Wednesday, December 30, 2009

2009: كورس مكثف فى الصبر


فكرة الورقة والقلم اتعلمتهم من زمان وحبيتهم من زمان وهى انى اطلع كل اللى جوايا فى الورقة والقلم ، لما بمسكهم بحس انى عايشة وانى بتنفس وانى اقدر اتعدى كل المصاعب وانى حقدر اكمل واوصل ، عشان كدة جميل اوى انك اخر كل سنة تقعد مع نفسك وتعمل عصف ذهنى على الورق وتكتب كل حاجة اتعلمتها ومريت بيها وايه الصح اللى عملته ونفسك تثبت عليه وايه الغلط اللى عملته ونفسك ماتكرروش تاني ، اعتقد لحظة زي دي تعتبر لحظة مهمة فى حياة كل واحد فينا ومش لازم يضيعها من ايده ... لحظة المحاسبة والمراجعة والفهم للذات

كل سنة بتعدي فى حياتنا بيبقى ليها معنى وشكل ولون ، بنتغير معاها ، بنكبر ، بنفهم ، بندرك ، بنتعلم ، مواقف وتجارب كتيرة اوي ممكن تعدي عليك خلال سنة من عمرك وبتيجي فى يوم فى اخر السنة تقعد مع نفسك وتشوف انت ابتديت السنة ازاى ودلوقتى انت عامل ازاى وانت فى نهايتها ، عامل ازاى وجسديا ونفسيا واجتماعيا ودينيا واخلاقيا وكل حاجة
الفين وتسعة سنة عجيبة ... طويلة جدا وقصيرة جدا فى نفس الوقت مليانة احداث ومراحل واشخاص ومواقف تقريبا عمرى ما حنسى اى حاجة حصلتلى فى السنة دي بالذات ، المهم مش حطول عليكوا قولوا طولي ، حكتب فى نقاط سريعة كدة اتعلمت ايه
*****

كبرت فى 2009 أضعاف عمري الحقيقي

السنة اللى فاتت كنت بتمتع بسذاجة رهيييييييبة بحاول اتجنبها السنة دي ان شاء الله ... جعلوني ناصحاً

السنة اللى فاتت عشتها كأن حد مغميلي عيني ... على نياتي لأقصى درجة

اتعلمت السنة اللى فاتت ان الطيب سهل أوي يتاكل .. او الطبيعي انه يتاكل ... واللى شوكته قوية وقادر ياخد حقه ولو حتى بلسانه بيتعمله ألف حساب

اتعلمت يعني ايه حد مايعبركش طول ماهو مش محتاج منك حاجة

واول ما تلوح له مصلحة عندك فى الأفق يبقى ناقص يحطك فوق دماغه

اتعلمت يعني ظلم وقد ايه هو احساس بشع بجد

واتعلمت يعني ايه اللى ظلمك ده يحاول يتعامل معاك ويضحك فى وشك

ومن ضهرك هو بجد لا بيحبك ولا بيطقك

*****

اتعلمت من السنة اللى فاتت انك لو معندكش خطة لحياتك غصب عنك ومش بمزاجك حتبقى جزء من خطط الآخرين

اتعلمت من السنة اللى فاتت ان عمر ماحد حيقتنع انى مهمة طول ما انا نفسي مش مقتنعة بكدة

اتعلمت من السنة اللى فاتت يعني ايه قضاء وقدر ويعني ايه لطف فى القضاء والقدر

اتعلمت يعني ايه اسم الله القدير .. مهما الناس اتكلمت هو قادر يخلف ظنونهم جميعا

اتعلمت يعني ايه غربة ويعني ايه يتم ويعني ايه وحدة ويعني ايه خوف

اتعلمت يعني ايه حد يكرهك أوي

واتعلمت انك لو عايز تعرف مين بيحبك ومين بيكرهك بجد شوفه وقت الشدة حيتصرف معاك ازاى

