الحمد لله رب العالمين .. إتخرجت

أيها السادة الكرام .. إليكم هذا النبأ الهام .. حدث فى هذا اليوم التاريخى الموافق 24 من شهر يوليو سنة 2007 ميلادية و العاشر من رجب لسنة 1428 هجرية فى تمام الساعة الرابعة و16 دقيقة .. كنت فى ميدان التحرير انتظر اى ميكروباص معدى بينما يتساقط علينا عرق الشعوب .. فى هذه الأثناء سمعت صوت رسالة لسة واصلة طازة صادر من شنطتى السوداء

قلت يارب خير

رسالة مبعوتة من ايناس صحبتى مكتوب فيها كلمتين بس

elnatiga tel3et

.

وكانت هذان الكلمتان كفيلتان ان يصيبانى بالذعر البالغ - ايه النحوى اللى بكتب بيه ده - اتصلت بيها جرى ، قالتلى بصوت يملأه القلق : النتيجة طلعت يا ياسمين .. خدى نمرة امانى وهى حتقولك نمرتك .. وابقى طمنى طنط

انا : اطمن مين؟؟ .. انتى قولتى لماما؟؟؟؟؟؟؟؟؟

هى: ايوة سألتنى ومكذبش عليها

انا: ليه بس كدة يا ايناس حرام عليكى .. ماشى ياايناس انا حتصل بأمانى اهوه

.

طلعت ورقة وقلم من الشنطة ووركنت على جمب مستعدة للكتابة ومسكت الموبايل واتصلت بأمانى

هذه الرقم مرفوع مؤقتاً من الخدمة .. حاول الإتصال فى وقتٍ لاحق

يادى النيلة السودا .. هى ناقصة؟؟ .. يارب استر يارب - ساعتها كنت بموت بجد - اتصلت بإيناس

.

انا: ايوة يا ايناس الرقم مرفوع .. هاتيلى رقم اى حد تانى يجيبهالى

ايناس: انتى فين دلوقتى؟

انا: انا فى التحرير ومش حينفع اروح الجامعة خالص

ايناس: خلاص ياياسمين اقفلى دلوقتى وانا حظبطك .. سلام

انا: سلام

.

لاقيت نفسى راكبة ميكروباص .. مكنتش حاسة بنفسى وكنت حاسة ان تايهة فى زحمة الناس والنتيجة هى اللى حتخلينى اعرف اروح ، ركبت وقعدت احتضر جوا الميكروباص ... احمل فى يدي الموبايل والورقة والقلم واحتضر وانتظر

فجأة الموبايل رن .. استرها يارب

.

بابا : ايوة ياياسمين انتى فين؟

انا: ايوة يا بابا انا فى السكة على وصول ان شاء الله

وقفلت واستمريت فى الإنتظار والإحتضار

وانتظر

واحتضر

وادعو الله

فجأة رن الموبايل .. نمرة بيت إيناس

.

.

انا: ايوة يا إيناس ثانية واحدة

انا لسواق الميكروباص : ممكن توطى الكاسيت شوية الله يكرمك ثوانى بس .. ودارت المكالمة فى إنصات واهتمام بالغ من الركاب

انا: ايوة يا ايناس

ايناس: جيد تقدير رابعة والتقدير العام التراكمى جيد

انا: انا يا ايناس ؟؟ اللى بتقوليه ده تقديرى انا؟؟؟

ايناس : ايوة يا ياسمين

انا: ايناس انا مش شايلة حاجة؟؟؟؟

ايناس : لالا يابنتى الحمد لله

انا: انتى بتتكلمى بجد؟؟؟؟؟؟؟؟

ايناس : ايوة والله .. وانا حبقى اطمن طنط عشان زمانها قلقانة دلوقتى .. ولما تروحى اتصلى بيا عشان اقولك التفاصيل

انا: لا انا هبقى اطمنها .. ربنا يكرمك يارب ايناس

.

.

جموع من الركاب: عايزين الحلاوة بقا .. الف الف مبروووك

فضلت اعيط واحمد الله وانا مش مستوعبة قلتلهم: ربنا يكرمكم يارب

.

مسكت الموبايل واتصلت ببابا: ايوة يا بابا تقدير رابعة جيد والتراكمى جيد

بابا: الف مبروك يابنتى .. الحمد لله رب العالمين

انا: الله يبارك فيك يارب .. طمن ماما

.

