Friday, June 15, 2007

معقول؟؟؟

تحذير: هذا الموضوع يحتوى على كثير من المشاعر والكلمات المتضاربة .. اللى عنده الضغط او اعصابه خفيفة مايقراش ويريح نفسه .. ودمتم

لااااااااااااااااااااااااااااااااا

مش مصدقةةةةةةةةةةة ولا متخيلةةةةةةةةةةةةة ولا متصورةةةةةةةةةةةةة
خلصت التعليم يا بشرررررررررررررررر
خلصت الإستثناء من حياتى
يانهااااااااااااارىىىىىىىى ده التعليم ده خد منى رائااااااااااااات
إشى مواد مالهاش لازمة وإشى مدرسين بيزعقوا
واللى تضرب بالعصايا واللى تشخط واللى يهزأ
ياااااااااااااااااااااااااااااااه
واللى كانت تدينى واجب كتير ومقدرش اخلصه لأنى كنت طفلة والحاجات دى كتير عليا واجى بالليل اعيط زى المسكينة ياعينى
.
ولا المدرسين اللى كانوا عايزينى اخد دروس معاهم ومكنتش باخد معاهم بردو
ولا الدروس وبلاوى الدروس اعوذ بالله
لازم اذاكر واعمل الواجب وحاجة قرف وزهق
.
وكله كووووم والثانوى ده كوم تانى خااااااااااااااااالص
ييييييييييييي لاااااااازم تذاكر غصب عن عينك عشان تحدد الكلية اللى تدخلها
حاجة خنقة بجد ولا التارييييييييخ والجولوجيااااااااااا
ا
.
ولا الأزمة المعتبرة اللى مريت بيها بقا ومحدش مصدق لحد دلوقتى انا عديت منها ازاى بفضل الله الحمد لله
يا ايها السادة الكرام انا كنت بدل الفلسفة وعلم النفس واخدة مادة الجغرافيا
محدش يفتكر انها هى الجغرافيا مستوى رفيع
لالالالا .. ابسوليوتلى
دى مادة منفصلة بذاتها ولها كيانها الخاص
المهم نزل جدول الامتحان وياريته ما نزل
طلع الجدول بقا كتالى
يوم السبت إقتصاد وإحصاء
يوم الأحد (تانى يوم على طول) جغرافيا
يوم الاتنين جولوجيا
يعنى 150 درجة فى تلات ايام فى الضياااااااااع
بجد ماكنتش بنام .. البيت كان واقف على رجل
كله كان مكرس حياته فى سبيل ان التلات ايام دول يعدوا على خير
والحمد لله رب العالمين ربنا ستر وعدت على خير الحمد لله
.
وبعد كدة دخلت فيبس ( كليتى ) وما ادراكم ما فيبس
اتعلمت مبدأ مهم اوى فى فيبس وعاجبنى خالص
اتعلمت انى مش لازم افهم كل حاجة وامنطق كل حاجة
مافيهاش مشاكل ابدا لما تاخد الحاجة زى ماهية كدة من غير ماتحاول حتى تفهم
لانك لو حتى حاولت عمرها ماهتيجى معاك ابدا
فليه التعب ووجع الدماغ
,
قعدت فى فيبس اربع سنين من التعبببببببب والدماااااااااااار والضيااااااااااااااااااااع
مواد كتيييييير ومناهج طويلة وتكليفااات وابحاااااث وكويزات ومحاضراااات وسكاشن وحضور وغياب ومد ترمات وحركات والتعلب فات فات فى ديله سبع لفات
.
وياسلام بقا لما تدخل المحاضرة نفسك تفهم والله وبتدعى ربنا يااااارب افهم
بس على مين .. مش هتفهم يعنى مش هتفهم
ياما عيطت فى محاضرات .. مش بعيط عشان القهر والظلم
لالالا .. ابسوليوتلى
بعيط عشان مش بكون فاهمة فى المحاضرة
احساس غير طبيعى بالغباء يهب على كل خلايا مخك كدة
وتحس ان الدنيا ضلمت قدام عينيك وقفلت معاك
مش هتفهم يعنى مش هتفهم بقا
.
ولما بقا يجيلك يوم لطيف كدة تاخده من اوله من الساعة 8 الصبح مثلا لحد 6 ولا حاجة او من 10 لحد 8 مثلا
