Think Differently

طبعا زى مانتوا عارفين الواد كاميكازعشان ثقافته مش عالية زى حلاتى فمفهمش حاجة من العنوان ولا من الصورة وقعد يصوت ويحتج ويندد ويشجب ويرفض فى البوست وراسه والف كاميكازاية انى مادخلش احط البوست فى المدونة، يهديك يرضيك يا كوكو ، ابدااااااااااااااا

.

شكله مابيجيش بالذوق، قمت مسكاه من تيشيرته الكاميكازى وحدفته ع الكرسى اللى على باب المدونة وربطه ربط شدييييييييد عقبال ما اخلص واكتب البوست العجيب ده

.

بس صوعوب عليا بقا عشان هو غلبان وكوكو فحقوله انا كاتبة كدة فى البوست ليه .. بقا يا جماعة الحمد لله نفسيتى ابتدت تظبط الحمد لله وده كان نتيجة انى حاولت احسبها حسبة تانية .. وقد كان ، حاولت افكر بطريقة مختلفة وابقى اكثر مرونة فى مواجهة نفسى واحزانها ده اولا وفى مواجهة حياتى والناس بشكل عام ده ثانيا .. وكل مشكلة وليها حل وربنا كريم وان شاء الله خير

.

بحاول ارجع لياسمين الأولانية المتفائلة اللى دايما بتضحك وتحب تضحك غيرها ، هرجع اقرا من تانى ان شاء الله واكتب كمان زى الاول من الاخر كدة ححاول ألاقى نفسى وارجعلها إن شاء الله .. وسبحان الله جاتلى سفارية مصيف وكدة فى وقتها الحمد لله ..نفسى اعمل ريستارت لنفسى شوية

.

الله ماتزقش ياواد يا كوكو مستعجل على ايه .. مش حاخدك معايا طبعا انت هنا مكانك المدونة دى امانة فى رقابتك انت .. عبيط ده ولا ايه

.

المهم اما احكى معاكوا شوية بقا قبل ما اقوم اعمل كام مشاور كدة ، امبارح بعد الغدا قعدت قدام التلفزيون اتفرج شوية ونعست فنمت حبة ، حلمت حلم جمييييييييييييييييييييل ، ماخبيش عليكوا كنت بحلم بفارس أحلامى وكان بيفسحنى تقريبا وكنت مبسوطة اوييييييييي ، لاقيت مرة واحدة الحلم اتقلب كابوس وزعيق وشخط ونطر من جارنا ومراته

.

هى: انت فوضوى ومالكش فى النضافة

هو: احترمى نفسك بقولك

هى: احترم ايه انت خليت فيها احترام .. حد يفتح باب التلاجة ويسيبه مفتوح فى الدنيا

هو: لمى نفسك بدل ماجى الطشك بالقلم

هى: انا مش عارفة اخرتها ايه معاك مش عارفة

هو: اخرتها سودا إن شاء الله
.

يا فتاح ياعليم يا رزاق ياكريم .. بقا هو ده الجواز؟؟ بقا هو ده الحب؟؟ .. لا حول ولا قوة الا بالله

نفسى اتسدت اوى ساعتها وحسيت ان الحلم الجميل اللى كنت بحلم بيه عبارة عن طُعم عشان ادخل القفص ده برجلى وبمزاجى ... خدعة يعنى من الآخر كدة

.

شوية نزلت عشان اقيس الضغط اصلى كنت تعبانة شوية بعيد عنكم لاقيت البت بنت الجيران اللى فى اعدادى راكبة معايا ..هى اطول منى صحيح بس هى فى اعدادى الحق يتقال يعنى ، بس الاسانسير عندنا فيه مراية عقبال عندكم فقعدت اظبط فى الطرحة لاقيتها بتبصى وتبرقلى جاااااااامد كدة وتقولى: انتى لسة متخطبتيش؟؟؟!!!!ه

جاتلى صدمة الصراحة .. هو فى ايه يا جدعان؟ .. قلتلها بإستنكار: هه .. انا؟؟ .. لا لسة متخطبتش

هى: انتى فى سنة كام السنة دى؟

إنسانة: اتخرجت خلاص

هى: بجد؟؟ يعنى عندك 21 سنة؟؟؟

اللهم طولك ياروح: ايوة عندى 21 سنة
.