.

شوية واتصلت هند : ايوة يا ياسمين انتى جبتى جيد مرتفع

انا: هو مرتفع ولا جيد بس؟؟؟

هند : لا مرتفع ياحبيبتى الف مبرووووك

انا: الله يبارك فيكى والف الف مبروووووووك ليكى حبيبتى

.

.

روحت البيت واستقبلتنى امى بالاحضان والدموع وبالفرحة .. حسسيتنى انى أميرة متوجة على عرش قلبها .. يا حبيبتى يا امى .. انا مش فرحانة ليا خالص انا فرحانة انى فرحتها وفرحت بابا .. ويارب اموت وهما راضيين عنى اللهم امين

اتصلت بإيناس وخدت التفاصيل

.

.

ناجحة فى رابعة بتقدير جيد .. مش عارفة مرتفع ولا لأ .. بس الحمد لله

التقدير العام جيد

تقدير بحث التخرج إمتياز الحمد لله

.

يارب لك الحمد حمداً كثيراً طيباً مباركاً فيه .. ملئ السموات وملئ الأرض كما ينبغى لجلال وجهك ولعظيم سلطانك

.

.

اجدع بنت شوفتها فى حياتى ... ألف مبروك لإيناس ، إيناس تبقى

lost in the web

والف مبروووك لآلاء ولإسراء ولإيمان ولهند ولكل الدفعة بجد ولكل الناس ويارب الكل ينجح فى حياته زى مانجح فى الكلية بفضل الله .. الحمد لله رب العالمين

.

.

ثانية واحدة عايزة اقولكوا حاجة قبل ما تمشوا

انا فكرت كتير فى انى اقفل البلوج .. نظرا لظروفى فمش قادرة اتابعها ولا اكتب فيها زى الاول ولا ارد ع التعليقات اللى بجد بتسعدنى جدا ، فكرت كتير فى الموضوع ده ... بس لاقيت ان البلوج دى مش مجرد مدونة .. لا دى جزء مهم جدا منى ومقدرش اسيبها ، فحخلينى فتحاها ان شاء الله وححاول مين حين لآخر اكتب فيها على قد ما اقدر بإذن الله ، وارجوكم اعذرونى لو قصرت فى الرد ع التعليقات .. لان بجد الظروف اقوى منى

جزاكم الله عنى خير الجزاء يارب

:)

.

.

.

مالك يابت قلبتيها غم كدة ليه ده انتى ناجحة

ولا غم ولا حاجة يا كوكو .. وزغرطى ياللى أسمك إنسانة

.

لولولولولولولولولولىىىىىىىىىىىىىىىىىىىىىىىىىىىىىىىى

ياحرقة قلبى

اعتذر ياجماعة مبدأياً عن البوست ..ه

.
فيلم أسرار البنات كان عندى ع الكمبيوتر ، شوفته من باب الفضول ليس إلا ححكيه للى ماشفهوش.ه

ياسمين .. ده اسم بطلة الفيلم بنت فى اولى ثانوى، الفيلم بدأ بإن ياسمين كانت بتضع جنين لها فى الحمام فى وسط ذهول شديد من اهلها ، وبعدها رجع الفيلم فلاش باك لكل الأحداث ، ياسمين اتعرفت على جارها وحبوا بعض وكان دايما يعاكسها من الشباك ويوصلها للمدرسة ، وفى مرة كان باباها وماماتها مش فى البيت لاقت الباب بيخبط فتحت لاقيت جارها اللى بتحبه ، قالتله امشى محدش هنا فضل يكلمها من ع الباب ، سمعوا صوت الجيران وهما طالعين من السلم فدخل البيت بالعافية عشان محدش يشوفهم سوا وقفل وراه الباب ، دخل بيتها واوضتها وحدثت الفاجعة.ه

حملت ياسمين اللى فى اولى ثانوى وخبت على كل الناس كانت بتدخل اوضتها وتربط إيشاربات على بطنها عشان ماتبنش ، كانت دايما بتحبس نفسها فى اوضتها عشان محدش ياخد باله ، وفى يوم راحت عيد ميلاد بنت خالتها اللى اصرت ان ياسمين تبات معاها ، فوجئت الخالة وزوجها بصوت ياسمين فى الحمام بتتألم .. ينادوا عليها ومتردش ، كسروا الباب لاقوها ع الأرض وجمبها جنين

