Friday, December 28, 2007

سنة أولى إنسانة

فاكرة اول مرة اسمع فيها عن المدونات كنت لسة فى الكلية وشوفت حلقة لبرنامج العاشرة مساءا كانت مستضيفة بعض المدونين ومن هنا عرفت التدوين .. خدت بعضي زى الشاطرة وفتحت جوجل وابتديت اكتب اسامي المدونين اللى هيا مستضيفاهم ودخلت مدوناتهم واتصدمت .. اتصدمت من كم النقد اللى بيوجهه المدونين دول من مدوانتهم ، المشكلة بالنسبالى كانت الاسلوب والألفاظ فعلا اتصدمت جامد واتخنقت ومابقتش مصدقة نفسى وقررت مادخولش المدونات دى تاني ابدا - الصدمة اللى كانت عندى من المدونات اللى فاتحاها ع البحرى دى راحت خلاص على فكرة لانى ابتديت اعرف ان فى مدونات تانية اوقع من كدة بكتييييييير وان للأسف كل ده فى الواقع وزى مافي واقع حلو فى واقع منيل بستين نيلة واهو بردو واقع - بعد فترة عرفت بالصدفة مدونة جميلة اوى وابتديت ادخل على المدونات اللى هى ضايفاها عندها .. لاقيت ناس بتتكلم بإسلوب راقي محترم لمسنى وشدنى جدا لدرجة انى بكيت من جمال كلامهم ، قعدت فترة اتابع من بعيد لغاية ما قررت افتح مدونتى
.
فاكرة يوميها دخلت الموقع عشان افتح الحساب على اساس انى بجرب ومتأكدة مليون فى المية ان محدش حيشوف المدونة دى خالص ، تيجى ايه دى اصلا بين الناس الجامدة اوى دى .. مشيت فى الخطوات وانا بفتحها وبعدين لاقيت الموقع بيسألنى حتسمى المدونة ايه؟ .. احترت مافيش حاجة فى بالى وانا اساسا بجرب ومش عارفة حاجة .. قمت كاتبة إنسانة ، مكنتش متخيلة ابدا ان الاسم ده فى يوم من الايام حيبقى جزء مني .. خلصت وكتبت اول بوست فى الفضاء التدوينى واللى كنت متأكدة ان محدش فى الدنيا حيقرا كلمة واحدة بكتبها
.
من اعدادى كدة وانا دايما اكتب خواطر ومصير الخواطر دايما كان الورق الكتير اللى مضايق ماما من كتره ونفسها ترميه وانا نفسى احتفظ بيه لانه من جوايا أوى .. مع دخولي الكلية وانشغالى بالأبحاث والمحاضرات وحاجات كتير اوى بعدت عن الكتابة وقلمى ضاع منى ومبقتش اكتب حاجة خالص ، المدونة شجعتنى انى ارجع اكتب تانى وانى احتفظ بكل حاجة بكتبها وكمان ناس على قدر كبير جدا من الإبداع والإحترام تقرالي وتقيم اللى بكتبه ده ، حبيت المدونة والتدوين اوى وبقيت على طول افكر ايه جديد ممكن اكتبه واعمله إخراج تدوينى ويبقى بوست اهديه لإنسانة .. المدونة خدت خط انسانى مكنتش مخططاله خالص هو طلع لوحده سبحان الله
.
