Tuesday, July 24, 2007

الحمد لله رب العالمين .. إتخرجت


أيها السادة الكرام .. إليكم هذا النبأ الهام .. حدث فى هذا اليوم التاريخى الموافق 24 من شهر يوليو سنة 2007 ميلادية و العاشر من رجب لسنة 1428 هجرية فى تمام الساعة الرابعة و16 دقيقة .. كنت فى ميدان التحرير انتظر اى ميكروباص معدى بينما يتساقط علينا عرق الشعوب .. فى هذه الأثناء سمعت صوت رسالة لسة واصلة طازة صادر من شنطتى السوداء
قلت يارب خير
رسالة مبعوتة من ايناس صحبتى مكتوب فيها كلمتين بس
elnatiga tel3et
.
وكانت هذان الكلمتان كفيلتان ان يصيبانى بالذعر البالغ - ايه النحوى اللى بكتب بيه ده - اتصلت بيها جرى ، قالتلى بصوت يملأه القلق : النتيجة طلعت يا ياسمين .. خدى نمرة امانى وهى حتقولك نمرتك .. وابقى طمنى طنط
انا : اطمن مين؟؟ .. انتى قولتى لماما؟؟؟؟؟؟؟؟؟
هى: ايوة سألتنى ومكذبش عليها
انا: ليه بس كدة يا ايناس حرام عليكى .. ماشى ياايناس انا حتصل بأمانى اهوه
.
طلعت ورقة وقلم من الشنطة ووركنت على جمب مستعدة للكتابة ومسكت الموبايل واتصلت بأمانى
هذه الرقم مرفوع مؤقتاً من الخدمة .. حاول الإتصال فى وقتٍ لاحق
يادى النيلة السودا .. هى ناقصة؟؟ .. يارب استر يارب - ساعتها كنت بموت بجد - اتصلت بإيناس
.
انا: ايوة يا ايناس الرقم مرفوع .. هاتيلى رقم اى حد تانى يجيبهالى
ايناس: انتى فين دلوقتى؟
انا: انا فى التحرير ومش حينفع اروح الجامعة خالص
ايناس: خلاص ياياسمين اقفلى دلوقتى وانا حظبطك .. سلام
انا: سلام
.
لاقيت نفسى راكبة ميكروباص .. مكنتش حاسة بنفسى وكنت حاسة ان تايهة فى زحمة الناس والنتيجة هى اللى حتخلينى اعرف اروح ، ركبت وقعدت احتضر جوا الميكروباص ... احمل فى يدي الموبايل والورقة والقلم واحتضر وانتظر
فجأة الموبايل رن .. استرها يارب
.
بابا : ايوة ياياسمين انتى فين؟
انا: ايوة يا بابا انا فى السكة على وصول ان شاء الله
وقفلت واستمريت فى الإنتظار والإحتضار
وانتظر
واحتضر
وادعو الله
فجأة رن الموبايل .. نمرة بيت إيناس
.
.
انا: ايوة يا إيناس ثانية واحدة
انا لسواق الميكروباص : ممكن توطى الكاسيت شوية الله يكرمك ثوانى بس .. ودارت المكالمة فى إنصات واهتمام بالغ من الركاب
انا: ايوة يا ايناس
ايناس: جيد تقدير رابعة والتقدير العام التراكمى جيد
انا: انا يا ايناس ؟؟ اللى بتقوليه ده تقديرى انا؟؟؟
ايناس : ايوة يا ياسمين
انا: ايناس انا مش شايلة حاجة؟؟؟؟
