Wednesday, August 01, 2007

ماتسمعونا زغروطة



طبعا مستغربين عاوزة اسمع زغروطة ليه؟؟ .. سؤال وجيه بس استنوا قبل ما اجوابكوا

الله يبارك فى كل اللى باركلى على النتيجة واللى مابركليش كمان .. ويارب اللى لسة بيدرس عقباله لما يطلع بتفوق يارب واللى اتخرج خلاص عقبال انجاله واحفاده بقى

وبالنوسبة للواسطة فبعلنها قدام الناس كلهااااااااااااااااااا .. معنديش واسطة .. وسطتى ربنا وظنى فى الله خير إن شاء الله

بردو ماقولتش ازغرط ليه؟ .. مصممين تعرفوا؟؟؟ .. هو موضوع هايف اوى بس انتوا حريين .. براحتكوا يعنى

بصوا بقى ..مبدأيا كدة انا اصغر عضو فى اعضاء بيتنا ، مش مدلعة ولا حاجة بس زى ماتقولوا كدة إتكالية شوية ولازم اعتمد على حد تانى مايكونش انا .. ده مش فى كل حاجة اكيد بس الغالب يعنى ، بس لما بقيت اكبر بقت كمية الحاجات اللى بعتمد فيها على غيرى تقل خاااااااااااااااااالص وبدأت الحكاية دى من اول ما اختى اتخطبت وبعدها اتجوزت .. اختى اكبر منى بـ9 سنين .. زى ماما كدة بالنسبالى وعلى طول بتاخد بالها منى ومن البيت .. لما اتجوزت بقيت انا اللى لازم اخد بالى من البيت ومن بابا وماما كمان .. خصوصا لما ماما دراعها اتكسر وبقى عليا الطبخ والتنضيف وكل حاجة فى البيت تقريبا .. الحمد لله .. حاليا بقوا هما اللى يتكلوا عليا .. اكل مثلا .. اخد بالى من البت سولى بنت اختى .. اعمل مشاوير لبابا وهكذا دوليك .. الحمد لله رب العالمين

المهم

الكمبيوتر كان طالع عينه ومليان فيروسات ومافيهوش كارت صوت كمان ومحتاج ينزله ويندوز جديد ويتجاب كارت صوت .. اخويا زى ماتقولوا كدة مهندس كمبيوتر شاطر جدا كمان .. بس باله طويل وعلى طول مش فاضيلى .. وانا طبعا لا بعرف انزل ويندوز ولا اجيب كارت صوت ولا حاجة ابداااااااااااااااا ... اعمل ايه؟ اعمل ايه؟ اعمل ايه؟؟

طلعت مرة مول كمبيوتر كنت عايزة اشترى حاجة وسألتهم على كارت صوت وعرفت تمنه وبيتركب ازاى وكدة .. وعليها بقى عملت جدوى إقتصادية للموضوع - فيزابيليتى إستادى يعني - وعرفت الحسبة حتطلع قد ايه وبابا تفضل مشكورا وادانى الفلوس

روحت زى الشاطرة اشتريت كارت صوت وسماعة ومايك .. ووفرت فى الفلوس اوى على فكرة .. منا إقتصاد بقى ولازم أوجب مع نفسي برضه

بس جيت البيت اتحايل على اخويا ينزلى ويندوز .. هو مش فاضيلى اصلا .. وانا يعنى حستناه .. جبت الاسطوانة وحطيتها ومشيت مع الخطوات لحااااااااااااد ما الويندوز نزل

هييييييييييييييييييييييييييييييييييييه

لولولولولولولولىىىىىىىىىىىىىىى

وركبت كارت الصوت والسماعة والمايك واشتغلوا الحمد لله

لولولولولولولولولولىىىىىىىىىىىىى


تقدم ياجدعان .. انا مش مصدقة انى عملت الحاجات دى لوحدىىىىىىى .. احمدك ياااااااااااااااااااااااااارب

المصريين اهما والبلوجريين اهما والإنسانيين اهما

ول يا ول


مأفورة فى الإنبساط انا عارفة .. لإنى بصراحة لما النتيجة طلعت فرحت وكل حاجة بس محدش احتفل بيا .. الحمد لله على كل حال .. يمكن يحتفلوا بيا بعدين ولا حاجة

