Monday, April 02, 2007

أوقات

.
أوقات احس إنى مخنوقة
وانى مش مهمة عند حد خالص
وان طوب الأرض لو نطق
هيقول انه بيكرهنى
وأوقات احس إنى فرحانة
مبسوطة كدة من غير سبب
وانى لو شوفت قطة فى الشارع
هتضحكلى وتقولى بحبـك
وأوقات احس ان أيامى بتعدى من بين إيديا
تسيبنى وتحلف ما ترجعلى تانى ابدا
وإنى كمان نسياها خالص
مش فاكرة منها غير انها مشيت وسابتنى
.
مجرد أوقات .. بعيشها وبتعيشنى

53 comments:

  1. كلنا بيمر علينا وقت بنحس فيه احاسيس غريبه
    وبنحس فيها بوحده فظيعه
    وللاسف الحاله دى انتشرت مؤخرا بين ناس كتيره اوى
    انا حاولت اعرف ايه السبب بس بلاقى ان الكل بيبقى مش عارفه
    ياربت تبقى احس والاحساس ده مش يطول
    تحياتى

    ReplyDelete
  2. الايام اجمل ما فيها هوه التغير و احلى ما فيها انها يوم كده و يوم كده زي ما قالو كتبت علينا خطا مشيناها و مشيناها خطا كتبت علينا بتيقلي قالو كده ...مش عارف

    ReplyDelete
  3. وانى لو شوفت قطة فى الشارع
    هتبتسملى وتقولى .. بحبك
    :) اكيد ماتقصدكيش
    اللحظات الحلوه بالحياه بس هي لحظات وبتمر
    وبنحس طعمها بس لما بتيجي بعد لحظات صعبه
    حكايه انك تحسي ان مالكيش لازمه
    دي لحظات تجديد هدفك في الحياه
    ومن غيرها يبقي فعلا مالناش لازمه

    ReplyDelete
  4. هيا دي الحيـــاة يا ياسمين ، أنا أكثر حاجة بتخليني متحير الأصـــل هوا الحزن ولا الفرح !!! ................


    يمكن من فترة كـده الدنيا ابتسمت لي ، وبعدين كشررت تاني
    على رأي واحد صاحبي شاعر :

    واهي دايرة وبتدووور


    بوست حلو يا إنسانة :)


    وواحشاااانـــاااا


    فييييينــــك ؟؟؟ما بتظهريش ليييه ؟؟؟

    ReplyDelete
  5. تباين الاحساس عند الفرد هو من علامات كون الفرد صحيح نفسيا
    يعني مرة نكون زعلانين ومخنوقين ومرة نكون فرحانين و مبسوين
    بوست هايل يا انسانه
    تحياتي
    الدبور

    ReplyDelete
  6. هي الدنيا كده يوم فوق و يوم تحت يوم يمين و يوم شمال يوم فرح ويوم حزن..يوم ليك و يوم عليك..احييكي على مدونتك الجميلة ديه

    ReplyDelete
  7. طول عمر الحياة كده
    لو دامت لاحد ما وصلت اليك
    لكن انتى فى اى حالة فيهم؟
    ربنا يزيل همومك و ايانا

    ReplyDelete
  8. لا مش تقولي كدا يا ياسمين الواحد لما بيبقي حزين او مخنوق او محبط بيحس ان كل حاجه حوالية بتكرهه مع انها متغيرتش بس دي طبيعة كونية و غير كدا اانا حاسس انيك بتمثلي علينا كدبة ابريل يعني هههههههه روائي نحن هنا

    ReplyDelete
  9. ســبحان الله هذه الدنيا
    ربنا يصلح حالك ويزيح عنك ياااااااااارب امين

    ReplyDelete
  10. عادى يا ياسمين تقلبات فى حياتنا كتير و لازم نعيشها
    أوقات مغيبين و أوقات عايشيين
    أوقات فرحانين و أوقات زعلانين

    المهم نحاول مانتوهش و مانطولش فى الغيبوبة و الزعل عشان ماتضعش منا الدنيا من غير ما ناخد منها اللى هايريحنا فى الآخرة

    ربنا يهدينا و يصبرنا و يثبتنا جميعا يا رب

    ReplyDelete
  11. أوقات يادنيا معاكى بعيش
    وساعات مبفهمكيش
    وانتى ولا فاهمانى

