Tuesday, February 27, 2007

ياعينى ع التاجز

يانهاااااااااااااااااااااار
ايه الناس الكتير اللى واقفة على باب المدونة دى؟
واد يا كاميكاز .. تعالى هنا
انا مش بسيبك فى المدونة تصحى وتنام فيها عشان تحرسها؟؟
ايه الدوشة دى قولى؟؟

معلش يا ستو هانم .. اصل جتلك تاجز كتيرة ومعملتيهاش حضرتك
اها .. يعنى دول اصحاب التاجز وعايزينى اعملها؟؟
ايون
تيب هات اما نشوف
-----------------------
التااااااااج الملوكىىىىى
أن أن اااااااااااااه


التاج ده يا جماعة جالى من جهااات عدة بما إنه تاج أرض جو
جالى من نوجى حبيبتى وسهى غواص بحر الأمل سابقا .. وات إيفر حالياً
وبرده جالى من الاستاذ اللى مع نفسه ومن الواد كبكب
يمكن يكون جه من حد تانى وانا ناسية ولا حاجة
مشغوليات بقا معلش

إستعنا على الشقا بالله .. هيييييييه دنياااااااا

اسم مدونتك؟
إنســــانة

لماذا اخترته.. ماذا تقصد به؟
بص اللى هيقرا اول بوست ليا هيعرف إن الموضوع جه معايا بالصدفة البحتة
كنت عايزة اخوض التجربة فلما جيت اكتب إسم للمدونة معرفتش اكتب ايه
قلت انا إنسانة ربنا خلقنى وهيجيلى يوم وامشى
وسميتها إنسانة
وكملت إجرائات إنشاء المدونة وطلب منى وصف للمدونة
فقلت لو حد دخل هيقول مين الإنسانة دى
فخدت الوصف من فيلم ظرف طارق
كائن حى يعيش ويتعايش
:D
بس بعد كدة لاقيت إن إنسانة إسم كويس جدا بالنسبالى بالذات
لأنى على المستوى الشخصى بحب الإنسانيات جدا ودراما الحياة اليومية اللى كل واحد بيعيشها يومياً
آحلامه
آلامه
دموعه
أفراحه
ضعفه
ضحكه
اى شئ يتعلق بالإنسان


هل فكرت في إغلاق المدونة.. والسبب؟
لأمفكرتش .. بس فكرت اعمل مدونة تانية محدش يعرف من خلالها إنى أنا
لأنى هنا أهلى وصحابى وقرايبى والناس كلها عارفة المدونة
غير إنى بحط لنفسى قيود شديدة جدا على أى موضوع او صورة او كلمة فى المدونة
بس حتى لو عملت مدونة جديدة مش هقدر ابقى براحتى برده لأن انا اللى بحط القيود لنفسى طالما اللى هكتبه حد غيرى هيقراه وهفضل كدة على طول ده غير إن ربنا عارف انا مين فى كل وقت وفى اى مكان


صورتك فى المدونة ..رمزيتها ؟
غيرت صور كتيرة جدا
بس كان العامل المشترك فيهم كلهم هو الاطفال والدمعة
بس إستقريت على الصورة دى الحمد لله
فى تعليقات قالتلى إن الصورة مش لايقة مع خفة دمك
ماهو الضحك ده من همومنا الصراحة
يعنى مهما ضحكت من جوايا مقدرش أنسى الأزمة الإقتصادية والسياسية اللى كل العالم العربى بيعانى منها
وفلسطين
والعراق
ولبنان
والسودان
وقلة الحيلة
ده غير البطالة
والتضخم
وشبح العنوسة اللى بيهدد أى بنت
والتوهان اللى كلنا عايشين فيه
بس برده بنضحك وهنفضل نضحك عشان نعرف نعيش


طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
صعب اصنفها
انا بكتب اولاً واخيرا اللى جوايا
بس أى حاجة أدبية بكتبها بعتبرها عــــك
مش مقتنعة بنفسى فى الموضوع ده خالص

