Wednesday, December 31, 2014

من مذكرات جزرة

لاسباب مختلفة آيام براود الحمد لله … فعل المعافرة حلو وبيجيب نتيجة واحلى حاجة انه يخليك قدام الناس شخص عادي حتة عقلة جزرة اغلبها مختفي وبتتشاف بالعافية ومحدش حاسس بيها بس بتخوض كل يوم معركة شرسة عشان تتعمق وجدرها يقوى او على الاقل ما يتخلعش بسهولة او عشان دي الطريقة الوحيدة اللي تثبت انها عايشة ولو بطلت تموت … احيانا تنبسط بالمعافرة دي واحيانا كتير تتخنق وتكتئب وتحلم باليوم اللي حد يعدي ويشدها من الارض فحياتها تنتهي في طبق سلطة ولا جمب فرخة روستو … بس مع الوقت تبص وراها وتتبسط انها عملت كل ده حتى لو كل ده بيتم بشكل صامت تماما … مش مهم حد يعرف كفاية انها راضية عن نفسها كجزرة


الحمد لله خلصت لاول مرة من ٤ سنين تحدي جود ريدز … تخطيت عقبات كثيرة عصيبة لا داعي لذكر تفاصيلها … كتبت وخرجت من عزلتي كام مرة وغوطت في نفس العزلة اكتر واكتر … خلصت شغل ما بنجاح ومبسوطة بده جدا حتى لو ماحدش عرف انا كنت بعمل ايه بالظبط، جربت تقنيات جديدة في السعادة قراءة القرآن احتلت المركز الاول في التقنيات دي والسبحة المركز الثاني والطبخ التالت والكتابة الرابع وأنس ومالك خدوا باقي الارقام وخبوهم … بنتريستي قرب يوصل ل٢٠٠٠ متابع ولازلت نفسي اشتغل صنايعي بنتريست جدا وغالبا دي وظيفة احلامي بعد مذيعة الراديو ومدبلجة افلام الكارتون وكاتبة قصص اطفال وأراجوز وبائع بطيخ صيفا وبائع لكاليك شتاءا … ورميت زلطة في البحر الراكد ونشرت حدوتة عبيطة حكيتها لانس على ساوند كلاود وعملت فول بالسجق وتارت وبسكويت مملح وزبدة فول سوداني وكيكة بدون زبدة وسكر ودقيق!

Wednesday, November 26, 2014

زبدة فول سوداني بيتي



بعد قدر لا بأس به من سندوتشات رجعالي مع الأستاذ من الحضانة قولت ما بدهاش بقى أنس إتخنق من سندوتشات الجبنة! طب أعمل ايه؟ حلاوة؟ الحلاوة حلوة بس بتقع من السندوتش يبقى مافيش غير زبدة الفول السوداني بقى

بخلاف فوايد زبدة الفول السوداني في الطاقة والتغذية والدهون الصحية هي كمان بتتفرد ومش بتقع من السندوتش وكمان طعمها يجنن والأهم بقى طريقة عملها في البيت سهلة جدا ورخيصة!

المقادير: 
- ربع كيلو فول سوداني مقشر 
- من 1 - 2 معلقة كبيرة عسل نحل 
- من 1 - 2 معلقة كبيرة زيت 
- ربع معلقة صغيرة ملح


الطريقة: 
- بنفرد السوداني في صينية وندخله الفرن من 10 دقائق لربع ساعة لحد ما يتحمص ولونه يحمر 
- بنطلعه من الفرن وعلى الكبة أو الفود بروسيسور ونضربه لمدة دقيقتين متواصلين او متقطعين بس حتى لو خايفة على ماتور الكبة وهتخلي الضربة مش مستمرة خلي في النص كام مرة طويلة شوية 
- في الأول هيبقى فول سوداني مجروش مع استمرار الضرب الزيت اللي فيه هيخليه يمسك نفسه شوية ساعتها بقى نضيف العسل والملح والزيت ونكمل ضرب دقيقة كمان لحد ما تتحول لملمس كريمي 
- ننقلها في برطمان نضيف وناشف وعلى التلاجة وبالهنا والشفا

ملحوظة: 
- المقادير في الوصفة الأصلية مش زي مانا كاتبة لأنهم مستخدمين أكتر من ربع كيلو،     يعني الملح حطيته رشتين كدة والزيت حطيته بالبركة لحد ما بقت ناعمة 
- رابط الوصفة الأصلية موجود في أول تعليق فيه الطريقة بالتفصيل والصور 
- زبدة الفول السوداني البيتي اطعم بكتيييير من الجاهزة

