Friday, December 29, 2006

دكتورنا الإيجابى




الدكتور : هل قفلتُنّ الموبايلات؟؟؟؟

أنا : نعم سيدى

ديه كانت أول كلماته لينا

وبما إنى قاعدة قدام وصوتى واصله فجاوبت

وعلى فكرة المادة كانت باللغة الانجليزية مش فصحى ولا حاجة

المهم إن الدكتور ده بجد عمرى ما هنساه أبد

مشكلته إنه كان إيجابى جدا وحاول يوصلنا للدرجة دى من الايجابية

او على الاقل نبقى إيجابين وخلاص

لكن بالظبط زى ما قال سعد زغلول ..... مافيش فايدة

كانت البداية مع حادثة العبارة وكان رأيه إن احنا مش عندنا أسلوب جيد لمعالجة الازمات

ولازم نتدرب إزاى لو فى أزمة نتصرف بكل عقل وحكمة

مش مشكلة نجرب عادى

قالنا تصوروا إن المدرج حصل فيه حريقة .. هتتصرفوا إزاى؟؟؟

لاقى الكل باصصلوا بدهشة عارمة لأن الدرس ماتشرحش واحنا بلا فخر نفسنا ننجح

كان طبعا من الطبيعى إن لما تحصل مصيبة نخرج من المدرج كلنا 200 واحد تقريبا

وقالنا عاوز نظام وهدوء تخروجوا كلكم من المدرج فى منتهى الصمت والسرعة عشان الحريقة والعة

طبعا فوجئ برد فعل عنيييييييف من الطلبة

لا يا دكتور مش معقول كدة

عاوزين نفهم يا دكتور

ارحمونا بقا حريقة ايه دى

حسبى الله ونعم الوكيل

الراجل ساعتها اتصدم ، قالنا طب خلاص نفتح الكتاب على صفحة كذا والحمد لله شرح شوية

ودى كانت أول محاولة للدكتور معانا وفشلت بجدارة

المحاولة التانية كانت لما فهم من سياق المحاضرات إن هو الدكتور الوحيد اللى بيكلمنا فى الأحداث العامة اللى فى البلد، فطلب مننا كلنا أول ما الدكاترة التانين يدخلوا نقولهم من فضلكم بطلوا شرح فى المناهج شوية وكلمونا عن اللى بيحصل فى البلد وقالنا الاسبوع الجاى هسألكم عملتم ايه؟

طبعا الدكاترة اللى بعده دخلوا واحنا زى الشاطرين فتحنا الكتب وقاعدنا نسمع ونفهم واخر تمام التمام

دخل الدكتور الاسبوع اللى بعده وكله حماس وأمل وعلى وجهه إبتسامة جميلة

ها بقا .. عملتوا ايه مع الدكاترة ؟

طبعا الصمت الرهيب حل على المدرج

وأخيرا واحدة قالتوا يا دكتور لما بنرفع إيدينا لباقى الدكاترة عشان نوقفهم ونقولهم عاوزين نتكلم مش بيرضوا يسمعونا عشان عندهم مناهج لازم تخلص !!!!!! ودى كانت الصدمة التانية للدكتور

الصدمة الثالثة بقا كانت بايخة فعلا لأنها كانت لازم تتعمل

فى أحداث إنتخابات مجلس الشعب او الرئاسة مش متذكرة اوى

سئل مين يا جماعة معاه بطاقة أنتخاب ؟؟؟؟؟

طبعا الصمت الرهيب زى عادته جه تانى

لغاية لما 3 تقريبا قالولوا إحنا معانا

الراجل ما فقدش الأمل أبداً

وقال طيب اللى عاوز يعمل بطاقة انتخاب يروح مش عارفة مكتب ايه عشان يعملوا

وصفلنا الوصفة يعنى عشان نروح ونعمل بطاقة إنتخاب

وزى عادته قالنا الاسبوع الجاى اشوفكم عملتوا ايه ؟

وطبعا جه الاسبوع الجاى وسئل وفى عينيه نفس الأمل بتاع الصدمة التانية

ها بقا مين اللى عمل البطاقة ويوريهانى كدة
:)

بس ساعتها كان الصمت الرهيب عرف عنوان المدرج ففضل قاعد فيه ومنورنا كتير

وعرف وللأسف أخد الصدمة الثالثة مننا

وقال: تعرفوا إنتوا خسارة إنى أتعب نفسى معاكم

وبدأ يشرح المنهج زيه زى أى دكتور تانى

يوميها كل الطلبة فرحوا عشان هنفهم المادة عشان نبدأ نذاكر ونخلص بقا

كنت فاكرة انى هبقى زيهم بس حصل العكس

لاقيت نفسى زعلانة اوى

:(

الدكتور ده كان عنده أمل فينا وإحنا بكل بساطة ضيعنا أمله بحثاُ وراء الدرجات والشهادة

