Wednesday, August 15, 2007

إعترافات وتليفونات


ازيكم ياجماعة عاملين ايه؟؟ .. كل سنة وانتوا طيبين رمضان اهوه قرب ويارب ربنا يبلغنا رمضان ونطلع منه مغفورلنا جميعا اللهم امين

عندى كام اعتراف كدة عايزة اعترفهم قبل ما تقروا البوست
.
اعتراف رقم واحد: انتوا وحشتونى اوى اوى اوى اوى بجد
.
اعتراف رقم اتنين: بعتذر لانى مش بعلق عند اى حد ولا حتى برد على التعليقات عندى وده لأنى من ساعة ما اتخرجت وانا مش متظبطة نفسيا ولحد دلوقتى لسة مارجعتش زى الأول
.
اعتراف رقم تلاتة: ياجماعة انا مكنتش عاملة حداد عشان شيماء ربنا يرحمها ويغفرلها يارب ..لان الحداد فى الإسلام 3 ايام بس واحنا عرفنا الخبر بعد وفاتها بإسبوع فكل اللى حصل مكنش حداد .. كان مشاعر اخت لاختها
.
اعتراف رقم اربعة: عايزة اعترفلكم انى من بعد التخرج وانا مش متظبطة زى ما قلتلكوا لدرجة انى كنت حقفل المدونة ومش بدخل عندى ولاعارفة اكتب زى الاول ولا بدخل مدونة حد .. ماليش نفس لاى حاجة .. كنت حاولت اظبط من نفسيتى شوية وابتديت اكتب بوست ماتسموعنا زغروطة .. بعدها بيومين عرفت خبر وفاة شيماء وكتبت البوست ومن بعد ما كتبته بجد مبقتش قادرة ادخل مدونتى خااااااااااااالص والله وتقريبا مش بدخل النت .. الحمد لله على كل حال .. بعدها كتبت وتستمر الحياة عشان كدة كدة حتستمر سبحان الله

.
بس انا حبيت اقول الكلتمين دول فى الأول لكل اللى عايز يطمن عليا وحاسس انى مش فى المود .. ياجماعة بجد ادعولى ربنا يهدينى ويرزقنى الخير يارب .. واهم دعاء وادعوا بيه لنفسكوا كمان ان ربنا يخرجنا كلنا من الدنيا دى على خير اللهم امييييييييييييين


.

ربنا يستر شكلى داخلة على اكتئاب .. تمام يعنى انا دلوقتى مكتئبة .. يا شماتة كاميكاز فيا
.
احم احم .. سيادى آنساتى سادتى .. وكما عودتكم الإنسانة صاحبة هذه المدونة ان تقابل كل همومها بالإبتسام والتفاؤل والإشراق .. حتقولولى جتبى كل الإشراق ده منين يا لئيمة ؟؟ .. حقولكم مش ربنا كريم وهو رب الكون الوكيل؟؟ يبقى منفائلش ليه بقا؟؟ .. ان شاء الله خير وحيفظل ظنى فيه خير دايما .. سبحانك يارب

.

المهم كنت عايزة احكيكوا على موقف كدة .. من كام يوم بابا خلانى اروح ادفع فاتورة التليفون .. ودى اول مرة فى حياتى اروح سنترال وادفع فاتورة تليفون .. عادى بتحصل يعنى

.

روحت لاقيت خير اللهم اجعله خير .. حاجة كدة عاملة زى بيت جحا ( بتعطيش الجيم ) .. لاقيت اربع شبابيك .. اتنين للرجال واتنين للنساء وقدامهم طوابير طويييييييييييييييييييييييييييييييييييييييييييييييلة اوىىىىىىىىىى .. حعمل ايه يعنى .. مش قدامى غير انى استنى

استنينا


.

نلاقى بقا ان الطوابير دى مش بتمشى خاااااااااااااااااااالص .. ليه يا جدعان؟؟ .. اصل الموظفين مشيوا .. يالهوى راحوا فين دول!!! .. قال ايه النتوورك بتاعة السنترال وقعت !!!! واحنا واقفين

.

وعليها يا سادة .. النتوورك بقا ربع ساعة تيجى وتروح نص ساعة والموظفين يروحوا ويجيجوا .. واحنا واقفين

.

الناس اللى وقفت ورايا بقت اكتر من اللى قدامى ، الطابور وصل لحد الشارع برا تقريبا .. والاكسجين ابتدى يتشفط ومافيش حاجة الواحد يسند عليها حتى .. واحنا واقفين

.

واقفين

.

واقفين

.

واقفين

.

واقفين

.

واقفين

.

واقفييييييييييييييييين

.

بقالنا اكتر من ساعتين واقفين والناس تعبت من كتر الواقفة وتقريبا الشعب المصرى لما يتعب بيبتدى يهيس .. احلى تهييس بقا

.