طفلة انجبت طفلة!!!ه

ودوها المستشفى وامها ضربتها ولبستها دبلتها عشان الفضيحة ، ضاعت برائتها وطفولتها ومستقبلها وحياتها وسمعتها وفرحة اهلها بيها وكل شئ ، حاولت ياسمين تشيل بنتها .. معرفتش ، سألوها مين ابو البنت وقالتلهم .. وعملوا مشكلة كبيرة مع الولد واهله .. اتفقوا انه يكتب كتابه عليها .. طب ازاى وهى مش فى السن القانونى؟ .. خدها ابوها مع امها والولد وابوه وراحوا الفلاحين .. حيذورلها فى سنها ، وتم كتب الكتاب ، ماتت بنتها الطفلة من قبل ماحد يسميها ولا حتى فاكرين لها اسم ، خلص الفيلم بمشهد مش حنساه طول عمرى وياسمين نايمة ع السرير وبتفتكر كل اللى حصل حواليها من مشاكل اكبر منها بكتير ( الولد - اللى حصل - الحمل - الولادة - المستشفى - رد فعل الأهل- نظرات الناس - كتب الكتاب - البنت وموتها .. كل شئ ) ه
.

كنت فى سن البطلة لما شوفت الفيلم واتغميت اوى ساعتها وكبر جوايا خوف من الرجال والحب والإرتباط ، وفضل الخوف ده يكبر جوايا لحد دلوقتى .ه

.

شوفت الفيلم كتير .. وكل مرة اشوفه ابكى بحرقة ع المصيبة دى .. مش قادرة انسى الاغنية اللى فى آخر الفيلم ..ه

.

قبل الآوان كبرنا .. كبرت ملامحنا

.

الإتنين كانوا صغيرين .. والإتنين غلطانين

.

كان دايما شعورى تجاه الفيلم ده انه صرخة لكل بنت انها تاخد بالها من نفسها كويس اوى وبس .. مجرد صرخة فى حدوتة خيالية ليس لها اى علاقة بالواقع .. مكنتش اتخيل عمرى ان القصة دى تحصل بجد ، لغاية ماعرفت النهاردة انها حلصت فى الواقع للأسف بس بشكل اشد قسوة ووحشية .. جت القصة فى برنامج 90 دقيقة يوم الأربع ، هند .. خمسة إبتدائى .. 11 سنة .. طفلة بتروح مدرستها كل يوم الصبح مع زميلاتها ، وفى مرة راحت تجيب حاجة لمامتها ، اعترضها سائق توك توك عنده 21 سنة هددها بمطواة لو مجاتش معاه .. خدها بالعافية وتحت تهديد المطوة فى بيت مهجور وحصلت الفاجعة ، هددها تانى لو قالت حاجة لحد حيخبطها وهى رايحة المدرسة بالتوك توك وحيقتلها .. وفعلا ماتكلمتش

فات 5 شهور وشكلها بان عليه التعب والإجهاد .. قالت لباباها عندى مغص وعايزة اروح للدكتور، وداها والدها العامل البسيط - نقاش - للتأمين الصحى ، دكتورة التأمين طلبت منها إشاعة ماماتها خدتها وعملت الإشاعة ظهر فى الإشاعة جنين !! ايوة جنين الطفلة اللى عمرها 11 سنة بقت حامل !!!!ه

حاااااااااااااااااااااااااااااااااااااااااااااااااامل

امها فهمت منها ايه اللى حصل ووداتها القسم عملوا محضر اتقبض على الشاب وافرج عنه لحين وضع البنت وعمل تحليل الدى إن ايه .. يعنى هو حر تليق دلوقتى !!!ه

هند خلفت منة

طفلة ولدت طفلة !!!ه

مكنتش عارفة تشيلها فى البرنامج .. طفلة يانااااااااس بقت مسؤلة عن طفلة تانية !!ه

والله ماعرفت امسك دموعى وانا بتفرج .. البنت اتدمرت بجد ، مدخلتش امتحان خمسة ابتدائى عشان كانت بتولد !!!!! ضاع منها كل شئ .. برائتها وطفولتها ودراستها ومستقبلها وكل حاجة وابوها الغلبان اللى مش قادر على مصاريف ولاده ملزوم بطفلة رضيعة والأم اللى مبطلتش عياط من اول ماقعدت

.