اتعلمت يعني ايه مايبقاش قدامك خيار غير انك تعيش حياتك بنفسك

وتفرح نفسك بنفسك ، وتشغل نفسك وتعلمها وتمدلها إيدك وتساعدها

عشان لو معملتش كدة لنفسك ممكن الدنيا ماتوفرلكش حد يعملك كدة

اتعلمت ان الفرحة مش بضاعة ممكن تستوردها من الآخرين

اتعلمت ان الفرحة حلاوتها لما تطلع منك انت وتشع بيها لكل اللى حواليك

*****

اتعلمت يعني ايه صبر ويعني ايه عبادة ويعني ايه دعاء ويعني ايه ربنا

اتعلمت انى عمرى ما حرفعله ايدي واقوله يارب من قلبى وحيسيبنى أبدا

اتعلمت يعني ايه أمومة ويعني ايه حمل وايه هي آلامه

ويعني ايه تقعد 270 يوم قايم نايم وفى حد بيتحرك جواك وعايش معاك

يعني ايه تصلي وتقرا قران وهو جواك هادي وساكن مطمن بكلام ربنا

حد لو عليت التليفزيون شوية يتحرك وكأنه بيعترض او مبسوط

ولو طنشت وجبة يتألم ويحسسك بألمه عشان تقوم تاكل

يعني ايه ملامح انسانة كلها تتغير لوجود طفل فى احشائها

اتعلمت يعني ايه ولادة ويعني ايه غرفة عمليات

اتعلمت يعني ايه موت وألم ووحشة وفراق

اتعلمت يعني ايه صدمة

ويعني ايه الصبر عند الصدمة الأولى

اتعلمت يعني ايه طبيب مهمل

اتعلمت يعني ايه احساسك انك عشت الفترة دي كلها مع ملاك ربنا اصطفاه ورحمه من دنيتنا

اتعلمت يعني ايه تمشى وفى كائن حي ملك الموت جاله وقبض روحه وهو جواك

وموقف بشع جدا وانت حاسس انك قبر ماشي على رجليه

*****

اتعلمت يعني ايه حد يشتمك وتقرا شتيمتك بعينك

اتعلمت يعني ايه حد يفتري عليك ويتهمك انك بتتألى على الله وافتكرت انك ضمنت الجنة

ويعني ايه تبكي لما تقرا الكلام ده خجلا وحيائا من الله عز وجل

ويعني ايه بعدها بأسبوع واحد كل اللى يشوفك يقولك الطفل ده مش حيرضى يدخل الجنة الا لما ياخدك انتى وابوه فى ايده

اتعلمت يعني ايه اسم الله الحق والعدل

*****

اتعلمت يعني ايه مايبقاش ليا نفس ابدا للأكل

اتعلمت يعني ايه اخاصم النوم

اتعلمت يعني إيه أم تزعل لزعلي وتفرح لفرحي

اتعلمت يعني ايه حزن أب على فراق ابنه اللى كان مشتاقله جدا

عرفت يعني ايه اب يروح يدفن اول فرحته

وشه اتغير مش نفس الشكل اللى اعرفه

قولتله مالك، قالي مافيش

دفنت ابني اللى كنت بتمناه من الدنيا

سمعت صوته وانا طالعة من غرفة العمليات وهو بيعيط فى طرقات المستشفى

الكل كان بيبكي حتى الممرضات

ولاقيت ناس غريبة معرفهاش داخلين يطمنوا عليا ويحضنوني ويبوسوا فيا

عرفت يعني ايه تتنقذ من الموت

وتخرج من عملية تقول يارب .. انا نفسي اخش الجنة

عرفت يعني ايه ابني يدفن من غير ما اشوفه

وكل اللى يشوفه يقولي كان شبهك اوي

عرفت يعني ايه حرقة قلب ام على ابنها

بحس ان حد ماسك قلبي وبيعصره جامد بلا رحمة

وبحس صوتك قلبي وهو بيأن من الألم

والمس بلل دموعه بين إيديا

*****

اتعلمت يعني ايه حب واتعلمت يعني ايه عكس الحب ده

اتعلمت يعني ايه محنة وبردو يعني ايه منحة

اتعلمت يعني ايه اصدقاء مهتمين يخففوا عنك ألمك ولو حتى مايعرفوكش ولا عمرهم شافوك

اتعلمت يعني ايه حب خالص لله فى لله

اتعلمت يعني ايه مسؤلية فتح بيت اللى كنت مشفقة منها جدا

اتعلمت يعني ايه لما تزعل حد يطبطب عليك

وشوفت لما تزعل ممكن بردو حد يقولك انت بتعيط على ايه .. مش للدرجة دي يعني .. عادي عيل وراح