الشباكين بتوع الرجالة ياعينى واقفين وساكتين وصابرين على ما بالهم .. الدوشة كلها كانت عند الستات وكل ست ادلت بدلوها بقا .. اللى بتشتكى من جوزها اللى مخزن الفلوس على قلبه قد كدة ومأرطها عليها وعلى عيالها .. واللى عيالها مستلمين التليفون مش بيسبوه وفى الاخر تتدبس هى فى الفاتورة .. واللى عايزة ترجع البلد .. واللى لسة جاية من البلد واللى بنتها عيانة فى البيت واللى جايبة بالبيبى بتاعها واللى جاتلهم هيسترية ضحك بدون مناسبة واللى واللى واللى

.

جم بنتين واقتحموا الطابور عنوة ( بالعافية يعنى ) ووقفوا قدام .. الاول كان الموضوع عادى وغنوا حاجة لعدوية تقريبا .. مش قادرة انسى نظرة الشاب اللى كان فى طبور الرجال للبنتين دول .. ساعة الجد بقا قامت خناقة عشان البنتين عايزين يخدوا دور مش دورهم

.

الست اللى فى الطابور: ده مش دورك يا ماما ارجعى ورااااااااا

البت اللى داخلة عافية: ايه يامامااااا هو انتى بس اللى فيكى صووووووت؟؟ ماحنا كمان بنعرف نزعق كوييييس .. ما تيجى تدينى قلمين احسسسسسسسن

.

هههههههههههههههههههههههههههه

لا حول ولا قوة الا بالله .. انا ايه اللى جابنى هنا

.

واحدة كبيرة وقفت جمبى وتعبت من الوقفة فواحدة تانية بتقولها: خلى عيالك يبطلوا رغى فى التليفونات شوية .. ردت قالت: لأ ماهو اللى كان بيرغى الله يرحمه بقا ابو العيال

.

انا فى سرى: الله يرحمه

شوية لاقيتها تعبت وميلت على الحيطة وبتدندن وتقول: لو ماكنتش انت تدلعنى مين حيدلعنى؟؟؟

انا فى سرى برده: !!!!!!!!!!!!!!!!! .. لا حول ولا قوة الا بالله

.

طول عمرى فاكرة نفسى فوضاحية مابيتبلش فى بقى فولة .. بس بعد ما شوفت طنط واحدة تانية اتأكدت انى كتومة جدا .. طنط دى من الاخر فضحت كل افراد عيلتها نفر نفرررررر .. حكت على جوزها وبخله .. وبنتها خريجة حاسبات ومعلومات واللى بتشتغل فى جامعة القاهرة وبتقبض 900 جنيه فى الشهر وجيابة عريس عايز يجيب غوشتين شبكة وطنط مش موافقة عليه ومش راضية ابدا

انا: ليه ياطنط ماتوافقى وربنا يتمم بخير ( شوفتوا الطيبة )ه

هى: لا يابنتى ده ساكن فى ابو زعبل .. ترضى انتى تعيشى فى ابو زعبل؟؟

انا: معرفش هى فين عشان اقول اه او لأ الصراحة

هى: وبعدين ده شكله وحش .. العريس كدة لازم يبقى امور عشان الواحد يتفشخر بيه وبجماله

انا: ياطنط احنا مالنا ومال شكله .. الراجل مش بالشكل خالص

هى: لالالا انا مش طايقاه .. حاسة انه رخم

.

الوقت بيعدى .. واحنا واقفين

.

واقفين

.

واقفين

.

الموظفة اللى واقفة مش طايقانا ولا طايقة نفسها ... وفى وسط الجحيم اللى احنا فيه كل شوية تطلع ازارة تلج كبيييييييييييييييييييييرة تشرب فيها لوحدها .. عااااااااااااااااااااااااااااااااااا

طنط اللى فضحت الدنيا: ياربى الساعة بقت 3 ولسة حروح واطبخ

انا: طبخ ايه ياطنط ده حضرتك تروحى تشربى ماية وتنامى على طول

طنط: لا ده عشان انتى بنت تقولى كدة .. لكن لما تتجوزى حتعملى كلللللللللل حاااااااااااااااااجة

انا: الله يطمنك يا طنط .. هو انا اتعقدت من الجواز من شوية

طنط: يالهوى انتى متعقدة؟؟ .. لالا ماتتعقديش يابنتى اتجوزى وعلى ضمنانتى

انا: استر يارب

.

.

فضلت واقفة تلات ساعات ياجماعة لغاية ما جه الدور عليا وساعتها كنت فطست بجدارة وستر ربنا انى مأغمش عليا هناك

.

