Friday, November 07, 2008

شنطة حمزة

ممكن جدا تكون ماشى فى الشارع وشايف واحدة ع الرصيف التانى ماسكة شنطتها

ومدخلة راسها جواها وعمالة تحاول تتطلع حاجة معينة ومش عارفة

وطبيعى جدا بردو تكون فى اى محل وتلاقى بنت فاتحة شنطتها

وبتحاول تطلع لصاحب المحل اى حاجة وبردو مش عارفة

ويترسم على وشها كل علامات الدهشة والإستغراب

اللى تخليك على طول تفتكر جملة عبلة كامل الشهيرة فى مسرحية وجهة نظر

( كانت معايا ! .. كانت معايا فى الشنطة .. ثم تنخرط فى بكاء عميق ليسارع بالرد محمد صبحى مسائلاً:

هيا شنطة عربية ولا ايه؟؟؟)ه

مش عارفة كل البنات شنطهم زى شنطتى ولا لأ

بس ده حالى عموما

وحالى مع شنطتى حبيبتى الملقبة دائما وفى كل المحافل بشنطة حمزة

شنطة حمزة موجود فيها كل شئ

كلللللل شئ

مناديل

أقلام

أوراق

صور

مقلمة

محفظة

أدوات مكياج

كتب

مصحف

كتاب أذكار

دبابيس

أزايز مياه

كوباية

سبح

( يعنى اكتر من سبحة عشان لو ماعرفتش اوصل لواحدة آخد اللى قدامى على طول )ه

ريدار

فلاشة

إم بى فور

سبراي وبرفان

كاميرا ديجيتال

موبايل

مفاتيح

شيكولاتات وبومبونى

لبان

بسكويت

مصاصة

تفاح

زبادى

جزر

خيار

شاحن الموبايل

شاحن الكاميرا

شاحن الإم بى فور

شراب

جوانتى

اكسسوارات

المفكرة بتاعتى

مبرد

قصافة

مقص

مشط

توك شعر

فرشة سنان

معجون السنان

صابونة

فوطة

أدوية

مراهم

الساعة

كروت

ضمان الموبايل

سماعات

وما خفى كان أعظم

وربنا أمر بالستر!!ا


ده طبعا غير الزبالة اللى المفروض تترمى بس مش بلاقى باسكت قدامى

فبقوم حطاها فى الشنطة بدل ما اوسخ مصر اكتر ماهى متوسخة

شوفتوا الطيبة؟؟؟؟؟؟؟؟؟؟؟؟

كتير احس انها سلة زبالة ومتنكرة فى شكل شنطة

وزيادة فى التنكر بنطلق عليها إسم حمزة

لزوم التمويه يعني

طبيعى جدا ان شنطة حمزة تكون تقيلة جدا

ولو اديتها لحد يشلهالى يصوت

ولو حد ماشى معايا وحاول يرصد تصرفاتى مع الشنطة يركبه الإسبهلااااال

وطبيعى اوى بردو اكون فى موقف محتاجة فلوس وادور واقلب الشنطة

وملاقيش حاجة واول مااروح البيت وابص فى النور الاقى الفلوس ع الوش !ه

وطبيعى اقلب الدنيا ع البطاقة ومالقيهاش غير فين وفين

وطبيعى يبقى اسمها شنطة حمزة ... مش كدة؟؟؟

حاولوا كتير معايا يعرفوا سبب الكراكيب دى كلها اللى جوا الشنطة

بجد مش عارفة سبب واضح

وليه اصلا ممكن واحد يمشى من غير شنطة اساسا

والبنت يجرالها حاجة لو نزلت من غير شنطتها

والله ماعرف بردو

يمكن لان احتياجاتنا كتير؟؟؟

ممكن

بس اللى اعرفه انى مقدرش انزل من غير حاجة واحدة من الحاجات دى

ولو حصل ابقى حاسة ان فى حاجة نقصانى وانى ححتاجها

وفعلا سبحان الله بحتاجها فى اليوم اللى نسيتها فيها

بس بردو .. ماتستغربوش لو لاقتونى ماشية فى الشارع بالموبايل بس

خصوصا لو نازلة اعمل شوبينج

يعنى حشترى

يعنى حشيل تقيل

والشنطة لوحدها تقلة .. تيجى كام كيلو كدة

يبقى حشيل الحاجات ولا اشيل الشنطة؟؟؟

لدرجة انى مرة كنت مع ماما واشترينا كتير وبقت ياعينى مش قادرة تشيل

ولا انا كمان من تقل الشنطة

قمت مدياها شنطتى بس تشيلها وشلت انا الباقى عشان اعرف اكمل المشوار

ورجعنا هلكانين ومن يومها بقيت اتسوق بالموبايل بس

وطبعا حبيبة قلبى ماستغناش عنها

شنطة حمزة

شنطة كل الاوقات

وكل المشاوير

وكل المسافات

وكل السفريات

بس بجد ياجماعة

سؤال زهقنى من كتر ما سألته ومافيش رد

مين حمزة ده اللى انا شايلة شنطته ؟؟؟؟؟؟؟؟؟؟؟؟

Monday, October 27, 2008

يرضيك يالالالي؟


دول عايرونى وقالولى


يا اسمر اللون يالالالي


صحيح انا أسمر وكل البيض يحبونى يالالالي


ياعود قرنفل ما بين الفل حطونى يالالالي
ه
ه
ياعينى يالالالي
ه
ه
ياروحى يالالالي
ه
ه
ياسيدى يالالالي
ه
ه
------
يالالالي - محمد منير