انا بكتب البوست ده وانا بعيط اوى .. وفى قلبة حرقة
حسبى الله ونعم الوكيل فى الشاب ده

حسبى الله ونعم الوكيل

حسبى الله ونعم الوكيل
ياجماعة بجد اى حد يقرا البوست ده بالله عليه يقول حسبى الله ونعم الوكيل

.

احنا بقينا فين !!! لما طفلة يتعمل فيها كدة يبقى حصل ايه فى الدنيا ؟؟؟ لاهى كبيرة ولا اولى ثانوى حتى زى بطلة الفيلم اللى كنت بعتبره من افلام الخيال العلمى!!!ه

.
اللهم الطف بينا فيما جرت به المقادير يارب الطف بيها وبأهلها وبكل اللى زيهم وحسبى الله ونعم الوكيل فى الولد ده وكل اللى زيه .. يارب استر كل البنات يارب يارب استرنا ياااااارب امييين اللهم استرنا فوق الأرض وتحت الأرض ويوم العرض عليك ياارحم الراحمين يارب استرنا ولا تفضحنا برحمتك يا ارحم الراحمين
وحسبنا الله ونعم الوكيل

.

فين حق البنت دى ؟؟ .. قد كدة بقى الواحد مننا رخيص؟؟ بقينا فى غابة والوحوش مطلوقين فيها يعملوا مابدالهم؟؟؟؟؟ وهل يعقل ان الحكم اللى حياخده المجرم ده فى حين إثبات التهبة عليه 3 سنين بس؟؟؟!!!ه

.

لاحول ولا قوة الا بالله العلى العظيم

حسبى الله ونعم الوكيل

كلمة لشاب مطحون

احنا مش بننحت فى الصخر .. لأ

احنا بندور ع الصخر عشان ننحت فيه !!!ا

انا وكاميكاز والتاج .. عايشين لبعضينا

إنساااااااانة .. يا إنسااااااانة .. يوووووووه بقا .. ياسميييييييين

ايوة ايوة يابنى .. ايه فى ايه؟ ... وايه الميكرفون اللى ماشى بيه ده .. هتشتغل فى صباح الخير يامصر ولاايه؟؟

ها ها ها .. ضحكتينى يابنت ... انااااااا .. هشتغل مذيع

ياسلام .. ومالك مانفوخ اوى كدة .. بأمارة ايه بقا ان شاء الله؟؟؟

اهوه بقا .. انتى عارفة المودنة بتاعتك ضلمة وبقعت فيها لوحدى كتير قلت اهوه اسلى نفسى ومحرمش الجماهير من مواهبى الفاذة

فاذة!!!.. ربنا يستر... ماشى ياسيدى الله يسهلك .. هش يلا من هنا مش فضيالك

اهش ايييييه .. يابنتى انتى لازم تبقى اول واحدة اعمل معاها حوار

حوار ايه يابنى انت .. انت صدقت نفسك بجد ولا ايه .. يلا هشششششش

يووووه بقا دى حتنرفزنى .. خلاص بلاش روحى ده انا كنت هعمل فيكى جميلة واطلعك فى الراديون

راديون؟؟ .. اولا اسمه راديو يا جاهل

ثانيا انا طلعت فى الراديو قبل كدة يعنى مش مستنية عطف سيادتك عليا

ايه ده؟؟؟ بجد؟؟؟؟

ايوة طبعا

فين؟ ليه؟ مين؟ ايه؟

ياعينى الواد اتهبل خلاص ... بص يابنى وركز ... دلوقتى انت تعرف إذاعة حريتنا؟؟؟

اه

تعرف برنامج مدونة ع الهوا؟؟

اه اللى بيقدمه محمد عز الدين صاحب بيت العز

عليك نووور .. اهوه انا استضفونى فى البرنامج ده

ياااااااشيخة .. اشمعنى انتى يعنى .. كوسة يعنى ولا ايه؟؟

ياواد افهم .. عشان اتكلم عن موضوع مبنى الجحيم وكان فى معايا بنوتة اسمها سلمى عملت جروب ع الفيس بووك ضد المبنى ده ووقفة احتجاجية صامتة فى الكلية وكدة

اااااااااه افتكررررت .. اليوم ده انتى كنتى فى الكلية بتسلمى البحث ولاقيتهم رافعين شعارات عليها الصور بتاعتك عن المبنى .. يعنى شغل احتجاجات وحركات .. هتروحى فى داهية يافالحة ههههههههههههه