ربنا يسامحك يا بابا .. ويسامحك يا طنط .. ويسامح النت وورك اللى قرفتنا فى عيشتنا

44 comments:

  1. يادى الكسوف :$

    اول تعليق كده :$

    طب ندخل فى الموضوع بقى عشان الاحراج ميطولش

    اولا يا سمين يا جميلة والله انتى كمان وحشانا اوى

    صحيح انا مش بدخل عندك من فترة كبيرة بس اول ما دخلت قريتلك كتير اوى ةعجبنى كلامك جدا ودلوقتى تقريبا بدخل عندك كل يوم عشان اشوف الجديد بتاعك واتابع معاكى

    ثانيا ان شاء الله ترجعى للمود الطبيعى بتاعك قريب جدا وتنورينا وتبسطينا بكلامك الحلو ونشوفك على طول الوجه المبتسم المشرق اللى اتعودنا عليه منك

    اما بقى عن حكاية السنترال والطوابير والناس والفضايح اللى بتتقال فهو ده الشعب المصرى

    والله انا كمان كنت بقعد اقول على نفسى فضحيه بس لما بنزل وسط الناس وخصوصا الستات فى الاسواق والطوابير خصوصا بعرف انى هادية خالص زيك تمام كده

    اما عن النتورك اللى وقعت فده شئ طبيعى جداااا فى كل المصالح الحكومية .. والله بحس انهم بيعملوها عن قصد او عند عشان يريحوا نفسهم من الشغل شوية

    بجد عالم معندهاش دم يعنى


    المهم فى الاخر كمان مش طمنتينا عليكى وصلتى البيت امتى ؟؟ واستريحتى وبقيتى كويسة بعد وقفةالعذاب دى ولا لا؟؟

    ان شاء الله تكونى بخير قريب :)

    ReplyDelete
  2. اولا مودك الطبيعي دة انتي اللي بايدك ترجعيله
    ثانيا دي اول مرة اعدي عندك
    ثالثا بقى حكايتك مع السنترال دي حكاية شعب

    ReplyDelete
  3. يااااه حمد الله ع السلامة يا ياسمين
    وانتي كمان واحشانا اوي
    :):)
    كله دا حصلك وانت بتدفعي فاتورة التليفون
    امل لو رحتي تجددي رخصة العربية هتعملي اييييييه
    طابووووررر عشان المخالفات
    طابووووووور عشان التامينات
    طابوووووووووررر عشان الضريبة
    وانتظار كتيير اوي بقا عشان استلام الرخصة

    ودا اضعف الايمان
    وعمار يامصر
    :)

    بقولك ايه بما انك الحمد لله مودك بقا تمام التمام بعد مشوار السنترال ده ورجعتي شربتي الميه الساقعة ونمتي
    تعالي احبسي عندي بقا بالتورتة في الحفلة اللي عاملها في المدونة
    هستناكي

    محمد سمير

    ReplyDelete
  4. الحمد لله على السلامة، اشتقنالك يا شيخة، على العموم البوسط زوين بزااااااااااااااف، شكرا و ننتظر المزيد

    ReplyDelete
  5. أولا حمد اله على السلامة الاول

    اما بقى حكاية التليفونات دى والحكاية الجامد بتاعتك دى نعلق بيها بروقان بقى
    المهم انتى فاضية عشان انا يمكن اكتب تعليق حوالى خمسة او سته متر
    المهم
    نبدأ بقى

    حكايى التأخير فى السنترال ونظام الدفع واللازى منه انا بقول تخلى والدك ربنا يديله طوله العمر ويخليهمول يجيبلك فيزا كارت وتدفعى الفاتورة من على النت وتريحى نفسك وتبقى تجيبي ليا الرقم بتاع الفيزا عشان ادفعها انا كمان
    اما بالنسبة للطابور الطويييييييييل اوى اللى انتى بتقولى عليه لازم يا بنتى يبقى فيه طابور وطويل كمان عشان تعرفى وتحسي انك فى مصر
    مش مصر دى تبقى البلد اللى جنبا صح
    بالنسبة بقى لطنط الحجاة اللى بتقولى انك طلعتى كاتومة بالنسبة ليها امال ايه اللى بنتى بتحكيه ده
    دا انتى فضحتيها يا شيخة ولا انتى باين بتعملى اعلان جواز لبنتها دى بتاخد 900 جنيه يا جدع
    طيب انتى مجبتيش رقم تليفونها عنوانها حتى اهى تساعد فى الشقة ومصاريف الجواز هو حد لاقى

    المهم لما الحمد الله ربنا وفقك ودفعتى الفاتورة لما روحتى بقى البيت عملتى ايه فى الحاج
    اوعى تكونى زعلتيه
    طيب يوميها اتغديتى ايه طيب انتى شربتى ميه يوميها قد ايه
    ساقعة ولا عادية
    طيب روحتى بتاكسى ولا سرفيس
    طيب انتى مين أساسا
    دا انا دخلت فى حوارات تانية خالص
    المهم انا عارف الحاج بعتك تدفعى الفاتورة ليه تلاقيكي عشان بتتكلمى فى التليفون علطول وقال لما نديها درس عشان متتكلمش فى التليفون تانى وتكره من اساسه
    المهم فيه كلام كتير
    فوفى الآخر اقولك
    خلى بالك من نفسك وبلاش الاكتئاب اللى انتى بتقولى عليه ده
    وربنا يكرمك يا رب ويرزقك بالحلال ليكى ولينا جميعا باذن الله
    ربنا يكرمك يا رب

