Tuesday, December 17, 2013

رحلة طفلي من الصمت للكلام .. تجربة قد تفيدك

ملحوظة هامة جدا جدا جدا: مش معنى اللي هتقراه هنا إني بقول إن مشكلة تأخر كلام الأطفال عموما نتيجة مشاكل عضوية، التجربة دي خاصة بطفلي وبمشكلته اللي إكتشفنا بالصدفة البحتة إنها عضوية .. وعلى كل أسرة لديها طفل متأخر لغويا البحث وراء أصل المشكلة سواء عضوية أو نفسية والشروع بحلها بحول الله وقوته وربنا يحفظ أولادنا جميعا
-------------------

إبني إتأخر في الكلام .. كنت بكرر الجملة دي من أول ما تم سنتين لاني كنت حاسة اني بنفخ في إربة مقطوعة وإني مهما اتكلم واحكي وارغي هو ولا هو هنا .. مش بيقول كلمات تذكر وكل الحروف ضايعة، قابلت كل الإعتراضات من ناحية ان كل الاطفال كدة ومسيره ينطق وماتكبريش الموضوع لحد ما وصل سنتين ونص .. وبالصدفة كنا في زيارة عائيلية الزيارة دي كان فيها طفلة عندها سنة ونص وما شاء الله بتتكلم عنه كتير .. كان شكله حزين وبائس وهو بيحاول يكلمها ويتواصل معاها ومش عارف وكل اللي قدر يعمله انه يفضل يمشي وراها في كل مكان بس 


شوفته بيتألم وشوفت في عينه الحزن وماقدرتش اكدب احساسي، مع الوقت الموضوع اتطور لنوبات عياط وصريخ بسبب ضعف التواصل بينه وبين كل اللي حواليه .. بيحاول يوصلي معلومة بالإشارة او بهمهة غير مفهومة ولما مش بفهم نوبة الغضب بتظهر .. الموضوع ده كان مسببله ألم شديد كان باين عليه 


ما باليد حيلة مشيت في سكة جلسات التخاطب في رمضان (كان عنده سنتين و7 شهور) وكشفوا عليه في الاول الحمد لله السمع كويس لكن عمره اللغوي بتاع طفل عنده سنة .. جلسات التخاطب كانت فايدتها بالنسبالي اني عرفت ان مشكلته مش في التخاطب، ومشكلته الأساسية في ضعف التركيز .. اخصائية التخاطب تحاول تبص في عينه وهو يتعمد يبص في مكان تاني وتشاورله على الكلب وهو يشاور على الصفحة التانية عشان فيها قطة .. وهكذا، استحملت كام جلسة وسط الحر والصيام مالهومش أي لازمة غير انها في كل مرة ماتلاقيش اي تقدم ملحوظ تأنب فيا زيادة انتي ساكتة انتي قافلة بوقك .. ومهما حاولت اشرحلها اني كائن رغاي أساسا ولا الهوا! لحد ما جه في آخر جلسة وقام من كرسيه وشدني ناحية الباب عشان نمشي وقد كان


وديته مركز تاني وعملت تحديد مستوى قالوا ضعف شديد في التركيز وعايز جلسات تعديل سلوك، اشتركت وروحنا أول جلسة المدرب اعتذر اعتبرها علامة يا مارد ومشيت .. فكرنا نوديه لدكتور مخ وأعصاب يشوف لو في سبب عضوي .. روحنا وشخص الحكاية على انها ضعف في التركيز برضه وكتبله فيتامينات ودوا يقوي التركيز يمشي عليهم شهرين ولازم ولابد يدخل الحضانة


في الأثناء دي احنا كنا ماشيين بالتوازي في سكة تانية خالص ماكنش عندي أي فكرة او أي ربط بينها وبين تأخر الكلام .. مشكلة اللحمية وإن مناخيره مسدودة طول الليل وخلافه .. كملت في الطريقين طريق أدوية المخ والأعصاب وطريق علاج مشاكل اللحمية وحساسية الأنف لحد ما دكتور الأنف والأذن قالنا انه محتاج يعمل عملية اللحمية .. أيامها صاحبتي اتصلت بيا تطمن عليه وقالتلي ليه ماتكونش اللحمية هي سبب تأخر الكلام؟ كأنها رمت طوبة في بحر!! .. وفي الزيارة التالية للدكتور سألته .. اللحمية ليها علاقة بضعف التركيز؟ قالي طبعاااااا .. فكرة انه مش بيتنفس من أنفه دي معناها ان الأوكسيجين مش بيوصل لمخه كويس وبتأثر على التركيز ولو في طفل داخل مدرسة وعنده لحمية بنوصي يشيلها قبل ما يبدأ الدراسة .. فهمته انه متأخر في الكلام وانه راح لدكتور مخ وأعصاب وبياخد أدوية .. المعطيات دي كلها خليته يقول خلاص نشيل اللحمية في أسرع وقت


وقد كان .. عملنا العملية .. وبعدها بإسبوع حصلت المعجزة وإبتدا ينطق!! مش قادرة احكيلكم يوم ما قال "أنا" ده انا كنت فرحانة ازاي ويوم ما قال إسمه "أنس" كنت عايزة أزغرط بجد :D


