Wednesday, December 28, 2016

#yearinreview2016 كواليس الذهاب والعودة












استقبلت 2016 وانا عندي 30 سنة ورايحة جاية على الدكاترة بأشعة بتقول "شيلوا المرارة دي" لحد ما تعبت من اللف والنوبات والدموع وسلمت نفسي للدكتور في شهر مارس، الراجل استقبلني استقبال الجماهير لخاليسي وهي رايحة السوق بدينصوراتها، سلمت أمري لله وخليتهم يشيلوها ويبدو انها سمعتني ودعت عليا فجاتلي وانا بتعافى من العملية حساسية شديدة سمعت بعدها كلمة "هتموتي .. هتموتي .. هااااتمووووتيييي" تلات مرت من دكتورعجوز جدا شكيت انه بيعايرني اني هموت صغيرة وهو كبر وانبسط وكنت على وشك اقول إفيه يضيع هيبة وجلال اللحظة لولا انه طبطب عليا وقالي انتي بطلة يابنتي .. ثبتني ورحم نفسه في نفس الوقت ابن اللعيبة. 

الهزة القوية دي علمتني وعلمت عليا، مافيش حاجة تقدر تطلعك من رمية نفسك في البير غير قلم أو ألم يفوقك ويقولك انت مهم يا حمار، الحساسية خلت جسمي كله يقشر والناس تستغربني، نظرات شفقة على نظرات قرف على نظرات سبحان من له الدوام.

وعلمتني برده ان كلنا محتاجين لبعض مهما حصل، وان من الطيش والحماقة انك تاخد موقف حاد من حد مهما كان غلطه وان خسارة الناس مش بالساهل، وان السماح والمغفرة بتخففك من حمول تقيلة بتكتم على نفسك وتقتل فيك كل يوم بالتصوير البطيئ. 

Let it go
الجملة ام تلات كلمات دي اللي اتكتبت ببساطة على لوحة مفاتيحي اضطريت اتعلمها بالطريقة الصعبة، واقدر اقول بكل فخر بذكاء القدر وبإعلان كامل لحماقتي ان اكتر حد كرهته وخدت منه موقف قوي في حياتي هو نفس الشخص اللي انقذني من الموت فعلا!
المرارة باظت إغراقا في حزن بيعطل ويكبل ويكره الواحد في نفسه، كرهت نفسي فعلا وكنت شايفاها ذرة رمل في أرض محيط ولا تسوى، ولما وقعت وطولت لوحدي في الضلمة مالقتش حد يمدلها ايده غيري، لاقيتها غلبانة والوحيد اللي حبها بجد بدون شروط كان أبوها اللي سابها واتدفن وكل محاولتها لإسترجاعه بائت بالفشل، طيب انا بنت الراجل اللي حبها ده ولو محبتهاش أنا مين غيري هيحبها؟!

صالحتها واتعلمنا سوا شوية أنانية وقوة، لأنك عشان تعيش لازم تكون قوي، وفي حالة استمرارك على قيد الحياة مش قدامك غير حلين ملهمش تالت، يا تبقى قوي بإرادتك يا تقويك الدنيا بمعرفتها وبالعافية! 

بعد أيام وليالي واصلتها غايبة عن الوعي وجسمي مش فاهم مين بيعمل ايه وازاي اصلب طولي وازاي البس او امشي خطوة او اكل او اشرب، بعد جري رهوان في اتجاه موت قفل الباب في وشي فجأة بعد ما كان بيقولي تعالى بسرعة، قعدت شوية مش فاهمة انا رجعت ليه وكان بيشاولي من بعيد ليه طالما مش ناوي؟ يمكن كان بيفهمني انه في السكة فيلا عشيلك حبة قبل ما اجي، او بيقولي يا حمارة هو كمان عشان افوق، او بيرج جسمي بقوة زي المولود في الغربال يمكن افكاري تتعدل وكل حاجة ترجع لمكانها زي زمان، اضحك العب انبسط باللي في ايدي وما افكرش كتير .. يمكن!

Friday, June 17, 2016

المنحة يا ريس

وأنا راجعة بالعيال إمبارح من الحضانة صادفت واحدة بتضحكلي وتعملي باي باي .. استغربت، خطوتين كمان وظهرتلي واحدة تانية بتضحك وتباي باي .. دماغي زنهرت وطلعت كيس علامات التعجب من الفريزر!!!

 أكونشي اتشهرت؟ معقول الشير اللي عملتلهولي نيللي كريم على الفيسبوك تأثيره وصل لعامة الشعب اللي حالفهم الحظ ومشيوا جمب واحدة من الخمسة من عشرة المتواضعين على سطح الكوكب وهي بتجيب عيالها من الحضانة بنفسها من غير موكب ولا حراسة .. وانا بفرقع فقاعة الافكار المتخلفة دي لاقيت واحد معدي بيضحكلي ويعملي باي هو كمان - ماهي زاطت بقا - والصيدلي كذلك، لسة هتغر واجيب ناس تتغر وارجع كيس علامات التعجب للفريزر تاني شوفت إنعكاس صورتنا على زجاج الصيدلية ولاقيت مالك متقمص روح حسني مبارك وهو بيمشي يتفقد القرى والنجوع ويعمل باي باي لجموع الشعب المعدم

