Sunday, March 11, 2007

جعلونى مجرماً



احياناً كثيرة بتحطك الظروف فى مواقف معينة ولا ليك اى دخل بيها


المهم مش هطول عليكوا


بابا كان فى المستشفى زى ما قلتلكوا


وده معناه إنه محتاج أجازة مرضية


والاجازة دى بتتاخد من التأمين الصحى


وما أدراكوا ما التأمين الصحى


المهم كله تمام لحد كدة


اخويا الله يكرمه مشى فى الموضوع ده


وفضلوا يمطوحوا فيه يمين وشمال


واطلع الدور الفولانى


لالالا .. إنت ايه اللى جابك هنا


إنت تروح لمدام فلانة الفلانية فى الحتة الكاميكازية


المهم الواد صبر عليهم لحد ماقلولوا لازم الدكتور يعمل زيارة منزلية وبناءاً عليها يكتبله الاجازة


الواد ياعينى فضل ورا الدكتور لجد ما جه وكتبلنا الجواب


مكتوب فى جواب الاجازة ده بقا ان اخر يوم فى الاجازة يكون امبارح


وطبعا المفروض نروح نجدد الأجازة


لجل حظى التحفة .. الحمد لله على كل حال طبعا


اخويا حبيبى طلع مش فاضى امبارح عشان يروح للتأمين عشان يعمل اجازة تانية


وطبعا عشان الاجازة مش اتعملت يبقى لازم والدى يروح الشغل بنفسه


عشان نحاول نديهم الجواب بالأجازة اللى فاتت ونعمل طلب بأجازة تانية


هونها علينا يارب


روحت مع بابا الشغل الساعة سابعة صباحاً النهاردة


وزمايله الحلويين تكاتلوا عليه


وازيك


واخبارك


ووحشتنا


لغااااية ما قالولى اقعدى استنى شوية لحد ما نخلص الاوراق دى ونجيلك


طب خلوا بالكوا منه-


قالولى حاضر-


تيب-


قعدت جمب واحدة من زمايل بابا


قالتلى لأ ده باباكى ده راجل أمير


الله يكرمك يا طنط


إنتى بتدرسى بقا؟؟؟-


ايون ... كلية إقتصاد-


إقتصاد منزلى؟؟؟؟؟-


رديت بكل الغيط اللى فى الدنيا


إقتصاد وعلوم سياسية حضرتك-


يا ما شاء الله يا ما شاء الله-


كنتى جايبة كام فى الثانوية العامة بقا؟؟؟


آه هنبدأ نقر بقا


جبت 94ونص% حضرتك-


وفى سنة كام بقا-


سنة رابعة-


يلا هانت يابنتى ربنا معاكى-


يااااااااااااارب-


وبدأوا باقى الزمايل يجوا والقاعدة إحلوت


اللى بتحكى على البنات والبلاوى اللى بينيلوها فى الشوارع


واللى بتحكى على منظر فاسد لشاب حوليه بنانيت كتير


حاجة ترفع الضغط على الصبح فعلا


بس انا لسة الساعة 7 ومش شايفة قدامى لأنى نمت 3 الصبح للأسف


حاسيت انى هنام مش قادرة قمت حاطة السماعة فى ودنى ومشغلة الراديو


وجت حاجة لفيروز تقريبا عالامونى .. حاجة كدة فى اللامون


المهم مخدتش فى بالى .. اهم حاجة انى منمش


شوية وخدوا بالهم إنى مش تبعهم


مين الأمورة؟؟؟-


قصدهم عليا ههههههههههه


انا بنت الأستاذ فلان


ايوة تصدقوا شبهوا-


والله يابنتى باباكى راجل محترم جدااا-


كتر خيركوا يا جماعة-


إنتوا هتقولولى عليه؟ .. ده حبيبىىىىىى


بتدرسى؟؟؟-


هى صورة؟؟؟؟؟؟؟؟؟؟


ايون-


الأستاذة الأولانية اللى حققت معايا قالتلهم تاريخ حياتى بقا


إنبهجوا إنبهاجة كاميكازية


ايوة كدة اتجدعنى واطلعى سفيرة ولا وزيرة ولا حاجة-


خير من يمثلكم ... كاميكاااااااااااااز


رجعت السماعات تانى لغاية ما بابا جه