نزلت اول وتانى وتالت ومش فاكرة كام تانى بوست وبعديهم عرفتكم على كاميكاز الشخصية اللى حيرت ناس كتيييييير اوى وكتير جدا سألوا يطلع ايه كاميكاز ده .. كاميكاز ده يا جماعة ولأول مرة اقولها يبقى شخصية كرتونية من وحي خيالي ووظفته الأساسية فى المدونة انه الفراش او البواب او السكرتير بتاعها واى شغلانة تانية ممكن يسد فيها .. اول ظهور لكاميكاز كان من خلال بوست تخاريف كاميكازية ومكنتش متوقعة ابدا ان كاميكاز يعجبكم اوى كدة .. كاميكاز كلفظ اساسا كان بيطلق على القوات الإنتحراية فى الحرب العالمية ، أول مرة اسمع الأسم ده كنت فى عربية صحبتى ولما تلاقى مجموعة كدة بتعدى قدام العربية بشكل مفاجئ كأنهم عايزين ينتحروا كانت تقول عليهم كاميكاز ، فاكرة يومها قعدت اضحك جاااااااااااااامد ع الإسم وعجبنى جداااااااا ومن يوميها بقيت اطلق اللفظ ده على كل حاجة واى حاجة عجيبة او غريبة او مطرقعة
.
مر عليا زوار كتييير فى اللى لسة مواظب على القراية وفيه اللى اختفى فى دوامة الحياة وفى اللى بيفضل الصمت وعدم التعليق .. بجد تحت اى ظروف انا متشكرة ليكم جدا عشان استحملتوا الرغى والهرتلة دى كلها .. بفرح أوى لما الاقى حد متابع كل التدوينات تقريبا ومش بيفوت حاجة وفرحت واستغربت جدا لما لاقيت مدونة صديقتى جدا بتحب ردى ع التعليقات.. يعنى سابت البوست نفسه والمدونة باللى فيها وحبت الرد ع التعليقات هههههههههههه
.
فاكرة لما المدونة ابتدت تتشهر ولما عملت ضجة مبنى الجحيم ولما إذاعة حريتنا استضفاتنى .. فاكرة ساعتها قعدت اشرح واحكى لبابا بالظبط انا بعمل ايه فى المدونة دى .. يومها سرح شوية وبعدين قالي جملة لحد دلوقتى مش قادرة انساها .. سامحونى مش حقدر اقوهالكم بقا .. كمان فاكرة يوم ما اتنشرلى بوست بقايا انسان فى جرنال المصرى اليوم .. فاكرة اللمعة اللى كانت فى عينى يوميها ونظرة الإعجاب اللى كانت فى عين ماما وبابا .. فاكرة لما مسكت الجرنال وقعدت اقول لماما الخاطرة الصغيرة اللى اتنشرتلى .. بصتلى ساعتها وقالتلى: جميل .. مين اللى كاتب الكلام ده بقا؟؟ هههههههههههههههه
.
سبحانك يارب معقول مرت سنة كتبت فيهم 68 تدوينة؟ .. سنة بحالها قضيتها معاكوا هنا ضحكت معاكم كتير من قلبى وكبرت وحزنت وامتحنت وفرحت واتخرجت وقعدت عاطلة لحد ما هيست ، اتحرق قلبى واتكلمت واتجننت وحلمت واتفاجئت ، فضفضت معاكوا كتييييير واكتئبت وبكيت هنا كتييييييير .. كنت لما ابقى ببكى بحرقة جامدة افتح المدونة واكتب اللى جوايا وانشره يمكن استريح ، وكتير من كتر الهم مكنتش بقدر ادخل المدونة واقعد بالكام شهر كدة معرفهاش ، حليت تاجز اما طلع عينى وعين اللى جمبى ، والواد كاميكاز اظهر فيهم مواهبه بردو .. فرحت معاكوا فى مناسبتكم وحسيت بمشاعركم فى كل حرف بتكتبوه فى مدوناتكم ، وحزننا كلنا لما فقدنا اختنا شيكو اون لاين ومدام هدى رحمة الله عليهم يارب
.
بقيتوا ناس غالين عليا اوى ولازم اطمن عليكم من مدوناتكم حتى من غير ما اعلق ، وبحزن جدا لما يرجى لأى حد بعد الشر اى مكروه او حتى يسيب مدونته ويغيب
.