    معلش ياياسمين
    الحياة عاملة زى موج البحر
    كل ثانية بتتغير

    ReplyDelete
  12. شيئ طبيعي إنك تفكري كده .. أنا في أحيان كتير بفكر كده .. الطبيعة الإنسانية متناقضة .. إحساسك ده نتيجة منطقية لازمة عن التناقض اللي جوايا و جواكي و جوا الناس كلها .. كل نفس ربنا ألهمها الفجور و التقوى .. ابتلاء الدنيا الأساسي إن المرء يميل ناحية الجزء التقي فيه على حساب الجزء الفاجر .. كلامك بجد حساس أوي .. دمــتــي مــســلــمــةً , دمــتــي انــســانــةً

    ReplyDelete
  13. يوم ليكي
    ويوم عليكي
    مش اغنية لأ

    بجد استفادي من الايام اللي عليكي
    اكثر من الايام اللي ليكي

    تحياتي

    ReplyDelete
  14. أوقات يا دنيا معاكى بعيش


    وساعات مبفهمكيش

    وانتى ولا فهمااانى


    اوقات بحس ان انا مجروح

    عايش حلاة روح

    ودمعتى محوطانى


    صابر عاللى بيجرالى

    وانتى لا ليكى عزيز ولا غالى



    اوقات فى عز العتمة بشوف

    وساعات بموت من الخوف

    وغصب عنى بدارى

    بحلم يعدى عليا الليل

    من غير عذاب ولا ويل

    وتحسى مرة بنارى


    صااابر عاللى بيجرالى

    وانتى لا ليكى عزيز ولا غالى


    اوقات بتاخدى اعز الناس

    واقول نصيب وخلاص

    واصبر على احزانى

    أوقات بحب قلوب بتبيع

    وفى الف لحظة بضيع

    وبرضه مش حسااانى


    صااابر عاللى بيجرالى

    وانتى لا ليكى عزيز ولا غااالى


    ملقتش تعليق غير ده أقوله

    :)


    إسمعى الاغنية وقوليلى رأيك

    ReplyDelete
  15. أحمد فؤاد قال التعليق اللي انا كنت هقوله.
    ماشي ياحمد.
    هي فعلا بتبقي أوقات, بس الحلو ان الأوقات الوحشه بتعدي, وان الأوقات الحلوه بتكرر تاني (:

    ReplyDelete
  16. الحياه سلسه من الحظات
    متكررةاو منفصله
    ولكنها فى النهايه لحظات وبتمر
    وتبقا ذكريات
    بس موضوع القطه ده غريب
    هى دائما الناس بتبتسم للى تحبو او تعرفو او من نفس النوع
    ههههههههه
    تحياتى

    ReplyDelete
  17. دايما بنحس باحساس الأفتقاد ده على فترات متباعدة ,, شعور بيجتاح الواحد , حنين لحاجة معينة مش عارفين ايه هى

    بس هتعدى

    ReplyDelete
  18. مفيش حاجة بتفضل علي حالها
    لازم زي ما بتمر لحظات كويسة هتمر لحظات صعبة واحساسنا بالالم او الوحدة بيخلونا لما تمر اوقات حلوة نحس فعلا بطعمها . ربنا يريح قلوب الناس كلها

    بجد وحشاني اوي

    ReplyDelete
  19. اوقات ننسحب لتيار يجرفنا ولا نعلم الي اين
    ولكننا مستسلمين كنوع من التجربة لعله يكون خير
    دائما ما كنا نتواصل
    ولكن كان هناك شئ مفقود غريب
    مثل ان ينمي لعلمنا بان طريقنا لا امل له ولا نهاية
    وكل ما يسعنا ان ننظر خلفنا لامسنا ونضحك مهما كان مروره علينا صعب او حزين
    ولا يسعنا غير ان ننظر للامام ونبتسم ايضا
    عل ايامنا تخدع بتلك الابتسامة فترسل لنا يوما بشوش مبتسم
    ننظر لليمين ونبتسم مذكرين ملك اليمين باحضار كل خير وان يكتبه لعل تكون ايامنا مبهجة من عملنا
    وننظر لليسار ونبتسم لملك اليسار
    لكن هذه المرة ابتسامنا لاننا نعلم ان ايامنا الماضضية والاتية ماذا ستكون من اعمالنا السابقة والقادمة والتي لا يعلمها الا الله
    فلا يوجد من يبتسم علي نفسه
    فقط من كرهنا ندهوه لاحتساء قهوة وان كان يهمنا فلنتبادل معه اطراف الحديث عن سبب كرهنا