واكتشفت انهم مش رضيوا يعتمدوا الأجازة لأن فى تضارب فى التواريخ


وكاتبين إسم بابا غلط


كماااااااااااااان؟؟؟؟؟؟؟؟؟؟


المهم بقا


طلعنا من الشغل على التأمين الصحى


وما أدراكوا ما التأمين الصحى


لازم عشان ياخد الاجازة يعدى على الدكتورة ويدولوا ادوية وحاجات من دى


طلعنا نشوف


ولا كشفت عليه ولا حاجة يا نااااااااااس


شافت الروشتة وصرفتلوا زيها وبس


طيب يا جماعة اعمل اجازة ازاى؟؟؟-


قالولوا مرضة السكر مش ليهم اجازة


عشان دى امراض مزمنة


امراض مزرجنة ازاى يعنى مش فاهمة؟


يلا مش مهم


بعد كام مشوار كدة من وجع القلب


واطلعى هاتى كذا وانزلى اشترى كذا وروحى امضى كذا


اخيرا طلعت من المبنى المرعب بتاع التأمين


وحاولنا نروح


ربنا ستر فى تعدية الشارع الحمد لله


وقفت ميكروباظ عشان نركب


ركبت انا وبابا جاى يطلع


الاقى السواق بيقول : يلا يا حاااااااااج


قلتله برااااااحه عليه


وعنيا بطق شرار كدة


المهم روحنا البيت مش شايفة قدامى والله


صليت الظهر ونمت شوية عشان عندى محاضرة الساعة 3


صحيت ونزلت .. الدنيا متربة وحر اوى كدة ليه


المهم فضلت واقفة فى الحر


إن عربية تعبرنى؟؟؟


أبدااااااااااااااااااااااااااااا


هاعمل ايه يعنى ادينى واقفة مستنية


الاقى عربية روبابيكياااااااا معيدة فى الشارع العمومى تخيلوا؟؟


وبعدين جه واحد كبير فى السن وقف قدامى وقعد يبصلى كتير كدة


قلت يمكن فاكرنى بديعة بنت اخته ولا حاجة


يابنتى طنشى


لغاية ما الحمد لله ربنا كرمنى وركبت


وطلع الشارع واقف كالعادة


ونوسة صحبتى عمالة ترنلى بما يعنى ان الدكتور دخلت خلاص


اعمل ايه يعنى ....... اطير؟؟؟؟؟؟؟


نزلت عند الجامعة اجرى واركب تانى واجرى تانى


لغااااااااااااااااااااااااااااااية ما وصلت للمحاضرة


كنت مهيسة على الآخر ومش شايفة قدامى من المشاوير الكاميكازية اللى فاتت


المهم الدكتور قعدت تقولنا ايه اللى علينا فى الكتاب اللى لسة مستلمينه


طلعت مخلصة الكتاب تقريبا وهتدينا كتاب تانى غيره


يالهوووووووووووى


مش تسكت بقا عشان مش نقوم ناكولها


لأ إزاى


لا يا سنة رابعة احنا بنعب نفسنا معاكوا-


ونديكوا معلومات وتطلعوا من الإمتحان مش فاكرين حاجة


وده عيب فيكوا إنتووووووووووو


لاااااااااااااااااااااااااااااااااااااا


محدش يحوووووووووشنى


قمت هابة فيها


لأ يا دكتور .. إنتوا بتدونا معلومات كتيرة اوىىىىىىىى-


ومعلومات كتيرة متكربسة تساوى زيرو


صفر يعنى


لولا نوسة ولوءة قعدوا يهدوا فيها كان زمانى واخدة فيها ساعتين فى القسم


يلا المسامح كريم


خلصنا وروحنا


وركبت مينى باظ


قلنلاه يقف عند حتة معينة راح وقف قبلها


عادى برده مش مشكلة


الناس اللى قدامى نزلوا وانا جاية انزل


الاقى التباع بعلوا حسه


يلا يا آآآآآآآآآآآنسةةةةةةةةةةةةةةةة


نزلت وقلتله بحده


براااااااااااااحة


اعتقد انه رد عليا بس انا طنشت الصراحة


كان عندى إحساس فى اليوم ده إن اللى هيقولى بـــم هينضرب

.