    ReplyDelete
  6. ااااااه
    وتستمر الحياه
    ايه عشان تعرفي ان بابا كان رحمك من المشاوير
    وعشان في كل مره تتكلمي في التليفون تفتكري اللي حصل
    هههههههههههههه

    ReplyDelete
  7. عزيزتى
    اول شئ انا بكره اللى يقول اى مبرر علشان ميعلقش على اى تعليق يجيله يا بكلمة مشغول يا مش مظبط
    زى ما الانسان بيعرف يحط موضوع جديد يعرف برضوا يعلق
    ولو على الاكتئاب يبقا ده عادى وحاله عامه كل الناس مودها مش مظبط
    واحمدى ربنا انها اول مره علشان تعرفى بابا كان بيتعب اد ايه
    تفتكرى مش مفروض ترحمى بابا من دفع الفواتير بعد كده
    سلام

    ReplyDelete
  8. ايه يا بنتي دا كلو


    انت حسستيني اني واقف معاكي في الحر دا وبدأت انهج

    انما حلو قوي نم الستات والفضايح اللي بتطلع

    بس ليا سؤال

    على رأي الحكمة بتاعة عادل امام في النوم في العسل

    إن ماكنش النهاردة يبقا بكرة

    ايه اللي خلاكي تقفي تستني

    ما كنتي مشيتي وجيتي تاني يوم
    !!!!!

    يقطع التيفونات على مصلحة التليفونات
    قطيعة

    ReplyDelete
  9. ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    hhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhh

    LoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoOoL

    dunno why while i was reading this post i just felt that i miss u awyyyyyyy bgd :)... may be i miss our days together, our talking, our laughing, ... . dunno exactly what i miss, but what im quite sure that i miss is only YOU :)

    ReplyDelete
  10. أنا كنت مستمتع جدا بالحواديت بتاعة الطابور دي .. ما سمعتيش حاجة تاني كده ولا كده؟

    :-D

    ربنا يخليلنا الحكومة الإلكترونية اللي مش شغاله خالص .. المفروض إن الفواتير تندفع عن طريق الإنترنت .. ممكن نص الطوابير تخف ساعتها

    ReplyDelete
  11. حمد الله علي سلامة ضحكتك

    ReplyDelete
  12. koka

    تتكسفى من ايه يا كوكا ده البيت بيتك .. ربنا يكرمك يارب المدونة جميلة بزوارها

    على فكرة انا كنت عندك فى المدونة وعجبتنى اوى .. كم الرومانسى غير طبيعى وعندى نصيحة صغننة ليكى .. ارحمى قلبك شوية عشان لسة صغير
    :(

    بعد الطابور ممممممممم
    ابدا ياستى لبست نضارتى الشمس الضخمة وركبت وروحت البيت .. اللى كان بيقول بم كنت بزعق فيه هههههههههه
    مكنش ليا نفس اكل اى حاجة ..كنت عايزة اشرب وبس

    الحمد لله على كل حال

    نورتينى ياجميلة
    :)

    ------------------

    خالد منصور

    اهلا بحضرتك لأول مرة وان شاء الله ماتكونش آخر مرة
    :)


    ---------------

    محمود على

    الله يسلمك يافندم
    مبتسمة اهوه من ساعة ما وقفت فى الطابور
    :D :D

    ---------------

    غمض عينيك

    الله يسلمك يافندم

    لالا ماهو انا مش عندى عربية اصلا وماما عمالة تتحايل عليا اروح اتعلم السواقة وانا منفضة

    الله .. تورتة؟؟
    طب انا حجيب الواد كاميكاز واجى جرىىىىىىىى
    هههههههههههههه

    شرفتنى

    ---------------


    مهندس سرى

    الله يسلمك يافندم

    ربنا يكرمك يارب .. بس مين بزاف ده؟؟؟
    :D :D

    اهلا بيك دايما


    ----------------

    3abdo me7tas

    الله يسلمك .. احكى احكى انا مش ورايا حاجة

    ههههههه عايزة اقولك ان بابا مش هو اللى كان بيدفع .. يإما اخويا او اختى وبعدين لما انشغلوا بقيت انا اللى بروح

    لالالالالالا انا مش بفضحها انا حتى معرفش هى اسمها ايه هى وبنتها .. انا بس بقول اللى حصل
    انا استغربت ان فى ام تقول كل المعلومات دى عن بنتها ههههههههههه

    ايه الظلم ده بس يا استاذ عبده والله ماحصل .. انا مش برغى فى التليفون حتى اسأل صحابى ..فين وفين لما بنكلم بعض ..كل الحكاية ان اخواتى انشغلوا زى ماقلتلك ووالدى تعبان وكدة فبروح انا

    كلت بامية على ما اعتقد وشربت ماية ساقعة وكنت رايحة بمكروباظ وكان حيخبطنى موتوسيكل وعربية واتوبيس .. التلاتة
    عاااااااااااااا