كنت ببقى فى قمة السعادة لما ادخل مدونة لأول مرة وابص ع العداد فى البروفايل الاقي رقم واحد واكيد الواحد ده انا فبكون اول واحدة اشوف المدونة .. بدخل وابارك وببقى فى قمة السعادة ، ولما حد عايز يدخل عالم التدوين واحاول اساعده فى البداية وبعدين الاقي المدونة بقيت مشهورة جدا ما شاء الله ساعتها فرحتى بتبقى لاى توصف بجد
.
عايزة اشكركم كلكم من قلبى بجد استحملتونى كتييييييييييير
.. جميل أوى لما تحس ان فى ناس مستعدة تسمعك من غير ملل واول ماتغيب يسألوا عليك ويدعولك من قلبهم بجد.. كل رأي او تشجيع او نقد كان بيفيدنى جامد جدا ياجماعة حتى لما بكون مخنوقة بلاقيكم بتدعولى .. كمان عايزة اشكر كل حد ساعدنى فى انى اخلى مدونة انسانة كدة .. بجد من سنة قبل مادخل عالم التدوين كان فى حاجات كتيرة جداااااا معرفهاش وبعد سنة لازم اعترف بفضل الناس دى عليا ربنا يكرمكم يارب
.
وعايزة كمان اعتذرلكم على البوستات الطويلة اللى كتير بضايق البعض .. بعتذرلكم ومعلش حاولوا تستحملونى ببقى عايزة افضفض ومبلاقيش حد افضفضله غير هنا ، كمان بتعذرلكم على لون الخفية الاسود ..معلش بقا كيفي كدة .. وبعتذر كمان على عدم الرد على التعليقات انا اسفة بجد .. وعذرى هو انى دايما مع بنت اختى وبكتب البوستات نفسها بطلوع الروح .. عايزة اعتذر كمان لانى حد ضايقته منى بأي شكل من الأشكال بالله عليك تسامحنى
.
مرت سنة وانا بينكم انتوا بس اللى بتقرولي ولسة ولا فرد من افراد اسرتى مهتم يقرالي .. بس مش مشكلة انا بحكيلهم ع اللى بكتبه واصدعهم بيه بردو ، فى الاخر عايزة اشكر إنسانة .. المدونة اللى سمعتنى واستحملتنى واديتنى كتييييييييييير أوى .. اللى لما اكون زهقانة افتح الأرشيف بتاعها واتفرج على نفسى على مدار الايام والشهور حسيت بايه وازاى حزنت وازاى ربنا فك كربى ورجعت فرحت من تانى ، مراية مش بس بتجيب شكلك لأ دى كمان بتجيب ملامح من عمرك ومن ايامك اللى بتعدى عليك .. إنسانة انتى يمكن ماتكونيش احسن مدونة ولا حاجة بس بحبك عشان انتى بتاعتى وبشوف فيكى نفسى .. الحمد لله
.
فى الختام عايزة اقولكم كل سنة وانتوا غاليين عليا اوى كدة وكل سنة وانتوا منورين إنسانة وقلت وحفضل اقول على طول مدونة إنسانة لو اعتبرنها مدونة كويسة تبقى كويسة وحلوة بزوارها .. بجد ربنا يجازيكم كل خير يارب
.
ملحوظة متكمكزة شوية : اى حد عنده اى نقد او اى اقتراح او اى حاجة عايز يقولها عن المدونة او اى حاجة فى التلاجة عايز ياكلها فى المدونة بردو اهلا وسهلا ويا مرحب يا مرحب وهيه هيه هههههه وكاميكاز فى هذه المناسبة الهامة جدا بيضرب طلقتين فى الهوا البلوجرى " طاخ طاخ " ، وسمعنى احلى سلام سيد الحبايب يا ضانايا انت .. تيرا را را .. وزغرطى ياللى اسمك انسانة لولولولولولولولىىىىىىىىىىى