كل المحاضرات ورا بعضها تحس ساعتها ان المحاضرات دى عاملة زى ماتش بينج بونج المعلومة تنضرب فى نافوخك وتطلع على طول ماتقعدش ، تحس ان كل دكتور بيسابق التانى من اللى يخلص ( علينا ) المنهج الاول ، وتجرى تصلى فى الكام دقيقة اللى بين كل محاضرة والتانية عشان مايروحش عليك فرض ويبقى حظك من السما لو لاقيت مكان تصلى فيه .. قاعة فاضية مثلا او تحت السلم ولا حاجة
يخلص اليوم وتروح البيت خلصاااااان مش شايف قدامك حاجة ومطالب انك تعمل اللى لازم يتسلم بكرة
والأسيمنتس ( التكليفات ) بقا واللى لازم يتعمل فى يومين وهو محتاج اسبوع مثلا
.
طب تصدقوا ان فى معيدة حدفتنا بالمايك فى السكشن؟
والله حصلت وكان يوم لطيف جدا الصراحة (وفى الاخر الدكاترة قالوا علينا اننا دفعة دمها خفيف !! ماهو من اللى بنشوفه ماعدش في دم اصلا عشان يخف)ه
.
ياااااااااااااااه
الكانترى بروفايل والفاينانس والماثيماتيكال والإكونوميتركس والإنترناشونال وتاريخ الفكر وتاريخ مصر الاقتصادى والفيزابيليتى والمحاسبة و المانيجريال و و و و و
.
ولا الورق وتصوير الورق محاضرات محاضرات على سكاشن على شييتس ( ملازم ) على مراجع الدكتور منزلها مثلا .. رحلة عذب رحلة تصوير الورق دى و بندفع فيها دم قلبنا وفى الاخر مبنقراش منه ولا كلمة عشان مافيش وقت
.
وكل ده كوووووووووم وبحث التخرج ده كوم تانى خااااااااااااااااااالص
تعمل الأوتلاين كدة زى الشاطر وتقدمه ميعجبش الدكتور ويرجعك بيه تانى ، تعدله تانى يرجعك تانى وهلم جرجر بقا ، تخلص الفصل الاول يطلعلك تعديلات تقعد فيها شهر ولا حاجة ، وياسلام لو غلطت فى النحوى ولا كلمة مكتوبة غلط ولا حاجة
وياسلام ع المواعيد المظبوطة اللى مش بتعطلك ابدا
وكان فى دكاترة بقا مرياحين دماغهم خالص وسايبين العيال الغلابة محتاسين ع الاخر
عشان يكتشفوا ان معاد التسليم بعد كام يوم ولازم البحث يتسلم
او ان المناقشة بكرة وتعالوا ناقشوا
استر يااااااااااارب
.
كان ختامها مسك اوى مع مبنى الحجيم اللى امتحنا فيه ده
>
بجد يا جماعة تعبنا اوى اوى اوى فوق ما اى حد ممكن يتخيل والله
فعلا كانت كلية مرهقة اوى
تفضل تتعب فيك كدة لحد اخر لحظة حتى وانا بكتب دلوقتى هى تعبانى بردو
>
جيت على اخر يوم الامتحانات وعينى ورمت جامد الحمد لله
تحس ان الديماند كيرف ( منحنى الطلب ) خبط فى عينى
او كينز عضنى فى رموشى وانا مش واخدة بالى ولا حاجة
اشوف فيك يوم يا شومبيتر انت ومالتس
******
بس استنوا استنوا ... معقولة انا خلصت؟
معقولة مش هصحى الصبح من بدرى والبس وانزل على مالا وشى جرى عشان الحق المحاضرة قبل ما الدكتور يقفل الباب؟
معقولة تستمر حياتى بلا اسيمنتس ولا محاضرات ولا ابحاث ولا معلومات مالهاش لازمة؟
انا خرجت برا النظام التعليمى ياناس؟؟؟
بجد؟؟؟
لسة النتيجة ماظهرتش صحيح .. ادعولى تبقى خير عشان يبقى بجد
معقولة مش هشوف صحابى كل يوم؟
معقولة مش هشوف توم حبيبتى واغلس عليها يوميا ( مش يوميا اوى ولا حاجة دى ماكنتش بتحضر اصلا)ه
.
بس تصدقوا على كل البلاوى اللى شوفتها انا بمووووووووت فى فيبس
وبحبها جداااااااااااااااااااااااااااااااااااااااااااااااااااااااا
وحزينة اوى انى هسيبها وعيطت كتير عشان كدة
عااااااااااااااااااااااااااااااااااااااااا
.
هييييييييييييييييييييييييييييه دونيااااااااااااااااااااااااااا
اهوه الواحد يبدأ دلوقتى مرحلة جديدة