وشوفت ان اللى ممكن يقول كدة يكون على درجة قرابة كبيرة باللى انت زعلان على فراقه ... سبحان الله

*****

اتعلمت انى لازم ماابقاش على الهامش وانى لازم اكون البطلة الأولى فى حياتي لانها ببساطة حياتي انا

حسيت بمتعة انك تعمل اللى على مزاجك والصح ومايهمكش كلام اى حد

اتعلمت يعني ايه حد يحاول بشتى الطرق انه يسيطر على حياتك ويتدخل فيها

اتعلمت يعني ايه حد يوعد ومايوفيش

اتعلمت يعني ايه حد يتكلم وماينفذش

*****

السنة اللى فاتت اول مرة اقفل فيها المدونة

السنة اللى فاتت اول مرة ادمن تويتر أوي كدة

لو حبيت اكتب شعار للسنة اللى فاتت حقول ببساطة

إذا سألتنى: ماذا فعلت فى العام الذى مضى؟

سأقول لك: كنت أتعلم الصبر

Tuesday, December 22, 2009

نهر الحياة


كثير من هؤلاء الناس الذين نراهم يمضون من حولنا فى نهر الحياة

دهستهم الحياة من قبل مرة او مرات

لكنهم انتفضوا ليواصلوا المسير

فالحياة طيبة برغم كل شئ

وبرغم أنها فى مثل تلك الحالات تغدو مثقلة بذكرى اللحظات الأليمة

تغدو مفعمة بالشجن

والشجن حزن جليل

والجلال أعلى مراتب الفتنة


أوتار الماء
محمد المخزنجي

Wednesday, December 09, 2009

لسة إنسانة



انا فاتحة المدونة دي من 2006


وفاضل كام يوم وحتم 3 سنوات


المدونة دي عاشت معايا فترات مختلفة ومتناقضة اوي من حياتي


عاشت فترة الدراسة ومتاعبها


وبعد التخرج والبطالة وحلم الوظيفة


وبعد الوظيفة ومتاعبها بردو



وقرار الاستقالة


وقرار الخطوبة والزواج


ووفاة ابني


طبعا اللى يعرفني من الأول يمكن يستغرب ويحس انى مش انا


اللى كان بيقرالها من زمان


كنت زمان بضحك ومقبلة ع الحياة


دايما كاميكاز موجود فى اى بوست


دايما بيهزر وبيضحك وبيضحكم


دايما بنتخانق مع بعض


ودايما بنضحك معاكم


انا كمان زيكم حاسة انى اتغيرت


يمكن اكثر نضوجا


او يمكن اكثر هما ومسؤلية من الاول


مش عارفة


وحتى الفرق فى السن مش جامد اوي


كنت عشرين وبقيت تلاتة وعشرين


يمكن كبرت فى التلات سنين دول تلاتين سنة مرة واحدة


مش عارفة


يمكن التجارب الكتيرة اللى مريت بيها خلال التلات سنين دول هما اللي عملوا كدة


على العموم مش انتوا بس اللى حاسين بكدة


ولا انا بس


كل اللى حواليا حاسين بكدة بردو


دايما شاردة وسرحانة


بتجيلي نوبات بكاء حادة فى اى وقت واى مكان


حالة من التصوف والزهد الشديد فى الدنيا

لا باكل ولا بنام تقريبا


دايما صاحية ودايما ماليش نفس للأكل



الحمد لله على كل حال


انا عارفة ان فى الفترة الاخيرة كانت معظم البوستات حزينة


بس والله دي لا شكوى ولا اعتراض على امر الله


يمكن اللى مش بقدر اقوله فى الواقع باجي اقوله هنا


ويمكن احتياجي للبوح والفضفضة هو اللي خلاني ارجع


افتح المدونة من تاني


ويمكن مستغربين انا ايه اللى خلاني اقفل المدونة


الموضوع ببساطة هو التعليق ده


Anonymous has left a new comment on your post "كان ليا حلم":
ربنا يهديك بص للمصايب اللى حواليك وانت تحمد ربنا بدل ما كل مدونتك شكوى كده الرحمه بالناس شويه



