Thursday, October 25, 2007

فوبيا الزواج


زمان من ثانوي كدة ابتديت احلم بفارس الأحلام اللى حيحبنى اوى واحبه اوى ونحب ربنا اوى ونجيب اطفال نحبهم اوى ويحبونا اوى ونحببهم فى ربنا اوى اوى اوى ، ده كان حلمى الوردى اللى لو فتشنا فى قلب اى بنت حنلاقيه ولو اختلفت تفاصيل وملامح الحلم ده بس حتلاقيه بردو موجود ، كنت مقبلة على الحياة اوى ايامها ونفسى مفتوحة زى مابيقولوا لحد ما شوفت فيلم أثر فيا اوى الصراحة اسمه " أسرار البنات " .. الفيلم ده عرفنى ان فى حاجة اسمها خطر وفى حاجة اسمها حذر من الخطر ده

دخلت الكلية وانا خايفة من العالم الجديد ومن اللى اى حد بيسمعه عن الجامعة والبلاوى اللى ممكن تكون فيها ، محور خوفى كان الجنس الآخر بصراحة لانى طول عمرى فى مدارس حكومية وتعاملى مع النوع ده كان فى اضيق الحدود .. عشان ابقى صادقة معاكوا كنت مرعوبة مش بس خايفة وإترجم رعبى ده لصلاة ودعاء عشان اهدى ، الحمد لله من كتر مادعيت تقريبا ربنا اكرمنى بكليتى .. وكليتى لمن لا يعلم معظمها بنات وقليل فيها جدا الولاد .. فرحت جدا بجد بالموضوع ده وحمدت ربنا عليه والحمد لله الجامعة مختلفتش كتير عن المدرسة .. اكنى لسة فى مدرسة بنات وبس وعلى مدار الأربع سنين فعلا كان تعاملى مع الشباب يكاد يكون معدوم الحمد لله

برغم فرحى بده إلا إن الحلم كان لسة موجود ومعترف بيه جوايا بس الحلم ده كان فيه حاجة غريبة جدا هى انه دايما كان بالنسبة لى حلم مُحرم او ممنوع .. يمكن عشان اختى اللى اكبر منى بتسع سنوات كانت لسة متجوزتش فمش من الطبيعى ابدا انى احلم بكدة ساعتها .. الأغرب والأعجب انها حتى بعد ما اتجوزت وربنا رزقها ببنتها لسة بردو الحلم جوايا مُحرم او ممنوع .. إزاى حتى افكر فيه وفى ملايين غيرى اكبر منى بكتير ولسة مرتبطوش .. لازم هما الأول وبعدين افكر فى نفسى

مع الوقت إبتدى يقل المنطق ده شوية وحسيت ان الحلم اللى كنت بحلم بيه من ثوانى ممكن اوى يحصل ويتحقق وفى أى وقت ... اللى مش حتصدقوه إنى مع قرب حدوثه إبتديت ابعد واخاف والخوف جوايا يزيد الى ان وصل الى درجة الرعب فعلا .. لاقيتنى بقولى فارس احلام ايه وبتاع ايه .. بلا وجع دماغ ، ايوة بقيت رافضة فكرة الزواج من اصله ومبقتش حتى اخليها تعدى كدة على راسى ولو على شكل فكرة بريئة ممكنة الحدوث .. السبب ؟؟؟ السبب هو المجتمع اللى بايقنا فيه والصح والغلط اللى تداخلوا اوى .. سهل جدا دلوقتى اى حد يتخدع خصوصا بالمظاهر او بوهم كبير اوى اسمه الحب اللى اصبح شئ قديم ومعنى غريب مش فاهماه .. وبقيت خلاص مش عايزة اتجوز مع انى عارفة ان حرام اقول كدة بس فعلا بقيت خايفة وقلقانة من كل الشباب ومش مطمنالهم ده غير انى معرفهومش اصلا .. اى شاب دلوقتى بقا عبارة عن علامة إستفهام كبييييرة ماشية على رجلين بتخوف .. عارفة انى بطريقتى دى بظلم ناس كتير على خُلق وناس كويسين بس متأكدة بردو ان فى شباب تانين بيفكروا نفس تفكيرى ده وبيقولوا فى قرارة نفسهم بلاش .. وديه ياجماعة تبقى الظاهرة المعروفة بـ" العزوف عن الزواج " او " فوبيا الزواج ".ه