كدة بقا كتيييييييييييييير اوى بجد .. وانا مش مكبرة الموضوع ولا حاجة ومش طبيعى ابدا ان اى مكان اى البنت تكون فيه لازم تتسأل اتجوزتى ولا اتخطبتى .. لا حول ولا قوة الا بالله

.

الموقف الخنيق ده فكرنى بموقف تانى اخنق منه كنت راجعة فى يوم من كتب كتاب صحبتى وكنت فرحنالها اوى .. ربنا يتمم بخير يارب .. وقفت اطلب الاسانسير "تقريبا الاسانسير ده هو اللى جايبلى الكافية انا بعد كدة حستخدم السلم واريح دماغى" ... لاقيت جارنا عارفينه من زمان متجوز وعنده عيلين لذاذ كدة سلم عليا وسلمت عليه ولاقيته بحلقلى واذبهل وانشكح فجأة كدة وقالى: إنتى تجوزتى؟؟!!!!ه

إنسانة: هه.. انا؟؟؟ .. لا

هو بنفس الإنبهاجة ياربى سبحان الله: إتخطبتى؟؟؟!!!ه

ابتديت اقلق على نفسى بقا شوية شوية يقولى وشك اصفر ولونك مخطوف قلتله : لأ

قام سايبنى وكمل اذبهاله ومشى

.

لا حول ولا قوة الا بالله .. هو انا حلاقيها من عمو وطنط ولا الواد جارنا ولا البت جارتنا .. شكلى كدة حرفع قضية ع العمارة كلها بما فيهم الأسنانسير كمان .. ناس غريبة صحيح

.

المهم بقا حسيبكم عشان الحق ارتب حاجتى عشان اسافر ان شاء الله .. اسبوع حغيبه كدة بإذن الله وسايبة الواد كوكو هنا يا جماعة واى تقصير فى ايوتها حاجة قولولى بس لما اجى .. عايزة الاقى تقارير كدة مهببة عن البلاوى السودا اللى بيعملها الواد كوكو وانا مش فى المدونة، وكمان عايزة لما ارجع ان شاء الله اكلمكم عن حملة يلا ننضف مصر وعن الشاب بتاع هونج كونج واحتمال انزل بوست راديو ياسمين ولو منفعش حنزله بعد رمضان ان شاء الله .. المهم اشوفكم على خير يارب والاعمار بيد الله زى مانتوا عارفين فأوصيكم ونفسى بتقوى الله فى السر والعلن وربنا يجعلنا من المتقين

.

استودع الله دينكم وأمانتكم وخواتيم اعمالكم

السلام عليكم

إعترافات وتليفونات

ازيكم ياجماعة عاملين ايه؟؟ .. كل سنة وانتوا طيبين رمضان اهوه قرب ويارب ربنا يبلغنا رمضان ونطلع منه مغفورلنا جميعا اللهم امين

عندى كام اعتراف كدة عايزة اعترفهم قبل ما تقروا البوست

.
اعتراف رقم واحد: انتوا وحشتونى اوى اوى اوى اوى بجد

.

اعتراف رقم اتنين: بعتذر لانى مش بعلق عند اى حد ولا حتى برد على التعليقات عندى وده لأنى من ساعة ما اتخرجت وانا مش متظبطة نفسيا ولحد دلوقتى لسة مارجعتش زى الأول

.

اعتراف رقم تلاتة: ياجماعة انا مكنتش عاملة حداد عشان شيماء ربنا يرحمها ويغفرلها يارب ..لان الحداد فى الإسلام 3 ايام بس واحنا عرفنا الخبر بعد وفاتها بإسبوع فكل اللى حصل مكنش حداد .. كان مشاعر اخت لاختها

.

