فِىْ هِجَاءِ الْمَوَاعَينَ

الحِلّةُ وَالِطّاسَةً وَالرّغَاوِيّ تَعْرِفُنِيْ

وَالْمُعَلَّقَةِ وَالْسَّكِينَةُ وَالمِغُرَفةً وَالْطَّبَقِ

كوكيز الشوفان

عزيزتي حواء الشقيانة .. أهلا بيكي معانا .. خالتك سوكا عايزة تكلمك النهاردة فى حاجة كدة لو ماكانش يضايقك يعني .. ايه بقى يا عزيزتي حواء؟ ايه؟ هو احنا هنقضيها ثورة كدة على طول ولا ايه؟ ماورناش مطبخ نقف فيه لحد ما رجلينا تنمل؟ .. يلا على المطبخ بسرعة منك ليها بدل ما ابلغ فيكوا الشرطة المطبخية تجيبلكوا الجيش بدباباته تشيلكوا هيلا بيلا وتعذبكوا فى المتحف المصري

بصي يا حواء يا حبيتي .. هكلمك النهاردة على حاجة مهمة جدا ودايما بنهملها ، وجبة الفطار .. عارفة هتقوليلي مش بفضى آكل وبأكل العيال وأجري ع الشغل والحوارات دي .. مش مشكلة .. انا ياستي جبتلك أكلة سهلة خالص ولا هتاخد منك وقت فى العمايل ولا وقت فى الأكل والأهم إن فوايدها الصحية كتيرة جدا جدا جدا .. ده غير انها تنفع اوي مع اللى بيصحى يروح الشغل جري وماعندوش وقت يقف يحضر أي حاجة اكتر من كوباية الشاي وإقلب

تعرفي حاجة إسمها شوفان؟ سمعتي عنها طيب؟ .. الشوفان ده ياستي يعتبر من الحبوب بس هو بيتزرع وده شكله .. الشوفان ده مفيد جدا جدا وغني بالكالسيوم والبوتاسيوم والماغنسيوم .. يعتبر من مهدئات الأعصاب ومضاد طبيعي للإكتئاب والقلق والإضطرابات العصبية والإرهاق ، ولكثرة ما يحتويه الشوفان من ألياف بيحمي من سرطان الأمعاء ، ده غير إنه بيحافظ على معدلات الكوليسترول والسكر الطبيعية فى الدم

هتلاقى الشوفان فى السوبر ماركت فى نوع مشهور منه إسمه كويكر، بس فى أنواع تانية كتير برضه .. دوري كويس فى السوبر ماركت الكبير وانتى تلاقيه بلاش كسل ، المهم ان كان عندي شوفان ومش عارفة اعمل بيه ايه ، ايوة اللى فى الصورة ده .. بتقولي ايه؟ إشتريته ليه؟ .. أبداً ، كان عليه عرض فجيبته .. وانتى عارفة اى حاجة عليها عرض وسعرها حلو نجيبها الأول وبعدين نشوف هنعمل بيها ايه !! .. وفى يوم من ذوات الأيام يا حواء يااختي شوفت حلقة فى برنامج فتافيت عن كوكيز الشوفان والنخالة .. لاقيت طريقتها سهلة خالص وقررت أعملها .. النخالة اللى هي الردة على فكرة .. والطريقة هنا والفيديو هنا مافيش داعي اكتبهم تاني بقى

تعالى هنا رايحة فين؟ .. خدتي الوصفة وادتيني ضهرك وماشية عادي كدة!!!؟ مش بتكلم انا؟ .. احم .. بصي يا ستي .. هما كاتبين فى الوصفة إنها بالردة وانا مش عندي ردة ، أعمل ايه يعني؟ .. أغلب؟ .. ماعملش الكوكي يعني؟ .. يوستحيل .. الشيف قالك إتصرف يبقى نعملها من غير ردة .. كاتبين بالسكر البني وانا مش عندي ماعملهاش برضه؟ .. مايصحش .. بلاها سكر بني