الوصفة الأصلية هنا

Sunday, October 26, 2014

بابا




3 شهور قضيتهم معاه في إنتظار أنس، 3 شهور إتحول فيهم من التعب الرأسي للتعب الأفقي، كان يمشي بدون إتزان من الصالة للأوضة عشان الشبكة تلقط ويكلم أخويا يتطمن عليه، أسيب فارم فيل وأتابعه بعين بتسنده مش بتشوفه، أيوة يا ياسر انت فين؟ يخلص المكالمة ويلف عشان يرجع، مشكلة الإتزان تخليه يقع في الأرض! أصوت .. يكشر .. ماتتخضيش كدة! أشده يقوم ويكمل للصالة، بعد شهر قعد وماقمش تاني، قالي أنا عايز أصلي ومش عارف أتوضى، قولتله إتيمم يا بابا، هو ينفع؟ أيوة ينفع .. صلى وبص في الحيطة البيضة وقال إحنا في القطر أهو رايحين نزور ياسمين، إحنا مش في القطر وياسمين جمبك، طيب هنزورها إمتى؟ أنا عايز أزورها

ليه حسسني إنه عمره ما هيسيبني وفجأة مشي كدة! أم عندها 25 سنة وإبن 64، إزاي؟ خدعة محبوكة وملعوبة صح، كتير بحقد عليك عشان عمر ما حد إتصل بيك الصبح وقالك أبوك مات زي ماحصل معايا، وفضلت تاخد التليفون لما يكلمك وتمشي بدون إتزان لحد الأوضة تكلمه برهبة طفل بيكلم أبوه وخايف يزعل منه ويعاقبه، ماوحشتنيش عشان أنا اتاخدت معاك يوم ماروحت، الورق بيقول غير كدة بس من إمتى إحنا بيهمنا ولا بيفرق معانا الكلام على ورق؟ ماتخدش في بالك...

الجلابية اللي خدتها وخلتها في دولابي من ريحتك، الكنبة والعصاية ونضارة القراية، شعرك الرمادي اللي كنت بتسيبهولي ألعب فيه لحد ما تنام، مشوار للمدرسة عشان المدرس السخيف، هو إسمه إيه؟ تامر .. هخليهولك هيثم، مشاوير تخليص ورق المعاش، مشاوير دكاترة العيون وبهدلة التأمين الصحي، مذاكرة الجغرافيا وكوباية الشاي، بوسة وحضن أولى كلية عشان شلت مادة واحدة بس ونجحت في الباقي لإني جدعة

حدوتة التمساح والعصفورة، سيبك من الوحدة والكلام الفاضي ده حطي سماعات الووكمان في ودانك وسلي نفسك، باي باي من كراسي بعيدة وانا على مسرح بستلم شهادة تخرج من الكلية، صور كتير كأني نجمة وإنت المخرج، مافيش حاجة إسمها تحولي قسم عربي .. خلي القاموس الإلكتروني ده معاكي وركزي إنتي جدعة وقدها وقدود، أول مرة تعلمني أركب المترو، أول مرة تشوفني بالفستان الأبيض وتعيط، أول مرة أسيبك وأسافر، أول مرة تسيبني وتمشي...

27/10/2011

3 سنين يا بابا؟ 3 سنين؟ ينفع كدة؟

Thursday, August 07, 2014

رحلة طفلي من الصمت للكلام (الجزء الثاني) .. تجربة قد تفيدك

ملحوظة هامة جدا جدا جدا: مش معنى اللي هتقراه هنا إني بقول إن مشكلة تأخر كلام الأطفال عموما نتيجة مشاكل عضوية، التجربة دي خاصة بطفلي وبمشكلته اللي إكتشفنا بالصدفة البحتة إنها عضوية .. وعلى كل أسرة لديها طفل متأخر لغويا البحث وراء أصل المشكلة سواء عضوية أو نفسية والشروع بحلها بحول الله وقوته وربنا يحفظ أولادنا جميعا
--------------------
بعد ما عملنا عملية اللحمية واللوز لإبني في نوفمبر 2013 وهو داخل على 3 سنوات أصبح عمره اللغوي سنة واحدة وأغلب الحروف غلط .. تخيلت إنه مع الوقت هيتحسن بس كان تحسن طفيف ومع الوقت بقيت محتارة فعلا، عملنا عملية ونطق وماكملش تطور بعدها ليه؟ ليه بينطق غلط كدة؟؟ وبدأت اسمع نصايح جديدة بإننا نعرضه على دكاترة تخاطب، طبعا كان إقتراح مرفوض تماما بناءا على حالة إبني لانه في الأساس مااتكلمش على إيد دكاترة التخاطب والنطق كان بسبب العملية