اللي عرفته ان الطفل في عمر سنة المفروض يقول كلمة واحدة وفي عمر سنتين يقول جملة من كلمتين وفي عمر 3 سنين يقول جملة من 3 كلمات وهكذا هو حاليا داخل على 3 سنين وعمره اللغوي بتاع طفل عنده سنة والكلمات مش كلها واضحة بس الحمد لله بيتحسن .. الحضانة كمان قايمة بدور كبير في تعليمه كلمات جديدة وانه يلقطها بسرعة ويتواصل مع أطفال تانية ويسمع حواديت وقرآن وأناشيد .. وابتديت ادخل عالم الحواديت وابتدا يركز ويسمعها ويحاول يقول زيها الحمد لله 


ممكن تكون تجربتي مختلفة عن تجارب باقي الأمهات بس رأيي او نصيحتي لكل أم:

- صدقي نفسك وصدقي إحساسك بطفلك .. لو حاسة ان في مشكلة يبقى في مشكلة فعلا ولازم تخبطي على كل الابواب الممكنة لحد ما توصلي للحل 

- متأخر في الكلام ولا لأ دي حاجة يحددها المتخصصين مش اي حد تاني .. إسعي وامشي في الطريق لو حسيتي ان في مشكلة وتذكري دائما إن إدراك المشكلة هو بداية الحل

- أول حاجة ممكن تسمعيها لما تمشي في الطريق ده ان المشكلة عندك انتي عشان مش بتكلميه كتير او مش عنده اخوات، وجوده في الحضانة هيبين صحة تأثره بالبيئة المحيطة وكمان انتي أدرى واحدة بتتكلمي معاه كتير فعلا ولا لأ 


- ابنك ضعيف ومسؤول منك ... لحد ما ربنا يكرم ويتكلم حاولي تمدي جسور التواصل بينك وبينه عن طريق العطاء المعنوي من بوسة وحضن وضحكة وطبطبة ولعب


- متوقع في المرحلة دي يغضب جدا بشكل يخض .. حاولي تهدي تماما وتتعاملي على انها فترة وهتعدي .. سيبيه يعيط لحد ما يهدى لان كل محاولتك لتهدئته وانتي مش عارفة هو عايز ايه اساسا هتعصبه أكتر وكمان لو اتعصبتي عليه بزيادة كدة بنزود المشكلة مش بنحلها


- وارد يتصرف تصرفات فيها غضب وعصبية وانتوا برا البيت، ممكن لو منتظرة دوره عند الدكتور يقضيها صوات وعياط! معلش اصبري وماتشيليش هم شكلك قدام الناس نهائي 


- اعملي حسابك لما تخرجي معاه يكون معاكي وسيله ترفيه سهل تخرجوا بيها زي كتاب صغير فيه صور وألوان حلوة او كورة صغيرة .. وطبعا أكل وشرب عشان لو طلب حاجة منهم وانتوا برا وطلع مش معاكي مش هتعرفي تفهميه يصبر شوية او يستنى 


- للأسف صعوبة التواصل ممكن تسبب مشاكل سلوكية استعيني في حلها بالدباديب والعرايس لانه هيعرف يتواصل معاهم بلغته وهيحبهم، تعاملي مع الدبدوب كأنه من ضمن أفراد الأسرة له إسم خاص بيه، وممكن نديله أوامر بطريقة غير مباشرة لما نقولها للدبدوب ونصحيه من النوم ويدخل الحمام ويغسل سنانه وينام في سريره ويسمع حدوتة .. ماما زعلانة من الدبوب عشان عمل كذا .. ماما بتحب الدبوب وهنديله حضن ... بيعيط وزعلان تعالى نصالحه .. وهكذا، هتحاولي تتداركي المشاكل السلوكية وفي نفس الوقت هيحس بتواصل بينه وبين كائنات لطيفة بتسمعه وبتفهمه فحالة الإنعزال والعصبية تقل شوية، خصوصا لو مش عنده إخوات ولسة مادخلش الحضانة، وكمان هتلاقي مادة للكلام الكتير معاه من الجميع الأب والأم حتى لو راح زار الجد والجدة ممكن ياخد الدبوب معاه فيعرف كلمات له علاقة بمواقف حياتية كتيرة ومختلفة

- قللي بل إمنعي قنوات الأطفال اللي فيها اغاني .. فعلا مدمرة، وياحبذا لو تقفلي التلفزيون وتقعدي معاه على الارض تلعبوا أي لعبة سوا او حتى تجروا ورا بعض في الشقة 

- لو مضطرة للتلفزيون تبقى قنوات عادية وأفضل في السن الصغير براعم لان جوها العام هادي واصواتها مش مزعجة ومريحة وبحس انها بتقدم برامج مدروسة مش أي كلام .. كمان أي كارتون يشوفه لازم تفضلي تشرحي كل حاجة باينة على الشاشة .. دي قطة وده فار وده شباك وده باب .. وهكذا 