كمان كاتبين السكر كوب وانا حطيت نص .. وطلع حلو برضه الحمد لله .. وكاتبين ½ كوب شراب البانكيك بس ما وضحوش ايه هو الشراب ده وبيتجاب منين وبتاع ايه .. بس انا إستبدلته بعصير تفاح بس ربع كوب بدل نص لأني مش حاطة نخالة ، وقال على رأي المثل: عزيزتي حواء الشطورة تغزل بورك عصفورة

انا عملته بالدقيق الأسمر .. لو لاقيته فى السوبر ماركت هاتيه .. مش غالي ومفيد أوي خصوصا لو بتعملي ريجيم او بتحافظي على وزنك .. ماجربتوش بالدقيق الأبيض .. لو جربتيه إبقي قوليلى يا عزيزتي حواء إلهي يسترك

المهم انى عملته ماخدش بالظبط 10 دقائق عمايل لانه مش محتاج يخمر ولا حاجة .. ولما دوقته عجبني أوي لانه بيشبع خالص ويخليكي صامدة لحد الغدا حتى لو هتتغدي بالليل .. واضح ان فيتامين الفوليزم واخد إعارة فى الكوكيز دي، فى طرق كتييييير للكوكيز ده بس الطريقة دي عجبتني عشان سريعة

اكتشفت كمان انه بيعمل أحلى دماغ ، انا متأكدة انك بعد ما تاكلي منه وتشوفي نشرة الاخبار او اى جرنال هتلاقى أول خبر مكتوب فيها: عاجل | كوكيز الشوفان أحلى من البتنجان وتقعدي تضحكي كدة من غير مناسبة كمان .. حلو السجع ده ! ، ده شكله بعد ما خرج من الفرن ، لونه فاتح شوية عارفة عشان ماحطيتش سكر بني زي الوصفة ما بتقول ، نعم؟! بتقولى ايه سيادتك؟ سمعيني صوتك كدة .. شكله مش عاطفي؟!!!! .. احنا هناكل ولا هنتعايق وبعدين إنتى مالك أصلا و.... إحم ، نسيت إنى فى المدونة ، لا يا عزيزتي ده هو بس اللى شكله كدة لكن طعمه جباااااار ، وماتنسيش المثل اللى بيقول: ياما تحت السواهي دواهي

وفى ختام كلامي لعزيزتي حواء اللى عاملة ريجيم او عايزة تاكل أكل صحي أو حامل او عندها سكر او خايفة من سكر الحمل او مش فاضية تفطر الصبح أتمنى انك تجربيه وتقوليلي رأيك .. ايه؟ مين بينادي؟ عزيزي آدم؟ .. ايوة يا عزيزي آدم عايز إيه؟ عايز حتة؟ أنا عاملة الكوكيز دي لعزيزتي حواء دلوقتي .. إنت إسمك عزيزتي حواء؟!!!ا

حلة محشي دايت

نعم محشي .. لا تصرخي فى وجهي عزيزتي حواء وتقولي لي بالفم المليان: مش حينفع اعمل محشي أصل انا عاملة ريجيم !! .. وانا عارفة انك لسة ضاربة شقتين سكلانس من عند الواد حودة اللى على ناصية الشارع بس مطنشة بمزاجي

لا تخافي عزيزتي فلن أفتن عليكي وأقول لأمك، ولكن سأدهشك بالحل العبقري اللوزعي غريب الأطوار والأنماط والأعراف الذي سأقدمه لكي من خلاصة تجاربي

الحل العجيب الحصري فقط من شركة الماسة .. احم قصدي مدونة إنسانة هو .. حلة المحشي الدايت ... أيوووووون داااااااايييييت

يأتيكي عزيزتي مع حلة المحشي الدايت كتيب توجيهات صغير لحلة عملاقة صحية

يفضل قبل الشروع فى عمل حلة المحشي الصلاة ركتين بنية التوفيق فى هذه الخطوة الخطيرة فى حياتك