ايناس : لالا يابنتى الحمد لله
انا: انتى بتتكلمى بجد؟؟؟؟؟؟؟؟
ايناس : ايوة والله .. وانا حبقى اطمن طنط عشان زمانها قلقانة دلوقتى .. ولما تروحى اتصلى بيا عشان اقولك التفاصيل
انا: لا انا هبقى اطمنها .. ربنا يكرمك يارب ايناس
.
.
جموع من الركاب: عايزين الحلاوة بقا .. الف الف مبروووك
فضلت اعيط واحمد الله وانا مش مستوعبة قلتلهم: ربنا يكرمكم يارب
.
مسكت الموبايل واتصلت ببابا: ايوة يا بابا تقدير رابعة جيد والتراكمى جيد
بابا: الف مبروك يابنتى .. الحمد لله رب العالمين
انا: الله يبارك فيك يارب .. طمن ماما
.
.
شوية واتصلت هند : ايوة يا ياسمين انتى جبتى جيد مرتفع
انا: هو مرتفع ولا جيد بس؟؟؟
هند : لا مرتفع ياحبيبتى الف مبرووووك
انا: الله يبارك فيكى والف الف مبروووووووك ليكى حبيبتى
.
.
روحت البيت واستقبلتنى امى بالاحضان والدموع وبالفرحة .. حسسيتنى انى أميرة متوجة على عرش قلبها .. يا حبيبتى يا امى .. انا مش فرحانة ليا خالص انا فرحانة انى فرحتها وفرحت بابا .. ويارب اموت وهما راضيين عنى اللهم امين
اتصلت بإيناس وخدت التفاصيل
.
.
ناجحة فى رابعة بتقدير جيد .. مش عارفة مرتفع ولا لأ .. بس الحمد لله
التقدير العام جيد
تقدير بحث التخرج إمتياز الحمد لله
.
يارب لك الحمد حمداً كثيراً طيباً مباركاً فيه .. ملئ السموات وملئ الأرض كما ينبغى لجلال وجهك ولعظيم سلطانك
.
.
اجدع بنت شوفتها فى حياتى ... ألف مبروك لإيناس ، إيناس تبقى
lost in the web
والف مبروووك لآلاء ولإسراء ولإيمان ولهند ولكل الدفعة بجد ولكل الناس ويارب الكل ينجح فى حياته زى مانجح فى الكلية بفضل الله .. الحمد لله رب العالمين
.
.
ثانية واحدة عايزة اقولكوا حاجة قبل ما تمشوا
انا فكرت كتير فى انى اقفل البلوج .. نظرا لظروفى فمش قادرة اتابعها ولا اكتب فيها زى الاول ولا ارد ع التعليقات اللى بجد بتسعدنى جدا ، فكرت كتير فى الموضوع ده ... بس لاقيت ان البلوج دى مش مجرد مدونة .. لا دى جزء مهم جدا منى ومقدرش اسيبها ، فحخلينى فتحاها ان شاء الله وححاول مين حين لآخر اكتب فيها على قد ما اقدر بإذن الله ، وارجوكم اعذرونى لو قصرت فى الرد ع التعليقات .. لان بجد الظروف اقوى منى
جزاكم الله عنى خير الجزاء يارب
:)
.
.
.
مالك يابت قلبتيها غم كدة ليه ده انتى ناجحة
ولا غم ولا حاجة يا كوكو .. وزغرطى ياللى أسمك إنسانة
.
لولولولولولولولولولىىىىىىىىىىىىىىىىىىىىىىىىىىىىىىىى