كنت فكرانى انا بس اللى بقيت كدة .. خوف وقلق أدى الى انى اشيل الفكرة من دماغى خالص بل وارفضها كمان وبشدة لحد ما اتفرجت على حلقة فى برنامج آدم بعنوان فوبيا الزواج .. وقالوا فى الحلقة ان نسبة كبيرة جدا من الشباب والبنات فى الوقت الحالى رافضين فكرة الزواج شكلا وموضوعاً وبيفضلوا البعد عن الجنس الآخر تماما .. رغم إن الإحصائية اللى قالوها ومش فاكرة ارقامها كانت تحزن بس كنت فرحانة انى مش لوحدى وفى ناس تانية طلعت زيي


خلال الحلقة حاولوا يشوفوا ايه الاسباب اللى أدت الى ظاهرة الفوبيا دى .. واللى خلت معظم الشباب والبنات بجد تخاف تاخد الخطوة دى وتخاف من تحمل المسؤلية ، ولاقوا ان اهم الأسباب على الإطلاق هو البطالة والحالة الإقتصادية الصعبة فالشباب مش عندهم القدرة على الخطوة دى فبيقولوا بلاش والبنات شايفين الحال عامل ازاى فبيقولوا بلاشيين ... السبب التانى هو متمثل فى أزمة ثقة بين الشباب والبنات .. البنت شايفة ان معظم الشباب دلوقتى - مش كلهم عشان محدش يزعل - بقا غير قادر على تحمل المسؤلية بصورة او بأخرى ، مش عارفة نوع من الهيافة يمكن او بسبب البطالة يجوز الله أعلم ، وكمان الولد عنده أزمة ثقة فى البنات بسبب كتر الفساد المنتشر فى الجامعات والفديو كليبات واللى بيشوفه ويسمع عنه من المحيطين بيه أو عدم ثقة فى أهلها نفسهم وأنهم ممكن يغالوا فى الطلبات وهو مش عايز يحرج نفسه فبيبعد من سكات وخلاص

السبب التالت والأقوى فعلا هو الصورة السلبية جدا المتصدرة إلينا معشر السنجلز " الغير مرتبطين يعنى" من المتزوجين ومن وسائل الإعلام كمان واللى بتأكد وبقوة إن الزواج ده شئ وحش جدا جدا جدا ، وجمل بقا من نوعية " كان يوم اسود يوم ماشوفتك!" .. " كنتى فين يا لأ لما انا قلت آه! " .. " الجواز؟؟ بلا هم ياشيخة استمتعى كدة وشوفى حياتك احسن .. بلا جواز بلا هم " ..." متحسبوش يابنات ان الجواز راحة " .. " كان بدرى عليك عليك بدرى" ... بتأكد النظرية ان التعبيرات السلبية اللى زي دى كان ليها أثر كبير فى عزوف الشباب والبنات عن الزواج لأن مع إستبعاد العامل الأول والأكبر اللى هو البطالة وسؤ الحالة الإقتصادية حنلاقى فى نسبة عازفة بردو .. يعنى ناس قادرة تتزوج ومش عايزة او رافضة وده فى الغالب بيكون بسبب الصورة السيئة المتصدرة إلينا من أهلينا نفسهم او الإعلام او المحيطين بينا وهم جرَ

كلام جميل ولما طبقته عليا لاقيته انه صح جدا .. يعنى من الحاجات اللى كانت بتغير فكرة الزواج عندى هى حال اختى بعد زواجها وقد ايه بقت مطحونة فى البيت ومع البنت .. على النت استاذى العزيز طهقان وزوجته طهقانة قاموا بالواجب وزيادة الحقيقة هههههههه .. ده غير والدتى وكلامها على ان احلى ايام بجد كانت فى قعدتها فى بيت ابوها