كما يجب أن تتذكري جيداً عزيزتي إن أول طلعة جوية فتحت باب الحرية .. اقصد صنعت حلة محشي

ويجب عليكي ألا تنسي أبداً إنك من أحفاد الفراعنة بناءة الأهرام حماة المستقبل .. يعني بنت كفاءة وتسلك فى أي حلة بدون خسائر

يفضل مع البدء فى صنع حلة المحشي تشغيل أغاني كئيبة حتى تدخلي فى المود .. وينصح الخبراء بسماع أغنية شادية "والله يا زمن" من فيلم نحن لا نطبخ المحشي

اعلمي عزيزتي ان أهم شئ فى صنع المحشي هو النية الخالصة السليمة ودعاء الوالدين ، كما أقترح قراءة كتاب إخرج المارد الذي بداخلك .. ودخله فى حلة المحشي

من الأفضل صناعة المحشي على مراحل متعددة .. وأقترح فى الحر ده تعليق محلول جلوكوز حتى يمكننا حينها أن نضحي بحياتك فى سبيل حياة حلة المحشي

يجب عليك عزيزتي قبل البدء فى صنع حلة المحشي الذهاب إلى السوق لإختيار ما لذ وطاب من أصناف المحشي المختلف .. يفضل إختيار الكوسة فى المقام الأول أو الباذنجان نظراً توائمهم النفسي مع الدايت

لا تنسى شراء كمية لا بأس بها – كبيرة جداً - من "خضرة المحشي" وهي الشبت والكسبرة والبقدونس ، وإن كنتي لا تعرفين بالتحديد الفرق بينهم فأطلبي من البائع إحضارهم وخلاص .. لا يوجد مانع من إضافة بعض عيدان النعناع الأخضر ( وراور ) لزوم الطعم الجميل

عند العودة للمنزل يمكنك الشروع فى عمل المحشي بشكل فوري او تأخذي هدنة حربية لمدة لا تتجاوز الساعتين حتى لا تفقدي الذاكرة وتنسى ماذا كنتي ستفعلين أساساً

إياكي أن تتخيلي عزيزتي أن صنع حلة محشي أمر صعب، أبداً، فقط إنظري فى المرآة وتذكري إجتيازك لكل المراحل الدراسية بنجاح، هكذا المحشي

المرحلة الأولى: مرحلة غسيل الخضار .. إغسليه بالخل ولا ترحميه .. بثي فى غسيله كل همومك وعذاباتك اليومية الدورية الحلزونية .. اغسلي معه مخك من اي شخص او فكرة تحاول تعكير صفو حياتك

المرحلة الثانية: مرحلة تقوير (تأوير) المحشي .. ضعي المقوار فى قلب الباذنجانة من دول بغل كدة وكأنك تقتلين به كل من فرسك وعكنن عليكي عيشتك .. وعندما تنتهين من (قتل) الباذنجانة وتعذيبها وإخراج تلافيف تلافيفها ستشعرين براحة بالغة

المرحلة الثالثة: غسيل المحشي ووضعه فى مصفاة ( مخرمة طبعاً يا عزيزتي لا تشمتي آدم فينا )ه

المرحلة الرابعة والأخطر: صناعة الخلطة .. والخلطة صناعة .. تضعين فيها كل ما تحبين وبالطريقة التي تفضليها .. أهم شئ فى الخلطة حتى تكون دايت بحق هو ألا تكثري من الرز وأن تكثري بشكل مبالغ فيه من الخضرة وأن تقللي المادة الدهنية إلى الحد الأدنى .. كثيرا ما اضع فيها معلقة واحدة زيت وفقط

المرحلة الخامسة: مرحلة حشو المحشي .. لا تجعلي مخك يسرح بعيداً ويذكرك بأحلامك الضائعة وإحبطاطك اللانهائية .. فقط إحشي بصبر وفى هدوء ورددي فى سرك المقولة الخالدة (( يا جبل ما يهزك ريح )) ثلاث مرات

