Monday, January 29, 2007

تانى تاج على التوالى

فى البداية عاوزة انبه إن أنا حرة بعتتلى تاج يا جماعة بقاله اسبوع تقريبا ومجاوبة عليه والله
تحت عنوان إيه الرغى ده كله .. وده لأن التيجان نزلت عليا ترخ زى المطرة من جهات متعددة
المهم جاى تاج خبيييث بكل المقاييس من واحدة عزيزة عليا اوى وهى الجميلة
يارب يا معين
خمس حاجات ماحدش يعرفهم عني خااالص
ربنا يسهل
.
أولاً: زمان وانا صغيرة كنت مش عارفة ليه بعد ما البيت كله ينام ويبقى الحال تمام التمام اجرى على المطبخ وافتح برطمان الزتون المخلل واديييييييييييييها اكل فيه من غير مناسبة .. طبعا مافيش اى أثر ورايا ولا حاجة
بس حاليا مش بطيق اكل زتوناية واحدة .. جالى تشبع من اللى عملته وانا صغيرة
.
ثانياً: زمان برضه وانا فى ابتدائى كنت باخد درس رياضة- شفتوا الخيبة- وكان المستر بيدينا واجب عشان نحله
انا بقا بنصحتى عرفت إن اخر الكتاب فى حلول للأسئلة دى .. وعليها
اى واجب يجي كل اللى عليا إنى انقل الاجابة من ورا
وطبعا كنت ممتازة وشاطرة فى نظر الجميع ومحدش يعرف الحقيقة المرة دى لحد دلوقتى
بس طبعا إتأكدت إنها غلط لما كبرت شوية
.
ثالثاً: فى حاجة أهلى بس اللى يعرفوها
كنت وانا فى تالتة إبتدائى بعرف فى إلقاء للشعر وكدة
كان فى قصيدة بقا إسمها .. أمى
المهم بما إنى بارعة ولازم الكل يشوف
كانوا قرايبنا عندنا جمعتهم وقلتلهم انى بلقى قصيدة واقعدوا ساكتين عشان الاقيها وكدة
وانا طبعا زى عقلة الإصبع وقفت على كرسى وقعدت اديييها
أمى نداااااااااء محبة .. بل إن كل الحب أم - واتشحتف وانا بقول - أماااه .. أماااااه يرعاكى الذى خلق البرية من عدم
وفى وسط مانا ملعلعة بالإلقاء وفى قمت مجدى إذ بى مرة واحدة وبدون اى مناسبة عمالة اعيط
عااااااااااااااااااااااااااا
مالك يا ياسمين فيه ايه؟-
الكتاااااااب ضااااااااااااع عاااااااااااااااااااااااااا-
وهاتك يا عياط عااااااااااااااااااااااااااااا
ساعتها بقا اللى اتقلب من على كرسيه واللى كان هينط من الشباك من الضحك
ومن ساعتها طلعت اول نسخة من سلسلة مجلات ياسمين للجيب ... زى ميكى وتنتان كدة
ألا وهى : ياسمين والكتاب الضائع
.
رابعاً: كان فى مدرس انجليزى فى اعدادى شاكك انى باخد درس وانا تقريبا كنت الوحيدة اللى مش باخد معاه - وباخد بره برده - المهم بقا
فهمته انى مش باخد درس ولا حاجة
الامتحانات تيجى وامتحن اقوم جايبة 18 من 20
الراجل يجى يسألنى بسخرية ها عملتى ايه .. اقوله جبت 18
يتخض ويتنرفز: 18 إزاى يعنى إنتى كنتى بتغشى ولا ايه
قلتله: وانا مالى يا مستر ما انتوا اللى بتصححوا .. نجحتونى ليه امال
بصى بحزن كدة وقالى بصوت مخنوق:ه
زى زكى رستم فى فيلم "مين عمل ايه" بالظبط
وساعتها نزلت النسخة التانية من سلسلة المجلات برده
ســــرك معاكى ياياسمين (وين هنادى ياماى)ه
.
خامساً: الكلية بوظتلى عنيا الحمد لله وقعدت فترة مش بشوف البورد - الصنبورة - ورحت لدكتورعيون .. المهم انى المفروض اعمل نظارة
وقد كــــان .. خدت ماما ونزلتها فى البرد عشان نجيب الشنبر ومشاوير عشان اوديها واستلمها وهيصة كدة
المهم جت بعد طول إنتظار واول ما لبستها بصيت لنفسى فى المراية وضحكت وقلت: انا بقيت كاميكااااااااااز
المهم بقا رحت بيها الكلية زى الشاطرة وفرحانة بشبابى وبشكلى الكاميكازى
وفى آخر اليوم اديتها لصحبتى عشان كنت عاوزة اتوضى
خلصت ورجعتلها وصليت وبعدين وانا بربط الكوتش قولتلها: هى فين النظارة؟؟
بصتيتلى وبرقت
قلت فى بالى اكيد البت بتهزر
لاقتها كمان مش عارفة فين النظارة
وبعدين قامت سيبانى وراحت قدام كدة وجبتهالى من على الارض
وطبعا العدسة اتكسرت وطلع عينها
واتغميت اوى اليوم ده عشان ده اول يوم ليا بيها وملحقتش
المهم روحت البيت وقلتلهم انها اتكسرت
ايه اللى كسرها يابنتى؟-
قلتلهم وانا بصلى وقعت منى واتكسرت ومجبتش سيرة صحبتى خالص
وقعدت اعيط ( مش استهبال والله بس عشان هما تعبوا معايا فعلا ) هما افتكرونى بعيط عشان عايزة النظارة وعياطى ده كان أسف .. المهم بابا حن عليا وخلانى اروح اصلحها
وده بقا سر من النوع التوب شكرى ( توب سكرت يعنى ركزوا بقا ) قبل ماروح صحبتى ضميرها وجعها ياعينى وبقت مش عارفة تعملى ايه .. بس الحمد لله قلبتلها الموضوع ضحك لدرجة ماكنتش عارفة تروح من كتر الضحك
قلتلها جهزى البيت بقا عندكوا عشان لو ابويا طردنى ولا حاجة .. قالتى حاضر
انا : عندكوا همبورجر؟
هى: فى ايه يابنتى
انا : ايوة ماهو مايبقاش كسر نظارة وجوع كمان .. يا همبورجر يا هوديكى فى داهية انا بقولك اهوه ههههههههههههههه
وساعتها برده نزلت النسخة الثالثة من سلسة المجلات الشهيرة
ياسمين والنظارة المكسورة
فى نسخ تانية من المجلة على فكرة بس دينا عاوزة خمس حاجات بس
المهم كفاية فضايح لحد كدة بقا
ليه يا زمن ماسبتناش أبريا .. تيرا را را
--------------------------------------
أمرره لمييييييييين ؟
لأول مرة أدبس حد
اللى عاجباه الاسئلة ياخد التاج برده هدية منى ليه
بس يدفع نص جنيه مصاريف الشحن