Tuesday, October 21, 2008

ليلى الغضبانة


ايوة ليلى إنسانة

ايوة انسان اتولد بس لاقى نفسه ليلى

يعنى انتوا الاتنين إنسان

بس من نوع مختلف

*****


فكرة كلنا ليلى شدتنى اول ما دخلت عالم المدونات

وكان نفسى اكون معاهم فى الطلعات الجوية بتاعتهم

بس الحمد لله اخيرا جاتلى الفرصة انى اشارك

واسفة انى اتأخرت فى المشاركة

*****


مبدأيا .. ايوة انا ليلى

يعنى انثى

وبعيش فى مجتمع اخلاقه بدأت فى الإختفاء

إن ماكنتش اختفت واتاوت تحت التراب من زمان

اللبس بقا غريب وعجيب ومش طبيعى ابدا

يعنى يا بنت يا امورة يا عسولة ياللى لابسة اه

ومش لابسة اصلا

عايزة ايه ؟

نفسى اعرف انتى عايزة ايه بالظبط بلبسك المستفز ده

اه لو تعرفى بيتقال عليكى ايه

انا اهو بنت زيي زييك وعندى اخويا

وعارفة هو وكل اللى زيه شايفينك ازاى

وبيقولوا عليكى ايه

ايه لزمة الطرحة فوق شعرك وانتى جسمك كله باين اصلا

وليه يا ليلى يا محترمة يا اللى لابسة عباية حشمة جدا

تسيبى بنتك تمشى بالشكل ده

عايزة ايه انتى كمان؟

خلاص بقيتى مش عايزة تدخلى الجنة؟؟

بقا كل همك ان بنتك تبقى حلوة وامورة ومايفوتهاش قطر الجواز وخلاص؟؟

لا حول ولا قوة الا بالله

ويا بنوتة يا بتاعة الثانوى

ايه اللى بتلبسيه ده

عايزة ايه فى سنك ده

متخيلة ان الشاب الامور ده حيتجوزك؟؟

ولا ممكن يرتبط اصلا؟

بتحلمى

يا حبيبتى انا عارفة ان عندك مشاعر واحاسيس وحاسة بيكى

بس لسة بدرى

حافظى على نفسك عشان ربنا يكرمك باللى يحبك ويحافظ عليكى

يا حبيبة قلبى الاكل المكشوف الدبان كله بيحوم حواليه بجد

ليه تلعبى بمشاعرك واحاسيسك ونرجع فى الاخر نقول ياريت اللى جرى ما كان

وانتى اللى بتتعبى فى الاخر

على الاقل بتتوجعى وتتكسرى

وانتى غالية اوى عند ربنا ومش عايزك تتوجعى

سيبى كل اللى جواكى ده لحد ما يجى اوانه

عمرك شوفتى زرع مقطوف قبل اوانه طعمه حلو؟؟

بالعكس ده بيبقى اخضر وطعمه مر اوى اوى

بس لما بيجى اوانه ويستوى بيبقى عسل

وانا عايزاكى تبقى احلى كمان من العسل يا ليلى

*****

ايوة انا ليلى وبحقد على كل الرجال

ايوة من وانا صغيرة وانا بحقد عليهم جدا وبغبطهم بشكل مش طبيعى

وليه لأ يعنى

واحد واخد حريته

يروح ويجى زى ماهو عايز

يخرج وقت ماهو عايز

يسافر وقت ماهو عايز

يصاحب اللى يعجبه

يكلم اللى يعجبه

يلبس اللى يعجبه

ويا بختهم بجد بجد بجد

عشان مش بيتعاكسوا لما يمشوا فى الشارع

ولا لما يبقوا لابسين طقم شيك

او بيضحكوا

او بيبتسموا حتى

يا بخت كل راجل لانه ممكن لو جاتله الهفة

يجرى على شط البحر فارد درعاته تحت المطر

زى الطير الشارد

ومش خايف حد يتفرج عليه

ولا حد يبصله بصة وحشة او نواياها سيئة

ايوة انا بحقد على الرجالة كلهم

يا بختكم يا رجالة لانكم رجالة مش مصدر فتنة

غير ملفتين للنظر بأى حال من الأحوال

عمر حد فيكم شاف راجل ماشى من جمب قهوة

او جمب اى محل واقف على بابه اى حد تانى وقاله

بس بس

يا حلو انت ياحلو

يا عسسسسسسل

ايه الجمال ده

ايه الحلاوة دى

يا سسسسكككككككررررر

حصلت؟

ابدا

يبقى ليا حق احسدهم على حريتهم ولا لأ؟

ايوة انا عمرى ما كنت حرة

ولا عمرى حسيت بالحرية

اول ما اخرج من باب بيتنا بحس انى مسجونة بنظرات كل الناس

خصوصا الرجال

ورغم ان لبسى محتشم

ورغم انى محجبة الحمد لله من زمان

ورغم ان جمالى عادى جدا جدا جدا جدا جدا

الحمد لله على كل حال

ورغم انى ممكن ابقى ماشية بسبح

او مكشرة وباين عليا الارهاق

فى اى حال كنتى يا ليلى حتتعاكسى يعنى حتتعاكسى

ومش عايزة حد يقولى اصل فى صعوبة فى الزواج

والمشاكل الاقتصادية وبتاع

اتقوا الله بجد

لما يبقى واحد متجوز ومخلف وبيتحرش

لما يبقى واحد عجوز وبيعاكس

دول بردو عندهم مشاكل فى الزواج؟؟؟

ولا هيا حيوانية وبهيمية وخلاص

وليه ما نفرقش بين الناس

ليه اى حاجة مؤنثة تتعاكس

اوقات احس انهم لو جابولهم معزة حيعاكسوها ويتحرشوا بيها

انا معاكم ان فى بنات بتزودها كتييييييييير اوى

واللبس بقا زبالة بجد

عارفة وشايفة والله

بس بردو مع ذلك فى بنات منقبات

ومخمرات ولابسين اسدال وعبايات وواسع

نفسى اعرف واحدة زى دى تتعاكس لييييييييييه

ليه بجد؟

لما هيا احترمت حالتك الاقتصادية

ومارضيتش تفتنك

واتقت الله فيك

ليه انت كمان ما تتقيش الله فيها؟

وتعاملها زى ما بتحب الناس تعامل اختك؟

وعلى كل حال

اى حد بيعاكس يتأكد ان اخته هيا كمان حتتعاكس

وان ماكنش له اخوات حتبقى مراته

او بنته

او اى حد عزيز عليه

يا جماعة انا واحدة بجد قربت اكره الرجالة والله

بس لولا انه حرام مش بعمل كدة

ويمكن انتوا لمستوا بنفسكم احساسى من خلال موضوع

فوبيا الزواج اللى كتبته السنة اللى فاتت

ايوة انا اختكوا واتأذيت بسببكوا

وطبعا مش بعمم

بس اتأذيت فى حياتى وبقيت مش عارفة حتى ارتبط بحد

لانى بقيت اخاف من الكل

عاطل على باطل

بخاف وخلاص

لا مش خوف ده رعب وبجد

الحمد لله على كل حال

يا معشر الرجال

خليكوا كويسين عشان ربنا يكرمكم بالله عليكم

واتقوا الله فى النساء

اللى حتقفوا قدامه يوم القيامة

ويحاسبكم على كل بنت عاكستوها

او اتحرشتوا بيها

هى دى وصية سيدنا محمد ليكوا؟؟

اتقوا الله فى النساء؟

اخى الكريم بالله عليك اتقى الله فى اختك

وفى بنتك

وفى امك

وفى زوجتك

كفى المرء إثماً أن يضيع من يعول

ويا معشر الليلالت

اى النساء

اتقوا الله بجد

فى لبسكم

ومشيتكم

وصوتكم

وطريقتكم

واسلوبكم

انا واحدة زيي زيكم وكان نفسى ابقى حرة

بس مش عارفة

مش عشان ماينفعش

بالعكس .. ما اكثر المتحررات

عشان انا اللى حاطة القيود دى لنفسى

وربنا اللى حيعوضنى عن الحرية الممكنة اللى سبتها من اجله

ويمكن مع شدة قيودى الدينية والاخلاقية

وجدت قمة حريتى بجد

Sunday, October 19, 2008

أواخر الصيفية

مرق الصيف بمواعيده


والهوا لملم عناقيده


وماعرفنا خبر


عنك ياقمر


ولا حدا لوحلنا بإيده

_________
بعدك على بالى - فيروز

Tuesday, October 14, 2008

إستقلت


عمرى ماكنت اتخيل انى اكتب خبر زى ده عنى من اول ما فتحت المدونة
ه
كنت متخيلة ان ممكن يجيلي يوم واقولكم اتخرجت او اشتغلت او اتخطبت او اتجوزت او خلفت او حجيت
ه
او حتى حد من المقربين ليا يدخل يقولكوا انى متت عشان تدعولى او لو حد زعلان منى يسامحنى
ه
لكن خبر استقالتى ده اللى عمره ما جه على بالى ابدا
ه
ايوة انا استقالت النهاردة من الشغل
ه
مش حقول بقا الخطوة دى واخداها عن اقتناع او مجبرة عليها
ه
بالعكس
ه
الخطوة دى حاسة انى باخدها وانا مغيبة عن الوعى
ه
او متخدرة
ه
احساس زى مابتكون نايم وشايف نفسك بتتكلم مع ناس وبتروح فى اماكن كتير وبرده مش عارف تغير حاجة
ه
أكنك بتتفرج على نفسك جوا فيلم ومش عارف تتدخل وتغير اى شئ من الاحداث

ورغم عدم قدرتى على التدخل إلا انى فرحانة ومبسوطة انى باخد الخطوة دى دلوقتى

يمكن عشان خلاص زهقت من الاسلوب والوضع والطريقة والسيستم بتاع الشغل

ويمكن عشان حاجات كتير وحسابات كتير اوى فى دماغى

يمكن عشان كدة بضحك ومش هاممنى رغم ان كل اللى فى الشغل زعلانين ومضايقين من القرار ده

رغم ان صاحبة الشغل نفسها استمر ومامشيش

واتبعت تقريبا كل الإغرائات المادية والنفسية على امل انى اكمل

بس خلاص

وصلت لمرحلة زهق فظيعة

وعملت استخارات كتير وخلاص مش قادرة

برغم تعلقهم بيا وتعلقى بيهم

وفى فترة قصيرة جدا بقينا اكتر من الاخوات

نجوى ورحاب وريهام

ومعاذ الشهير بميزو

وفرج الله اللى كان حزين كأن مايتله مايت وهو بيقولى انه قال للدكتورة انى ماشية

والاستاذ سامح اللى كان خلاص حيعيط

وفاروق الشهير بالباز افندى

ومدام عزة الشهيرة بزووزة

ومدام وجدان ام على

ووائل الشهير بالأستاذ معرفش حاجة

وعبد العظيم اللى نحس بورصة مصر وتوغل النحس لحد ما وصل بورصة امريكا ههههههههههههههه

وعبد الله

وحسين

التلاتة اللى عمرى ما صدقت ولو للحظة انهم فعلا دكاترة هههههههههه

ووائل بتاع البوفيه

حتى الألقاب اللى اشتهرت بيها

اللقب الرسمى قشطة و فريسكا ومؤخراً سوكا

الحمد لله تجربة ربنا قدر انها تحصل من خمس شهور

رغم قصر مدتها الا انى ماشية وانا مستفيدة كتير الحمد لله واتعلمت حاجات كتير اوى

يمكن التدوينة مش حتكفى عشان احكيلكم على اللى اتعلمته وشوفته

كفاية الخبرة بطباع البشر

اهم حاجة واحلى حاجة كمان انى ماشية والحمد لله سايبة ذكرى حلوة

والكل بيدعيلي ومش شايل منى ولا فرحان انى ماشية زى ما حصل مع ناس قبلى

ومش على لسانهم غير: حتوحشينا ياياسمين ، حنفتقدك بجد ، هنهون عليكى؟ ،

الحمد لله رب العالمين .. حب الناس نعمة

يارب ارزقنا حسن الخاتمة

واغفرلى لو كنت قصرت فى شغلى

وعوضنى خير يارب وصبرنى اللهم امين

الحمد لله على كل حال

قدر الله وما شاء فعل

لعله خير

اللهم أجرنى فى مصيبتى واخلف لي خيراً منها يارب اللهم امين

ولا تنسونى من صالح دعائكم يا جماعة بالله عليكم

Monday, October 13, 2008

يارب انت المستعان

وكأن كل ده بيحصل والقدر بيرتبه عشان أثبت على موقفى اكتر سواء بالرفض لشئ او بالموافقة على شئ آخر
ه
يمكن كل ده بجد ربنا رتبه عشان اعرف اعيش بعد كدة ومافيش حاجة تضايقنى من ناحية الموضوع ده
ه
يمكن كل اللى حصل من اول ما اتخرجت كان عشان كدة
ه
وعشان اصبر واقول يارب
ه
وعشان امشى فى الطريق اللى ربنا اخترهولى
ه
وكأن كل شئ حصل من الاول خالص كان اكنى ماشية وقدامى طريقين ونفسى فى طريق منهم اوى اوى اوى
ه
وبعدين ألاقى الكل واقفلى ويقولى بلاش .. خدى الطريق التانى احسنلك
ه
كل شئ قالى كدة .. وكل حد .. حتى الظروف والملابسات
ه
حتى التفاصيل البسيطة اوى
ه
حتى الاحلام او المنامات اللى بشوفها
ه
او حد يشوفهالى
ه
حتى احلام ماما عنى
ه
حتى سطور كل كتاب بقراه
ه
حتى آيات القرآن
ه
حتى صوتى المخنوق فى التليفون
ه
حتى افكارى قبل ما انام
ه
حتى اللى بشوفه حواليا
ه
حتى الخنقة اللى انا فيها دلوقتى والقهرة اللى جوايا
ه
كأن كل ده حصل عشان اعرف ان كل شئ بأمر ربنا بس مش عشان اسباب الدنيا خالص
ه
لان ربنا اللى خلق الناس والدنيا وكل شئ
ه
وربنا قادر على كل شئ
ه
يارب .. انت العالم بحالى وغنى عن سؤالى
ه
يارب انت عالم باللى حيكون
ه
يارب صبرنى وعوضنى خير يارب
ه
يارب انت بس اللى عالم بالخوف اللى جوايا والقلق
ه
والرهبة الشديدة
ه
والرعب
ه
والدموع اللى جوايا ونفسها تطلع دلوقتى على هيئة صرخات مدوية
ه
يارب انا عارفة ان اللى انا فيه دلوقتى ده إبتلاء كبير
ه
يارب انجح فى الإبتلاء ده وتبقى راضى عنى
ه
وابقى اختارت سكتك وطريقك وقدرك
ه
يارب ده اللى يهمنى يارب
ه
يارب ياقادر على كل شئ نجحنى فى إبتلائك يارب
ه
يارب
ه
يارب افرغ عليا صبرا واهدينى لسبل الرشاد
ه
وطمن قلبى واهديه للى فيه الخير
ه
يارب أعينى وقوينى على اللى جاى يارب
ه
اللهم انت فى نحورهم وابعد عنى شرورهم وافوض امرى إليك
ه
يارب إهدى عليا الناس اللى بشتغل معاهم وصبرنى عليهم
ه
يارب اللهم آمين

Sunday, October 12, 2008

Epitaph lost her blog!!!

We are a group of Egyptian bloggers really bothered by the blockage of the two-year-old blog "Epitaph_87" ( http://www.epitaph-87.blogspot.com/) along her gmail account (epitaph87@gmail.com), since October, 4th , 2008. She has sent you her problem and requests on Google Help Center and Blogger Support, but in vain. We wish that you'd help us retrieve that blog and account and answer the requests of our fellow blogress, sending you from (epitaph_1987@hotmail.com), and hopefully ASAP!Just for notice, we have published this problem on our blogs!!

Thank you!