    يلا خير ان شاء الله

    اهلا بيك دايما


    ------------------
    hollow

    اه استمرت فوق دماغى اهيه هههههه
    ايوة ماهم قالولى كدة واحنا فى الطابور المدامات اللى واقفين ..قلتلهم لأ مش حتكلم تانى ولو واحدة اتصلت بيا حقولها اقفلى عشان باباكى بتطلع عينه
    هههههههههههههه

    شرفتنى

    ------------------

    احساس لسه حى

    :$:$:$:$ طب وليه الاحراج ده بس

    بكرر اسفى ليك ولكل اللى اضايق وحاول اعلق ان شاء الله ومش تزعلوا

    مع السلامة
    :)

    ---------------------

    طهقان

    هههههههههههه
    لا مكنتش ينفع بكرة انا بابا باعتنى فى مهمة ولازم انجزها هههههههههه

    ماتزعلش يا استاذ طهقان بالفعل انا روحت يوم تانى .. بس عشان طلع فى فواتير تانية عايزة تتسدد

    وعمار يا مصر
    :)


    ----------------
    OMG :| u dunno me :(

    شكلك لولو يابت انتى هههههههه

    انتى كمان وحشانى اوى والله وربنا اللى عالم نفسى اشوفك واشوف الشلة كلها قد ايه

    فاكرة الصالون يابت يا لولو ههههههههههههه كنتى حتموتى يوميها من الضحك وانا كان حيغم عليا

    ربنا اللى عالم انا بحبك قد ايه ومفتقداكى قد ايه

    بحبك فى الله اوىىىىىى


    -------------------

    يا مراكبى

    المركبى عندنا .. يا مرحبا يا مرحبا

    ههههههههههههه مستمتع بالحكاوى اومال لو كنت واقف كنت عملت ايه

    سمعت بلاوى .. اللى رايحة تتفدع للمديرة اللى عندها فى الشغل وقارفة نفسها عشانها

    واللى جوزها كان حيطلقها وهى بتدفع

    وهييييييييييييه عماااار يا مصرررررر

    نت مين بس قول يا باسط .. احنا كبيرنا ننادى بعض من الشبابيك اساسا ههههههه
    -------------------

    سكتم بكتم

    الله يسلمك يافندم ومقطعهاش من اى حد يااااااااارب

    ReplyDelete
  13. ههههههههههههههههههههههههههههههههههه

    والله يا ياسمين فكرتنى بمسلسل بتاع بكيزة وزغلول هههههههههههههه

    لما بكيزه راحت تدفع فاتورة الكهرباه اخدت حته عالقه تمام
    احمد ربنا باه انك مش اتعمل فيكى زى بكيزه

    هههههههههههههههههههههههههههههههههههههههه
    وتعيشى وتدفعى فاتورة التليفون

    ReplyDelete
  14. السلام عليكم
    انسانه المود اللى انتى فيه طبيعى خصوصا لما تحسى ان محدش بعيد عن الموت ولا حد اقرب منه اللهم احسن خاتمتنا اجمع وكمان يمكن زعلك على شيماء ربنا يرحمها ويصبر اهلها اكيد ليه دخل ودى حاجه جميله انك تحسى بحد حتى لو بعيد عنك ومتعرفهوش عشان انتى انسانه
    بالنسبه بقى للطابور فتعيشى وتاخدى غيرها ههههههههههه
    يا بنتى ما احنا حالنا كله بقى كده
    طوابير فطوابير كل حاجه ليها طابور
    العيش التليفون الميه
    ده حتى السينما
    كله طابور
    عشان متبقوش تتكلموا فى التليفون تانى ههههههههههه

    ReplyDelete
  15. السلام عليكم ورحمة الله وبركاته

    ههههههههههههههههههههه

    فطستيني من الضحك وانا اصلا لسه جايه من الصيدليه فطسانه خلقه ...هههههههه

    دا انتي بطله يا بنتي حد يستحمل يقف في طابور 3 ساعات في الحر ده ، وكمان الطابور مش بيتحرك ...بجد الله يكون في عونك

    عموما الف حمد الله علي السلامه

    ويجعله عامر

    ReplyDelete
  16. سوري, نسيت أقولك كمان إني مبسوطه أوي و الله عشان حاسه إنك رجعتي لحالتك الطبيعيه تاني الحمد لله :)

    و حاجه كمان بس يعني لو مافيهاش إسائة أدب يعني ^o)... إنتي بتعرفي إزاااااااي إن إنااا :@:@:@

    ReplyDelete
  17. dana 2a3da w ta3ba nafsy w 3ammala akteb bel3araby w 2aol 3asahn el bet mate3rafnesh :D tamweh b2a (H):1:1:1 w tegy seyadtek bebasata keda te2olely "shaklek lolo" :@ lolo eh w zeft eh :@ da eh el nas de :@:@:@ akshef rasy w ad3y y3ny :@:@:@ ...