بس بشكل عام اقدر اقولك إنى بكتب للإنسان وعن الإنسان اللى جوانا كلنا


لماذا تدون أصلا ؟
سؤال وجيه
لو لاحظت دلوقتى هتلاقى محدش بيسمع حد بجد
محدش فاضى ولا ناقص اساسا يسمع حد
لو كلمت حد على حاجة عنك هتلاقيه رد عليك بحاجة عنه هو ومش هيسمعك
المدونة عملتلى مساحة خاصة بيا اتكلم فيها واحكى عن كيانى انا
لان حتى لو حد من المحيطين بيا قلل منى بس الأهم إنى مش مقللة من نفسى
اكيد كلنا بنتعرض للموقف ده
بس لما بيحصلى كدة بقول لنفسى إنى واحدة من بنى آدم
ربنا هو اللى خلقنى ورزقنى وأكرمنى فى الدنيا دى الحمد لله
أكيد كل ده لحكمة
وخلانى عايشة فى الوقت ده بالذات
وخلانى بالشكل والشخصية دى بالذات
كل ده مش عبث حاشى لله
وزى ما الدكتور إبراهيم الفقى دايما بيقول
إنت احسن مخلوقات الله
الكون ده كله مسخر لك

على فكرة ده مش غرور خااااااالص .. ده تقدير للذات
لإن الواحد لو حب نفسه وإحترامها بجد هيعمل لها اللى يخليها سعيدة فى الدنيا وفى الاخرة إن شاء الله


أحلى جملة قيلت لك فى وصف مدونتك ؟
إنها إنسانية بجد


التعليقات بالنسبة لك ..أهميتها ؟
اكيد مهمة بس فى نفس الوقت مسؤلية
لان معنى كدة إن فى ناس بتدخل على المدونة وبالتالى لازم اخد بالى اوى انا بكتب ايه وعايزة اقول ايه ولازم احترم عقل اللى بيقرالى


أحلى بوست كتبته ..ضع اللينك ..ثم اذكر لماذا ؟
كلهم أولادى
ببس البوست بتاع كل عام وأنتم بخير ده بجد حسيت إنه شرف المدونة
Oh God, Forgive me when I whine
بجد قريب من قلبى جداااااا
وتخاريف كاميكازية طبعااااا
عشان ده كان اول مرة اعرفكم على كاميكاز
بالمناسبة كاميكاز ده شكله هيودينى فى داهية
ربنا يستر

أفضل مدونة قرأتها ..يمكن اختيار عدة مدونات ؟
كتيييييييييير حاطة هنا شوية لينكات بس فى حاجات تانية بستكشفها وعجابنى أوى

أفضل بوست قرأته ..يمكن اختيار اكتر من لينك ؟
لا كتير اوى الصراحة

هل خسرت صديق بسبب كتابة هنا؟
اعوذ بالله .. بعد الشر ياكابتن

حد قل ادبه فى التعليق ..ايه رد فعلك ؟
كان فى حد مرة عمل تعليق بالعنجليزى مش حلو فلغيته طبعا
لكن اى نقد لأى حاجة عندى برحب بيه اكيد

:)أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
فعلا كتير ومن وحاشتهم مش عايزة اتفكرهم بقا

أسوأ بوست ؟
أى بوست بذيئ

أسوأ مدون ..مهو هتجاوب هتجاوب ؟
يادى النيلة
اللى بيبعت البوست البذيئ يا بيه

أمرره لمين بقى ؟
انا متأكدة انه وصل لمصر كلها اصلا

الحمد لله اخيراً خلصت
إستنى يا ستو هانم ... ليه ليكى تاج تانى
يابنى إبقى زمر وإنت ماشى
تاج ايه ده إيه ده كمان؟؟؟
ده تاج من الجميلة وئام .. يلا جاوبى بقا بلاش دلع
تيب بس ماتزقش

افتح الكتاب اللي بتقراه حاليا علي صفحة 123 و عد خمس سطور و اكتب اول تلاتة بعدهم

ه- لسنا معجبات .. نحن أعضاء فى جمعية تكونت فى باريس للدفاع عن عمرو
ضحك صبرى وهو يقول:ه
ه - براءة .. مادام الجمال سيدافع عنك

دى رواية حارة الهلالية لمحمد جلال

نفسى اعرف ايه لزمة التاج ده
يلا مش مهم
انا همشى بقا
أى خدمة يا ستو هانم؟؟
أيون يا كوكو .. خد بالك من المدونة
وابقى نضف الشبابيك دى متربة خااااالص
وماتنساش تشوف الناس الجميلة دى تشرب ايه
:)
تحت أمرك يا ستو هانم
يلا إمشى بقا صدعتينا

Friday, February 23, 2007

عدنـا


هى دى الحياة .. ضحكتين وآآه
ضحكتينك عيشهم .. دمعتينك حوشهم
.