عارفة إن الشهادة مهمة والعلم والنجاح مهمين بلا شك

بس برضه إحنا جزء من المجتمع ومن الطبيعى إننا نتفاعل معاه ونحس بيه

المهم دى كانت قصة دكتورنا الإيجابى

24 comments:

  1. السلام عليكم ورحمة الله وبركاته
    مبارك عليك مدونتك الجديدة ويارب تكون فاتحة خير لك ولمن حولك ...
    وإن شاء الله تستمر كده على طول مدونة جميلة محترمة تكون في مقابل طوفان المدونات إياها ..
    وبالنسبة للدكتور الإيجابي والله كانت مفاجأة لي إن فيه دكتور إيجابي مع الطلبة داخل الجامعة فتجربتي في الجامعة أثبتت لي إن الدكتور إن لم يكن حزب وطني فهو يرفض أي حديث خارج المقرر ..
    أظن كمان إن الصمت الرهيب بيسود في المدرج مش لسلبية الطلبة بس لكن كمان إما لأن الطلبة اتفاجأوا زي ما انا اتفاجأت أو لخوفهم من جواسيس حرس الجامعة ..

    عموماً هي بشرى خير .. وكل سنة وأنت طيبة وننتظر منك المزيد

    ReplyDelete
  2. وعليكم السلام ورحمة الله وبركاته .. الله يبارك فى حضرتك وكل سنة وانت طيب

    اللى ما تعرفوش بقا إن الدكتور ده ضد الحكومة جهاراً نهاراً ... ده على حد تعبيره طبعا ، ودخل المعتقل قبل كدة كتير... مش أى حد يعنى

    ReplyDelete
  3. عفوا
    فليس الدكتور هو الذى ايجابى
    بل
    اغلب الشعب صار
    مغيبا

    ReplyDelete
  4. maged stephen
    وده اللى زاد حزنى

    ReplyDelete
  5. واللهي فكرتيني بواحد صاحبي
    بس ياخوفي ليتقفش
    :)

    بس اللي مفروض يبفي عارفه انه لو عرف يأثر في 10 من ال200 واحد دول حد ذاته شيء كويس
    وواضح ان الراجل اثر فيكي عشان كده كتبتي عنه

    ربنا يباركله و بارب ميفقدش الامل

    ReplyDelete
  6. يارب يكرمه بجد .. هو يمكن يكون فقد الامل فى دفعتنا بس معتقدش انه هيفقده بشكل عام لانه راجل نشيط سياسياً جدا غير إنه إقتصادى قد الدنيا ومؤلفاته الكل بيشهدلها فهو طبعا راجل محترم جدا وعارف هو بيعمل ايه وعارف إن العلم مهم طبعاً- بدليل إن متفوق فيه جدا- بس اللى اهم من العلم هو إزاى تخدم بالعلم ده بلدك وتخليها دولة ليها كيانها واعتبارها بين باقى الدول

    ReplyDelete
  7. عارف معنى الشعور ده...

    ودي تجربتي مع التعليم

    اضغط هنا

    هتلاقوا فرق رهيب بين تعليم هنا وتعليم أي حتة محترمة
    ربنا يستر على البلد دي

    ReplyDelete
  8. هوة دة اللي بيواجهه اي حد بيحاول يفكر او يغير من تفكير المجتمع المغيب اللي عايشين فية
    واللي اصبح تفكيرة ضحل و منحصر في اهداف متواضعه جدا لا تمت للحياة ولا للانسانية بصلة

    كان مفروض الدكتور يقوللكم كلمة سعد زغلول الشهيرة
    مافيش فايدة

    لان هوة دة الشعب المصري من مئات السنين
    ومش حايتغير

    ربنا يلطف بالدكتور بتاعكم دة

    اكيد انة في النهاية سينتهي في مستشفى للامراض العصبية

    ان لم ييأس و يسافر لدولة اخرى يستطيع

    يمكن هو اللي غلط مش احنا

    اكيد هوة اللي غلط علشان لسة بيفكر وعندة مخ بيشتغل

    ReplyDelete
  9. مصـ( الخير )ـعب
    يارب يستر علينا وعلى البلد دى


    الحصان الأسود
    عندك حق فى كل كلمة
    المنظر كان بشع بجد فى كل محاضرة يدخلها وهو بيحاول يعلمنا ويفهمنا واحنا زى الكتبة اللى عاوزين نصم كل حاجة وندخل نحل
    ربنا يستر علينا وعلى البلد دى

