحمار

طظ فيك

2011-06-28T05:58:00.000-07:00

يا طير يا عالي في السما .. طظ فيك

متفتكرش ربنا مصطفيك

برضك بتاكل دود وللطين تعود

تمص فيه يا حلو ويمص فيك

وعجبي

صلاح جاهين

إختار هديتك بنفسك

2011-06-27T08:21:00.000-07:00

هل تعلم إن من أصعب المهام على المرأة شراء هدية مناسبة للرجل؟ يا عزيزي آدم إنها حقيقة علمية مسلم بها لدى كل النساء .. ماذا يمكن أن يهادى به الرجل ، ساعة ، شراب ، كرافات ، باكو لبان .. لا تدري بالتحديد ، يزيد من صعوبة الأمر الهدية الموجهة للرجل الغير محدد الهواية والشغف .. لا يدخن لا يشجع أي رياضة .. إلخ

مشكلة الهدية تكمن فى إنك لما بتسأل اللى المفروض هتجيبله هدية على نوع الهدية اللى هو عايزها نادراً لما بيقولك حاجة معينة على سبيل الإحراج ومش عايز أكلفك وكدهوك ، بس انا من رأيي إن طالما كدة كدة الهدية هتيجي وكدة كدة فى فلوس هتتدفع يبقى المفروض تدفع فى حاجة تنفعك وإنت محتاج لها فعلا بدل ما تجيلك هدية زي عدمها او مش هتنفعك فى شئ .. مش كدة يا باشا؟

عندي أقتراح أرجوا تعميمه على كل الجدعان اللي هيجيلهم هدية قريب - يا بختهم مبدأياً - الإقتراح ده إنك تغمض عينك وتتخيل لو أنك قد دعكت الفانوس ثم خرج ليقول لك ( شبيك لبيك .. إطلب وإنجز يا برنس ) .. وإحلم بقى ، نفسي فى كذا وكذا وكذا وكذا .. إكتبهم فى ورقة بسيطة وسلمهم للشخص اللى سألك نفسك فى ايه هدية

رد فعل الشخص على الإقتراحات هيكون حسب طبيعة الإقتراحات .. لو لقى مكتوب هدايا من عينة الآيفون والآيباد والآيام دونكي والحاجات دي إنسى .. مش هيجيبلك حاجة وآدي دقني أهيه لو عبرك فى هدية تاني

إنما بقى لو هدايا معقولة ظريفة لطيفة - مش وردة طبعا .. الحاجات دي ما بتاكلش معاك عارفة - من عينة أكلة حلوة ، صابونة بريحة ، فرشاة سنان ، فرشاة بلاط مايضرش .. تبقى جدع وأستاذ وكفاءة .. الهدية هتجيلك فى لمح البصر وفوقيها وعد بهدية مماثلة كل عيد ميلاد أو كل شهر حتى

وبحذرك يا عزيزي آدم لما تيجي تختار هديتك تقولها انا هدتيتي إنك تبقى عاقلة وراسية وطيوبة والكلام الحمضان ده .. صدقني هتجيبه لنفسك .. هتلاقيها برقت وإتخضت وإنتفضت وقالتلك: ليييييييييه هو انت شايفني بشد فى شعري قدامك عشان تقولي عايزك عاقلة؟؟؟؟؟؟ .. طووووم طاااااااااااااخ طششششششششش

والله الموفق والمستعان

إتفنن فى تعذيب أخوه

2011-06-26T04:45:00.000-07:00

انا كل يوم أسمع ….. فلان عذبوه

أسرح في بغداد و الجزاير واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!ا

الأمين الجتة

2011-06-25T06:59:00.000-07:00

أمين شرطة قتل صاحب مخبز بالرصاص لأنه رفض إعطاء والده خبز خارج الطابور

تخيل المشهد

الأمين: إنت هتدي أبويا بجنيه عيش ياض إنت ولا أقتلك؟

الخباز: إنت فاكرنا لسة بنخاف بعد الثورة ولا اييييييه

أبو الأمين: إبني اللوا جه هيه .. إبني الجتة جه هيه

الخباز: إحترم نفسك وأقف فى الطابور ياعم انت

الأمين الجتة: إنت الظاهر عليك نسيت نفسك ... طاااااااااخ
-

أبو الأمين: أنت لسة هتموت بقى وتقرفنا .. هات العيش الأول وبعدين موت براحتك
-

ثم يخرج الأمين الموبايل أبو كاميرا من جيب البنطلون ويصور والده مع القتيل وهو يبتسم بفخر كصورة تذكارية .. ثم يتصل بالست الوالدة: أيوة يا ماما .. إبسطي جبنا عيش من برا الطابور وقتلنا الخباز كمان .. أيوة وأبويا صمم يتصور معاه عشان يضيف الصورة لألبون القتلا اللى عنده ، انتي عارفة بقى ياما قتلنا بقالين وسواقين ومكواجية .. عالم تحرق الدم .. طب يلا حضري الأكل بسرعة إحنا جايين فى السكة مايتين من الجوع .. إنتى عارفة بقى القتل بياخد مجهود وكدهوك

سجدوا لك يا حمار؟

2011-06-24T04:06:00.000-07:00

سجدوا لك؟ وعملوا لك بوستر بعرضك وطولك

بشار ده إسمك بجد ولا إسم مستعار؟

يادي الحوسة البعيد طلع مش بشار

إسمه الحقيقي غدار

وصفته - اللهم أحفظنا - حمار

لاتكون ما بتفهمش بالسوري يا موكوس؟

نقولهالك بالمصري تاني ومن غير فلوس

إرحل يعني إمشي .. ياللى ما بتفهمشي

إتفضل إمشي انت

2011-06-23T02:57:00.000-07:00

انا عايزة أسأل سؤال .. هي المحطة التلفزيونية دي بتاعة أبو المذيع من دول؟ يعني مثلا بيتعامل معاها على إنها عزبة أبوه وبتاعته ومن حقه يستضيف مين ويطرد مين على الهوا؟ الكلام ده بيفكرني برئيس كان فاكر البلد عزبة أبوه برضه وبيعمل فيها اللى هو عايزه ماهي بتاعته بقى .. بعد الثورة الكلام ده لسة موجود وبالصوت والصورة .. عمرو أديب يبدع ويتفوق على نفسه ويكشف نفسه بنفسه .. كيف يطرد ضيف على الهواء؟ وإذا كنت على إستعداد لطرد أي ضيف لماذا تستضيفه من الأساس؟

فى قاعدة بتقول الزبون دايما على حق يعني مهما كان تصرف الضيف لازم تحترم وجوده ، ولا أقولك بلاش شغل الأسواق ده خلينا فى كلام الأصول : من جالك بيتك جاب الحق عليك .. والبرامج بتقول على اللى بتستضيفهم ضيوف .. ينفع تطرد ضيفك بالشكل ده مهما عمل؟
-

عمرو أديب .. القناة دي مش بتاعة السيد الوالد ، وكان أحرى بك الإعتراف بخطأ معديين البرنامج اللى اعتمدوا على موقع غير موثوق به مثل ويكيبيديا كمصدر للمعلومات تسبب فى تقرير خاطئ يقول أن الشاعر مصري / قطري فى حين إنه تنازل عن الجنسية القطرية يعني مصري بس ، ولو هتتجن وتجيب إسم قطر فى جملة مفيدة قول الحقيقة .. كان معاه جنسية قطرية وإتنازل عنها .. شوفت الحقيقة سهلة إزاي؟

مافيش إعلامي محترم بيحترم نفسه ومشاهديه والكرسي اللى قاعد عليه والكلية اللى اتخرج منها والرسالة الإعلامية اللى بينقلها يعمل اللى انت عملته .. ونصيحة مني تتفرج على حلقة يسري فودة مع الدكتور السباعي .. رغم كل الكذب اللى قاله الضيف لم يقل له المذيع إتفضل إمشي ، لأنه مش إعلام أبوه ده إعلام المشاهد ومش من حق حد يطرد أي ضيف من بيت مش بيته بالأساس!!ا ... وتأكد لو الجمهور عنده نفس القدرة اللى تخليه يقول لأي مذيع إتفضل إمشي .. صدقني كنت سمعتها من زماااااااااااان

ملحوظة: انا لا اتحدث دفاعاً عن عبد الرحمن يوسف على الإطلاق ، رغم إنه إعتذر لجمهوره بعد إنتهاء الحلقة عن رد فعله العنيف وانا رأيي فى رد فعله ده إنه رد فعلي شخصي يختلف من إنسان للتاني ، الله أعلم أنا أو حضرتك لو اتعرضنا لنفس الموقف كنا هنصرف إزاي ، انا بتكلم كمشاهدة ساءها طرد ضيف - أي ضيف - من برنامج على الهواء بهذا الشكل الفج من غير ما يعملوا حساب إنى قاعدة بتفرج حتى

لسعات

2011-06-22T03:00:00.000-07:00

أخبروها وهي فى السابعة من عمرها ماحدث لها وهي صغيرة ، حادثة لم تكن بسيطة فى حينها .. إنسكب كوب الشاي الساخن على صدرها وبطنها وكادت تموت ، هرع الجميع لإنقاذها وبقي أبوها وأمها يبكيان عليها بشدة ، صارت تحب سماع الحكاية وتبتسم ولا تحزن ولا تمل من تكرارها ، كلما سمعتها تمعنت فى آخر جزء فى الحكاية .. بكاء الأب والأم .. تسمع هذا الجزء وتطير من الفرحة .. إنه دليل حبهم لها

كبرت قليلاً لكن شيئاً عجيباً إستمر فى الحدوث .. اللسعات .. لا تفوت سنوات متتالية إلا وتلسع بالنار بأي طريقة ، مرة وهي تساعد أمها فى المطبخ فتلسع لسع بالغ فى صدرها ، مرة وهي تزور خالتها وتقترب من المكواه السخنة فتلسع ركبتها

مرة أخرى بعد خطوبتها بأيام .. تقف أمام البتوجار لتصنع شيئاً سريعاً تأكله فتجد نقاط من الزيت تنتشر على وجهها ويدها فيضيع جمال وجهها الباسم أمام خطيبها الذي لا يشعر بضياع هذا الجمال على الإطلاق ويبشرها بالشفاء القريب وتختفي أثار هذه اللسعات للأبد

يوما آخر وهي تطبخ لزوجها سُكب فوق يدها زيت ساخن جداً ، وجدت نفسها فجأة على الأرض تصرخ من شد ألم الحرق ، دخلت بعدها فى حالة إكتئاب لظنها إن الله غاضب عليها لذلك يبتليها باللسعات المتكررة ، ومما أكد لديها هذا الإحساس هو تعليق أمها على تكرار هذه اللسعات بقولها: إنتِ موعودة باللسع من يومك! .. ظلت تبحث عن سبب هذا الوعد العجيب ولماذا هي بالتحديد وليس غيرها؟ ولماذا لسع وليس طريقة أخرى للعقاب؟ ، ظلت الأسئلة تتكاثر وتتكاثر ولا تجد إجابة شافية ، لم تترك باب للإجابة إلا وطرقته

بحثت كثيراً ولم تصل لشئ فى النهاية ، إلا إنها ذات يوم بالصدفة وجدت الإجابة على سؤالها فى جملة فى كتاب تقول: لكل إنسان نصيبه من النار ، إن كان من الصالحين أخذ نصيبه من النار فى الدنيا وإن كان غير ذلك أدُخر له فى الآخرة .. أخذت نفساً عميقاً وإبتسمت وهي تقول: الحمد لله

اضحك وافرح

2011-06-21T05:57:00.000-07:00

ليه تشغل بالك ليه .. على بكره وتبكي عليه ليه

مين عارف ح يكون ايه .. مين عارف

اضحك وافرح من قلبك .. وانسى الدنيا وما فيها

خللي الايام تفرح بك .. وانت كمان افرح بيها

افرح بشبابك واتهنى .. ح تلاقي الدنيا بقت جنة

*****

ياما ناس بيشوفوا أسيه .. أيام وليالي طويلة

وفي غمضة عين والتانية .. لياليهم تبقى جميلة

أفرح بشبابك واتهنى .. حاتلاقي الدنيا بقت جنة

ليه تشغل بالك ليه .. على بكره وتبكي عليه ليه

مين عارف ح يكون ايه .. مين عارف

كلمات :مرسى جميل عزيز
لحن : محمد الموجى
غنا : عبد الحليم حافظ

الدبوس هو الحل

2011-06-20T10:02:00.000-07:00

ظاهرة التحرش الجنسي زادت وإنتشرت لحد إنها مابقتش ظاهرة ولا حاجة ، دي بقت طبيعة وشئ عادي فى شوارعنا ، بنت ماشية يعني هتتعاكس ، فى المواصلات يبقى هغلس عليها وأحاول ألمسها .. وهكذا

فى الأول إسمحيلي يا حواء يا حبيبتي أعرفك ع الواد المعفن الزبالة اللى بيتحرش ده ، وهو بالمناسبة مش دايماً ولد .. كتير بيكون حد كبير ، حد كبير مش راجل كبير لإن المتحرش مش راجل أساساً ! ، اللي بيتحرش ده بقى ياستي لا بيهمه شكلك أو لبسك أو سنك أو حتى حالتك أو المكان والزمان اللى انتوا فيه ، يعني ممكن جداً تكوني منقبة أو محجبة أو حتى حامل ويتحرش بيكي ، ممكن كمان فى عز الضهر فى شهر رمضان يتحرش بيكي برضه ، ماهو مش بني آدم بقى

المتحرش ده ممكن جداً تلاقيه فى الشارع أو فى المواصلات أو حتى فى الشغل أو مدرستك أو كليتك أو الصيدلية أو عند البقال ، إختصاراً بيتلاقى فى كل مكان وممكن يتحرش بيكي فى أي مكان من دول ولو بلعتي لسانك تبقى هتفضلي طول عمرك تفتكري اللى حصل وإنتى قلبك بيتعصر من جواكي على إمتهان جسدك بالشكل ده

أما بقى بالنوسبة للبعض اللى يقولك ماهي تستاهل لابسة ضيق ومحزق أقوله: المبادئ لا تجزأ يا حلاوة ، إفرض هي لابسة وحش وعايزة تتعاكس زي ما بتقول ، وإفرض إن الشباب نفسه يتجوز ومش عارف ( مع إن الحديث الشريف بيقول من إستعفف أعفه الله ) ، لالا إفرض كمان إنها متفقة مع الواد اللى بيتحرش بيها ده وعاجبها الوضع ، هل ده مبرر إنك تشوف مشهد زي ده فى الشارع وتسكت عليه تحت شعار: ماهي اللى عايزة كدة؟ ... من حق الشارع واللى فى الشارع أنهم مايشوفوش مشاهد خارجة عن الآداب العامة على الأقل ، إعتبره مشهد خارج يا سيدي وماينفعش نعديه ، وإلا بقى هنكتب على ناصية كل شارع للكبار فقط!ا

نرجع لمرجوعنا يا عزيزتي حواء .. فى طرق كتيرة لحماية نفسنا من التحرش

أولاً: عمرك فى حياتك ما تركبي مواصلة وتقعدي جمب سواق أبداً أبداً أبداً

ثانياً: لو ركبتي مواصلات دوري على مكان فيه بنات تقعدي جمبهم وخلي أوبشن القعدة جمب الولاد أوبشن غير مطروح على الساحة إلا فى الضرورة القصوى

ثالثاً: زمانك بتقولي: أقعد فى المواصلات؟!!! ده انتى متفائلة أوي ، عارفة انه صعب بس إياكي تركبي أتوبيس وتوقفي خصوصاً لو كنتي راكبة لوحدك لأن ماحدش من الذكور اللي قاعدين ع الكراسي عنده شوية دم عشان يقوملك وتقعدي إنتي ، فريحي نفسك من الأول وماتركبيش

رابعاً: حصل وتم التحرش ، ماتسكوتيش يابت إنتى ، صوتك ده يجلجل ويملى فراغات الكون ويخبط فى دماغ هذا الكائن المتعفن ، إشتميه ، لو تاكسي إفتحي باب التاكسي وهدديه إنك هترمي نفسك لو ماوقفش ، لو ماوقفش إرمي نفسك من العربية ، انا عندي أموت أشرفلي من إنى أعيش بدون كرامة .. لو وقف إنتى ومزاجك بقى يا تبصقي فى وشه يا تشتميه ، إتس أب تو يو يا ولية

خامساً: فى أفكار لصاعق كهربا ولرشاش سيلف ديفينس وانا صراحة مش بفضلهم ، لأن مثلا همشي بصاعق إزاي وانا معايا طفل؟! مش هينفع ، وبعدين السلف ديفينس ده ماعرفش بيجيبوه منين .. يعني مثلا لو رحت للعطار وقولتله: إديني 2 كيلو سيلف دفينس لو سمحت وإتوصى ! .. هيرد يقولي إجري هلب يور سيلف بعيد عني يا ست إنتى

فى حل تاني أبسط وأروق وأخبث بكتير ، كتير مننا محجبات وطرحتهم متلغمة دبابيس ، ولو مش محجبات يشيلو دبابيس معاهم فى الشنطة .. قرب منك ، حاول يلمسك ، هوووووووب تشوكيه بالدبووووس ، هتلاقيه إتشال وإتحط وبقى يصوت ومش لاقي اللى ينجده ، وإنتى هتضحكي من كل قلبك بجد

سادساً: ليكن شعارك فى الحياة ياللى إغتصبتوا بنات القُبة هنلسوعكوا برجل الكنبة

الخوف والحرية

2011-06-19T06:43:00.000-07:00

قال الفيلسوف الألماني فريدريك نيتشيه يوماً: "من غير المجدى أن نقوم دوماً بحساب الجوانب الإيجابية والسلبية للأمور ، إرتكاب الخطأ أحياناً هو جزء من الشرط الإنساني"ا

قال المعلم للتلاميذ: "الخوف من إرتكاب الخطأ هو الحاجز الذي يسجننا فى قلعة الكفاف ، إذا إستطعنا قهره نقوم بخطوة حاسمة بإتجاه حريتنا"ا

منمن كتاب (مكتوب) لباولو كويلهو

صباح حلم الإعلام المصري

2011-06-18T01:40:00.000-07:00

أتساءل اليوم بعد كل هذه الصباحات التي شاهدتها .. كيف إستطاع هذا البرنامج أن يجعلني أتعلق به هكذا طوال هذه السنوات؟ .. حتى أنني إذا ما أردت الإستمرار فى النوم ودقت الساعة التاسعة صباحاً أهرع إلى الريموت كنترول وأتنقل مسرعة بين القنوات حتى آتي بقناة دريم1 وأشاهد مذيعة البرنامج الرائعة دينا عبد الرحمن على الهواء تتحدث بلغة سليمة وثقافة واسعة ثم أذهب فى النوم مرة أخرى مستمتعة بالحوار ولا استقيظ إلا على صوت التتر وقد إنتهى وقد حزنت لإنتهائه

مع إستمرار البرامج اليومية يتوحد الإنسان معها وتصبح جزء لا يتجزأ من يومه يصعب الإستغناء عنه .. فالصباح يعني صباح دريم .. حيث قراءة الصحف ومناقشة الأخبار وشرح الموضوعات المطروحة التي يحق للمشاهد أن يفهمها أكثر ، وإستضافة أهل العلم والثقافة والكتب وأحوال البسطاء ، فقرات كثيرة ومتنوعة وكلها مفيدة .. مثلة فقرة أحوال وأحوال عربية ، وفقرة ديوان المظالم الذي يعتبر حلقة وصل بين أفراد لديها ظروف صعبة وبين السيد المسؤل الذي يصعب عليهم الوصول إليه أو حتى الوصول لأهل الخير ومساندة من يحتاج لمساعدة ودعم ، كلها أفكار وفقرات إنسانية متنوعة من الطراز الأول حتى وإن غلب عليها الطابع السياسي ، فتشاهد نماذج تبث فى يومك الأمل بعد معاناة وكفاح مع الحياة أو المرض ثم الإنتصار