Sunday, January 28, 2007

عم عباس المحتاس



حكـاية عبــاس

.
عباس وراء المتراس


يقظ منتبه حساس
.

منذ سنين الفتح يلمع سيفه


ويلمع شاربه أيضا



منتظرا محتضنا دفه


بلع السارق ضفة



قلب عباس القرطاس


ضرب الأخماس بأسداس



بقيت ضفة


لملم عباس ذخيرته والمتراس



ومضى يصقل سيفه


عبر اللص إليه وحل ببيته


أصبح ضيفه




قدم عباس له القهوة


ومضى يصقل سيفه ؛



صرخت زوجة: عباس


أبناؤك قتلى عباس


ضيفك راودنى عباس


قم انقذنى ياعباس



عباس وراء المتراس


منتبه..لم يسمع شيئا


زوجته تغتاب الناس



صرخت زوجته: عباس


الضيف سيسرق نعجتنا




عباس اليقظ الحساس


قلب عباس القرطاس


ضرب الأخماس لأسداس



أرسل برقية تهديد



فلمن تصقل سيفك ياعباس؟ -


لوقت الشدة -



إذا..اصقل سيفك ياعباس

.


***
.


عباس يستخدم تكتيكاً جديداً
.



بعد انتهاء الجولة المظفّرة



عباس..شد المخصرة


ودس فيها خنجره


واستعد للجولة المنتظرة

.

***
.


اللص دق بابه



عباس لم يفتح له


اللص أبدى ضجره



عباس لم يصغ له

اللص هدّ بابه

وعابه


وانتهره: يا ثور أين البقرهْ؟


عباس دس كفه في المخصره

واستل منها خنجره

وصاح في شجاعة:و


في الغرفة المجاورة

.

****

.

اللص خط حوله دائرة


وأنذره:و

إياك أن تجتاز هذي الدائرهْ

.

***

.

علا خوار البقرة

خفت خوار البقرة


خار خوار البقرة


ومضى اللص بعدما


قضى لديها وطره



ثم مضى


وصوت عباس يدوي خلفه:و

فلتسقط المؤامرة


فلتسقط المؤامرة!ز

.

***

.

عباس:والخنجر ما حاجته؟!ه -

للمعضلات القاهرة -


وغارة اللص؟!ه -


قطعت دابره


جعلت منه مسخرة


إنظر...ه

لقد غافلته

واجتزتُ خط الدائرة!و


.


المبدع : أحمد مطر

Friday, January 26, 2007

فيلم هندى



هو : تعالى هنا .. كلمينى زي ما بكلمك

.
هى : بكرهك .. بكرهك من كل قلبى

.

طلقنىىىىى

.

Thursday, January 25, 2007

يوم ميلاد الإنسـانة ديا



سيداتى آنساتى سادتى .. هدوء شوية عاوزين نقول الكلمتين ونخلص
أيها المدونون والمدونات .. الإنترنتيون وايه .. مش عارف اقراها دى

الإنترنتيات يا استاذ
ايوة اللى بيقول عليه ده
معاكم المذيع المبجل المحترم كاميكازافندى سيف الدين اللى مكانش حد عارفنى المرة اللى فاتت ..
واكيد محدش هيعرفنى المرة دى خالص عشان عامل مذيع بقا .. وهدوم تنكورية كمان ... حلوة صح ؟ .. طول عمرى شيك ومش عاوز اعقدكم ...

المهم هنذيع لسيادتكم النهاردة الحفلة التنكرية الكاميكازية بنماسبة الاحتفال بيوم ميلاد البنت صاحبة المدونة ديا

نفتح الإضائة الخافتة يا ريس؟

أفتح يا عمنا

كان ياما كان .. يا سعد يا إكرام وما يحلى الكلام إلا بذكر النبى عليه الصلاة والسلام

عليه الصلاة والسلام

فى يوم من ذوات الايام .. فجر يوم السبت 25 يناير من وااااااااحد وعشرين سنة .. جائت الى هذا العالم الفسيح ( اللى اضيق من خرم الابرة ) طفلة صغننة مسمرة شوية .. حجمها قد كف الايد .. مكنتش باينة من اللفة اصلا .. تتغذى على اللبن والسيريلاك وموطنها الاصلى حضن ماما