بابا حبيبى كان دايما له رأى فى الموضوع ده .. تحبوا اقولهولكوا؟؟ .. حقوله طبعا مش مدونتى هههههههه
المهم بقا بابا كان زمان وانا فى مرحلة الحلم الوردى يقولى الزواج ده يابنتى حدث عارض فى الحياة ،ازبهل كدة واقوله عارض إزاى ياعم الحاج؟؟؟ .. يقولى يعنى ممكن اه بيحصل بس مش هو كل الحياة !!! ..اتنح كدة واسرح واتنهد - كنت رومانسية اصلى هههههههه - واقول فى نفسى " إزاى ده هو الحياة باللى فيها ياريس" وبعدين ارجع اركز معاه لاياخد باله من التنهيدة الاقيه بيقول انه قصده ان حتى الحيوانات بتتجوز ، يبقى معنى كدة ان الزواج هو فعلا أمر ضرورى بس مش هو الهدف .. هو وسيلة لا غاية ، يعنى الزواج يحصل وبعد كدة الواحد يكمل مشواره فى الحياة ويمشى فى طريق نجاحه وتحقيق اهدافه مع شريك حياته اللى اختاره ويعمر فى الدنيا وهو متزوج .. الجواز مش نهاية المطاف يابنتى اتنح كدة ويترسم على وشى علامة تعجب كبيرة واقوله: نظرية بردو!ا


لما كبرت لاقيت كلام بابا صح جدااااااااا وأصح لو طبقناه على الشغل كمان .. لو تلاحظوا دلوقتى لو سألتوا اى شاب ايه اهدافك حيقولك مثلا اشتغل الشغلانة الفلانية واتجوز .. والكلام ده غلط جداااااااا ، الشغل والجواز أحداث عارضة فى الحياة ، ومش معنى انك حصلت على الوظيفة التمام يبقى خلاص حققت هدفك .. لازم بعد ما تشتغل تبتدى تشوف تقدر تطور إزاى وتحسن إزاى من كفائتك فى الشغل اللى لو الكل فكروا بالطريقة دى حيتحسن مستوى وحال أمتنا أكيد ، واعتقد والله اعلم ان احدى اسباب تخلفنا فى مسار باقى الدول هو ان الزواج والمنصب من اهم اهدافنا .. لو تلاحظوا برا الزواج مش مشكلة اوى زى هنا وبتجوزوا فى سن صغير كمان وفى الشغل بيكون هدفهم جودة المنتجات نفسها مش مجرد منصب ومكتب وبدلة وكدة


مش حنهى الموضوع بنصيحة او بخاتمة ، هى بس مشكلة وحبيت احكيلكوا عنها .. ممكن يوافق عليها البعض ويرفضها البعض الآخر جملة وتفصيلا ، بس وافقنا عليها او لم نوافق ده مايمنعش انها ظاهرة موجودة وملموسة فى الوقت الحالى للأسف ، وفى النهاية طبعا لا يصح إلا الصحيح وهو أن الزواج هو سنة عن سيدنا محمد عليه الصلاة والسلام وحيفضل أمر ضرورى جدا لتعمير الأرض والإصلاح فيها

Sunday, October 14, 2007

تاج وتاج يبقوا تاجين

10



20



30



40



50



100


أحمدك ياااااااااااارب


ايه يابنى مالك .. وايه الفلوس اللى بتعدها دى كلها


دى فلوس العيدية يابنتى .. الحمد لله بقيت من الأعيان المتكمكزين


ما شاء الله ما شاء الله .. ربنا يزيدك


متشكر


الله يفتحها فى وشك


ميرسي


إلهى يجبر بخاطرك قااااااااااادر ياكريم


يحنن


كدة؟؟؟ .. طب يلا غور من وشي


ماشى من غير ماتقولى بس قبل مامشى لازم اغيظك وارمى قنبلتين .. قصدى تاجيين فى المدونة واجرى