بس هو انا رغيت كتير اوى كدة ليه؟؟؟؟

.


يلا اسيبكوا بقا عشان الواد كاميكاز عايز يقفل المدونة

.


إلحقوووووووونى

قفل الباب على صوباعى

37 comments:

  1. ربنا يدى بابا الصحة و يديكى انت كمان
    الظاهر كاميكاز ما نامش هو كمان
    قفل على صووباعك من التعب معلش
    هو نايم دلوقت لما يصحى اشدلك ودانه

    ReplyDelete
  2. علموني .. بقت حاجة لمون كده ..
    ومالها الاقتصاد المنزلي .. المهم ما يجيش يوم تتمني إنك تكوني خريجة اقتصاد منزلي بدل اقتصاد وعلوم سياسية .. وفي مصر دا ممكن يحصل .. شوية إحباط ونكد
    وبعدين أنا مش فاهم .. إنتو بتناقشوا الدكاترة .. عادي يعني ؟ دا مسموح بيه في القطر المصري ؟؟ .. أصل أيامنا كان الحاجات دي عيب قوي ..
    المهم سلمي لي على كاميكاز باشا .. وبلغيه شكري

    ReplyDelete
  3. تعبا كلها الحياة ياست انسانه
    معلش
    مضطرين نعيشها بحلوها ومرها
    انما كله بيعدى
    وكله بيتنسى فى الاخر

    شدى حيلك انتى بس وأتجدعنى
    وشوفى مذاكرتك
    وربنا يوفقك

    سلام

    ReplyDelete
  4. اهم حاجة في الموضوع صباعك ما يجرالوش حاجة
    والف سلامة على بابا
    باي باي يا جميل

    ReplyDelete
  5. ومن الغيظ تخرج البسمة والضحكة
    ورغم فعلا اني قرفان ومتضايق ومعرفش انا جيت هنا ازاي
    رغم ذلك لم أندم
    سلامي لبابا ربنا يشفيه

    وتحياتي

    ReplyDelete
  6. الاول ربنا يدي الحاج الصحة ويبعدة عن التامين والدكاتره كلهم

    بس بجد ربنا يكون في عونكم دول عالم تجيب المرض لوحدها بتوع التأمين دول

    ReplyDelete
  7. الاول ألف سلامة على بابا
    ثانيا: احب اقولك مقولة سنعتها قبل كده
    "موظفين مصر بيشتغلوا على بعض"
    بمعنى لو فيه موظف بيأدى وظيفة معينة فى 50 موظف تانيين شغالين على الموظف الاولانى
    واحد يعمله شاى و واحد يعمل مدير عليه و واحد يعمله المرتب وواحد يقبضه وواحد يراقبه وواحد يديله اجازات و واحد يشوف حضوره وانصرافه وواحد يطرقعله صوابعه .......