احم احم .. ربنا يستر

بس استنى هنا .. انتى وحشة اوى على فكرة ... مخدتنيش معاكى اوصل واتكلم فى الراديون شوية ليييييييييه؟؟

يابنى اخويا راح معايا يوصلنى وبعدين الجو كان حر اوى وانت طول عمرك فى المدونة هنا فى التكييف خفت عليك تطلع برا تسيح ولا حاجة واحتاس بقا انا من بعدك

ممممممممم .. ماشى ياستى هعديها المرة دى .. بس انا عاوزة اسمع الحلقة بقا ماليش دعوة

حملها من هنا ياكوكو ولا تزعل

ممممم .. ألا هو انتى صوتك عامل كدة ليه؟؟

كاميكاااااز .. احترم نفسك بقولك

طيب طيب .. اهدي بس .. بضحك معاكى ياستى

دمك تقيل

طب بصى انا هروح ادورلى على اى مدونة اعمل معاه حوار ولا حاجة تكونى انتى خلصتى التاج .. اشطة؟؟

ايييييييه .. تااااااااااااج!!!ه

خلاص بلاش ضرب الله يكرمك انا متشيك عشان اعمل مذيع حرام عليكى

طيب خلاص خلاص انت حتشحت؟!! .. جه من مين التاج ده راخر؟؟

بصى بقا انتى اولا بقا شكلك وحش اوى فى الوسط التدوينى لان التاج ده جايلك من زمااااااااان وانتى مطنشة الصراحة

احم احم .. طب مانا عارفة لازم تفكرنى يعنى .. المهم جه من مين؟

استنى لما اشوف فى اجندة التاجز

كمان بقا عندك اجندة .. ده انت وصلت بقا

طبعا هو انا قليل فى البلد .. شوفى ياستى

التاج ده جالك من مها الكلام نوعان

اللى اتخطبت؟؟؟

ايوووون

ما شاء الله .. الف مبرووووووووووك يا مها الف الف مليوووون مبروووووك ربنا يتمملك بخير يااااااااااارب

وجه كمان من البشمهندس ما علينا

اااه .. ربنا يسامحه بقا نازل في البنات تقطيم اما هارانا

هههههههههههه ... ( احسن تستاهلوا )ه

بتقول حاجة؟؟؟

لأ ده انا بكح ... كح كح

بحسب

وجه من الدكتورة ما علينا كمان

مممم .. اه دى فتحت راديو .. هتنافسك اهوه ياعم

تنافس ميييين .. ده انا جامد اوىىىىى

اما نشوووف

وجه من شلبية هانم بردو

اااااااه .. فين الجاتو ياشلبية؟؟؟ ... الاهلى عمهمممم وحابس دمهممممم

بييييييب بيييييييب اهلىىىىىى

خلاص ياعم انت مابتصدق ..المهم دلوقتى ياسيدى روح انت بقا شوف حالك وانا هخلص التاج ده وامشى

ماشى بس استنينى ماتمشيش إلاما اجيلك عشان اروح معاكى .. اصلى معرفش الطريييييق

عيل انت يعنى عيل؟؟ .. متعرفش تروح لوحدك .. ده ايه العبط ده

مابلااااااااش انتىىىىىى .. مش احسن ما اعلم بيتنا عشان اعرف ارووووح

احم احم .. طيب هستناك .. يارخم

ماشى .. فووووووووووووووو

.
******

ارد بقا ع التاج الملغم ده

استعنا ع الشقا بالله

انت مين؟

انا ياسمين .. مسلمة ومصرية وبعبد رب العالمين

مين أكتر ست أشخاص بتحبهم؟

سيدنا محمد

ماما

بابا

اختى

بنتها

اخويا

انت سعيد؟

الحمد لله رب العالمين يمكن الأجواء العامة ماتخليش اى حد سعيد .. بس بحاول اتفائل واحبس دمعتى بين جفونى

لو اجتمعت انت وحسني مبارك في غرفة واحدة؟

حقوله عايزة حقى ياريس

لو معاك مليون و نص جنيه تعمل بيهم ايه؟

المال مسؤلية .. هتتسأل على كل مليم صرفته ف ايه وهل أديت شكره ولا لأ .. بس بردو مافيش حاجة بعيدة على ربنا والله