يالهوى تاجين حتة واحدة يا مفترى .. وماله اهم احسن منك .. امشى يلا من هنا .. هش


اشطة اروح اهيص انا واسيبك مع القنبلتين .. سلاااااااااااام


يلا اجرى .. ده ايه القرف ده ياخواتى .. إشحال ماكنت مشغلاه عندى فى المدونة وخليته يطلب العيدية اللى هو عايزها منكم كمان .. وقال على رأي المثل .. خيرا تعمل بطيخاً تلقى


التاج الأول ده من اختى تمر حنة هو دسم شوية بس ربنا يسهل .. يلا بسم الله


لو قالولك اختار عصر من عصور مصر علشان تعيش فيه تختار اى عصر و فى عهد اى حاكم .. واشمعنى؟
الخمسينات اعتقد كان جميل اوى .. على قد ما بسمع ان كان اى حد يتخرج يشتغل على طول وان مشاكل البطالة والعنوسة اللى موجودة دلوقتى مكنتش موجودة زمان على الإطلاق ... بس طبعا لو اطلعتم على الغيب لاخترتم الواقع فاللى الواحد فيه احسنله اكيد
.
اول اولويه فى حياتك عيلتك ولا شغلك ولااصحابك؟
لا عيلتى طبعا طبعا طبعا .. خيركم خيركم لأهله



ايه اكتر حاجه بتحبها فى رمضان؟
بحبه هو شخصيا وشحن بطاريتنا الإيميانية فيه الحمد لله .. الواحد بيخرج منه كأنه اتولد من جديد


اوصف ليا اجمل فطار ممكن تفطره
لا عادى اى حاجة .. الصايم مش بيركز اى حاجة بتشبعه وخلاص ، بس فى العموم انا بحب الأسماك اوى ومينفعش اسماك فى رمضان فأى حاجة بقا مش مشكلة



لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
حديهم القدرة على انهم يخالفونى ويعارضونى لو غلطت .. يعنى يسمعوا كلامى طول ما انا صح ولو غلطت يقوموني


اللى بيبوظ الحكام .. نفسهم؟ ولا الشعب؟ ولا الحاشيه المقربه؟
ممكن تقول كل ده مع بعضه بس العنصر الأقوى بيكون الحاشية على حد علمى


مين أكتر اعلامي مصري بتحترمه؟
منى الشاذلى وعمرو أديب ومعتز الدمرداش ومي الشربينى ومحمود سعد ..رغاية انا صح :$ه


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
هه؟!!!!! .. لأ


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
والله لسة مشتغلتش عشان اجاوبك ياريس


ايه تانى بلد تتمنى تعيش فيها بعد مصر؟
المدينة المنورة طبعا .. حلم حياتى انى اعيش فيها


اوصف ليا ترتيبات اجمل فرح ممكن تحضره
اجمل فرح فى رأيي اللى هو يبقى كتب كتاب ووليمة وبس على كدة .. الفرح بدوشته والهيصة وكل ده مبحبوش .. ذنوب وبعزأة فلوس ع الفاضى ومحدش بيرضى فى الآخر .. وبعدين ليه يبتدوا حياتهم بمعصية بدل ما يبدأوها بطاعة ... يحوشوا فلوس الفرح ويروحوا عمرة مثلا او يتصدقوا بيها .. كدة يعنى ، واكيد ربنا حيبارك فى اسرة بدأت حياتها بطاعة


بتراعي كلام الناس والقيل والقال؟ لو اه او لو لا قول لى ليه؟
فى الغالب لأ ده لو ع الناس التانية ولو الكلام عليا بحاول بقدر المستطاع ارضى ربنا فلو كلامهم وإنتقادهم على حاجة حلال ولا بهتم لكن لو حاجة فعلا غلط بحاول اراجع نفسى اكيد


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
الحمد لله بعرف اتأقلم


السعاده هى؟
الأنس بالله وراحة البال


عندك أمل ؟؟ أسبابك ؟
أكيد .. اسبابى ان ربنا هو ربنا .. يعنى بالثقة فى الله ورب الكون وانه قادر على كل شئ بحوله وقوته .. لو اى حد له رب قادر اوى وعظيم اوى كدة ازاى ميكونش عنده أمل؟