اعتراف رقم اربعة: عايزة اعترفلكم انى من بعد التخرج وانا مش متظبطة زى ما قلتلكوا لدرجة انى كنت حقفل المدونة ومش بدخل عندى ولاعارفة اكتب زى الاول ولا بدخل مدونة حد .. ماليش نفس لاى حاجة .. كنت حاولت اظبط من نفسيتى شوية وابتديت اكتب بوست ماتسموعنا زغروطة .. بعدها بيومين عرفت خبر وفاة شيماء وكتبت البوست ومن بعد ما كتبته بجد مبقتش قادرة ادخل مدونتى خااااااااااااالص والله وتقريبا مش بدخل النت .. الحمد لله على كل حال .. بعدها كتبت وتستمر الحياة عشان كدة كدة حتستمر سبحان الله

.

بس انا حبيت اقول الكلتمين دول فى الأول لكل اللى عايز يطمن عليا وحاسس انى مش فى المود .. ياجماعة بجد ادعولى ربنا يهدينى ويرزقنى الخير يارب .. واهم دعاء وادعوا بيه لنفسكوا كمان ان ربنا يخرجنا كلنا من الدنيا دى على خير اللهم امييييييييييييين

.

ربنا يستر شكلى داخلة على اكتئاب .. تمام يعنى انا دلوقتى مكتئبة .. يا شماتة كاميكاز فيا

.

احم احم .. سيادى آنساتى سادتى .. وكما عودتكم الإنسانة صاحبة هذه المدونة ان تقابل كل همومها بالإبتسام والتفاؤل والإشراق .. حتقولولى جتبى كل الإشراق ده منين يا لئيمة ؟؟ .. حقولكم مش ربنا كريم وهو رب الكون الوكيل؟؟ يبقى منفائلش ليه بقا؟؟ .. ان شاء الله خير وحيفظل ظنى فيه خير دايما .. سبحانك يارب

.

المهم كنت عايزة احكيكوا على موقف كدة .. من كام يوم بابا خلانى اروح ادفع فاتورة التليفون .. ودى اول مرة فى حياتى اروح سنترال وادفع فاتورة تليفون .. عادى بتحصل يعنى

.

روحت لاقيت خير اللهم اجعله خير .. حاجة كدة عاملة زى بيت جحا ( بتعطيش الجيم ) .. لاقيت اربع شبابيك .. اتنين للرجال واتنين للنساء وقدامهم طوابير طويييييييييييييييييييييييييييييييييييييييييييييييلة اوىىىىىىىىىى .. حعمل ايه يعنى .. مش قدامى غير انى استنى

استنينا

.

نلاقى بقا ان الطوابير دى مش بتمشى خاااااااااااااااااااالص .. ليه يا جدعان؟؟ .. اصل الموظفين مشيوا .. يالهوى راحوا فين دول!!! .. قال ايه النتوورك بتاعة السنترال وقعت !!!! واحنا واقفين

.

وعليها يا سادة .. النتوورك بقا ربع ساعة تيجى وتروح نص ساعة والموظفين يروحوا ويجيجوا .. واحنا واقفين

.

الناس اللى وقفت ورايا بقت اكتر من اللى قدامى ، الطابور وصل لحد الشارع برا تقريبا .. والاكسجين ابتدى يتشفط ومافيش حاجة الواحد يسند عليها حتى .. واحنا واقفين

.

واقفين

.

واقفين

.

واقفين

.

واقفين

.

واقفين

.

واقفييييييييييييييييين

.

بقالنا اكتر من ساعتين واقفين والناس تعبت من كتر الواقفة وتقريبا الشعب المصرى لما يتعب بيبتدى يهيس .. احلى تهييس بقا

.

الشباكين بتوع الرجالة ياعينى واقفين وساكتين وصابرين على ما بالهم .. الدوشة كلها كانت عند الستات وكل ست ادلت بدلوها بقا .. اللى بتشتكى من جوزها اللى مخزن الفلوس على قلبه قد كدة ومأرطها عليها وعلى عيالها .. واللى عيالها مستلمين التليفون مش بيسبوه وفى الاخر تتدبس هى فى الفاتورة .. واللى عايزة ترجع البلد .. واللى لسة جاية من البلد واللى بنتها عيانة فى البيت واللى جايبة بالبيبى بتاعها واللى جاتلهم هيسترية ضحك بدون مناسبة واللى واللى واللى

.