Friday, October 03, 2008

عودة للحياة

مع الوقت معظم وسائل التسلية اصبحت مملة ولا معنى لها

فلا متعة فى النت الخنيق

ولا وقت مع الصديقات المشغولات

ولا بهجة فى مسلسل او مسرحية فى السهرة

ولا لهفة لخروجة وسط هذا الزحام والصخب

ولا فرحة فى الذهاب الى العمل

ولا ألفة مع بشر تملأ اعينهم الهم

او مكتوب فوق جبينهم بخط لا احد يراه غيرى

" عفواً .. لدي ما هو اهم منك لأعطيه وقتى " ه

حينها فقط اشعر ان القاهرة المزدحمة الصاخبة اصبحت فارغة تماما

إلا مني

لأبقى شاردة وحيدة حزينة

حينها فقط اشعر بحنينى لأصدقائى الحقيقيين

واحباء عمرى وحياتى

الكتب

فأعود لأقرأ

وأقرأ

وأقرأ

حتى ينتهى اليوم

ويمل الورق منى

وتتمنى الكلمات على استحياء ان اتوقف عن النظر إليها بهذا الإعجاب

والحب

والعشق

والشغف

وتتمنى الصفحات ان اتركها لتستريح من إرهاق يوم طويل

واطويها لتنام بداخلها السطورهانئة مستأنسة ببعضها البعض

فلا استجيب لأمنياتهم حتى يغالبنى النعاس

فأغرق فى بحور الخيال العميقة

واذهب بروحى لأماكن بعيدة

واستأنس بمن يصعب الإستئناس بهم فى الحقيقة

حينها فقط اشعر بالحياة رغم هذا الموت المؤقت

ويزداد داخلى العرفان والإمتنان

والرغبة فى الدعاء لمن علمنى كيف تكون القراءة

Tuesday, September 30, 2008

فى قلب العيد


فى قلب العيد

قلبى وحشاه سوكا ونفسه يلعب معاها

يا ترى يا سوكا يا حبيبتى مين حيلاعبك هناك؟

حد حيفتح باب الشقة ويعمل سباق معاكى فى الطرقة زى ما كنت بعمل؟

حد حياخدك ويحطك فى الأرض ويفضل يزغزغ فيكى ويضحكك زيي؟

حد حيرقص ويصقف معاكى زيي؟

حد حتجرى عليه وتقوليله (أوبا)عشان يشيلك؟

حتنبسطى ولا حتبقى خايفة منهم زى ما بتخافى من اى حد غريب؟

يارب يهنيكى ويجيبك لينا ولخالتوا ياسمين بالسلامة يارب

فى قلب العيد

حاسة انى لوحدى

نفسى اجيب بلالين زى كل عيد

بس العب بيها مع مين؟

نفسى ايام العيد تجرى بسرعة عشان الاجازة تخلص وابطل احس بالوحدة دى بقا

عارفة انى كئيبة ورخمة وتلاقيكوا بتقولوا مش داخلين المدونة دى تانى

طب خلاص مش تزعلوا

الواد كوكو حيعملكم أراجوز وياخد العديات من على الباب اهو

عيل بقا حنعمل ايه

صحيح قبل ما امشى

مش معنى انى مضايقة عشان بنت اختى مسافرة ووحشانى وحاسة انى لوحدى وكدة

انكوا تستغلوا الفرصة وتالكوا عليا العيدية انا والواد كاميكاز

لا يا جماعة

كان غيركم اشطر

حاخد العيدية زى كل مرة

ومش حتنازل عن حقى الكاميكازى ده ابدا

وبناخد العيدية نقداً او بشيكات

المهم ناخدها وخلاص

ايوة ماهو يبقاش انتوا وسواقين الميكروباص علينا كمان

كله هاتى هاتى مافيش مرة خدى؟

المهم من غير تقطيم انا عارفة انكوا كويسين وحتدفعوا العيدية بالزوق

انا ضد العنف

ومش بحب اتعامل بيه خالص

واد يا كوكو .. اللى يمشى من غير ما يحط عيدية فى صندوق الكاماكيز كتفه وحطله كمامة

لو شاورلك عشان يديك العيدية سيبه وفكه ومشيه

لو استعبط فيها وفضل عامل فيها مش واخد باله وكدة

طلع العصاية

وانت عارف حتعمل ايه بقا

بس ياريت من غير صوت عشان انت عارفنى

مش بحب العنف خاااالص

يلا كل سنة وانتوا طيبين يا حلوين

Saturday, September 27, 2008

سلامتك يا بلادى

ايه اللى نابك يا مصر؟

يكونش عليكى ندر ولا حاجة ؟!!!ه


Thursday, September 25, 2008

مناوشات مصيرية

أحاول التصدى لكافة الضغوطات والإغراءات والأساليب للعدول عن
ه
الحــلال

ه
ه
يارب أنت المستعان

Monday, September 15, 2008

لما اموت


مش عارفة ابدأ ازاى ولا اقول ايه

بس لازم اتكلم قبل ما يجرالى حاجة

عارف احساس لما الناس القريبة منك تبقى مش طايقاك

وبيتصيدولك الأخطاء عشان ياخدوها عليك

ومافيش مانع من شوية زعيق

على شوية اهانة

على شوية ظلم

على تصدير احساس بإنعدام اهميتك فى الدنيا كلها

مش عندهم بس

انا بجد تعبت يا جماعة

ونفسى اريحهم بردو ونفسى انا كمان ارتاح

ساعات بسرح وافكر

ياترى حيكون ايه رد فعلهم لما يجيلهم كارت شيك كدة لونها بمبى

وعليه فيونكة مفرحة

كأنه دعوة فرح رقيقة جدا

ومكتوب جواه

افرحوا

هايصوا

البت اللى مضيقاكوا كلكوا راحت خلاص

ومكتوب فى النص

بخط كبير ولون مختلف

ياسمين ماتت

حينبسطوا ... مش كدة؟؟

مش عارفة ليه حاسة انهم حينبسطوا اوى

الحمد لله على كل حال

واسفة على الازعاج

ربنا افرغ علينا صبرا

اللهم آمين

Wednesday, September 10, 2008

سبحانك ربى سبحانك















ملحوظة: توفت ميريام فى 3 رمضان وتم تسجيل الحلقة قبل وفاتها

Sunday, August 31, 2008

رمضان كريم


الدنيا دى غريبة اوى .. عاملة زى امواج البحر بالظبط .. ما بين ثانية والتانية ممكن بجد تبقى فى حال غير الحال خالص .. بتعجب وبستغرب عن وضعى السنة دى فى رمضان والسنة اللى فاتت .. سبحان الله بجد والحمد لله على كل حال

السنة دى بطلب دعواتكم بجد .. وبالله عليكم تدعوا لأختى ربنا يشفيها ويعجل بشفاها يارب اللهم امين

يارب اعيش لحد ما رمضان يجى بكرة يارب

كل سنة وانتوا بألف خير وقبل ما امشى عايزة ازف ليكوا بشرة سارة جدا جدا جدا جدا جدااااااااااا



بسم الله الرحمن الرحيم

قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ

Wednesday, August 27, 2008

دور برد

صحيت اول امبارح حسيت بإحتقان فى الزور جامد .. وده غالبا ودائما بيكون مؤشر انى خدت دور برد، اليوم عدى عادى جدا فى الشغل وماكنتش تعبانة .. ابتدى التعب يبان عليا وتكسير الجسم والرشح ورجليا اللى مش شايلينى بالليل

زى كل يوم بنام جمب ماما عادى .. اليوم ده معرفتش .. لان ماما لازم تنام ومروحة السقف شغالة مما يؤدى الى عطس وتعب زيادة وانا مش قادرة ، ماما حست ان انا تعبانة وخافت لأعديها .. قولتلها الأمومية فى الزمخشرى بتقول انه فى مثل هذه الحالات الأم بتحضن طفلها وتطبطب عليه وتبوسه .. قعدت تضحك واديتنى برامول ودورت على فلوموكس مالقتهوش وحاولت تدينى مضاد حيوى غيره بس انا مرضتش .. وقالتلى قومى نامى فى أوضتك ، وقد كان .. ودى يا سادة يا كرام تبقى طردة رقم واحد

قمت نمت فى اوضتى وعلى سريرى وفين وفين لما النوم جه من التعب .. لاقيت اللى بيصحينى الساعة 2 بالليل ويقولى ماتناميش هنا !!!! .... مين؟ فين؟ ايه؟ ليه؟ .. طلع اخويا اللى بيصحينى وبيقولى ماتناميش هنا عشان حشغل المروحة وحشرب سجاير وحفتح الكمبيوتر !!!ه

قولتله حاضر .. ودى تبقى الطردة التانية .. قمت ادور على حتة تانية انام فيها وانا مش قادرة اقف اصلا لاقيت كنبة الصالون جمب باب الخروج ، المشكلة ان ماكانش عليها مخدة اسند راسى عليها .. المهم نمت وحسيت ببرد شديد اتارى المروحة بتاعة الصالة مفتوحة وعمالة اتأوه بالليل وبابا بيفتح الباب وداخل بعد ما صلى الفجر .. سألنى مالك يابنتى .. قولتله تعبانة شوية يا بابا

خلص اليوم ابو ليلة غريبة .. وبسبب طبع غريب فيا اسمه الالتزام رحت الشغل وانا تعبانة .. ماما اطمنت عليا الصبح وقالتلى اشترى فلوموكس وانا رايحة الشغل .. وقد كان بردو

رحت الشغل وكان باين عليا جدا التعب الشديد .. لا قادرة اتكلم ولا قادرة امشى وتعبانة اوى .. بس كل ده مامنعهومش انهم يتقلوا عليا فى الشغل .. لولا بس زميلتى عملت الجداول اللى طالبينها بدالى كنت طلعت روحى قدام الجهاز

روحت وانا بجرجر فى رجلى اتغديت وريحت شوية وتقريبا غفلت وصحيت لاقيت ماما خرجت وشوية وبابا كمان خرج ومابقاش فى حد فى البيت خالص غيرى .. حاسة انى سخنة اوى بس مش عارفة اعمل ايه .. كل اللى اعرفه انى استنى العشا تأدن وبعدين اخد فلوموكس وبرامول وانام .. سمعت المغرب وقمت من السرير بتأوهات شديدة وتحاملت على نفسى لحد ماوصلت للحمام واتوضيت وصليت وعملت كوباتين واحد لمون سخن والتانى جنزبيل بشاي اخضر وعسل نحل .. شربتهم وصليت العشا وخدت فلوموكس وبرامول ونمت

شئ طبيعى جدا وتفاصيل طبيعية ومنطقية ليوم واحد عيان وعنده برد الصيف اللى بيصفوه بإنه احد من السيف .. الشعور الغريب اللى جالى هو الغربة .. ايوة الغربة .. حسيت انى غريبة وان محدش يعرفنى خالص .. حسيت ان اللى حواليا ناس يمكن لأول مرة تشوفنى مع انهم اهلى وزمايلى .. يمكن مش غربة اوى بس حسيت بشعور غريب جدا والله .. خصوصا لما قعدت من الساعة 6 لـ 9 بعانى من الألم وقاعدة لوحدى مستنية العشاء .. حسيت بكل ثانية وكل لحظة فى التلات ساعات دول كأنهم تلات سنين مش تلات ساعات بس .. حسيت قد ايه البنى آدم ده ضعيف اوى .. قد ايه غلبان ووحيد مهما كترت الناس حواليه .. حيعملوله ايه الناس .. حيشفوه؟ .. لا .. الشافى هو الله

فى التلات ساعات دول حسيت انى ماليش حد بجد او جالى الإحساس ده عشان احس انه ماليش الا ربنا مهما عشت ومهما مرت عليا مواقف وتجارب وناس .. هو ربنا وبس .. ربنا اللى قادر يؤنس وحدتك .. ويفرج كربك .. ويكرمك

شعور غريب جالى لدرجة انى بقيت ادعى وانا بتألم واقول يارب حنن قلوب الناس عليا وحنن قلبى على الناس .. يمكن لو ده حصل حياتنا تبقى احسن ومش كل واحد يقول يلا نفسى وانا مالى .. طالما انا كويس مش مهم الباقى

سبحان الله لحظات الألم بالذات بتقربك اوى من ربنا .. لانك بتتيقين ساعتها ان محدش يقدر يعملك اى حاجة غيره هو وبس .. ساعتها بس بتعرف نفسك على حقيقتها وتعرف انت ايه وحجمك قد ايه بجد