لما تحب تهرب من كل شئ بتروح فين؟
بروح لربنا .. أصلى وأدعى



امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
لا قلتها كتير السنة دى .. لما تميت 21 سنة ولما اتخرجت من الكلية ولما اختى خلفت وبقيت خالة ولما اختى نزلت الشغل وبقت تسيبلى سولى وابقى مسؤلة تماما عنها لحد ما امها تيجى من الشغل


لما بتعمل عمل خيرى بيكون ايه هو دافعك الاول؟
الدار الآخرة


بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لأ الحمد لله .. مش عارفة فى ظاهرة فعلا غريبة اليومين دول ان بنات كتيرة جداااااااااااااااااااااااااااااااااااااااااااااا بيشربوا سجاير ومن كل الأعمار والطبقات ومحجبات وغير محجبات ، والأغرب ان البنت بتكون باينة فى الأول حمل وديع بجد وقطة مغمضة وحاجة كدة لو قولتلها بخ تتسرع مثلا .. وفى الاخر تكتشف انها حريفة شرب سجاير لأ وبتشرب زى المعلمين شيشة ياجدعان كمان ،الأنكت هو انى سمعت مرة حكاية ان بنت واحد قريبها كان بيحبها اوى وكان متمسك بيها جدا جدا جدا كانت مترددة فى الاول بس وافقت فى الاخر وبعد ما وافقت قالها انتى عارفة انا متمسك بيكى ليه .. لأنك خام وقطة مغمضة وعلى نياتك ع الآخر !!!! .. اللى ميعرفوش الباشا انها بتشرب سجاير من ثانوى من ورا أهلها ولو فى شيشة على اى قهوة مع صحبتها مافيش مانع ،نفسى اعرف بيشربوها ليه وسألت واحدة منهم فعلا قالتلى هروب!! .. لاحول ولا قوة الا بالله ، الموازين اتقلبت يا جماعة بجد ومحدش بقى عارف فين الصح من الغلط .. مين الكويس ومين الوحش ، المظاهر بجد بقت اونطة واى كلام ع الآخر .. مش عارفة انصح الشباب يستخيروا ربنا كويس قبل ما ياخدوا اى خطوة جدية تجاه اى بنت ولا انصح البنات تستخير ربنا كويس قبل ما توافق على اى شاب ..ولا ندعى احسن ونقول يارب ألطف بينا وخرجنا من الدنيا دى على خير

بتعرف ايدك اليمين من الشمال ازاي؟
ده سؤال ذكى جدا لأنى فعلا مش بعرفهم من بعض بإعتبار إنى شولة ، بس لما اتزنق وابقى عايزة اعرف مين فيهم ايه بكتب ع الهوا .. الإيد اللى بتكتب تبقى الشمال والتانية تبقى اليمين طبعا مش محتاجة ذكاء يعنى

ايه اكتر اله موسيقيه بتحبها ؟
الطبلة

فى رأيك ليه الذوق والنخوه اتعدموا؟
هما متعدومش اوى الصراحة عشان الواحد يبقى حقانى بس ، هما قلوا شوية كتيييييييير .. قلوا ليه بقا مش عارفة .. يمكن فايروس؟؟؟؟

ايه الحاجه اللى لو حصلتلك تبقى سعيد قوى؟؟؟
حاجات كتيرة بصراحة ... يارب اللى دعيت بيه فى رمضان يتحقق حبقى سعيدة اوى ان شاء الله

تختار يبقى عندك...ارض زراعيه ولا احسن عربيات و لا كام عماره و لا فلوس فى البنك؟؟؟؟
اتعلمنا فى الإقتصاد ان الفلوس مع الوقت قيمتها بتقل بسبب التضخم وكدة .. فأى أصل بيكون احسن من الفلوس النقدية بشكل عام ..لكن يبقى عندى ايه بالظبط من الأصول دى الله اعلم .. اللى ربنا رايده هيكون إن شاء الله