فعلا دوام الحال من المحال
فى لحظة كل شئ اتغير
الكمبيوتر باظ الاول وعطلنى جامد فى البحث
وبعدين بابا تعب اوى ونقلناه للمستشفى
غير إن اختى على وش ولادة والبيت فى حالة طوارئ
ده غير الحاجات اللى الدكاترة بتوع الكلية طالبينها
والمحاضرات اللى عايزة تتبيض
بس مع كل ده لازم تصبر وترضى وتظن فى ربنا الخير
وتقول بكل جوارحك وبأعلى صوت فى قلبك
الحمد لله على كل حال
الحمد لله انا بعمل البوست ده من البيت والكمبيوتر إتصلح الحمد لله
الحمد لله بابا رجع البيت وبقى احسن بكتير الحمد لله
والحمد لله إنى عندى مدونة اقدر افضفض فيها
المهم بقا يا جماعة بجد إنتوا وحشتونى جدا
وجزاكم الله خيرا كلكم على كل حاجة
بجد حسستونى إنى عندى ناس يمهم أمرى بجد
بيسألوا عليا وبيدعولى من قلبهم
ربنا يكرمكم جدا على الدعاء والسؤال والاهتمام
.
بس بقا انا حبيت اطمنكم على بابا
ويارب ربنا يتم شفاه على خير ويشفى كل مريض
وياريت تدعوا لأختى ربنا يقومها بالسلامة يارب
ويارب سنة رابعة والبحث يخلصوا على خير
.
.

دى كانت اخر اخبارى الكاميكازية

المهم إنتوا عاملين ايه واخباركم ايه ؟؟؟؟؟
.
.

إستنوا كنت هانسىىى

كاميكاااااااااااز بيسلم عليكوا

Tuesday, February 20, 2007

اسألكم الدعاء

يوم الاحد الصبح بابا تعب اوى
والضغط والسكر عليوا جامد فنقلناه للمستشفى
وهو لسة هناك لحد دلوقتى
ارجوكم تدعوله
ربنا يشفيه ويعافيه ويشفى كل مريض
الطف بيه يارب
.
.
اللهم صلى على سيدنا محمد صلاة تفتح بها ابواب الخير والتيسير
وتغلق بها ابواب الشر والتعسير