كان نفسى اسمع زغروطة .. او اروح فى الصحرا بعيد ومحدش سامعنى واهيص براحتى .. اصلكوا مش واخدين بالكوا الزغروطة دى ليها معايا مواقف لا تحصى

وانا صغيرة زمان حسبة 10 سنين كدة كنت فى فرح بنت خالتى ويوم الفرح الصبح بنات خالتى التانين علمونى ازاى ازغرط .. وعليها بقا كل شوية أهبل ، كنت اجى الساعة 3 الظهر والناس نايمة وبيأيلوا عشان يعرفوا يركزوا بالليل فى الفرح واطلع فى البلاكونة فى عز الشمس وازغرط مع نفسى كدة هههههههههههههههههههههه

نصيبة والله
ومرة تانية إيناس كانت بتكلمنى فى التليفون والأهلى جاب الجون الرابع .. وعينيكوا ماتشوف اللى النور .. لولولولولولوللىىىىىىىىىىىىىىىىىىى فى السماعة لما البت اصنجت هههههههههههه .. معلش حقك عليا يا نوسة

بتكسف ازغرط قدام مخاليق ربنا من الرجال ، ده غير إنى صوتى عالى وبحس انه مزعج جدا وربنا يكون فى عون مخاليق ربنا اللى بتعاملوا معايا من الجنسين .. المهم مرة كنت فى كتب كتاب صحبتى فى الكلية .. وصحبتى دى مكنش عندها قرايب فى سنها خاااااااااااااااالص .. كلهم كبار وعاقلين ومتجوزين ومخلفين ومش بيهيصوا خااااااااااااااااااالص .. الصمت الرهيب ، طنط ماماتها ياعينى جاتلنا وقعدت تتحايل علينا نهيصلها شوية .. بصراحة صعبت عليا .. عايزة تفرح ببنتها بردو .. بس إزاى واحنا متشيكين كدة وطلبة محترمين فى كلية محترمة يعنى

كله رفض انه يزغرط ماعدا انا وإيمان .. عملنا زى سماعات الإستريو .. هى طويلة فزغروطتها تسمع الناس اللى فوق وانا قصيرة وصوتى عالى فبسمع الأغلبية اللى قاعدة .. تنظيم إستراتيجي للزغروطة بقى

ساعتها ياعينى كان فى مدام محترمة جدااااا حظها العثر - أي والله العثر - خلاها تقف قدامى وانا برقع الزغروطة .. كانت طالعة منى على صرصور ودنها رشق .. الست اتنفضت واتخضت جاااااااااااامد وحاطت صوابعها فى ودانها وبقت فى حالة صعبة جدا .. وهى واقفة قدامى وانا لسة طالعة بالزغروطة ولا اجدعها صاروخ فى مرحلة الإنطلاق وطبعا ماينفعش اوقف الزغروطة فى أولها .. هى تستنى لكن الزغروطة لأ !!ا

بس فحطيت إيدي على كتفها وشاورتلها بإيدى إنها تستنى لما اخلص .. فضلت مستنية وفى عنيها نظرة رعب رهيبة وخضة جامدة وصوابعها فى ودانها كأني حطلق قنابل مدوية من زوري .. وانا منفضالها وشغالة عادي خالص وصحابى بيموتوا من الضحك .. اول ما خلصت المهمة الزغروطية الصعبة تنفست الصعداء فى إبنهاج وسعادة كإنى أنجزت مهمة حربية عويصة وطبطبت على كتف طنط بفخر كدة وقلتلها: معلش ياطنط .. ماتخديش فى بالك !!!!ا

طبعا انتوا مستغربين ايه التوهة اللى دخلتكوا فيها دى .. تحمل مسؤلية على كارت صوت على زغاريط على هيصة ... بصراحة ياجماعة انا جوايا هموم كتير ونفسى اخرج منها وافرح بس بجد مش عارفة .. قلت اجى اطلع اللى جوايا فى المدونة يمكن اعرف افرح هنا والاقى اللى يشاركونى فرحتى

ماسمعتش زغروطة يعنى!!ا

28 comments:


  1. ما تسمعونا زغروطة؟ زغروطة مين؟ المهم متكونش من انسانة لحسن دي دوشجية كبيرة

    وبعدين تعالي هنا

    ايه علاقة الزغروطة بالفيزيبيليتي ستادي بكارت الصوت بالتخرج بطنط الي ودانها انطرشت بسببك لا حول والا قوة الا بالله بالسؤال الوجيه؟