*********
ده تعليق جالي على البوست اللى قبل ده


وفعلا قعدت افكر


يعني ايه واحد صاحي الصبح مقبل ع الحياة


ويقوده حظه العثر لمدونتي ويقوم يكتئب


هي الناس ذنبها ايه فعلا بجد


اللى مات ده ابنى انا مش ابن حد تاني


واى حد بيقرا المدونة بجد مالوش اى ذنب فى اى حزن جوايا


فكرت افرفش عشان عزيزي القارئ ينبسط


بس اكدب عليكوا لو قولتلكوا اقدر


ممكن امثل الحالة دي فى الواقع وفى اماكن كتيرة


بس هنا جوا المدونة بجد مش بقدر


بحس انى جوا نفسي اوي وكأني قدام مراية وببص فيها


حتى وانا بكتبلكوا دلوقتى مش مرتبة حكتب ايه


بسيب صوابعي ع الكيبورد وقلبى يمليها الكلمات


سامحوني مش بإيدي


حاولت انساه بس مش قادرة


يمكن لأن فترة النفاس لسة ماخلصتش


يمكن لان كل حاجة فى جسمي بتفكرني بللي حصل


يمكن مش عارفة


الحمد لله على كل حال


انا بس كان نفسي اقول للأخ صاحب التعليق


ربنا وحده اللى يعلم انا راضية ولا ساخطة على امره وقضائه


وربنا وحده اللى يعلم باللي بيني وبينه


بس مافيش حاجة فى الدين بتقول ان الحزن يتنافى مع الرضا


والا ماكنوش سموا عام وفاة السيدة خديجة رضي الله عنها بعام الحزن


الحمد لله على كل حال


وقدر الله وما شاء فعل


نرجع بقا للسبب اللى خلاني افتح المدونة من تاني


السبب هو اندهاشي الشديد من شئ خطير


وحبيت اقوله عشان انبه غيري من خطورته



اللى حصل ان وفاة الطفل كانت بطريقة فجائية جدا


يوم الاحد فى السونار القلب بينبض وبيتحرك وزي الفل


تاني يوم ولا حركة ولا نبض


والدكتور المتابع مش عارف سبب الوفاة


وكل اللى قاله بعد الولادة ان الحبل السري خنقه


بس والدتي الله يبارك فيها صممت اني اروح لدكتور تاني


رحنا الحمد لله لدكتور ثقة وله اسمه فى القصر العيني ما شاء الله


المهم لما حكيناله اللى حصل


طلب مني تحاليل سكر صايم وفاطر


وطلب حاجة اسمها الهومجلبين السكري


وده بيبين هل السكر فى الدم اخر تلات شهور كان عالي ولا لأ


وعملت التحليل


واول ما شاف الورق برق واتخض


لاقى نسبة السكر صايم وفاطر عالية


والنسبة من تلات شهور كانت عالية بردو


وقالي معنى كدة ان سكرك من تلات شهور كان اكبر من الارقام دي بكتير


وقال ان سكر الحمل هو المرض الوحيد اللى بيسبب وفاة مفاجأة للجنين


يعني يوم صاحي وكويس وتاني يوم يتوفى من غير سبب


الحمد لله على كل حال


اللى مستغرباله دلوقتى ومش قادرة اتخيله


يعني ايه طبيب محترم تبقى المريضة اللى بيتابعها

عندها سكر حمل وواصلة لمراحل متأخرة منه

لدرجة انه تسبب فى انها تفقد طفلها

وهو لا يعرف ولا عنده فكرة اصلا؟

طول عمري بسمع عن اهمال الاطباء وخطورته


بس دي اول مرة اشوفه بعيني واجربه بنفسي


ويارب مايشوفه ولا يجربه حد يارب

ياريت محدش يزعل مني بسبب المود ده


وانا مهما كان ومهما حصل




مـجـرد إنــســانـة

فى وشهـا إبتسـامة فرحانـة


وفـى عنيهـا دمعـة حيرانـة

بتفـرح وتضحـك

بتزعـل وتحـزن

ومـن قلبهـا بتدعـى


تخـرج علـى خيـر من دنيـانـا

سمعوني آمين بقا
:)