Sunday, June 21, 2015

زبادي حُبنا

أول ما رمضان يجي تظهر الأطباق والكوبايات الفخار وبسم الله الرحمن الرحيم وهنبدأ الليلة ونحتفل بمراسم الزبادي البيتي … كنت اقف قدام اللبن لحد ما يغلي وبعدين اعمل كوباية شاي لبابا لحد ما اللبن يهدى والفرعون العاشق يجهز للإحتفال … يدخل المطبخ كشيف محترف يتأكد إن اللبن دافي وبعدين يصبه في الخلاط ويضرب معاه زبدية صغيرة خميرة ويصب الخليط في الاطباق والكوبايات الفخار اللي من ضمن مهامي الوظيفية غسلهم اول بأول، يظبط حرارة الفرن ويدخلهم ويسيبهم لحد ما يتحولوا لزبادي وادخلهم التلاجة عشان ناكلهم على السحور. يخلص السحور ويمسك الطاجن الفخار الصغير ويبصله بصة جواهرجي مستمتع بلمعة جوهرة إستنى كتير عشان يشوفها … بابا كان بيحب الأكل وبيستمتع بيه حقيقي بس دايما الزبادي له قدسية ومعاملة خاصة يغلب عليها الإحترام والشغف، على مدار السنة بيتنا دايما فيه زبادي لكن لما بيجي رمضان بيتنا بيتحول للمقر الرسمي للإحتفال بالعيد القومي للزبادي.

Wednesday, December 31, 2014

من مذكرات جزرة

لاسباب مختلفة آيام براود الحمد لله … فعل المعافرة حلو وبيجيب نتيجة واحلى حاجة انه يخليك قدام الناس شخص عادي حتة عقلة جزرة اغلبها مختفي وبتتشاف بالعافية ومحدش حاسس بيها بس بتخوض كل يوم معركة شرسة عشان تتعمق وجدرها يقوى او على الاقل ما يتخلعش بسهولة او عشان دي الطريقة الوحيدة اللي تثبت انها عايشة ولو بطلت تموت … احيانا تنبسط بالمعافرة دي واحيانا كتير تتخنق وتكتئب وتحلم باليوم اللي حد يعدي ويشدها من الارض فحياتها تنتهي في طبق سلطة ولا جمب فرخة روستو … بس مع الوقت تبص وراها وتتبسط انها عملت كل ده حتى لو كل ده بيتم بشكل صامت تماما … مش مهم حد يعرف كفاية انها راضية عن نفسها كجزرة


الحمد لله خلصت لاول مرة من ٤ سنين تحدي جود ريدز … تخطيت عقبات كثيرة عصيبة لا داعي لذكر تفاصيلها … كتبت وخرجت من عزلتي كام مرة وغوطت في نفس العزلة اكتر واكتر … خلصت شغل ما بنجاح ومبسوطة بده جدا حتى لو ماحدش عرف انا كنت بعمل ايه بالظبط، جربت تقنيات جديدة في السعادة قراءة القرآن احتلت المركز الاول في التقنيات دي والسبحة المركز الثاني والطبخ التالت والكتابة الرابع وأنس ومالك خدوا باقي الارقام وخبوهم … بنتريستي قرب يوصل ل٢٠٠٠ متابع ولازلت نفسي اشتغل صنايعي بنتريست جدا وغالبا دي وظيفة احلامي بعد مذيعة الراديو ومدبلجة افلام الكارتون وكاتبة قصص اطفال وأراجوز وبائع بطيخ صيفا وبائع لكاليك شتاءا … ورميت زلطة في البحر الراكد ونشرت حدوتة عبيطة حكيتها لانس على ساوند كلاود وعملت فول بالسجق وتارت وبسكويت مملح وزبدة فول سوداني وكيكة بدون زبدة وسكر ودقيق!

Wednesday, November 26, 2014

زبدة فول سوداني بيتي



بعد قدر لا بأس به من سندوتشات رجعالي مع الأستاذ من الحضانة قولت ما بدهاش بقى أنس إتخنق من سندوتشات الجبنة! طب أعمل ايه؟ حلاوة؟ الحلاوة حلوة بس بتقع من السندوتش يبقى مافيش غير زبدة الفول السوداني بقى

بخلاف فوايد زبدة الفول السوداني في الطاقة والتغذية والدهون الصحية هي كمان بتتفرد ومش بتقع من السندوتش وكمان طعمها يجنن والأهم بقى طريقة عملها في البيت سهلة جدا ورخيصة!

المقادير: 
- ربع كيلو فول سوداني مقشر 
- من 1 - 2 معلقة كبيرة عسل نحل 
- من 1 - 2 معلقة كبيرة زيت 
- ربع معلقة صغيرة ملح


الطريقة: 
- بنفرد السوداني في صينية وندخله الفرن من 10 دقائق لربع ساعة لحد ما يتحمص ولونه يحمر 
- بنطلعه من الفرن وعلى الكبة أو الفود بروسيسور ونضربه لمدة دقيقتين متواصلين او متقطعين بس حتى لو خايفة على ماتور الكبة وهتخلي الضربة مش مستمرة خلي في النص كام مرة طويلة شوية 
- في الأول هيبقى فول سوداني مجروش مع استمرار الضرب الزيت اللي فيه هيخليه يمسك نفسه شوية ساعتها بقى نضيف العسل والملح والزيت ونكمل ضرب دقيقة كمان لحد ما تتحول لملمس كريمي 
- ننقلها في برطمان نضيف وناشف وعلى التلاجة وبالهنا والشفا

ملحوظة: 
- المقادير في الوصفة الأصلية مش زي مانا كاتبة لأنهم مستخدمين أكتر من ربع كيلو،     يعني الملح حطيته رشتين كدة والزيت حطيته بالبركة لحد ما بقت ناعمة 
- رابط الوصفة الأصلية موجود في أول تعليق فيه الطريقة بالتفصيل والصور 
- زبدة الفول السوداني البيتي اطعم بكتيييير من الجاهزة

الوصفة الأصلية هنا