مرحلة من البحث
بحث عن نفسه وعن كيانه وعن حلمه وهدفه
والرحلة المصرية المقدسة طبعا
رحلة البحث عن وظيفة
.
بالمناسبة بما إن كل الناس لاقية شغل والحياة تمام التمام وكدة يعنى فاللى عنده اى شغلانة الايميل مرزوع اهو فى البروفايل - قال يعنى المشرحة ناقصة قتلة - واهو الناس لبعضيها بردو ومانجلكوش فى حاجة وحشة
.
*****
المهم ادعولنا ياجماعة اننا ننجح ونتخرج على خير ياااااااااااااااااارب
وادعوا لمنة بردو عشان طالع عينها فى الثانوى والواد كوبا زي حالتها
مش عارفة انا اخرة التعليم ده ايه
قلنا قبل كدة ان العلم خطر محدش صدق
.
******
مناقشة البحث يوم الاتنين الجاى ان شاء الله
عايزة دعواااااااااااااااااااات بالله عليكم
إلهى ربنا يكرمكم ويفتحها فى وشكم يااااااااااارب
اللهم اميييييييييييييييييييييين

.
معلومة اخيرة: رغم إن التعليم تعبنى وقرفنى فى عيشتى بس بجد كانت احلى ايام حياتى واحلى ذكريات وخايفة اوى من المرحلة اللى جاية .. مش عارفة الدنيا مخبيالى ايه بس انا ثقتى فى ربنا كبيرة وان شاء الله خير
.
عارفة ان محدش وصل لهنا اساسا عشان البوست طويل اوى وغير مفهوم ليا انا شخصيا
بس هضطر اقوم بقا قبل ما كاميكاز يحدفنى بطوبة اللى فى ايديه دى عشان اسكت
طااااااااااااااااااااااااااااااااااااااااااااااااااااخ
ناشنت يا فالح
عاااااااااااااااااااا
*****
والآن اعزائى القراء اللى ماوصلتوش لهنا اساسا اترككم مع الأغنية العاطفية المناسبة فى المواقف اللى زى ديا
كل شئ راح راااااااااح وانقضىىىىىىى
واللى بينا خلاص مضىىى اااه مضىىىى مضىىىى

44 comments:

  1. !!!معقووووووووول ؟؟

    انا اول واحد يرد على التوبيك الجميل ده
    بجد انا وصلت لاخر سطر فيه ومحستش بأي ملل ولا حاجة زي مكنتي خايفة
    :)

    عايز اقولك بأه تحمدي ربنا انك خلصتي
    وتفرحي أه وكل حاجة مفيش مشاكل
    لكن متتفائليش اوي كده