Tuesday, December 01, 2009

كان ليا حلم




حتجيله فين بس الأعادي

ده لا عنده مال ولا له اراضي 

ومالوش مكان غير قلبي انا

*****

الله يرحمك يا حبيبي

Thursday, November 26, 2009

وديلي سلامي



وديلي سلامي يارايح للحرم
 وادعيلي وسلملي على هادي الأمم
انظر للكعبة يامحلاها
 نورٌ وجلالٌ يخشاها
يحفظها ربي ويرعاها
اذكرني أمامها وادعيلي

وادعيلــــــــــــــــــــي

ياساعي بهمة من الصفا للمروة 
 ياشارب من زمزم تذكرني بدعوة
 ياطالع على الجبل الرحمة
ياماشي في وسط الزحمة
 اطلب من مولاك الرحمة
 واذكرني أمامها وادعيلي

وادعيلــــــــــــــــــــي


هنيئاً هنيئاً ,,,, يارايح للهـــادي
غراموا شغلني ,,,, ملك كل فؤادي
 ادخل من باب السلام
بتأدبٍ واحترام
سلم على طه الُتهامي
وصاحبيهِ

وادعيلـــــــــــــــــي

Wednesday, November 04, 2009

حبيب قلبى المجروح




من شهور طويلة فكرت فى اول بوست عنك

حوصف ايه وحقول ايه ولا ايه

فكرت كتير والافكار ملت راسي

بس فكرة واحدة عمرها ماجت فى بالي

الفكرة هي ببساطة ان اول بوست عنك يكون بوست فى رثائك

*****
حبيبي

يا من لم تراك عينى

ولم تلمسك يدي

ولم يحضنك قلبى

ولم تطرب لسماعك أذنى

اشتاق لك كثيرا

لا تحزن لعدم قدومي لتوديعك

وإلقاء النظرة الأولى والأخيرة عليك

اعذرنى كنت مشغولة فى حمد الله

كنت مشغولة فى ذكره وطلب المغفرة والرحمة منه

حبيبي

أدعوا الله ان يجمعنى بك على خير فى الآخرة

وان يغفر الله لي بك ما اقترفته من ذنوب كثيرة

وان يغفرلنا وان يرحمنا ويصبرنا

حبيبي

لا تغضب من بكائي حينما اسمع من يعذيني فيك

وسماع كلمات المواساة والتعجب من ذهابك قبل معاد قدومك الرسمي بساعات معدودة

اعذرني حبيبي

فإن القلب ليحزن

وإن العين لتدمع


و إنا لفراقك ـــ يا ولدي ـــ لمحزونون

وإنا لله وإنا إليه راجعون

اللَّهمَّ أجرني في مُصِيبَتي ، وَاخْلُف لي خَيْراً مِنْهَا

Saturday, October 24, 2009

حسبي الله


حبیت

لكن حب من غیر حنان

وصاحبت

لكن صحبه مالھاش أمان 

رحت لحكیم واكتر 

لقیت بلوتى 

إن اللى جوه القلب مش ع اللسان 

وعجبى

-------------
صلاح جاهين

Sunday, October 11, 2009

يا مسرحياتك يا مصر



أحلى حاجة فى بلدنا انها بلد مسلية جدا

عمرك ماتحس فيها بملل خالص

فى بلاد كدة اخبارها واحدة واحداثها واحدة

إنما احنا مش كدة خالص

احنا فى مصر بلد الفنون واصل التسلية كلها

مصر فى تسليتها بتعتمد على أبو الفنون شخصيا


المسرح

ومش بتقدم اى نوع من المسرحيات

لأ دى بتقدم المسرحيات الهزلية العبثية بالتحديد


عشان التسلية تبقى للركب


إزاي تحس بملل وانت عندك كل المسليات دي يا جدع؟

عندك مسرحية الأنفلوانزا الخنزيرية مثلا

ودي مسرحية على ثلاث فصول

الفصل الأول : إعدام الخنازير

الفصل الثاني : الحج والعمرة


الفصل الثالث : يا مدرسة الهنا تغورى انتى واعيش أنا