بداية رائعة لأي يوم ، أخبار سليمة ودقيقة وآراء ستحترمها سواء إتفقت معها أو إختلفت ، بدأت أستمتع بهذا البرنامج منذ 2008 حتى الآن ، ومع كل عيد ميلاد للبرنامج فى 4 أغسطس أشعر أنني أحتفل به معهم كبرنامجي المفضل وأشعر بإمتنان شديد وشكر عارم لهذه البداية الجميلة لكل يوم

كثيرا ما إنتقدت المذيعة محافظين ووزراء كثيرين قبل الثورة والحكومة غارقة فى العسل ، كم كذب محافظ ووزير على الهواء ، حتى إنني شاهدت بنفسي حلقة كانت الوزيرة السابقة عائشة عبد الهادي تزعق فى المذيعة لأن المذيعة تقول الحقيقة والوزيرة بالطبع لا تريد الحقيقة

دينا عبد الرحمن من الإعلاميين اللى بيثبتوا إن الإعلامي الحقيقي له موقف ورسالة مش مجرد صورة حلوة تطلع على الشاشة تقول أي كلام وخلاص ، لذا لم أندهش من إنحياز المذيعة للثورة منذ اليوم الأول ، رغم معارضة إدارة القناة لهذا القرار وتدخل مالك القناة بنفسه ( أحمد بهجت ) على الهواء ليثنيها عن رأيها ولكنها تمسكت به رغم كل شئ ، حتى وصل الأمر إلى قطع التيار الكهربائي عن البرنامج فى يوم موقعة الجمل

حلقات البرنامج ولله الحمد أصبحت تسجل على اليوتيوب وتستطيع أن تشاهدها إن كنت ممن لا يتواجدون فى منازلهم صباحاً ، فهي حلقات بعيدة كل البعد عن برامج التوك شو المسائية بعبثها وزخمها المعتاد ، حيث تستفرد دينا صباحاً بعقل المتفرج الذي إستيقظ لتوه من النوم لتقرأ عليه الأخبار والمواقف والتحليلات ، فسرعان ما أردك المشاهد المتابع لها حجم الفرق الشاسع بينها وبين مذيعي التوك شو المسائي وبين برنامجها وبرامج المساء

موقف بسيط قد يلخص لك أهمية هذا البرنامج بالنسبة للكثيرين ، إتصل مرة أحد المشاهدين بالبرنامج وتكلم بجدية شديدة مع المذيعة وطلب منها أن يستمر البرنامج يوم الخميس والجمعة أيضاً ، وإذا لم تستطع أن تكون على الهواء يمكنها تسجيل البرنامج مساءاً فيعرض لنا صباحاً كالمعتاد يوم الخميس والجمعة ، سبب هذا الطلب الغريب إنه ضرير ولا يجد من يقرأ له الجرائد ويحلل له الأخبار كل يوم كما تفعل دينا عبد الرحمن فى برنامجها صباح دريم

صباح دريم ليس مجرد برنامج صباحي عادي ولكنه فى رأيي حلم لما يجب أن يكون عليه الإعلام المصري المحترم الذي يهتم بفائدة المشاهد فى المقام الأول وإصلاح ما يمكن إصلاحه فى حياته ولا يضع حجم الإعلانات فى أعلى مقام ويضرب بالفائدة والمشاهد عرض الإستوديو .. ويصعب عليّ أن أختم هذه التدوينة دون أن أردد الكلمة الشهيرة التي تقال فى آخر كل حلقة فتبث فى باقي اليوم الأمل .. وصباحكوا بكرة صباح دريم

إظلمني

2011-06-17T05:50:00.000-07:00

إظلمني

ظلمي هيسود حياتك

وهيطفي فرحتك

ويخنق ضحكاتك

الظلم علقم

ودعوتي مُر

مصبوب فوق راسك

دبلة جديدة

2011-06-16T03:17:00.000-07:00

قالها فى لحظة غضب ، لم تتخير الوقت المناسب للنقاش فتطور الأمر إلى أن قالها ، تركت كل شئ وذهبت فى حالة ذهول وصدمة شديدة ، لأول مرة تلاحظ العلاقة بين الطلاق وطلقة الرصاص ، كلاهما صعب الرجوع فيه ، وكلاهما يقتل ويجرح !ا

وقف لا يصدق ما حدث ، وكأنه سقط فجأة من جبل شاهق إلى أرض صلبة وجافة ، نظر حوله فوجد كل شئ فى البيت ينطق بإسمها ، ملابسها .. عطرها المفضل .. فرشاة شعرها .. كتابها ، صورتها بفستان الفرح ، كل شئ يذكره بجريمته فى حقها

ظل أياماً ينظر إلى هاتفه ينتظر مكالمة من أهلها أو منها ولكن شيئاً ما لم يحدث ، الكل إختفى وإنقطع الخيط فجأة ، ضغط على زر إتصال أمام إسمها المسجل على الهاتف " حبيبتي " .. سمع الرنين الذى طال إلى حد أنه تأكد من إنها لن تجيب .. هم أن يضع الهاتف ويصمت ولكن فجأة سمع صوت .. آلو

قال كلام كثير لا يعرف له أول أو آخر .. قال وكفى ، طلب أن يقابلها .. وافقت

قابلها فى المكان الموعود ، بكى كثيراً كطفل تركته أمه وغضبت عليه .. كانت صامتة صمت جريح ، لا تعرف ماذا تقول أو تفعل .. ترجاها للعودة .. وافقت .. ستعود له .. لا تقوى على الحياة بدونه حتى يكون لها حرية القرار

إشرطت للعودة شرطان .. دبلة جديدة وقلب جديد .. وافق على الفور وذهب بها إلى الصائغ وطلب منها أن تختار أحلى وأغلى دبلة زواج .. إختارت وسألها الصائغ إذا كانت تريد أن تكتب شيئاً على الدبلة .. سلمته ورقة صغيرة مطوية .. طلب منهما الصائغ العودة لأخذ الدبلة فى اليوم التالي

ألح عليها لتعود معه للمنزل ولكنها رفضت .. أخبرته أنها لن تعود للبيت إلا بالدبلة الجديدة

جاء اليوم التالي وذهب ليأخذ الدبلة الجديدة .. نظر بداخلها ليرى إسمه ساطع كما كان فى الدبلة الأولى وقلبه يرقص من الفرحة ، ولكنه لم يجد أي أثر لإسمه على الإطلاق .. دقق النظر فى الدبلة فقرأ المكتوب بخط صغير: إنكسر جوانا شئ !ا

عرابي والثورة الإفتراضية

2011-06-15T02:55:00.000-07:00

كتبت هذا الموضوع فور ظهور فيديو اللوا أبو قمر ، وها أنا أنشره اليوم مصدومة ومقهورة بسبب أنباء عن "ترقية" هذا اللواء بدلاً من محاكمته فى ظل وزير خارجية جديد وأجواء لا نهائية من الإنفلات الأمني

---------------------------

الثورة كمصطلح سياسي هي الخروج عن الوضع الراهن إلى وضع مختلف تماماً .. وهكذا تمنى وتوقع كل مشارك أو مؤيد للثورة الشعبية التي خرجت يوم 25 يناير مطالبة بكل ما كنا نتمناه طوال ثلاث عقود عجاف هي مدة حكم الرئيس السابق .. تغيير – حرية – كرامة إنسانية ، ولكن السيناريو أصبح مختلف

فالتغيير حدث بشكل جزئي وحتى يومنا هذا لم تتغير حكومة الفريق أحمد شفيق ولم يتم إقالة الوزير أحمد أبو الغيط والوزير ممدوح مرعي ووزير الداخلية محمود وجدي الذى إستفز جموع الثائرين بحديثه فى برنامج مصر النهاردة ودفاعه عن إستخدام الشرطة للرصاص الحي على المتظاهرين مبرراً ذلك بإستخدام المتظاهرين العنف ووجود بعض العناصر التي إندست بين المتظاهرين وإستخدمت السلاح! ، ورفضه لمطالب المتظاهرين بحل جهاز أمن الدولة معتبرا إياه جهازا وطنيا ولا غنى عنه وموجود بالعالم كله

عن أي كرامة إنسانية يتحدثون بعد أن تسرب فيديو على الإنترنت لمدير أمن دمنهور وهو يقول بالنص: اللى يمد إيده على سيده لازم يتضرب بالجزمة وتقطع إيده .. إحنا أسيادهم وإحنا الأمن وإحنا الأمان وإحنا اللى حامينهم والناس كلها كانت بتعيط وتقول يارب تيجوا عشان اللى إحنا فيه .. شافوا طبعاً أيام سودا.

بالله عليكم ما هذه العقليات التي لا تحتاج فقط إلى أن تستوعب وتدرك ما حدث يوم 25 يناير ، بل تحتاج أن تراجع أيضاً درس الثورة العرابية فى كتب التاريخ عندما رد الخديوي على مطالب عرابي قائلاً : كل هذه الطلبات لا حق لكم فيها، وأنا ورثت ملك هذه البلاد عن آبائي وأجدادي، وما أنتم إلا عبيد إحساناتنا .. فقال عرابي جملته الشهيرة: لقد خلقنا الله أحرارًا، ولم يخلقنا تراثًا أو عقارًا، فوالله الذي لا إله اله الا هو إننا سوف لا نُورَّث، ولا نُستعبَد بعد اليوم

أين عرابي ليسمع مدير الأمن وهو يتحدث عنا – نحن الشعب الذى طالب عرابي بتحريره منذ أكثر من قرن الزمان - وكأنه سيدنا ونحن عبيد إحسانه .. ناسياً او متغافلاً الدور الحقيقي لرجل الأمن وهو حماية المواطنين وليس الإستعلاء عليهم أو إذلالهم أو المن عليهم بواجبه الوطني

مدير الأمن يتحدث عن الشعب المصري - الذى لم تبرد ناره على الشهداء بعد – وكأننا فى عصر السادة والعبيد وكأن كل ما قمنا به من ثورة ورغبة فى تطهير البلد من الفساد ومعاملة المواطن المصري بكرامة فى بلده وكل بلاد العالم كان مجرد ثورة إفتراضية فى عقولنا وخيالنا فقط ، وكأن دم الشهداء كان مجرد لون أحمر أغرق الشوارع مثلما يحدث فى ألعاب البلايستيشن ثم يختفى بمجرد ظهور كلمة ( جيم أوفر )

كيف تعود الثقة بين المواطن ورجل الشرطة ووزير الداخلية لا يريد حتى الإعتراف بالجرائم التي إرتكبها جهاز الشرطة وأمن الدولة من قتل وإصابة أبناء الشعب ، كيف نطمئن بعد أن قام شرطي بإطلاق النار على سائق ميكروباص لإختلافهم على أولوية المرور!!! .. كيف تستقيم الأمور ووزير الداخلية يعتقد أن المشكلة تكمن فى ملابس الشرطة التي تحتاج إلى تغيير ولا يدرك أن المشكلة الحقيقة تكمن فى عقليات من يعتبرون أنفسهم أسياد والمواطنين عبيد ولا يتدبروا ولو للحظة معنى شعار: الشرطة فى خدمة الشعب

نحن لا نأكل الحيسمون

2011-06-14T03:24:00.000-07:00

لا تندهش يا صديقي من العنوان أو تقول فى نفسك: الولية إنسانة دي إتجننت وجاية تستظرف ، كلا البتة والله ، كل الحكاية إني إستيقظت فى أمان الله فى إنتظار أخبار كل يوم عن عجلة الإنتاج وضرورة الإستقرار والجاسوس إبن الست وقيعة ، فوجدت نفسي أتكعبل فى مقال غريب الأطوار فى روزاليوسف يتكلم عن خبايا وتفاصيل عائلة المخلوع مبارك

الشعب طلع ظالم المخلوع أوي ، يعني مثلا طلع مش ساكن فى قصر ولا حاجة يا ظلمة ، ده طلع ساكن بعيد عنك فى ثلاث فيللات عشوائية متجاورة وجدرانهم مشروخة كمان ، أيوة فيلل الإيواء المخصصة لمتضرري الرئاسة، فيلل الإيواء أم حمام سباحة واحد بس

انا اتصدمت بجد فى اللى كان رئيسي ، تخيل يا عزيزي القارئ إنه كان زملكاوي .. شوف انت بقى بلد رئيسها زملكاوي هتبقى عاملة إزاي .. مصر ما اتنحستش من شوية

تخيل كمان أنه يأكل زبادي عادي زيينا كدة وعيش محسن ، أيوة محسن .. محسن مين؟ ، وأنا اشعرفني أهو أي محسن وخلاص ، وقال ايه مرة إكتشف فتلة ضلت طريقها فى قلب الرغيف قاموا قافلين المخبز كله .. وأنا ياما إكتشفت بلاوي وبلاش أقولك لحسن أقرفك ع الصبح وانت مش ناقص يا عزيزي القارئ ، ياما أكتشفت ياخويا وماحدش عبر أهلي

ده غير إنه بيتغدى بامية بالصوص الأبيض ، متعرفهاش؟ .. دي بعيد عنك كدة الدمعة بتاعة البامية بدل ما تكون حمرا تبقى استغفر الله العظيم بيضا وربنا يستر على ولايانا جميعاً ، وكما قال صديق البرنامج فى تويتر: الصوص الأبيض ينفع فى اليوم الإسود

قد تعتقد أن المشكلة توقفت عند هذا الحد وهذا ليس صحيحاً بالمرة ، فبالرغم من أنه لا يحب الصلصة الحمراء فهو من هواة شرب عصير البرتقال المدمم ، ولا أدري هل يتخيل دمائنا عصير برتقال حتى لا يصاب بالقرف وهو يشربها أم يستعيض عن فيتامين الصلصة الحمراء بهذا العصير البرتقالي الدموي؟

كما إنه يعشق سمكة الحيسمون ، لالالا مش الحيزبون الحيسمون يا عزيزي القارئ ركز بقى ، لاهو انت ماتدراش؟ دي طلعت عقبال أمالتك كدة مش كاوتش بوكليت بين قوسين مش بيض ولا حاجة ، دي يا سيدي سمكة ضخمة حمراء كانت تأتى له هدية وتوجد فى شرم الشيخ ، وهنا أتوجه بالشكر لكاتب المقال لأنه عرفنا ماهي هذه السمكة العجيبة التي لم نسمع عنها من قبل كما أتوجه بالكلمة للرئيس المخلوع قائلة: بقى ياراجل تاكل سمكة الحيزبون دى وسايب شعبك ياكل من الزبالة؟ ، طب حتى كنت صورتهالنا وأهو الشعب يبقى شاف الحيزبون قبل ما يموت

من الآخر المقالة عايزة تقولنا إن مبارك ده راجل غلبان أوي وإننا ظالمينه وإنه عايش فى فيلا ضيقة أوي وثورجي من يومه وبيحب الشعب ومافيهاش حاجة خالص لما يسرق مصر ماهي بتتسرق من أيام الفراعنة وهتفضل تتسرق عادي يعني ، مزعل نفسك ليه يا شعب ، أما أنتوا شعب مفتري بصحيح !ا

فِىْ هِجَاءِ الْمَوَاعَينَ

2011-06-13T06:51:00.000-07:00

الحِلّةُ وَالِطّاسَةً وَالرّغَاوِيّ تَعْرِفُنِيْ

وَالْمُعَلَّقَةِ وَالْسَّكِينَةُ وَالمِغُرَفةً وَالْطَّبَقِ

عائلة الأستاذ شلش

2011-06-12T04:06:00.000-07:00

شكراً للثورة التي رحمتنا من البرامج والمسلسلات التي لا معنى لها وجعلت التليفزيون أخيراً يقوم بإعادة الكنوز التليفزيونية مثل مسلسل عائلة الأستاذ شلش ، بطولة صلاح ذو الفقار - ليلى طاهر ، إنتاج 1985

المسلسل كان مقرر علينا فى الطفولة ، دائما ما يأتي ودائما ما نستمتع ، حتى إننا أصبحنا نعرف أعمارنا وأجيالنا من خلال المرحلة العمرية التي شاهدنا فيها هذا المسلسل ، كنت من موليد 1986 لذلك أتذكر إننى شاهدته فى الطفولة المبكرة جداً ، أولى إبتدائي بالكتير ، وجدت على تويتر من شاهده وهو فى الإبتدائية ومن شاهده وهو فى الإعدادية ومن شاهده وهو فى المرحلة الثانوية !ا

وكالعادة كلما شاهدت مسلسل قديم تجد أن نظرتك أيام الطفولة مختلفة إختلاف كلي وجزئي عن نظرتك وإنت كبير ، قوت القلوب على سبيل المثال ، سكرتيرة الأستاذ شلش ، كانت فى نظري تجسيد بشري لكلمة ( ست وحشة ) .. ليه وحشة؟ .. عشان قليلة الأدب ، وعندما أشاهد المسلسل هذه الأيام أجد إنها ليست قليلة الأدب على الإطلاق ، بالعكس دي الأدب نفسه مقابل ما شاهدنا فى السنوات الأخيرة على شاشات التلفزة

هو فعلا مسلسل عائلي بمعنى الكلمة ، لا فى إسفاف ، ولا رقاصة وبترقص ، ولا كلمات خارجة ، ولا يعاني من المط والتطويل كما يحدث فى مسلسلات رمضان .. يناقش مشاكل أسرية لا يخلى بيت منها بطريقة بسيطة جدا ومسلية فى نفس الوقت

لذلك كله شكراً للثورة ، وأتمنى أن تكتمل الثورة حتى يعيدوا إذاعة مسلسل هند والدكتور نعمان ، وكارتون الفواكه والقط فليكس ودلفي وبابارو فيل خرطوموه طويل

عموماً إن كنت مثلي من جمهور هذا المسلسل العائلي الجميل فأدعوك لمشاهدته مرة أخرى وأنت كبير .. يعرض على قناة النيل كوميدي الساعة 8 مساءاً والإعادة الساعة 3ونص فجراً ، وإن لم تكن تعرف من هو شلش أصلا فأدعوك لتشاهد وتستمتع ، كفاية رغي بقى احسن صوابعي وجعتني ... قطيعة ... ماحدش بياكلها بالسااااااهل

التوقعات المرئية فى إمتحانات الثانوية العامة الثورية

2011-06-11T16:29:00.000-07:00

السؤال الأول : ـ
أكتب فيما لا يزيد عن 5 صفحات قصة طالب مثالي كتب قصيدة حبلوصية فريدة من نوعها ، مع توضيع مواطن الحبلصة فيها وذكر معنى كلمة حبلص وما إذا كان مشتقة من كلمة حبلظلم أم لا؟!ا

السؤال الثاني : ـ
إختر الإجابة الصحيحة من بين القوسين :ـ

ـ الفرق بين إنتهاكات شرطة مبارك وإنتهاكات الشرطة العسكرية ..... ( إنتهاكات شرطة مبارك مرفوضة شعبياً - إنتهاكات المجلس العسكري مبررة ومقبولة - يعني ايه إنتهاكات؟ )ا

ـ المجلس العسكري لا يتقبل النقد كحاكم سياسي لمصر لأنه..... ( خط أحمر - حامي الثورة - يعني ايه نقد؟)ا

ـ محاكمة المدنيين فى محاكمات عسكرية ومحاكمة مبارك وعصابته فى محاكمات مدنية لأن ..... ( المدنيين بلطجية ويستاهلوا - مبارك ضغطه بيعلى وأعصابه ماتستحملش يتحاكم عسكرياً - يعني إيه عسكرية؟ ) ا

ـ الدكتور يحيى الجمل مازال نائبا لرئيس مجلس الوزراء لأنه ..... ( طود راسخ - طود راسخ - يعني ايه طود؟)ا

ـ حسني مبارك مازال فى شرم الشيخ لأنه ..... ( سيدكم وتاج راسكم - عنده حساسية من النوم ع البورش - يعني ايه شرم؟ ) ا