المهم نمت وماحستش غير الساعة 10 بالليل بماما بتجسنى وبتقولى ياسمين مالك انتى مولعة نار وسخنة اوى .. ساعاتها بجد ماكنتش فاهمة حاجة .. واعية اه بس بقول اى كلام وبخطرف ههههههههههه .. شوفتونى وانا مخطرفة؟؟

كملت نوم ولاقيتها جابتلى فوارة برد خدتها وعملتى كمادات خلت الموزامبليه اللى فى شعرى يبوظ وخليتنى انام جمبها وطفت المروحة وفضلت طول الليل تجسنى وتشوفنى لسة سخنة ولا لأ

صحينا والحمد لله انا احسن دلوقتى واتصلتلى بالمكتب وقالتلهم انى مش حاجى النهاردة لانى سخنة وتعبانة

ربنا يكرمك يا ماما ومايحرمنيش منك ابدا يارب .. ويارب اشفى كل مريض وارحم الجميع وبلغنا رمضان واعيننا على صيامه وقيامه يارب .. اللهم آمين

Friday, August 22, 2008

إخصصص


ايه يا جدعان ؟؟

مالكوا بس؟؟

صلوا ع النبى كدة أمال

اسيب التدوين ايه وتجربة شخصية ايه وبتاع ايه بس

ده كل الحكاية انى قلت انا اسفة عشان فتحت المدونة والوقت مش ساعفنى اكتب فيها ولا اتابع باقى المدونات

ايه يا جماعة .. إهدوا بس

مكنتش اعرف ان الموضوع كبير اوى كدة

مظاهرات على باب المدونة وخبط ورزع ع الباب والشباك وبتاع

والواد كوكو لسة راجع من فترة عيا كدة وبياخد نقاهة ياعين امه فى المدونة

ومطفى النور ومشغل اغنية سيد الحبايب يا ضانيا انتا

وقاعد فى امان الله

تقوموا تعملوا فيه كدة؟؟

ده كان ناقص نسمعها فى الأف إم والبي بي سيتر وقناة الجزيرة وقناة تصبح على خير للسياحة

ايه ياجماعة انتوا ماصدقتوا ولا ايه؟

لسة بنطق واقول اسفة

لاقيتكم ناطين فى وشى وبتقولوا لاااااااا

مانتى قاعدة

طب نجيب قهوة

طب حلبسة

طب اى حاجة طيب

طب ماتقطعيش الجوابات بس

طب يلا غورى من هنا بقا

لالالا بجد مخصماكوا

اخص اخص اخص

لا بجد اخص عليكوا اخصصصصص

كدة تظنوا فيا الظن البطال ده؟؟

انا اقفل المدونة بتاعتى اللى كاميكاز بياكل منها عيش؟

انا؟

انا اقفلها على صوباع الواد كوكو اللى جايبه بالشئ الفولانى من عمر افندى؟

انا؟

مكنش العشم يا بشر

المهم نرجع للجد بقا

هو كله هزار ولا ايييييه

احم احم

انا فعلا معنديش وقت اكتب اى حاجة والله يا جماعة

بس عشان القلق اللى بتعملوه ده ان شاء الله احاول اكتب بين الحين والاخر

واحب ان اضيف ان كاميكاز قاعد على قلبكم لطولون

مين طولون ده؟

ومش حيتعتع بالساهل ومحافظ على مكانته ومفاتيح المدونة كويس اوى

ونحن نقف بالمرصاد لكل من تسول له نفسه ويفكر ان يزعزع أمن المدونة

لااااااااا وألفولة لااااااااااا

هو ايه اللى انا بقوله ده؟؟؟

المهم حقكوا عليا لو كان حد اضايق من البوست اللى فات

وبجد مش عارفة اشكركم ازاى على اهتمامكم بيا وبكتاباتى

جزاكم الله خيرا بجد

وكل سنة وانتوا طيبين عشان رمضان بقا

واللى عايز يجيب لكوكو الفانوس مافيش مانع طبعا

بس عايزينه من اللى على شكل توك توك الجديد ده

ويكون بيغنى الاغنية العريقة

الدنيا خرباااااااااااانة

Thursday, July 31, 2008

اسفة


اسفة على كل كلمة قريتوها عندى وممكن تكون ضايقيتكم

اسفة على كل يوم بعدت فيه عندكم

اسفة على كل يوم فكرتوا تدخلوا فيه المدونة وملاقيتوش حاجة جديدة

واسفة على كل يوم حتدخلوا فيه وماتلاقوش جديد بردو

اسفة انى شلت مواضيع كتير من المدونة عشان مش عاوزة اشيل حد همى اكتر من كدة

وبالله عليكم تدعولى

اسفة يا جماعة

اسفة انى عملت المدونة من الأصل

وكمان اسفة انى سبتها كدة

اسفة انى بعيدة اوى عن المدونة

واسفة انى حفضل بعيدة

اسفة يا مدونتى

اسفة يا قلمى

اسفة يا نفسى

اسفة بجد

اسفة

Sunday, June 01, 2008

عايزين فلوس؟؟؟


عايزين فلوس يا جماعة؟؟؟

طيب اللى عايز فلوس يرفع إيده

ايه ده ... كلكوا؟؟؟؟

طب قولوا ورايا : إحنا عايزين
فلوس

إحنا عايزين فلوس

لالالا .. بصووت أعلى .. انتوا مافطرتوش ولا ايه؟!ه

إحنا عااااااايزييييين فلووووووس


طب منا كمان عايزة فلوس !!! ه

تعالوا نشوف حد يدينا كلنا بقا !!!!ه

*******
****

فى رمضان اللى فات كنت اتخرجت من الكلية خلاص وعمالة ابحث عن وظيفة .. عادى يعنى زى كل الناس .. وبقيت اسأل كل حد واى حد .. لغاية ما فى يوم من ايام الصيام الجميلة دى .. كنت صايمة وقعدت على النت اشوف المدونة وكدة ، فلاقيت الاستاذ رفيق اون لاين - الاستاذ رفيق كان معانا فى شغل كنت بعمله ع النت تبع صناع الحياة ، بالتحديد جروب اسمه صناع نت - المهم ، مش فاكرة ساعتها سألته على كورسات ولا ايه ولا باين سألته على شغل ادور فى انهى مجال احسن وكدة .. مش فاكرة اوى يعنى ، بس اللى فاكراه ومش حقدر انساه ابدا هو رده عليا
قالى : اقولك على حاجة احسن من ده كله؟
قولتله خير؟
قالى : عليكى بسورة الواقعة كل يوم بالليل .. اوعى تسبيها ابدا .. وحتشوفى بنفسك


ماخبيش عليكوا انا كنت بعمل كدة من فترة بس عوامل الكسل بعيد عنكوا خليتنى اسيب الموضوع ده .. لكن لما الاستاذ رفيق - جزاه الله عنى خير الجزاء - فكرنى بيه ، ده غير انى كنت صايمة وغير كمان انى كنت بدعى ربنا اوى الفترة دى لانى كنت مزنووووقة فعلا .. فحسيت ان ده الرد بتاع ربنا .. إقرى سورة الواقعة

وده طبعا لان فى حديث شريف بيقول ، قال رسول الله صلى الله عليه وسلم : (( من قرأ سورة الواقعة في كل ليلة لم تصبه فاقة أبدا )) رواه البيهقي عن ابن مسعود رضي الله عنه ،الفاقة أي الفقر


قلت اجرب.. طبعا ماينفعش تجريب فى حاجة زى كدة لانها يقين اصلا .. بس ساعتها كانت حالتى النفسية فعلا وحشة وحصلت كذا حاجة كدة ورا بعض خلونى خلاااااااااص مش قادرة بجد

المهم قلت وماله .. اقراها ومش حخسر حاجة .. يمكن ربنا يكرم إن شاء الله والاقى شغل وتفرج

قريتها فى نفس اليوم ده .. وفضلت اقراها كل يوم لحد يومنا هذا .. قربت على سنة وحستمر الى ان يمد بيا العمر ان شاء الله ، طبعا مش حقدر اوصفلكوا ولا اشرحلكوا كربى اتفك ازاى .. لانه فعلا اتفك لدرجة انا نفسى كنت بستعجبلها واللى حواليا كمان استعجبولها والله .. كنت فاكرة انه عادى حلاقى شغل واشتغل وخلاص .. لكن فعلا ربنا أراد انى ما اشتغلش وفى نفس الوقت يفك كربى .. وده كان بالنسبالى من المستحيلات بجد

فعلا والله الرزق كان بيجيلى من حيث لا احتسب .. لدرجة انى كنت ساعات افتح شنطة من شنطى والاقى فيها مبلغ محترم .. واقعد اعصر فى مخى انا حطيت الفلوس دى امتى؟ .. والله ما افتكر .. سبحان الله

اقدر اقولكم ان من ساعة ما استمريت على سورة الواقعة وانا عمرى ما بقيت مزنوقة مادياً ولا مش معايا فلوس .. دايما بتفرج بفضل الله والله .. ولو مش مصدقين جربوا بنفسكوا

سورة الواقعة بفضل الله مش بتخلى فى فقر ابدا و ده حقيقة ، لكن اللى لاحظته لما واظبت عليها وواظب عليها ناس تانية نصحتهم بيها انها بتديك حاجة تانية غير الفلوس .. ويمكن اهم من الفلوس بكتير جدا .. بتديك الرضا ، بتخليك راضى على حالك وعلى نصيبك ورزقك وقدرك وكل شئ

ساعتها يا جماعة انا كنت نفسيا فى الارض بجد .. والظروف اتكاترت عليا جامد جدا ومكنش ليا ملاذ غير ربنا وبفضله وكرمه عليا انه اكرمنى وذكرنى بالسورة دى .. ربنا مقدرليش انى اكمل فى الماجستير ولا انى آخد دبلومة فى الكلية .. وتقريبا لحد دلوقتى مخدتش ولا كورس من الكورسات اللى كان نفسى فيها ( وسبحان الله كل ده ماكانش لأسباب مادية خالص .. بالعكس .. هى ظروف عائلية او حاجات بتحصل تبعدك عن اللى انت عايزه بطريقة تخليك فى الاخر تقول " ربنا مش مقدرلى الموضوع ده وقدر الله وما شاء فعل " .. سبحان الله بجد )ه

بردو لحد دلوقتى لسة مالقتش شغل ، ولسة مش عارفة اشتغل ايه ولا اعمل ايه ، وزاد كمان على موضوع الشغل هو انى ان شاء الله حسافر بلد جديدة عليا فالله اعلم حعرف اشتغل فيها ايه .. بس بجد والله واقسم بالله مش زعلانة .. بالعكس حاسة انى مع كل ده راضية اوى .. ومسلمة امرى لله لان ظنى فيه انه حيكرمنى اوى وبيدبرلى الخير

طبعا مش محتاجين اقولكوا وافكركوا ان الرزق مش فلوس وبس
.. لا .. الرزق فلوس وصحة وراحة بال ورضا ومعانى تانية كتيييييير اوى .. ربنا يكرمكوا بيها يارب اللهم آمين