Monday, December 24, 2007

بحلم ويحلالي


بحلم ويحلالي

احلم وانا مالي اللي حيحصل ايه


راضي انا بحالي

راضي وبعيش حالي منغير مافكر فيه

بحلم وحلمي عنيد

لكن نصيبي اكيد لازم حيوصلي


مدومت انا وياه

وفي قلبي نبض حياه اكيد يوصلني


اللهم إنى أسألك من فضلك

Tuesday, December 18, 2007

عيد جميل عليا وعليكوا


مكنتش مخططة اكتب بوست خالص ولا كنت مخططة افرح اوى كدة فى العيد .. عادى اهوه عيد زي اى عيد عدى ، بجد لما كبرت احساسي بالعيد ابتدى يقل جدا، لكن سبحانك ياكريم أردت ان اشعر بجمال العيد هذا العام واكون فرحانة وسعيدة بفضلك وكرمك
.
يارب كل سنة وامى وابويا بخير وحواليا وراضيين عنى وعن اخواتى اللهم امين
يارب اقسمت عليك بعزتك وجلالك ألا تقبض روحى وإلا وهم راضيين عنى تمام الرضا .. يارب ادخل الجنة برضاهم يارب آمين
يارب بارك فى سلسبيل بنت اختى واكرمها واجعلها من الصالحات واكرم اختى وزوجها واخى وكل من تحيط بهم شفقة قلبى .. ربنا آتنا فى الدنيا حسنة وفى الآخرة حسنة وقنا عذاب النار ... يارب أحج اللهم آمييييين
.
.
مش قادرة اكتب اكتر من كدة ببكى من كتر الفرحة ومن كتر كرم ربنا ع الناس كلها .. الحمد لله على نعمة الإسلام وكفى بها نعمة وكفى بها نعمة
.
.
كل سنة وانتوا بألف خير يارب
.
صحيح .. متنسوش العيدية ياجماعة كاميكاز بقا بياخد بالدورار على فكرة .. مش أى أى ولا زي زي ولا كل كاميكاز يتقاله يا كوكو بقا ... والعيد فرحة مااااااااء
.
وممنوع دخول أولاد ابو اسماعيل
.
تحديث: نزلت اول يوم العيد انا وبابا نزور جدى اللى ساكن فى شارع فيصل بردو .. الله ياجدعان البلد فاااااااااااااااااضية وجميييييييييلة وحلوووووووووة والمواصلات فاضيةةةةةةة .. ويادوبك كدة تشاور بصباع إيدك الصغير ده تلاقى الميكروباص وقفلك على طول ولو مكسل تشاور بس تقول انا عايز اركب ميكروباص ..وليه تقول انت بس فكر إنك عايز تركب ميكروباص حتلاقى السواق جايلك على طول وبيبتسملك عشان تركب كمان
اللــــــــــــه ... مش عارفة اقول ايه البلد كلها متكربسة فى العاصمة .. ملينا البلد بجد .. الحمد لله على كل حال ويارب الناس اللى جايا من محافظات اهاليها توحشها ويروحوا يزورهم كل شوية عشان البلد تفضى حبة ونعرف نعيش .. ولتانى مرة بكررها ..ممنوع دخول أولاد أبو اسماعيل .. وكلمة السر " العيدية فى النملية " ..!ه

Thursday, December 13, 2007

!!!!!!


والله لسة بدرى والله ياشهر الصيااام تي را رام .. إيه ده لأ دى بتاعة العيد اللى فات العيد ده بتاع اللحمة

العيد فرحة هيه هيه وفتة ولحمة هيه هيه ، اهلااااااا اهلا بالعيد مررررحب مرحب بالعيد هيه هيه هييييييييييه ، خروووفى خرووووفى يابو بدلة صوووفى ، العيد فرحة مااااااااااااااااااااااء – ايه العبط اللى بعمله ده – احم .. ماتخدوش فى بالكوا ، ندخل فى علامات التعجب دى ، بس صلوا ع النبى الاول .. عليه الصلاة والسلام

كنت خارجة النهاردة مع ماما – منا اصلى قاعدة فاضية بقا – وصلنا لشارع جانبى كدة فدخلنا لاقينا صوان عجيب شوية .. متعرفش إذا كان صوان ميتم ولا فرح .. طب وهما يعملوا فرح دلوقتى ليه ماهو العيد قرب اهوه يبقوا يعيدوا ويتجوزوا بالمرة!ه

ماما هو ده ميتم؟؟

لا يابنتى دى صناديق الحاجة الساقعة اهيه

طب ايه المشكلة يمكن بيشربوها فرحانين انه مات .. اكنهم بيشربوها ويقولوا يلا ياعم غار فى داهية كان قارفنا ههههههه

!!!!!

.

كملنا وروحنا عند العطار عشان نجيب صابون سائل للمواعين حاكم القديم كان غلس و .... ، احم ماتخدوش فى بالكم ، ماما سألت الراجل : هو فى ايه .. فرح ده ولا ايه؟

لا يا حاجة دول حد عندهم طالع يحج

حج !!!ه

يا حاجة دول جهلة بقالهم كام يوم زغاريط ودي جي ونانسى عجرم وقاعدين فى الصوان تحت بيضربوا نار وبيشيشوا

لا حول ولا قوة الا بالله

وفعلا لاقينا فى ضرب نار والمفرقعات اللى بتعمل اشكال فى الهوا دى والدي جي إشتغل واشتغلت الملحمة الشهيرة " فكهانى وبحب الفاكهة وبموت فى الموز والمنجة " وزغاريييييييط كان ناقصهم بجد يخطفوا رجليهم لشارع الهرم يجيبولهم رقاصة فى السريع كدة وتيجى ترقص بقا اهى تعملهم جو شوية ... وتبقى ليلة يا عمدة

.