61 comments:

  1. ألف ألف ألف مبروك
    انا بقى مستنى الحلاوة
    ولا أقولك انا خلاص
    حلاوتى انى اول تعليق
    السلام عليكم

    ReplyDelete
  2. للولولولولولولولولولولولولىىىىىى
    ألف ألف ألف ألف مبروووووووووووووووووووك

    وخلاص مش هنقول عقبال السنة اللي جاية ((:
    كفااااااااااارة

    ربنا يسعدك دايما يا رب

    ReplyDelete
  3. هيييييييييه .. هيييييييييه
    هيييييييييه .. هيييييييييه

    الناجح يرفع إيده ... هيييييييييه ..
    ونغني في عيدنا وعيده ....
    هيييييييييه ..
    ونقول ونقول .. دايما
    دايما على طول .. دايما
    ونجاحنا يقول .. دايما
    دايما على طول دايما على طول

    ألف مبارك يا ست الأستاذة .. ويارب دايما من نجاح لنجاح .. ويرزقك الخير ويفرح والدك ووالدتك بيكي دايما . يااااارب

    ReplyDelete
  4. مبرووووووووووووووك :)

    ReplyDelete
  5. ياحلولي يا حلولي يازمين ناجحه يا حلولي مبروك رورورورورررررررررررررري
    والله فرحتليك يا يازمين اخيرا خلاص مفيش ايديكوشين تاني ماشيه معاكي يا ستي لو عملتي حفلة التخرج اعزميني بقي :] س

    ReplyDelete
  6. الف الف مبروك
    فكرتينى بنفسى يوم نتيجتى
    نفس الفرحة والتنطيط
    بس كنت فى البيت
    كان السنة اللى فاتت
    يااااااه ذكرياااات
    الف مليون مبروك

    ReplyDelete
  7. الف الف الف الف مليون مبروك يا ياسمين النجاح
    يوم مش هتنسيه طول عمرك بجد
    فرحة مافيش بعدها فرحة ابدا الف مبروك وبالنسبة لموضوع انك تقفلي البلوج ده...بلاش بليز

    الف مبروك

    محمد سمير

    ReplyDelete
  8. لولولولولولولولولولولولولولولولولولولولولولولولولولولولولولولولولولولولولولولولولولوىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىىى

    انا عنيا دمعت معاكى

    ReplyDelete
  9. لولولولولولولولولول
    لولوولولولولولولولولولولو
    لولولولولولولولولولولوىىىىىىىى
    ىىىىىىىىىىىىىىىىىىىىىىىىى
    ىىىىىىىىىىىىىىىىىىىىىىىىىىىى

    ReplyDelete
  10. الف الف الف الف الف الف الف الف مبروك يا ياسمين

    ReplyDelete
  11. والله كويس اول مره آجي الاقي فرح
    مابروووووووووووووووووووووووووووووووووك

    ReplyDelete

  12. الف الف مبروك
    عقبال الدكتوراه

    ReplyDelete
  13. ألف مبروك النجاح

    وياريت متفكريش في انك تقفلي البلوج

    ربنا يعينك في حياتك بعد التخرج ونشوف ليكي بوستات كلها خير

    ReplyDelete
  14. وصلي صلي علي النبي صلي

    دي زفة أسكندراني

    ويا هو ياهو العروسة أهي

    والناجح يرفع أيدة يغني في عدنا وعيده

    وأمبلأ ألا أمبلأ...وأيييييية أأأأأأأأأ

    بجد فرحانلك

    بس أقولك حاجة أنا كانت دراستي ست سنوات مأنتي عارفة درست يمكن حوالي30 مادة ولم أحصل علي جيد غير في مادة واحدة طول الست سنوات ومش عايز أقولك كانت مناحة

    طبعا لأن أغلب المواد أمتياز

    طبعا الملحوظة اللي فاتت للتعقيد فقط

    بس والله فرحتلك مبروووووووووووك ألف مبروك

    ReplyDelete
  15. الف مبروك ياسمين
    عقبال ما نبارك لكى يوم زواجك اللهم امين يارب العالمين

    ReplyDelete
  16. مبرووووووووووك .. الف الف مبروك :)

    ReplyDelete
  17. مبروك ياياسميييييييينه عقبال العرير ههههههههه

    ReplyDelete
  18. أولا الف مبروك

    ثانيا

    نحتاج الى رأيك ودعمك في حملة القضاء على المخدرات انتظرك هناك
    www.tw3ya.blogspot.com

    ReplyDelete
  19. ياسمين

    تهنيئة من القلب ـ مع امنية بتحقيق كل احلامك

    ReplyDelete
  20. ما شاء الله لا قوة إلا بالله
    ألف مبروك النجاح يا إنسانة
    ربنا يفرح قلبك زي ما أدخلتي الفرحة على والدك ووالدتك
    اللهم آمين

    ReplyDelete
  21. ألف مبروووووووووك يا ياسمين
    ربنا يسعدك عالطول يارب
    ومتفق معاكى تماما أن المدونة جزء من الواحد فعلا , تخيلى بقة لما أولادك وبناتك يقروا البوست الجميل دة فى المستقبل ان شاء الله ويشوفوا فرحة أمهم , ويشوفوا حدث مهم جداا فى حياة أمهم
    شعور لا يوصف

    :)

    ReplyDelete
  22. congratulation , with all my best wishes to you ,and more successful life , but take care you just finish the first step(easy step),
    from one observe you effort .
    notes:
    and be far away from bakeza & zaghlol(sons of your aunt).