- لو وصل سن سنتين دخليه حضانة مشهودلها بالكفاءة عشان الاختلاط بأطفال غيره هيفيده جدا، الحياة مش بمبي لو رجعلك مضروب او متخربش ارجعي للمدرسة بتاعته واعرفي ايه اللي حصل وفهميها ان قلة كلامه بتخليه بيتواصل بصعوبة وممكن يتعصب ويضرب فتركز معاه شوية زيادة 

- اهتمينا بالطفل كتير نهتم بالأم بقى :) انك تشوفي ابنك قصاد عينك ومش عارف ينطق دي حاجة مش سهلة، هتبقي عبارة عن كمية مشاعر متحركة مش مشكلة، احرصي على تفريغ المشاعر دي بكل الطرق الممكنة .. إبكي، اكتبي، شاركي اصدقائك التجربة والعيلة واطلبي منهم الدعاء

- آخر حاجة ودي أهم حاجة فعلا .. إدعي ربنا يفك عقدة لسانه، وتصدقي بنية شفاءه وصلي قيام ليل وادعي كتير .. ربنا مافيش أرحم ولا أكرم منه إستعيني بيه لانها ممكن تبقى مرحلة صعبة وقاسية بس إن شاء الله هتعدي على خير .. ابشري :) 

Thursday, December 12, 2013

فضحتينا يا أنجيلينا

يا نساء العالم اتحدن

دلوقتي احنا مش عايزين الكلفتة تحت الغطا تنسينا الكارثة اللي بتتعرض لها اخواتنا في الانسانية النسوية في أمريكا، مرة ميشيل الراجل الجبروت يعاكس واحدة وهي قاعدة جمبه ومرة أنجيلينا بعد ما تكع دم قلبها - عن طيب خاطر - في جزيرة على شكل قلب وتقدمها هدية في عيد ميلاد اللي ينشك في حواجبه براد ويروح يخونها مع الدادة بتاعة العيال يبقى لأ بقى 

لا وألف لا .. احنا لازم نقف وقفة رجالة .. قصدي وقفة ستات وننشر الوعي الاجتماعي المصري بين نساء العالم ونوعيهم بأصول وقواعد الحياة الزوجية من واقع التجارب المصرية عشان يعيشوا عيشة هنية .. وقال على رأي المثل: هي أم الدنيا مصر هي وردة كل عصر

1- شوفي يا أنجلينا يا ختي مرتبك ده بتاعك يا ماما .. تحوشيه وتروحي تشتري بيه دهب كسر - عشان بيبقى ارخص في المصناعية - وتشيليه للزمن محدش عارف بكرة فيه ايه ياختي، وقال على رأي المثل يا مآمنة لبراد يا متزحلقة ع البلاط.

2- حوار الجزيرة والهبل ده تنسيه تماما وتعقلي وتفوقي لنفسك كدة، هتروحي بكل بساطة تاخدي منه مفاتحيها وهو نايم وتدخلي جروب أبو سوسن السمسار وتكتبي مواصفاتها وتعرضيها للبيع او للإيجار .. انتي أولى بكل قرش يا خايبة. 

3- انتي كأنثى أكيد مجروحة وعايزة ترتكبي جريمة وتدخلي تصوري فيلم أكشن وتقتلي الممثلين جميعا وبعدين تلفي تقتلي في الجمهور واحد ورا التاني، وعلى ايه الطيب أحسن .. عليكي وعلى براد بالليل وهو نايم قصي شعره زلابطة هيصحى يبص في المراية يتخض تجيله سكتة قلبية نخلص منه بلا وجع دماغ.

4- لو هتعملي زي الستات الخايبة وتسامحيه فانتي حرة بقى .. بس خلي بالك هو لغاية دلوقتي ما كتبش عليكي عند مأذون ولا حتى هان عليه يضرب ورقة عرفي يقطع ألسنة الناس بيها، لا احنا نغير الخطة وتضغطي عليه يا تتجوزني يا هجرجرك في المحاكم وأقول خاطفني.

5- خلي بالك بقى وصحصحيلي كدة وركزي معايا .. كتبيه قايمة ومؤخر كبير بتاع 10 آلاف ولا حاجة. ويديكي مصروف للبيت كبير بتاع 250 جنيه ومصروف خاص بيكي حسبة 200 جنيه كل شهر حلوين احنا هننهب .. المهم تأشطيه أول بأول وتقصقصي ريشه لحد ما يبقى ع الحديدة والبنات تبطل تعاكسه.

6- السيطرة بقى انك تطلبى منه هدايا دايما ولو سألك هديتي فين اعملي من بنها او قوليله انا هديتك يا حبيبي .. ولو سأل تاني اعمليله حلة محشي يتلهي فيها. 

7- اتعلمي كمان من عمالقة الفن المصري زي الفنانة نبيلة عبيد ونادية الجندي وإلهام شاهين وغادة عبد الرازق وفيفي عبده وسمية الخشاب، مابيطلعوش في فيلم او مسلسل غير لما يعلموا على البطل ويشبشبوله ويمرمطوا بكرامة اهله الأرض، مايغركيش هوليود بتاعتك دي يا أمي احنا حضارة سبع آلاف سنة بحالهم. 