وفاتت سنيييييييين وايااااااام

ايام تشيلها وايام تحطها

لغاااااااااااااااااااااية

ما لاقت نفسها بقت 21 سنة

مرررة واحدة ومش على اقساط كمان

صــــدمـــــة

لما عرفت كان هيوغمن عليها على طول

النونو اللى كان فى اللفة بقى إنسان راشد وعاقل ومسؤل عن تصرفاته

لا حول ولا قوة الا بالله

ومن ساعتها يا سادة اصبح موطن هذه الإنسانة الاصلى بيت ابوها .. وتتغذى على النسكافيه والكابتشينو.. وتعانى من الدكاترة بتوع الكلية

هيييييييييه دونياااااااااااااااااااا

دنيا غرورة ياسد احمد

صادق ياعم الكاميكازييين

بس ياد انت بقا

-------------------------
أعزائى الحضور

وبهذه المناسبة الكاميكازية قررنا نحن كاميكاز افندى سيف الدين أن نحتفل بها فى مدونتها الغامقة دى فى وسط حلفة تنكرية كاميكازية

وستنتضلوا إذاعتنا الكاميكازية مع مدونتها الإنسانية لنقل هذا الحدث الكاميكازى الإنسانى العالمى
وفى وسط هذا الزحام من المدونين والانترنين وصديقاتها واقاربها .. ظهرت هذه الانسانة وهى قادمة إليكم حالاً


---------------------
يلا بقا الناس مستعجلة
طيب طيب
تعالى يا إنسانة مدونتك ومطرحك
إدخلى برجلك اليمين سن الواحد والعشرين وكل سنة وانتوا طيبين

بسم الله الرحمن الرحيم .. هى سنة واحد والعشرين ملها مضلمة اوى كدة ليه .. هو مافيش حد هنا ولا ايه ؟ يا اهل الله ياللى هنا
إنتى بتنادى من بير السلم
بس بقا فضحتونا


مليتوا البلد
----------------
ها يابنتى .. فى المناسبة دى تحبى تقولى ايه؟
بصراحة انا


أيوة ايوة مفهوم مفهوم

هو انا نطقت

ايوة عارف هتقولى انا مبسوطة اوى مريسى خالص والكلام إياه ده

مش فاضيين لتضييع الوقت ده يا ماما ورانا شغل .. بنتعب ساعدونا بقا

( يرجع يبص تانى للكاميرا وعلى وشه ابتسامة بلهاااء )

المهم الجماهير نفسها تعرف ايه الهدايا اللى جاتلك

هو فى الحقيقة انا

واخد بالى واخد بالى

يابنى انا ماتكلمتش

منا عارف اللى فيها ... محدش عبرك زى كل سنة طبعاً

هههههههه إنت رخم على فكرة .. وبعدين عبرونى (صورة واحد مطلع لسانه) ومش هقولك جالى ايه

هههههههه

--------------------------

ايه شعورك بعد ما بقيتى 21 سنة ؟

الحقيقة جوايا إحساس مش عارفة اوصفه .. حاسة إنى كنت صغيرة ومرة واحدة قلولى انتى دلوقتى كبيرة ومسؤلة رسمى

بس من معاميق معاميقى بحس انى حد عجوز اوى .. كهل كدة ويلا حسن الختام ... بس برضه فرق لما تحس إنك عجوز ولما تبقى عجوز فعلا

إنتى هتتفلسفى .. ايه الناس دى؟. .. يابنتى انا قصدى اسألك يعنى انتى مبسوطة ولا زعلانة؟؟

هو انا مبسوطة وزعلانة فى نفس الوقت

مبسوطة لان الحمد لله هانت السنين بتعدى عشان الواحد يخلص وربنا يارب يرزقه حسن الختام .. معقول اعيش 21 سنة تانى؟؟؟... ربنا يخرجنا من الدنيا دى على خير

وزعلانة لان مش عارفة هل طول الـ21 سنة دول رضيت فيهم ربنا ولا لا .. وحسابى عليهم عامل ازاى

ربنا يستر

وزعلانة اوى بقا عشان حاجة تانية ياريت لو تسمحلى اقولها قدام الكاميرا

إتفضلى اما نشوف اخرتها

زعلانة عشان المجتمع هيبتدى يحطنى فى برواز انا كنت على طول بعيد عنه ومبسوطة انى بعيدة

برواز إنتظار العريس اللى فى السكة .. يقعدوا كلهم كدة بعداد ويعدواا عليا أكنها حلبة مصراعة


21

22

23

24

25

26

27

28

29

30



STOP

ترمى من اقرب شباك

غير صالحة للإستخدام الآدمى

أصبحت كائن حى بيعض

>

يانهار ابيض للدرجة دى

واكتر يا كابتن.. امبارح صحبتى بتقولى : كل سنة وانتى طيبة .. اهلا بيكى فى سن العنوسة

قولتلها : عنوسة؟؟؟ هو انا لحقت؟؟؟

قالتلى : طبعا يابنتى ده سن النضوج والعنوسة .. معروفة يعنى

خلاص يابنتى صوعبتى عليا

البعيرُ هلك خلاص... لينا رب اسمه الكريم .. عاااااااااااااااا

خلاص إنتى هتشحتى .. خدى الشكولاتة دى بقا وبطلى زن

ميرسى يا كوكو كلك ذوق .. نوعها ايه دى؟

وصلتلنا رسالة من إحدى المدعوات الكاميكازيات .. ثوانى اقراها

كل سنة وانتى طيبة يا جاسمين

اهلا بيكى فى رابطة مشجعى ما بعد العشرين

أنتم السابقون ونحن إن شاء الله بكم لاحقون

الامضاء : إيمى

إنتوا هتموتوا ولا ايه .. ايه الرابطة دى

مرسى اوى ليكى يا إيمى يا عسولة

لا بعد الشر عنهم .. وبعدين ازاى تبقى مذيع كاميكازى قد الدنيا ومسمعتش عن الرابطة

خلاص بطلى رغى بقا الناس صدعت .. مكنش عيد ميلاد ده

إنت مالك إنت .. مدونتى وانا حرة فيها .. هش عاوزين نرش ماية قدام المحل

فعلا مليتوا البلد


-------------------------------------------------

كلام جد


انا لو اعتبرت نفسى حققت اى حاجة فى حياتى فطبعا الفضل يرجع لربنا ثم لأمى ولأبويا

ولو قعدت اشكر فيهم للصبح مش هيكفى والله بجد ولولاهم مكنتش بقيت اى حاجة ، دعمهم ورعايتهم وتصبيرهم ليا فى لحظات الانهيار .. ربنا يديكم الصحة وطولة العمر