    يلا حسبنا الله ونعم الوكيل

    ReplyDelete
  8. هههههههههه

    ياه يا ياسمين

    دة يوم واحد بس

    تخيلى بقة لو بدورى على شغل فى الوزارات

    ومن الوزارة دى للوزارة دى

    وكل واحد يقولك

    لاء مش هنا

    الأعلان نازل على الحته الفلانية

    وإللى يقولك لاء أحنا وكلاء نيابة

    يعنى بلاش غلط بقة

    وعادى بقة

    وربنا يقوملك أبوكى بالسلامة

    ألا صحيح إنتى قلتيلى إنتى من فين بالظبط ؟؟؟




    دارى إيدك يا خاااااااال دم هنادى بينقط منهم



    جولتلك هنادى خدها الوبا




    وعادى بقة
    أودى

    ReplyDelete
  9. ايه ده كله يا بنتى ؟


    اسالينى انا عن الايام الصعبة دى

    مبقعدش اسبوع من غير ملبسلى يوم كده


    هييييييييييييييييييه

    دنيااااااااااااااااا


    لا اله الا الله


    ربنا يعينك يا ياسمين



    ويعينا كلنا

    ReplyDelete
  10. lol u closed the door on ur finger bravo 3leky ya benty

    7at2olili 3la el ta2min el se7y ay 7aga 7okoma keda rabna yhdehom b2a

    b2olk ih sa7i7 law 3awza a3mal makrona bel bashmel ezai b2a we ih el mokwenat

    msoh ektesad manzli brdo ?????????

    ReplyDelete
  11. يا فندم سلامة الوالد الف سلامة
    ومشاوير التأمين دي امر لابد منة علي كل مصري
    زية زي الصلاة و الصوم

    ربنا يعنيكو

    ReplyDelete
  12. يابنتي انا قلتليك انا اتشلت في نص السكه انتي اشتلتي امتي بقي الاول سلامة والديك و ثانياااااااااااااااا ربنا يرحمنا من الروتين المصري المقرففففففف و غير كدا الولاية بتاعت اقتصادد منزلي واحده بتشتغل ياعني المفروض متعلمه تقولللل الكلمه دي استغفر الله العظيم يارررب

    ReplyDelete
  13. ربنا يقوى ايمانك
    و كويس انك حضرتى الحوار فى الجهات الحكومية علشان تاخدى مناعة منها لو اشتغلتى حاجة حكومية
    و اعتقد بعد اللى حصلك ده مستحيل تاخدى الخطوة دى
    تحياتى و مدونتك جميلة اوى
    تحياتى
    بحرى أنا :)

    ReplyDelete
  14. يا سلاااااام
    دي مصر يا عبله
    مش عارف اقةلك معلش ولا حاجه لان لسه في من ده كتير لحد ما تتولى سفارة مدغشقر ولا حاجه
    قريتى كتاب خمسين طريقه ناجحه للانتحار
    لأ
    طيب
    أول ما اكتبه وانشره هابعتلك نسخه هديه

    ReplyDelete
  15. بس يابنى انت بتلعب فى أخوك ليه :S

    معلش يا سيمو يا حبيبتى أهو يوم و كويس انه عدى على خير
    يا رب السنة كلها تعدى على خير :'(

    ReplyDelete
  16. يالا يابنتي الحمدلله انك رجعتي بالسلامه سواء من التأمين الصحي أو من الكليه
    وأدي اليوم كله عدي, وبقي زكري.

    ReplyDelete
  17. مهو ده الروتين في التامين وغيره عليه العوض ومنه العوض في البلد المهم ربنا يدي لبابا الصحه ويبعده اهنيكي علي البوست الجميل ده وياريت تبقي تشرفيني

    ReplyDelete
  18. انسانه
    اولا الف سلامة على بابا
    ثانيا احنا الروتيين اعتقدانه فى الجينات بتاعتنا
    ثالثا
    مين كاميكاز ده؟

    ReplyDelete
  19. ممكن تبعتيلى حكاية الست المجنونه اللى قابلتك ف الاتوبيس شان نرسمها
    لو تسمحى يعنى؟
    mak_cartoon@yahoo.com

    ReplyDelete
  20. مرحبا بك في عالم المصالح الحكومية يا عزيزتي..
    انتي كنتي فاكرة زي امريكا ناس قاعدة بتشتغل قدام كمبيوترات وبتخلص شغل والحاجات دي؟
    شعار المصالح الحكومية..انا موظف اذن انا مسئول عن عكننة الناس وتدويخهم ومخاطبتهم بقلة ذوق لحد ميدفع الابيج ساعتها مصلحته تخلص وهو واقف
    ده غير الرغي واللت والعجن والكربسة والستات اللي مش وراها حاجة غير الرغي
    هي الدنيا مش سودا ولا حاجة احنا بس جيل مينفعناش الموضوع ده ولا حنتعود عليه
    الف سلامة لبابا تاني