8- وبعدين اتعظي يابنتي من اللي عملتيه في مراته الاولانية الدنيا مش دايمة لحد والكفن مالوش جيوب والمتغطي بالدنيا عريان وكما تدين تدان وكله سلف ودين حتى المشي ع الرجلين .. عيطي يا أنجلينا، عيطي ياختى ده العياط بيريح والنف بيفوّق.

Wednesday, December 11, 2013

إمسحي دموعك يا ميشيل


بيان هام

بالأصالة عن نفسي وبالنيابة عن عضوات جميعة حقوق المرأة المتوحشة أدين وأحتج وأشجب التصرف المتهور الأحمق من الرئيس أوباما في عزاء مانديلا، الذي أثبت للعالم ان وظيفة رئيس الجمهورية دي وظيفة عبيطة مالهاش لازمة وانه لو كان بيشتغل خدمة عملاء في إتصالات كان هيخاف على بريستيجه أكتر من كدة وهيقرا قرآن في العزا كمان.

 ياخي اتعظ ياأخي عيب عليك، ياخي إعمل حساب البدلة ياأخي .. طب العيال .. طب حتى احترم أم ساشا اللي هتشبشبلك في البيت دي .. عموما أنت اللي جبته لنفسك وأشرب بقى يا حلو 

وأوجه كلامي لأختشي وحبيبتشي الست ميشيل أوباما وأحب أقولها يا أم ساشا انتي لازم تتصرفي بحكمة في المواقف اللي زي دي وماتخليش أوباما يمسك عليكي غلطة .. هدي نفسك خالص ولما تروحوا أطرديه برا البيت الأبيض بمنتهى الهدوء واحدفيله هدومه وجزمه من البلكونة واتصلي بكل وكالات الانباء وأدخلي نامي قريرة العين يا حبة عيني 

انتهى البيان 

Tuesday, December 10, 2013

ثورة عم رضا

أثناء إنهماكي في البحث عن بصل متوسط الحجم جميل الهيئة وسط أكوام من البصل الغير جدير بالوجود في أكلاتي العبقرية، سمعت عم رضا الخضري بيشتكي لصاحبه وهو متعصب جدا لأن إبنه قطع شنطة المدرسة ومحتاج شنطة جديدة.

حاول صديقه تهدئته قدر الإمكان بطريقة لم أفهمها .. فكان يقول له بلهجة يملأها البرود والإستخفاف: ما تشتريهاله يا أخي!

فيستشاط غضب عم رضا ويرد عليه: منا لسة جايبهاله جديدة في أول السنة يا نااااس .. ده حتى نص السنة لسة ماجاش يا أخي، ازاي الشنطة ماتقعدش معاه سنة؟ ها؟ 

فيرد عليه صاحبه بنفس الطريقة المستفذة: تلاقيه بيلعب بيها كورة، اشتريهاله اشتريهاله. 

ساعتها عم رضا ماقدرش يرد بأكتر من انه بص ناحية الزبونة القادمة - والشرر يتطاير من عينه - وقال: لا حول ولا قوة الا بالله بصوت عالي ونبرة قوية فالست اتخضت ورجعت الطماطم مكانها وطلعت تجري. 

لم أشأ أن أزيد من شقاء عم رضا واحكيله عن إبني ذو العامين اللي بيدوب شنطة الحضانة - اللي مافيهاش غير سندوتشات لا يأكلها ولامؤاخذة غيارات داخلية وكراسة فارغة - في شهرين بالعدد، تقوم تقولي شنطة المدرسة تقعد سنة كاملة؟ يارااجل كبر مخك.

Friday, December 06, 2013

الوصايا العشر للقضاء على مرض العصر

لو معدل تراجع نفسيتك بيزيد الفترة دي - وده أكيد يعني - اتعلم تطبطب على نفسك إزاي، لأن الحياة مش دايما هتوفرلك أوبشن الطبطبة ده طول الوقت كدة، ماهو بالعقل كدة إذا كانت الحياة نفسها هي اللي تسببت في إكتئابك فإزاي هتبسطك؟ كل حاجة والعكس واردة بس مش دايما نظرا لطول فترات الاكتئاب.

طيب نرجع لمرجوعنا الأساسي، إزاي أطبطب على نفسي؟ .. بسيطة جدا حط إيدك اليمين على كتفك الشمال وارفع كفك لفوق وانزل بيه بالراحة خالص على كتفك، كرر العملية دي كذا مرة وانت بتقول: بس بس بس. :)

في أفكار تانية للطبطبة على نفسك او على الأقل شغلها عن الاكتئاب زي:
------------------------------------------------------------------------
1- إنك تسمع قرآن بصوت قارئ بتحبه، ولو عندك وقت حاول تحفظ هيفرق معاك بجد.

2- إنك تقوم تاخد دُش لو قاعد في البيت أو إلعب رياضة، أيوة في تمارين سهلة بتاخد نص ساعة بس ومن البيت ماتتحججش.

3- لو في الشغل قوم اتوضى وارجع تاني - لو تأثير الإكتئاب شديد أوي عيط وانت بتتوضى - ماحدش هيعرف يفرق بين دموعك والوضوء.