اى مدرس وأى دكتور ولو حتى علمنى كلمة واحدة فأنا بشكره جداااااااااااااااا

عاوزة ابعت تحية لأختى وربنا يقومك بالسلامة .. ولأخويا ويارب أحلامك الكويسة كلها تتحقق

صحباتى كلهمممممممممم بحبكم اوى وكل سنة وانتوا فى كل خير ياااااارب

مدونين مصر المحترمين .. بجد افدتونى كتيييييييييير جدااااااااااااااا وانا مبسوطة اوى انى دخلت عالم راقى ومثقف زى ده

اى حد دخل مدونتى وعجبته انا بشكره .. واى حد دخل مدونتى ومعجبتهوش انا برضه بشكره

واى خد مدخلش مدونتى من اصله بشكره .. لان التدوين المحترم أفادنى كتيير جدا

ربنا يكرمكم كلكم وكل واحد نفسه فى حاجة تتحققله إن شاء الله

يارب السنين الى فاتت زى ما كانت سنين ظلام فى مجالات كتيرة يارب السنين الجاية تنور على إيدينا إحنا اللهم امين

--------------------------

رجاء خاص

الحفلة تنكرية بتعليقاتكم .. اى حد يكتب تعليق يكتبه بلسان حد تانى غيره من إختياره هو

اى شخصية .. كرتونية ، تاريخية ، أدبية ، سياسية .. اى حاجة ولو حتى جماد ونبات وحيوانات ولو حتى بلوجر تانى .. إنتحل شخصيته واعمل نفسك هو ... ممكن الشخصية دى تبقى مهمة بالنسبالك وغيرت فيك كتير .. فياريت تقولنا سبب اختيارك للشخصية دى

واللى هيكتب تعليق من غير ما يتنكر فى شخصية حد تانى مش هياكل جاتو

صحباتى بتوع الجامعة إياك حد يتنكر فى دكتور من الدكاترة عشان منخسرش بعض وقد أزعر من انذر

------------------------------

شكر خاص

لصاحبة الفكرة التنكرية ... ياسمين الحرة
هى طلبت إنها ماتتنكرش .. اوبجيكشن


هتتنكرى يا حرة ومانتيش حرة

ههههههههههههههه

------------------------------------

رغيت كتير اوى واكيد جوعتوا .. يلا يا كوكى وصلهم للبوفيه جمب ماى كومبيوتر على ايديك اليمين