جم بنتين واقتحموا الطابور عنوة ( بالعافية يعنى ) ووقفوا قدام .. الاول كان الموضوع عادى وغنوا حاجة لعدوية تقريبا .. مش قادرة انسى نظرة الشاب اللى كان فى طبور الرجال للبنتين دول .. ساعة الجد بقا قامت خناقة عشان البنتين عايزين يخدوا دور مش دورهم

.

الست اللى فى الطابور: ده مش دورك يا ماما ارجعى ورااااااااا

البت اللى داخلة عافية: ايه يامامااااا هو انتى بس اللى فيكى صووووووت؟؟ ماحنا كمان بنعرف نزعق كوييييس .. ما تيجى تدينى قلمين احسسسسسسسن

.

هههههههههههههههههههههههههههه

لا حول ولا قوة الا بالله .. انا ايه اللى جابنى هنا

.

واحدة كبيرة وقفت جمبى وتعبت من الوقفة فواحدة تانية بتقولها: خلى عيالك يبطلوا رغى فى التليفونات شوية .. ردت قالت: لأ ماهو اللى كان بيرغى الله يرحمه بقا ابو العيال

.

انا فى سرى: الله يرحمه

شوية لاقيتها تعبت وميلت على الحيطة وبتدندن وتقول: لو ماكنتش انت تدلعنى مين حيدلعنى؟؟؟

انا فى سرى برده: !!!!!!!!!!!!!!!!! .. لا حول ولا قوة الا بالله

.

طول عمرى فاكرة نفسى فوضاحية مابيتبلش فى بقى فولة .. بس بعد ما شوفت طنط واحدة تانية اتأكدت انى كتومة جدا .. طنط دى من الاخر فضحت كل افراد عيلتها نفر نفرررررر .. حكت على جوزها وبخله .. وبنتها خريجة حاسبات ومعلومات واللى بتشتغل فى جامعة القاهرة وبتقبض 900 جنيه فى الشهر وجيابة عريس عايز يجيب غوشتين شبكة وطنط مش موافقة عليه ومش راضية ابدا

انا: ليه ياطنط ماتوافقى وربنا يتمم بخير ( شوفتوا الطيبة )ه

هى: لا يابنتى ده ساكن فى ابو زعبل .. ترضى انتى تعيشى فى ابو زعبل؟؟

انا: معرفش هى فين عشان اقول اه او لأ الصراحة

هى: وبعدين ده شكله وحش .. العريس كدة لازم يبقى امور عشان الواحد يتفشخر بيه وبجماله

انا: ياطنط احنا مالنا ومال شكله .. الراجل مش بالشكل خالص

هى: لالالا انا مش طايقاه .. حاسة انه رخم

.

الوقت بيعدى .. واحنا واقفين

.

واقفين

.

واقفين

.

الموظفة اللى واقفة مش طايقانا ولا طايقة نفسها ... وفى وسط الجحيم اللى احنا فيه كل شوية تطلع ازارة تلج كبيييييييييييييييييييييرة تشرب فيها لوحدها .. عااااااااااااااااااااااااااااااااااا

طنط اللى فضحت الدنيا: ياربى الساعة بقت 3 ولسة حروح واطبخ

انا: طبخ ايه ياطنط ده حضرتك تروحى تشربى ماية وتنامى على طول

طنط: لا ده عشان انتى بنت تقولى كدة .. لكن لما تتجوزى حتعملى كلللللللللل حاااااااااااااااااجة

انا: الله يطمنك يا طنط .. هو انا اتعقدت من الجواز من شوية

طنط: يالهوى انتى متعقدة؟؟ .. لالا ماتتعقديش يابنتى اتجوزى وعلى ضمنانتى

انا: استر يارب

.

.

فضلت واقفة تلات ساعات ياجماعة لغاية ما جه الدور عليا وساعتها كنت فطست بجدارة وستر ربنا انى مأغمش عليا هناك

.