ومسرحية الأنفلوانزا الطائرة


ومسرحية الكورة الحديدية

ومسرحية القمامة النظيفة

ومسرحية المياه المبلولة المقطوعة

ومسرحية النظافة على أصولها الحديثة

ومسرحية نقاب وميكروجيب


ومسرحية النار فى الاسعار

ومسرحية الفن الحلزوني

ومسرحية الفتاوى المجانية

ومسرحية المواصلات والمرور الكوميدية

ومسرحية الإعلانات الإلحاحية


ومسرحية الصحافة الرداحة والمقالات الفضاحة

ومسرحية صراع الأفيال

لبطليها احمد شوكير ومرتضى مذهول

ومسرحية الآثار الحواوسية

ومسرحية دماء فارس الشرق على أعتاب اليونيسكو

ومسرحية البطالة العمومية

ومسرحية الجهل المستديم

ومسرحية الفقر النمائي

ومسرحية الضرائب االعقارية البطرسية

ومسرحية الجمعيات الخيرية الشحاتية

ومسرحية الخصخصة المحمودة

ومسرحية مواطن بلا ماهية او هوية

والقنبلة الكبيرة بقا

مسرحية التوريث المباركية

*****

أكيد محدش حيستجري يقول ع البلد نص كلمة

ومحدش حيقدر ينكر بعد كدة ان بلدنا مسلية فعلا


معاك انك ممكن تتشل وانت بتتفرج

او يجيلك حول مزمن

او ارتشاح فى ماسورة الشريان التاجي

او تفقد القدرة على التفكير من اساسه

بس الاهم من ده كله اننا بنتسلى

وبنشوف فن هادف

مصر بتتقدم بينا يا جماعة وبمسرحياتنا

تصفيق حاااااااااااااد للبلد بقا


وأوعى حد يحدف طماطم

عشان الخُضرى متراقب


وصدق اللى قال

ومـا مصـر الا مســرح كبيــر

Friday, September 25, 2009

إنى خائفة




ايها الخوف

اتركني قليلا 

حتى استطيع النوم 


دعني فقط حتى الصباح 


او دعنى للأبد 


كما تشاء 


فلا ارجو منك سوى الليلة 


ولا تغضب اذا كررت ذلك الرجاء


كل يوم


وكل ليلة



اعذرنى لضعفي


وقلة حيلتي


وقلة خبرتي 

وقلة فهمي


اعذرنى لرعبي


اعذرنى لخوفي 


اعذرني لإضطرابي وتوتري


اعذرني كثيراً


او لا تعذرني


فقط اتركني


اواجه ما قدره الله لي


لعله خيراً 


ولعله نجاة 


ولعله راحة


ولعله آمان


ولعله مغفرة ورضوان


ايها الخوف


كيف تسكن قلبي والله معي؟


كيف تتملكني والله قادر على كل شئ؟


كيف تتغلغل في وكل شئ عند الله بقدر؟


ايها الخوف


اتركني للأبد


*******


لا إله إلا أنت سبحانك إني كنت من الظالمين


Saturday, September 19, 2009

ما تنفخ بقا يا نجاتي :D


والله انا محرجة منكوا جدا جدا جدا


طبعا انتوا عارفين وغنى عن التعريف يعنى


انى بنفض كتييييير اوي للمدونة


ودي حاجة مش حلوة انا عارفة


بس كتير اوى بحس انى بأدن فى مالطة


وان محدش بيدخل المدونة دي أصلا


إذا كنت انا صحبتها بدخلها كل فين وفين

فمابالكم بالقراء الأعزاء


أكيد فى ما هو أهم من اللى بكتبه عشان يتقري


ومش معنى كلامي اني زعلانة ولا واخدة على خاطري منكم


لا والله أبدا


كل الحكاية اني بحس بكدة فعلا


ويمكن ده اللى بيخليني أكسل كتييييير اوي انى اكتب


وافكر اكتب فى اى اجندة لنفسي وخلاص


المهم ما طولش عليكوا قولوا طولي