    اهلا بيك لاول مرة عندنا وان شاء الله ما تكونش اخر مرة
    تحياتى

    ReplyDelete
  10. يا عيينى

    احبطتور الراجل حرام عليكوو


    ده انا لما بصدق بلاقى دكتور كده

    بمسك فيه بايدى وسنانى

    انا فاهم اوى انتى ليه زعلتى

    ومقدر ده

    :)

    ReplyDelete
  11. هو معزور وانتم معزورين
    وليته يقرأ ويرى هذا البوست لكى يتأكد ان كلامه لم يضع هبائا !!
    تحياتى ليكى ولمدونتك المتميزة
    yhy

    ReplyDelete
  12. فكرتينى بدكتور عبد المنعم راضى الله يمسيه بالخير

    هذا قدر المتميزين

    ReplyDelete
  13. والله دكتور ممتاز بس للاسف وجد فى مكان او زمان غير الزمن
    مرتبط بمنهج معين ولازم يخلص ومرتبط بقوانين عقيمة وللاسف والكارثة الاكبر طلبة وطالبات اتعملوا الصمت والصم
    فكريتنى بايام الجامعة كان فى دكتور بيناقش بس كان عددنا حوالى 3000 واللى بيحضر المحاضرة اللى كانت كلها نقاش ومحاضرة اكثر من رائعة للاسف لا يتعدى الـ 50 طالب
    تحياتى

    ReplyDelete
  14. مدونتك لذيذه مووت

    و اسلوبك بجد بيشد

    ما تحاولي بجد تكتبي قصه قصيره كده

    مستنيكي

    تحياتي

    ReplyDelete
  15. الدكتور الايجابي ده موجود منه نسخه في كل كليه وبيلاقي نفس الفشل بنسب متفاوته
    انتي عارفه يا انسانه الناس كلها
    بتقول المشكله في الحكومه لو اتغيرت هنعلا ونعلا ونعلا
    لو الحاكم اتغير هيعمل زي مالدكتور عمل معاكم مره واتنين وبعدين هيزهق

    الشعب كله محتاج غسيل دماغ من التفاهه والسلبيه اللي بتتوزع عليه مع الاكل والتعليم
    بس يكون هو عاوز يرفع راسه

    ReplyDelete
  16. da ento talba tefe23 el marara sa7i7 el ragel 3ndo 7a2 a7btooh

    da 3omla nadra mab2sh feh dactra keda '
    el doc kol hamo yshre7 el kelmten el 7afzehom asdy ysme3 el kelmten el 7afzhom we ymshy ka2enana shewal bi3bi feh

    yala ma 3linaaaaaa

    ReplyDelete
  17. Very good work, have a good weekend.

    ReplyDelete
  18. ومفيش فايده يا صفيه غطينى وصوتى عليااا


    بوست مكتوب بأستذه ...كعادتك يعنى يا جميله ....مواااااااااااااااه

    ReplyDelete
  19. بقدر ما المقال صادق بقدر ما بيوجع , فعلا كلنا تحولنا لالات للتلقى و الحشو و الأستاذ اللى يحاول يخرج عن المنهج ( المرسوم ) يبقى بيلعب فى السياسة و مش بعيد يتشال من مكانة

    ربنا معاكى يا مصر

    ReplyDelete
  20. ana 3ayza a3raf meen el dr da....ana fe FEPS, 3rd grade,,,,economics,,,,,i think am with u in college,,,,,,nice blog,,,w congratulations

    ReplyDelete
  21. السلام عليكم
    هو اللي يستاهل
    أمثالنا مينفعش معم غير العين الحمرا

    ReplyDelete
  22. انا قريت الموضوع ده قبل كده
    بس حبيت اعرف هو قاعد فين دلوقت فى ازبيتالية المجاذيب؟

    ReplyDelete
  23. لن يغير الله ما بقوم حتى يغيروا ما بانفسهم
    لازم انتو ترغبو بالتغيير علشان تقدروا تغيروا
    لازم قبل ما نطالب بالتغيير
    نغير نفسنا يا ياسمين
    بوسن حلو يا قمر
    تحياتى ليكى

    ReplyDelete
  24. عدناااااااااا
    ازيك يا ياسمين .. تعبى والشغل الفترة اللى فاتت منعونى بس من التشريف وآسف لهذا
    أنا مش جاى اعلق على البوست انا جاى بس أطمن عليكى واقوللك انتى فين من زمان ويا رب تكونى بخير ويا رب ينجحك فى البحث بتاعك يا رب..
    دعواتنا ليكى ان شاء الله
    وطمنينا عليكى

    ReplyDelete

الكلمـة نـور .. وبعـض الكلمـات قبـور