ـ تعتبر المرأة الغير إخوانية ..... ( درجة أدنى - من ع الرصيف - يعني إيه مرأة؟ ) ا

ـ الإخواني الذي يتزوج من إمرأة غير إخوانية يصبح ..... ( فلوطة - مش راجل - يعني ايه يتجوز!! ) ا

ـ أغنية شهداء 25 يناير ماتوا فى أحداث يناير تقدم ..... ( معلومة جديدة - معلومة مفيدة - يعني ايه يناير؟ )ا

السؤال الثالث :ـ
إعرب ما تحته خط في العبارات التالية :ـ

ـ أنا كنت جزء من النظام كنت بسرق الجبنة من ورا أمي وهي تتهم أبويا ان هو اللى أكل الجبنة ، مصر بتتغير وانا كمان ، انا من دلوقتي هاسرق حلاوة

الشهيد المجهول

2011-06-10T16:46:00.000-07:00

أنا مصري

لا يهم إسمي ولا لبسي ولا عنواني

انا مصري وبطاقتي بلون علمي

أبيض يوم ما إتولدت

إسود يوم ما اتظلمت

أحمر يوم ما اتقتلت

الصورة بعدسة أحمد عبد الفتاح

إهمال طبيب

2011-06-09T03:01:00.000-07:00

إهمال طبيب .. كلمة بسيطة من كلمتين لكن ما أصعب عواقبها وأشد خطورتها ، نانسي الفقي ليست الأولى ولا الأخيرة التي توفت بسبب هذه الكلمة ، دخلت نانسي الزوجة والأم لطفلين حاملة طفلها الثالث بين أحشائها فخرجت من المستشفى محمولة إلى قبرها .. والسبب؟ إهمال طبيب

مات طفلي الأول فجأة بسبب سكر الحمل الذي لم يهتم الدكتور المتابع بالمتابعة الدقيقة والأمينة للحالة وأنقذني الله وحده من موت محقق .. والسبب؟ إهمال طبيب

دخلت غرفة العمليات للولادة القيصرية للمرة الثانية وخرجت منها أصرخ من الألم بدون أي مسكنات ثم آلام شديدة فى الرأس والرقبة وإنخفاض ضغط والمستشفى لم تكلف خاطر أي من الدكاترة ليتابع الحالة بعد الولادة أو حتى يرحمني من آلام العملية ويعطيني مسكن .. والسبب؟ إهمال طبيب

تعب أبي ودخل المستشفى منذ خمس سنوات ، التشخيص خاطئ - إرتفاع فى السكر والضغط - كام ساعة ويخرج ويبقى زي الفل ، بعد ثلاث سنوات من التدهور السريع نفاجئ إن التشخيص السليم للحالة هو جلطة فى المخ تُركت ولم تعالج منذ 3 سنوات مما أدى إلى ظهور ماء بالمخ يصعب علاجه لإن الحالة متأخرة ، يعيش الآن بجسد عاجز وفاقد معظم وظائفه الحيوية من كلام ومشي وبصر ، تحول من جلطة فى المخ يسهل علاجها إلى إنسان مشلول يعيش بين الحياة والموت وهو لم يتعدى الـ65 عام .. والسبب؟ إهمال طبيب

ما حدث لنانسي ولي ولأبي ولكثيرين غيرنا يحدث بشكل متكرر فى مصر والسبب هو إهمال فى محاسبة الطبيب المهمل ، دائرة لا نهائية من الإهمال .. وإذا راود ذهنك سؤال بسيط: فى بلادنا لما لا نحاكم الطبيب الذى أهمل؟ .. فستجد الإجابة أبسط: مش لما نعرف نحاكم قاتل زهرة شباب مصر الأول نبقى نحاكم الطبيب؟!!ا

كاميكاز يقابل حبلص

2011-06-08T14:04:00.000-07:00

كاميكاز: أعزائي القراء الحلوين المنورين ، انا النهاردة هعمل حوار مع رجل القصيدة الأول ، الطالب المثالي .. حبلص

حبلص: ميرسي ميرسي

كاميكاز: إزيك ياعم حبلص

حبلص: ما تحترم نفسك ياض

كاميكاز: ياعم ده إسمك

حبلص: آه أيوة إفتكرت .. أهلا أهلا

كاميكاز: قالولنا إنك الطالب المثالي ، الكلام ده صحيح؟

حبلص: آه جدا

كاميكاز: طيب يا فندم كنت جايب كام فى الثانوية العامة على كدة؟

حبلص: يووووه ما تعدش .. 50% بحالهم

كاميكاز: لا متفوق متفوق يعني

حبلص منتشياً من الفرحة: أهو

كاميكاز: طيب يا حبلص مشاهدي البرنامج يحبوا يسمعوا منك القصيدة الأخيرة بتاعتك .. أيوة اللى مالهاش لازمة دي .. إتفضل المايك معاك

حبلص: آه طبعا حاضر .. إحم إحم

ياللي بتتريق علي البوليس اكيد انت اخو ابليس

بكره أبو دبوره و شورت و كا ب حيخلو عيشه اهلك هباب

مع ان الشورت ده مش لبسنا ده لبس اللي زيك من الكلاب

واقف ترقص و عامل فرحان و انت بتشتم اللي بيحرسوا الاوطان

لو كنت راجل بحق و صحيح ما كنتش غلط فينا و انت بتصيح

لكن الشرطه يبني حرقاك لانها دايما معلمه علي قفاك

اكيد انت حرامي فراخ او قعدت في يوم علي المنفاخ

مهما يبني تلف و تدور ضباطنا يبني نور علي نور

مهما تقول انت و جمال مروان اللي ابوه جاسوس و بتاع نسوان

جنفضل نحميكي يا مصر يا غاليه مهما قالوا عملاء الامريكان

و دي رساله مني ليك قبل ما تموت و تغمض عينيك

كاميكاز أوغمن عليه فى نص القصيدة وبيحاولوا يفوقوه

اتقي الله يا واطي في بلادنا دول ضباطها سيادك مش لعبه في ايديك

ماسك جيتار يا خسيس اش فهمك انت في البوليس

كبيرك تعاكس الحريم او تاكلك شويه برسيم

لكن تتكلم عن الرجاله دي واسعه عليك يابو رياله

العيب مش عليك يا فكيك ده عيب ابوك اللي نسي يربيك

لو دخلت الشرطه أي يوم حتهرب ملط من غير هدوم

الشرطه دي فخر و صيت و انشأها الفاروق يا عبيط

كفاياك يا بني تنطيط و اسرحلك ببيض و صميت

احنا عايزين اعتذار من الرجاله مش الرقاصين الزباله

لو غلط فيه اللي اسمه رامي أكيد حعتيره زي أي حرامي

مش عجبك مباحث الآداب أكيد ماما هناك يا كداب

عامه يا بني جاموس اللي زيك بيعبد الفلوس

اخر كلمه حقولهالك الحق شوف اللي حيجرالك

كاميكاز فاق أخيرا: ايه ده .. انا فين .. الترجيع ده شعر يا كابتن؟

حبلص: طبعا أومال انت فاكر ايه .. ده شعر وموزون كمان

كاميكاز: موزون مين يا كابتن ، ميزانكوا بايظ .. إبقى إوزن برا بعد كدة ، بس ماتقولهومش إنك حبلص لايزبطوك

حبلص: يزبطوا مييييييييييين .. ده أنا أوول حبلص أوول ذا تايم

كاميكاز: حبلصوا عليك ساعة وسكتوا يا بعيد .. طب بالنسبة لثقافة حضرتك العامة ، هل وصل لمعلوماتك إن الثورة قامت وإن الحكومة مشرفة طرة ووزير داخليتك هيتعدم والحوارات دي؟

حبلص: ثورة؟ ثورة ايه انت بتصدق؟ .. بقولك معلمين عليهم تقولي ثورة؟

كاميكاز: انا سمعت انهم هيقدموا فيك بلاغ للنائب العام عشان شتمت الشعب المصري وكدهوك

حبلص: ولا يهزني وهفضل أشتم برضه .. انا اتعلمت أشتم بس أصلا

كاميكاز: فالنكتفي بهذا القدر أعزائي المشاهدين من الكلام مع هذا الكائن الحبلص ، وانا من هذا المزنق أتقدم ببلاغ للنائب العام لركاكة هذه القصيدة مع طلب حصول سليمان عيد على جائزة أحسن قصيدة حبلصية فى التاريخ

المتهم بيصيف

2011-06-07T02:03:00.000-07:00

جاء يهودي إلى أمير المؤمنين ( عمر إبن الخطاب ) ليشكو له ( عليّ بن أبي طالب ) فى دين أو نزاع بينهما ، وكان إمام المتقين (عليّ) يجلس إلى جوار (عمر) ، فحرص العادل (عمر) على أن يساوي بينه وبين خصمه فى مجلس القضاء، فطلب منه أن ينهض من جواره ويقف إلى جوار خصمه لكي يتحدث كل منهما بما عنده قائلاً له: ساو خصمك يا ( أبا الحسن ) . فظهر علامات الغضب على وجه (عليّ) ، ونهض فوقف إلى جوار اليهودي ، وعرض الرجل ادعاءه .. وعرض (عليّ) دفاعه، فقضى (عمر) بينهما بما رآه عدلا ، وبعد إنصراف المدعي راضياً ، سأل (عمر) (عليّ): أكرهت أن تساوي خصمك يا (عليّ)؟ فأجابه إمام المتقين عاتباً: بل كرهت أن تميزني عنه فتناديني أمامه بكُنيتي ( يا أبا الحسن ) !

أين لبلادنا بعدل (عمر) وتقوى (عليّ) وأم الشهيد تعيش فى نار وقاتل إبنها يطفئ نار الصيف فى شرم الشيخ؟!!!ا

إنه خالد وسعيد

2011-06-05T15:16:00.000-07:00

رأيت خالد سعيد بعد وفاته فى المنام

دار بيني وبين أمه حوار لا أذكر تفاصيله

لكنها كانت تؤمن أنه مازال على قيد الحياة

أشارت إليه وقالت لي: شوفي شكله حلو إزاي؟

كان نائماً فى سكينة وهدوء

ليس به خدش واحد

وجهه أبيض ورائق وجميل

النور الذي يشع من جسده أضاء ظلمة المكان

كان مثل القمر فى ليلة تمامه

هاتف

2011-06-05T15:09:00.000-07:00

ﻻ ﺗﺸﻄﺐ ﺃﺳﻤﺎء ﺃﺻﺪﻗﺎﺋﻚ ﺍﻟﺸﻬﺪﺍء ﻣﻦ ﻫﺎﺗﻔﻚ ﺃﺑﺪﺍﹰ، ﻓﻘﺪ ﻳﺘﺼﻠﻮﻥ ﺑﻚ ﻟﺴﺆﺍﻟﻚ ﻋﻤﺎ ﻓﻌﻠﺖ ﻣﻦ ﺃﺟﻞ ﻣﻄﺎﻟﺒﻬﻢ

ﻣﺮﻳﺪ ﺍﻟﺒﺮغوثي

سهوكة

2011-06-04T16:01:00.000-07:00

والست من دول تبرق لجوزها وتقوله بحسم: طب لو راجل تطلقني!!!ا

وأول ما يقول: روحي وإنتي .....ا

تجري عليه وتقوله بسهوكة: وأهون عليك يا أبو نسمة؟!ا

بعد الثورة .. المحترم يكسب

2011-06-03T13:43:00.000-07:00

يسري فودة .. أعرف هذا الإسم وأسمعه من بعيد لبعيد قبل الثورة ، أعرف إنه مقدم برنامج سري للغاية .. وأحفظ طريقته فى مقدمة البرنامج المحفذة والموحية بجدية موضوع الحلقة وأهميته وخطورته فى نفس الوقت .. وفقط ! ، لا أعلم عنه شئ آخر وليس مطروح بأي شكل من الأشكال قبل الثورة

بعد الثورة ظهر يسري فودة .. وأتسآل وانا أشاهده بإمعان وتركيز شديد .. أين كنت قبل الثورة ؟ وأصاب بإندهاش شديد عندما أعلم إن برنامجه الرائع ( آخر كلام ) بدأ قبل الثورة بعامين وأنا لا أدري

المشاهد المصري يستحق إعلامي بحجم يسري فودة وليس بحجم تامر أمين أو خيري رمضان وغيرهم ممن فرضهم علينا النظام السابق ، نحن نستحق إعلامي ينحاز للحق والحقيقة وليس كما يريد صاحب المحل، إعلامي يتحرى الدقة والوضوح فى نقل المعلومة والتوازن والموضوعية فى طرح القضايا ، إعلامي دارس بجد ، يذاكر للحلقة بجدية قبل أن يطل علينا .. ليس ممن يصلون الى الشاشة عن طريق الفهلوة أو المحسوبية ، يتحدث اللغة العربية بإتقان ليس مثل ممكن لوثوا آذاننا بلغتهم الركيكة وتسببوا فى فقع مراراتنا كلما سمعناهم وشاهدناهم صباحاً ومساءاً وقبل الأكل وبعده

يكفي أن تتابع إختيار يسري فودة لضيوفه لتعلم لما أحبه المشاهد كثيراً ، يكفي أن تشاهد حلقة السباعي أحمد السباعي كبير الأطباء الشرعيين السابق وانت تعلم مهمة الإعلام الوطنية فى كشف القناع عن وجوه قبيحة كانت أحد أسباب خراب هذا البلد .. لأول مرة يتعامل المشاهد مع إعلام إيجابي يحترمه ويفيده ويفيد بلده ، يتحدث بلسان المشاهد ويفكر بعقله ويقول كلمته
-

ميزة أخرى من ميزات يسري فودة هي أنه يتحدث ويتحاور مع الجميع بنفس القدر من الإحترام والمهنية .. المسؤل والمواطن العادي .. العالم والأمي .. الكل عنده سواء والكل له حد واضح من الإحترام الإنساني

يحدث مع البرامج اليومية فى العادة حالة من الإتحاد مع المذيع المحبوب .. فتعتبره جزء من يومك، صعب أن تنام دون أن تشاهد برنامجه صاحب الميعاد المتأخر .. ورغم علمك بأن متابعتك لهذا البرنامج وحبك لهذا المذيع قد تتسبب فى تأخرك فى الذهاب لعملك فى الصباح الباكر إلا إنك تظل تتابعه مسلوب الإرادة منساق لحب وتقدير كبير وإحترام أكبر

سبب آخر مَيز يسري فودة عن أي إعلامي آخر ألا وهو قربه من جمهوره أكثر وتواصله معهم عبر الشبكات الإجتماعية مثل تويتر ، حيث كسر الحاجز الزجاجي بين الإعلامي والمواطن العادي .. أصبح مثلنا .. نعمله ريتويت .. نرد على كلامه .. نعمله هاشتاج عشان يتجوز بقى ويخلصنا ! ، وعندما تبدأ الحلقة نتابعها ونعلق عليها كأننا نشاهد أخ لنا أو صديق على الشاشة وليس مجرد صحفى تليفزيوني .. فنركز فى لون الكرافات .. شكل البدلة .. صوته الرخيم وهو يقول ( طيب ) .. الضحكة الخبيثة أحياناً .. مقدمة الحلقة التي تشعرك إن هناك شئ غامض ينتظرك .. براعته فى إلقاء شعر أمل دنقل .. الردود على ما نرسله له على تويتر أثناء الحلقة .. كل ذلك وأكثر يحدث كل يوم

صعب جدا المقارنة بين إعلامي مثل يسري فودة والمسوخ الأخرى من تلاميذ النظام السابق .. كأنك بالضبط تقارن بين الحق والباطل .. بين الصدق والكذب .. بين الحر والعبد ، وفى نهاية هذا البوست المتواضع لا أملك سوى أن أطالب بتبكير ميعاد عرض هذا البرنامج الرائع وأن أتوجه باللوم والعتاب للأستاذ يسري فودة وأقول له: مش معقول يعنى أرفعلك القبعة بعد كل حلقة بجد .. هيجيلي برد كدة

تاج الثورة

2011-06-02T15:40:00.000-07:00

أين كنت أثناء مظاهرات 25 يناير؟
كان يوم عيد ميلادي وكنت فى البيت عشان كنت لسة نفسة – لسة والدة يعني – معظم صحابي على تويتر شاركوا

هل كنت تتوقع أن تؤدي هذه المظاهرات لثورة؟
بصراحة لأ ، أكذب يعني؟ .. دايما في مظاهرات وعمر ما في حاجة حصلت ، اليآئسين بيشجعوا مصر وإحنا معاهم

ماذا فعلت وقت إنقطاع الإتصالات والإنترنت؟
دمار دمار دمااااااااار .. كنت حاسة بإمتهان شديد ، والغلاسة بقى إن بعد ما الإنترنت رجع الكمبيوتر باظ وما اتصلحش إلا يوم تنحي مبارك .. وعجبي

ماذا كان رد فعلك بعد إعلان تنحي مبارك؟
انا طلعت فى البلكونة أزغرط والله

ما شعورك تجاه إستمرار وجود مبارك فى شرم الشيخ؟
قلة أدب وسفالة وقلم كبير على قفا كل مصري ، مبارك مش أهم من أي حد فينا .. مبارك زيه زينا .. العدل هو الأساس

هل إتفاجئت بحجم فساد النظام السابق؟ وضح؟
انا كنت عارفة إن في فساد بس مش للدرجة دي خالص .. فعلا اتخضيت ونفسيتي تعبت من حجم السرقة والنهب والبلاوي الزرقا اللى كانت بتتعمل فى البلد دي .. حسبنا الله ونعم الوكيل

هل غيرت الثورة شئ ما فى داخلك؟
طبعااااااا ، بقيت أجرأ فى الحق وقادرة أعبر عن رأيي بحرية من غير ما أخاف ، بقيت عاملة زي اللى كان طول عمره مفهمينه إنه أخرس وهو مصدقهم ومرة واحدة إكتشف إن عنده صوت ويقدر يتكلم براحته

هل لديك تفسير للإنفلات الأمني؟
الإنفلات الأمني غير مبرر ومالوش معنى غير إن الشرطة عايزة ترجع زي أيام العادلي وده اللى مش ممكن أبداً

مصر رايحة على فين؟
رايحة على كل خير إن شاء الله ومسيرها تروق وتحلى

فى رأيك من هو " أحد قيادات الجيش " الذي يتصل دائماً ببرنامج (آخر كلام)؟!!!!ا
إحم .. أنا ايه اللى جابني هنا؟!!!ا

-

بمرر التاج ده لكل المشاركين فى حملة التدوين اليومي وأي حد تاني يحب يجاوب عليه يتفضل

تسمح لي أحرجك وأسألك

2011-06-01T15:13:00.000-07:00

إختر الإجابة الصحيحة من بين الخيارات التالية: ه

ماذا تفعل إذا علمت أن الشرطة العسكرية قد قامت بالكشف على عذرية أمك؟ .. أمي أنا؟ أيوة أمك إنت!!ا

أ- إخرس قطع لسانك أمي طول عمرها عذراء

ب- أمي شريفة وما بتعملش ثورات

ج- خليهم يتسلوا

عزيزي القارئ .. فاكرني؟

2011-05-30T06:22:00.000-07:00

كاميكاز حبيبي .. سلامات ، كيفك كدة؟ إزاي الصحة؟ طيبون؟

انت مين ياست إنتى؟

إخص عليك يا كوكو خلاص نسيتني؟ ماكنوش كام السنة اللى نفضتلك فيهم دول .. عموما هفكرك ، انا اللى قعدت أرغي السنة اللى فاتت ومسكت ودانك وقعدت ألوك لوك فيها شهر بحاله ، يوم يوم .. حرف حرف .. زنجة زنجة

ايه؟ مالك؟ .. شايفاك كدة إتخضيت وزي ماتكون خايف من حاجة ، لا ماتخافش ده كل الحكاية إنى هرجع أدون يوماتي زي ما عملت السنة اللى فاتت بالظبط