    أنت مين أصلا؟

    عموما ربنا يكرمك وحجرب أزغرط على قدي
    هاهاها


    ولي ولي ولي ولي ولي ولييييييييييييييييي

    اي كلام

    تحياتي لك من ماناساس البلد

    ReplyDelete
  2. بس بس بس امسك امسك
    ايه ياعم انتي توهتيني من اختك لاخوكي للويندوز وكارت الصوت للوغاريط والفرح وكتب كتاب صحبيتك

    انا تعيبت
    فظيعة يا ياسمين والله

    :):)

    بس قوليلي جبتي كارت الصوت بكام؟؟
    :p

    الف يلامة على ايد مامتك
    محمد سمير

    ReplyDelete
  3. نسيت اقولك
    كاميكاز علطول سايب البوج ومزوغ

    انا مكنتش ناوي اقول بس انا قفشتة امبارح في سلينترو المهندسين قاعد مع شلة بنات حلوة وبصراحة حقدت عليه وقلت افتن بقى وخلاص خصوصا انو عمل نفسه مش شايفني


    :p
    محمد سمير

    ReplyDelete
  4. هسمعك احلي زغروطه يا سمسم
    بس كدا

    انتي جيتاي في جمل يعني

    مبروك علي كل حاجه يا قمر
    وعلي المستقبل كمان

    ملون مبروك
    ويارب تبقي حياتك كلها فرح وسرور وهنا علي طول

    تسلم ايدك يا قمر

    تحياتي

    ReplyDelete
  5. لولولولولولولولىىىىىىىىىىىىىىى
    لولولولولولولولىىىىىىىىىىىىىىى
    لولولولولولولولىىىىىىىىىىىىىىى

    أحلى زغروطه ليكى يا ياسو
    انتى عارفه
    بتفكيرنى بنفسى أول ما جيبت الكمبيوتر من كام سنه
    كان كل شويه يبوظ واجرى اتصل بالمهندس
    لغايه ما فى يوم الويندز وقع واتصلت بالمهندس وكان مش فاضى وقالى انه هيعدى كمان يومين
    انا اتجننت ازاى اقعد يومين من غيره
    قلت عليا وعلى أعدائى
    هجرب وخلاص
    لو باظ يبقى بكملت هو كده كده هيروح للمهندس
    لو اتصلح يبقى من عند ربنا
    وفعلا يا بنتى جربت وعرفت انزل ويندز واسطب كل حاجه وتمام
    ومن يومها بجد محدش لمسه تانى
    اى حاجه تبوظ فيه افضل وراها لغايه ما اصلحها
    واهو داخله على السنه التالته محدش لمس الجهاز ده غيرى
    فكرتينى بالذى مضى يا ياسو

    ادى زغروطه كمان علشان البنات الشطار اللى نزلو ويندز
    لولولولولولولولىىىىىىىىىىىىىىى
    لولولولولولولولىىىىىىىىىىىىىىى
    قبلاتى
    (^_^)

    ReplyDelete
  6. فن الزغروطة دا فن نسائي يصعب على الذكور ممارسته .. أظنه بيدرس تبع المدرسة السرية .. في مادة الاستغلال الأمثل لطبقات الأصوات في مواجهة الرجالة ... مش دي مادة مقررة برضه

    هههههههه ....

    بس سيبك أحلى حاجة في الكتابة إنها تنفع فيها كل حاجة وادي واحدة زغروطة ..

    لولولولولولولولولولولي

    وأهو تبقى برضه من غير صوت عشان ما يبقاش عملنا حاجة مخالفة ولا حاجة

    وكل سنة وانتي طيبة ..

    مش الزغروطة عشان عيد ميلاد برضه ولا إيه ؟؟؟!!