    بالمناسبة:بلاش شغل جيفارا مع دكاترة الجامعة لانك ممكن تقعدي في سنة رابعة لحد معيالك يبقو معاكي في نفس السنة
    اسمعي كلام اخوكي الكبير الواحد يامامشاف في ليالي الكلية والحكومة دي
    يلاسلام بقي وسلميلي ع الواد كاميكاز

    ReplyDelete
  21. عسولة يا انساناز
    :)
    حكيتي عن يوم متعب بلذاذة و تشويق ربنا يشفي باباكي و تطمني عليه
    و صدقيني ايام الجامعة دي احلى ايام
    استمتعي بيها اد ما تقدري

    بالتوفيق ان شاء الله

    ReplyDelete
  22. اولا الف حمد لله علي والدك وشفاه الله وعفاه
    ثانيا دي صوره مصغره من كل الاماكن والاشغال في مصر الا من رحم ربي
    بس عارفه تنفعي سيناريست من الوصف الدقيق ده
    سيبك من الاقتصاد المنزلي :)))واشتغلي في السينما

    ReplyDelete
  23. السلام عليكم
    أول أما قلتي التأمين الصحي صعبتي علي من غير أما أكمل
    المهم
    يارب والدك يكون بخير دلوقتي و ياريت بلاش موضوع التأمين علشان ميتعبش أكتر
    و بمناسبة الدكتورة معلش هترجعي تحني للأيام دي قريب مش مصدقاني طبعا بس هتشوفي
    و بمناسبة لعزيزي سائق الميكروباص أنا بأحترمهم جدا جدا جدا
    و السلام ختام

    ReplyDelete
  24. khaled

    اللهم امين ربنا يكرمك
    كاميكاز ده خلاص بقا إجرام على الاخر
    لو ينفع تاخده معاك المعتقل وتريحنى منه يبقى كتر خيرك

    ــــــــــــــــــــــــ
    ma_3alina

    عايزة اقولك ان الاقتصاد المنزلى برقبة الاقتصاد التانى .. على الاقل بنسفيد وبناكل اكلة شهية فى الاخر

    لا ماهو حضرتك مش واخد بالك
    هما بيسبونا نتكلم ونقول اللى فى نفسنا واللى فى دماغهم هو اللى بيتنفذ فى الاخر برده

    عادى يعنى

    وبعدين نفسى اعرف بتشكل كاميكاز على ايه؟؟ على صباعى المدوحس؟؟؟


    ـــــــــــــــــــ
    حسن محمود

    وهى دنيا ماشية
    ربنا يخرجها منها على خير

    وعليكم السلام

    ــــــــــــــــــــ
    فلة

    الله يسلمك
    وحشانى والله فينك؟


    ــــــــــــــــــــ
    حائر فى دنيا الله

    مش تستغرب جيت هنا ازاى
    اصل الواد كاميكاز مركب مغناطيس تحت عقب الباب
    هههههههههه
    الله يسلمك
    اللهم امين


    ــــــــــــــــــــ
    king a.s.r

    امين يارب
    فعلا حاجة ترفع الضغططططططططط


    ــــــــــــــــــــ
    مشروع بطل

    الله يسلمك
    خمسين بس؟؟؟؟؟
    فعلا حسبى الله ونعم الوكيل


    ــــــــــــــــــــ
    أودى

    نزلت ودورت على شغل كمان وجالى إحباط
    عاااااااادى خالص

    يارب انا وانت وكل شباب مصر يلاقى شغل
    اميييييييين


    ـــــــــــــــــــ
    زودياك

    معلش كلنا لها
    امين يارب
    ويعينك انت والمتكاظين كلهم

    ــــــــــــــــــــ
    مااااا علينا

    إنتى مش تعرفى انى عضوة فى رابطة مشجعى المكرونة البشاميل ولا ايه؟
    من عينى يابنتى ماما بتعملها حلو اوى
    ويحيا الاقتصاد المنزلىىىىى