إتفضلوا إتفضلوا

****

كاميكاز .. تعالى هنا .. بقولك ايه

اللى ياخد اكتر من حتة جاتو واحدة اكتبلى إسمه فى ورقة

مش مال سايب هو

اهلا اهلا منورين والله

اتفضلوا على البوفيه الخير كتير الحمد لله

وقال على رأى المثل

العيش مخبوز والمية فى الكوز

>

المذيع : كاميكاز سيف الدين

أم الفصاد : إنسانة

حد منعرفوش

Wednesday, January 24, 2007

ايه الرغى ده كله

فى البداية عاوزة اقولكم وحشتونىىىىىىى اوىىىىى
الحمد لله خلصت الامتحانات
هيييييييييه
مش عارفة افرح اوى عشان البحث لازم نشتغل فيه
غير ان الاجازة كلها على بعضها اسبوعين بسسسسسس
ومع ذلك وحشتونى برضه
وادعولنااااااااااااااااااااااااااااااااا
-------------------
ياسمينا الحرة بعتتلى تاج اجاوب عليه
متشكرة ليكى جدا يا مينا
ومن عينى هجاوبه حاضر
بس ماقلتليش عليهم كام درجة؟
------------------------------
.
اية اللي حيحصل لايميلك لما تموت ؟
انا كنت بفكر فى الموضوع ده بقالى فترة
مش مشكلة حيحصل ايه للإيميل
انا كل اللى يهمنى انى ادى الباسورد لحد لما اموت عشان يقول لصحبااتى إنى مت عشان يدعولى
.
اديت الباس وورد لحد قبل كده؟
مممم هى باسوردى صعبة جدا عموماً
بس بما إنى عندى ايميلات كتيرة جدا
فأى حد بيتزنق فى ايميل بيجيلى
وبديله الايميل بباسورده
إيميل من بابه يعنى
رجعه تانى اهلا وسهلا
مرجعوش يبقى حلال عليه
.
لو اه كانت طبيعة علاقتك بيه اية؟
اللى إديتها إيميلات بالناس اللى عليها
مش مجرد باسورد يعنى
كانت واحدة صحبتى عزيزة عليا اوى
.
اسمك؟
مممممممممم
إسمى اللى اهلى إختاروه وانا صغيرة
ياسمين
بس لو كان ينفع اسمى نفسى كنت سميتها اسامى تانية خااااااالص
خديجة
عائشة
إخلاص
إكرام
أسامى كدة تفرح القلب
اصل بصراحة بفكر كدة لو ربنا إدانى عُمر وبقيت جدة
هبقى تيتة ياسمين؟
مش حلوة فى حقى حتى
.
اسم الدلع المشهور في وسط اصحابك؟
والله الاسامى كتيييييير
وكل حد بإسم شكل
فى البيت الإسم الرسمى للدلع هو توتى
مالوش اى علاقة بياسمين
بس مع صحابى فى سيمو
وناس تقول سمسم او سمسمة
وناس جاسمين
واكتر حد مطلع عليا اسامى غريبة هى اختى .. كل يوم بإسم شكل
اخويا لما بيبقى عاوز حاجة بقى بيقولى ياسمينا
بس بالنسبة لى عادى مش بتفرق اوى
اهوه انا وخلاص
.
عمرك؟
21 سنة
عدوا ازاى عدوا امتى متسألنيش عشان معرفش
.
برجك؟
برج الدلو ... حاد الذكاء (أشك) ، معندهمش اسرار ، الصراحة ، إجتماعى
and extremely unexpected
.
مجالك او مجال دراستك ؟
فى سنة رابعة كلية إقتصاد تخصص عام إقتصاد - إنجليزى ، تخصص فرعى إحصاء - جامعة القاهرة
وبلا فخر مطلعة عينى وعين اللى جمبى
ولما بنام بحلم إن الكلية بتتحرق
!!!!!!
.
شخصيتك نوعها اية؟
بنى محروق
هههههههههه
نوعها زى اى بنى آدم عادى
جوايا وجوه كتيرة جدا
فى ناس فكرانى متدينة جدا وده مش حقيقى .. انا بس بحاول
وفى ناس فكرانى على طول بضحك ولمضة وبقول حاجات تتضحك
بس الحقيقة إنى إنسانة زى اى إن حد ، يعنى ممكن ابقى جد وممكن اهزر .. وسعات كتير بفرح وسعات بحزن ، سعات ابقى مقبلة على الحياة من غير مناسبة وسعات اكتائب وابقى فى قمة اليأس
بس اهم صفة على الإطلاق هى
*..............*
بنى محروق
.
السفر بالنسبة لك؟
السفر حاجات كتيرة اوى
السفر إنسان جديد ،عالم تانى ،ناس تانية
السفر ممكن منفعة .. رزق وشغل ومستقبل ونجاح
السفر ممكن متعة مع البحرررر مثلا
وعبادة .. حج وعمرة مثلا
بس مع كل الاختلافات دى بيفضل ربنا واحد مهما سفرنا
بس تبص فى السما تحس إنك ماسفرتش ولا حاجة
وإنك مهما رحت فانت على الارض برضه وهو رب كل مكان
.
المود بتاعك؟
هو دايما كدة الحمد لله تلاقى على وشى إبتسامة من غير مناسبة
لدرجة إن فى واحدة صحبتى بس فى قسم تانى كل ما تشوفنى تقولى
هو انا يابنتى كل ما اشوفك الاقيكى بتضحكى؟؟
على اساس إنها جريمة
بس الابتسامة فى وش الناس صدقة وبعدين هنعقدها ليه يعنى
محدش واخد منها حاجة
بس مش معنى كدة انى على طول مبسوطة كدة من غير مناسبة
بس مش بحب اشيل حد همى لان محدش ناقص
وبعدين ما احنا بنضحك من الهم
هم يضحك وهم يبكى
صحيح فكروتونى بمثل راجل كبير مرة قالهولى وانا صغيرة .. هو توفى الله يرحمه
كان بيقولى صباح السمر يطول العمر
ساعتها مفهمتش ايه العلاقة مابين العمر وصباح السمر
لما لاقانى متنحة ومش فاهمة حاجة .. قالى يابنتى عشان بيضحكوا كتير
!!!!
.
وقت فراغك بتعمل فيه اية؟
غالباً افتح الكمبيوتر وافتح موقع بص وطل او المدونات واقعد اقرا، او اقرا اى مقالة فى التنمية البشرية على النت
او التليفزيون
او اقرا كتاب
اخرج مع ماما
اروح لأختى
كدة يعنى..حسب
.
الاكلة المفضلة؟
بص هى لو ماما اكلتنا عيش ناشف هقولها تسلم إيديكى يا ماما وهيبقى شهد .. بجد بتتعب اوى ربنا يكرمها
بس فى الغالب اى حاجة مش فيها شطة
واى حاجة بعيدة عن لحمة الراس ومشتقتهاااااااا
.
الصفات اللي خدتها من بابا؟
سماره .. اللون يعنى
تحليله للمواقف
.
الصفات اللي خدتها من ماما؟
خدت منها الملامح .. شبهها
التعلق بقيمة كبيرة أوى وهى الدين
إخشوشنوا فإن النعمة لا تدوم ... بمعنى إن لو مزهزهة معايا اصرف بس مش بتذير ، ولو مش معايا أعيش على قدى ومعقدهاش .. يعنى فى كل الظروف حاول تبقى متزن
والله لو فضلت اتكلم عن امى مش هتكفينى ولا عشر مدونات وبرضه مش هكفيها حقها خااااااااااالص
.
اكتر 6 حاجات بتكرهها؟
الشتايم ... عمى عمى عمىىىىىىىىىى
السجاير مش بطيييق رحيتها
الحال المايل
إن حد يزعل منى .. بحس إن صفو حياتى إتعكر
اى حاد طالع فيها
ضميري لما يأنبنى .. بمووووووت
مش بحب حد يبقى كشرى على طول كدة.. بكسر الكاف
التحقير من الناس بشكل عام
مبحبش النصيحة بأسلوب فج
بس كفاية بقا دول اكتر من 6 بكتييير
.
اكتر 6 حاجات بتحبها؟
الله وسوله والإسلام
كل من تحوط بهم شفقة قلبى ( أمى ، بابا ، اختى ، اخويا ) عيلتى ، صحابى ، جيرانى ... الناس كلها من الآخر
بيتنا .. بحب اقعد فى البيت جدااااااااااااااااااااااا .. واكتر حاجة تضايقنى لما يطلوبوا منى انزل الشارع
القراية والكتابة
الحياة والموت
.
الشغل بالنسبة لك؟
ضرورة بتفرض نفسها على البنت ، بس لو محتاجاه هيبقى وسيلة اجيب بيها فلوس والفلوس وسيلة اجيب بيها احتياجاتى وهكذا ، لو مش محتجاه يبقى افضل فى بيتى احسن من البلاوى اللى الواحد بيشوفها فى الشارع
انا بجد بقيت بخاف انزل الشارع
.
اية الكومبيوتر والانترنت بالنسبة لك؟
دنيا تانية .. معلومات .. طموح .. مستقبل.. ثقافة ومعرفة
حاجات كتيرة اوى
.
عايزيني امرر التاج دلوقتي لحد
مش عارفة مين اصلا راحله التاج ده قبل كدة
عشان كدة
اللى عجابه الاسئلة وعاوز يجاوب عليها ياخد التاج هدية منى ليييه
والسلام عليكم