    وان كنا فرحين فنصيحتي الا تفكري في سبب فرحك فقط استمتعي بكل لحظة سعادة تمرين بيها
    وكلمتي القبل الاخير
    اني احبك عن حق واشتقت لكي
    وكلمتي الاخيرة اعذريني


    شفتيني وانا بالنحوي:))

    ReplyDelete
  20. السلام عليكم
    يارب تكون أوقاتك كلها اللي بتحسي فيها إن الناس كلها بتحبك علشان باقي الوقات اللي مش كده بتكون حاجة لا يعلم بها إلا ربنا
    ربنا يجعل أوقاتك كلها سعادة

    ReplyDelete
  21. السلام عليكم
    زى كل بوست فى الدراسة مكنتش ناوية ارد على التعليقات لان الوقت مزنوق اوى ... بس مشاركتكم الجميلة اوى دى خليتنى لازم ارد عليكم لانى بجد بعزكم اوى وربنا اللى يعلم

    ReplyDelete
  22. reemoo
    بيتهيألى سببها اننا بقينا مشغولين عن بعض اوى

    منورة المدونة يا ريمو واهلا بيكى دايما

    ReplyDelete
  23. انتظار مؤقت
    ابقوا راجعوا كلمات الاغانى قبل ما تقولها بقا

    :D

    طبعا عندك حق

    واهلا بيك فى المدونة

    وكاميكاز بنفسه بيسلم عليك

    ReplyDelete
  24. حصان برى

    يا ساتر يارب

    لا القطة قصدانى طبعا اومال هتقصد مين يعنى

    :D

    تصدق عندك حق
    لما اللحظات الصعبة بتمر عليا بقعد افكر .. هو انا جاية الدنيا دى ليه؟
    عشان احس انى محبوبة من اللى حواليا ولا اعشان اعبد ربنا واعمر الارض؟؟

    فعلا بتجدد هدفى فى الحياة اوى

    اهلا بيك يا حصان وكاميكاز نفسه يلعب بيك شوية .. بس اوعى تجرى بيه جامد
    ده صغنن مش قدك
    :D

    ReplyDelete
  25. إبراهيم .. معايا

    الاصل لا الحزن ولا الفرح .. الاصل هو الحياة بحلوها وبمرها .. بكل ما فيها من متناقضات

    فعلا هى دايرة وبتدور على الكل

    ربنا يكرمك ويعزك يارب

    ReplyDelete
  26. الدبور

    يعنى انا صحيحة نفسيا؟؟؟

    طب الحمد لله انا اطمنت على نفسى كدة

    ربنا يكرمك يا استاذ دبور

    اهلا بيك فى المدونة

    ReplyDelete
  27. shreef

    ربنا يكرمك واهلا بيك فى المدونة

    على فكرة الواد كاميكاز عاجبه الواد اللى بيمشى ده اوىىىى

    ReplyDelete
  28. khaled
    فعلا دوام الحال من المحال

    بصراحة انا لما كتبت البوست كنت فى الحالة الاولى بتاعة الخنقة .. بس الحمد لله على طول بقلبها للحالة التانية

    ماهى دنيا فانية بقا

    امين يارب

    ReplyDelete
  29. copa
    كدبة ابريل ايه بس
    ده انت بتاع الكدب كله

    فاكر كدبتك ولا نسيتها؟؟؟

    مروئة اهو .. حد قال غير كدة؟؟؟

    ReplyDelete
  30. أمـانـى

    امين يارب

    اهلا بيكى حبيبتى ربنا يكرمك ويعزك يارب امين

    ReplyDelete
  31. لوست حبيبتى

    امين يارب يا نوسة بس مش عارفة ليه الموضوع بيأثر فيا

    حساسة زيادة عن اللزوم تقدرى تقولى

    ألاقيش عندك دوا للحساسية غير البتاع اللى بالجودرى ههههههههههههههههههههههه

    ReplyDelete
  32. Mohamed A. Ghaffar
    مجمدة اهوه

    ربنا يستر

    ReplyDelete
  33. الأباصيرى

    صابرة عاللى بيجارى وهيا لا ليها عزيز ولا غالى

    اكيد طبعا .. كفاية الرحلة البائسة بتاعة القطر اللى عندك فى المدونة .. فاكرها ولا ايه ههههههههههه