    :P

    ReplyDelete
  7. مشكلة يا انسانة


    الف مبروك على التخرج وربنا يوفقك وتشتغلى او تلاقى عريس_أيهما أقرب
    (:

    خفة الدم دي نادر انها تكون موجودة اليومين دول-ما شاء الله طبعا

    ربنا يوفقك فى حياتك وتبقى ناجحة وشطورة وتعرفى تعملي ويندوز لوحدك كدة على طول


    والسلام

    ReplyDelete
  8. لولولييييييييييييييييي

    ألف مبروك يامينو

    طب كنت تقولي واحنا كنا نعملك الحفله اللي انت عايزاها , وتسيبك من البيت

    بس حلو أووي موضوع تعليم الزغروطه ده

    أنا للأسف مش بعرف (:

    وان شاء الله ربنا هينولك اللي انت عايزاه ويفرحك ويبقي مفيش مكان للهموم ;)

    ReplyDelete
  9. شوفي أنا لسة جاي من فرح واحد صاحبي حالا
    ولقيت ملاحظة مهمة جدا أن الزراغيط دي حاجة البنات مبيتعلموهاش دي موجودة في الجينات الوراثية وعايز أقولك مبتقدروش تمسكوا نفسكوا
    البنات دكاترة محترمات بنضارات كعب فنجان ومع ذلك رقعوا شوية زغاريط ليها العجب

    وعلي رأي دكتور درس لنا في الكلية

    اللي أنكتب علي الجين لازم يشوفه الجنين

    ربنا يديم عليكي الفرح
    سلام

    ReplyDelete

  10. علي فكره
    الي انتي فيه ده
    اول دلائل التخرج
    اهلا بك في عالم العاطلين
    بس اوعي تتطولي

    ReplyDelete
  11. أنا مش باعرف ازغرط .. بس لو كنت اعرف كنت زغرطتلك
    مبروك على نجاحك .. مبروك على تصليح الكمبيوتر
    أنا بقيت ما باصدق اسمع خبر حلو .. و دي اخبار حلوة.. كتري من الاخبار دي على قد ما تقدري
    :)
    تحياتي

    ReplyDelete
  12. كل شيء بالتجربة
    ودايما بأقول ان الواحد ممنا داخله طاقة لا يتعرف مدى قوتها إلا عندما يشرع في استغلالها

    ReplyDelete
  13. السلام عليكم ورحمة الله وبركاته

    ما شاء الله عليكى انتى دمك خفيف اوى وسكر فى سرد الاحداث
    ربنا يكرمك يا رب ويعزك

    ReplyDelete
  14. كفايه انتي تزعردي
    حنبقى احنا كمان
    مبروك على النجاح ...متاخره معلش
    ومبروك على كارت الصوت والويندوز الجديد
    ههههههههههههههههه

    ReplyDelete
  15. This comment has been removed by the author.

    ReplyDelete
  16. انا كمان كنت كل سنه بخلصها وانا في الكليه بيزغرطوو ويقلبوا دماغ العماره والشارع كله
    الا يوم تخرجي ما سمعتش حاجه والسبب ان لسه الجيش والجيش لما اخذت تأجيل يبقي فاضل الشغل ولما جه الشغل فاضل أن القي شغل تاني احسن ... ودوامه
    ورجعت شويه وره لقيت أن كل سنه كنت بخلصها وانا في الكليه كنت ان شاء الله عارف كنت هروح فين عشان كده كنت بعكس حالتي علي البيت كله
    انما بعد ما تخرجت دخلت في دوامه ولقيت ان سبب عدم سماع الزغريط كان في الاصل انا .....فايه رايك لسه عاوزه تسمعي زغروطه.........رووي.. معلش اصل نسيت طقم الاشنان بتاعي يا بنتي ..ودومت بالخير

    ReplyDelete
  17. begad da7akteny awy ya bet ya yasmine ... loooooool

    ReplyDelete
  18. ازيك يا انسانة , ايه الأخبار

    أنا أول مرة آجى هنا , حلوة مدونتك اوى

    بس دا احنا طلعنا من سن واحد
    انا كمان كنت المفروض أتخرج السنة دى بس قررت قبل الامتحانات انى عاوزةأكمل مع الكلية فتنحيت السنة دى و نازلة لهم السنة الجاية

    بس بجد الف مبروك تخرجك

    و الف مبروك كمان على فرح قرايبك و صاحبتك و كل الناس اللى بتتجوز عندكم

    و مبروك الكبيرة بئا على كارت الصوت و الويندوز

    و الله انا عارفة الواحد لما بينجز حاجة مكانش له فيها اصلا بيكون فرحان أد ايه
    الف الف مبروك