دخلت النهاردة ع النت


بما اني سهرانة بقا


واخدة على انتظار السحور والفجر فى رمضان


فلاقيت بعض الأخوة المدونين الأعزاء


مكلفين نفسهم وداخلين المدونة مخصووووص عشان يعيدوا عليا


فرحت اوي ساعتها والله


فرحت ان لسة فى حد فاكرنى ومهتم يدخل المدونة


ومهتم يكتب تعليق يعيد فيه عليا


واحرجت من نفسي أوي الصراحة


انى مش بدخل كتير المدونة وفين وفين لما بفكر اكتب فيها


على العموم ومش عايزة اغلس اكتر من كدة احنا في عيد


كلللللللل سنة وانتوا كلكوا بألف خير وصحة وسلامة وسعادة يارب


ويارب اللى كان له دعوة ألح بيها فى رمضان تقضيهاله عن قريب يارب


وربنا يكرمكم جميعا ويعزكم اللهم آمين


العيد السنة دي غريب عليا أوي من كل النواحي والزوايا


والحمد لله على كل حال


بس ده طبعا لا يمنع أبدا أنى اطالبكم بالعيدية زي كل سنة


وانا عارفة انتوا شطار وحتدفعوا من غير خناق


وبرغم ان كاميكاز واقف يزغرلكم على باب المدونة اهوه


ومعنى الزغرة دي لمن لا يعلم = حتدفع يعنى حتدفع يا حلو/حلوة


رغم كل ده الا انى مش بحب العنف خاااااالص ومش حضغط عليكوا


وحرصا مني على المواطن المطحون اللى مش قادر على دفع عيدية


حنعمل اتفاقية لذيذة


اللى حيدفع يقف ع اليمين فى طابور ويحط العيدية فى الصندوق ويشد رحاله فى امان الله


والتاني اللى مش ناوي وحيغلبنا معاه حيطول معانا شوية


وحيقعد يساعد نجاتي فى نفخ البلالين


وطبعا لمن لا يعلم نجاتي ده بنجيبه بالأجرة مخصوص كل عيد عشان ينفخ البلالين


وده طبعا عشان كاميكاز يركز فى الضغط عليكوا عشان تدفعوا


واهو بردو يبقى مساعدة مننا فى حل مشكلة البطالة


:D

Thursday, September 03, 2009

ثقافة الجزمة

 الجزمة ... بالفصحى حذاء ... بالإنجليزية شوز ... وبالعامية البيئية صرمة قديمة ... تعددت اللهجات والمصطلحات والبيئات والمعنى واحد ، انها الجزمة .. ايوة يا عم الحاج اللى بنلبسها فى رجلينا ونمشى بيها دى ... ايوة ام رباط او من غير رباط مش فارقة المهم انها ليها وظيفة محددة ومكان محدد كمان بتقوم بمهامها الوظيفية فيه
-
-
واضح ان الجزمة تحت ... تحت أوى ... تحت خاااااالص ... تحت كدة لحد الرجلين ... ايون بتتلبس فيها تصدق؟ ... وبنمشي بيها على الأرض كمان ... ما تستغربش هيا معمولة لكدة ودى مهامها الوظيفية الأساسية
 -
 -
لكن واضح اليومين دول بسبب أزمة البطالة باين ولا ايه الجزمة فكرت تخرج عن السياق شوية وباين عليها زهقت من كتر ما اتداس عليها بأقدام اللى يسوى واللى مايسواش فإتمردت على الوظيفة دى وقالت لما اشوفلى وظيفة تانية جانبية احسن بيها دخلى .. واعرف اتجوز البت الصندل ام كعب اللى عينى عليها من زمان دى
 -
 -
أوم إييييه؟؟ ... عقل بالها هداها وقعدت تفكر ... قالت فى نفسها انا ضخمة ونعلى متين ولو ضربت حوجع ... اهو اشتغل بلطجية وألقط عيشي بدل الشغلانة التقليدية اللى مش جايبة همها دى
 -
 -