الموضوع ده بقاله كتير معايا وعايشة بيه وبنصح اى حد يحكى معايا بيه .. بس اللى خلانى اكتب عنه هو اختى نوارن ( بت خيخة واى كلام ) لانها كانت مزنوقة مادياً بردو ونصحتها بسورة الواقعة والحمد لله رب العالمين ربنا فك كربها .. حسيت ساعتها انى ممكن افك كرب ناس كتير اوى لو فكرتهم بالسورة الجميلة دى

ايه .. عايزين فلوس كمان؟؟

طيب طيب وطوا صوتكوا شوية حتودونا فى داهية

بصوا يا جماعة فى طريقة كمان .. كانت مبعوتالى فى رسالة من فترة .. هى جميلة اوى بس انا مجربتهاش .. جربوها انتوا ، الموضوع بكل بساطة ان حضرتك لو بتشتغل وحضرتك لو بتاخدى مصروف من البيه جوزك .. خدوا من الفلوس الشهرية دى مبلغ صغير اوى .. اى حاجة ولو حتى جنيه واحد وطلعوه صدقة .. شرط الموضوع ده ان المبلغ اللى حتخصصه من المرتب ده تطلعه صدقة كل شهر .. ولو حابب تزود مافيش مشكلة ، لانك كدة اكنك بتقرض الله وحتشوف ربنا حيرد القرض ده ازاى بجد .. ممكن جدا المرتب مايزيدش ولا حاجة ويفضل هو هو .. بس سبحان الله حتحس ببركة غريبة فيه


بتقولوا ايه؟؟ .. عايزين فلوس اكتر عشان ارتفاع الاسعار؟؟

ايه يا جماعة انتوا فاكرينى قاعدالكوا على بنك ولا ايه؟؟؟


ومفتاح الرزق بجد وعن تجربة ومش رزق أموال بس لا ده أموال وذرية ومغفرة وتفريج كروب وجنة وحاجات حلوة كتييييير اوى .. المفتاح ده هو الإستغفار .. ( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاء عَلَيْكُم مِّدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) نوح(10-12) .. ده غير الحديث الشريف ( روى النسائي وأبو داود وابن ماجة والبيهقى عن عبدالله بن عباس رضي الله عنهما قال: قال رسول الله صلى الله عليه وسلم "من لزم الاستغفار جعل الله له من كل هم فرجا، و من كل ضيق مخرجا، ورزقه من حيث لا يحتسب " ) .. ده غير يا جماعة ان ذكر الله اصلا بيطمن القلوب اوى وبيخلى الدنيا قليلة فى عنيك وفى قلبك اوى وبيعلقك فيما عند الله بجد .. وانت الكسبان فى كل الحالات لانك حيبقى فى صحيفتك استغفار كتير وكلنا عارفين قول السيدة عائشة رضى الله عنها " طوبى لمن وجد فى صحيفته إستغفارا كثيرا " .. وقول سيدنا على رضى الله عنه " ما ألهم الله سبحانه عبدًا الاستغفار وهو يريد أن يعذبه " ... وطبعا ومع كل ده لازم ما ننساش ندعى كتير ونتوجه لربنا .. احيانا ربنا يبتلى العبد عشان يسمع صوته ويلجأله ويقوله يارب .. مستنين ايه؟؟ .. ادعوا معايا يلا

الحمد لله رب العالمين

والصلاة والسلام على سيدنا محمد وعلى آله وصحبه أجمعين

اللهم صُن وجوهَنا باليَسار ولا توهنّا بالإقتار

فنسترزقَ طالبي رزقك

ونستعطفَ شرارَ خلقك

ونشتغلَ بحمد من أعطانا

ونُبتلى بذم من منعنا

وأنت من وراء ذلك كله أهل العطاء والمنع

اللهم كما صنتَ وجوهَنا عن السجود إلاّ لك

فصنّا عن الحاجة إلاّ إليك بجودك وكرمك وفضلك يا أرحم الراحمين

اللهم اغننا بفضلك عمن سواك

وهب لنا من رزقك الحلال الطيّب المبارك ما تصون به وجوهنا عن التعرض إلى أحد من خلقك

واجعل اللهم لنا إليه طريقا سهلا من غير فتنة ولا محنة ولا منّة ولا تبعة لأحد

وجنبنا اللهم الحرام حيث كان وأين كان وعند من كان

وحُلْ بيننا وبين أهله

واقبض عنا أيديهم واصرف عنا وجوههم وقلوبهم

حتى لا نتقلب إلا فيما يرضيك

ولا نستعين بنعمتك إلاّ فيما تحبه وترضاه برحمتك يا أرحم الراحمين

اللهم هب لنا من رحمتك مالا يمسكه غيرك

اللهم إن كان رزقنا في السماء فأنزله

وإن كان في الأرض فأخرجه

وإن كان معسرا فيسره

وإن كان بعيدا فقربه

وإن كان قريبا فيسره

وإن كان حراما فطهره

وإن كان قليلا فكثِّره

وإن كان معدوما فأوجده

وإن كان موقوفا فأجره

وإن كان ذنبا فاغفره

وإن كان سيئة فامحها

وإن كان خطيئة فتجاوز عنها

وإن كان عثرة فأقلها

وبارك لنا في جميع ذلك إنك مليك مقتدر وما تشاؤه من أمر يكون

يا من اذا أراد شيئا إنما يقول له كن فيكون

سبحان ربك رب العزّة عما يصفون وسلام على المرسلين

والحمد لله رب العالمين

وصل الله على سيدنا محمد وعلى آله وصحبه أجمعين


إقروا سورة الواقعة يا جماعة وتصدقوا واستغفروا الله وادعوه ووصوا اهلكم واصحابكم وكل الناس بالكلام ده .. وتعالوا نحيي سنة من سنن الحبيب المصطفى عليه افضل الصلاة والسلام

ملحوظة مكعبرة: انا كتبت البوست ده يا جماعة امبارح (1/6/2008) بعد صلاة الفجر .. تانى يوم على طول استلمت شغل جديد والله .. وده حقيقة انا نفسى مستغربالها .. سبحان الله .. مش قادرة اقول غير الحمد الله على نعمة الاسلام وكفى بها نعمة .. وكفى بها نعمة .. يارب لك الحمد حمدا كثيرا طيبا مباركا فيه ملئ السموات وملئ الارض كما ينبغى لجلال وجهك ولعظيم سلطانك

Saturday, May 10, 2008

تقـدر؟


تقدر فى عز لحظات الألم والوجع تخبى ومتعبرش؟

تقدر وانت جواك كلام كتير اوى تفضل ساكت وماتتكلمش؟

تقدر والدموع مالية عنيك تبتسم وتضحك وتفرفش؟

تقدر الصرخة تكون جواك نفسها تطلع وانت حابسها؟

تقدر الآه بصوتها العالى اوى محدش يسمعها غيرك؟

تقدر تكون فى مكانك وانت نفسك تهرب بعيد جدا لوحدك؟

تقدر تبقى مخنوق وشايف الاكسجين بعنيك ومش قادر تقوله تعالى؟

تقدر تتكلم وانت نفسك تسكت خالص؟

تقدر تبقى " عادى " وانت اللى جواك مش عادى ؟

تقدر تعيش مع اللى حواليك وانت مش مستحمل نفسك اصلا؟

تقدر تضحك وانت نفسك تبكى اوى؟


تقدر تبان مبسوط وانت من جواك زعلان اوى؟

تقدر تبقى هادى جدا وانت من جوا بتتقطع بجد؟

****

يمكن تقدر .. بس انا بجد مش قادرة

حعمل ايه؟ .. ولا حاجة

حدخل آخدلى دش ساقع يمكن افوق شوية!ه

Sunday, May 04, 2008

واحد شاى


المكان: اوضتى اللى جوا بيتنا وقدام كمبيوترى العجيب .. بيب بيب
الزمان: النهاردة الأحد 4 مايو
الحدث: الشعب عامل إضراب باين
عرفت منين: كنت نايمة الصبح فى الاوضة وسمعت بابا فى الصالة بيطلب من اخويا يعمله مشوار واخويا رفض انه ينزل النهاردة بالذات وقام قايل لبابا النهاردة عندى مسرح فى الجامعة وبكرة ابقى اروح مشوارك !، بابا قاله اشمعنى مش النهاردة ياد يا ياسر؟؟ .. قام اخويا رادد وقاله اصل النهاردة في إضراب يا بابا وخايف لايكون فى مظاهرات والشوارع تقف زى الاضراب اللى فات وكدة .. معلش يا بابا اروح النهاردة المسرح بتاعى وبكرة إن شاء الله اعملك مشوارك !ه
السؤال الكاميكازى: سمعت ده كله ازاى وانا نايمة؟ .. حكمة ربنا يا مؤمنين .. حنعترض؟
السؤال الأخطر : مين اللى قال لأخويا على حكاية الإضراب دى؟؟ .. علمى علمكم ياجماعة .. انا عندى استعداد اتبرى منه هو شخصيا لو طلع بيسمع عن الحاجات دى ... ماهو ده اللى كان ناقص كمان .. ايه الناس دى
رد فعلي ع الحدث العجيب ده: ولا حاجة .. حاسة ان عينى بتوجعنى شوية .. تفتكروا ان ده له علاقة بالموضوع التانى ده .. ولا ده موضوع وده موضوع .. ولا ايه الموضوع اصلا؟؟؟؟
بعمل ايه دلوقتى: ولا حاجة بردو .. بعمل واحد شاي .. بس نفسى البراد يبقى كبير شوية واعمل للشعب كله واحد شاي عشان يروق كدة .. بجد يا جماعة مش بهزر .. مش مصدقينى؟
.
طب خدوا الحكمة آدى مش اختكم هنادى (مين هنادى دي؟؟؟) .. كل ما تقفل فى وشك اعملك واحد شاي يابرنس واضربها طبنجة .. حتقولولي ايه العلاقة بين الحالة النفسية وكباية الشاي .. حقولكم طبعا العلاقة وثيقة جدا وماسكة فى بعضها بإتنين مشابك من الكبار الخشب دول .. عارفينهم؟
.
المهم من غير رغى كتير وكتر كلام .. نفسى نقدر نعمل زى كلمات اغنية واحد شاي ما بتقول .. بس حاسة انه صعب .. ولا انتوا ايه رأيكوا؟ .. شوفوا الكلمات كدة واحكموا انتوا بنفسكوا على نفسكوا.. بس قبل ما تقروا الكلمات عاوزة اقولكم على حاجة خطيرة جدا بجد .. انا من ساعة ما الاغنية دى نزلت وهى معلقة معايا اوى .. كل شوية اعمل فى واحد شاي وأربع فيه واغنيها .. لدرجة انى بقيت شبه فناجين الشاي التخينة ام ودن واحدة دى .. بس الفكرة انى فى الحقيقة بودنين مش ودن واحدة .. تفتكروا اودى فردة الحلق التانية دى فين؟؟؟؟؟؟
.
المهم بطلوا رغي بقا كلمات الاغنية اهيه

عبى جيوبه من الأفراح
و طاح فى الحزن بالضحكة
و جلجل صوته و قال يا جراح
أدينى قافل لك السكة

ما هواش فاضى
يضيع وقت على الماضى
عارف ان اللى راح موش جاى
قعد يشرب له واحد شاى
و روّق باله و بحاله صبح راضى

...........