    و يا ستى كل ما تقدرى تفرحى افرحى متخليش حاجة تمنعك , الفرحة عملة نفذت من السوق تقريبا فلو عدت جنبك اقفشى فيها اوعى تسيبيها

    طولت عليكى انا معلش

    ReplyDelete
  19. انا مبعرفش ازغرط
    استنى بقى لما حد من الستات اللى عندنا ييجى عشان يزغرطلك

    ReplyDelete
  20. وضح ان حالتك صعبة اوى اوى

    لا بجد واضح انك متضايقة وعايزة تفرحى

    على اى حال يا ستى مع انك لغبطيلنا دماغنا اكتر ما هى ملغبطة
    بس ربنا يسعدك

    ومش هزغرط بقى علشان بيقولوا الراجل عيب يزغرط

    "قل بفضل الله وبرحمته فبذلك فليفرحوا هو خير مما يجمعون"

    ReplyDelete
  21. lolololololyyyyyyyyy

    3ala yaddy
    tool al leel wana sam3a sotek biegly f betna :D
    w kalam eh w de7k eh w 3'ona eh :D

    btw ya gmaa3a lely lsa magarabsh al mic m3a yasso

    yasmin sotha helw aweeeeeeeeeeeeeeeeeeeeeeeeeee

    shofteeny wana baza3'ratlek foo2 (A)

    ReplyDelete
  22. لولولولولولولولىىىىىىىىىىىىى

    واحلى زغروطه لياسي القمر

    ازيك يا بنوته عامله ايه والله وحشتينا

    المهم فاكرة اول كومينت ليكي عندى لما قلتى ان احنا شبه بعض جدا

    بصي

    من موقعى هذا ومن مكانى هذا تحدثك
    فتاة الجنة
    :)

    احنا فعلا شبه بعض
    جداااااااا
    حتى فى الاسماء بس خدي بالك اسمي مش ياسمين لو عرفتيه ابقى قوليه في سرك

    :)

    ReplyDelete
  23. السلام عليكم
    ربنا يفرحك دايما و تكون كل همومك راحت
    أنا بصراحة أتفاجئت بعد أما كتبتي كل ده و بعدين قلتي جواكي هموم كتير
    أنت شكلك طيبة أكتر ماأنا متخيل
    ربنا يوفقك و تلاقي شغل يناسبك و تفرحي في كل حاجة في حياتك الشغل و الصداقة و الزوج الصالح و الأولاد الصالحين
    بس يارب متفرحيش للأهلي :)

    ReplyDelete
  24. the groom

    لاااااااا ماتزغرطش الله يكرمك .. لحسن بوش يفتكرها إشارة لتفجيرات إرهابية وتروح فى ابو نكلة .. بلاش احسن

    :D

    -------------------

    غمض عينيك

    حقولك الأول لما سألت قالى ب60 تانى مرة لما روحت قالى ب45 بس .. قمت موفرة وجبت سماعة بالمرة
    :D

    الله يسلمك ويكرمك يارب


    يادى كاميكاز اللى جايبلى الكلام ده .. هو فعلا بقاله كتير مش موجود .. مرة تانية حبقى اعمل بوست واقلكم هو فين

    دونت وورى
    :D
    ----------------------

    gohayna

    قلتيلى حسمعك ومسمعتش يعنى
    ;)

    الله يبارك فيك ياجميلة ربنا يكرمك يارب ويسعدك دنيا وآخرة اللهم اميييييييين


    --------------------

    reemo

    :D
    فعلا يابنتى الحاجة ام الإختراع .. الحوجة وحشة اوى وتحسى كدة انك مزلولة .. ده ايه الناس دى
    :@

    هههههههههههههه الله يبارك فيكى وعقبال عندك ياام فاروق
    :D

    -------------------

    البشمهندس ما علينا

    يادى المدرسة السرية .. على كدة الدكاترة ليهم مدرسة والمهندسين ليهم مدرسة والرجال ليهم مدرسة والبوابين ليهم مدرسة سرية كمان