    حنانيك (براحة شوية يعني) ربنا يسترها معاكي

    انتي يا دوبك حتزودي قائمة المحبطين بمحبط زياده

    اسف والله يا انسانة على التعليق البايخ ده

    بس من فرحتي اني قريت الموضوع الحلو ده
    حاسس اني بخرف
    :(

    :: :: :: :: :: :: :: ::

    بيتهيألي ان التعليق ده هو اللي مليان مشاعر واحاسيس متلخبطة اكتر من موضوعك

    انا مش عارف انا بكتب ايه بالظبط بس عايز اقولك ادعيلي
    نفسي اخلص كليتي واحس بالاحساس اللي عندك ده

    بجد والله انا اتخنقت
    بآلي 3 سنين في تالتة

    يووووووووووووووه

    انا باين عليه بخرف

    كفاية كده لحسن تدعي علية

    سلام
    :( :( :(

    ReplyDelete
  2. معلش نسيت اقولك ان صورة الافيتور بتاعك تحفة

    والمدونة كلها جميلة
    لالالالالا

    جميلة اوي أوي اوي من غير مجاملة والله

    اسلوبك جذاب جدا

    انا سعيد اني وقعت ف مدونتك والله

    بجد تسلم ايدك
    انا هحاول اتصفحها شوية كده يارب اقدر اكملها النهاردة

    سلام دلوقتي ولو افتكرت حاجة تانية هبأه اجي اقولك

    :D

    ReplyDelete
  3. هههههههههه .. برافو عليك يا كاميكاز

    سلامة عينيكي .. شافاكي الله وعافاكي .. ربنا يستر وما تروحيش تناقشي كده .. شكلك حيبقى حكاية..

    المهم كنت عايز اقول لك ...

    من غير تعقيد يعني ...

    التقيييييييييييل وراااااااااا

    ReplyDelete
  4. ايه ياعم الناس دي

    خلصت دراسة
    وعاوزة تشتغل كمان
    ايه الطمع ده

    وبعدين متستعجليش اوي كده

    ههههههههههههه

    لسسسسسه

    ربنا معاكي

    ReplyDelete
  5. سلام عليكم

    أهي دقني اهي
    كلها تلات اربع شهور
    و هتقولي ليت الجامعة تعود يوما
    و اسألي مجرب

    يلا و عموما بالتوفيق ان شاء الله
    و ألف مبروك على التخرج
    و ربنا يحميكي

    ReplyDelete
  6. كفااااااااااااره يا ياسو
    كفاره يا حبيبه قلبى
    عارفه رغم كل حاجه وكل المساوئ بتاعه التعليم
    بس بجد كانت ايام حلوه وناس حلوه
    اهلا بيكى يا قمر فى عالم الباحثين عن الكيان
    لما تلاقى وظيفه كويسه ابقى باصى لاختك يا ياسو
    احسن بصراحه ان زهقت من موضوع الدروس ده
    الناس لبعضيها برده
    ان شاء الله هتناقشى بحثك والنتيجه تتطلع زى ما بتتمنى
    ربنا يوفقك يا كميله
    محبتى

    ReplyDelete
  7. هذه فقط هي البداية
    وعينك ما تشوف الا النور ونور بيطرقع كمان

    ReplyDelete
  8. فرحانة انك سيبتى الكولاج لا يا ماما لاااااااا

    الجاى احسن ان شاء الله هههههه

    عن تجربة يعنى الحياة بعد الكلية مختلفة ابسوليوتلى

    انت عاوزة تشتغلى ايه بالظبط و ندورلك

    بس متعشيش باه فى الدور و تقولى فى مجالى علشان انسى يا عمرو

    يالا اكتبلنا بوست فيه ال
    c.v.