Friday, January 19, 2007

كل عام وانتم بخيـر


كل سنة وانتوا طيبين .. او زى ما الصورة بتقول .. وقلوبكم بيضاء

إن الواحد يبقى قلبه ابيض شئ جميل اوى ونعمة كبيرة اوى انك ماتشلش من حد وانك تنسى وتحب كل الناس

المهم انا كنت ناوية احط الصورة بس فى البوست وخلاص على كدة

لاقيت انه ماينفعش الناس كلها اول ما السنة الميلادية تيجى الكل يهتم بالحدث ده ولما السنة الهجرية تيجى يبقى شئ عادى واهى ايام وبتعدى

بداية سنة هجرية بتفكر كل مسلم بهجرة سيدنا محمد عليه الصلاة والسلام من مكة الى المدينة

ساب بيته وبلده وتعب اوى عشان الدين ده يوصلنا يا جماعة

لو الواحد بس يستشعر قد ايه سيدنا محمد تعب وضحى عشان الدين ده يوصلى ويوصلك ويوصلنا كلنا

ايوة تعب عشانك إنت بالتحديد

تخيل إنه بكى من شوقه لينا قبل وفاته

.

فى أخر ايامه خرج صلى الله عليه وسلم ليزور شهداء أحد و يقول: "( السلام عليكم و رحمه الله و بركاته ، أنتم السابقون و نحن بكم لاحقون إن شاء الله ) ثم يرجع النبى بين الصحابة رضى الله عنهم و يبكى ،فيقولون : ما يبكيك يا رسول الله ؟ فيقول لهم : إشتقت إلى إخوانى ، فيقولون : أولسنا بإخوانك يا رسول الله ؟ قال : لا أنتم أصحابى ، أما اخوانى فهم قوم يأتون من بعدى يؤمنون بى و لم يرونى " صلى الله عليك يا رسول الله

بتحبه زى ما حبك واشتقالك وبكى من شوقه ليك قبل وفاته؟

اكيد بتحبه

إشتقت إليه زى ماكان مشتاق لك عليه الصلاة والسلام

تيجى نفتكر آخر خطبة ليه قبل وفاته صلى الله عليه وسلم ونفتكر وصانا بإيه

..

بدأ خبر وجع رسول الله ينتشر بين الناس و بين الصحابة حتى أن صوتهم بلغ مسمع النبى صلى الله عليه وسلم فقال : إحملونى إليهم ... فحملوا النبى إلى المسجد و ألقى أخر خطبة له و قال : (( ايها الناس، كأنكم تخافون علي ؟ ايها الناس موعدى معكم ليس الدنيا ، موعدى معكم عند الحوض ، والله لكأنى أنظر أليه من مقامى هذا ، أيها الناس والله ما الفقر أخشى عليكم ولكن أخشى عليكم الدنيا ان تتنافسوها كما تنافسها الذين من قبلكم فتهلككم كما أهلكتهم ، ايها الناس إن عبداً خيره الله بين الدنيا وبين لقاء الله فأختار لقاء الله .... ففهم ابو بكر المراد و عرف أن الرسول قد خُير بين الدنيا و لقاء ربه فأختار لقاء ربه ، فعلى صوت ابى بكر بالبكاء و قال : فديناك بأموالنا ، فديناك بأبائنا ، فيديناك بأمهاتنا ، فنظر إليه الناس شجراً ، فقال لهم الرسول صلى الله عليه وسلم : ايها الناس دعوا ابا بكر فوالله ما من أحد كانت له يد إلا كافئناه بها إلا ابا بكر لم استطع مكافئتة فتركت مكافئتة لله عز و جل ... و بدأ الرسول صلى الله عليه وسلم يوصى الناس و يقول : ايها الناس أوصيكم بالنساء خيراً و قال عليه الصلاة والسلام : الصلاه الصلاه ، الصلاه الصلاه ، الله الله فى النساء ، و ظل يرددها و بدأ يدعى و يقول : اواكم الله ، نصركم الله ، ثبتكم الله ، ثم ختم و قال صلى الله عليه وسلم : ايها الناس ابلغوا منى السلام كل من تبعنى إلى يوم القيامة )) ... وصل السلام وعليك السلام ورحمة الله وبركاته يا رسول الله .. اللهم بلغ رسولك منا السلام الآن يارب