    ReplyDelete
  34. Chavazelle

    اللهم امييييين

    تعليقك بجد اثر فيا اوى اوى اوى

    جزاك الله خيرا واهلا بيك فى المدونة نورتها بجد

    ReplyDelete
  35. زحل الفلكى

    الله المستعان يا زحل

    ربنا يكرمك ياااااارب

    ReplyDelete
  36. zordeak

    الموضوع كله كان فى الكلية وحسيت فعلا انى مخنوقة وانى فعلا محدش بيحبنى خالص .. خصوصا من صحباتى

    المهم وانا مروحة وحاطة السماعة فى ودنى ومشغلة الراديو الاغنية دى اشتغلت

    سبحان الله

    بعدها كتبت البوست

    اجمل تعليق بجد
    تسلم ايدك

    ReplyDelete
  37. esraa
    حلوة اوى نظرتك دى يا اسراء

    الوحش بيعدى والحلو بيتكرر تانى

    روووعة
    :D

    ReplyDelete
  38. محمد العنانى

    تمام كلامك

    بس موضوع القطة مش غريب ولا حاجة
    مفهوم الحب عندى شامل وواسع اوى
    نظرة القطة بحب ترضينى .. بحب اقلامى .. بحب لبسى .. بحب كتبى .. بحب الشارع اللى انا ساكنة فيه .. بحب مبنى الكلية .. نظرة الأمل فى عين معظم الشباب الصبح وهما رايحين اشغالهم
    ده لو لاقوا شغل اصلا

    :D

    بحب كل حاجة ولما بكون فرحانة بحس انهم كلهم بيضحكولى ويقوليلى بنحبك
    :)

    ReplyDelete
  39. hesterua
    بتعدى بس بتوجع
    وجعها مقدرش انكره
    لو نكرته دموعى مش هتقدر تنكره

    وهتعدى

    ReplyDelete
  40. dyin_soul

    امين يارب
    انتى وحشانى اوى يا هبة ونفسى اتكلم معاكى زى الاول

    ادعيلى ياحبيبتى

    ReplyDelete
  41. ody911

    طبعا عادى
    حد قال كلام غير ده؟؟

    ReplyDelete
  42. smraa alnil

    يا حلاوة يا ولااااد
    سمرا بتتكلم نحوى فيرى فيرى جوود

    كلمتى اللى قبل الاخيرة انى مشتاقة ليكى فعلا .. وافتقدك بشدةةةةةة

    والكلمة الاخيرة .. إنتى اعذرينى

    بحبك فى الله
    :)

    ReplyDelete
  43. سمرا

    اليوم ده كان قاسى عليا فعلا
    لدرجة ان دموعى غلبتنى وانا فى المواصلة وفضلت ماشية زى التايهة لحد ماروحت البيت

    واللى طلعنى من الحالة دى بعد ربنا بنت اختى الصغيرة

    نسيتنى الدنيا باللى فيها

    ReplyDelete
  44. No Fear
    وعليكم السلام

    امين يارب

    الاحساس التانى مر اوووى .. زى العلقم والله

    ربنا ما يحكم على حد بيه ابدا ياااارب

    ReplyDelete
  45. يأسك وصبرك بين إيديك وانت حر
    تيــأس مــا تـيــأس الحيــاه راح تمــر
    أنـا دقت منــدا ومنــدا عجبى لقـيـت
    الصـبر مــر وبـرضــك اليـأس مــر
    عجبى!!!!ا
    تحياتى لك ولمدونتك الجميلة

    ReplyDelete
  46. و انا كمان
    تعرفي الصورة حلوة قوي

    ReplyDelete
  47. we all get these feelings from now nd then , dunna know why we all have these mood swings alot !!!!!

    God help us

    ReplyDelete
  48. كل اللى انتى قولتيه طبيعى جدا و بيحصل لينا كلنا ... احنا بشر ..



    و عموما ربنا يكتر الأوقات السعيدة فى حياتنا كلنا


    قولوا آمين

    ReplyDelete
  49. ياستي بنقول بري يلعب بيا ايه بس؟
    ممكن ابقي اجيب له علي سيسي صغير
    حلوه قوي فكره كاميكاز بس انتي مشيلاه المدونه كلها
    بهدي نفوس بس ده مايصحش .

    ReplyDelete
  50. و لأنك إنسانة ....تتملك هذه الأحاسيس الإنسانية التي و جدتها صادقة ...

    هذه هي الدنيا صعود و هبوط

    لكنها تحتاج لقلب .....قوي شامخ شموخ الجبال

    أتمنى لك الحب الدائم لكل من حولك

    ReplyDelete

الكلمـة نـور .. وبعـض الكلمـات قبـور