البحر و لا النيل؟؟؟
لا ده ولا ده .. البحر غدار والنيل متلوث وطالع عينه

مركب و لا طياره؟؟
طيارة وربنا يستر

مجنون و لا عاقل؟؟
الإتنين وبحب الحالتين جدا

تقرأ كتاب و لا تتفرج عليه فيلم؟
الاتنين .. ده طعم وده طعم

تمرر التاج لمين؟؟
اللى حيعلق حيجاوب يا جماعة .. اللى أوله شرط آخره بنوووووووووووووور


التاج التانى تاج مزاج عالى اوى جايلى من اخويا مبرمج حر .. رغم ان هو والواد كوكو مش بيطيقوا بعض خااااااااالص .. لكن طبعا زى مانتوا عارفين انى طيبة وبحاول اصالحهم على بعض دايما

التاج اسمه " لما احب " .. وانا بصراحة لما احب حاجة احب اعملها بمزاج .. يلا خدوا نفسكوا واقروا اللى جاي بمزاج بقا

لما أحب اعمل بحث عن حاجة معينة بفتح جوجل طبعا ..لكن لو عايزة كتاب او حاجة معينة بدور فى موقع اسمه " فور شيرد " حلو جدا ودايما بلاقى اللى انا عايزاه الحمد لله

لما أحب اعمل دماغ بجد .. امسك القلم واكتب او ادور فى النت على الحكم والكلمات المأثورة

لما أحب اعمل دماغ عالية اوى يعنى .. امسك كتاب حلو واقراه او اشوف اى ندوة لدكتور إبراهيم الفقى او اضلم النور واتفرج على فيلم اجنبى حلو .. يعنى مايكونش رعب وميكونش أكشن جاف ورخم

لما أحب اتبسط .. اهيس جامد او اخرج مع اختى ، اى خروجة معاها تعتبر متعة بالنسبالى خصوصا لو خدنا البت سولي معانا وقعدت تتفرج ع الدنيا والناس بإنبهار بااااااالغ ، رغم ان اختى بتقعد اليوم بطوله تتحايل عليا عشان اخرج معاها اصلا

لما أحب ادخل عالم داخل عالم اروح الكوافير .. فعلا عالم تانى خااااااالص بجد

لما أحب العب لعبة حلوة بلعب مع سولي

لما أحب افصل خالص بقا بغسل المواعين .. لا ده بجد غسيل المواعين فعلا بيخلى المخ ينشغل بحاجة تانية غير الواقع ودايما اى افكار جديدة تجيلى بتجيلى وانا بغسل المواعين واجرى اكتبها بالماية والصابون زى ماهما كدة

لما أحب افرفش واضحك واهيص وكدة حاجة من الاتنين يا اتصل بصحبتى ونقعد نتضحك على اى حاجة وكل حاجة .. او اروح لبنات خالتى ونهيصة لغاية ما جرانهم يفتكروا ان فى واحدة منهم اتخطبت واحنا بنهصيلها ههههههههه