Thursday, February 15, 2007

عادى خااااااااالص


ماشية فى طريقى فى آمان الله
والطریق واقف کالعاده
وبقول ايه الزحمة دى
يارب الدكتور مايكونش دخل عشان الحق احضر
المكروباظ ده بطئ كدة ليه
حاجة قرف
وتلاقى مرة واحدة فى اول اسبوع الدراسة
والواحد مش طايق الكلية ولا البحث ولا طايق نفسه
ماسووووووووورة لونها أحمر تنفجر فيكى يامصر
خير اللهم اجعله خير
أتارى فى حاجة بقا اسمها عيد البتاع
قصدى عيد عم فلانتين ده
وحاسة كدة ان ليه علاقة بفلانتينوا بتاع زمان
يلا مش مهم
المهم بقا ان كل حاجة بقت حمرة ياناس
وظهرت كائنات غريبة على الشعب المصرى كمان
إشى دبدوب
وإشى قلب احمر
وإشى بلالين
وإشى كروت
واشی حاجات بتلمع
والحاجات دى بقا موجودة ومتعلقة فى كل حتة
قلت يابت عادى خااااااااالص ومالناش دعوة
ألاقيلك بقا التلفزيون يوميها ماعندوش غير عبد الحليم
وفيلم نهر الحب وفيلم حبيبى دائما وفيلم أغلى من حياتى تقريبا
بتاع أحماااااااااد هدىىىىىىىىى
لما دماغى ورمت
قلت يابت عادى خاااااااااااااالص ملناش دعوة
وفى البرامج بقا كله لبس احمر وبيتكلم عن المناسبة دى
وان حتى الاصحاب والاخوات يسألوا على بعض ويحبوا بعض
قلت يابت البنات اللى عندك على الموبايل مش هتهونى عليهم وهيعبروكى ولو حتى بميسد
أفاجئ إن الموبايل ساااااااااااااااااكت من اول اليوم لأخره
قلت يابت عادى خاااااااااااااالص ملناش دعوة
البت بنت الجيران الصغيرة فى ثانوى باين خبطت علينا الباب فتحتلها كانت لسة راجعة من المدرسة وبتسأل على حاجة الاقى معاها هدية حمراااا
قلت يابت عادى خااااااااااااااالص وملناش دعوة
الاقى فى التليفزيون برده الناس بقا فى الشوارع وبيشتروا هدايا وحركات وكلام من ده والاقى ان محدش عبرنى بقفص جزم حتى
يابت عادى خااااااااااالص وملناش دعوة
تنزل الشارع - ستر ربنا إنى منزلتش ده اخويا اللى بيحكيلى - تلاقى الدنيا زحمة مووووووووت فى ايه ياناس؟؟؟
اتارى فى حفلة عمو تامر حسنى والناس كلها رايحة
عشان طبعا قولی بحبااااااااااک بصوت عااااااااالی
عشان الشعب يعيش
اكيد عادى خااااااااااااااالص
وموبينيل لما تخلى مكالمة من الساعة 1 الصبح للساعة 8 الصبح متواااااااااااااصلة بجنيه واحد بس تقريبا
ورد على التليفون بصوت وااااااااااطى
برده عادى خاااااااااااااااااالص ملناش دعوة
والاقى ساعتها الكمبيوتر بايظ وفاعدة مخنوقة ومتعطلة عشان البحث
والناس مزأططة وكله تمام تمام
ماشى عادى خااااااااااالص
والاقى الواد كوبا بيقولى انه نازل ياخد هديته وخايف لاتطلع وردة
وميعرفش إن محدش عبرنى بحزمة فجل حتى
فبرده عادى خاااااااااااالص وماليش دعوة
اساسا انا مش معترفه بالظلانطین ده
والمشكلة بقا انى اتلخبطت شويتين
قلت طالما الشوارع احمرت
والقلوب ظهرت
والدباديب اتنططت
يبقى خلاااااااااااااااااااااص
الشعب كله اشتغل
ومافيش حد قاعد على القهاوى
والتعليم بقا 100 فل
والمرتبات عليت
والشوارع نضفت
واللى نفسه يتجوز بيتجوز
عادى خااااااااااااالص
وفلسطين اتحررت بقا
وينفع نسافر اى بلد عربى من غير باسبوركمان
وامريكا انقرضت اساسا
وإسرائيل إترمت فى البحر
كله تمام التمام بقا
بس فى مواطن نبيه ممكن يسألنى
طيب وايه المشكلة لما الناس تحب بعضها فى وسط كل المشاكل دى؟؟
اقوله سؤال واجيه ياكابتن
مافيهاش مشاكل خاااااااااالص
احنا مالنا.. ربنا يسهل لعبيده ياعم الحاج
ده غير اساسا إن الواد كاميكاز بيدور على عروسة
واخدين بالكوا يابنااااااااات إستعدووووووووووا
بس خدوا بالكم ده عاوزها شبه كامكوزة عجرم
ولن يتنازل ابدا عن الشرط ده
وبما إن مافيش حد فى مصر شبه كامكوز عجرم عشانى
فكاميكاز قرر يستوردهولى بس بشرط يجبلى حزمة الفجل ويكون لونها احمر كمان
ازاى معرفش وماليش دعوة
وبما إن كاميكاز قرب يفتح بيت عقبال عندكوا فطبعا محتاج لنصائح كاميكازية
وشفقتاً بيه وبكل اللى زيه قررت اديه احلى نصايح فى الدنيا
نصايح فظيعة مريعة لحياة مستقبلية كاميكازية غير طبيعية
استنوا قبل مامشى
ألف مليون لأى اتنين مخطوبين وهيتجوزوا قريب او عرسان جداد وربنا يتمم بخيريارب
وياريت تركزوا اوى مع النصايح دى