يالهوي؟ حرام عليكي يا شيخة إنتى ماعنديكش كاميكازات صغيرين ولا ايه؟

إحم يلا ما علينا .. انا عارفة انك بتغلس عليا ومش قصدك كدة خالص وإنك منبهر ومندهش ومش مصدق نفسك من عبقريتي الكتابية الرهيبة ، مش كدة؟

لالالا انا ماقولتش كدة خالص بلاش تكتبي أحسن إلهـي ... ا

فجأة تقمصت دور مذيعين القناة الأولى لما بتحب تقاطع الضيف أول ما يلبخ ويخبط فى الحلل : أيوة أيوة فاهمة قصدك .. إنت طبعا تقصد تقولي ياريت أعملها طول السنة .. إنت عارف بقى مشاغلي بقى وكدة

لا بس أصل الصداع زيادة اليومين دول من حنفية الأخبار اللى مابتخلصش دي ومش ناقصة صداع الحكاية

يا شيخ خضيتني .. لا دي بسيطة خالص .. إشتري بنادول إكسترا!!! ، سيبونا ناخد فرصتنا بقى .. أكتب براحتي وابعبر عن مكنونياتي ويبقى الرغي للركب بقى وهييييه

مين ابن التيـــــت اللى فكرها بيا بس؟؟؟؟؟؟

ايه؟! تعالى هنا .. بتتنيل تبرطم تقول ايه؟

ولا حاجة ياست الكل .. ولا حاجة .. مدونتك ومطرحك

آه بحسب .. بعد بكرة من النجمة ألاقيك قاعد قدام باب المدونة مطرطق ودانك وغاسلها كويس ومتسني الدرر اللى هقولها .. آه وقبل ما أنسى .. طبعا مش محتاج أفكرك تنفض المدونة تنفضية العيد لإن حملة التدوين اليومي دي موسم وبتجي من السنة للسنة ومش عايزة الزباين وخصوصا عزيزي القارئ يجوا ويلاقوا المدونة متربة كدة .. وتنضف بزمة .. فاهم ياض؟ا

صوتي يا بهانة المجلس بيستعمانا

2011-05-23T07:22:00.000-07:00

لسة حاسة بالقهر ولوي الدراع بعد الثورة من المجلس العسكري .. إحنا عملنا ثورة عشان الشعب يكون له الكلمة الأولى ويتسمع كلامه ومايبقاش مهمش زي زمان .. بس للأسف إحنا لسة زي ما أحنا .. كل اللى حصل بس هو إنتقال للسلطة من مبارك للمجلس العسكري

كل اللى بيحصل دلوقتي مالوش غير معنى واحد بس .. إن إرادة الحاكم أهم وأقوى من إرادة الشعب وده اللى مش ممكن نرضى بيه أو نوافق عليه بعد الثورة تاني أبداً ، ناس كتير رفضت حكم المجلس العسكري للبلاد وطالبت بمجلس رئاسة مدني وماحصلش ، رفضنا وجود يحيى الجمل كنائب لرئيس الوزراء ولسة موجود لحد النهاردة ، قولنا التعديلات الدستورية مش هتنفع وقالوا لأ هي دي الصح وبعد ما خد موافقة الأغلبية عليها طلعولنا إعلان دستوري بـ60 مادة !

طب نخلي وضع الدستور الجديد قبل إنتخابات الرئاسة .. لأ برضه ، طب ليه التعديلات الدستورية من الأساس تتعمل فى غرف مغلقة ونجبر عليها .. مالكوش دعوة .. طب ليه تمشوا وزير الخارجية نبيل العربي الوحيد اللى خلى للمصري كرامة والشعب حبه وعمل مصالحة فلسطينية .. خليكوا فى حالكوا ، طب ليه بتحاكموا مبارك وحكومته والظباط اللى قتلوا المتظاهرين مدني وفى نفس الوقت بتقولوا على النشطاء بلطجية وتحاكموهم عسكرياً .. إطلعوا منها وهي تعمر .. طب حتى شاركونا فى صناعة القرار! .. إنت هتخرس ياض ولا أعورك؟

وما الثورة إلا عشة فراخ

2011-05-17T14:35:00.000-07:00

دي مش ثورة دي عشة فراخ

نحلق على فتحي سرور ، عائشة عبد الهادي تخرج

نهش مبارك ، سوزان تخرج

نجري ندخل سوزان ، زكريا عزمي يخرج

وعجبي

العيب فى الضَيّ

2011-04-21T06:48:00.000-07:00

وشي كذاب

عاملي فيها سعيد وبيضحك

بس عيني صادقة ومش عارفة تكذب

عيني دايماً بهتانة

شبكـة طبخ || عاجل || كوكيز الشوفان

2011-04-20T03:04:00.000-07:00

عزيزتي حواء الشقيانة .. أهلا بيكي معانا .. خالتك سوكا عايزة تكلمك النهاردة فى حاجة كدة لو ماكانش يضايقك يعني .. ايه بقى يا عزيزتي حواء؟ ايه؟ هو احنا هنقضيها ثورة كدة على طول ولا ايه؟ ماورناش مطبخ نقف فيه لحد ما رجلينا تنمل؟ .. يلا على المطبخ بسرعة منك ليها بدل ما ابلغ فيكوا الشرطة المطبخية تجيبلكوا الجيش بدباباته تشيلكوا هيلا بيلا وتعذبكوا فى المتحف المصري

بصي يا حواء يا حبيتي .. هكلمك النهاردة على حاجة مهمة جدا ودايما بنهملها ، وجبة الفطار .. عارفة هتقوليلي مش بفضى آكل وبأكل العيال وأجري ع الشغل والحوارات دي .. مش مشكلة .. انا ياستي جبتلك أكلة سهلة خالص ولا هتاخد منك وقت فى العمايل ولا وقت فى الأكل والأهم إن فوايدها الصحية كتيرة جدا جدا جدا .. ده غير انها تنفع اوي مع اللى بيصحى يروح الشغل جري وماعندوش وقت يقف يحضر أي حاجة اكتر من كوباية الشاي وإقلب

تعرفي حاجة إسمها شوفان؟ سمعتي عنها طيب؟ .. الشوفان ده ياستي يعتبر من الحبوب بس هو بيتزرع وده شكله .. الشوفان ده مفيد جدا جدا وغني بالكالسيوم والبوتاسيوم والماغنسيوم .. يعتبر من مهدئات الأعصاب ومضاد طبيعي للإكتئاب والقلق والإضطرابات العصبية والإرهاق ، ولكثرة ما يحتويه الشوفان من ألياف بيحمي من سرطان الأمعاء ، ده غير إنه بيحافظ على معدلات الكوليسترول والسكر الطبيعية فى الدم

هتلاقى الشوفان فى السوبر ماركت فى نوع مشهور منه إسمه كويكر، بس فى أنواع تانية كتير برضه .. دوري كويس فى السوبر ماركت الكبير وانتى تلاقيه بلاش كسل ، المهم ان كان عندي شوفان ومش عارفة اعمل بيه ايه ، ايوة اللى فى الصورة ده .. بتقولي ايه؟ إشتريته ليه؟ .. أبداً ، كان عليه عرض فجيبته .. وانتى عارفة اى حاجة عليها عرض وسعرها حلو نجيبها الأول وبعدين نشوف هنعمل بيها ايه !! .. وفى يوم من ذوات الأيام يا حواء يااختي شوفت حلقة فى برنامج فتافيت عن كوكيز الشوفان والنخالة .. لاقيت طريقتها سهلة خالص وقررت أعملها .. النخالة اللى هي الردة على فكرة .. والطريقة هنا والفيديو هنا مافيش داعي اكتبهم تاني بقى

تعالى هنا رايحة فين؟ .. خدتي الوصفة وادتيني ضهرك وماشية عادي كدة!!!؟ مش بتكلم انا؟ .. احم .. بصي يا ستي .. هما كاتبين فى الوصفة إنها بالردة وانا مش عندي ردة ، أعمل ايه يعني؟ .. أغلب؟ .. ماعملش الكوكي يعني؟ .. يوستحيل .. الشيف قالك إتصرف يبقى نعملها من غير ردة .. كاتبين بالسكر البني وانا مش عندي ماعملهاش برضه؟ .. مايصحش .. بلاها سكر بني

كمان كاتبين السكر كوب وانا حطيت نص .. وطلع حلو برضه الحمد لله .. وكاتبين ½ كوب شراب البانكيك بس ما وضحوش ايه هو الشراب ده وبيتجاب منين وبتاع ايه .. بس انا إستبدلته بعصير تفاح بس ربع كوب بدل نص لأني مش حاطة نخالة ، وقال على رأي المثل: عزيزتي حواء الشطورة تغزل بورك عصفورة

انا عملته بالدقيق الأسمر .. لو لاقيته فى السوبر ماركت هاتيه .. مش غالي ومفيد أوي خصوصا لو بتعملي ريجيم او بتحافظي على وزنك .. ماجربتوش بالدقيق الأبيض .. لو جربتيه إبقي قوليلى يا عزيزتي حواء إلهي يسترك

المهم انى عملته ماخدش بالظبط 10 دقائق عمايل لانه مش محتاج يخمر ولا حاجة .. ولما دوقته عجبني أوي لانه بيشبع خالص ويخليكي صامدة لحد الغدا حتى لو هتتغدي بالليل .. واضح ان فيتامين الفوليزم واخد إعارة فى الكوكيز دي، فى طرق كتييييير للكوكيز ده بس الطريقة دي عجبتني عشان سريعة

اكتشفت كمان انه بيعمل أحلى دماغ ، انا متأكدة انك بعد ما تاكلي منه وتشوفي نشرة الاخبار او اى جرنال هتلاقى أول خبر مكتوب فيها: عاجل | كوكيز الشوفان أحلى من البتنجان وتقعدي تضحكي كدة من غير مناسبة كمان .. حلو السجع ده ! ، ده شكله بعد ما خرج من الفرن ، لونه فاتح شوية عارفة عشان ماحطيتش سكر بني زي الوصفة ما بتقول ، نعم؟! بتقولى ايه سيادتك؟ سمعيني صوتك كدة .. شكله مش عاطفي؟!!!! .. احنا هناكل ولا هنتعايق وبعدين إنتى مالك أصلا و.... إحم ، نسيت إنى فى المدونة ، لا يا عزيزتي ده هو بس اللى شكله كدة لكن طعمه جباااااار ، وماتنسيش المثل اللى بيقول: ياما تحت السواهي دواهي

وفى ختام كلامي لعزيزتي حواء اللى عاملة ريجيم او عايزة تاكل أكل صحي أو حامل او عندها سكر او خايفة من سكر الحمل او مش فاضية تفطر الصبح أتمنى انك تجربيه وتقوليلي رأيك .. ايه؟ مين بينادي؟ عزيزي آدم؟ .. ايوة يا عزيزي آدم عايز إيه؟ عايز حتة؟ أنا عاملة الكوكيز دي لعزيزتي حواء دلوقتي .. إنت إسمك عزيزتي حواء؟!!!ا

أنا الشعب

2011-04-13T03:29:00.000-07:00

3 نوفمبر 2009 كنت خارجة من المستشفى بدون طفلي .. تحيطني العيون الباكية والقلوب المتأثرة والمعذية .. كنت أنظر لهم بلا مبالاة مُدعية الفرح قائلة: " الحمد لله .. إترحم من عهد مبارك " ، دائماً ما كانت تقابل هذه الكلمات بإندهاش واضح وصريح وكأن لسان حال المُتلقي يقول: هما ضربوها على دماغها وهي بتولد ولا ايه؟ الولية إتجننت

5 يناير 2011 خرجت من المستشفى مُنهكة .. الكل يبتسم ويهني وانا أموت فى الثانية ألف مرة من الإعياء .. بعد 20 يوم فقط من ولادة إبني الثاني (أنس) خرجت الثورة فى يوم ميلادي الذي كان فى يوم عيد الشرطة سابقاً عيد الثورة حالياً ، عندما أخبرت أصدقائي على تويتر أن يوم الثورة هو يوم ميلادي .. أجابني أحدهم : السنة دي هديتك مصر .. وكان راجل بمعنى الكلمة وحقق وعده

بعد سنتين من إنطفاء أول فرحتي عادت الفرحة .. عوضني الله بطفل آخر وعهد بلا مبارك فى آن واحد ولله الحمد .. والعجيب فى الأمر أن الطفل الجديد كان لا يكف عن البكاء إلا على أصوات الهتاف التي أظل أرددها له حتى يذهب فى النوم .. تغيير .. حرية .. عدالة إجتماعية .. يهدأ قليلاً ثم يصرخ معلناً عن حقه فى تغيير البامبرز فأغيره له وينام

ظلت غصة فى حلق أم الشهيد وهي القصاص العادل ، لم نكف عن الإبتسام والفرحة ونحن نرى فيديوهات ترحيل الحرامية لسجن طرة فنظل طوال اليوم نغنيها ونهلل عليها وكأنها رقصة العمر والفرح كله .. عندما يبكي أنس - إبن الثورة - نهرع إليه لإقافه عن البكاء ولساننا يردد : زكريا عزمي .. حراااااااااااااامي .. فيسكت ، ويذبهل ويندهش ثم يضحك فى الآخر

أتذكر كل ذلك الآن ولا أتمالك دموعي من الفرحة وحمد الله على كل شئ ، من فرحتي بخبر حبس مبارك وولاده حاولت تعلم التورتة لتكون حلاوة حبسهم .. بس بصراحة مش قيمتهم خالص وخسارة فيهم بجد .. إن شاء الله هتعلمها لما أنس يكبر عشان ياكل منها وأحكيله على مبارك وبلاويه

كان ياما كان

كان في حاكم فسدان

إسرائيل مسلطاه علينا

هو وماما سوزان

قتلنا كلنا

كُبار وصغيرين وشُبان

حرمنا بجد من كل حاجة

حتى الإحساس بالأمان

حكمنا على حكمه بالنهاية فى الميدان

والحمد لله عشنا لحد ما شوفناه

هو وولاده فى اللومان

وسمعنى أحلى سلام مصر تتحدث عن نفسها وتقول:

كايدة العُزال أنا من يومي .. إيوة آه

لولولولولولوليييييييييييي

وشرم رجعت سالمة لينا وشرم اليوم

تن تن تن تن

شرم اليوم فى عيييييييييد

هيييييييييييييييييييييييييه

قول للغريب

2011-04-05T01:25:00.000-07:00

قول للغريب حضنك هنا
دربك قريب من دربنا
بيتك هنا

اهلك هنا
حزن البشر دا حزننا

قول للغريب فرجه قريب
بكره القلوب تفتح لنا

عالم صغير بيضمنا
يرسم و يمحى اسمنا
نتلاقى فيه من غير معاد
ونسير بعاد من غير بلاد
قول للغريب بكره قريب
عالم صغير على قدنا
قول للغريب حضنك هنا
دربك قريب من دربنا
بيتك هنا اهلك هنا
حزن البشر دا حزننا

اقرأ أيضاً

إبتسامة الغريب

عودة الندل: كاميكاز مُفجر الثورة

2011-03-29T04:47:00.000-07:00

كاميكاز كبر وإتخرج من تحت إيدي .. قصدي اتخرج من الجامعة وبقى صوحافي محترم فى جريدة قومية محترمة – سامحني يارب الكذب حرام – ما علينا ، كاميكاز بعد الثورة أتنفخ وإتنفش وعمل فيها سبع رجالة فى بعض وكل ما يمشي ويلاقي بوستر للثورة يشتريه جري ، إذ فجأتن بقى ثورجي وعاشق لميدان التحرير – الله يرحم زمان ماكنش يعرف يعني ايه تحرير أصلا – بعد الثورة كاميكاز بقى من أكبر المتحولون .. مرة واحدة إتحول زي مازنجر وبقى ولا جيفارا فى زمانه

بعد ما مبارك اتنحى بكام يوم كاميكاز روح البيت وهو وماسك كمية بوسترات للثورة لا حصر لها بيقول لأمه وهو فرحان أوي: انا اللى فجرتها – انا اللى فجرتها !!!!ا

أم كاميكاز: فجرت ايه ياللى تنشك فى قلبك؟

كاميكاز: انا اللى فجرت ثورة 25 إبريل يا ماما .. إفرحي بقى

أم كاميكاز: يشفيك من الهبل يارب .. أولا دي كانت ثورة 25 يناير يا أحول .. ثانياً انت كنت نايم ساعتها

كاميكاز: يا ماما احترميني بقى مش كدة .. ثم انا فاكر انى كنت صاحي ساعتها وقاعد ع السرير ، حتى بالأمارة كنت بهرش فى راسي وفاتح بقي ، وأول ما قالوا إن الريس إتنحى قولت هيه .. حصل ولا محصلش؟

أم كاميكاز: حصل يا آخرة صبري .. بس يعني عشان قولت هيه بقيت بطل خلاص؟ .. نسيت يوم الجمعة لما صحابك قالولك إنزل وقولتلهم لأ انا بحب الريس؟

كاميكاز: إحم .. ايه يا ماما لازمة الكلام ده بس دلوقتي؟ .. ظبطي موجة الراديو على المرحلة .. انا ضد الرئيس وطول عمري ضده ولما بشوفه فى التليفزيون بيجيلي حموضة

أم كاميكاز: الحموضة دي بتجيلك من كتر أكل السجق من عند حودة المعفن ... ثم انت مش كنت غاوي فرجة على سيد وسيدة ومصر توداي وبتفكر تقدم عضوية فى الحزب الوطني وكنت مقتنع تماماً ان فى جهات خارجية بتحرك الثورة وإنهم بيوزعوا أجندات وكنتاكي ببلاش فى الميدان حتى لما جه يوم وماطبختش فكرت تنزل تاكل كنتاكي هناك .. راح فين كلامك يا تييييت؟

كاميكاز: لالالالالا .. ايه اللي بتقوليه ده .. انا طول عمري ضد النظام وبكره حسني مبارك وجمال مبارك وحسن شحاته .. حتى إعتزلت القراءة ومكتبة الأسرة مخصوص عشان صورة سوزان اللى ملزوقة وراها .. انا وطني يا ماما من يومي ومولود فى ميدان التحرير كمان

أم كاميكاز: ناقص تقولي إنك مفجر ثورة تونس كمان .. كفاية كدب بقى

كاميكاز: ايوة يا ماما انتى مستقلة بإبنك ولا ايه .. طب مش محمد بوعزيزي اللى فجر ثورة تونس حرق نفسه؟

أم كاميكاز: آه

كاميكاز: أنا اللى كنت شاريله البنزين يا ماما وربنا

أم كاميكاز: رحمتك يارب .. مش كنت رحت ميدان التحرير بصحيح وإستشهدت وخلصت منك .. انت مستحمل نفسك إزاي كدة .. ثم انت مش كنت نزلت مظاهرة مصطفى محمود وأيدت الرئيس وشالوك على الأعناق كمان والكاميرات كلها صورتك؟

كاميكاز: أيوة بس انا كنت بهتف للإستقرار .. اصل الأنتخة ع السرير حلوة أوي يا ماما

أم كاميكاز: آه ماانت كبيرك تأنتخ .. فين محكمة الثورة عشان ياخدوك وأرتاح من كدبك

كاميكاز: لااااااااااااااا .. منا لما فجرت الثورة دي بقدارتي الفذة ماقولتش إنى عايز محكمة ثورة .. والحمد لله سمعوا كلامي وماعملوهاش .. عقبال ما يسمعوا كلامي ويرشحوني لرئاسة الجمهورية بقى .. قولي يارب

وما أن نطق آخر كلمة حتى إنهال عليه شبشب أمه عابراً قارة الكنبة راشقاً فوق نافوخه .. أحسن!