بص ياسيدى اولا ححج إن شاء الله واحجج ماما وبابا واهلى وكدة بعون الله

ولو عرفت اجيب شقة فى المدينة المنورة يبقى تمام

ححاول اريح أهلى بشتى الطرق فى المقام الأول

بفكر اعمل مشروع

وفى مشروع جميل اوى بيتعمل فى السعودية اللى هو بيساعد العرايس والعرسان على الزواج

تسهيلات زواج .. نظرا للظروف الاقتصادية زى ماكلكوا عارفين موضوع الزواج ده بقا من تاسع المستحيلات للشباب والبنات فالمشروع ده ( مشروع خيرى ) بيقدم تسهيلات .. يعنى مثلا لو العريس والعروسة ناقصهم تلاجة المشروع يجيبهالهم .. ناقصهم اوضة نوم مثلا المشروع يجيبها وهكذا
اكمل دراسة ان شاء الله واحاول احقق هدفى على ارض صلبة .. آآآآآآآمين

اشترى شقة فى الاسكندرية ومطروح وبرا مصر لو درست برا

وطبعا العربية شئ مفروغ منه

والحاجات اللى لله فدى بينى وبين ربنا

ويارب يتقبل

.
الفلوس كتير ياجماعة زى مانتوا شافين اهوه .. حد عايز؟؟؟

فلووووووس .. ايون انا عايز فلوس

بسم الله الرحمن الرحيم بيطلعوا امتى دول

الله مش بتقولى مين عايز .. انا عايز

بجد عايز فلوس يا كوكو؟؟

ايوة انا عايز فلوس

طيب قول بقلب جامد كدة .. انا عايز فلوس

انا عايز فلووس

وانا كمان عايزة فلوس .. تعالى نشوف اى حد يدينا احنا الاتنين

:D

بتحب مصر؟

بعشقها

بتحب البنات؟

هو انا اعرف غير البنات عشان احبهم .. انا بنتمى لعالم البنات بحب البنات وبحس بيهم وبمشاكلهم وبحس ان المرأة دى شئ غالى اوى والإسلام كرمه اوى .. الحمد لله انى بنت

انت مسلم؟

الحمد لله رب العالمين

ليه؟

انا مسلمة بالوراثة .. بس جت عليا فترة فكرت بالعقل وبحثت ودورت جامد جدا .. وقلبى مارتحش غير للإسلام الحمد لله على نعمة الإسلام وكفى بها نعم وكفى بها نعمة

مين أكتر شخصية متقدرش تستغنى عنها في حياتك؟ و ليه؟

العادى ان الواحد يقول أمه وانا بردو بقول أمى .. لانها ببساطة كل شئ فى حياتى هى وبابا ربنا يديهم الصحة اللهم امين

بس فى حد تانى انا مقدرش استغنى عنه خالص الحد ده يبقى اختى الوحيدة .. وبحبها لانها زى امى بردو

بإختصار هى اختى وصحبتى وامى وكل حاجة .. ربنا يكرمها ياااااااااااااااارب

ايه أكتر موقف محرج تعرضت ليه؟ و اتصرفت ازاى ؟

والله بحس ان البنت بالذات بتتعرض فى حياتها لمواقف محرجة كتيرة جدااا

.

افتكر حاجة وانا فى ثانوى كدة كنت فى تالتة ساعتها .. والدى كان مدرس بدو فى نفس المدرسة اللى انا فيها المهم كنت مختارة مادة الجغرافيا زى ما قلت قبل كدة وكنا 6 بنات بس فى المدرسة كلها اللى اختاروها فالحصة كانت بتبقى زى الدرس كدة المهم المدرسة بتاعة المادة دى كانت زميلة بابا وانا كنت الحمد لله شاطرة وكان عندها ابنها فى تالتة بردو ودايما تقارنه بيا فى الدرجات وكدة منافسة غير مباشرة وهو لا عمره شافنى ولا انا اعرف شكله ايه المهم مرة فى الحصة واحنا قاعدين معاها قامت واحدة زميلتى -الله يسامحها بقا- ترغى مع الميس شوية والكلام جاب بعضه وجاب سيرة ابن الميس وعقبال ماتفرحى بيه والميس تقولها واجوزه مين .. الاقى البت زميلتى تبصلى بخباثة وتقولها ماتجوزيه ياسمين ياميس ( مش عارفة ايه المناسبة اللى خليتها تقول كدة ... الله يسامحك يابعيدة ) الميس بقا مش تسكت وتقولها عيب كدة يابنت وميصحش واحنا فى مدرسة والكلام الكبير ده .. لااااااااااااا