    بتاعك و الوظايف اللى ممكن تشتغليها و يا ريت 10 جنيه معاهم علشان ندور بذمة

    صحيح انتى مجتيش ليه افتتاح الراديو ؟؟؟؟تعالى انتى و كاميكاز

    ReplyDelete
  9. ايام وبتعدى
    ومبروك التخرج مقدما
    تحياتى

    ReplyDelete
  10. مبروووووووووووووووووك
    اهلا بيكي في عالم العاطلين

    ReplyDelete
  11. مبروووووك يا قمر
    عقبالي يا رب
    ربنا ينجحك ان شاء الله
    و يوفقك في كل حياتك
    تحياتي و حبي

    ReplyDelete
  12. انسانه
    خلصتى الدراسه؟ ما يابيضا شمرى كمامك وخدى نفس طويل علشان التعب بداء
    كل الحجات الى حكتيها دى بسمعها وانا بستمتع اوى ونفسى ترجع لمده يوم واحد بس
    الصعب بداء بجد من اليوم ده مرحبا بك مع المطحونون فى العمل والحياه والتدوين
    البوست جامد وحلو اوى بس هو ناقصه حاجه ايه هى مش عارف

    ReplyDelete
  13. يا ستي مبرووووووووووووووووك
    عقبال ما النتيجة تطلع وتبقي خريجة رسمي

    بس معلومة أخوية
    أيام الكلية مهما كانت...لا تعود ولا يمكن تتعوض
    وبكرة لما تشتغلي هتقولي ور يوم من أيام حتى الثانوية العامة

    دي مشاعر طبيعية لإنسانة طبيعية
    وتفكير طبيعي للتطور الطبيعي لنظام التعليم المصري العظيم

    توقعاتي ليكي..ان من هنا ورايح هتقضي حياتك كلها "معقول" و"أنا مش مصدقة"...اتعودي بقى
    C'est la vie mon amie
    Welcome to the real world

    :)
    نوني

    ReplyDelete
  14. بما انى فبساوى زيك
    بصراحة انا زعلان لانك صورتى الكلية بشكل مش حلو
    كليتنا جميلة والدراسة فيها شيقة والدكاترة معظمهم كويسين
    ممكن تكون صعبة شوية الدراسة بس ماهو انت بردو من المتفوقين فى البلد دى

    على العموم ايام الجامعة ايام جميلة وذكرياتها لذيذة وهتبقى تفتكريها بعدين

    احساس الانسان انه خلص التعليم فى مصر فعلا زى احساس المحكوم عليه بالمؤبد واخد افراج بعد حوالى 15 سنة دراسة

    بالتوفيق
    ومتنعيش هم الشغل
    ان شاء الله خير

    وياريت تبقى تشرفى مدونتى بالزيارة
    we can
    دى مدونتى الرئيسية

    انا فبساوى من 2002
    يعنى قديم شوية

    ReplyDelete
  15. انسانه--لفتنى اسم المدونه وحبيت اشوف فكرك ولقيت انك كنتى معايافى نفس الكليه وممكن تكونى عارفانى وممكن لا وانا ممكن اكون اعرفك بس الاكيد انك الحمدلله خلصتى انا قدامى لسه نفس الطريق من التعب بس الامل يارب انو ينعمنى بى ويصبرنى على الى قدامى فى الكليه
    كان ختامها مسك اوى مع مبنى الحجيم اللى امتحنا فيه ده ممممممم معاكى اوى فى الموضوع ده والمفروض ان اتكلمنا مع العميده وقالت ان رئيس الجامعه هو الى حدد المكان بس ازاى رئيس الجامعه حدد مكان ماينفعش فى التركيز ولا مكان يصلح لاى حاجه تتوقع المكان كان اول يوم امتحانات صدمه لينا
    والحمدلله خلصنا واخدنا الاجازه بس ياريت يراعو فى وضعهم للاماكن الامتحانات ان الطالب يقدر يركز فى المكان ده ولا يستنشق هوا نظيف حتى بس بجد كلنا بنكتسب واكتسبنا حاجات يارب تفيدنا فى حياتنا