المرحلة السادسة: رصي المحشي فى الحلة بأناقة وعذوبة – كأن شيئاً لم يكن – لا تخشي أي شئ فالمحشي لن يبوح بأفكارك السودوية لأحد

المرحلة السابعة والأخيرة ( احمدك يارب) : ضعي الحلة على النار غير مأسوف عليها مع قليل من الشوربة او الماء

لا تنسى عزيزتي حواء عندما تنتهي من صنع حلة المحشي ووضعها على النار أن تظلي رايحة جاية تدعي بكل إخلاص: يارب المحشي يطلع حلو

يمكنك أثناء إنتظار حلة المحشي ضرب شوب موز باللبن ساقع عشان تنسي

إذا شممتي رائحة شياط وإتضح إن حلة المحشي إتلسعت منك لا تشعري بالفزع ، كما قولت لك أهم شئ الثقة فى النفس ودي مجرد شكليات ، ايه يعني أكلة باظت ماانتى ياما بوظتي كتير جت على دي؟

بعد ما حرقتي المحشي إجري ع المراية وإبتسمي .. وتذكري دائما إن محاولات النجاح دائما ما تأتي فوق جبال من الفشل


عارفة إنك مش ضامنة هو إستوى ولا لأ .. عارفة إن البتنجان بيشد والرز بيقرقش .. بس ليه ماتقوليش إنك إخترعتي طريقة جديدة للمحشي؟

كفاكي بكاء يا حبيبتي ... كفاية إنك توصلتي لطريقة فاشلة لعمايل المحشي .. مش معنى كدة إنك فاشلة فعلا – بدأت أشك فيكي على فكرة – لا معناه إنك بتحاولي ويا عالم ممكن في يوم من الأيام تنجحي .. قادر على كل شئ

لو إتحايلتي على أمك إنها تاكل من الحلة ولو من باب المجاملة وباعتك عند أول ملف برضه ماتزعليش، إبتسمي وشغلي إغنية عيني ع الأم وحنان الأم بسرعة

ولو موضوع ماما ده حازز فى نفسك أوي ممكن تشغلي كمان أغنية محمد فوزي: ليه ياماما تعذبيني وأشتريكي وتبعيني يجرا ايه لو ترحميني وتدوقي المحشي؟؟؟؟

ولا يهمك يا عزيزتي حواء .. فقط أنصحك بالإبتسامة وقراءة كتاب دع القلق وابدأ الحياة بدون محشي

وفي قعر هذه الحلة .. اقصد نهاية هذا الموضوع أدعوكي للإسترخاء وإغماض عيناكي وأخذ نفس عميق جدا من معاميقك ولنتجرع كؤوس الماء المثلج ونلقي بمرارة الفشل فى ذاكرة النسيان لكن مش عارفة ليه يوهيألي يا حورية إنك ما اتوضتيش قبل ما تدعي إن المحشي يبقى حلو ... تذكري دايماً عزيزتي إن حلة المحشي محتاجة قدر كبير من صفاء النفس ونقاء السريرة

مكرونة للجدعان

أيها السادة

إليكم هذا النبأ الهام

لقد قامت قواتنا المطبخية اللوزعية الخزعبلية

بتدشين أحد إنجازاتها الكاميكازية

الخاصة بالمكرونة

فالمكرونة كما تعلمون يا سادة مادة لا تفنى ولا تستحدث من العدم

ولكنها تؤكل بالصلصة

أو بالشاميل أو باللحمة المفرومة أو بالتونة

وبما إننا نختلف عن الآخرين .. تماماً

فقد قررت قواتنا المطبخية عمل مكرونة بالرنجة

أينعم .. رنجة

ولكن نحب أن نطمئنكم جميعاً أننا صامدون

ونعافر للبقاء على قيد الحلة

وما نجيلكومش فى حاجة وحشة

ولا أراكم الله مكروهاً لديكم

وربنا يجعلها آخر الآحزان

ولا عزاء لموجوعي البطن