4- لو بتدور على الراحة النفسية أونلاين صدقني انت في المكان الغلط، أقفل كل شبكات التواصل الاجتماعي وتمتع الصفاء والنقاء والهدوء. 



5- طبعا لو في مواصلة مش قدامك غير حل من اتنين لو مش انت اللي سايق اقرا كتاب، لو انت اللي سايق اسمع كتاب او اغنية او افتح الراديو على إذاعة مهمة او حتى تافهة المهم تشتت انتباهك وتركيزك اللي معشش في الاكتئاب ده يا أخي زهقتني.

6- كفااااااااااااااااااية سياسة إرحم نفسيتك العيانة. 

7- عدي على السوبر ماركت واشتري برطمان نوتيلا لو مش عامل ريجيم، لو عامل ريجيم اتصور جمبه بس.  

8- غير ترتيب الأثاث في بيتك او في اوضتك على الاقل، وروقها بالمرة بقى عيب كدة.

9- أعمل خير، ده الحل السحري اللي بيجيب من الآخر، أي عمل خير هتعمله صعب تتخيل هيحسن مودك إزاي غير لما تجرب بنفسك. 

10- لو سبب المشكلة في الأساس انك قاعد في البيت بلا شغل او فرصة او او او جرب تعمل أعمال تطوعية مش محتاجة غير وقت بسيط زي الكتابة للمكفوفين - بتكون من البيت لو صعب تخرج - او لو حابب تخرج ممكن تبقى مرافق لطالب في الكلية او المذاكرة وكدة، التعامل مع المكفوفين عموما هيعلمك ان اكتئابك ده كلام فارغ أولا، ثانيا هتتعلم انك مش أحسن من ذوي الاحتياجات الخاصة في حاجة بالعكس ده ممكن يكون أشطر وأنجح منك وبيذاكر حاجات انت ممكن تكتبهاله وتقراهاله آه بس ماتفهمهاش زيه، ثالثا بقى هيعلمك معادلة بسيطة تطفش بيها الإكتئاب اللي لازقلك ده: عيش لغيرك - إنسى همومك - تلاقيها إتحلت - توماتيكي توماتيكي.

Sunday, August 25, 2013

الحظر كمكمة

كان دايما الوصول للسوبر ماركت شئ سهل وبسيط .. ايه يعني لو مش هنقدر نروح كأسرة إلا 6 بالليل؟ مش مشكلة الليل طويل ، لكن مع الحظر الوصول للسوبر ماركت اصبح خطوة محتاجة ترتيب وإجراءات وقدر كبير من السرعة والسربعة في آن واحد .. لازم اقعد قصاد الورقة اعصر مخي في كتابة الطلبات لا اكون ناسية حاجة تبقى مصيبة .. زمان لو نسيت حاجة ابقى اروح بعدين هيحصل ايه ، في الحظر لأ الغلطة بفورة وهي فرصة واحدة لمدة ساعة واحدة مش مسموحلي بغيرها 

أدخل السوبر ماركت وانا مش مصدقة نفسي أخيراااا شوفته ، ليك شوقة ووحشة يا عم السوبر ، وبعدين افتكر ان الوقت بيجري فأعمل شمبانزي وأجري بعربية السوبر ماركت وأنس قاعد فيها وفاكرني بلاعبه ، وآخد غرز بالعربية عشان أفادي زمايلي في الكفاح السوبر ماركتي وأدور على كل الرفوف اجيب اللى انا عايزاه لحد ما اوصل للكاشير بنهج ألاقي قدامي طابور طويل واستنى والواد يعيط والضغط يوطى وبعد طول عناء وبعد محاولة الست اللى ورايا انها تاخد مكاني وبعد ما احفظ تفاصيل ستايل وألوان البنت اللى واقفة قدامي أنال شرف الوصول للكاشير أخيرا و احاسب

اخرج للشارع اللى بيتحول بعد الساعة 6 للعبة سيارات التصادم واتشاهد على روحي واحضن أنس بالجامد وأبص على أكياس السوبر ماركت كإحدى إنجازاتي الحياتية المعدودة وأوصل البيت وافتح الباب وادخل الشقة اترمي ع الكنبة وأنام واحلم بلميس الحديدي ماسكة في خناق عمرو أديب على الهوا والمشاهدين بيهللوا والمصور بيلف سجارة حشيش ومرتضى منصور بيسجل الحلقة عشان يرفعها على سي دي.