    وبتمنالك انك تتوفقى فى الى جاى من حياتك بس خلى الحلم والامل قدامك وماتيأسيش

    ReplyDelete
  16. يااااااااااااا ساتر ايه يا بشر الإحباط اللى فى التعليقات ده
    اوك الموضوع مش سهل ، بس مش كدا برده
    ان شاء الله كله يبقى تمام و بعدين هى الحياة كدا و لازم نعيشها و هى حلوة كدا أساسا انت مش هاتحس بالحلو إلا لو ذوقت المر، و لو حلو على طوول مش هاتحس بيه
    و بعدين ربنا كبير و كريم و كل واحد بياخد رزقه خلوا نيتكو خير بس و كله يبقى تمام التمام

    حلو كدا يا سيمو حبة تفاؤل اهو :D

    ReplyDelete
  17. emotional blessings :)June 17, 2007 at 8:21 PM

    eeeeeeeh :( ... heyya ayam w ben3eshha :S

    ReplyDelete
  18. ألأف مبروك اولاا وانشاء الله كل مرحله تكون متميزه عن الى بعدها....وكل مرحله تخطفى منه ااحلى الذكريات واحلى الأيام.....ربنا معاكى يا جميله ااااالحدث الى بتكتبى عنو هو نفس الحدث الى لاازم يفوت على كل وحد مننا ربنا يكرمنا كلنا يارب.........على فكره بأه وحشتينى جدا وكنت بدور عليكى بس انا بأه لقيتك

    ReplyDelete
  19. :d
    ماشاء الله لا قوة إلا بالله
    :d

    ربنا يديم عليكي الفرحة و الانشطاح و الزأططة :d

    و يكرمك في مشروع التخرج
    تعملي كويس اوى اوى ان شاء الله
    :):)

    ReplyDelete
  20. ههههههههههه
    كل دة علشان خلصتي دراسة طيب والله لا تشتاقي لكل لحظة

    اسئليني انا وحتي المبني الي صورتية

    هههههههههههههههه

    بس بصراحة بعد اجتياز الامتحان في الظروف دي وظيفتك عندي

    متدوريش ابداااااا

    دانتي كفاءة

    ReplyDelete
  21. الحمد لله اخيرا
    بجد ياسمين انا كنت حاسه انى انا اللى بامتحن عشت معاكى جو الامتحانات اللى نسيته من زمااان وقاعده دلوقتى على قهوة المعاشات بس بمزاجى طبعا انتى عارفه مش ليا اصلا فى الشغل
    هاتعيشينا كمان بقى فى موضوع البحث عن وظيفه والكلام دة
    الله المستعان
    المهم ربنا ينجحك يارب وزى ما وعدتك كدة هاحتفل بيكى عندى فى المدونه

    ReplyDelete
  22. لولولولولولولولولولوووووووووى
    عقبال النجااااااااااااااااااااح

    حمد الله على السلاااااااااااامه
    مستيه اشوف يوميات البطاله اللى هتعشيها بئا :P

    اييييييييييييه دنيا
    فكرتينى لما خلصت كنت فرحانه زيك كدا
    بس دلواقتى بقول ياريت الايام دى ترجع تانى بجد
    كانت فعلا اجمل ذكريات العمر

    ربنا يسعدك يا انسانه ياجميله

    ReplyDelete
  23. لا ياشيخة بجد ...؟ انقضت ايام العذاب و المعاناة...والله فرحتلك جدن جدن..انتم السابقون ونحن اللاحقون
    عقبالي..عقبااااااااالي
    على فكرة انا وصلت لاخر سطر خالص...فين الجايزة بقى

    ReplyDelete
  24. مبروك على النهاية السعيدة دي انشاء الله وربنا يوفقك في حياتك الجاية بس المهم تكون دي بداية ليكي مش نهاية لحياة جيه سعيدة انشاء الله
    تحياتي