    ya ret teb2ay te2olely 3la tare2a ad5ol beha w ar3'y bera7ty ^o) mn 3'er ma at3eref (H) 3'alasa b2a (H) :1

    ReplyDelete
  18. looooooooooooooooollz bgad
    msh adra awseflek d7ekt ezay ra3'm eny kont medai2a :))

    ReplyDelete
  19. حمد لله على السلامة يا ياسمين

    ReplyDelete
  20. ههههههههههههه
    بوستك دمه خفيف جدا ...وهما دول المصريين ..الصراحة انا لما بكون في موقف من مواقف الإلتحام يطبقات الشعب بكون عايز اولع في الناس اللي حوليا كلهم

    ReplyDelete
  21. سؤال .. هي شيماء اللي اتوفت كانت مدونه ؟؟
    علي العموم حمدلله علي رجوعك
    و ربنا يغفرلها و يرحمها يا رب و يسكنها فسيح جناته

    ReplyDelete
  22. سلام عليكم
    انا قلت برضه اكيد انسانة فيها حاجة علشان كده مش بنشوفها فى المدونة
    ايه يا انسانة اكتئاب ايه بس....سيبك من الكلام ده ...استمتعى بحياتك ...شوفى اى نشاط واعمليه ولو حتى حاجة بسيطة هتلاقى المود بتاعك اتغير ....ما تقفليش المدونة لانك كده هتزهقى اكتر خليكى معانا ...

    اما حكاية السنترال والطوابير دى حاجة طبيعية خالص ....لو النتوورك بتاعة الحكومة ما تقعش امال ايه اللى يقع
    يا شيخة اديكى اتسليتى 3 ساعات

    ربنا يوفقك

    ReplyDelete
  23. السلام عليكم

    فى البداية ديه تانى مره أدخل المدونة , ومن أول دخول ليا عجبتنى المدونة بشكل كبير وقبل ما أدخل كان ربنا أعلم بحالى ولما دخلت قريت كام كلمة خرجتنى شوية صغننين من حزنى , فأنا بشكر أختى إنسانة وهى فعلا إنسانة على المدونة , والحمد لله إنك مقفلتيهاش علشان لو كنت مدخلتش المدونة فى اليوم الى كنت حزين فيه الله أعلم كنت حعمل إيه فى نفسى

    وليا تعليق بسيط على نفسيتك الى مش متظبطة , أنا عاوزك تثبتى فعلاً أنك تقدرى تواجهى الحزن والإكتئاب وعاوزك ترجعى زى الأول , لأن الواحد لما يلاقى إن لسه فى ناس متفائلة فى الدنيا بيحس إنه لسه فى أمل فى الحياه

    وبخصوص الأخت شيماء الله يرحمها , أنا الصراحة معرفش شخصيتها , لكن أحسبها إنسانة صالحة , وإن شاء الله تكون فى الجنة , وما أدراك الجنة , وأتمنى كلامى لا يضايقك الإخت شيماء إرتاحت من الدنيا وهمها وراحت للجنة بنعيمها إن شاء الله .

    أما حكاية السنترال , فببساطة تلك هى بلدنا الأمورة التى تضع الشعب فى المرتبة الأخيرة والناس من غلبها بتفضفض وخلاص

    فى النهاية فى إنتظارك يا أختى بكلامك وكتباتك التى أسمع أنها رائعة وتحمل معانى التفائل وتعدوى تلك الإنسانة المشرقة المبدعة , فهناك الكثرين يحتاج للتفائل والأمل

    يوووووه كلامى دايما كتير بش عارف أعالج الحتة ديه , وسورى على التطويل والكلام الكتير

    وشكرا على البوست الجميل

    ReplyDelete
  24. آسف بجد نسيت أدعى للأخت شيماء

    اللهم إغفر لها و إرحمها و عافها و إعف عنها و أكرم نزلها ووسع مدخلها و إغسلها بالماء و الثلج و البرد و نقها من الذنوب و الخطايا كما ينقى الثوب الابيض من الدنس اللهم و ابدلها بدار خير من دارها و اهلا خير من اهلها و ادخلها الجنة و اعذها من عذاب القبر و من عذاب النار اللهم انت ربها و انت الذي خلقتها و انت الذي هديتها للاسلام و انت الذي اكرمتها بالايمان و انت علام الغيوب تعلم ما بسرها و علانيتها اللهم اكرمها بمقعد صدق عندك يا جبار السماوات و الارض اللهم انك عفو كريم تحب العفو فاعف عنها اللهم انك عفو كريم تحب العفو فاعف عنها اللهم انك عفو كريم تحب العفو فاعف عنها يا ذا الجلال والإكرام

    ReplyDelete
  25. السلام عليكم
    ازيك يا انسانة

    تحياتى ليكى اولا

    وعاوزة اقولك انتى كمان وحشانا
    ومش عارفة انتى ليه نفسيتك تعبانة
    يمكن عشان مرحلة جديدة فى حياتك
    بصى انتى بصى للموضوع من ناحية مبهجة
    يعنى كفاية اتخرجتى وخلصتى من الامتحانات