ربنا يسامحك يا بابا .. ويسامحك يا طنط .. ويسامح النت وورك اللى قرفتنا فى عيشتنا

وتستمر الحياة

وتستمر الحياة

بين ابتسامه وآه

فيها اللى تاه فى دجاه

واللى ضميره هداه

.

لملم جروحك يا حزين واسعى

واهى دى الحقيقة بس منسية

وكلنا ولاد تسعه وبنسعى

ودى مش وسية الناس سواسية

.

لملم جروحك يا حزين وامشى

خطوة كمان وتخف آلامك

واحلم بعين صاحية ولا تنامشي

غير لما تقطف زهر احلامك

.

وتستمر الحياة

بين ابتسامه وآه

فيها اللى تاه فى دجاه

واللى ضميره هداه

.

تتر مسلسل الوسية

Shiko online

شيماء .. بنت مصرية عندها 28 سنة مصممة جرافيك ، عرفتها فى شهر يناير تقريبا .. دخلت عندى وكتبت فى الشات بوكس وابدت اعجابها بمدونتى ، زورتها فى مدونتها ولاقيتها فنانة زوقها عالى وكتابتها حساسة جدا، لما تدخل عندها البلوج تحس انها مدونة اختك او حد انت تعرفه كويس ، بنت مصرية محبة للحياة اوى والابتسامة مش بتفارق وشها .. جميلة ومتفائلة ودمها خفيف وذوق ، مكنتش بتابع كل مواضيعا للأسف عشان ظروف الدراسة وكدة .. بس هى كانت دايما بتابع كل مواضيعى تقريبا وعلى طول تسأل عنى وتدعيلى .. ولو جالها تاج الاقيها مهتمة انها تبعتهولى ... رغم اننا منعرفش بعض بشكل شخصى مكنتش تنادينى غير بـ " أجمل إنسانة " ..ه

.

بعد هوجة المذاكرة والإمتحانات إكتشفت انها مش على الساحة خالص .. إتخفت تماما .. حتى موضوع مبنى الحجيم اللى معظم الناس علقت عليه لاقيتها معلقتش .. لا عندى ولا عند غيرى ، ساعتها كانت جاية على بالى قوى ونفسى اطمن عليها ، بس للأسف كنت مضيعة اللينك بتاعها واخيرا عترت فيه ولاقيتها كاتبة بوست وبتقول:ه

غياب لاجل يعلمه الله

حقيقى وحشتونى جداااااا
ومش عارفه هتوحشونى لحد امتى
لكن كل اللى متأكده منه انى محتاجه دعواتكم
التجربه الصحيه اللى بمر بها مش بسيطه
اذا ربنا كتب لى الشفاء منها هاحكى لكم عنها بالتفصيل
تحياتى لكم كلكم

.

اتخضيت عليها جدا .. معقولة تبقى جاية على بالى لأنها تعبانة وفيها مكروه؟؟ .. لا حول ولا قوة الا بالله

كتبتلها تعليق وسبتلها ايميلى وطلبت منها تطمنى عليها

ردت على التعليق وقالت:ه

مش عارفه اقولكم ايه .. حقيقى اكتشفت قد ايه وحشتونى وقد ايه بحبكم وعشان كده كلمة شكرا ليكم قليله انتوا بدعواتكم والبوستات اللى اتعملت عشانى خففتوا عنى كتير ربنا يخليكم ليا شكرا يا عمرو،انسانه،كوكو،بندقة،القادم اجمل،وحيد،فنان،محمود على،شاه .. واتمنى لكم دايما كل خير

وردت على الشات بوكس وقالتلى:ه

اجمل انسانه الله يسلمك يا حبيبة قلبى والف شكر على سؤالك عليا

انتظرت انها تضيف إيميلى عشان اطمن عليها بس محصلش ، فتحت النهاردة الإيميل بتاع المدونة ولاقيت ايميل ضايفنى وصاحبه اون لاين .. سألت مين معايا؟؟ .. قالتلى هوندا، سلمت عليها وكدة .. وقالتلى معلش ياياسمين مش حقدر اتكلم ولا اتعرف عليكى دلوقتى لإن حالتى كرب خالص