    ReplyDelete
  23. الف مبروك
    بتفكرى تقفليها؟
    مممممممم
    هاتسيبيها مفتوحة؟
    ممممممممممممم
    اقلك ممكن نخليى كوكو يبيع فيها بيبس

    ReplyDelete
  24. الف الف مبرك يا حبيبتى

    ربنا يهنيكى يا رب ويسعدك كمان وكمان

    انا فرحانه ليكي اوى بجد

    نتيجتي لسه ما ظهرتش انا كمان مستنياها

    حبيبتى ما تقفليش المدونة

    بس ابقى طمنينا على اخبارك من فترة للتانيه

    ReplyDelete
  25. مبروك ليكى بس اكيد والدتك سعادتها لاتوصف!!!!بس ايه العلاقه بين التخرج وقفل المدونه؟؟؟

    ReplyDelete
  26. الف الف مبروك يا ياسمين

    تحياتى لكى بالنجاح الدايم فى حياتك العمليه

    ReplyDelete
  27. الف مبروك أستاذة
    وعقبال الماجستير
    أسلوبك ظريف في السرد

    ReplyDelete
  28. Salaam from chile, Southamerica!
    I admire very much arabian culture, my grandparents from my mum was from Syria...
    Please, visit me and send a comment, even an arabian:)
    shukran!!

    ReplyDelete
  29. السلام عليكم
    الف الف الف مبروووووووووووووووك
    وعايزين الحلاوه
    هههههههههههههه
    هما كانوا منتظرين تدفعيلهم الاجره
    يعني بمناسبة الفرحه بس محصلش نصيب

    الف الف مبروك ومرحبا بك في عالم الاعمال والواقع

    يا تري عندك واسطه؟

    ReplyDelete
  30. السلام عليكم
    ألف مبروووووووووووك
    و ربنا يوفقك في اللي بتعمليه دلوقتي و شاغلك و يوفقك في حياتك كلها
    و ألف مبروك لكيميكاز
    أستعدي بقة علشان تجهزي ورق الجيش :)
    و جهزي كده كم ظرف علشان تقدمي في كل وظايف مصر الكتير
    ربنا يكرمك و يوفقك ديما

    ReplyDelete
  31. alf mabroooooooooooooook

    gayed mortfe3 wala monkhfed el mohem enak etkhrgty
    lololiiiiiiiiiiiiiiii

    we mash3'ola fe ih s3tek b2a ???

    ReplyDelete
  32. الف مبروك على النجاح بس مكناش نفتكر ان الحلاوة بتعاتنا انك تفكري في قفل المدونة
    ياريت الفكرة دي ما تجيش في دماغك اصلا
    تحياتي والف مبروك

    ReplyDelete
  33. الف الف الف مليون مــبروك
    وربنا يوفقك ياااااااااااااارب آمــــــــــين
    ويكرمك بزوج صالح يـااااااااارب آمـــــــين
    علشان فرحتك وفرحتنا تكمل يااااااااااااااااااارب آمـــــــــــــــين

    ReplyDelete
  34. الناجح يرفع ايده
    هيييييهه
    و يغني في عيدني و عيده
    هيييييييييييه
    مبروك مبروك