Sunday, February 11, 2007

حالـة



ذهب بنا إلى الحديقة


كعادته دوماَ يوم العطلة


تركنا الولد يلعب مع اصدقائه بالكرة


فهو يعشقها كثيراً


اصبحنا بمفردنا


تعالت اصوات ضحكاتنا


كم استمتع بخفة ظله


جلس اسفل شجرة مجاورة إثنان


كانا يستمعان لأغنية لفيروز


وبدأت سلاسل الحب تنسج حول قلوبنا

أنا لحبيبى وحبيبى إلي


نظر لى بلهفة الطفل كعادته


اخفيت نظرته بين جفونى


قبل ان يلاحظها احد من حولنا


يالله! كم اعشق هذه النظرة


يا عصفورة بيضا لابأة تسألى


إتسعت إبتسامته وهو يقول


ه- "اقول ايه بس .. بحبـك"ه


ه-"بس انا بقا مش بحبك .. انا بعشقك!"ه

-


****

-


فجأة توقفت سلاسل الفيروز


وتحولت الى تصفيق يزداد من حولى

ابصرته فوق خشبة المسرح


يتسلم شهادة التخرج فى غاية السعادة


هبط ادراج المسرح


اقترب منى بلهفة الطفل كعادته


مسح دموعى واحتضننى


ه- "بابا هيفضل عايش جوانا يا امى"ه

Wednesday, February 07, 2007

عَلق عَلق ياعم الحاج


-

كاميكاااازبيسأل سؤال وجيه

-

ياترى بيقولوا لبعض ايه؟؟؟؟

-

-

-

-

ملحوظة هامة:ه

صاحب احلى تعليق له 75 قرش بس

عشان الميزانية الكاميكازية مخرمة شوية

Monday, February 05, 2007

Oh God, Forgive me when I whine

قضيت ليلتى هذه مع دمعة مسجونة
لم اتمكن من الافراج عنها
من شدة الألم والضيق
ولا اعلم من اين هدانى الله الى هذه الانشودة
التى فجرت كل دموعى المكبلة
وأطلقت لسانى بخير كلمة
أراحت قلبى
الحمـد لله

>
.
Today, upon a bus,
I saw a girl with golden hair.
And wished I was as fair.
When suddenly she rose to leave,
I saw her hobble down the aisle.
She had one leg and wore a crutch.
But as she passed, she smiled.
Oh God,
forgive me when I whine.
I have two legs the world is mine.
With feet to take me where I `d go.
With eyes to see the sunset's glow.
With ears to hear what I'd know.
Oh God,
forgive me when I whine.
I have blessed indeed, the world is mine.
.
I stopped to buy some candy.
The lad who sold it had such charm.
I talked with him, he seemed so glad.
If I were late, it `d do no harm.
And as I left, he said to me,
"I thank you, you've been so kind.You see," he said,
"I `m blind"
Oh God,
forgive me when I whine.
I have two eyes the world is mine.
With feet to take me where I `d go.
With eyes to see the sunset's glow.
With ears to hear what I'd know.
Oh God,
forgive me when I whine.
I have blessed indeed, the world is mine.
.
I saw a child with eyes of blue.
He stood and watched the others play.
He did not know what to do.
I stopped a moment and then I said,
"Why don't you join the others, dear?"
He looked ahead without a word.
And then I knew. He couldn't hear.
Oh God,
forgive me when I whine.
I have two ears the world is mine.
With feet to take me where I `d go.
With eyes to see the sunset's glow.
With ears to hear what I'd know.
Oh God,
forgive me when I whine.
I have blessed indeed, the world is mine.
.
.
الحمـد لله

Friday, February 02, 2007

من تكون؟



فكرت كثيرا من ستكون هذه المجهولة التى لااعلم عنها سوى انها فتاة مثلي .. احبها قبل ان اراها واتعجب وافكر كثيرا
ترى من تكون؟
.

جميلة الجميلات جنية القصر المسحور؟
.
أم نجمة فى السماء من نور؟
.

أم سمكة تاهت بين أمواج البحور؟
.

أم فتاة شرقية ذات جناح مكسور؟
.

أم فتاة غجرية تحتمى بقلبها الجسور؟

.

أم كلمة حق فى كتاب الحياة تلمع بين السطور؟
.

أم عقل هائج بالوقت يـخور؟

.

أم كـارمن وعِندها فى بحر يثور؟

.

أم طير جريح محلق بين الصقور؟

.

أم زهرة من العصور الحجرية؟
.

أم بسمة على الشفاه منسية؟
.

أتكونينَ رابعة العدوية؟
.

أم انتِ انا..وانا هيّ؟
.


تمضى بى الحياة ويبقى السؤال
.

من تكون؟


ذكرى أليمة

2/2/2006
تاريخ غرق العبارة
الســلام
98
أيوة .. عـدت سنة



جدير بالذكر ان هذه القضية لم تحسم بعد
وتم إعتبارها جنحـة
>
.
.

اللهم اغفر لهم وارحمهم
وافرغ على قلوبنا صبرا
.
.