 بالصدفة أنا سبت أدوية حساسية الأنف عن عمد علشان أرحمه شوية من كل الأدوية اللي مشي عليها سنة كاملة .. شهر ورا شهر وضع أنفه كان بيسوء أكتر، في الأول رشح وبعده كحة ببلغم، وكان أمامنا إختيارين يا نروح للدكتور المشهور ونستحمل 6 ساعات أو أكتر لحد ما دورنا يجي وندخل مع أسرة تانية نكشف نظراً للزحام الشديد ولا نشوف دكتور جمبنا؟ .. ساعتها إحنا كنا منهكين من السنة اللي راحت في زيارة دكاترة بتخصصات مختلفة وعلاجات مختلفة فإختارنا دكتور أنف وأذن جمبنا في مستوصف بسيط جداً - الكلام ده في مارس 2014 - الدكتور ما شاء الله عليه كان شاطر .. ماعرفناش قد إيه هو شاطر غير مع الوقت  

اللي حصل إنه كشف عليه وفهمنا إن عنده حساسية أنف مزمنة وإنه لازم يمشي على العلاج مدى الحياة وإن أي إهمال في العلاج ده هيبوظ الدنيا تمامًا .. خلاص كتر خيرك وسلام عليكم

 ثواني هنا رايحين فين؟ الولد ده بيتكلم؟ -

هو نطق بعد عملية اللحمية الحمد لله -

أيوة يعني من ساعة ما شال اللحمية لدلوقتي كلامه اتحسن ولا لسة زي ماهو -

لا زي ماهو -

طيب متأكدة إنه سامعك كويس؟ -

اه يا دكتور سامعني وبيفهمني كمان -

 طيب مبدأيًا هو مش سامعك كويس ولا حاجة علشان شاكك إن عنده ماية ورا ودن من  الاتنين، ومش معنى إني سمعت قولتي ايه وفهمته إني أبقى كدة سامعك كويس لان في حاجة اسمها جودة السمع .. ولو أنا سامع كويس هنطق كويس لكن لو سامع غلط هنطق أغلب الحروف غلط زيه كدة .. ودي كانت نقطة الخلاف الأساسية، الدكتور متأكد إنه مش سامع وإحنا متأكدين إنه سامع .. وعلشان يخلص من الخناقة دي طلب مننا نعمل حاجة إسمها ضغط أذن علشان يشخص حالة الأذن   

عملنا ضغط الأذن في مستشفى محايدة .. عبارة عن سماعات عادية بتتحط في الودان وبيطلع تقرير .. التقرير فيه إن في ماية ورا الأذنين مش أذن واحدة كمان .. طب والعمل يا دكتور؟ 

الماية دي سببها حساسية الأنف لانها خلت مناخيره بقت عاملة زي حنفية مفتوحة بتنزل في كل الأماكن اللي حواليها زي الوادن والحلق .. الحل دلوقتي إننا نسيطر على حساسية الأنف بالعلاج ويمشي عليه لمدة شهر ونشوف الحالة إتحسنت بنسبة 100% ولا لأ .. ولازم شهر العلاج ده لا يجيله في برد - إزاي يعني؟ ماليش دعوة إتصرفي - ولا يروح الحضانة ويختلط بأطفال تانين يعدوه فالحساسية تزيد

فهمت أنا ساعتها إنه تحول لفار تجارب .. هنقعده في البيت شهر في ظروف معينة لا فيها أطفال ولا خروج كتير ولا حضانة ونشوف الحالة هتتعالج ولا لأ 

الشهر خلص الحمد لله بطلوع الروح وإلتزمنا بالعلاج ومافوتناش ولا جرعة وطبقنا كل الشروط وروحنا للدكتور تاني وطلب ضغط أذن تاني والحمد لله الماية نشفت بس ضغط الأذن مش مظبوط .. المفروض يطلع صفر طالع سالب 180 وقناة ستاكيوس كمان مش مظبوطة بسبب الضغط ده