اوعى تسيب الحزن فى قلبك ياكل حتة
حاول تانى ودور وانت تلاقى السكة
فى الإمكان تهزم حزنك مهما إن كان
بس اعمل زيه ودوب حزنك جوا الضحكة

ما هواش فاضى
يضيع وقت على الماضى
عارف ان اللى راح موش جاى
قعد يشرب له واحد شاى
و روّق باله و بحاله صبح راضى

رسم على وشه بالألوان
و رافع يافطة للأحزان
كتب فيها أنا الفرحان

و موش شاغل دماغه بهم
غلب حزنه بخفة دم
خسر دمعه طلع كسبان
طلع كسباااااااااااااان


السؤال اللى بيطرح نفسه دلوقتى بقا .. ممكن فعلا نضيع وندوب كل همومنا فى واحد شاي بجد؟ ولا الموضوع محتاج براد بحاله .. ولا نشترى قهوة فى الحسين من بابها ونقعد كلنا نأربع فى شاي لحد ما الشعب كله ينسى ويقول انا جدع ؟؟
.
نرجع لمرجوعنا ( ألا احنا كنا فين اصلا؟) من حكمدار المدونة الى مدونات العاصمة : كاميكاز إرجع .. المكان كله محاصر والإنكار مش حيفيدك .. يرضيك كدة تسيبنى؟ .. يرضيك تعذبنى؟ ..ما كفاية كدة يعنى .. وانا حعمل ايه بعدييييك
.
سؤال تانى اخطر من كل الاسئلة اللى فاتت : انا ايه اللى جابنى هنا؟؟؟؟؟؟؟
.
ملحوظة متخلفة: فى شوية نعناع كان الواد كوكو زارعهم على شباك المدونة ابقوا حطوا منها فى الشاي لزوم المزاج وكدة يعنى .. بس خدوا بالكوا كل واحد ورقة نعناعاية واحدة وبس .. بطلوا نصب بقا .. شعب مش طامر فيه بصحيح .. بلا بتاع

Thursday, May 01, 2008

Wednesday, April 09, 2008

انا فين؟؟



سلام عليكم الاول .. ازيكم عاملين ايه؟؟ .. يارب تكونوا كلكم بخير
مش حقول واحشينى تانى لانى قلتها قبل كدة ومش حقول النت واحشنى لانه اكيد عارف ولا حقول الواد كوكو واحشنى اوى لانه اكيد واخد باله يعنى .. الحمد لله على كل حال ، انا بخير الحمد لله ياجماعة بفضل الله .. طيب انا فين بقا؟؟ .. ده سؤال وجيه بيطرح نفسه فى كل المحافل الإنترنتية التى تعودت على وجودى الكاميكازى سواء على الماسنجرات بكل انواعها واشكالها او المدونات او المنتديات او الفيس بوك او او او !!!!ه
.
عمرك حسيت انك مش قادر تتكلم؟؟ .. عمرك جربت انك تبعد وبس؟ .. تبعد عشان عاوز تبعد وبس مش عشان اى سبب تانى .. تبعد عن كل حاجة .. لدرجة انك لو تعرف تبعد عن نفسك كمان كنت عملتها بس ماينفعش
.
هو مش سبب معين بردو خلانى ابعد .. هى مجموعة من العوامل تضافرت وادت للنتيجة دى ( حلوة تضافرت دى .. جاية من الضفاير مش كدة؟ ) .. عوامل كتيرة جدا منها ان بنت اختى بطلت تبقى معانا هى ومامتها ودخلت الحضانة والبيت فيضى عليا انا وماما وبابا .. وابتدى إحساس جديد وغريب يطرأ عليا واحس بيه .. الاحساس ده هو انى لازم اقضى اطول فترة ممكنة معاهم واعملهم اللى هما عاوزينه .. اخويا دايما فى شغله واختى مشغولة فى بيتها وبنتها وشغلها ومحدش مع ماما وبابا غيرى انا .. ابتديت احس انى بقيت الشخص الوحيد اللى بيآنس وحدتهم .. بابا من اول النهار وماما من بعد ما ترجع من الشغل .. بالظبط بقينا اربعة فى البيت دايما مع بعض .. ماما وبابا وانا والتليفزيون .. وهنا يتراجع دور النت بشكل نهائى .. بجد بقيت استخسر اى وقت اضيعه ع النت وماقضيهوش معاهم .. لدرجة انى لو قعدت ع النت شوية او انشغلت فى اى حاجة الاقى ماما جاية وقاعدة جمبى لحد ما اخلص .. بجد بتصعب عليا اوى هى وبابا ..بس الحمد لله انا فرحانة لانى صاحبتهم اوى بفضل الله ويارب يعينى ويقدرنى على برهم
.
ده سبب من ضمن الاسباب .. اه فى حاجات تانية .. منها ان معاش بابا لحد دلوقتى ماطلعش .. بابا طلع على المعاش من شهر سبتمر اللى فات .. فمشاوير المعاش بكل ما تحمله من بيروقراطية بقوم بيها .. سواء لوحدى او وبابا معايا لانه ماينفعش يخرج لوحده ... الشئ التانى هو مشاوير التأمين الصحى وجلسات الليزر بكل ما تحمله من بواخة وسماجة وكآبة .. بردو بقوم بيها مع بابا او لوحدى .. الحمد لله رب العالمين
.
دى المشاوير الصباحية .. بعد الضهر ده ملك لماما وبس .. وفى بعض الاحيان بيكون لبابا كمان بس الاصل لماما .. صاحبة ماما الاساسية هى اختى وبعد ما اختى اتجوزت ماما نفسيتها تعبت جامد بجد وقعدت فترة كبيرة عقبال ما قدرت تتأقلم .. ماما من النوع اللى بيحب الخروج لان جو الشغل الكئيب والبيت بيخنوقها فبتحب تروح عن نفسها وتخرج تتفرج ع المحلات او تتمشى وكدة ..بالإضافة الى انها كمان مش بتحب تخرج لوحدها واللى كانت دايما مطوعاها فى الموضوع ده زى ما بتقول هى اختى الكبيرة .. لانها بتحب الخروج زيها ... وبعد ما اختى اتجوزت ماما بقت تحس انها لوحدها اوى لانى مش زى ماما فى حاجات كتير .. يعنى مثلا لو ماما عاوزة تخرج وعايزانى انزل معاها ده بيطلب منها جهد كبير فى انها تتحايل عليا وتشرحلى قد ايه الخروجة دى مهمة واننا ممكن نلاقى حاجات كويسة ليا ونشتريها .. وممكن الامر يتعدى للسؤال الطبيعى من ناحيتى: تدفعى كام وانزل معاكى؟؟؟ .. لانى مش بحب الخروج بشكل عام .. شخصية بيتوتية جدااااااااا
.
بعد كدة جت سولي وسلتنى جامد انا وماما وبعد ما مشيت وراحت الحضانة مش بس ماما اللى حست بالوحدة لا وانا كمان وبابا .. عشان كدة لما بتقولى ننزل بوافق على طول رغم انى مش بكون عايزة انزل ولا حاجة .. بيدخل فى كدة مشاوير السوق والترزى والفرجة ع المحلات وهلم جرجر والحمد لله
.
بصراحة وبينى وبينكم بقيت احس ان ماما وبابا اولى بأى وقت ممكن اديه لحد غيرهم .. حتى لو كان الوقت ده لعمل حاجة انا بحبها زى انى ادخل النت .. الفترة دى اللى ركزت فيها معاهم تحولت الى صوحبية مش بس علاقة بنت بأمها وابوها .. بحس انها كمان علاقة واحدة لسة فى بداية حياتها بزوج وزوجة ليهم خبرة كبيرة فى الحياة وكل يوم بتتعلم منهم حاجة جديدة ومفيدة جدا .. فالحمد لله انى بقضى معاهم وقت كبير كدة .. اكتسبت صحوبية جميلة ده غير البر بالوالدين الحمد لله .. فماما تحولت الى صحبتى .. نخرج سوا وننام سوا ونصحى نصلى الفجر سوا ونفضفض ونفتح قلوبنا لبعض ونقرا قرآن سوا .. وكتير احس انها فعلا صديقتى وان مافيش فرق السنين الكتير اللى بيننا وانها مش ماما ومش كبيرة .. لا دى واحدة صحبتى اوى وبتحبنى اوى .. مش بس بتاخد رأيي فى حاجات كتير .. لا دى كمان كتير بتمشى بالرأي ده لو لاقيته سليم
.
بقيت انا كمان الحدث الكبير فى حياتها .. بلاحظ الموضوع ده فى كلامها مع اى حد .. زى مثلا " دى ياسمين كانت تعبانة اوى امبارح " ، " ياسمين لسة مش لاقية شغل .. ربنا يفتح عليها يارب " , وهكذا ... الموضوع اتطور لدرجة انى بقيت اناديها بإسمها بدون ألقاب وهى بتاخد الموضوع عادى من غير زعل .. بس ساعة الجد هما ماما وبابا واحترامهم اهم شئ فى حياتى .. مرة كانت اختى عندنا وكنا بنتفرج ع التلفزيون فناديت ماما بإسمها .. اختى قالتلى عيب كدة .. فقولتلها مافيهاش حاجة .. إن كبرت ماماتك صحبيها ههههههههه .. الحمد لله رب العالمين ربنا يديهم الصحة وطولة العمر ياااااارب .. مين عارف .. مش يمكن موضوع انى الاقى شغل ده اتأخر مخصوص عشان اكون معاهم واقضى طلباتهم وأونسهم .. الحمد لله رب العالمين على كل شئ بجد
.
العامل التانى او التالت مش فاكرة هو ان الجهاز بقى غبى بجد .. كل مرة افتحه فيها لازم يقرفنى بحاجة .. مرة النت فاصل ومرة الجهاز بطئ جدا وميت من سنة .. ومرة اعمل ساين إن ع الماسنجر وبعد ما يقعد ساعة عشان يدخل يقوم عامل ساين أوت لوحده قبل ما اعرف مين اون لاين اصلا .. وهكذا دواليك
.
ماكذبش عليكم الامر لا يخلى من شوية رغبة فى الابتعاد بردو .. ليه وعشان ايه مش عارفة .. او احساس انه مافيش فايدة للكلام .. ما احنا ياما اتكلمنا وكل يوم الناس بتتكلم وبعدين ايه اللى حصل؟ .. ولا حاجة .. لسة بيأكلونا لحم حمير وكلاب وقطط واحصنة .. ولسة الأغانى ممكنة .. ممكنة .. وابقى علي صوتك بالنهيق بقا على ما تفرج .. وماتنساش تسلملى ع التروماي
.
صحيح .. اخبار البرد ايه معاكوا .. واخباركم ايه نفسيا مع ارتفاع الاسعار .. ومين راح فين بكام؟؟
.
اخيرا وليس آخر الواد كوكو واحشنى بجد .. حاسة انى نفسي اشوفه واخده بالحضن واقوله وحشتنى اوىىى .. وحقك عليا انا اسفة انى بعدت اوى كدة .. وماتزعلش منى .. حتقولولى ما تعملى كدة وايه اللى حايشك ؟! ... مش عارفة يا جماعة الواد كوكو اختفى فى ظروف غامضة .. جيت المدونة لاقيتها خربانة خالص ومتربة والاكل برا التلاجة وبايظ .. مع انه عارف اني لسة طابخة من كام شهر يعنى الاكل لسة طازة وملحقش يبوظ خالص
.
المهم لو شوفتوه قولولو ارجع يا كاميكاز .. إنسانة تناديك .. انا ليا مين غيرك؟؟ وحعيش لمين غيرك؟؟ .. وسلام مربع للست وردة وكل ازهار الجونينة ... صحيح .. اللى فيكوا ربنا فاتح عليه وبيشتغل صوحافي يبقى ينزل اعلان فى الجرنال نداء كاميكازي مني له .. يااااااااه .. المدونة ضلمة من غيره اوى .. ده غير انها ضلمة من الاول اصلا