    ـــــــــــــــــــ
    ana ga3an

    يادى النور يادى النور
    الاستاذ الجعان مرة واحدة عندنا
    اهلا بيك يا فندم

    ربنا يصبرنا على حالنا كلنا
    الحمد لله على كل حال


    ـــــــــــــــــــــ
    Copa

    ههههههههههههه
    ماتعبش فى الاقتصاد المنزلى عشان انا نفسى حلو فى الاكل
    بيقولوا كدة
    هههههههههههههه

    ذاكر كويس يا كبكب

    ــــــــــــــــــــ
    r2k

    :D

    ـــــــــــــــــــ
    mohamed gouda

    ربنا يكرمك يافندم
    واهلا بيك لاول مرة عندنا


    ـــــــــــــــــــ
    أحمد سلامة

    مدغشقر حتة واحدة؟؟؟؟؟؟؟

    يلا احسن من بلاش
    هو حد طايل

    مش تنتحر ربنا يكرمك
    مش ناقصة العملية والله

    ــــــــــــــــــ
    نوسة

    سيبى الواد يتمرن فى اخوه يابنتى

    الحمد لله على كل حال
    ياااااااارب تعدى على خير يا نوسة


    ــــــــــــــــــــ
    إسراء

    هازاكر اهوه بس ادعيلى الله يكرمك
    على فكرة انتى وحشانى خالص مالص
    :D

    ــــــــــــــــــ
    fares

    ربنا يكرمك يا استاذى
    واهلا بيك لاول مرة عندنا


    ـــــــــــــــــ
    الفنان مخلوف

    اولا الله يسلمك
    ثانيا : للأسف
    ثالثا: كاميكاز ده حد مهم جدااااا
    إزاى تكون مش عارفه؟؟؟


    ـــــــــــــــــ
    الفنان مخلوف تانى
    ههههههههه

    كان بودى بس اللى حصل مايتحكيش والله
    الحمد لله انه عدى على خير
    ماتفكرنيييييش


    ــــــــــــــــــــ
    أحمد عيسى

    عندك حق
    بلدنا ومصر هى امى وبنت خالتى
    هنعمل ايه يعنى

    كاميكاز بيسلم عليك اوىىىى

    ـــــــــــــــــ
    سمباتيك

    بنفسها عندنا؟؟
    يا مرحبا يا مرحبا

    ادعيلى ده انا طالع عينىىىىى
    ربنا يستررررر
    ياااااااااارب

    ــــــــــــــــــــ
    محمد مفيد

    سيناريست مرة واحدة؟؟؟
    كتر خيرك والله
    اهوه الاقيلى شغالة لو الاقتصاد زمزأ معايا ولا حاجة


    ـــــــــــــــــــــ
    No Fear

    وعليكم السلام
    اللهم امين

    هى فعلا احلى ايام
    بس يارب تكمل وتعدى على خير
    اللهم امين

    ReplyDelete
  25. ياااااااااه ده انتى تعبتى اوى بس عاااااادي
    الروتين واللى اخترعوا الروتين
    وبعدين كويس انهم ماقالولكيش هاتى ورقه بتقول فيها والدك جالوا السكر من ايه موقعه عليها من 2 موظفين لا يقل مرتبهم عن 5000 جنيه وحليني بقى
    وبعدين اتناقشيش الدكاتره ابدا عشان تطلعي سليمه من الكليه
    المهم سلامة صوباعك ونصيحه روحي التأمين عالجيه
    ههههههههههه

