مكرونة بالبشاميل دايت

إن كنت ممن كتب الله عليهم الدايت من أمثالي فيجب عليك التألقم على شئ هام جداً لن تستطيعي الإستمرار بدونه ، ألا وهو التحايل على القانون .. اقصد هنا القانون المطبخي بالطبع

فكل او معظم وصفات أكل الأباء والأجداد تودي فى داهية ريجيمية حدف ، وللإستمرار فى الدايت او الريجيم او الأكل الصحي مدى الحياة ( لأن فى ناس إتكتب عليهم كدة بجد ) يجب عليك التعود على كسر كل ما هو مألوف ومعتاد والتغيير والتعديل فى أي وصفة أياً كانت ، والفيصل النهائي الطعم والصحة طبعاً

إنسفي مطبخك القديم .. ولا تقلقي على الإطلاق إن كنتي لا تعلمين فنون وأصول الطبخ المبدأية وإتبعي المثل القائل " اللى ماعلمتوش أمه يعلمه الإنترنت " والأخ جوجل لا يتأخر الحقيقة وقايم نايم فى خدمتك

المكرونة بالبشاميل - على سبيل المثال لا الغلاسة - رائعة وتحفة وتجنن ولكن كيف نأكلها فى الريجيم؟ وكيف يكون ريجيمنا بدون حرمان؟ .. دعونا نتفق أولا إن أي أكلة يمكن صنعها بطريقة صحية ، فالرك على طريقة الطهي التي قد تجعل أكلة معينة صحية جدا وقد تجعل نفس الأكلة مضرة جداً ، وإن كنا لا نستطيع التخلص من كل السعرات الحرارية المصاحبة لأكلة معينة نظراً للمكونات الأساسية المستخدمة فعلى الأقل نحتفظ بالحد الأدنى من السعرات ولا نزيدها وقال على رأي المثل " نص العما ولا العما كله "

لا تتنازلي عن حقك فى أكل المكرونة البشاميل عزيزتي حواء ، إنظري الى نفسك فى المرآه اليوم وإبتسمي وتذكري يوم ما ضحكتي على حرس الجامعة ودخلتي بدون الكارنيه .. ياله من إحساس رائع!

دعي خيالك المريض هذا جانباً وركزي معايا .. إسلقى المكرونة ( القلم ماتفضحيناش ) ولو ماعندكيش مكرونة قلم او ماتعرفيهاش أصلا مش مشكلة ، الشيف قالك إتصرف ، لو عملتيها بالإسباجتي مش هتقولك لأ على فكرة ، المهم إسلقى المكرونة بقى بالطريقة المعتادة

وحضري العصاج فى طاسة تيفال بدون زيت او سمن ، لحمة مفرومة حمراء ( تتشوح الأول ) + بصل مبشور + جزر مبشور لو تحبي + بسلة + فلفل رومي .. كل ما تزودي خضار القيمة الغذائية هتزيد والطعم هيبقى أحلى .. وتضيفي بهاراتك وحركاتك كما يحلو لك .. صحصحى وانتي بتعملي العصاج عشان ماتعمليش زي صديقتي اللى سلقته على أساس إن مصير أي لحمة السلق على طول !

نيجي للطامة الكبرى .. البشاميل الذي نحوله بقدرة قادر إلى قنبلة تدميرية قادرة على الإنفجار فى أي لحظة ، فقد رأيت بأم عيني من يصنع هذا البشاميل بأكواب من السمن ولكي انت تتخيلي حجم الكارثة

طقطقيلي ودانك كدة وركزي فى هذا الجزء يا عزيزتي حواء كويس، ستحضري 2 ملعقة كبيرة دقيق وتضعيهم على نص لتر لبن خالي الدسم وتقلبيهم على البارد ثم ترفعيهم على النار وهاتك يا تقليب لحد ما تسمعي أصوات إستغاثتهم بأذنك ، ضيفي مكعب مرق وملح وفلفل وإستمري فى التقليب بلا هوادة حتى تحصلي على القوام المطلوب .. لو تقل تكملي تقليب وتزودي لبن او شوربة .. خفيفة تزودي دقيق وهكذا .. بس لازم تقلبي جامد عشان مايكلكعش ولو كلكع منك ما اعرفكيش

وخلصت الشغلانة .. إجري زي الشاطرة إحضري صينية للمكرونة وضعي فى الأرضية شوية بشاميل ( أرضية الصينية مش أرضية المطبخ ماتخلنيش أفطر عليكي ) عشان المكرونة مايلزقش ، ضيفي طبقة مكرونة ثم طبقة اللحمة المفرومة ثم طبقة مكرونة أخرى ثم البشاميل فى النهاية على الوش .. إحفظي هذا الترتيب كويس حتى لا تعملي نفس عملة صديقتي التي وضعت طبقة البشاميل فى النص!


على الوش ممكن تدلعي نفسك بقى – جبنة موتزاريلا ( مكتوبة صح كدة؟ ) قليلة الدسم او جبنة رومي أو أي جبنة خالية الدسم عندك أو فى ناس بتضرب بيضة بملح وفلفل وتفردهم على الوش .. إنتى وذوقك بقى


وبخ على كدة ناقص بس الوش يحمر .. حطي الصنية فى الفرن وإطلعي إجري .. إجري إعملي سلطة طبعا ولا ناوية تبلطجي وماتعمليش سلطة كمان؟ .. والله أعورك


تعالى هنا رايحة فين؟ .. خلاص مكرونة دايت وهيصة وواخدة بعضك بالصنية وفرحانة اوي؟ .. لا مش معنى انها دايت او قليلة السعرات انك تلهطى الصنية كلها لواحدك .. لا طبعا .. كفاية اوي قطعة واحدة مع سلطة وشوربة والبروتين وكفاية اوي على كدة .. بلطجة مش عايزة ياعزيزتي إنتى.. سامعة؟

ملحوظة رفيعة

صورة الصنية اللى فوق دي مش عمايل إيديا ولا حاجة

لاطشاها من الشيف جوجل عندك مانع؟