لاقيها بتبصى وبتبتسم إبتسامة خبيييييثة جداااااا بردو وعنيها لمعت بشكل مايريحش خالص وبتقولى: هو احنا نطول؟؟ .. بس هى توافق وترضا

يالهوىىىىىىىىىىىىىىىىىى

وشى جاب كل ألونات قوس قزح والقوس اللى مش قزح وكان نفسى الأرض تنشق وتبلعنى بجد

الله يمسيهم بالخير بقا .. ويسامحهم بردو

.

إيه الأمنية اللى بتدعى دايما ربنا انه يحققها ليك؟

يارب اموت وامى وابويا وزوجى - إن شاء الله - راضيين عليا وماضيعش من اعول

انجح فى الإمتحان بتاع الدنيا من الاخر

ويارب اخرج من الدنيا دى على خير .. لا بيا ولا عليا واحظى بالفردوس الأعلى وصحبة سيد الخلق اللهم امين
حلمى وهدفى اللى فى دماغى مش هقول عليه بس يااااارب أعننى إنى احققه

اللهم امين

نمرر التاج لمين ؟

لا بلاش الطيب أحسن

.

******

.

عاااااااااااااااااااااااااااااا

ايه ياكوكو مالك بتعيط ليه؟؟

عاااااااااااااااااااااااا

يابنى انطق فى ايه؟

مش هتصدقى

لا قول

مستحيييييييييييل

يوووووووووووه ... اخلللللللللص

إنجى سمراء النيل

مالها؟؟

قفلت المدونة بتاعتها

ايييييييه؟؟؟؟؟؟؟

اه والله زى مابقولك كدة

وانت عرفت منين؟؟

روحتلها المدونة اعمل معاها حوار لاقيت قفل كبييييييير ع الباب ومعرفتش ادخل

عاااااااااااااااااااااااااااااااااااا

لا حول ولا قوة الا بالله

خلاص خلاص اهدى .. هات الميكروفون اللى فى إيدك ده

احممم احمممم 2 4 6 8 .. ايييييييييييه شعبى الحبيييب الصبوووور المهااااااود

إنتى هتلعبى انتى كمان .. خلصى

اه طيب .. معلش اصل الجلالة خدتنى

احم احم .. إنجى .. سمراء النيل .. اوجه إلكِ هذا الندأ وقلبى يملأه الأسى من مثل هذا القرار المفاجئ

نوجى .. البلوجرز كلهم ينادوكى

عووودى يا هاميييس

الفضاء البلوجرى سيظلم بدوووونك

بطلى هزار بقا .. يابنتى اتكلمى جد شوية

طيب حاضر بس ماتزقش

إنجى .. ارجعى تانى انا بقولك اهوه

مايفنعش تبطلى التدوين اصلا

هترجعى لان قرآئك اللى انا منهم بيحبوكى وبيحترموكى ونفسهم انك ترجعى

بجد ماينفعش كدة .. عشان خاطرى ياشيخة .. طب بلاش خاطرى انا عشان خاطر الواد اللى مفلوق من العياط ده .. حرام عليكى ده اتدمر خالص

كوكو .. عيط وعلي صوتك شوية

عاااااااااااااااااااااااااااااااااااااااااااااااااااااا

سمعتى؟؟ .. ده حتى الناس اتملت والعدسات بتصور وبلاوى سودا

بجد منتظرينك يا إنجى والله ماينفع كدة

كانت معكم ياسمين أم العاااافية .. قطاع التدوييييين

:)

خلاص خلصت .. خد المايك بتاعك ياعم انت

عااااااااااااااااااااااااااااااااااااااااااااا

بتعيط ليه منا خلاص كلمتها عايز ايه تانى

عاااااااااااااااااااااااااااااااااااااااااااااااا

ياواد مالك فى اييييييييييه؟

عااااااااااااااااااااااااااااااااااااااااااااااا

كوكووووووووو مااااااااااااالك

عااااااااااااااااااااااااااااااااااااااااااااااااااااا

هضربك ..انطق

اصـ .. اصـ .. اصلك دايسة على صوبااااعى

صوباااعك؟؟!!!!ه

عاااااااااااااااااااااااااااااااااااااااااااااااااااااا