لسة حقولها ربنا يفك كربك وخير فى ايه؟؟ .. لاقيتها بتقولى تعرفى ان شيكو ماتت؟؟

مصدقتش اللى بتقوله .. اكدتلى ان اخو شيماء كاتب فى البلوج خبر وافتها .. روحت ولاقيت التعليق ده: ه

أحمد صفوت said...
السلام عليكم أنا أحمد أخو شيماء(شيكو) صاحبة هذه المدونة .. أعزائي ضيوف المدونة أعلمكم بأن شيماء توفيت إلى رحمة الله تعالى ليلة النصف من رجب وكانت قد أوصتني أن أعلمكم بهذا الخبر وأن أسألكم أن تقرأوا لها الفاتحة وتدعو لها بالمغفرة والرحمة ونظرا لعدم معرفتي بكلمة المرور الخاصة بها فقد دخلت وكتبت هذه الرسالة ضمن التعليقات أقسم عليكم بالله أن تدعو لها .. رحمك الله ياشيماء وأسكنك الفردوس الأعلى .. موعدنا الجنة إن شاء الله

.

إنا لله وإنا إليه راجعون

اللهم أجرنا فى مصيبتنا واخلف لنا خير منها

شيماء توفت يوم السبت اللى فات بعد ماخفت من مرضها .. توفت قضاء وقدر ، كانت بتسلم على كل اصحابها وزمايلها فى الشغل وقرايبنا وكأنها حاسه باللى هيحصل ، كانت مخططة تروح عمرة وكانت بتصلى حتى وهى فى المستشفى ، كانت ثابتة ومتماسكة وكانت هى اللى بتحاول تصبر اللى حواليها

توفت وهى عندها 28 سنة ياجماعة .. لا اتخطبت ولا اتجوزت ، توفت بعد ما خفت من مرضها سبحان الله .. عشان نعرف ان كلنا ممكن نبقى فى نفس موقفها وان الموت مالوش اسباب ولا له سن معين

وكم من فتى امسى واصبح ضاحكاً .. وأكفانه فى الغيب تنسج وهو لا يدرى

انا فقدت اخت عزيزة جدا عليا والمجتمع التدوينى كله فقد مدونة من المدونات المحترمة جدا .. وببلغ تعازيا وتعازي كل المدونين لأهلها .. ربنا يفرغ عليكم صبرا .. يارب آمين

.

ربنا يرحمك يا شيماء .. اللهم ياجامع الناس ليوم لا ريب فيه إجمعنى بيها فى الفردوس الأعلى .. يارب انا معرفهاش شخصيا بس أشهدك انى احبها فيك .. يارب كما احببتها فيك أسألك وأقسم عليك بعزتك وجلالك ان ترحمها وتغفرلها وان تجعل قبرها روضة من رياض الجنة وان تبدلها داراً خيرا من دارها واهلاً خيرا من اهلها وتغمدها برحمتك وكرمك يارب العالمين .. يارب انها بين يديك الان .. يارب ارحمها واغرفها لها وتجاوز عن سيئاتها .. يارب انها فى دار الحق ونحن فى دار الباطل .. اللهم ارحمنا إذا صرنا إلى ما صارت إليه .. يارب افرغ على اهلها صبرا .. يارب صبر أمها واجمعها بكل من احبت فى الفردوس الأعلى فى صحبة سيد الخلق عليه الصلاة والسلام

.

اللهم ارحمنا جميعا فإنك بنا راحم .. ولا تعذبنا فإنك علينا قادر .. اللهم ارزقنا من يترحم علينا بعد وفاتنا .. يارب اخرج الدنيا من قلوبنا وازهدنا فيها ..اللهم إنا نعوذ بك من طول الأمل والتعلق بالدنيا .. اللهم إنا نشكوا إليك سؤ نفوسنا .. يارب اهدينا .. يارب اهدينا لأقرب من هذا رشدا قبل فوات الأوان يارب

يارب استجب .. يارب استجب .. آمين آمين آمين .. وصلى الله على سيدنا محمد وعلى آله وصبحه وسلم