    ReplyDelete
  25. حمد الله ع السلامة
    اخيرا خلصتي امتحانات

    ذكريات الكلية كلها هي الاجمل دائما مهما كان فيها من تعب و شقي

    ربنا يكتب لك النجاح و التوفيق يا رب
    و ان شاء الله رحلة البحث عن وظيفة تكون رحلة قصيرة و سهلة و نبارك لك قريب علي النجاح و الشغل و كل حاجة انت بتتمنيها ان شاء الله

    ReplyDelete
  26. مــبروك انك خلصتى
    وربنا يكرمك بالنجاح والتوفيق يااااارب آمـــــــــــين وكل اخواتنا واخواننا يااااااااااااااااارب آمــــــــــــين
    بس اقولك التعليم احسن حاجة الوحيدة اللى أد ما تديها تديلك اما بقى الباقى
    أهئ أهئ
    يعنى انا مثلا بأشتغل اتناشر ساعة متواصلة وعلى مفيش
    أهئ أهئ
    الحمدلله على كل حال
    ربنا يكرمك يااااااارب آمــــــين

    ReplyDelete
  27. السلام عليكم
    زى غيرنا ما باع نبيع
    واللى علية الدور يستعد

    ReplyDelete
  28. السلام عليكم
    في انطلاقة المدونات احببنا ان نجرب اقلامنا ونطلقها للعنان ...
    كما تتفتح ازهار الربيع.
    .ولتمنو كما تنمو براعم النباتهمسات للقلم

    ReplyDelete
  29. الف الف الف مبروك ...عقبلنا ويكمل المشوار الجميل ده بالنجاح انشاء الله
    ......بس معلش هو ايه الفيبس ده هو في كليه اسمها كده ولا انتي بدلعيها

    ReplyDelete
  30. معقولة مش هصحى الصبح من بدرى والبس وانزل على مالا وشى جرى عشان الحق المحاضرة قبل ما الدكتور يقفل الباب؟
    معقولة تستمر حياتى بلا اسيمنتس ولا محاضرات ولا ابحاث ولا معلومات مالهاش لازمة؟



    مش تخافي يا حبيبتي بكرة تصحي من النجمة وبتجري برضه جري عشان تلحقي الامضا قبل ما تتقفل عشان مش يتحسبلك جزا او خصم من المرتب الي مش يساوي قطنة مرتبة واحدة
    اساليني انا
    عاااااااااااااااا

    مبروك مقدما يا مفعوثة
    وان شاء الله تنجحي

    بس ايه يا بت المواد الغريبة دي
    مش كنت اعرف انك مثقفة كدة
    عشت وشفتك يا ياسمين بتتكلمي لغات
    انتي مكانك مش هنا بقي
    انتي لازم تسافري بره باللغات بتاعتك دي
    وحشاني يا بت

    ReplyDelete
  31. The Summer arrived. We go to wait that it brings light. That it brings hope. That it brings peace. That it brings the end of the curse.

    ReplyDelete
  32. تحياتي

    اولا ...الف مبروك الانتهاء من الامتحانات...و ان شاء الله النتائج تكون مفرحه و مشرفه.

    ثانيا....في رأيي انه يخطيء من يعتقد انه انهي مرحلة التعليم... فالحياة تعلم و تعليم مستمر... لازم نستمر في التعليم بالاطلاع علي الجديد في التخصص
    بحضور دورات تدريبية و مؤتمرات..و ندوات.
    التعلم من خلال الحياة و تجاربها التي قد تكون أشد قسوة من نجربة التعليم.

    لكن مادامت العزيمه موجوده...و الرغبة في تطوير الذات...و تشكيل شخصية متمكنه واثقة من نفسها و من علمها...فأن كل الصعاب ستهون ان شاء الله...

    تحياتي و تمنياتي بالتوفيق دائما.