استقروا يرحمكم الله

2011-03-23T05:27:00.000-07:00

كلما سمعت كلمة: انا صوتت بنعم عشان الإستقرار ، وقبل منها: ربنا يستر بقى خلى البلد ترجع تستقر زي ماكانت .. أتحسس لساني وآخذ فى وصلة دعاء مستمرة على الرئيس المخلوع مبارك لما فعله فينا

هذا الرجل الذى شربنا الإستقرار بالمعلقة لمدة 30 عام .. إستقرار عائم فوق بركة من العفن والفساد والسرقة والقتل والتعذيب والغش والفساد السياسي والإذلال والإبتذال وكل ما شئت من معاني مهينة جعلت المصري يعيش فى بلده وخارج بلده بلا كرامة ، بلا حقوق ، بلا معنى ، بلا لازمة

مبارك شربنا الإستقرار لحد ما اتكرعنا .. أدمنا الإستقرار .. أصبحنا نعيش ونتغذى على الإستقرار ، نشربه شرباً ونأكله أكلاً .. مرة بالجبنة ومرة وباللحمة ومرة بالصلصة ، ننشده ونبحث عنه ونرغب فيه أكثر مما نرغب فى تنظيف البلد من الفساد وإستكمال الثورة ، مبارك يمشى والفساد يخف بس والنبي سيبولي الإستقرار ده انا ماليش غيره .. أنا مستقر إذن أنا موجود

ماذا جلب لنا الإستقرار 30 سنة؟ لا شئ .. 30 عام ستذكرهم كتب التاريخ كأن شيئاً لم يكن .. وإن كانت كتب تاريخ عندها ضمير شوية هتوصف الفترة دي بأبشع الأوصاف

كيف نبحث عن الإستقرار فى حين يضرب ويهان مواطن مصري حاصل على جائزة نوبل فى عز النهار؟ ، نبحث عن الإستقرار وآمناء الشرطة كل ما يحبوا يتظاهروا تحصل حريقة .. مظاهرة إشعال ذاتي يعني

ثم نستمر فى البحث وهناك تسريبات أمنية عن نية رجال العادلى فى قتل بعض الرموز المصرية وتأديب البعض الآخر .. هل بطئ المجلس الأعلى للقوات المسلحة هو الإستقرار المرجو والمنشود؟ هل شباب الثورة اللى حرروا مصر أصبحوا كخة الآن وثورجية وعايزينها تولع واوعوا تسمعوا كلامهم؟ لا ينقصنا سوى ان يضرب كل أب على يد إبنه ويوبخه على إستمراره فى الثورة قائلاً: فى شاب مؤدب مستقر يعمل اللى انت بتعمله ده؟!!!!ا

ومع التنقيب عن الإستقرار نفاجئ بمن يخلط الدين بالسياسة بشكل يخدم مصالح أفراد بأعينهم كما تفعل مثلا قناة الحياة فى كل فاصل من فواصلها التي تذيع فيه كلمة للشيخ الشعراوي متحدثاً عن ضرورة ترك الثائر لثورته بعد أن تحقق الثورة مطالبها .. فين المطالب دي اللى اتحققت عشان نخلص الثورة؟ الشيخ الشعراوي نفسه لو كان عايش كان هيقول الثورة لسة ما كملتش أساساً

على كل حال إطمئنوا فقد وصل الإستقرار إلى الثورة والكل يعمل على إخمادها جاهداً حتى تستقر هي الأخرى ، إشمعنى هي يعني؟ ، لذلك أرجوك عندما تشعر بإستقرار الثورة وضرورة توقفها تذكر شنب صفوت الشريف ونظرة سوزان مبارك وضحكة جمال مبارك ومناخير زكريا عزمي .. إفتكر إن كل دول لسة بيمرحوا وبيبرطعوا فى البلد كأي مواطن مصري صالح وإنت تستقر من جواك خالص وتحلم بيه وإنت نايم كمان

شوية إستقرار ع الماشي بقى: إبقى وقع على هذا البيان الحقوقي للمطالب للقبض على صفوت الشريف وفتحي سرور وزكريا عزمي وخلي كل معارفك يوقعوا عليه

ولمزيد من الإستقرار إقرا مقال بلال فضل بتاع النهاردة

صوتي يا إنشراح

2011-03-17T01:39:00.000-07:00

مش عاوزة أدفعك فى إتجاه صوت معين سواء بالرفض أو القبول للتعديلات الدستورية .. لأني ببساطة لسة ماحددتش هصوت بإيه ، بس الأكيد إني هصوت إن شاء الله وده المهم

انا عارفة انك هتصوت لإنك بتدخل الإنترنت وبتقرا الأخبار وعارف ضرورة المشاركة فى الإستفتاء ده ، المشكلة إن مش كل الشعب المصري مهتم بالتعديلات الدستورية او بالتصويت من أساسه وهنا بيجي دورك الذى لا يقل أهمية عن التصويت نفسه ، وهو التسويق للتصويت .. بمعنى إنك ماتنزلش تصوت لوحدك أبداً .. خد حد معاك ، صاحبك اللى مالوش فى السياسة ، زوجتك اللى مش فارق معاها ، جارك اللى مكبر دماغه .. خد أي حد وفهمه أهمية التصويت والمشاركة وفهمه آه يعني إيه ولا يعني ايه ، إشرحله إن الدنيا إتغيرت بعد الثورة ودلوقتي صوتنا بقى له معنى وهيأثر فى مستقبل بلدنا ، وذكره بالحكمة اللى بتقول: ليس هناك من هو أكثر بؤساً من المرء الذي أصبح اللا قرار هو عادته الوحيدة

الأهم بقى إنك ماتحاولش تأثر عليه بصوت معين ، لإن الديموقراطية تساوي الحرية وهو حر فى قراره ومش المفروض أبداً إنك تأثر عليه ، ولا تسمح لحد إنه يجبرك بالتصويت زي ماهو عاوز أو حتى يأثر عليك برأيه ، مهم جدا كمان إنك تاخد ولادك معاك وتحاول تشرحلهم إحنا بنصوت ليه وبنستفتي على ايه ويعني ايه ديموقراطية وايه اللى بيحصل بالظبط ، صدقني مهم يشوفوا أبوهم وأمهم إيجابيين وهاممهم مستقبل بلدهم وبيشاركوا في تحديده بصوتهم ، تجربة زي دي هتأثر معاهم وهتفرق فى تفكيرهم ونظرتهم للبلد وللحياة

لو مقطوع من شجرة زي حالاتي وساكن بعيد عن أهلك إتصل بيهم وحثهم على التصويت والمشاركة ، لو فى بلد تانية خالص ومش من حقك تصوت كلم أهلك وصحابك وجيرانك وقرايبك اللى فى مصر وفهمهم ايه الحوار وخليهم يصوتوا

بس الله يسترك حدد موقفك قبل يوم الإستفتاء بدل ما تروح لجنة التصويت بالمصلية عشان تستخير تقول آه ولا لأ ، إحتارت أوي وضربت أخماس فى أسداس إعمل قرعة ، أو إعمل عبيط وروح صوت برضه ، ماتنساش إن ده أول إستفتاء فى حياتنا مانبقاش عارفين مسبقاً النتيجة هتكون آه ولا لأ ، محدثين ديموقراطية بقى

مهم كمان أقولك إنك إذا كنت من فريق لا والنبي يا عبده ، أو من فريق نعم يا حبيبي نعم وجت نتيجة الإستفتاء على غير رغبتك فمن الضروري جداً جداً جداً إن مايكونش فى نفسك أي غضاضة من رأي الأغلبية لأن هي دي الديموقراطية ، يعني الأهم من نتيجة الإستفتاء سواء بلا أو بنعم هي نسبة المشاركة فى الإستفتاء و اللى هتنجح التجربة الديموقراطية فى مصر ، بس خلاص

هو مين راح فين بكام؟

2011-03-12T05:59:00.000-08:00

بيقولك فى إستفتاء على التعديلات الدستورية يوم 19 مارس الحالى ، فتلاقي اللى بيسألك: هو يعني ايه دستور أصلا؟ .. طب هو إتعدل ليه وإتعدل إزاي؟ طب لما أروح الإستفتاء أكتب نعم ولا لأ؟

ثم يظهر لك شوية ناس فاهمة التعديلات ويقولوا آه ولا لأ بس عايزين يعرفوا هما لو قالوا لأ هيحصل ايه؟ .. هنطلع الدستور القديم من الفريزر ونعمل عليه شوربة وفتة ولا هنشتري جاهز من برا؟

وبعدين يجي لك البرنامج المحبب بتاعك اللى بيفهمك كل حاجة تقريبا يستضيف ضيفين .. واحد يقولك التعديلات دي حاجة حلوة والمفروض نقول نعم ، والتاني يقولك التعديلات دي حاجة وحشة والمفروض نقول لأ .. في حين تترك أنت فى حالة حول نافوخي مزمن بدون بورشامة صداع واحدة يا مؤمن

شوية وتسأل نفسك نعمل الإنتخابات الرئاسية الأول ولا البرلمانية؟ ولا البرطمانية عشان نلحق نحط ملفات أمن الدولة المفرومة في التلاجة عشان اهي تنفع فى العصاج

طب نسيب البلد دي فى ايد الجيش ولا نعمل مجلس رئاسي كدة حلو ومحندق صالة وخمس مطارح فورفورشيه والنيش على العريس؟

وبعدين يقولولك ده المسلمين والمسيحين مية مية .. بعد شوية .. لأ مش مية مية ولا حاجة دول نص نص .. شوية تانين .. يالهوي لأ دول مش طايقين بعض خالص .. لالالالا ده احنا كلنا ايد واحدة يا بهجت كلنا بنكمل بعض

وبعد كدة تظهر الحكومة على الساحة فيجتمع البعض على بعض رموزها فى حين يعترض البعض الآخر على البعض الآخر برضه ، فتجد نفسك أمام بدلة سمير غانم فى المتزوجون .. تظبط الجاكتة البنطلون يضرب .. تعدل البنطلون الجاكتة تضرب

ثم يظهر قانون مكافحة البلطجة أبو عقوبة قد تصل للإعدام فتجد منظمات حقوق الإنسان ترفضه شكلاً وموضوعاً .. ثم يحاول الجيش تطبيق القانون فيلقى القبض على اتنين أبرياء مالهومش فى حوار البلطجة مثل علي صبحي وعمرو عبد الله البحيري

ويجيبولك العادلي فى الصورة وتقول يتحاكم محاكمة عسكرية فيقولولك لأ ده من حقه محاكمة مدنية عادية !!! .. فى حين ان الشباب المعتصمين اللى اتاخدوا على انهم بلطجية بيتحاكموا محاكمة عسكرية عادي خالص

وهوبا تظهر الطامة الكبرى متمثلة فى مرتضى منصور اللى بيقولك ان الثورة دي ثورة شادي ووائل!!!! .. طب مافي ناس إسمها احمد وجرجس وكانوا فى الثورة عادي يعني يا كابتن وماحدش طلعلهم كارت أحمر ولا حاجة

وبعدين شوية تلاقيه بيقولك احنا عايزين مبارك يرجع تاني ، وبعد كدة يقول لأ ده الشفيق أحمد فريق هيترشح وهعمله حملة إنتخابية بالمهلبية والمكسرات وانتوا لأة ، وبعد شوية يطمع هو فى المهلبية ويصرح ان لو الشفيق ما أكلهاش هأكلها انا كلها لوحدي ومش هديكوا حتة يا جرذاااااااان

قسـوة

2010-10-25T16:55:00.000-07:00

عادت لصمتها من جديد ، فما الفائدة من الإندماج فى حياة صاخبة فى عدم وجوده؟ .. لم يكن البعد من إختيارهم ولكنها الأقدار .. وحدها الأقدار أمرت بذلك ولم يكن أمامهما سوى التنفيذ الفوري والسريع

تجولت فى عيون الآخرين لم تجد نظرته الشافية لعلة قلبها .. لم تجد إبتسامته الهادئة العميقة .. غاصت فى بحر الذاكرة لتنظر إلى عيناه ولإبتسامته على مدار معرفتها به .. اليوم الأول والثاني .. الشهر التاسع والعاشر .. السنة الرابعة والخامسة .. كل هذا الكم من الذكريات والصور المتلاحقة فى ذاكرتها لم تستطع تعويضها

نعم أحبته .. رغم كل محاولاتها للإبتعاد عن الوقوع فى الحب ولكنه حدث .. فالحب يصيب المرء تماماً كما يصيبه أي شئ فجأة ، لا تذكر بالتحديد كيف سكن قلبها ومتى بالتحديد .. كل ما تدركه هو ذلك الشعور الذى يملأ كيانها كله وتلك القطعة الدموية التي تضخ الدم لكل أعضائها بحبه

لم تكن تعلم ان الحب مؤلم إلى هذا الحد .. حاولت كثيراً التعايش وكأنه لم يحدث ولكنه المستحيل بعينه .. كيف تُخفي إحساسك بالجوع او العطش او الألم؟ ، تعلم أن كثرة التعبير عن الحب للحبيب قد تخنق هذا الحبيب بل قد تؤدي إلى نفوره التام ولكن ما العمل وقد تحول حبه إلى ما يشبه الإدمان الذى يصعب الحياة بدونه .. وقد حان موعد أخذ الجرعة

أخذت التليفون وبدأت تبحث عن إسمه .. لم تبحث كثيراً .. كان أول إسم فى قائمة الإتصال .. صوت الجرس

آلو

تحدثت فى أشياء عامة ليس لها أي علاقة بأي شئ ، وكأنها تغذي أذنها بصوته حتى يسهل إسترجاعه من جديد كلما إشتاقت إليه .. كانت تنتظر أن يعطيها جرعة الحب بكلمة ( أحبك ) ، كلمة بسيطة لا يشعر بها الإنسان إلا إذا خرجت من قلب من يحبه بصدق .. وجدته يكرر كلمة أخرى ( مع السلامة .. ) ، لا تعلم ما الرد المناسب والملائم لهذه الكلمة المتكررة القاسية وهي فى هذه الحالة .. هل تطلب منه أن يقول لها ما تريد سماعه؟ .. كيف تطلب منه شئ تريد أن يخرج من قلبه لا كي ينهي المكالمة بسرعة كما يتمنى؟

حاولت إقناع نفسها بإنه لن ينسى هذه المرة أيضاً وأنه سيقولها دون أن تطلبها منه كما كان يفعل سابقاً .. نعم هو يحبها وسيفعل ذلك .. وإلا لما كان يكرر تلك الكلمات المعسولة حتى أوقعها فى شباكه؟ ... قررت أخيراً أن ترد التحية وقلبها واثق بإنه سيتذكر ويقولها .. أجابته بثقة وأمل ( مع السلامة .. ) ، لم تسمع شئ بعد تلك الكلمة سوى صوت إنقطاع الخط يدق فى أذنها ورأسها وقلبها .. أغلق الهاتف وظل هاتفها فى يديها لا تدري ماذا تصنع

*****

عاد من سفره نادم على إنشغاله الدائم وعدم تمكنه من الإتصال بها ، يعلم إنها لا تعرف غيره فى هذه الغربة ولابد أنها شعرت بالوحدة كثيراً .. ابتاع هدية قيمة ليخفف من توبيخ ضميره .. فتح باب المنزل بالمفتاح كما إعتاد .. البيت مُظلم ومُقبض .. لابد أنها نائمة

فتح باب الغرفة وجدها نائمة على جمبها الأيمن وفى يدها الهاتف الخلوي .. مُغمضة العينين وخط إسود من الكحل يخرج من إحداهما وكأنه يعلن شئ ما .. حاول إيقاظها بشتى الطرق .. نادى عليها بأعلى درجات صوته .. لم تجيب

يعني ايه صافي سليم؟

2010-09-24T12:34:00.000-07:00

يعني ايه صافي سليم؟ يعني كل الوزراء ورجال الأعمال وكبارات البلد يعرفوكي ومعاهم رقم تليفونك كمان ، ومش بعيد يكونوا بيدوكي ميسد كول وبتكنسلي عليهم يا قادرة

يعني ايه صافي سليم؟ يعني يبقى اسمك صافي سليم مع إن الحقيقي أمينة عبد الحميد ، وتستعري من هذا الأسم العريق ، رغم إن أكبر ممثلات الزمن الجميل كان إسمها أمينة رزق ، وصاحبة أول صلعة فى الدراما التليفزيونية هي الفنانة فردوس عبد الحميد

يعني ايه صافي سليم؟ يعني تفضلي طول عمرك مصيبة، وكل شوية مصيبة من مصايبك تبان ... مرة بتاعة علاقات مشبوهة ، مرة مدمنة حشيش ، مرة أمينة صديقة الطلبة .. خايفة لا تطلعى فى الآخر انتى اللى سرقتي لوحة زهرة الخشاش وبلعتيها على إنها لفافة بانجو تبقى مصيبة

يعني ايه صافي سليم؟ يعني تطق فى دماغك إنك تتجوزي - الله أعلم للمرة الكام - لأ وكمان تعملي فرح .. وبعيد عنك كان فرح جملي ومليان مصايب متلتلة .. المصيبة الأكبر فى نظري إن الفرح خلص قبل ما البوفيه يتفتح

يعني ايه صافي سليم؟ يعني تطلعي السويت مع عريسك بعد الفرح المنيل تلاقي سي دي فاضح ليكي - إخص على دي تربية – وجوزك يدب معاكي خناقة ويتخنق منك ويطلقك .. أحسن

يعني ايه صافي سليم؟ يعني تموتي وترتاحي من هنا واحنا نضرب أخماس فى أسدادس مين اللى قتلك .. مش أصول يعني تكتبي جواب ولا حاجة قبل ماتموتي تقوليلهم مين اللى قتلتك وتخلصينا يا ولية أنتى؟ ولا هي غلاسة وخلاص؟

يعني ايه صافي سليم؟ يعني حسن باشا محفوظ يطلع عينه فى كشف الحقيقة فى بلد لا تعرف الإحتراف أو الأمن أو النظام ، يا شيخة حرام عليكي تعباه حية وميتة ، مش كفاية عليه مراته الخنيقة والجيوب الأنفية؟ .. روحي يا شيخة إلهي تموتي أكتر ما انتى ميتة

يعني ايه صافي سليم؟ يعني الشك يفضل يحوم حوالين الجميع فيتهموا سميرة طلعت اللى تطلع بتغير منك وبتكرهك وعلمتك الإدمان وتسببت فى تبويظ فرحك كمان ... إحساسك ايه لما حسن باشا خلاها تعترف بكل ده بعد ما موتي صحيح؟

يعني ايه صافي سليم؟ يعني تتجه أصابع الإتهام لجوزك الجراح العالمي المشهور (شريف راسخ) واللى نكتشف فى الآخر إنه لا دكتور ولا حاجة ولا عمره عتب كلية طب برجليه ، كل الحكاية إنه رجل أعمال ، صاحب محل فول وطعمية عقبال آمالتك

يعني ايه صافي سليم؟ يعني تتجه أذرع الإتهام لنديم كمال ، فنكتشف إنه ماقتلكيش ولا حاجة ، كل الحكاية إنه بيتعامل تجارياً مع إسرائيل بس ، بسيطة المهم إنه بريئ من دمك

يعني ايه صافي سليم؟ يعني كل شوية حد يمثل الجريمة ويلخبط اللى جابونا ، مرة نديم كمال ومرة على القاضي ومرة شريف راسخ ومرة خالد الصاوي .. ماكانش ناقص بس غير المخرج والمؤلف وكل واحد من الجمهور ياخدله لفة فى قلب مسرح الجريمة

يعني ايه صافي سليم؟ يعني نكتشف فى آآآآآخر حلقة إن اللى قتلك وضلل العدالة وخنقنا من أول المسلسل هو أبوكي .. خوفاً من إنك تفضحيه بعد السنين دي كلها - قال يعني مش مفضوح بخلفتك من أساسه - بس بيني وبينك كدة ياصافي ماتتكسفيش مش هقول لحد .. كنتي هتفضحيه بإيه؟ ها؟