    ReplyDelete
  26. ربنا يصرف المرض عن والدك

    عادي مش تستغربي مهو دي مصر يعني بلد الروتين والمبدأ فيها انك لازم تتعب في الحاجه علشان تحس بطعمها في الاخر علشان كده كل حاجه تيجي تخلصيها في اي مصلحه حكوميه او طبيه او غيرها لازم يطلعوا روحك الاول ويتوصوا بيكي لحد ما تقبي بحته بخمسه ولا بعشره من جيبك تلاقي المصلحه قضيت

    جميل اسلوبك كتير ومدونتك لذيذه

    تحياتي لك

    ReplyDelete
  27. ربنا يشفي باباكي يارب و يقومه بالسلامة و ان شالله ربنا يعدي الفترة دي علي خير

    اما بقي عن بقية اليوم من اول الصبح و زمايل باباكي لحد الدكتورة و ما روحتي فمرحبا بك في مصر

    ده الطبيعي يا ماما

    معلش ربنا معاكي

    واغنية فيروز اسمها علموني حبك علموني

    حرام عليكي تخليها لمون

    عاااااااااااااااااااا

    ReplyDelete
  28. باباكي عامل اية النهاردة؟
    على فكرة الصورة تحفة تهلك من الضحك

    تحسي ان البنوتة بتقول
    اي دو ات

    هههههه

    ReplyDelete
  29. اييييييييه ده
    انا مجيتش هنا ازاي قبل كده

    اولا يا بنتي احمدي ربنا ان مشوار التأمين الصحي عملتيه مره واحده بس ومش مضطره حاليا تعملي كذا مشوار حكومي زي مبيحصل مع اللي زي حالاتي بعد وفاه والدي رحمه الله

    وروح بقا مش عرف عند مين علشان تعمل ايه وارجع تاني هات ايه

    وموااااااال كل شوية يتعمل علشان نخلص اوراق وافلام هندي

    احمدي ربنا

    عايز اتكلم عن الحته بقا اللي متفق معاكي اوي فيها
    وهي ان الدكتورة بتدي معلومات كتير
    وده بيخلي الحصيلة صفر

    تعرفي مشكلتنا اننا مش بنفكر كده
    جربي كده روحي اشرحي لبنت عمة خالة جارتك

    ايوه البت اللي في 2 ثانوي دي
    جربي تشرحيلها كده
    بس ماده تكوني بتحبيها
    وشوفي الكمية اللي حتشرحيها اد ايه
    وحيتهيألك انك مشرحتيش حاجه
    والبت يا حرااام حتبقا بتموت اساسا

    ودي مشكلتنا
    وربنا يهدي الدكاتره دول

    وبجد مبسوط اني عديت من هنا
    وان شاء الله حاجي كل شوية
    مش كنتي بتقولي مش لاقية مواصلات
    :)

    ReplyDelete
  30. هههههههههههههههههههههههههههههه

    يا عيني عليكي يا ياسمين
    اتبهدلتي ياضنايا
    عشان تعرفي بس مصيرك ايه لما تكبري اهو تستعدي

    فكرتيني في مرة رحت لبابا المستشفي اللي كان شغال فيها
    يا لهووووووووووووووووووووووي

    تقوليش عروسة مولد والنمل اتلم عليها
    واسئلة بقي من اللي قلبك يحبها
    عشان كدة حاسة بيكي

    وبعدين تباعين الميكروباز والسواقين عنهم حق يزعقولك

    اصل نتي بتتلكعي كتير وبطيئئئئئئئئئئئة
    دة حتي كاميكاز اشتكي منك عشان كدة قفل المدونة علي صباعك
    بس تعيشي وتاخدي غيرها
    هههههههههههههههههههه
    واوعي تخلي كاميكاز يقفل المدونة تاني
    وربنا ينجحك يارب
    مشمعقولة اكون بكتبلك كومنت وبكلمك في المسانجر في نفس الوقت ايه الصداع دة

    ReplyDelete
  31. الكلام نوعان

    يالهوى اروح اعالجه هناك
    مستحييييييييييييل
    ده انا كنت همسك فى خناق مدير المستشفى هناك والله