أسألكم جميعاً الدعاء لشمياء ولكل موتى المسلمين

ماتسمعونا زغروطة

طبعا مستغربين عاوزة اسمع زغروطة ليه؟؟ .. سؤال وجيه بس استنوا قبل ما اجوابكوا

الله يبارك فى كل اللى باركلى على النتيجة واللى مابركليش كمان .. ويارب اللى لسة بيدرس عقباله لما يطلع بتفوق يارب واللى اتخرج خلاص عقبال انجاله واحفاده بقى

وبالنوسبة للواسطة فبعلنها قدام الناس كلهااااااااااااااااااا .. معنديش واسطة .. وسطتى ربنا وظنى فى الله خير إن شاء الله

بردو ماقولتش ازغرط ليه؟ .. مصممين تعرفوا؟؟؟ .. هو موضوع هايف اوى بس انتوا حريين .. براحتكوا يعنى

بصوا بقى ..مبدأيا كدة انا اصغر عضو فى اعضاء بيتنا ، مش مدلعة ولا حاجة بس زى ماتقولوا كدة إتكالية شوية ولازم اعتمد على حد تانى مايكونش انا .. ده مش فى كل حاجة اكيد بس الغالب يعنى ، بس لما بقيت اكبر بقت كمية الحاجات اللى بعتمد فيها على غيرى تقل خاااااااااااااااااالص وبدأت الحكاية دى من اول ما اختى اتخطبت وبعدها اتجوزت .. اختى اكبر منى بـ9 سنين .. زى ماما كدة بالنسبالى وعلى طول بتاخد بالها منى ومن البيت .. لما اتجوزت بقيت انا اللى لازم اخد بالى من البيت ومن بابا وماما كمان .. خصوصا لما ماما دراعها اتكسر وبقى عليا الطبخ والتنضيف وكل حاجة فى البيت تقريبا .. الحمد لله .. حاليا بقوا هما اللى يتكلوا عليا .. اكل مثلا .. اخد بالى من البت سولى بنت اختى .. اعمل مشاوير لبابا وهكذا دوليك .. الحمد لله رب العالمين

المهم

الكمبيوتر كان طالع عينه ومليان فيروسات ومافيهوش كارت صوت كمان ومحتاج ينزله ويندوز جديد ويتجاب كارت صوت .. اخويا زى ماتقولوا كدة مهندس كمبيوتر شاطر جدا كمان .. بس باله طويل وعلى طول مش فاضيلى .. وانا طبعا لا بعرف انزل ويندوز ولا اجيب كارت صوت ولا حاجة ابداااااااااااااااا ... اعمل ايه؟ اعمل ايه؟ اعمل ايه؟؟

طلعت مرة مول كمبيوتر كنت عايزة اشترى حاجة وسألتهم على كارت صوت وعرفت تمنه وبيتركب ازاى وكدة .. وعليها بقى عملت جدوى إقتصادية للموضوع - فيزابيليتى إستادى يعني - وعرفت الحسبة حتطلع قد ايه وبابا تفضل مشكورا وادانى الفلوس

روحت زى الشاطرة اشتريت كارت صوت وسماعة ومايك .. ووفرت فى الفلوس اوى على فكرة .. منا إقتصاد بقى ولازم أوجب مع نفسي برضه

بس جيت البيت اتحايل على اخويا ينزلى ويندوز .. هو مش فاضيلى اصلا .. وانا يعنى حستناه .. جبت الاسطوانة وحطيتها ومشيت مع الخطوات لحااااااااااااد ما الويندوز نزل

هييييييييييييييييييييييييييييييييييييه

لولولولولولولولىىىىىىىىىىىىىىى

وركبت كارت الصوت والسماعة والمايك واشتغلوا الحمد لله

لولولولولولولولولولىىىىىىىىىىىىى

تقدم ياجدعان .. انا مش مصدقة انى عملت الحاجات دى لوحدىىىىىىى .. احمدك ياااااااااااااااااااااااااارب

المصريين اهما والبلوجريين اهما والإنسانيين اهما

ول يا ول

مأفورة فى الإنبساط انا عارفة .. لإنى بصراحة لما النتيجة طلعت فرحت وكل حاجة بس محدش احتفل بيا .. الحمد لله على كل حال .. يمكن يحتفلوا بيا بعدين ولا حاجة