    :D

    ايون عيد ميلاد ابن عم عبدو البواب .. تم 500 سنة عقبال عندك


    --------------------
    Islamist Bloke

    الله يبارك فيك يارب .. اللهم اميييييييين

    جزاك الله خيراااااا

    وعليكم السلام


    ---------------------

    esraa

    اللهم امييييييين

    اعلمك يابنتى مافيش مشكلة .. بس لو اضربتى بعدها انا مش مسؤلة

    خاااااااااااااالص
    :D :D



    ---------------------

    سكتم بكتم

    ههههههههه حلوة حكاية كعب الكباية دى .. لا ساعة كتب الكتاب اللى رحته كنا كلنا إقتصاد وعلوم سياسية سيادتك .. صباح الدماغ يعنى

    اللهم امين ويديمه على حضرتك دايما يارب

    سلام


    ---------------------

    محمود على

    فعلا والله عندك حق .. انا باين عليا داخلة على دور جنان حاد

    ربنا يستر وماطولش


    -------------------

    masria

    الله يبارك فيكى ياجملية

    لو عاوزانى اعمل مدرسة لتعليم الزغاريط انا معنديش مانع ابدا .. بس لو اتقلب قضية امن دولة انا ماليش دعوة بردو

    :D


    -----------------------

    أكتب بالرصاص

    بالظبط كدة
    تمام يا استاذى


    ------------------

    Fedaa AL Eslam

    وعليكم السلام ورحمة الله وبركاته

    ياحبيبتى الأحداث حلوة عشان انتى قريتيها .. جزاكى الله خيرا يااااااارب


    --------------------

    اسكندرانى اوى

    الله يبارك فيك يافندم
    جزاك الله خيرااااااا
    :D


    --------------------
    hollow

    والله انت جبت التايهة .. انا فعلا عرفت ليه محدش فرحلى وهيصلى لما اتخرجت

    مش عارفة الناس دى مستنية ايه يعنى
    :D

    يلا الحمد لله على كل حال .. متشكرين ع الزغروطة ياطنط دولت .. نجاملك يوم فرحك يااااااااارب
    ههههههههههههه

    تحياتى


    ---------------------
    lo2a

    ههههههههههه بموووووووت فى ضحكتك يابت يالولو

    استنى كنت حنسى اسألك .. مجبتش سيرتى؟؟؟؟؟؟؟؟؟؟

    loooooooooooooool

    676 للصبحححححححححح


    ---------------------

    ME

    ماطولتيش ولا حاجة يابنتى اهلا بيكى دايما

    ربنا يبارك فيكى ويفرحك دايما يارب

    اللهم اميييييييييين


    -----------------------
    mo'men mohamed

    :D:D:D

    --------------------

    omar مشروع بطل

    هى صعبة بعقل؟؟ .. الحمد لله رب العالمين

    ربنا يفرحك ويسعدك دايما اللهم امييييين

    ---------------------

    Mony The Angel

    يالهوتىىىىىىىىى
    ايه يابت الفضايح دى استرى عليا طيب
    ههههههههههههه

    ياجزوفى ياجزوفى ياجزوفى
    :$:$:$:$:$:$

    ابقى شوفى مين حيرغى مع اسراء اختك فى الميك بعد كدة

    ده ايه الناس دى
    :D:D:D

    -----------------

    ftataljanna

    انا الحمد لله بفضل الله كويسة .. وانتى ازيك ؟؟؟ .. وانتى وحشانى اكتر بجد

    شبه بعض ؟؟ .. مابلاش يابنتى ماضيعيش مستقبلك

    حتى فى الأسماء؟؟؟

    ممممممممم يسرا؟؟؟؟؟؟؟؟

    :D:D:D

    فى سرى اهوه
    :D


    -------------------
    No Fear

    وعليكم السلام

    اللهم امين يارب وإياك
    واوعى انت كمان تفرح للزمالك
    :D

    ReplyDelete
  25. فكرتنى يا ياسمين باول يوم ليا نزلت فيه وندز للجهاز هههههههههه

    على العموم الف مبروك يا قمر على تنزيل الوندز

    ReplyDelete
  26. mabrouk ya simo lolololololllyyyyyyy simo et2addemet ya reddala
    bas estanny hena ba2a ana w esraa bardo za3'ratna ta2reban ^o)

    ReplyDelete
  27. انتي مش بتزوريني ليه
    زعلانة مني؟

    محمد سمير

    ReplyDelete
  28. لي لي لي لي لي لي لو لو لو لو لو... :-)

    ReplyDelete

الكلمـة نـور .. وبعـض الكلمـات قبـور