مـات رسول الله صلى الله عليه وسلم ... بس لسة عايش فى قلب كل واحد فينا

عايزين السنة دى تبقى احسن من السنة اللى قبلها إن شاء الله

نبقى اقرب لربنا ونصلح اخطائنا

فاكرين الروحانيات العالية اللى كانت فى رمضان .. ياريت السنة كلها رمضان

عاوزين نرجعها تانى يا جماعة .. رب رمضان هو رب كل الشهور

ياريت نرجع تانى لقيام الليل ولو ركعتين وللقرآن تانى ولو صفحة فى اليوم

بجد ماننساش ربنا فى الدنيا عشان ماينساناش فى الاخرة

قال كذلك اتتك آياتنا فنسيتها وكذلك اليوم تنسى "(126) سورة طه "

بذكركم وبذكر نفسى قبلكم والله .. انا شر الناس إن لم يعفوا عنى وهو اعلى واعلم ... اللهم إنى اعوذ بك أن اذكر بك وانساك

وكل عام وانتم الى الله اقرب وعن المعاصى ابعد وعلى طاعته احرص وادوم بإذن الله

Thursday, January 18, 2007

بقايـا إنســان


تفوت سنيـن
.
ويفضل جوايا
.
بقايا إنسـان
.
براويز صور عالحيطان

.
شخابيط حلم إبتدى
.
شوية ورق ألوان
.
كل ورقة بسنـة
.
واللون عنوان
.
تفوت سنيـن
.
ويفضل جوايـا
.
بقايا إنسـان

.

Wednesday, January 17, 2007

نفسـى فى دمعـة


نفسى فى دمعه
تريح قلبى اللى اشتكى من همـه
دمعة فى وحدته تونسه..تسمعله..تحكيله
دمعة يغسل بيها ذنبه..يقضى فيها ليله
دمعة لطريق الجنة دليله
نفسى فى دمعة وصعب الاقيها
دمعة قلبى محتاج ليها
دمعة صابرة..دمعة نادمة
دمعة الأمل ساكن فيها

كلـه فى الكلتـش




طبعاً بعد إعدام صدام حسين لازم الكل يقول كلمته ويقول رأيه


كانوا جايبين النهاردة فى قناة العربية تقرير عن اغنية شعبان عبد الرحيم الجديدة عن إعدام صدام


ولما المراسل سأله عن رأيه


قال : لا بس دول هما اتنين عرب بيتخائوا على شوية معيز وخرفان


عم بوش بقا ماله يحشر نفسه بينهم ليه؟؟؟؟


*****


وكملت النشرة بالإضافة للإيميلات كمالة الموقف البطولى!!! ...شعبولا" يتحدى بوش".. بعد أن جهز أغنية عن إعدام "صدام حسين" باعتبار الحكم ليس نهائيا سارع وألّف أغنية أخرى بعد صدور "الإعدام" تقول كلماتها "مش لاقي كلام أقوله وإن قلت أقول لمين، عملوا فيلم وسيناريو عدموا "صدام حسين"، خلاص مات الكلام وكله في التمام، وأهي القضية خسرت الحكم بالإعدام"


وفي لقاء بنقابة الصحفيين قام "شعبان عبد الرحيم" بغناء الأغنية وأنهى كلمته قائلا: "مش بعيد بوش يحكم عليّ أنا كمان بالإعدام ولن يستطيع أحد وقتها أن يعارضه وإن حدث ذلك.. وصيتكم العيال


!!!!!



خلصت المسرحية


مش لاقي كلام أقوله


وإن قلت أقول لمين


عاملين فيلم وسيناريو


فاكرينا مغفلين


خلاص الكلام مات


وكله في التمام


والمحكمة حكمت


والحكم بالإعدام


ونزلت الستارة


اللعبة اتفبركت


الورقة اتسكلت


والحكم أصدروه


خلاص هاينفذوه


والمسرحية خلصت


قال إيه هايعدموه



بس خلاص

Thursday, January 11, 2007

تخاريـف كاميكـازيـة



بعد ما دماغى وقفت وحسيت إنى مش فاهمة حاجة خالص

وبدأت الفيوزات اللى فى نافوخى تضرب

لاقيت النور مرة واحدة اتقفل فى دماغى

والدخان طالع من ودانى

وحالتى بقت صعبة خالص

لدرجة إنى صوعبت على كاميكاز

اللى قعد يهدى فيا ويقولى معلش يابنتى

ما الدنيا إلا كاميكاااااز كبير

هنعمل ايه بس؟

خلاص يا كوكو مش قادرة خلاااااااااص

البعيرُ هلك

البعيرُ هلك

البعيرُ هلك

.

حد يسألنى مين البعيرُ هلك دول

اجاوبه بكل فخر واقوله مرة تانية هبقى احكيلك قصة الملك هاموشير وعبدوس الوزير عشان مش وقته

.


ووسطت هذا الجو الملبد بغيوم الحزن والكآبة

من هذه المادة الهبابة

فوجئت بحبل الافكار نازلى من سحابة

وأصحبت أكثر خيابة

كاميكاز: ياعينى عليكى فى الفصيح

مريسى يارافع معنوياتى

.
المهم لاقينا مرة واحدة الكتاب وقف وطلع لنا لسانه

وقعد يغنى ويقول

ورااااك انا والزمن طويل .. انا مش هسيييييبك مستحيييييييييييييل

قول عليا مهبووول قول عليا مهطووول

خدها كلمة منى ومن الآخر هتذاكرنى فى يوووووووم

.

طبعا أوغمن عليا على طول انا وكوكى فى نفس ذات اللحظة
.

***فاصل من الأغانى الكاميكازية المبهجة***

مع كامكوزة عجرم

.