كان نفسى اسمع زغروطة .. او اروح فى الصحرا بعيد ومحدش سامعنى واهيص براحتى .. اصلكوا مش واخدين بالكوا الزغروطة دى ليها معايا مواقف لا تحصى

وانا صغيرة زمان حسبة 10 سنين كدة كنت فى فرح بنت خالتى ويوم الفرح الصبح بنات خالتى التانين علمونى ازاى ازغرط .. وعليها بقا كل شوية أهبل ، كنت اجى الساعة 3 الظهر والناس نايمة وبيأيلوا عشان يعرفوا يركزوا بالليل فى الفرح واطلع فى البلاكونة فى عز الشمس وازغرط مع نفسى كدة هههههههههههههههههههههه

نصيبة والله

ومرة تانية إيناس كانت بتكلمنى فى التليفون والأهلى جاب الجون الرابع .. وعينيكوا ماتشوف اللى النور .. لولولولولولوللىىىىىىىىىىىىىىىىىىى فى السماعة لما البت اصنجت هههههههههههه .. معلش حقك عليا يا نوسة

بتكسف ازغرط قدام مخاليق ربنا من الرجال ، ده غير إنى صوتى عالى وبحس انه مزعج جدا وربنا يكون فى عون مخاليق ربنا اللى بتعاملوا معايا من الجنسين .. المهم مرة كنت فى كتب كتاب صحبتى فى الكلية .. وصحبتى دى مكنش عندها قرايب فى سنها خاااااااااااااااالص .. كلهم كبار وعاقلين ومتجوزين ومخلفين ومش بيهيصوا خااااااااااااااااااالص .. الصمت الرهيب ، طنط ماماتها ياعينى جاتلنا وقعدت تتحايل علينا نهيصلها شوية .. بصراحة صعبت عليا .. عايزة تفرح ببنتها بردو .. بس إزاى واحنا متشيكين كدة وطلبة محترمين فى كلية محترمة يعنى

كله رفض انه يزغرط ماعدا انا وإيمان .. عملنا زى سماعات الإستريو .. هى طويلة فزغروطتها تسمع الناس اللى فوق وانا قصيرة وصوتى عالى فبسمع الأغلبية اللى قاعدة .. تنظيم إستراتيجي للزغروطة بقى

ساعتها ياعينى كان فى مدام محترمة جدااااا حظها العثر - أي والله العثر - خلاها تقف قدامى وانا برقع الزغروطة .. كانت طالعة منى على صرصور ودنها رشق .. الست اتنفضت واتخضت جاااااااااااامد وحاطت صوابعها فى ودانها وبقت فى حالة صعبة جدا .. وهى واقفة قدامى وانا لسة طالعة بالزغروطة ولا اجدعها صاروخ فى مرحلة الإنطلاق وطبعا ماينفعش اوقف الزغروطة فى أولها .. هى تستنى لكن الزغروطة لأ !!ا

بس فحطيت إيدي على كتفها وشاورتلها بإيدى إنها تستنى لما اخلص .. فضلت مستنية وفى عنيها نظرة رعب رهيبة وخضة جامدة وصوابعها فى ودانها كأني حطلق قنابل مدوية من زوري .. وانا منفضالها وشغالة عادي خالص وصحابى بيموتوا من الضحك .. اول ما خلصت المهمة الزغروطية الصعبة تنفست الصعداء فى إبنهاج وسعادة كإنى أنجزت مهمة حربية عويصة وطبطبت على كتف طنط بفخر كدة وقلتلها: معلش ياطنط .. ماتخديش فى بالك !!!!ا

طبعا انتوا مستغربين ايه التوهة اللى دخلتكوا فيها دى .. تحمل مسؤلية على كارت صوت على زغاريط على هيصة ... بصراحة ياجماعة انا جوايا هموم كتير ونفسى اخرج منها وافرح بس بجد مش عارفة .. قلت اجى اطلع اللى جوايا فى المدونة يمكن اعرف افرح هنا والاقى اللى يشاركونى فرحتى

ماسمعتش زغروطة يعنى!!ا