    يلا حصل خير إن شاء الله

    ـــــــــــــــــــــ
    3lool

    اااااه يابلد
    بجد خلاص ربنا يصبرنا على البيروقراطية دى

    ربنا يكرمك يا علول
    بس هو يعنى ايه علول؟

    ــــــــــــــــــــ
    ody911

    يااااااارب

    ــــــــــــــــــــ
    dyin_soul

    ربنا يكرمك يابوبتى ياحبيبة قلبى يارب
    الكومنتات نورت

    ايون حاجة فى اللمون كدة
    لسة صاحية من النوم يابنتى الساعة 7 ومش فاهمة حاجة اساسا

    معلش استحملونى لما بهبل بقا
    :D


    ـــــــــــــــــــــ
    دنيا فهمى

    عودا حميداااااا
    ;)

    ـــــــــــــــــــــ
    Sampateek

    الحمد لله احسن من الاول بفضل الله

    شوفتى الإجرام
    عمل فرح فى وش اخوه
    اعتقد انه ولد مش بنت
    ولا إنتى ايه رأيك؟؟؟؟


    ـــــــــــــــــــ
    زحل الفلكى

    لا إنت جيت على فكرة بس روحت وقولت عدولى
    وكاميكاز بيتلخبط من العد فبطل يعد
    عادى يعنى

    رحمة الله على والدك وربنا يرحمنا من الروتين والبيروقراطية المصرية الكاميكازية يارب

    بس على فكرة انا روحت اكتر من 3 مرات تقريبا
    لغاية ما فى الاخر روحت للموظفة قالتلى لأ التاريخ بعيد عن الختم
    كنت هعيطلها والله
    صوعبت عليها
    ودلتنى على الرئيسة بتاعتها لو وافقت ومخدتش بالها هتمشيها مش مشكلة
    نزلت دورين وطلع عينى وقعدت ادعى عشان ماتخدش بالها من الخطأ الفادح ده
    الحمد لله فعلا مخدتش بالها والموضوع مشى

    واخيرا الاجازة إعتمدت بنجاااااح

    وربنا يسترها معانا كلنا ياااااارب

    على فكرة بطلوا حجج لإن المواصلات للمدونة متوفرة فى كل حتة
    هتلاقى ميكروباظ كاميكازى جواه التباع الكاميكاز بينادى بعلوا حسه ويقول
    كاميكااااز كاميكاااااز كاميكاااااز

    تقوم هوب وراكب على طول
    هتلاقى نفسك هنا فى السريع

    شوفت سهلة ازاى؟

    ــــــــــــــــــــــ
    نووووووووجى

    ايه ده الكومنتات نورت يابنتى

    هههههههههههههههههه
    مش طيقانى لا فى الماسنجر ولا فى المدونة
    هو انا قاعدة على قلبك يابنتى؟
    ايه الناس دى

    ReplyDelete
  32. الف سلامة على بابا

    و قولي لكاميكاز انا جايبله تورتة مخصوصة له عشان نجحت

    :)))))))

    ReplyDelete
  33. ألف سلامة علي باباكي وربنا يديه الصحة إسأليني بقي زنا علي التزمين الصحي لأني ملدوعة منه بردة زنا بقي كنت تعبانة وتقريبا نايمة علي ظهري مبتحركش لمدة شهر كان بداية حملي والدكتور قالي كدة لازم رنتي وضع خاص المهم ياستي بعد الشهر مخلص وقرت ققوم علي رجلي وبابا ومامامسندني علشان نروح التزمين يولفقلي علي أجازة الشهر دة وعلشان ميتخصمش من الراتب الدكتور البطوط قسلي الضغط رالحاجات دي

    ReplyDelete
  34. شافاه الله وعافاه باباكى

    بجد مدونة رائعة

    بارك الله فيك أختى الكريمة وفى أسلوبك الرائع

    ReplyDelete

الكلمـة نـور .. وبعـض الكلمـات قبـور