    ReplyDelete
  35. عزيزتى
    الف مبروك
    مع ان التخرج بدايه للطاحونه اللى اسمها الشغل يلا خشيها
    ومعلش اطلب منك زى ما كنتى متعاطفه مع هند وكتبتى موضوع عنها بعد الاخبار الجديده اللى اسبتت ان...
    هكذا المراه جزئ من جزيئات الاطفال
    شهدت محكمة جنايات بنها جلسة هادئة على عكس ما كان متوقع وذلك فى اطار محاكمة محمد سامي المتهم باختطاف واغتصاب الطفلة هند التي انجبت مولودتها منة الله منذ عشرين يوماً.
    حضر الجلسة والد المتهم ووالدته واشقاؤه كما حضر 4 شهود تطوعوا إلي رئيس المحكمة للشهادة لصالح المتهم محمد سامي.. لم يحضر محمد عيد والد هند ولا أحد من أسرته الجلسة

    قررت هيئة المحكمة تأجيل نظر قضية الطفلة هند للدور الأول من شهر سبتمبر المقبل لسماع الشهود والاطلاع علي تقرير الطب الشرعي ومناقشة المجني عليها والمتهم.
    أصدر القرار المستشار أحمد عطية رئيس المحكمة وعضوية المستشارين محمد موسي ونادر أبوالفتوح بحضور محمد الغنيمي ومحمد البدري وشريف سيف النصر وكلاء النيابة وأحمد حمدي رئيس النيابة الكلية وأمانة سر أحمد طنطاوي.
    بدأت الجلسة في العاشرة صباحاً ونادي المستشار علي المتهم محمد سامي الذي حضر للمحكمة قبل الجلسة بنصف الساعة وكان متماسكاً واستقبلته أسرته بالدموع والفرحة لظهور نتيجة تحليل الحامض النووي في صالحة معلنا براءته قبل بداية جلسة محاكمته مما أثار لغزاً جديداً من ألغاز القضية المثيرة للجدل لعدم معرفة من هو والد الطفلة "منة الله".
    وأكد محامي المتهم ايمن ابوكراع أنه سوف يفجر مفاجأة كبري في القضية لم يفصح عنها خاصة بعد نتيجة تحليل البصمة الوراثية، كما أنه واثق من براءة موكله لوجود بعض المتناقضات في أوراق القضية التي وصلت حتي الآن إلي مائة ورقة.
    وعلى جانب آخر طلب محامي هند تأجيل نظر القضية للاطلاع علي أوراق القضية وطلب صورة رسمية من الملف وتقدم بدعوي مدنية ضد المتهم طالباً التعويض عن الاضرار التي لحقت بـ"هند" وبدأ رئيس المحكمة بطلب سماع شهود الاثبات وهم الرائد خالد حسن محمد غالي والضابط محمود البنا وتبين عدم حضورهما الجلسة وتم اثبات غيابهما في محضر الجلسة.
    مفيش أمراه ضحية ولو كانت قصادها ضحايا كتير
    سلام

    ReplyDelete
  36. مبروك
    وربنا يديم الفرح
    تحياتى

    ReplyDelete
  37. السلام عليكم
    الف مبررررررررررررروك

    ReplyDelete
  38. ألف مبروك
    انا كمان نجحت
    وجبت جيد مرتفع رغم ان الكل بيقلولي مفيش مرتفع
    :)
    بس مش مهم

    ReplyDelete
  39. مبرووووووووووووووووووووك
    تحياتي لكي

    ReplyDelete
  40. الف مبروك يا ياسو
    معلش يا قمر متأخره اوى
    بس والله لسه عارفه
    بجد فرحتلك اوى يا قمر
    والتقدير بجد حلو اوى
    ربنا يكرمك يارب
    قبلاتى

    ReplyDelete
  41. الف مبروك صحيح دى اول زيارة لى بس ان شاء الله مش هتكون الاخيرة
    عندك حضور عالى جدا فى السرد بطريقة جميلة
    تحياتى
    inksarat.blogspot.com

    ReplyDelete
  42. الف مبروك يا احلي انسانة
    تحياتي

    ReplyDelete
  43. الف مبروك على النجاح و عقبالي يا رب

    ReplyDelete

  44. ألف ألف ألف مبروك

    وعقبال ...... ولا بلاش لحسن دي فيها طوب

    :))))