    ReplyDelete
  33. ندعوكم لمشاهدة العدد الثانى من مجلة نفسنا

    ReplyDelete
  34. الف الف مبروووووووووووووووووووك
    كفااره
    عقبالي يا رب
    وعلى فكره انا وصلت لآخر البوست
    وقريت الاغنية كمان
    :)

    ربنا معاكي في رحلة البحث عن وظيفة
    يارب

    ReplyDelete
  35. الحمد لله
    ألف ألف مبروووووووووووووووك
    و عقبالنا يارب

    بس تصدقى فعلا هتفضلى دايما تقولى كانت أحلى ايام

    خصوصا لما تلاقى نفسك فى "معترك الحياة" .. وتبدأ البهدلة

    ReplyDelete
  36. يا ستى كلنا وصلنا لآخر البوست الجميل الرقيق ده .. وربنا يوفقك يارب فى البحث وبعد البحث .. بس اعملى حسابك رحلة ما بعد الكلية اصعب ميت مرة من جوة الكلية فشدى حيلك
    وربنا مع الجميع
    ألف مبارك على النجاح مقدما يا ياسمين

    ReplyDelete
  37. طيب بما انى مجربه شعورك ده من سنتين تقريباً , وبما ان حاله الفقد للكليه والتعليم تستبد بى

    فالحقيقه ان الكليه والتعليم هى فعلا من أفضل سنين العمر ..

    برغم كل ما ذكرتيه .

    قبل عامين لو كتبت عن شعورى لما وجدت خير من كلماتك أقتبسها .

    وفقك الله فى النتيجه

    ReplyDelete
  38. ههههههههه
    والله بكرة تندمى انك خلصتى

    لما تندمى ابقى ادينى رنة
    هه؟؟

    ReplyDelete
  39. يا جماعة متشكرة ليكم كلكم على التعليقات .. الله يبارك فيكم وجزاكم الله خيرا .. اسفة مش هقدر ارد على كل تعليق لانى تعبانة نفسياً شوية

    اعلم جيداً ان ما مضى كان اجمل ايام حياتى التى اندم وابكى عليها حتى فى كل وقت .. وسواء ندمت عليها ام لم أندم فقد مضت ولن تعود تانى .. وليس ندمى هو ما سيرجعها
    شعور الحزن من انتهاء الكلية والخوف من الحياة بعدها كان متمكن منى حين كتبت هذا الموضوع ولكنى وجدت التعليقات تزيد من خوفى و قلقى و حزنى

    ادعوا الله ان يرفق بى فى القادم من عمرى وان يخرجنى من دنياكم على خير
    اللهم امين

    جزاكم الله خيرا

    ReplyDelete
  40. الخلاصه

    هي دي مصر

    مصر هي مامتي
    لونها لون بيجامتي

    انتي م الآخر كده جبتي تاريخ البني ادم المصري

    ارحمنا يا رب

    تحياتي

    ReplyDelete
  41. مبروك وياريت متحاوليش تقربى من رصيف البطاله لان الاعداد هناك زياده قوى والزحمه كبيره قوى

    ReplyDelete
  42. ههههههههه

    لولولليييييييييييييي

    مبروك يامينو

    ويارب عقبال النتيجه يارب, وان شاء الله هتكون كل خير

    وشكرا اوي علي منة اللي منسيتيهاش

    وان شاء الله ربنا هيوفقك في مناقشة البحث وتجيبي امتياز كمان ((:

    ملحوظه:
    أنا قرأت البوست كله
    عايزه حاجه حلوه بقي

    ReplyDelete
  43. الحمد لله
    مبروك خلصتي
    وانتهيتي من الدراسه
    دلوقتي بقى قدامك مسؤليات تانيه اكبر
    صديقني والله كلمه من متخرج قديم هههههههههه

    حيجي وقت عليكي وتقولي ولا يووووووووووم من ايام الدراسه
    تمنياتي بالتوفيق في حياتك اللي جايه

    ReplyDelete

الكلمـة نـور .. وبعـض الكلمـات قبـور