إحساس جديد



فى قلبى بيزيد



بحسه كل ما بدخل اللجنة



إنى على طول



عقلى مشغول



كتير بتلخبط



ومش فاكرة ولا كلمة

***

انا ما بدى اكتب كلام



يصدع قلمى ويجيبله زكام



بيكفينى



يقولوا نجحتى



هايدى الكلمة بتقتلنىىىىىىىىى



***

.

صاحب هذه الاغنية الرائعة رقص وطبل وتنطيط من كاميكاز افندى حبيب الجماهير



واحد من الشعب يسألنى مين كاميكاز ده؟



هزعل منه جدا أولا عشان السؤال ده كتر أوى اليومين دول

وثانيا عشان مش مثقف ومش عارف مين هو كاميكاز حبيب الجماهير

وثالثا وده الاهم مش هرد لانى انا شخصيا معرفش مين كاميكاز ده


.

*** فاصل آخر ***

ولا ليلة ولا أجمل من دى ليلة

بين إيديا كتابى بقاله سنين طويييييييييييييييلة.......................... أكمل الفراغ وعلل أسبابه واذكر إسم مؤلف الكتاب وموقفه من التجنيد.


.

طبعا اول ما كاميكاز سمع إن فيها اسئلة غنى اغنيته المفضلة

كدة كفاية كدة تجريييح .. كدة كفاية ... كدة كفاية

ياعينى عليك فى الحزين يا كوكي

ثااا.. ثااا..ثاااانك يوووووووووو

يرحمكم الله

.

.
**الفقرة الرياضية من نادى كاميكاز الرياضى**

أعزائى المشاهدين معاكم المذيع كاميكازى أفندى أبو نسمة ، وطبعا بعد فرحتنا اليوم بفوز الأهلى الساحق الماحق 5-1

والذى رد بجدارة على كل الاقاويل المغرضة التى طعنت فى قدرات مثل هذا النادى العريييق

والذى وضع خمس أهداف عشان كل اللعيبة تفرح والكل يجيب اجوان وخلى الشعب يعيش

على فكرة كاميكاز وهو معدى جمب الإستاد اتحايلوا عليه ينزل يجيب جون وهو قالهم انا عندى شغل .. اعطل نفسى يعنى.. ايه الناس دى

وكما تسمعون الان اعزائى المشاهدين هتاف الجماهير الكاميكازيين فرحاً بفوز ناديهم المفضل

او ممكن يكون من كبت الامتحانات

لا ادرى بالظبط

ولكن هناك شخص قصير وشكله غريب مهيج كل الجماهير بالهتفات الرنانة

والزنانة ايضا

هذا الشخص يدعى كاميكاز

وإنه حقاً لكاميكاز

وياله من كاميكاز

مرعب

شنيع

مريع

فظيع

رقيع

رائيع

بديع

.

هنيئاً لكم ايها الكاميكازيون الموعودون بالنجاح دائماً

.

update

**مئوية الأهلـى الكاميكازية**

يا أهلى

ياحبيبى ياأهلى

يانور عينى ياأهلى

يا فضحيتنا قدام العالم كله يا أهلى

حد كاميكازى بقا يفهمنى ايه اللى حصل يوم التلات ده بقا؟؟؟؟

اربع اجوان؟؟؟

يعنى مش 1 ولا 2 ولا 3 حتى

يانهار ابيض

اول جون افتكرت إن الكاميرا جابت مشهد من ماتش تانى

والا الجون التانى بتاع الواد اللى ابو 19 سنة

والرابع اللى فى الوقت اللى بدل الضائع

يانهااااااااااااااارى

وضجة إعلامية

وإعلانات

ومئويات

وحركات

والتعلب فات فات فى ديله سبع لفات

فين اللعيبة

ابص عند الجون بتاعنا اقول يمكن بيحاولوا يحافظوا على شباكنا الزهبية

الاقى الحضرى ياعينى واقف لوحده وضغطه عالى من الشخط فى اللعيبة

ابص عند الجون بتاع برشلونة اقول يمكن بيحاولوا يجبوا جون الاقيه فاضى ومهوى

ادور عليهم فى نص الملعب بيمكن بيسخنوا ولا حاجة مالقيش حد بردو

فين لعبية الأهلى ياجدعان

فين ابو تريكة اللاعيب

ولا متعب!!!!ه

ولا فلافيو!!!!ه

يلا هنقول ايه بس

اللى حصل حصل بقا وخلاص

واللى لعب لعب من زمان

واتفضحنا واللى كان كان

كنت منورنا ياعم رونالدينهو

ومتشكرين على الكام توقيع اللى على الكاميرات دول

وعلى الاربع صواريخ اللى دخلوا فى شبكتنا

عااااااااااااااااااااااااااااااااا
يا شماتة أبلة ظاظا فياااااااااا

.

**إنتهت الفقرة**

.

.

وبعد إشفاقى على كل من وصل لنهاية البوست اللى مالوش موقع من الإعراب ده ومش فاهمة فيه ولا كلمة

اقولكم كلكم بالله عليكم إدعولنا

ومانجلكوش فى حاجة وحشة

مين يفعل خير بيداه يلتقاه

وهنيالك يا فاعل الخير والثواب
إهئ إهئ إهئ

انا عاوز كوكاكولاااااااا

بطل شحاتة بقا.



اسيبكوا بقا عشان كاميكاز دماغه ضربت زيي بالظبط وعامل دوشة ودخل جوا الكمبيوتر واتكعبل على العتبة بتاعة التوول بار وعمال يلعب فى الإن بوكس بتاعى

.

يلا تصبحوا على خيييير

كاميكاز: مع السلاااااااامة

خش نام بقا صدعتنى