    الف مبروك مرة تانية وربنا يكرمك ويرزقك بأحسن وظيفة يا رب

    قفل المدونة فيها دم ورقاب خدي بالك

    وكمان فين الحلاوة؟

    تحياتي لك من ماناساس البلد

    ReplyDelete
  45. الف مليون مبروك للسكرة الجميلة انسانة

    والحمد لله انك اتخرجتى بتقدير صدقنيى بينفع برده..انا كمان تقدير عام جيد ونافعنى لما بتقدم للشغل
    خلى البلوج مفتوحة وابقى عرفينا اخبارك
    سلام يا جميلة

    ReplyDelete
  46. مبروووووووووك
    مبروك مبروك مبروك
    مبروك عليكى وعلينا
    عليكى الشهادة
    وعلينا انضمام عضو جديد من اعضاء العطل الوطيفى
    الف مبروك يا احلى انسانه
    انا عايزة الحلاوووووووووووووووووووة

    ReplyDelete
  47. سلام عليكم
    مش اول زياره لمدونتك
    لكن اول تعليق
    الف مبروك على النجاح
    من نجاح لنجاح يارب
    نفع الله بكى الاسلام

    ReplyDelete
  48. الف الف مبروك
    ودايما ناجحه ومتفوقه فى حياتك
    ومدونتك جميله
    وان شاء الله تفضل موجوده ونقرا لك مواضيع حلوه
    الف مبروك تانى

    ReplyDelete
  49. مبروك يا بت
    عارفة والله العظيم عنيا دمعت لفرحةمامتك وباباكي

    ربنا يباركلك فيهم يارب

    اوعي يا بت تزعليهم خالص

    وابقي طمنيني عليكي يا ندلة

    ReplyDelete
  50. ندعوكم لزيارة العدد الثالث من مجلة نفسنا
    ولمن لدية هواية الكتابة ويريد المشاركة معنا نرجو منه مراسلتنا
    nafsena@gmail.com

    ReplyDelete
  51. يا ميت ألف مبرو...

    مبروك يعني
    :)

    ReplyDelete
  52. اخيرا اخيرا اخيرا ...مبروك يا انسانة
    اخيرا على ايه؟
    اخيرا خلصت منك فى الكلية
    ايوة انا فى كليتك وطبعا هتعملى نفسك مش فاكرانى
    براااااااااحتك
    بس حبيت اقولك مبروك برضه

    ReplyDelete
  53. Mabrooooooooooooooooooooooooooook
    congretulations ya yassoo
    far7analek aweeeeeeeeee
    (G)(G)G(G)(G)(G)(G)(G)(G)

    ReplyDelete
  54. مبروك يا ياسمينة ألف مبروك

    وعقبال الشغل ان شاء الله

    ReplyDelete
  55. الف الف مبروووك يا ياسمين ومن نجاح إلى نجاح بإذن الله

    واوعي تفكري تقفلي المدونة

    :) :)

    ReplyDelete
  56. ايه ياست اللى إنت عاملاه ده دا انت رعبتى الواحد بس بجد ألف مبروك وربنا يسعدك ونجلكم فى الأفراح بس تعزموا بقى ولا النجاح بيورث افترا

    ReplyDelete
  57. mabrouk ya simooooooooooooooooooooooo
    lolololololllllllllllllllllllyyyyyyyyyyyyyyyyy

    ReplyDelete
  58. أولا أهنؤكي من كل فلبي على البشرى السعيدة ر التي هي إن دلت على شئ فهي تدل على كفاحك و المجهود الجبار الذي بذلتيه طوال مشوارك الدراسي، أحب أن أضيف أنه قد حصل معي نفس القصة بخلاف أنني كنت واثقا من الرسوب لأفاجأ بعد تأديتي للعرض الختامي لمشروع التخرج أنني قد أحرزت مجموعا كبيرا و بتفوق كمان. على العموم، ألف ألف مبروك
    bon courage pour ton avenir, et bon continuation.
    أخوك المهندس السري

    ReplyDelete

الكلمـة نـور .. وبعـض الكلمـات قبـور