واقعدوا بالعافية .. فى مصر!ه

Sunday, December 09, 2007

حبة خوف وحبة ضحك

يامما .. ايه الرعب ده ؟؟

معلش استحملوا مانتوا اللى قعدتوا تقولوا تعالي بسرعة ومش عارفة ايه فجيت .. زى القرش البراني تسيبه يجيلك تانى .. المهم ركزوا معايا كدة فى الكام كلمة اللى جاية اصدعكم بيهم دول عشان مهمين اوى

خرجت النهاردة انا واختى نجيب شوية حاجات وفى وسط اجواء من البرد والمد عشان البت فى البيت ممكن تعيط لو اتأخرنا عليها - البت دى تبقى بنت اختى سولي - مع العلم انها قاعدة مع ماما اساسا يعنى ان شاء الله مش حتعيط .. المهم خلصنا خلاص قوم ايه اختى تشبط فى بيبى جونسون الشامبو اللى من غير دموع ده للبت سولي قال ايه عشان العيد قرب !!

جبناه وجينا نمشى لاقينا راجل طويييييييييييل وعريييييييييييض وشكله موريب حبتين .. الراجل ده بقا بيعمل ايه ؟ بيقرب من كل عربية ويقف جمب المراية اللى ع الجمب ويخبطها بعنف لحد ما تتدشدش وتبقى ولا ليها لزمة .. عربيات يا جماعة ع الزيرو ، خدت بالى منه فى الاول وشهأت جامد من المشهد ده - الشهئة دى فعل بيطلع غالبا عند عمايل الملوخية - وحكيت لاختى .. المهم بقا واحنا ماشين اختى قالتلى تركبى ولا نمشيها .. قلتلها والله انتى مستعجلة عشان بنتك فنركب عادى .. قالتلى خلاص يبقى نمشيها !!!

جينا نمشى لاقينا صاحبنا إياه واقف بين عربيتين فى حتة ضلمة وانتوا عارفين نظرة المجنون بتبقى عاملة ازاى .. اختى سألتنى سؤال واحد ماتنتوش .. الراجل ده هو اللى كان بيكسر العربيات؟؟ بصيت عليه لاقيته بيبصى ما اخبيش عليكوا قلبوا وقع فى رجليا .. قلتلها اه وانا مرعوبة .. وعينكوا ماتشوف الا النوووووووور

اختى من النوع اللى بيترعب من المجانين جداااااااااااا يعنى لو شافت مجنون ممكن تعدى العربيات من غير ما تبص حتى وتعرض نفسها للخطر ولا انها تعدى جمب مجنون .. لاقيتهالكوا بتشدنى من ايدى وهوب عايزة تعدى .. فى نفس ذات اللحظة دى لمحتلكوا مواصلة فاضية وبتحمل .. قولتلها يلا نركب العربية وهى تشدنى من ايديى عشان اعدى الشارع بالعافية وانا صوتى رايح اصلا من اثار البرد فعاملة زى البطة المبحوحة اللى حد مزعلها وعمالة تزعق ومحدش فاهم منها حاجة !!!.. المهم عدينا ونجينا بأعجوبة من قدام عربية مرسيدس سريعة .. وفضلت تشد فيا وبقيت اخبط فى الناس اللى واقفة وواحدة كانت حتقع وحكاية .. فى الحين ده بردو ابتدى نشاط عم المجنون يزييييييييد وابتبدى يكسر فى عربيات تانية كتير لدرجة ان الشارع كله خد باله منه ومن عمايله

بس وعديت انا واختى وفضلت تمد جااااااااااااااااامد ومتوترة جدا وحالتها حال وانا عمالة اجرى عشان احصلها ومش عارفة اتكلم صوتى رايح
إهدى يابنتى شوية
قولي اي حاجة عشان تبعد الشر
تبعد الشر؟؟ !! .. إبعد يا شر
إقرى آية الكرسى بسرعة
قريتها ولاقيتها بتمد اكتر وبتسبقنى بكتييييييير
ايه يابنتى انتى سبتينى اقرا آية الكرسى وحتهربي وتسبينى ولا ايه
يالهوي ياياسمين لو كان عملنا حاجة
الحمد لله ربنا ستر
كنا ساعتها بقا نطلعله البيبى جونسون وندلقه فى وشه .. بس يا خسارة مكنش حيعمل فيه حاجة ده مش بيحرق العين !