مش هحكيلك على مشاوير الدكاترة اللى اتضربت بالنار ولا كل الفسح والسفريات اللي باظت ولا كم الملل والزهق والفراغ اللى عشنا فيه يوميا ، ولا هوجع ضميرك وأفكرك بهمك اللى طلعته في الاكل وكل كيلو زاد ع الميزان وكل كرش أثبت وجوده في الحياة بزيادة ولا كل صرخة مكتوبة صرخها الميزان كل ما تقف عليه ، ولا هفكرك بإكتشافات الحظر أكيد انت اكتشفت نفسك واللي حواليك بما فيه الكفاية ، واكتشفت كمان عدد بلاطات الشقة وحسبت سرعة النملة وسعة درج الديب فريزر والسيفون بيتملى ماية في كام دقيقة واكتشفت ان الجيران بيتخانقوا كتير .. وان الخناقة الواحدة فيها 45 شتيمة و13 صويتة و7 بوكسات وشلوتين، ولا هشقلب عليك المواجع وألفت نظرك لإن البلد خلاص كمكمت من كتر الحظر 

ورغم ان الحظر بايخ ويقرف وابن كلب إلا انه كان فرصة مناسبة للتدوير جوا ذاتك واكتشاف مواهبك الدفينة واكتشاف أماكن فِرد الشرابات التايهة ، وكان فرصة كمان لكل أنثى انها تعيش لحظات شماتة نادرة لوجود اخوها/زوجها/ابنها/ابوها في البيت بدون ما يخترع أي مشوار ويزوغ ، ورغم كل اللى اللي شوفناه من الحظر بس المؤكد والثابت اننا تعايشنا - او حاولنا نتعايش - معاه وده في حد ذاته يعتبر أكبر دليل على ان الحب بيجي بعد الجواز!
.

Thursday, August 08, 2013

الضاحكون أيضا يموتون

ما أقسى الأعياد بدون من نحب ، صبيحة يوم العيد اتذكر وجه الضاحك الأسمر وشعره الاسود الناعم الذي تداخل فيه الشعر الأبيض من باب الصحبة الحلوة تحت الطاقية الشبيكة ، يرتدي الجلباب الأبيض بعدما توضأ ثم انشغل في البحث عن مصلية وجلس في الصالة ينتظرنا جميعا

نخرج كلنا ونجلس في العربية الجيب التي تربيت فيها فيدوّرها ويبدأ بالسواقة بإحترافية شديدة كنت اغبطه عليها ، لم اجلس بجوار من يسوق مثله ولا أظنني سأجد ، كان يجري بحرية الطير وبحذر التمساح وكانت حرية الطير تبهجني وتخيفني في آن واحد ، وحذر التمساح يُضحكني ذلك لانه اخبرني ذات مرة ان علاقته بي ( الابنة الصغرى ) - وهو الصعيدي الذي يهابه الجميع -  كالعلاقة بين التمساح والعصفورة ، فالتمساح لا يأكل العصفورة والعصفورة لا تخشى التمساح :) 

ما أجمل الطيران بالعربية صباح العيد وسماع تكبيرات العيد من كل أفراد أسرتك كاملين ، يجد ركنة بعد جهد بالقرب من ميدان مصطفى محمود .. ينفصل النساء عن الرجال ثم نتقابل بعد الصلاة ويبحث بإهتمام شديد عن البلونة الكبيرة - صديقة الأعياد - أم جنيه ، نأخذ البلالين ونكرر الرحلة عودة للبيت وفي هذه المرة يغني فنغني معه 

فطار العيد كان عبارة عن كحك وبسكويت وشاي بلبن + فرحة أبي بالكحك ، يقوله الكعك فآخذ على عاتقي مهمة تصحيح الكلمة: اسمها كحك يا بابا كححححك بالحه ، قول معايا كدة ! فيضحك على لماضة احبها فأحبته هي الأخرى 

بعد الفطار تبدأ مراسم توزيع العيدية على الكل ، يا عاطي العيدية من يعطيك! ثم تبدأ مراسم نفخ البلالين واللعب بها ، يقف هو حارس مرمى في المدخل الفاصل بين الصالون والانتريه ونتناوب نحن شوط البلونة عليه ، مرة أنا ومرة أخي ومرة أختي ، ثم يذهب أخي كحارس مرمى ويشوط أبي البلونة عليه كضربات جزاء بلونية ، حتى يشتكي الجيران من صوت - دبدبتنا على الارض - فيفتح الباب ويرسم على وجهه علامات الانزعاج من شقاوة الاولاد مع وعد بتأديبهمم ويعود بعد ان يغلق الباب فنجلس في هدوء حذر ثم ننفجر جميعا في وصلة ضحك 

أقول العيد يشبهه ولا أقول يشبه هو العيد ، تجسدت فيه البهجة والفرحة والطفولة حتى اصبح العيد هو النظر الى وجهه الضاحك وكفى ، تلك النظرة التي حُرمت منها وحرمت معها بهجة العيد

أرسل لي ليلة العيد بريد إلكتروني يعيد ويسلمّ وانا استمتع بقراءة اسمه وكلماته حتى صحوت وعادت لي الذاكرة البغيضة ، هو لم يرسل لي شئ وانا لن أراه مرة ثانية ! 