يعني ايه صافي سليم؟ يعني البعض يجد إنه مش منطقى أبداً إن أبوكي اللى يقتلك ويغير أداة الجريمة فى رقبة بنته بدم بارد ده غير إن دوافعه غير كفاية لإرتكاب الجريمة ومش محبوكة كويس .. بس انا شايفة إنه منطقى أوي إن عم عبد الحميد هو اللى يقتلك .. ملك الكبدة بقى وقلبه ميت

يعني ايه الحاجة زهرة؟

2010-09-01T15:47:00.000-07:00

يعني ايه الحاجة زهرة؟ يعني تبقى جميلة وفِرعة لدرجة إن كل اللي يشوفك يحبك فوراً ويتهبل من جمالك يابنت المحظوظة .. من الآخر تبقى سوبر سوبريم وومن والأجر على الله

يعني ايه الحاجة زهرة؟ يعني تتجوزي مرة وإتنين وتلاتة وعشرين لو أمكن – هو الجواز حوروم؟ - فما إن تحصل أي مصيبة لزوجك حتى يأتي لك زوج جديد على الفور

يعني ايه الحاجة زهرة؟ يعني يتلهف الرجال على الزواج منك لهفة غير طبيعية .. تذكرني بلهفة الممسوك عليه ذلة

يعني ايه الحاجة زهرة؟ يعني كل ما جوزك يتبخر – يتسجن بقى يموت تجيله مصيبة تاخده مش مشكلتنا دلوقتي – يجيلك غيره هوا من غير ما يفكر ولو لثانية إنك ممكن تكوني نحس مثلا

يعني ايه الحاجة زهرة؟ يعني جوزك يموت محروق والعياذ بالله - ما انتى نحس بقى - ويرجع لك تاني بعد كام حلقة صاغ سليم من غير خدشة واحدة ، كل الحكاية إنه فاقد الذاكرة بس .. بسيطة نبعت نشتري له واحدة جديدة

يعني ايه الحاجة زهرة؟ يعني كل ما تتجوزي راجل جديد يعدي مشهدين وتضحكي فى خباثة مصطنعة وتقولي له ( أنا حامل ) .. كلما سمعت هذه الكلمة على لسان الحاجة زهرة شعرت إننا فى أزهى عصور الخصوبة

يعني ايه الحاجة زهرة؟ يعني تسع شهور الحمل يعدوا هوا ، وهوب تدخلي المستشفى هوب تزلطي العيل من دول ، هوب يختفي العيل عن الشاشة فى محاولة واضحة وصريحة لتهميش الدور الدرامي المحوري للرضيع (المزلوط لتوه) .. ولا أدري كيف تسكت أم الرضيع الموهوب الحقيقية على تهميش دور رضيعها الدرامي بهذا الشكل؟

يعني ايه الحاجة زهرة؟ يعني تزلطي العيل من هنا وترجعي رفيعة وأمورة وحلوة وغندورة تاني مشهد على طول ، ويتكرر هذا النهج الميتافزيقي مع كل حمل وكل ولادة ، وبالرغم من إن الزوجة الطبيعية " تفيص تفييصاً تاماً " مع ولادة العيل الثالث إلا إن المخرج عايز كدة .. حد له شوق فى حاجة؟

يعني ايه الحاجة زهرة؟ يعني يبقى عندك 3 أولاد فى سن حديثة ولا يطرف لك رمش عليهم ولا ترضعي ده ولا تسكتي فى ده ولا تشقري على ده ، ناهيكي بقى عن البامبرز والتكريع والتهشيك والذى منه ، أولاد الحاجة زهرة إنفيزيبول أول ذا تيم

يعني ايه الحاجة زهرة؟ يعني تفضلي طول الوقت مصيفة ولابسة - أو مش لابسة - صيفي ، رغم إن كل عيل من العيال التلاتة بياخد له كدة حسبة 9 شهور عقبال مايشرف ، يعني يمر عليه أمطار ورعود ورياح وبرد وحر وخريف وربيع .. لكن يبدو إن الحاجة زهرة متمسكة بنظرية العجل فى بطن أمه

يعني ايه الحاجة زهرة؟ يعني بالصلاة ع النبي كدة يبقى عندك خمس أزواج حتة واحدة ، مع إن كل تترات المسلسل تؤكد إنهم أربعة بس .. لكن نقول ايه؟ ماهو معاها فى نفس الموسم مسلسل عايزة أتجوز ، يعني حقها تخمس فى وشنا يا جماعة برضه .. حقها ولا مش حقها؟ .. حقها يا أبو كمال ، حقها ياخويا

مكرونة بالبشاميل دايت

2010-08-23T05:51:00.000-07:00

إن كنت ممن كتب الله عليهم الدايت من أمثالي فيجب عليك التألقم على شئ هام جداً لن تستطيعي الإستمرار بدونه ، ألا وهو التحايل على القانون .. اقصد هنا القانون المطبخي بالطبع

فكل او معظم وصفات أكل الأباء والأجداد تودي فى داهية ريجيمية حدف ، وللإستمرار فى الدايت او الريجيم او الأكل الصحي مدى الحياة ( لأن فى ناس إتكتب عليهم كدة بجد ) يجب عليك التعود على كسر كل ما هو مألوف ومعتاد والتغيير والتعديل فى أي وصفة أياً كانت ، والفيصل النهائي الطعم والصحة طبعاً

إنسفي مطبخك القديم .. ولا تقلقي على الإطلاق إن كنتي لا تعلمين فنون وأصول الطبخ المبدأية وإتبعي المثل القائل " اللى ماعلمتوش أمه يعلمه الإنترنت " والأخ جوجل لا يتأخر الحقيقة وقايم نايم فى خدمتك

المكرونة بالبشاميل - على سبيل المثال لا الغلاسة - رائعة وتحفة وتجنن ولكن كيف نأكلها فى الريجيم؟ وكيف يكون ريجيمنا بدون حرمان؟ .. دعونا نتفق أولا إن أي أكلة يمكن صنعها بطريقة صحية ، فالرك على طريقة الطهي التي قد تجعل أكلة معينة صحية جدا وقد تجعل نفس الأكلة مضرة جداً ، وإن كنا لا نستطيع التخلص من كل السعرات الحرارية المصاحبة لأكلة معينة نظراً للمكونات الأساسية المستخدمة فعلى الأقل نحتفظ بالحد الأدنى من السعرات ولا نزيدها وقال على رأي المثل " نص العما ولا العما كله "

لا تتنازلي عن حقك فى أكل المكرونة البشاميل عزيزتي حواء ، إنظري الى نفسك فى المرآه اليوم وإبتسمي وتذكري يوم ما ضحكتي على حرس الجامعة ودخلتي بدون الكارنيه .. ياله من إحساس رائع!

دعي خيالك المريض هذا جانباً وركزي معايا .. إسلقى المكرونة ( القلم ماتفضحيناش ) ولو ماعندكيش مكرونة قلم او ماتعرفيهاش أصلا مش مشكلة ، الشيف قالك إتصرف ، لو عملتيها بالإسباجتي مش هتقولك لأ على فكرة ، المهم إسلقى المكرونة بقى بالطريقة المعتادة

وحضري العصاج فى طاسة تيفال بدون زيت او سمن ، لحمة مفرومة حمراء ( تتشوح الأول ) + بصل مبشور + جزر مبشور لو تحبي + بسلة + فلفل رومي .. كل ما تزودي خضار القيمة الغذائية هتزيد والطعم هيبقى أحلى .. وتضيفي بهاراتك وحركاتك كما يحلو لك .. صحصحى وانتي بتعملي العصاج عشان ماتعمليش زي صديقتي اللى سلقته على أساس إن مصير أي لحمة السلق على طول !

نيجي للطامة الكبرى .. البشاميل الذي نحوله بقدرة قادر إلى قنبلة تدميرية قادرة على الإنفجار فى أي لحظة ، فقد رأيت بأم عيني من يصنع هذا البشاميل بأكواب من السمن ولكي انت تتخيلي حجم الكارثة

طقطقيلي ودانك كدة وركزي فى هذا الجزء يا عزيزتي حواء كويس، ستحضري 2 ملعقة كبيرة دقيق وتضعيهم على نص لتر لبن خالي الدسم وتقلبيهم على البارد ثم ترفعيهم على النار وهاتك يا تقليب لحد ما تسمعي أصوات إستغاثتهم بأذنك ، ضيفي مكعب مرق وملح وفلفل وإستمري فى التقليب بلا هوادة حتى تحصلي على القوام المطلوب .. لو تقل تكملي تقليب وتزودي لبن او شوربة .. خفيفة تزودي دقيق وهكذا .. بس لازم تقلبي جامد عشان مايكلكعش ولو كلكع منك ما اعرفكيش

وخلصت الشغلانة .. إجري زي الشاطرة إحضري صينية للمكرونة وضعي فى الأرضية شوية بشاميل ( أرضية الصينية مش أرضية المطبخ ماتخلنيش أفطر عليكي ) عشان المكرونة مايلزقش ، ضيفي طبقة مكرونة ثم طبقة اللحمة المفرومة ثم طبقة مكرونة أخرى ثم البشاميل فى النهاية على الوش .. إحفظي هذا الترتيب كويس حتى لا تعملي نفس عملة صديقتي التي وضعت طبقة البشاميل فى النص!

على الوش ممكن تدلعي نفسك بقى – جبنة موتزاريلا ( مكتوبة صح كدة؟ ) قليلة الدسم او جبنة رومي أو أي جبنة خالية الدسم عندك أو فى ناس بتضرب بيضة بملح وفلفل وتفردهم على الوش .. إنتى وذوقك بقى

وبخ على كدة ناقص بس الوش يحمر .. حطي الصنية فى الفرن وإطلعي إجري .. إجري إعملي سلطة طبعا ولا ناوية تبلطجي وماتعمليش سلطة كمان؟ .. والله أعورك

تعالى هنا رايحة فين؟ .. خلاص مكرونة دايت وهيصة وواخدة بعضك بالصنية وفرحانة اوي؟ .. لا مش معنى انها دايت او قليلة السعرات انك تلهطى الصنية كلها لواحدك .. لا طبعا .. كفاية اوي قطعة واحدة مع سلطة وشوربة والبروتين وكفاية اوي على كدة .. بلطجة مش عايزة ياعزيزتي إنتى.. سامعة؟

ملحوظة رفيعة

صورة الصنية اللى فوق دي مش عمايل إيديا ولا حاجة

لاطشاها من الشيف جوجل عندك مانع؟

حاوريني يا كيكا

2010-08-07T06:59:00.000-07:00

ياسمين فيصل: هناك العديد من المواهب الشابة ولا أحد يلتفت لمواهبهم

ان تدخل عالم التدوين من اجل ان تثبت لنفسها انها قادرة على البوح والفضفضة والحديث عن كافة الاشياء بكافة اساليب الكتابة من شعر ونثر ومقالات ساخرة احيانا واحيانا نقدية، فانك تتحدث عن المدونة ياسمين فيصل خريجة كلية الاقتصاد والعلوم السياسية – جامعة القاهرة، والتي دخلت عالم التدوين بمدونة " انسانة" للتعبير عن نفسها وعن الاحداث من حولها، حاولنا الاقتراب منها والتعرف عليها عن قرب لنكشف معا جوانب جديدة وموهبة جديدة في عالم التدوين.

كيف دخلت عالم التدوين ؟

دي قصة طويلة ، الأول إتعرفت على الموضوع من تقرير فى التليفزيون مع المدونين المصريين والفضول اخدني اعرف ما هي المدونات فدخلت على الانترنت ورأيت مدونات الشباب الذين ظهروا فى التقرير وتفاجأت من مساحات الحرية بها والتي تستخدم بطريقة خاطئة جداً ، سب وشتائم وألفاظ بذيئة وخوض فى الأعرض تحت مظلة المعارضة السياسية .. ألا يمكن الإعتراض بأدب؟ ، بعدها تركت هذا العالم بل هربت منه بالمشوار لأني تأذيت من أسلوب الكتابة هذا ، ثم حدثت صدفة أخرى عندما تعرفت من خلال مجلة إلكترونية على مدونة كانوا يتحدثون عنها ، وعندما دخلتها تأثرت جداً بالإسلوب الجميل والرقة والعذوبة حتى إنني بكيت بعد أن قرأت لها ، ومن خلال هذه المدونة تعرفت على مدونات أخرى ، طبعاً لم يكن العدد مثل الآن كان أقل بكثير ولكن أغلبهم كان مميزاً بالفعل ، كنت أهتم بالقراءة لهم والتعليق حتى جاء مساء يوم 28 ديسمبر 2006 ذلك المساء الذي لم أستطيع النوم فيه على الإطلاق ، شئ ما بداخلي يدفعني للقيام وفتح الكمبيوتر مرة أخرى وإنشاء مساحة خاصة لي على الإنترنت .. وقد كانت مدونة إنسانة

ولماذا اخترت هذا العنوان؟

حالة إنشاء المدونة وقتها كانت لحظية جداً وكأن هناك قوة أخرى أقوى مني تدفعني إلى هذا الأمر ، قمت بكل إجراءات الإنشاء ووجدت أمامي سؤال عن الإسم ، لم أجد أي كلمة تلخصني مثل إنسانة .. مجرد إنسانة مثلي مثل الجميع .. وحتى أشرح لنفسي وللآخرين سبب التسمية كتبت جملة توضيحية للإسم تقول: مجرد إنسانة فى وشها إبتسامة فرحانة وفى عنيها دمعة حيرانة .. بتفرح وتضحك .. بتزعل وتحزن .. ومن قلبها بتدعي تخرج على خير من دنيانا

وماذا كتبت في اول عهدك بالتدوين؟

أول موضوع كان عن قصة دخولى لعالم التدوين ، كان موضوع بسيط مافيهوش تفاصيل كتير، بعدها بدأت اكتب خواطر ويوميات وتدوينات إجتماعية وسياسية ، لكن الروح الغالبة على المدونة هي النقد الساخر لسلبيات المجتمع التي نعاني منها بشكل يومي ، أحب هذا النوع من الكتابة ولا أتكلفه فهذه هي شخصيتي الحقيقية .. الضحك من أي شئ مؤلم أو حزين حتى أستطيع إستكمال الحياة بشكل طبيعي وبتفاؤل ، فالسخرية من الواقع البائس حل سحري وعلاج مزدوج ، فهو يريحني من عبئ تلك السلبيات وفى نفس الوقت يعطيني ويعطي القارئ – الذي يعاني من نفس المشاكل – الإبتسامة المشجعة على التواصل والإستمرار فى الحياة وعدم الإستسلام للإكتئاب ، ممكن أن تكون كل إنجازاتي فى الحياة هي محاولة إدخال البهجة فى حياة أي إنسان من خلال قلمي .. صناعة البهجة فى حياة الآخرين شئ نبيل جداً

وأحياناً كثيرة أكتب موضوع أو يطلب أحد القراء مني أن أكتب موضوع من أجل الضحك وفقط ، وعندما أبديت إندهاشي من حرص القارئ على ما أكتب من موضوعات ساخرة رد عليّ أحد القراء قائلاً: "ما انتى لازم تكتبي عشان إحنا نعمل دماغ" !

ما أهمية التدوين بالنسبة لك ؟

التدوين قدم لي خدمة جليلة وهي التشجيع على الكتابة والإستمرار فيها ، انا أكتب منذ مرحلة المراهقة وكنت دائماً ما أجد حرجاً فى عرض ما أكتب على المحيطين بي ، وعندما كنت أقهر خجلي وأطلع البعض على ما أكتب أجد ردود الأفعال مختلفة وغريبة ، بعضها مشجع وبعضها مستهزئ ، فقررت حينها ألا يقرأ أحد ما أكتب أبداً ، إلى أن دخلت عالم التدوين وبدأت أتطور معاه حتى فى إسلوب الكتابة نفسه ، أنا أدون منذ أربع سنوات ولا شك أن التدوين غير فى حياتي الكثير حتى إنه غير مجال إهتمامي وطموحي ، ومع الوقت نشأت علاقة صداقة بيني وبين المدونة وأصبحت جزءاً لا يتجزأ مني

التدوين بشكل عام يتميز بتلقائية التعبير ومصداقية رد الفعل أو التلقي فمن يقرأ فى أغلب الأحيان لا يعرف الكاتب بشكل شخصي وقد لا يُعرف نفسه للكاتب أيضاً أو يعلق بشخصية مجهولة أو إسم مستعار فى الغالب ، هذا التخفي يتيح له قول رأيه الحقيقي فيما أكتب ، خصوصاً انه غير مجبر على التعليق فهو شئ إختياري تماماً ، لذلك فمن يهتم بأن يقرأ ويعلق سواء بالسلب أو بالإيجاب فهو يقدم لي شئ نادراً ما يوجد في أي عمل أدبي مطبوع ، ففضلاً عن كونه يتفاعل معي فهو فى الغالب يقول الصدق .

بعد ان صارت لك مدونة هل تغير رد فعلك حول الاحداث؟

هو طبعاً إحساس مختلف أن يكون لك مدونة ليس على مستوى الأحداث الجارية فقط ولكن فى الحياة بشكل عام ، فكل ما يحدث من أحداث عامة أو خاصة بحياتك يمكنك أن تكتبي وتتكلمي عنه ، مع الوقت تصبح المدونة مثل صورة مكتوبة لتأريخ كل الأحداث الخاصة بالكاتب بالإضافة للأحداث الجارية التي بالطبع تؤثر عليه ، فمثلا لا يمكن أن أنسى ما قدمته لي المدونة عند تجربة وفاة إبني حيث وفرت لي مكان ابوح فيه بأحزاني وأجد من يسمعني بكل صبر ومحبة ودعم من الجميع .