المهم بعدنا عن مكان المجنون الحمد لله وبعدها عملنا اكبر جريمة ممكن يتصورها عقل .. وقبل ما نرتكب الجريمة دى بصينا لبعض شوية وغمزنا لبعض غمزة تنم عن نية لفعل شئ خطيييير للغاية .. روحنا عند الفرن - يعنى مع سبق الإصرار اهوه - واشترينا فطيييييييييييييييييييييير .. اكبر جريمة ممكن تتعمل فى الحقل الرجيمى فى التاريخ اصلا .. كانت الاول رافضة عشان الامانة بس .. بس انا قعدت اغريها فجيبنا واحدة كبيرة وبعدين اغريتنى هى فجيبنا واحدة صغيرة كمان واستعبطت انا فى الاخر وقلت للراجل هات اتنين صغيرين وواحدة كبيرة ياعم!

بس ومشينا ورحنا للسوبر ماركو والراجل قعد يشتكيلى من ان الشيبسى غلى وكله حيبقى بتلاتة جنيه مالين الكيس هوا ومعرفش ايه .. اييييه دونيا

وفى آخر المطاف كان الراجل بتاع الجرايد اللى دايما اغلس عليه واقعد اتفرج ع الدفيفيديهات عنده ولا بشترى ولا بنيل .. وعلى طول اسأله انا واختى على مسرحية عروسة تجنن .. بتاعة إسعاد يونس
اختى وقفت بعيد عشان هى عارفة اللى حيحصل .. بصيت ع المسرحيات اللى عنده وبصيتله كدة بكل ثقة : هى مسرحية عروسة تجنن لسة مجاتش؟
قالى : انهى دى ؟
قلتله :اللى إسعاد يونس كانت طالعة فيها هبلة!!!
سمعت ساعتها صوت اختى وهى بتكتم ضحكتها من المنظر
قالي : لا والله ده انا حتى سألت عليها فى الشركة مالقيتهاش
قلتله: ايوة ماهى شريطها ضايع من التلفزيون ذات نفسه تلاقيهم سجلوا عليه ماتش كورة ولا توم وجيرى ولا حاجة
قالى : لا ان شاء الله لو لاقيتها حبقى اجيبهالك
تجيبهالي ؟!! .. اه شكرا .. سلام عليكم

وانتهى الموقف واختى حتموت من الضحك .. قلتلها اسكتى ده بيقول حيبقى يجيبهالي .. يالهوى لوعملت زى النكتة بتاعة ايس كريم بالكوسة

استنوا اما احكيهالكوا منا قاعدة فاضية بقا ... مرة واحد كان فى سوبر ماركت تحتيه كل شوية وهو نازل يسأل الراجل : عندك ايس كريم بالكوسة ؟
ايه .. لا مش عندى
ازاى معندكش انا عايز ايس كريم بالكوسة
وهو طالع نفس الكلام
عندك ايس كريم بالكوسة ؟؟؟
لا يابنى والله ماعندى
لا حول ولا قوة الا بالله .. ازاى ده مشهور جدا انا عايز منه
كل يوم لمدة شهر كل شوية يسأل فى الراجل ع الايس كريم بالكوسة .. الراجل قال مابدهاش بقا انا اروح الشركة واللى يحصل يحصل .. راح الشركة وقالهم ان فى طلب كبير جدا على النوع ده ومعرفش ايه وفعلا الشركة اقتنعت وانتجت منه
الواد عدى تانى ع البياع وسأله : عندك ايس كريم بالكوسة؟؟
قاله: اه
قاله: يع!!!

الحق اجرى انا بقا قبل مااتحدف بالطوب عشان النكتة الحمضانة دى والبوست العجيب اللى مش باينله ملامح ده

ملحوظة كاميكازية اخيرة قبل حدف الطوب معلش: كل الأحداث المتكمكزة السابق ذكرها حدثت فى اغلس شوارع مصر، شارع فيصل .. توب علينا يااااااااااارب

واقعدوا بالعافية .. فى مصر !ا

Tuesday, December 04, 2007

كل شي بيخلص


نبقى سوا وصوتك بالليل



تقلي وانا عم اسمع



بحبك حتى نجوم الليل



نجمة ونجمة توقع



وخلص الحب وسكتت الكلمة



وتسكر القلب ما وقع ولا نجمة



ما تاري الكلام بيضلو كلام



وكل شئ بيخلص حتى الاحلام



والايام



بتمحي



ايام
.
_________
الله معك - فيروز
***
فترة غياب لا اعلم مداها
ولكن ما اعلمه جيدا هو اننى افتقدكم بشدة
دعواتكم بالله عليكم