اخوتي اخبروني في الهاتف انهم سيذهبون لزيارته اليوم في قبره فلا يكتفي الموت بحرماني من رؤيته مرة فتحرمني غربتي من زيارة قبره مرة بعد مرة 

فليس أمامي الآن سوى خيالي لأراه يقود السيارة بحرية في طريقنا للمدرسة على انغام إذاعة الأغاني وصوت محمد قنديل " تلات سلامات يا واحشني تلات ايام " وانا بجواره فيغني ويندمج مع مقطع " بعادك يا جميل طول وده أول بعاد بيطول "  و يخرج ذراعه من شباك العربية وأخرج ذراعي انا الاخرى من الشباك بجواري ونطير ، اشتري لطفلي بلونة كبيرة وأذهب به لقبر أبي  ليرى كيف اصبح ابني يشبهه لهذه الدرجة وألعب معه بالبلونة ليشاهد بنفسه ما غرسه في قلبي وورثه طفلي من ضحك وبهجة ومرح ، هل يجوز توزيع البلونات على ارواح المبهجين في العيد؟ 

 اهرب من عيون الجميع وابكي وحدي ،  فكيف يبكي من يُضحك وهل يمتلك الضاحكون دموعا؟ اهرب واتخيل واتسآل وابكي ولكن تبقى الحقيقة ثابتة .. الضاحكون أيضا يموتون 

Thursday, July 25, 2013

أسباب وجيهة للحرب على الإرهاب

رمضان السنة دي جه على سهوة .. إرهاب رمضاني

صوت طرقعة القفا في الاعلانات .. إرهاب سمعي 

إعلان بريل .. إرهاب ذكوري 

إعلانات التبرعات .. إرهاب عاطفي 

عربيات بتركن جمب الانتريه .. إرهاب عقلي 

عبير صبري في 3 مسلسلات .. إرهاب بصري 

ألفاظ - لامؤاخذة - أبيحة عمال على بطال .. إرهاب - لامؤاخذة - إباحي 

رامز جلال .. إرهاب فرعوني 

إلهام شاهين في مسلسل كوميدي .. إرهاب فكاهي

ليلى علوي  بتعمل عروسة كل سنة في رمضان .. إرهاب زغاريطي

مسلسل " الزوجة الثانية " .. إرهاب تاريخي 

مسلسل إذاعي "إشاعة حب دجيتال" بطولة مصطفى شعبان = عمر الشريف ، درة = سعاد حسني ، أحمد ماهر = يوسف وهبي .. إرهاب هبابي

مستشفى المجانين في مسلسل غادة عبد الرازق .. إرهاب بتنجاني 

ديكور فيلا غادة عبد الرازق .. إرهاب فضائي 

أخت غادة عبد الرازق اللي سرقت جوز غادة عبد الرازق .. إرهاب أُسري

شفايف غادة عبد الرازق .. إرهاب نفسي 

تون صوت غادة عبد الرازق .. إرهاب توني 

غادة عبد الرازق .. إرهاب كومبو 

وأخيرا .. وصلنا لمرحلة الحرب على الارهاب ولسة المشاهدات بيتصلوا يباركوا للشيف شيربيني على افتتاح قناة سفرة .. إرهاب غذائي 

ملحوظة: ما تم ذكره هو جزء بسيط جدا من الارهاب الذي يتعرض له المواطن المصري كل يوم ، فمصر تتميز بالعديد من أنواع الإرهاب المختلفة مثل الإرهاب المقلي والإرهاب المشوي والسنجاري والإرهاب بالشطة والليمون بالإضافة لسلطة الإرهاب المُنعشة والباباغنوج الإرهابي والعيش والمخلل .. والحلو إرهاب بالبندق.

Saturday, July 06, 2013

إبتسامة في نفق الغروب

سأخرج خارج حدود عالمي وأطير 
احوم بين سحاب كثيف لا يعرفني ولا اعرفه 

نستشعر روعة البدايات سويا فنتعارف

 ونبتسم ثم نضحك 

ونضحك

 ونضحك

 حتى نذوب في ضحكاتنا وتذوب ضحكاتنا في الغروب وتختفي الضحكات


لكن لا ابكي ، لا .. لا ابكي عند الغروب 

فالغروب يأتي ومعه وعد بإنه لن يطول وان الشروق قادم لا محالة 

أعود وحدي لنفق الغروب وابتسم

 في انتظار ان اشرق في اليوم التالي 

Monday, May 20, 2013

الفقاعات أيضا تطير


وبعد انقطاع الكهرباء وغسل الصحون لم يتبقى لي من التكنولوجيا أي شئ حتى الموبايل فطل شحن وكأنها مؤامرة كونية عليّ حتى لا اجد ما افعل ، حاولت النوم لدقائق وحاول أنس أن يفتح عيوني بشتى الطرق 

 وبعدما صرفت فكرة النوم الفكسانة هذه عن بالي بدأ الملل والزهق يدب في نفسي وفي نفس أنس ، فدخلت المطبخ وفتحت الثلاجة لأبحث عن علبة الكانز التي لمحتها ذات مرة على السفرة وبعد بحث طويل وبمساعدة أنس لم أجد لها أي أثر ، بحثت عن قطعة شكولاتة لم المحها مثل علبة الكانز ولكن خيالي المريض أخبرني بأنه يمكن ان يكون هناك قطعة شكولاتة هنا ولا هنا فتتابعي البحث يا فتاة ، لم أجد شيئا 