وما رأيك في وضع التدوين حاليا؟

المدونات بشكل عام تجربة رائعة بشرط أن تستمر ، مشكلة المدونين هذه الأيام هي العزوف عن التدوين والكتابة ، الأمر الذي أصبح يعاني منه الكثير من القراء الذين تعودوا على قراءة مدونة بعينها لجمال أسلوب كاتبها ، فقارئ المدونة يتأثر بتوقف كاتبها عن الكتابة يمكن أكثر مما يتأثر الكاتب نفسه

أتوقع للمدونات النجاح والإستمرار فى إظهار مواهب كثيرة لم يسمع أحد بها من قبل ، فهناك العديد من المواهب الشابة فى كل محافظات مصر يبدعون ولا أحد يلتفت لمواهبهم

ما رايك في موضوع تحويل المدونات لكتب ورقية؟

عالم التدوين أظهر مواهب كثيرة أصدرت كتب مطبوعة ، وهناك مواهب أكثر تسعى للظهور ولكن المشكلة الوحيدة فى هذا النوع من الأدب الوليد هو ميله بعد ذلك إلى العالم الورقي ، في حين إن سبب إنتشاره وشهرته هو التدوين فى المدونات ، نادراً ما تجد من يستمر في التدوين بعد صدور كتاب له ، أعتقد إن الكاتب في هذه الحالة يكسب القارئ الورقي على حساب القارئ الإلكتروني الذى كان سبب شهرته فى الأساس

تفتكري ان المدونات مجرد وسيلة للتنفيس ام اصبح لها دور حقيقي في المجتمع؟

التدوين فى رأيي هو التجسيد العملي لفكرة الحرية ، حرية أن أعبر عن رأيي فى مساحة لا تتوفر لي فى الغالب فى أرض الواقع ، حرية أن أتكلم وأجد من سمعني أو يهتم بسماعي دون أن يتكلف ذلك ، التدوين هو صوت الصامتين ومتنفس للجميع ، متنفس لمن يستخدم التدوين فقط للفضفضة أو للإبداع الأدبي ومتنفس أيضاً لمن يستخدمه فى المشاركة السياسية ، كلاهما يعتبر التدوين متنفس ولكن كلاً فى طريقه وإتجاهه

فالمدونات يمكنها القيام بدور مهم جدا في المجتمع، هو ما قدمته في مدونتي فبعد فترة قصيرة من التدوين كنت أمتحن فى البكالوريوس وكان المبنى المخصص للإمتحان تحت الإنشاء ويشكل خطر على حياة من كل من يدخله ومع ذلك أعداد كبيرة من الطلبة كانت تمتحن فيه وفي كل أدواره بشكل يومي ، أخذت الكاميرا وصورت كل مساوئ وأخطار المبنى وكتبت تدوينة بعنوان " مبنى الجحيم " ، أتذكر إن هذه التدوينة أحدثت ضجة كبيرة فى الكلية فمعظم الطلبة فكروا فى الصمت وإستمرار فى الإمتحانات وخلاص ، لكن بعد هذه التدوينة ونشرها فى جروب الكلية على الفيس بوك تشجع عدد كبير من طلبة الكلية وصعّدوا الأمر لوكيل الكلية وللعميد وأخذوا الصور المنشورة فى المدونة وطبعوها ووقفوا بها أمام سلالم الكلية إحتجاجاً على الإمتحان فى المبنى

كما انه من خلال التدوين تستطيع الاشتراك في العديد من الحملات، مثل حملة 30 يوم تدوين وهي حملة أطلقتها المدونة داليا زيادة بغرض حث المدونين على الإنتظام فى الكتابة والتدوين من خلال كتابة تدوينة لمدة شهر كامل ، تحمست للفكرة وإشتركت فيها وأصريت على تحدي نفسي وقلمي وكتابة موضوع بشكل يومي لمدة 30 يوم ، رغم خوفي من أن يمل القارئ من ظهوري له كل يوم بموضوع جديد ولكن الحمد لله الموضوع أعجب المتابعين بشدة وتحمسوا له وشجعوني للإستمرار حتى نهاية الثلاثين موضوع ، الحملة هذه لا أنساها أبداً للمجهود الذي بذلته فيها لكتابة موضوع ذو قيمة يحترم القارئ ويقدم له شئ جديد ، كانت تجربة ممتازة ومفيدة جداً بالنسبة لي رغم صعوبتها

حلة محشي دايت

2010-07-15T10:32:00.000-07:00

نعم محشي .. لا تصرخي فى وجهي عزيزتي حواء وتقولي لي بالفم المليان: مش حينفع اعمل محشي أصل انا عاملة ريجيم !! .. وانا عارفة انك لسة ضاربة شقتين سكلانس من عند الواد حودة اللى على ناصية الشارع بس مطنشة بمزاجي

لا تخافي عزيزتي فلن أفتن عليكي وأقول لأمك، ولكن سأدهشك بالحل العبقري اللوزعي غريب الأطوار والأنماط والأعراف الذي سأقدمه لكي من خلاصة تجاربي

الحل العجيب الحصري فقط من شركة الماسة .. احم قصدي مدونة إنسانة هو .. حلة المحشي الدايت ... أيوووووون داااااااايييييت

يأتيكي عزيزتي مع حلة المحشي الدايت كتيب توجيهات صغير لحلة عملاقة صحية

يفضل قبل الشروع فى عمل حلة المحشي الصلاة ركتين بنية التوفيق فى هذه الخطوة الخطيرة فى حياتك

كما يجب أن تتذكري جيداً عزيزتي إن أول طلعة جوية فتحت باب الحرية .. اقصد صنعت حلة محشي

ويجب عليكي ألا تنسي أبداً إنك من أحفاد الفراعنة بناءة الأهرام حماة المستقبل .. يعني بنت كفاءة وتسلك فى أي حلة بدون خسائر

يفضل مع البدء فى صنع حلة المحشي تشغيل أغاني كئيبة حتى تدخلي فى المود .. وينصح الخبراء بسماع أغنية شادية "والله يا زمن" من فيلم نحن لا نطبخ المحشي

اعلمي عزيزتي ان أهم شئ فى صنع المحشي هو النية الخالصة السليمة ودعاء الوالدين ، كما أقترح قراءة كتاب إخرج المارد الذي بداخلك .. ودخله فى حلة المحشي

من الأفضل صناعة المحشي على مراحل متعددة .. وأقترح فى الحر ده تعليق محلول جلوكوز حتى يمكننا حينها أن نضحي بحياتك فى سبيل حياة حلة المحشي

يجب عليك عزيزتي قبل البدء فى صنع حلة المحشي الذهاب إلى السوق لإختيار ما لذ وطاب من أصناف المحشي المختلف .. يفضل إختيار الكوسة فى المقام الأول أو الباذنجان نظراً توائمهم النفسي مع الدايت

لا تنسى شراء كمية لا بأس بها – كبيرة جداً - من "خضرة المحشي" وهي الشبت والكسبرة والبقدونس ، وإن كنتي لا تعرفين بالتحديد الفرق بينهم فأطلبي من البائع إحضارهم وخلاص .. لا يوجد مانع من إضافة بعض عيدان النعناع الأخضر ( وراور ) لزوم الطعم الجميل

عند العودة للمنزل يمكنك الشروع فى عمل المحشي بشكل فوري او تأخذي هدنة حربية لمدة لا تتجاوز الساعتين حتى لا تفقدي الذاكرة وتنسى ماذا كنتي ستفعلين أساساً

إياكي أن تتخيلي عزيزتي أن صنع حلة محشي أمر صعب، أبداً، فقط إنظري فى المرآة وتذكري إجتيازك لكل المراحل الدراسية بنجاح، هكذا المحشي

المرحلة الأولى: مرحلة غسيل الخضار .. إغسليه بالخل ولا ترحميه .. بثي فى غسيله كل همومك وعذاباتك اليومية الدورية الحلزونية .. اغسلي معه مخك من اي شخص او فكرة تحاول تعكير صفو حياتك

المرحلة الثانية: مرحلة تقوير (تأوير) المحشي .. ضعي المقوار فى قلب الباذنجانة من دول بغل كدة وكأنك تقتلين به كل من فرسك وعكنن عليكي عيشتك .. وعندما تنتهين من (قتل) الباذنجانة وتعذيبها وإخراج تلافيف تلافيفها ستشعرين براحة بالغة

المرحلة الثالثة: غسيل المحشي ووضعه فى مصفاة ( مخرمة طبعاً يا عزيزتي لا تشمتي آدم فينا )ه

المرحلة الرابعة والأخطر: صناعة الخلطة .. والخلطة صناعة .. تضعين فيها كل ما تحبين وبالطريقة التي تفضليها .. أهم شئ فى الخلطة حتى تكون دايت بحق هو ألا تكثري من الرز وأن تكثري بشكل مبالغ فيه من الخضرة وأن تقللي المادة الدهنية إلى الحد الأدنى .. كثيرا ما اضع فيها معلقة واحدة زيت وفقط

المرحلة الخامسة: مرحلة حشو المحشي .. لا تجعلي مخك يسرح بعيداً ويذكرك بأحلامك الضائعة وإحبطاطك اللانهائية .. فقط إحشي بصبر وفى هدوء ورددي فى سرك المقولة الخالدة (( يا جبل ما يهزك ريح )) ثلاث مرات

المرحلة السادسة: رصي المحشي فى الحلة بأناقة وعذوبة – كأن شيئاً لم يكن – لا تخشي أي شئ فالمحشي لن يبوح بأفكارك السودوية لأحد

المرحلة السابعة والأخيرة ( احمدك يارب) : ضعي الحلة على النار غير مأسوف عليها مع قليل من الشوربة او الماء

لا تنسى عزيزتي حواء عندما تنتهي من صنع حلة المحشي ووضعها على النار أن تظلي رايحة جاية تدعي بكل إخلاص: يارب المحشي يطلع حلو

يمكنك أثناء إنتظار حلة المحشي ضرب شوب موز باللبن ساقع عشان تنسي

إذا شممتي رائحة شياط وإتضح إن حلة المحشي إتلسعت منك لا تشعري بالفزع ، كما قولت لك أهم شئ الثقة فى النفس ودي مجرد شكليات ، ايه يعني أكلة باظت ماانتى ياما بوظتي كتير جت على دي؟

بعد ما حرقتي المحشي إجري ع المراية وإبتسمي .. وتذكري دائما إن محاولات النجاح دائما ما تأتي فوق جبال من الفشل

عارفة إنك مش ضامنة هو إستوى ولا لأ .. عارفة إن البتنجان بيشد والرز بيقرقش .. بس ليه ماتقوليش إنك إخترعتي طريقة جديدة للمحشي؟

كفاكي بكاء يا حبيبتي ... كفاية إنك توصلتي لطريقة فاشلة لعمايل المحشي .. مش معنى كدة إنك فاشلة فعلا – بدأت أشك فيكي على فكرة – لا معناه إنك بتحاولي ويا عالم ممكن في يوم من الأيام تنجحي .. قادر على كل شئ

لو إتحايلتي على أمك إنها تاكل من الحلة ولو من باب المجاملة وباعتك عند أول ملف برضه ماتزعليش، إبتسمي وشغلي إغنية عيني ع الأم وحنان الأم بسرعة

ولو موضوع ماما ده حازز فى نفسك أوي ممكن تشغلي كمان أغنية محمد فوزي: ليه ياماما تعذبيني وأشتريكي وتبعيني يجرا ايه لو ترحميني وتدوقي المحشي؟؟؟؟

ولا يهمك يا عزيزتي حواء .. فقط أنصحك بالإبتسامة وقراءة كتاب دع القلق وابدأ الحياة بدون محشي

وفي قعر هذه الحلة .. اقصد نهاية هذا الموضوع أدعوكي للإسترخاء وإغماض عيناكي وأخذ نفس عميق جدا من معاميقك ولنتجرع كؤوس الماء المثلج ونلقي بمرارة الفشل فى ذاكرة النسيان لكن مش عارفة ليه يوهيألي يا حورية إنك ما اتوضتيش قبل ما تدعي إن المحشي يبقى حلو ... تذكري دايماً عزيزتي إن حلة المحشي محتاجة قدر كبير من صفاء النفس ونقاء السريرة

صمت الألوان

2010-07-01T13:56:00.000-07:00

قد تحاول مكافحة بهتان ألوان حياتك بإنك تجعلها فاقعة قوية التأثير ، ففقعان الألوان يحميها من البهتان فى قلبك وعينك ، قد يمتد هذا الفقعان ليشمل واقعك وتفاعلاتك مع الآخرين ، فتتحدث بصوت عالي صاخب وكأنك تتعمد ممارسة فعل الحياة وإثبات وجودك ولو لذاتك ، فيمتد بك صخبك ليشمل إضحاك الآخرين ، قوة ضحكهم تصنع فى حياتك السعادة وكأنها لا تأتي إلا بعد تصديرها للآخرين .. الإفتراضيين!

فى المراحل المتقدمة للوحدة قد تصل لمرحلة بناء علاقات إنسانية مع كل شئ حولك ، فتحدث النظارة وتتصاحب على الكيبورد وتتناقش مع الريموت كنترول وتحكي حكايات مع الصحون حتى يمكنك أن تسمي كل صحن منهم بإسم مختلف ( الحلة زوبة) و(طبق الهنا) و(الشوكة الهشتوكة) و(المعلقة الحسناء) و(الطاسة الموقرة) ، أن تصل لمرحلة من الفانتازيا التحايلية على الحياة حتى تستطيع إستكمالها ، حتى تستطيع أن تنام وتنتظر يوم جديد تفاصيله لن تختلف كثيراً عن اليوم الماضي ، فتحب الصمت وتنسى الكلام وتتحدى الملل وتآخي التكنولوجيا وتعانق الكتب وتناجي القلم وتكره الساعة .. وتضحك على نفسك!ا

حداد على خالد سعيد

2010-06-24T14:19:00.000-07:00

من حقنا نعيش بكرامة .. ونموت من غير لفافة

إسفكسيا العرق

2010-06-17T13:33:00.000-07:00

ركبت إمبارح الأتوبيس من المحطة وكان فاضي بيحمل ، قاعد فى أول كرسيين قدامي بنت وأمها فقمت قاعدة فى الكرسي اللى وراهم على طول ، فجأة ظهر شخص غريب الأطوار إكتشفت بعد لحظات إنه السيد البيه السواق ، داخل متنرفز ومتزرزر وغالباً مخنوق إن الأتوبيس اللى قبله مشي محمل على أخره وسابه فاضي إلا من الثلاث نساء اللى انا منهم طبعاً ، نفخ نفختين فى الهوا بغيظ وحمر عينيه ، ظبط ركنة الأتوبيس وقالنا وعينه ترمي بشرر: انا مش متحرك من هنا غير لما العربية كلها تكمل .. ويارب ما تكمل !!!ا

إستغربت جداً من طريقته ، هو حيذلنا ولا ايه؟ ، ايه الغلاسة دي ؟ ، ولسة حكمل سيل الرفض والثورة والإمتعاض و ...و... و.. ولاقيت تركيزي بيروح ناحية البنت وأمها اللى قاعدين أمامي ، الأم قالت لبنتها: خلاص خدي الخمساية دي وانزلي اشتريلك باكو بسكوت وعصير وتعالي ، وما أن خرجت البنت من الأتوبيس حتى هرعت الأم فى إحتلال مكان البنت جمب الشباك !! ، لكن الأم كانت مهتمة جداً لتوجيه إبنتها ناحية نوع معين من البسكويت ، كانت حريصة قوي على أن البنت تشتري أى حاجة وخلاص ، البنت للأسف رجعت بخفي حنين وأمها إتضايقت جامد ، مش عارفة ليه ليه إتضايقت أوي كدة .. خيالي المريض حس إن الأم كانت طمعانة في باكو البسكوت ده !!!ا

المهم ربنا كرم والأتوبيس كمل والسواق جه وإضطر آسفاً إنه يسوق ، فى هذه الأثناء يا سادة يا كرام لم أر شيئا غريبا أو مختلفا حتى أصدعكم به هنا - كالعادة - ولكني شعرت بشئ لا تراه العيون ولا تسمعه الآذان ولا تلقطه الأقمار الصناعية ، شئ تخصص أنوف وفقط ، إنها رائحة العرق ، وما أدراكم ما رائحة العرق ، شعرت بها تتخلل الجموع الغفيرة فى الأتوبيس لتأتي وتستقر في أنفي أنا ، شعرت بأنها تحولت ليد مخبر غريب بيمد إيده حول رقبتي ليقبض روح روحي ، آآآآآآآآه مما شممت ، كنت أحتضر بإسفكسيا العرق النووي ، رائحة غريبة عجيبة نفاذة بشكل غير طبيعي ، تستهدف قتلك بشكل غير مبسوق وكأن حد مسلطها عليك

حينها فقط شعرت برغبة ملحة فى إرسال رسالة إستغاثة وشكر وتأييد للممثلة المشهورة اللى كانت بتعمل إعلانات ريكسونا .. أشكرها أولاً على المشاركة فى هذه الحملة الإعلانية ذات الأهداف النبيلة وأقترح عليها ثانياً أنهم يغيروا إسم المنتج بدل ريكسونا .. يبقى إنقذونا!!!ا

خنقة العرق جعلتني أتقبل - على مضض - ظهورها المنفر في الإعلان ده بالذات رغم إنتقادي الشديد لهذه الحملة من البداية ، إزاي ترفع دراعها بكل بساطة كدة وتحط مزيل العرق قدام الناس والمخرج والمساعدين والمصورين؟ ، وبعدين أدقق شوية فى الشاشة وأقول: طب ماهي مبينة دراعها كله من برا فرقت يعني من جوا؟ شوية يجي الفاصل تاني ويتذاع الإعلان تاني وأقعد أفكر وأفكر وأفكر وأفكر وفى الآخر أقول لنفسي - بعد ما الإعلان نفسه يكون خلص من زمان - وعلامات تعجب كبيرة تتراقص أمامي: طب حتى مش خايفة لحسن حد يزغزغها؟!!!ا

عندما

2010-06-16T03:52:00.000-07:00

سألت الشيخ عبد ربه التائه

- متى يصلح حال البلد؟

فأجاب

- عندما يؤمن أهلها بأن عاقبة الجبن أوخم من عاقبة السلامة

الكاتب الكبير نجيب محفوظ
أصداء السيرة الذاتية

صورة خالد

2010-06-10T12:21:00.000-07:00

جريمة بشعة بلا شك إستيقظنا جميعاً عليها اليوم وسط صدمة وذهول من الجميع ، لماذا يقتل هذا الشاب بهذه الوحشية؟ ، لماذا لا نحيا فى آمان دون أخبار تعكر علينا أوقاتنا ؟ . بالإضافة إلى إحتمال أن يكون أي منا بطلاً لأي خبر من هذه الأخبار الصادمة ، إنتهى زمن الأمان وبدأ عصر الرعب ، عصر الضرب والإهانة والتعذيب والتهشيم والتحرش والسب والقتل

أتفهم كل هذا الآن ، ولكن لا أتفهم أبداً إنتشارالصورة البشعة لجثة خالد فى كل مكان على الإنترنت ، كيف ننهض غاضبين بسبب ضياع حق خالد فى الحياة أو العيش بكرامة ونحن من يقوم بإنتهاك كرامته حتى بعد وفاته ، ألا يكفيه ما عاناه من تعذيب وتهشيم وقتل بوحشية حتى نأتي نحن وننشر صوره في كل مكان؟

أنا لا أحدثكم اليوم دفاعاً عن خالد وكرامته الإنسانية وفقط .. بل أحدثكم وانا أتخيل نفسي فى مكان خالد ، لن أريد أن يرى جثتي بشر ولا أن يقشعر بدن طفلة ليس لها ذنب سوى دخولها على الانترنت فى وقت مشحون بالغضب ، لن أريد أن يرى أحد جسدي بعد أن كفل له الدين الكرامة والحُرمة بعد الممات .. أفضل حينها أن أنعم بكرامة الموتى بعد فقداني لكرامة الأحياء

يقول البعض أن نشر الصورة ضروري لفضح الجاني .. نعم ، ولكن أين الإنسانية فى نشر صورة بهذه البشاعة على العامة .. كل العامة ، بلا تنبيه أو تحذير ، للكبير والصغير ، الكل عليه أن يصدم والكل عليه أن يشارك فى إنتهاك هذه الجثة فضلاً عن كونها إنتهاك فج للمقتول نفسه

وإن كنا ننشر الصورة بلا غضاضة بغرض الدفاع عن حقوق الإنسان ، فعفواً .. مجرد نشرك للصورة يتنافى وينتهك بشكل صارخ حقوق الإنسان .. فإكرام الميت دفنه وليس تداول صورته .. فللميت حرمة لا يمكن التغافل عنها مهما حدث ومهما كانت الدوافع أو الأسباب .. نشر صورة المتوفي بالضبط مثل إخراج جثته من قبره لتصويرها ونشرها للعلن

حق خالد علينا الستر والدفن وليس النشر وتداول صوره .. وإن كنا نريد أن نفضح الجناة فلنفضحهم هم بأسمائهم وصورهم وليس صورة خالد ، خالد الذي ترك لنا دنيانا القاسية منعماً ومكرماً عند الله فى منازل الشهداء فلم نؤذيه حتى بعد أن أصبح جثة هامدة مهشمة الوجه .. خالد الشاب المصري الذي حُرم من المعاملة بكرامة كإنسان حياً .. فهل نبخل عليه بالإنسانية والكرامة ميتاً؟

هرش مخ

2010-06-09T02:55:00.001-07:00

هرش المخ بالنسبة لي ليس جديداً .. فقدت بدأت هذه الهواية منذ الطفولة .. أفكر .. أهرش في مخي شوية .. ثم أقول ما أشعر به ، هكذا مرت كل مراحلي الدراسية .. لم يعجب الكثيرون بكلامي المختلف عن السائد .. فقد إعتبره البعض نضجاً مبكراً والبعض الآخر كان يقول : أنتِ بتحسسيني إنك ماما .. والبعض إعتبره رغياً وكلاماً فارغاً منبعه إنسانة مهروشة فى دماغها وتافهة وعبيطة وهبلة !!! ... في حين إعتبره البعض الآخر عبقرية مفرطة