    دورى على شغل واعملى نشاطات جديدة


    الموضوع ظريف اوى
    فكرتينى بنفسى
    اصلى بقف فى طوابير كتير

    كنت فى الكلية اقف لغاية ما تطلع عينى عشان ادفع المصاريف
    حار ونار فيهم
    وفى الاخر يقولى الوقت خلص
    تعالى بكرة


    تصورى بقى
    احمدى ربنا ان محصلكش كده


    عاوزكى بقى تردى على تعليقى المرة
    مش تديها طناش


    على فكرة
    عملنا مدونة جديدة اسمها المنبر انا وعبير وممكن وواحد وشيماء
    اتمنى تزوريها وتقولى رايك
    تحياتى
    http://elmenber.blogspot.com/

    تحياتى يا قمر

    ReplyDelete
  26. باه انا بدور عليكى و انتي فى السنترال حضرتك

    ماشى براحتك

    اما بالنسبة للاكتئاب فقلنا بداية حياة التخرج

    كده كلها تخبط بس مش تياس يا جميل

    و سلميلى على سولى

    ReplyDelete

  27. أهلا بك في سنترال مصر المحروسة

    مش حعلق غير بحاجة واحدة

    روحي اقري البوست بتاعي الاخير اللي حكتبه كمان شوية

    تحياتي لك في ماناساس البلد

    ReplyDelete
  28. ايه ده تروحى السنترال بنفسك

    انتم معندكوش عمو الشوفير يروح هو يدفع ولا كارت فيزا تدفعوا بيه من على النت

    ياى

    ReplyDelete
  29. أولا...بجد ليكي وحشه كبييييره فعلا
    ثانيا...متستسلميش لاي احساس من بتوع بعد التخرج و كملي مهانا في رحله التدوين
    :)
    بالنسبه للفاتوره فحسبي الله و نعم الوكيل
    و بس
    :)
    تحياتي

    ReplyDelete
  30. السلام عليكم الاول
    بصي انا قبل ما اتكلم يا انسانه احب اقولك انتي عسوله قوي
    بجد انا كنت بضحك بهستيريه من كلامك
    بجد انتي عسووووووووووووله
    بصي نصيحة ليكي
    ما تروحيشششششششش طوابير عيش،فواتير تلفونات ،او اي مصلحة
    ممممم هوه ده الشعب المصري
    طوابيييييييييييييير

    *****************
    ثانيا يا قمر الف مبرووووووووووك على التخرج
    انا برضه لسه متخرجة السنادي على فكره
    احسااس فعلا غريب قوي
    كبرنا
    والمسئولبه
    و حجات كتير
    المهم يا بنتي خلصنا
    بصي يا قمر انا هستناكي في مدونتي المتواضعه و يا ريت نكون اصحاب
    سلام يا انسانه
    زيزي

    ReplyDelete
  31. السلام عليكم
    أولا أحيكي علي مواجهة الإكتئاب بالضحك
    و ثانيا ربنا إن شاء الله يكرمك و خلي بالك هي حالة بتيجي لكل الناس اللي بيعرف يتخلص منها بسرعة هو الشاطر
    أنت بصراحةى فضحتي الناس كلها و خصوصا مأرط دي كتبتيها إزاي
    خير
    كل سنة و أنت طيبة و ربنا يكرمك

    ReplyDelete
  32. يعنى انت جاية عشان تقولى انك مش بتكتبى حاجة ولما تكتبى تبهدلينا ببوست خمس صفحات؟؟ ايه الافترا ده ؟؟
    وبعدين الواحد رجليه تعبت من الوقفة فى الطابور معاك أساسا من كتر انتظار نهاية البوست
    ربنا معاك ياياسمين ويهدى الجميع ويعدى الأيام دى على خير بالنسبة لك
    مستنيين نسمع أخبار حلوة عنك

    ReplyDelete
  33. الحمدلله انك بقيتى بخير
    ايوا كده بلاش الحزن والمود اللى انتى كنتى فيه دى حال الدنيا يوم فوق ويوم تحت
    *****
    يا عســـــــــل حياتنا طوابيــــــــــــــــر
    طوابيـــــــــــر
    لبكرة الصبح بيقت السمة الاساسية ربنا يرحمنا من عنده

    ReplyDelete
  34. enty leeky el gannah looooooool

    ReplyDelete
  35. واضح ان والدك حب يوريكي معاناته في دفع الفاتورة يمكن رفقي به وطبتلي رغي في التليفون مثلا او حاجة زي كدة يعني
    :)))

    المهم..اتمني انك ترجعي لمودك الطبيعي وربنا يوفقك الى ما فيه الخير

    سلام :)