اغلقت باب الثلاجة وألتفت لأخرج خارج المطبخ فوجدت لعبة الفقاعات المائية كما هي منذ اشتريتها الصيف الماضي مع صديقاتي من نادي نقابة المهندسين بـ2 جنيه ، اشتريت علبتين وخبئتهم في المطبخ حتى لا تعبث بهم أيادي الصغير 

اخذت العلبة وخرجت من المطبخ وأنس يتبعني ، فتحت النافذة ثم فتحت العلبة وأخرجت تلك العصاية البلاستيكية المستديرة ونفخت فيها فأنطلقت الفقاعات تسبح في الهواء في بهجة وسرور وكأنها انتظرت في العلبة سنة كاملة في انتظار تلك اللحظة ، لم تستمر بهجتهم كثيرا فبعد إنطلاق عدة دفعات أخذت أراقب كيف اختفوا بعد ثواني معدودة الواحدة تلو الأخرى ، اختلفت الأحجام والألوان والإتجاهات والمصائر ، تلك تسبح يسارا وتلك يمينا ومنهم من صعد إلى السماء ومنهم من أختفى في الحال 

مسكينة الفقاعات لم تعرف من الحياة سوى أيام وليالي من الوحدة ولحظات قصيرة من السعادة الخاطفة ثم الاختفاء ، لم أشفق عليها لأن المشهد كان رائعا وكأنها تستمتع بدورة الحياة تلك ، كثيرا ما أشعر أن علبة الفقاعات ماهي إلا همومي وأحزاني احبسها في تلك  العلبة حتى أفتح النافذة وأتحرر منها وتتحر مني وتطير  

أغلقت النافذة وجلست أدفع المزيد من الدفعات ناحية الصغير ، أخذ يضحك ويصرخ ويلهو ويطاردهم حتى انفخ فتخرج دفعة جديدة ، اختفى عن انظاري قاصدا المطبخ وعاد مسرعا وفي يده ملعقة ، وكلما ظهرت فقاعة جديدة كان يلقطها بالملعقة ويحاول أكلها ! 

كلما لمست الملعقة الفقاعة تختفي الفقاعة حتى ملّ تكرار المحاولة ، وكأي طفل يهوى الغلاسة على أمه حاول أنس بشتى الطرق أن يأخذ مني علبة الفقاعات وكأي أم أصغر من صغيرها لم أسمح له بأخذها :) 

Monday, April 29, 2013

ولقد شاهدت فيلم سمير أبو النيل .. أيون

الفليم مش حلو وبرضه مش وحش .. بمعنى انك مش هتحس بقيمة مضافة رهيبة لما يخلص ولا هتحس انك اتقتلت ضحك فطلعت شحنة بس في نفس الوقت هتضحك وهتبنسط :) 

حسيته زي كل الأفلام اللى اتعملت بعد الثورة بتجيب أفكار وأحداث من اللى حصلت ومازالت بتحصل وبتبني عليها حدوتة وفيلم .. كأنه عايز يقول حاجة بس قالها بصوت واطي او شرحها بطريقة ماوصلتنيش اوي 

الإسلوب المباشر في حب مصر متمثل في بكاء دينا الشربيني وآخر حوار لمكي في الفيلم قفلني ! العيب مش في الفكرة قد ماهو في الوقت والجهد اللى اديته للفكرة ، لو استعجلت هتطلع نص سوا

ماعجبنيش ظهور إعلانات لشركة جرين لاند ( عصير - وجبنة ) في الفيلم واللي غالبا كانت مشترطة ان البطل بنفسه هو اللى يعلن عن المنتجات دي ويستخدمها في الفيلم بنفسه مش حد تاني ، وكمان في شركات تانية ظهر لها اعلانات في الفيلم وبكدة يكون الفيلم ناقض نفسه لانه بيسخر من اللهث وراء الإعلانات والعائد المادي من الإعلاميين وصناع الفيلم مااختلفوش كتير عن اللى بينتقدوهم

مكي حاول يغير جلده ، مخرج ومؤلف ومنتج وممثلين كمان غير اللى دايما بيظهر معاهم .. عجبتني فكرة التغيير في حد ذاتها بس التوليفة " اللي خدت عليها في أعمال مكي عجبتني أكتر "

الشعر والشنب والملابس ونمط شخصية ماعدش حد بيهتم يقدمها اليومين دول ويديها دور البطولة ، شخصية البخيل .. أقوى عمل اخدت شخصية البخيل فيه دور بطولة كان مسلسل البخيل وأنا ، واختيار نمط الشخصية بالنسبالي موفق جدا من المؤلف أيمن بهجت قمر لأن غالبا الإنسان البخيل تصرفاته بتكون غريبة ومش منطقة فبتقلب بضحك

من أسباب بهجتي أثناء مشاهدة الفيلم كان محمد لطفي ، الدور لايق عليه جدا وضحكني أكتر من مكي نفسه ، شبه المواطن المطحون اللى كل ماتنزل الشارع او تركب مواصلة تشوفه ويقول او يعمل موقف يضحك فتنسى كل الهم اللى بنصحى وننام فيه وتضحك من قلبك وتقول والله احنا شعب مسخرة :D