وأنا لست على إتفاق تام مع كل هؤلاء .. فأنا لا اعلم بالتحديد ماذا يحدث .. قد يكون كلامي به كل هذه المعاني وقد لا يحمل أي شئ منها على الإطلاق .. إنما هو فقط هرش مخ .. تفسيري البسيط لهذا الهرش لخصته فى جملة بسيطة تقول: القلب زي الكوباية .. لما يتملي يدلدق ويزروط الدنيا !!! .. وهذا بالضبط ما يحدث معي .. فهرش المخ هذا يخرج من قلبي بعد إمتلائه بشئ ما يريد البوح به ولا يجد من يسمعه .. لعلمه المسبق أنه لن يجد من يسمع .. وإن وجد هذا الشخص المضحي بأذنه فهو بالتأكيد لن يهتم !ا

إعتدت علي ممارسة هذه الهواية فى كل وقت و في كل مكان .. بداية من الكشاكيل والدفاتر والكتب المدرسية والخارجية والمراجعات النهائية .. مروراً بالمراجع والدوريات العلمية بالكلية .. وصولاً إلى التويتر والفيس بوك والجوجل باز ، لكن مشكلة واحدة كانت تقابلني مع هذه الهواية .. فكرة التأريخ والأرشفة وسهولة البحث عن هرشاتي السابقة .. فكما تعلمون الكتب كثيرة ولكنها تذهب مع الريح بمجرد إنتهاء العام الدراسي ، و يكاد يكون من المستحيل أن تبحث عما قلته على التويتر أو الفيس بوك منذ عام مضى .. كما أن الدفاتر والأجندات ليس بها هذا الأوبشن العبقري

Ctrl + F

إلى أن قرأت كتاب تلابيب الكتابة لصافيناز كاظم فصلا بعنوان منمنمات .. جمعت فيه جملاً وعبارات تعبر عن مواقف مختلفة ولكنك تشعر بشئ جميل عندما تقرأها فى فصل واحد .. منذ قراءة هذا الفصل وانا أشعر بتقارب رهيب بيني وبين الكاتبة وأحلم بتجميع كل هرشاتي المخية فى مكان واحد مثلما فعلت .. كتاب .. مدونة .. أي شئ .. حتى يسهل علي البحث فيه بشكل أساسي وأرى هل سأشعر بنفس الشعور الجميل عندما اقرأهم كالذي شعرت به عند قراءة منمنمات الرائعة صافيناز كاظم أم لا ؟

أخترت أن أفتح مدونة جديدة بعنوان هرش مخ .. بعون الله ستضم كل هرشاتي المخية الكاميكازية المتناثرة فى كل المحافل الإنترنتية .. قد لا تحتاج أن تكون من زائري المدونة الدائمين .. وقد لا تدخلها من الأساس لأن كل ما فيها ستجده عندي على الفيس بوك أو تويتر أو جوجل باز .. لن أمنعك من الزيارة بالطبع .. فأنت حر أولاً وأخيراً .. ولكن عذراً .. سيتم تفتيش كل السادة الزائرين المستغنين عن آذانهم بلا إستثناء .. حيث يمنع منعاً باتاً دخول أي نوع من أنواع المراهم .. حتى يحلو الهرش بالطبع

جعلوني مدوناً

2010-05-31T08:10:00.000-07:00

تجربة التدوين اليومي مرهقة بلا شك ، أن تبحث عن موضوعات وتفكر فى إسلوب التقديم شئ يحتاج إلى محترفين كتابة وليس مجرد هواة ، ولكنه ممتع حقاً ، فكنت قد قرأت عن فكرة الكتابة اليومية أن هناك مؤلف شهير جداً كان يلزم نفسه بأن يكتب ألف كلمة كل يوم ، كنت أندهش جداً من الرقم والحالة الإلزامية وأهميتها من عدمها على إعتبار إني من كسالى الكتاب إن صح التعبير ، لكن بعد خوض تجربة الكتابة اليومية أستطيع أن أوكد لكم أنها فعلا كما قالت لي صديقتي العزيزة طهقانة "حتسلكي ماسورة الكتابة " تشجعاً لي على الإستمرار فى الحملة ، مع الوقت تجد فعلا أن الماسورة بتسلك وتحتار حينها فى ماهية عملك بالظبط ، هل أنت كاتب ومدون أم سباك؟

لن أنكر أننى إستفدت بشكل كبير جداً من خلال هذه التجربة ، إستفدت الحرية التي تشعر بها عندما تعلم أن لك الحق والمساحة لإبداء رأيك في أي موضوع يشغل بالك ، هذه الفترة كانت بمثابة دورة تدريبية مكثفة فى الكتابة ، أن تلزم نفسك بأن تكتب وتكتب بالفعل ، أن تكون مدوناً بحق وبشكل يومي ومتفاعل مع الأحداث ، إستفدت أيضاً من المتابعة والتشجيع وزيادة عداد الزوار ، مجرد أن ينتظرك ولو شخص واحد بشكل يومي ليعرف ماذا ستقدم له اليوم شئ يشعرك بالمسؤلية الكبيرة ورغبة فى إفادة هذا الشخص ومتعته بأي طريقة

فى منتصف الطريق علمت أننى لن أستطيع تكلمة الـ30 يوم ، كان أمامي حينها خيارين – لا طماطم لهما – الأول أن أعتذر عن الحملة التي تحمست لها كثيراً ، والثاني أن أكثف جهودي وأكتب الـ30 موضوع قبل نهاية الشهر ... واخترت الحل الثاني لأني لو كنت إنسحبت كنت سأحزن كثيراً ... أعلم أن فعل الكتابة أمر مرهق جداً ، لكن كما تعلمون .. الكيف بيذل

أشكر فى المقام الأول داليا يونس صاحبة فكرة حملة 30 يوم تدوين ، كما أشكر بشدة كل من شجعني على الإستمرار وكل من أرسل لي رسائل حتى أستمر ولا اتوقف وكل من اهتم بالمتابعة والتعليق على كل ما أكتبه ، ما أدهشني أكثر هو رغبة البعض من الأعزاء القراء فى أن استمر على هذا النهج فى التدوين اليومي حتى بعد إنتهاء الحملة .. وسؤالي لهؤلاء الأعزاء: إنتوا معاندكوش إخوات بنات؟

كتبت لكم 30 موضوع فى أقل من 30 يوم - إوعى وشك - يمكنك عزيزي القارئ متابعتهم وقرأتهم على أقل من مهلك من خلال هذا الرابط ، وإن كنت زي حالاتي تتمتع بقدر لا يستهان به من الملل فسنقسم البلد ثلاث أجزاء وإليك هذا الثلث

أنا حغير الواقع

182.621099 يوم

وداعاً للطواجن

أزهى عصور القرف

ليلة القبض على شهرزاد

للهيافة فنون

الفارم فيل .. أرض الأوهام

صدمة العمر

رشدني .. شكراً

أكتب عربي

*****

وفي النهاية

عزيزي القارئ

أرجو أن أكون قد أفدتك من خلال هذه الحملة

ولم أزهقك فى عيشتك

أُكتب عربي

2010-05-19T12:55:00.003-07:00

كيف نتوقع من أي أمة أخرى أن تحترمنا ونحن لا نحترم أنفسنا؟ كيف نطالب بحقوقنا ونحن من يقوم بتضيعيها ، كيف تكون عربي من أب وأم عربيين ومع ذلك لا تكتب سوى بالإنجليزية أو بما يعرف بالفرانكوا آراب ، ذلك المسخ من اللغة العربية بحروف إنجليزية ، شئ مقزز جداً وكلما رأيته أشعر بالإشمئزاز ، انت تستطيع أن تكتب بالعربية وتتحدث بها ومع ذلك تكتبها بالإنجليزية .. أين إحترام الهوية؟ ... أين إحترام الذات وكرامة الكلمة واللغة والحضارة والدين؟ .. نحن مهبط الرسالات السماوية جمعاء شرفنا الله بذلك .. كيف لا نشعر بقيمة هذه اللغة ونتخلى عن هذا الشرف ونرتمي فى أحضان الغرب متحدثين بلغته بمناسبة وبدون مناسبة؟

إن كنت لا تعرف كيف تكتب بالعربية فأعتقد أنه أبسط مجهود يمكن أن تقدمه إحتراماً لهويتك هو أن تتعلم كيف تكتب باللغة العربية وهو أمر بسيط للغاية ، وإن كنت فى بلد أجنبي أو صاحب لكنة متكسرة ولا تستطيع أن تكتب بالعربية .. فهناك برامج كثيرة يمكنها أن تحول ما تكتبه بالفرانكوا أراب إلى اللغة العربية

أحب أن أحكي لكم عن سارة ، سارة فتاة تعرفت عليها من خلال موقع تويتر ، هي بنت مصرية تعيش وتعمل فى إنجلترا ، ودائماً ما تكتب لنا باللغة العربية ، تصر على الكتابة بها حتى وإن كان عدد كبير ممن يتحدثون معها عرب وفي بلد عربي ومع ذلك يكتبون بالإنجليزية ، نمت صداقتنا ومعرفتنا وطلبت أن أتحدث إليها عن طريق الصوت ، إندهشت جداً مما سمعته ، فهي لا تجيد الكلام باللغة العربية بالمرة ، الكلمات والحروف متكسرة وكأنها أجنبية حديثة العهد باللغة العربية

لا استطيع أن أصف لكم مقدار أحترامي لتلك الفتاة بعد هذه المكالمة ، إحترمتها لأنها تحترم جذورها وبلدها وتهتم أن تكتب باللغة العربية كلما تواصلت معنا ، هي حتى تهتم بالأخبار والأحداث المصرية وتتابع كل شئ يحدث فى البلد يمكن أكثر من شباب كتير جداً "عايشين فى البلد ومش عايشين" ، وعندما سألتها كيف تكتبين بالعربية وبحروف عربية ومع ذلك يصعب عليكي نطقها؟ ، أخبرتني أنها فعلاً لا تستطيع الكتابة باللغة العربية ولكنا تستخدم برنامج ما يقوم بتحويل ما تكتبه " كفرانكوا آراب " إلى حروف عربية

بالله عليكم ما يجبرها على مثل هذا التصرف؟ ما اسهل عليها أن تكتب بالإنجليزي وأن تنغمس وتذوب فى الحضارة الغربية كما فعل الكثيرين ، ولكنها تشعر بقيمة إنتمائها لبلادها وتحترم لغتها حتى وإن كان من الصعب عليها نطقها ، كم أتعب عند المقارنة بين سارة وبين الكثير من الشباب .. يستطيعون الكتابة بالعربية .. لبلب ، يمكنه الكتابة على لوحة المفاتيح .. زي الفل ، ومع ذلك يكتب باللغة الإنجليزية أو عربي بحروف إنجليزية وكأنه يريد تغيير جلده أو الإنسلاخ من لغته ، كفانا ما تخلت عنه الدولة للأجانب من أراضي بدافع الخصخصة ، لا لخصخصة اللغة ، أرجوكم لا تتخلوا عن لغتكم بدافع الحداثة او تبيعونها (بالرخيص) وتشترون الأجنبي

لماذا يُقتل المصريون؟

2010-05-19T06:52:00.000-07:00

المصري معروف بقوته وجبروته

تلك الجملة المعبرة التي قالها محمد هنيدي فى فيلم فول الصين العظيم

معبراً عن واقع المصري الجامد طحن

أتذكر هذه الجملة كثيراً عندما أقرأ كل كام يوم أخبار من عينة

وعينة

وأتعجب أين هذه القوة والجبروت التي يتشدق بها كل من هب ودب من المذيعين؟

وكرهنا بسببها معظم الدول العربية

ولكوا أن تتخيلوا ما يقوله أحد الأخوة العرب معلقاً على الخبر الأخير

اينما تذهبون مصيركم الضرب والاهانة داخل اوطامكم وخارجها

هذا جزاء تفرعنكم وتكبركم على العرب بدون اية فائدة

بينما شخص فرد عربي آخر

ايه دا يا فرعنا ايه دا انت تنضربوا فى بلدكم وداخلها

ولكن هدا جزائكم انا حزين عليكم يا فراعنة

لانكم سوف تضربون بالحجارة اينما دهبتم ردا على مافعلتم

عقوبة الفيفا لبعظكم منصفة لكن الاهم امها صدرت يعني انتم متهمون

وسوف تسيؤون الى سمعة بلدكم

وسوف تضربون اينمادهبتم وسوف يطالبون الفيفا بعقوبات مثل التى صدرت عليكم

المهمة السمعة لكنكم لا تهتمون الى سمعتكم بسبس تفرعنكم

ايه دا يا فرعنا الى بتعملوه

الأخطر من هذه الأخبار هي التعليقات

التعليقات لا تكذب وتظهر كم الخلافات العربية الحقيقية

دائما ما تتحول التعليقات إلى مشاجرة طاحنة بين كل الأطراف

بسبب ما فعله الإعلام " الأهوج " لجل خاطر سواد عيون الكورة

ويا فرحة إسرائيل فينا

*****

انا لا أعترض على الضرب مطلقاً

الناس كلها ممكن تتغابى على بعضها عادي

واحنا اخوات وعرب ونستحمل بعضينا ما يجراش حاجة

المشكلة الحقيقية فى حوادث القتل المتكررة بشكل ملفت

مستغربة الموضوع ده جداً ومش عارفة ألاقيلوا سبب محدد

نكونش إتحولنا لصراصير يسهل قتلها بالبيرسول واحنا مش واخدين بالنا؟

أول لنمل يسهل فعصه تحت الأقدام بكل ببساطة؟

وبعدين إحنا مستغربيين ليه يعني؟

إذا كان النيل بذات نفسه حيضيع ومحدش سأل .. جت علينا احنا؟

لأ .. إستنوا

يكونش القتل ده عقاب لينا عشان مش بنرضى ننظم النسل

ونطبق قواعد تنظيم الأسرة فبتتنظم طبيعي؟

توماتيكي توماتيكي يعني؟

ولا يكونش بسبب ما يعانيه المصري داخل بلده

من إضطهاد وهضم للحقوق وللكرامة؟

وقال على رأي المثل

اللي يقول لشعبه يا أعور .. يتسحل الشعب ويتكعور

ولا يكونوش زي ما بيقولوا بيسلطوا الناس علينا

عشان يخففوا من الكثافة السكانية

والبلد تفضى لهم ويبرطعوا فيها براحتهم؟

أيون .. هو كدة

وقال على رأي المثل

قبل ما نجيب مولود نتأكد إنه حيريحنا منه ويموت

وأقعدوا بالعافية فى مصر

الحياة ملل

2010-05-18T12:06:00.000-07:00

خفت تحمس الكثيرين لهذه السلسلة من القنوات بعد أن كانوا من أشد المعجبين بها ، وأنا أزعم إن هذا الخفوت بسبب إدراة القناة فى المقام الأول ، فإدارة القناة تقوم على فكرة بسيطة .. أن تذيع برامج تجذب المشاهد بشكل كبير جداً وما أن تتأكد أن المشاهد يجلس الآن ليشاهد برامجها حتى تنزل عليه بسيل من الإعلانات المتتالية والمتتابعة المملة من كل حوب وصوب بلا رحمة ولا هوادة

فمثلا برنامج مثل كلام من القلب ، فأنا من أشد المحبين لهذا البرنامج ولمذيعته اللامعة دعاء فاروق ، إلا أنني كنت دائماً مع نهاية كل حلقة أشعر بإحساس بغيض ، ذلك الإحساس الذى تشعر به عندما يقنعك شخص ما أن ما تشاهده من البرنامج هو ساعة كاملة أي 60 دقيقة بالتمام والكمال ، ثم تجد نفسك فى آخر الحلقة لم تخرج سوى بـ30 دقيقة كحد أقصى مقسمة بين كلمة المذيعة فى بداية الحلقة وكلمة الدكتور الضيف ومكالمات المشاهدين .. والـ30 دقيقة الباقية ذهبت فى الفواصل والإعلانات المتكررة والتي حفظها المشاهد عن ظهر قلب

مثال آخر مسلسل رجل وست ستات الشهير، عندما حاولت أن أشاهده وجدت عجب العجاب ، فالقناة يا سادة لا تعرض من هذا المسلسل إلا 5 دقائق ثم يأتي إليك الفاصل البغيض الذى يستمر لمدة ربع ساعة كاملة !!! ، ثم يأتي المسلسل مرة أخرى بخمس دقائق أخرى – تكون أنت بالطبع نسيت اول 5 دقائق كانوا تبع أنهي مسلسل – ثم ينهال الفاصل عليك لمدة ربع ساعة جديدة وهكذا

برامج أخرى مثل برامج الطبخ ( المطبخ أو سفرة دايمة ) تجد أن الشيف يرد على التليفونات أكثر مما يطبخ ، ولكنه والحق يقال هو لا يترك الطبخ ليرد على التليفونات وفقط ، بل يقوم بأخذ فواصل تضاهي مدتها مدة ما يعرضه الشيف من أكلاته الشهية ، لدرجة إنى كثيراً ما اتخيل إن هذا الشيف اللامع وظيفته الأساسية هي أخذ فواصل جديدة وليس الطبخ

لم تكتفي قنوات الحياة بمثل هذه السخافات الإعلانية اللعينة والتي فى رأيي ستفقدها الكثير من مشاهديها واحداً تلو الآخر ، فبدأت فى سبق باقى القنوات فى الإعلان عن مسلسلات رمضان من الآن ! .. فلك أن تتخيل قناة تعلن عن مسلسل ما سيعرض بعد أكثر أربعة شهور .. أي أنك ستشاهد إعلانات هذه المسلسلات لمدة 120 يوم وأكثر من مرة فى اليوم الواحد ، حتى تصل لمرحلة أن تمل من المسلسل المزعوم حتى قبل أن تشاهده كاملاً فى شهر رمضان ، ناهيك عن الشريط الأبيض العريض الذي يعيقك عن الرؤية الكاملة لأي محتوى مرئي معروض سواء مسلسل أو برنامج مفيد ، يختفى هذا الشريط اللعين فقط عند إذاعة الإعلانات ! .. تشعر حينها أن قناة الحياة تتعمد إنهاء حياتك غيظاً من الإعلانات ومن إخترعها

كنت أظن أن ما أشعر به تجاه هذه القنوات هو شعور فردي نابع من قلة خبرة أو رحابة صدر لا أتمتع بها ، إلا إنني وجدت أن هناك الكثير من أكثر المتابعيين لهذه القنوات في عائلتي قد إبتعدوا عنها وتوقفوا عن متابعة برامجها تماماً .. أعلم أن هناك الكثير والكثير من القنوات تتبع نفس هذا النهج الإعلاني الخانق ، ولكني لا أهاجم قنوات الحياة بالأخص بدافع الغلاسة ولكني أفعل ذلك بدافع الآمال التي كنت قد عقدتها على هذه القنوات كإعلام مصري محترم ، بالإضافة إلى إنها تقدم محتوى فعلاً يستحق المشاهدة بدون تشويش إعلاني ، إلى جانب حبي لبلدي ورغبتي فى أن أجدها تمتلك إعلام يحترم عقلية وآدمية المشاهد قبل أن يهتم بجذب المعلنين وحشد أموال الإعلانات

وبما إن شعار القناة هو إسأل مجرب من رمضان اللي فات ، وبما إنى مجربة وعارفة فكالعادة رمضان سيكون 24 ساعة إعلانات وباقي اليوم - إن كان له باقي - مادة جاذبة للمشاهدين ، وذلك أحب أن أقترح على القناة أن تقوم بعمل برومو أو إعلانات للإعلانات التي سوف تعرضها فى رمضان ، حتى يتوقع المشاهد ما سيؤل عليه الوضع عندما يقرر أن يشاهد أي شئ في رمضان على قنوات الحياة !ا