Thursday, April 03, 2008

طعم الأفراح


شكلني بطعم الأفراح

لوني بلون التفاح

وبطعم المانجة وكمنجة

تعزفلي عالجرح ارتاح

يمكـــــــــــن

---------
منير - يمكن
---------
كلمات الشكر لوحدها مش كفاية على سؤالكم عليا بجد جزاكم الله خيرا
انا بخير الحمد لله وبعتذرلكم كتيييييير جدا على غيابى عن المدونة وعن النت كله
شوية ظروف والله المستعان .. وحشتونى اوى اوى ومحتاجة جدا لدعائكم ليا بظهر الغيب
وجزاكم الله عنى خير الجزاء

Thursday, March 06, 2008

لون البنفسج


بدأ مخططها اليومي بالذهاب إلى السوق لتشترى بعض الخضروات قبل أن تعود إالمنزل ، فقد كانت لديها مشاكل بسيطة خاصة بالعمل تشغلها منذ الأمس تستطع ان تفكر ماذا تحضر له اليوم على الغداء ، ظلت تسرع فى خطواتها فهى تخشى أن يعود من عمله قبل أن تعد له شيئا ، ولكن ماذا ستقدم بالتحديد : " أعمل له البامية مع الأرز الأبيض؟ .. لا إنه يحب صينية البطاطس بالصلصة مع الدجاج .. لالا بل إنه يحب الأرز بالخضراوات أكثر من أي شئ آخر ... " قطع ذلك السيل من الأفكار صوت رنين تليفونها المحمول .. فتحت حقيبتها وأخرجت التليفون .. إنها شقيقتها .. آلوو...

إنطفأت نظرة الحماس فى عينيها وتحولت إلى ذهول ، وكأن صاعقة مفاجئة هبطت عليها من السماء ، وهي لا تدرى ماذا تفعل ؟! .. سقط التليفون من يدها ، وجرت تعبرالطريق الذي تمرق فيه السيارات دون أن يراعي سائقوها أية حدود لسرعتها، غير منتبهة لآلات التنبيه التى أخذت تعوي كالذئاب فى وجهها عندما فاجأتهم وهي تلقي بنفسها في نهر الطريق السريع ولكنها لم تعبأ ولم تهتم .. استمرت حتى وصلت إلى الجانب الآخر على الكورنيش ، ظلت تمشي في نفس الإتجاه شاخصة البصرلا تصدق ما سمعت .. إختلطت دموعها بقطرات المطر الذي كان يهطل علي المدينة منذ الليلة الماضية .. شعرت أن الكون كله يبكي معها .. وأن العالم من حولها قد إنتهى وتلاشي تماما ولم يتبقى منه أمام عينيها سوى هذا المكان الخفي للعابرالعادي في الطريق الأشهر في المدينة ، وأخيراً وصلت إليه ، وصلت إلي المكان الذى شهد كل لحظاتهما الجميلة معاً .. تقابلا هنا منذ خمس سنوات لأول مرة خارج أسوار الجامعة .. وهنا صرح لها بحبه .. وهنا أهداها تلك الزهرة التى طالما عشقتها منذ الطفولة .. زهرة البنفسج ... ومنذ تلك اللحظة وهذه الزهرة لا تغادر حقيبتها أبدا .. وهنا طلب منها الزواج .. وهنا قررا ميعاد حفلة الخطوبة .. ومرت السيارة يوم الزفاف من هنا ، وأخبرته لأول مرة على استحياء بالحقيقة: إنها تحبه .. سألها بهدوء: أتحبيننى فقط ؟؟ .. أجابته في خجل غير مصطنع : لا بل أحبك بلون البنفسج .. ومنذ يومين فقط اختارا هنا اسم من يسكن فى احشائها الآن ...

توقفت عن المسير واستدارت عند بوابة صغيرة للشاطئ متجهة نحو البحر ، كانت تمشى وكأنها مُبرمجة فاقدة للوعى وللإرادة وكأن قوة خفية أكبر وأقوى منها تسيطر عليها وتوجهها ، فتحت حقيبتها واخرجت زهرة البنفسج .. سقطت الحقيبة من يدها على الرمال واستمرت في سيرها نحو الشاطئ زائغة العينين ، مذهولة عن العالم ، وفى يدها تلك الزهرة الحزينة .. ظلت تتقدم حتى لامست مياه البحر قدميها .. وكأن هذه المياه أعادت لها الوعى فأدركت حجم مصيبتها فى زوجها وحبيبها فإنفجرت فى نوبة أقوى من البكاء ثم الصراخ في لوعة : كيف تتركنى وحدى؟ .. كيف وأنا هنا أحبك ، وابنك ينتظرك؟ .. لمن سيكون قلبى بعدك ؟ .. لمن سيكون جسدى بعدك ؟ .. لمن سيكون البنفسج بعدك ؟؟؟؟ ... لا لن نتركك يا حبيبى .. سنأتى إليك أنا وابنك والبنفسج .. لن نتركك وحدك ... ظلت تصيح وتبكى وتتقدم حتى أخفت مياه البحر جسدها بالكامل وابتعد صوتها شيئاً فشيئاً حتى اختفى تماماً .. غرقت .. وطاف البنفسج .

استيقظت فجأة تصرخ فوجدته نائماً بجوارها .. كانت تتصبب عرقا من هول ما رأت ... لعنة الله على هذه الكوابيس البغيضة .. قبلت يده وجبينه وحمدت الله ، مدت يدها تتحسس زهرة البنفسج واطمأنت علي أنها كما وضعتها بالأمس تحت الوسادة ، ضمتها بأصابعها بقوة وقبلتها ثم ارتمت فى حضنه من جديد .
تمت

Monday, February 25, 2008

Thursday, February 14, 2008

يوميات كاميكازية: عيد البتاع


( المشهد داخلى .. داخل المدونة .. ياسمين إنسانة تجلس خلف مكتب فخم واضعة ايدها على خدها ويبدو عليها أثر الهم والخنقة .. فى الحائط المقابل لهذا المكتب يقف كاميكاز متظاهراً بالإنشغال فى تلميع زجاج النافذة المواجهة لها بينما يسترق النظر إليها بين الحين والآخر .. وإذا كان جهاز الحاسوب الخاص بك جهاز عادى فستجد مكتب إنسانة على ايدك الشمال فى الركن البعيد الهادى فوق خالص ، أما إذا كان الحاسوب من النوع اللابتوب – إوعدنا يارب – فستجد إنها فى نفس المكان السابق ذكره لأنها مش حتفرق يا معلم ... يسود المدونة جو عام من الصمت الرهيب ، وفى هذه الأثناء دار بينهم هذا الحوار ...)ه

كاميكاز ( يغنى أغنية ردئية محاولاً إثبات وجوده وهو يلمع النافذة ) : انا قلبى فى إيديا .. ومافيش غالي عليا ، ولسةةةة ماتخلقش .. يابنى انت ماتخلقش اللى حيلعب بقلبىىىى .. إصحىىىىى .. فووووووق ( ثم ينظر إليها آملاً ان تكون قد خرجت من شرودها المعهود ، ولكنها لم تخرج هذه المرة فقد كانت يبدو عليها بعض الضيق .. وجد كاميكاز انه لابد من ان يتحدث معها مباشرة .. وهنا بدأت ملحمة " النحنحة " )ه

كاميكاز: إحم إحم .. إحمممممممممممم .. كح كح كححححح .. إحمممممم ( لم تجيب مرة أخرى .. ذهب الى ركن الأرشيف واخذ فى رزع البوستات على الأرض مما أدى إلى جذب إنتباهها بعض الشئ - يا مسهل يارب )ه

إنسانة : ايه يا كوكو عامل دوشة ليه؟

كاميكاز: مافيش يا ستو هانم انا بس شايفك مش هنا خالص قلت اشوف مالك يعنى .. خير فى ايه؟؟

إنسانة ( يبدو عليها بعض النرفزة ): وانت مالك انت؟؟ .. انت حتفضل طول عمرك حيشاري كدة .. قلتلك مليون مرة ماتحشورش نفسك فى اللى مالكش فيه وماتدخلش مناخيرك كدة فى كل حاجة .. قلت ولا ماقولتش؟؟؟

كاميكاز( ظاهراً عليه بعد آثار الدهشة ) : انا اسف يا إنسانة والله .. معلش حقك عليا مش حعمل كدة تانى

إنسانة : بطل رغى .. وروح نضف الارض فى المدونة كويس .. عايزاها تبرق وتلمع كدة .. حطفش الزباين مننا يا متخلف انت

كاميكاز ( مطقطقاً وجهه فى الأرض ) : حاضر

( يذهب كاميكاز ليكمل عمله ويبدو عليه أثر الحزن الشديد .. بينما تعود إنسانة لحالتها الشاردة ظاهراً عليها بعض الملل .. فهى تارةً تقلب فى التاجات اللى منفضلها ومش بتعملها .. وتارة تقرأ فى الجوجل ريدار بدون ان تعلق ، ثم نهضت من المكتب وذهبت لتنظر من النافذة .. لا جديد .. مدونات كثيرة فى الأفق والكل يتحدث .. شعرت للحظة ان الحياة تجرى سريعاً جدا فى حين تقف هى فى مكانها لا تدرى ماذا تفعل .. تركت النافذة وعادت للمكتب تتفقد تليفونها المحمول .. وتنظر إلى هذه الأرقام فى اعلى الشاشة والتى تخبرها بالساعة .. وبعض الإشارات التى تدل على ان الموبايل مشحون بشكل جيد وان الشبكة جيدة أيضا .. ولكنه كما كانت دائما تقول عنه " حتة حديدة " .. لا ميسد ولا اتصال .. وضعته فوق المكتب وجلست على كرسى المكتب من جديد .. ولكنها هذه المرة حاولت ان تتجاذب أطراف الحديث مع هذا الكاميكاز .. نعم فهي غالباً ما تفعل ذلك حينما لا تجد من تتحدث معه .. )ه

إنسانة : احم احم ( لا يرد كاميكاز عليها هذه المرة .. فهو يخشى ان " تقلب عليه " كعادتها ولكنها لم تهتم وحاولت مرة أخرى ) ه

إنسانة : إلا قولى يا كوكو

كاميكاز: تحت أمرك يا ستو هانم

إنسانة: لا ستو ايه وبتاع ايه بس .. تعالى .. تعالى اقعد هنا ( تشير إليه لكي يجلس على الكرسى المقابل للمكتب )ه

كاميكاز: انا؟؟

إنسانة ( بنظرة تطق شرار): أومال انا؟؟؟؟ .. ( ثم تدرك سريعا انها غاضبة بلا سبب فما تلبث ان تعود لحالتها الرقيقة او لنقول تعود لحالة إدعاء الرقة !! ) .. طبعا يا كوكو .. اتفضل اتفضل .. ماتخافش تعالى