طب والعمل؟ قدامكم طريقين عكس بعض .. طريق بطيئ يستمر فيه على العلاج بنفس الشروط دي إنه مايروحش حضانة و و و لحد ما كل المشاكل دي تروح  .. أو طريق سريع إنه يعمل عملية ويركب أنابيب تهوية للأذن لمدة 6 شهور تظبط الضغط وتمنع وجود الماية وساعتها هينزل للحضانة عادي ويبقى إنسان طبيعي وهيسمع ويتكلم إن شاء لله بس بشرطين الأول إن مافيش ماية تيجي ناحية ودانه لحد ما الانابيب تتشال والثاني إنه مايسبش دوا الحساسية مهما حصل

طبعا أنا ساعتها لاقيت وشي بيحمر فجأة ودموعي بتنزل لوحدها! عملية تاني؟ هو قلبي لسة طاب من الاولاني؟ ... لحظة القرار كانت عقلانية ولا تحتمل ذرة عاطفة .. الولد بيكبر ومتأخر عن سنه سنتين .. وفي الحضانة مش راضين يدخلوه الفصل اللي من سنه لانه مش عارف يتواصل ولا ياخد نفس المنهج .. ده غير إن قعاده من الحضانة تماما كان كارثة سلوكية لإنه ببساطة زهق من قعدته في البيت ونوبات الغضب رجعت تاني بشراسة لأنه كبر 

حالتي ساعتها ممكن إختصارها في جملة 
You never know how strong you are until being strong is the only option you have.

القرار جه من باباه وماكنش قابل أي مناقشة لأن الوضع بيزداد سوء مع الوقت .. مدركة طبعا إنه لازم يعملها بس قلب الأم كان مانعني أقبل ده، الدكتور طلب تحاليل قبل العملية وعرفنا إسم المستشفى وأخدنا منه معاد وأنا 

قلبي بيتقطع وحاسة إني في كابوس وكل ده مش حقيقي وهاصحى من النوم ألاقيه بيتكلم زي كل الناس .. المهم الولد دخل العمليات وأنا بموت كالعادة وربنا كرم وطلع بالسلامة وده كان في شهر مايو 

الدكتور فهمنا إن هيحصله تغيرات سلوكية لانه أول مرة يسمع كل حاجة بوضوح .. التغيير حصل فعلا بس بقى تدريجي وسريع في نفس الوقت .. أول شهر الكلمة بقت كلمتين وحروف غلط كتير إتصلحت، في الشهر الثاني الحمد لله الكلمتين بقوا 3 كلمات وشخصيته إختلفت تماما .. كان خجول ومش إجتماعي كأنه كان محبوس في سجن إفتراضي علشان مش سامع .. إنطلق بمعنى الكلمة وبقى يمشي يتكلم ويغني بصوت عالي وينادي بأصوات عالية ولا أجدع بياع بطيخ، ولو بنتفرج على التليفزيون يكرر اللي سمعه أيا كان الحوار حتى لو برنامج او مسلسل الحمد لله

فضلت قدامنا مشكلة هيستحمى إزاي!! طبعا فكرة القطنة مخوفاني لأنها ممكن تتبل والماية تدخل ودانه وكأنك يابو زيد ما غزيت .. ربنا كرم ووصلت لإختراع سدادات للأذن مخصصة للسباحة مطاطية ومصنوعة من السليكون زي اللبان والحمد لله مريحانا 

دلوقتي إحنا بقالنا 3 شهور عاملين العملية ومركبين الأنابيب .. الحمد لله خلال الفترة دي أنس نطق وإتكلم زعق وبقى يغني ويرغي ويحكي ويرقص ويشتكي ويبلطج ويدي أسافين كمان الحمد لله .. ومرة روحت اخده من الحضانة المشرفة قالتلي انه بقى رغاي! كان هاين عليا ساعتها أسجل كلامها في الشهر العقاري وأمضيها عليه من فرحتي 

جدير بالذكر إن صوت أنس هو أحلى صوت سمعته في حياتي وإني بحب طريقة نطقه لكل حرف حتى لو كان بينطقه غلط .. كل كلمة جديدة بتظهر كانت بترد فيا الروح وتبهجني وتنسيني أي حاجة مضايقاني، أما الجمل الكاملة بقى فدي سعادة السعادة وبهجة البهجة .. خصوصا لما يصحى الصبح ويقولي: باااح الخيييل :) وإكتشفت إنه غلباوي ولمض زيي وعنده إستعداد يتناقش معايا ويغلبني كمان .. إتكلم أكتر يا أنس ده انت كلامك شفا 
الخلاصة .. صدق إحساسك وإمشي وراه لحد ما توصل :)