لما أحب امشى بمشى فى الجامعة على مهلى خااااااالص واحط سماعة الراديو فى ودنى وامشى مزغللة عينى عشان مشوفش حد او امشى ابص على الشجر والسما واسرح
.
لما أحب ابقى فرحانة اقول اى حاجة تضحك اللى قدامى .. بفرح اوى لما اخلى اى حد يضحك الحمد لله
.
لما أحب ادخل مكان يريحنى بجد اروح اى مكتبة او اى بيت من بيوت الله
.
لما أحب استعيد همتى ونشاطى اقرا او اسمع اى حاجة فى التنمية البشرية على طول
.
لما أحب احس ان روحى اتردت ليا تانى آدى البت سولي حضن كبييييييييير .. مبعرفش اعيش وهى بعيد اساسا
.
لما أحب افتكر احلى سنين عمري اجرى على صورى انا وصحابى فى الكلية وافتكر كل دكتور وكل صاحبة وكل ركن كان بيجمعنا سوا .. وحشونى اوى العيال دى
.
لما أحب احس انى بعرف اعمل حاجة اتكلم مع اجانب بالإنجليزى وافرح اوى لما نبقى فاهمين بعض وعارفين نتواصل الحمد لله
.
لما أحب اضحك من قلبى بجد اتفرج على اى مسرحية لمحمد صبحى
.
لما أحب ابعد عن الدنيا واعرفها على حقيقتها وانها مجرد مرحلة ورايحة اقرا كتاب الروح لإبن القيم
.
لما أحب اهرب من كل شئ واى شئ فى الدنيا .. بتوضى وبصلي
.
لما أحب اعيش جوايا شوية بفتح أرشيف المدونة هنا واقعد اقرا فى مواضيعى القديمة .. مش عارفة ليه بستريح اوى لما اعمل كدة ، بقرأ كل كلمة كتبتها بإندهاش جدا كأنى مش انا اللى كاتبة وساعات استرغب انا كتبت الكلام ده ازاى ، وساعات اضحك اوى لما افتكر موقف حلو كتبت عنه وساعات ابقى حعيط لما افتكر موقف تانى أثر فيا وكتبت عنه او مود معين او مشكلة كنت فيها والحمد لله ربنا اكرمنى وبقيت احسن ، الأهم من ده كله انى بحس انى واقفة قدام مراية بتجيبنى فى مواقفى وأوقاتى كلها مش بس دلوقتى وكأنى بقرانى فى كتب التاريخ ، بحس انى لسة عايشة وان اللى عيشته زمان كان له أثر حتى لو الأثر ده محدش حاسس بيه غيري ، عشان كدة بحب اكتب حتى لو البوست طويل لأنى ببقى عارفة ان بعد فترة حرجع اقرا واستمتع باللى فضفضته مع نفسى تانى .. بفرح جدا لما حد يعجبه المدونة بتاعتى وحريص انه يعلق على كل موضوع فيها ، بس بصراحة مش بزعل لو فى حد المدونة مكنتش عجباه او مش مهتم انه يعلق فيها .. بيكفينى ساعتها انى حباها واعتقد انها هى كمان بتحب انى احبها او على الأقل ابقى راضية بيها وعنها ... الحمد لله رب العالمين
.
وبكدة يكون خلص التاج المزاج .. وزى ما اتفقنا قبل كدة .. اللى حيعلق حياخد التاجين ويجاوب عليهم ، انا قلت ونبهت اكتر من مرة .. انتوا احرار بقا

Thursday, October 11, 2007

كل سنة وانتوا طيبين


كل سنة وانتوا طيبين

وبخير


وسلام


وصحة


وسعادة


وآمان


وصدق
.
وحرية

.
وصبر
.
ومغفرة
.
وتوبة
.
وعفو
.
وقرب من الله
.
وطاعة
.
وعبادة
.
وتقوى
.
ومودة



ورحمة


وحب


وتفاؤل


وأمل


وقلب أبيض


وفرح


وتحقيق أهداف


ونصرة


وكل معنى حلو فى الدنيا دى


اللهم آمين


.

.


ملحوظة: كاميكاز بيقولكوا انه لن يتنازل ابدا ابدا ابداااااااااااااااااااااا عن العيدية الكاميكازية بتاعته، واى حد منكوا حيفكر بس مجرد التفكير انه يزوغ او يهرب من دفع العيدية سوف يعرض نفسه هو واللى جمبه للغرامة المتكمكزة والتى تتمثل فى دفع مبلغ العيدية السابق تسجيله فى الشهر العقارى المكوكاز مضروباً فى أربعة، ذلك بالإضافة إلى سحب الرخص البلوجرية من المتهم الهارب مع طلبه أول صباح عيد الفطر بالمثول أمام ساحات القضاء الكاميكازية المتخصصة فى مراعاة أحكام وشئون وتقاليد دولتنا الحبيبة كامكوزيا العليا.. هاي هي
.
إنتهى البيان
.
:D
.

كل سنة وانتوا طيبين



Send this eCard !