كاميكاز ( يذهب يقدم خطوة ويؤخر عشرات الخطوات إلى ان يذهب فى النهاية ويقف امام المكتب مرعوبا ولا يستطيع الجلوس ) : تحت أمرك

إنسانة : الأمر لله يا كوكو .. اقعد اقعد

كاميكاز( يجلس على إستحياء ) : خير يا فندم

إنسانة ( يبدو عليها الحماسة الشديدة ، متبعة اسلوب " السحلبة والدحلبة "!! ) : احم احم .. إلا قولى يا احلى كوكو فى الدنيا دى كلها .. محدش سأل عليا؟؟؟

كاميكاز: حد؟!!! .. حد مين؟

إنسانة : حد .. اى حد!ه

كاميكاز: لا يا فندم محدش عبرك خالص .. احم .. قصدى انه مافيش حد يعنى

إنسانة ( يبدو عليها أثار خيبة الأمل ) : اه .. طيب

كاميكاز ( نهض من مجلسه على الفور كأنه ما صدق ! ) : أقوم انا يا ستو هانم .. اى خدمة؟

إنسانة: إستنى بس متسربع على إيه ( تنهض هى الأخرة من خلف المكتب وتذهب لترغمه على الجلوس مرة أخرى .. بينما تأخذ هي فى اللف حول المكتب وبالطبع حول كاميكاز .. تفكر وتفكر وتفكر! .. ثم بدأت فى توجيه الأسئلة لكاميكاز المسكين متبعة أسلوب " المحقق كونان .. لا يخشى المحن " !! ) ه

إنسانة : تعرف النهادرة ايه يا كوكو؟؟؟

كاميكاز : اعتقد الخميس

إنسانة : حلوة تعتقد دى .. عايزة إجابة واضحة ومحددة .. النهاردة اييييييييييه؟؟؟؟

كاميكاز ( مرعوباً ) : الخميس .. الخميس يا ست الكل

إنسانة : اها .. الخميس .. لا يا كوكو النهاردة مش بس الخميس

كاميكاز ( مستغرباً ) : يالهوى .. هما ضموه ع الجمعة وانا معرفش؟؟؟

إنسانة : بطل هبل ياد انت واتعدل .. احم .. قصدى يعنى انه اه الخميس بس حاجة تانية كمان .. تعرفها؟؟

كاميكاز ( متظاهراً بالتفكير ) : بصراحة لأ يا هانم مش عارفها .. بس هو الخميس انا متأكد

إنسانة : طيب طيب .. لما نزلت النهاردة تجيب فينيك عشان تنضف بيه البلاط بتاع المدونة .. مخدتش بالك ان في حاجة متغيرة فى الشارع مثلا ؟؟

كاميكاز: امممممم ..اه افتكرت .. عم برعى بتاع الكبدة غير نشاطه .. بقا يبيع سجق حمير بدل الكبدة ( متأثرا وعلى وشك البكاء )ه

إنسانة :حمير ايه يا حمارانت .. جاتك القرف .. احم .. بص يا كوكو .. سيبك من عم برعى ده خالص .. ركز فى الالوان مثلا .. الدنيا كانت الوانها ماشية ازاى؟؟

كاميكاز: والله يا ستو هانم الدنيا واخدة وش احمر النهاردة مش عارف ليه .. بيتهيألى كدة بيقولوا انه الزلانطايم تقريبا .. دوا كحة دة يا إنسانة؟؟؟

إنسانة ( بقرف ) : زلانطايم؟؟ .. دوا كحة؟؟ .. اعوذ بالله .. يا إبنى ركز ده اسمه الفلانتاين .. عيد الحب يا غبى

كاميكاز : اااااااااااااااااااااااااااااااه .. طب مش تقولى من بدرى كنت بعت للبت مرجانة اى حاجة حمرا كدة .. عندى فردة شراب حمرا جوا رحيتها ايييييييه .. مقولكييييييش

إنسانة: بس بس كجتك القرف يا مقرف .. بقا تجيب للبت بتاعتك فردة شراب بريحتها كمان فى عيد الحب .. ده ايه الرومانسية دى كلها؟

كاميكاز : اه اومال ايه .. منا مرة سمعت فى الراديو انهم بيقولوا ان اى حد بيحب حد لازم يعبرله عن حبه فى اليوم ده

إنسانة : كلام جميل وكل حاجة يا كوكو محدش قال حاجة .. انا بس معترضة على حاجة معينة فى الموضوع ده

كاميكاز: اللى هيا؟؟

إنسانة : انه يبقى فى يوم معين عشان الناس تفتكر تقول لبعضها انه بتحب بعضها .. اصل انت مش فاهم يا كوكو انا حفهمك

كاميكاز ( مرتسماً على وجهه بعض البلاهة ) : اه .. ايوة افهم وماله .. لهو انا صغير؟!ه

إنسانة: بص يا إبنى .. فعل الحب ده مش محتاج اى حاجة .. لا وقت ولا لون ولا أسلوب معين

كاميكاز ( يهرش فى رأسه مما يدل انه مش فاهم حاجة خالص ) : اه .. ممكن بردو

إنسانة : ابسطهالك .. يعنى انا مثلا مش محتاجة مناسبة معينة علشان اترمى فى حضن ماما وابوسها واقولها انا بحبك اوى يا ماما ونفسى ربنا يجمعنى معاكى فى الجنة ،الحمد لله انك أمى ، ربنا يجازكى عنا خير ويجمعك مع سيد الخلق عليه الصلاة والسلام فى الفردوس الأعلى يارب ، وكمان مش محتاجة وقت معين ولا مناسبة معينة عشان اروح ابوس بابا قبل ما ينام واقوله تصبح على خير يا حبيبى .. ربنا يخليك لينا يارب او فى موقف تانى اقولهم هما الاتنين يارب اموت وانتوا راضيين عني ، وبردو مش محتاجة مناسبة معينة ولا وقت معين عشان احضن اختى بعنف وازهقها من البوس واقولها بحبك اوىىىىىىىىىىى .. ومش محتاجة بردو وقت او مناسبة معينة عشان ابوس اخويا واسلم عليه واقوله : واحشنى يا برنس !! .. وبردو مش محتاجة وقت او مناسبة خالص عشان احضن سولي واهيص معاها واغنيلها : انت حبيبى وبس .. ولا أيام بعدك تتحس .. او اغنيلها الاغنية الخاصة بيها اللى ألفتهالها مخصوص

كاميكاز: ايه ده .. عايز اسمعها ماليش دعوة

إنسانة ( متقمصة دور المؤلف الجامد قوى ) : عينى ياسيدى .. بس كدة؟؟ .. مطلعها بيقول .. احم احم

سولي سولي سولي .. حلوة وعسولي

سولي حلوة خااااالص .. كبد وقوااااانص

سولي حلوة جداااااااا .. والديك بيداااااان

كاميكاز ( يصقف لها فى إنبهار بالغ ) : الله .. الله عليكى يا استاذتنا .. بتقولي درر يا ست الكل

إنسانة ( يشوبها بعض الغرور ) : ميرسي ميرسي .. طول عمرى يابنى ( ثم تعود الى سياق الحديث من جديد ) بس ياسيدى زى ما قولتلك .. الواحد لما يحس انه عايز يعبر عن حبه او اى مشاعر ايجابية جواه المفروض يعبر عنها على طول .. يعنى مثلا ساعات اتصل بواحدة من صحباتى واقولها انتى وحشانى اوى على فكرة .. كدة من غير مناسبة لا عيد ميلادها ولا عيد العمال حتى .. ومافيش مناسبة معينة عشان الواحد يبقى من جواه بجد بيحب الناس كلها وبيتمنالهم الخير .. ولا وقت معين عشان يشكر ويقدر كل زواره وقرائه فى المدونة ويقولهم انه بيحبهم كلهم فى الله .. بشكل عام الكلمة الحلوة احلى حاجة بجد .. لان قلوب الناس مزارع فأغرس فيها الكلمة الطيبة .. فاهم يا كوكو؟؟

كاميكاز ( يبدو عليه بعض الإقتناع ) : فاهم فاهم .. يعنى انا مش محتاج مناسبة معينة عشان ابعبر فيها عن مكنونياتى ومشاعيري .. صح؟

إنسانة : إنت جبت مشاعيري دى منيييين؟؟ ( على طريقة عادل إمام فى مدرسة المشاغبين : إنتي جبتى لغاليغوا دى منين؟؟!! ... ثم أخذت فى الضحك بإنشكاح بالغ ! ) .. ايوة صح يا كوكو .. ما شاء الله عليك ابتديت تفهم

كاميكاز: اشطة خلاص حبقا ابعبر لمرجانة على طول .. بقولك يا فندم بما انك منشحكة كدة ومزاجك رايق

إنسانة ( مبتسمة ومقبلة ع الحياة ) : خير يا كوكو

كاميكاز: احم احم ..ماهو بس أصـ أصـ أصل

إنسانة : متأصأصش يا كوكو .. خير؟؟؟

كاميكاز: أصل بصراحة كدة ومن غير لف ولا دوران .. حنفية المطبخ بتاع المدونة بايظة وغرقت الدنيا جوا .. وانا مخبى عليكى من الصبح عشان الجيران اللى تحت اشتكوا وراحوا عملولنا محضر فى القسم الكاميكازى

إنسانة ( وعيناها تطق شرار مجدداً ) : نعمممممممممممم؟؟؟ .. وسايبنى ارغى من الصبح يا مدهول على عينك .. نهارك مش فايت .. خد

طاااااااااخ .. طووووم ... طشششششش ( تنهال عليه ضرباً مبرحاً ولا أكنها شمشون الجبار فى زمانه )ه

كاميكاز : ااااااااااااااااااي .. حرام عليكى يا إنسانة كفاية ضرب بقا .. ده انتى حتى اسمك انسانة يعنى

إنسانة : انت لسة شوفت حاجة؟؟ .. كنت فين ده كله مش تتكلم من بدرى يا مغفل؟.. يلا انجر قدامى نشوف حنعمل ايه فى المصيبة دى .. كله من تحت راسك يا حماااااااار

كاميكاز( باكياً من أثر الضرب – بصراحة إيدها تقيلة – المبرح ) : عااااااااااااااااااااااااااااااا

إنسانة ( تسحب كاميكاز بعنف متجهة نحو باب الخروج – اللى على إيدكوا اليمين – وهى تحدث نفسها ) : الحمد لله اهو الواحد لاقاله حاجة تسليه فى اليوم العجيب ده .. قال زلانطايم قال .. بلا نيلة

كاميكاز( بينما يتمتم كاميكاز ببعض الكلمات بنبرة غريبة يصعب إستيعباها ويبدو عليه المذلة والهوان – اعوذ بالله ) :ايه الضرب ده كله .. دى أكنها ما صدقت .. معقدة البت دى شكلها .. بس يلا قسم قسم .. اهو اخرج اشم هوا من المدونة المضلمة دى الواحد قرف .. وإن كان ع الضرب بسيطة ... واهو الضرب من إيد إنسانة زى أكل البتنجانة !ه


---------------

إقرأ المزيد

عادى خاااااااااااالص

قصة للحب الحقيقي

صور كاس الأمم الأفريقية من منازلهم