وقد كان ... وابتدت فى الموضوع ده على خفيف كدة ويمكن من زمان أوى ... لو تفتكر دايما فى اى خناقة او اى حد مسكلوا حرامى ولا حاجة - ده أيام ما كان في حرامية بيتمسكوا أساسا - تلاقيه قلع جزمته وهااااااااتك ياضرب فى الحرامي ... وكانت دايما الأمثال الشعبية القديمة تقولك ده خد علقة ماخدهاش حرامى فى مولد ... بيستشهدوا بالعلقة من كتر ماهي سخنة 
-
-
وبردو دايما كنا نشوف زمان اى واحدة من بنات البلد لو حد عاكسها او ضايقها او قل أدبه فى الشارع تقوم تقلع الشبشب أبو وردة حمرا اللى فى رجليها وفين يوجعك لحد ما الواد يحرم ينزل من بيتهم أصلا ... وده طبعا أيام ما كان فى بنات بتتضايق من المعاكسات وكدة
 -
 -
بس نعمل ايه بقا للتطور ... التطور لازم يدخل ويشمل اى وظيفة ، حتى الوظيفة الهامشية للجزم - اللى بتستخدم فى حالات بعينها وفى بيئات بعينها كمان - اجتمعت نقابة الجزم واول حاجة عملتها النقابة انها رفضت ان الوظيفة دى تبقى هامشية ... اتحولت وبقت أساسية ... اساسية جدا كمان يمكن أهم من الوظيفة التقليدية العادية بتاعة الرجلين دى .. وفكروا كمان ليه ما نكبرش قاعدة المستهلكين بتوعنا ... يعنى بدل ما حد يضربلوا حرامى او واحدة تضربلها واحد بيعاكس ... ليه ماندخلش على فئة أكبر وأهم وأشمل وأعم
 -
 -
يعنى فيها ايه لو نائب محترم فى مجلس الشعب رفع الجزمة فى وش زميله فى قلب المجلس مثلا؟؟؟ ... ولا فيها ايه لو مدرب رياضي محترم يرفع الجزمة فى قلب الملعب وفى وش كل المشاهدين والمشجعين؟؟؟ ... ولا فيها ايه لما ممثل محترم وله جمهوره يطلع فى برنامج ويضرب الضيف اللى جمبه بالجزمة بردو؟؟؟ ... ولا أى مسؤل تليفزيونى ورئيس قنوات ليها شأنها يهدد صحفى برفع الجزمة عليه لانه انتقده فى مقال ما فى جريدة ما؟؟؟ ... ولا بدل ما الإخوان المسلمين ما كان شعارهم المصحف فى اى مظاهرة ضد إسرائيل ، ليه ما يجددوش ويستخدموا الجزمة ويرفعوها مثلا؟؟؟
 -
 -
نعم أيها السادة ... اصبحت الجزمة هيا شعار المرحلة واسلوب الحوار والتخاطب بين صفوة المجتمع على كافة مستوياته ، فإذا وجد بعض السياسيين والرياضيين والإعلاميين والفنانيين والدينين يلجأون الى الجزمة للحوار بينهم وبين من لا يعجبهم او يختلف معهم او حتى يرفض فكرهم وأعمالهم ... فماذا ننتظر من المواطن البسيط فى اى منطقة شعبية أخرى؟؟؟
 -
 -
اعتقد لو كريمة المجتمع بذات نفسها بتعمل كدة يبقى لا يصح ان ننتقد العشوائيين والبلطجية ونتهمهم بزيادة العنف واستخدام السلاح الأبيض والبلطجة التى تصل الى حد القتل ... إذا كانت الطبقة المتعلمة المثقفة الواعية نفسها مش عارفة تتحاور بإستخدام الوسيلة الطبيعية للحوار اللى هيا اللسان فإزاى حنطلب من الجاهل او الفقير او المعدوم المطحون الحوار والبعد عن العنف؟؟؟
 -
 -
يبدو إن شعار المرحلة أصبح كالآتى: جزمتك فى إيدك ... شتيمتك فى لسانك ... مسؤليتك تحت رجلك ... اللى يقولك "بم" قطعه !!!ه