    ReplyDelete
  36. اولا برافو عليكى انك روحتى السنترال
    ثانيا برافوين عشان استنيتى الوقت الطويــــــــــــــل اوى دا
    ثالثا انا بقى عايزه اقلك انك بجد واضح انسانه رقيقه اوى وان الحياه عباره عن سنترال تليفونات

    ReplyDelete
  37. ZaHrAt El3eN

    ههههههههههههه
    لالالالا ويتعمل فيا زى بكيزة ليه .. ده انا حتى زى زغلول بالظبط هههههههه


    ----------------

    نسرين - أمة الله

    وعليكم السلام ورحمة الله وبركاته

    اللهم امين يارب

    هههههههههه
    طب حتكلم بقا ايه رأيك ؟؟ هههههه

    نورتينى بجد يا نسرين


    ------------------

    خمسة فضفضة

    وعليكم السلام ورحمة الله وبركاته

    ههههههههه الحمد لله انك ضحكتى يا فضفضة .. شوفتى ..فعلا حسيت انى بطلة وعندى قدرة ع التحمل

    مع السلامة وابقى كررى الزيارة ياام احمد
    هههههههههههه


    ----------------------

    omg :| u dunno me :(

    ياحبيبتى ربنا يخليكى ليا ... انا حكيتلك اللى مزعلنى ومضايقنى من باب الفضفضة ولأنى بحب اتكلم معاكى بس فوجئت برد فعلك الجميييييل اوى ده وقد ايه حاولتى تقفى جمبى ولو حتى بكلمة طيبة او شعور جميل

    حسستينى انك بتحبينى فعلا وانك زعلانة ليا بجد

    ربنا يخليكى ليا يارب وافرح بيكى ومعاكى ومتحرمش منك ابدا


    هههههههههه لا مافيش إساءة ادب يا ابو نسمة ولا حاجة ... ههههههههههههههههههههه بحس بيكى يابت

    مكنتش عشرة كلية دى عشان معرفكيش كمان

    ههههههههههه تمويه بس يا كونان بطل الحركات بتاعتك دى ههههههههههه

    لالالا مش حقولك ع الطريقة عشان اعرف ان انتى لولو واحتفى بيكى براحتى بقا فى مدونتى ..حلوة احتفى دى؟؟


    بحبك فى الله اويييييييييييي
    --------------------

    Mony The Angel

    ههههههههه طب الحمد لله

    اضحكى دايما يا منة ومتزعليش نفسك من اى حاجة .. الدنيا متستهلش زعل بجد


    ---------------

    Sharm

    الله يسلمك ياشارم ويبارك فيك

    ---------------

    Human

    ههههههههههههههه

    حرام عليك ماهو زى ماحنا مش طيقينهم هما كمان اكيد مش طايقينا
    مش حينوبنا غير الولعة واللسوعة وبس
    :D

    ---------------

    koukawy

    اه ياحبيبتى هى مدونة
    الله يسلمك

    اللهم امين يارب

    ReplyDelete
  38. عابرة السبيل

    وعليكم السلام ورحمة الله وبركاته

    ربنا يكرمك ع السؤال يارب وانا الحمد لله ابتديت اتظبط دلوقتى بفضل الله

    نورتينى
    :)


    ------------------

    الألم فى داخلى

    وعليكم السلام ورحمة الله وبركاته

    اهلا بيك يااخى فى المدونة وبعد الشر عليك من الحزن ربنا يارب يفك كربك
    اللهم امين

    ربنا يرحمها ويرحمنا جميعا اللهم امين

    لا تطويل ولا حاجة يا اخى
    اهلا بيك دايما

    ----------------

    Hadota .. حدوتة

    ربنا يكرمك ياجميلة ع السؤال
    الحمد لله بقيت احسن دلوقتى وحبتدى اشوف نشاطات ان شاء الله بس لما ارجع من السفر بإذن الله

    الحمد لله رب العالمين

    من عنيا حزورها بإذن الله

    هو انا اقدر بردو اطنشك ومعلقش ياجميل؟؟؟

    شرفتينى بجد

    -----------------

    Ma-3lina

    مراااااااام

    عاملة ايه وباباكى عامل ايه؟؟
    يارب يتم شفاه على خير ياااااارب

    ربنا ييسر الحال يارب وابقى ادعيلى


    ---------------------

    The Groom

    بتشتغلنى ياجروم اكمنك جروم يعنى؟؟؟

    روحت مالقتش حاجة جديدة يا فندم :@:@:@

    ------------------

    Mohamed A. Ghaffar

    ههههههههههههههه

    لالالا احنا ناس فقرانة بعيد عنك

    ايه الناس دى
    :D:D:D

    ------------------

    micheal

    متشكرة ليك جداااااا

    وبما انك خريج نفس الكلية الكاميكازية ... ايه اخبار الحياة معاك؟؟؟

    ههههههههههه

    اهلا بيك دايما شرفتنى

    ReplyDelete
  39. Meekness !!!

    هههههههههه ربنا يكرمك ياقمر ده انتى اللى عسل ياشيخة

    يالهوى عسل ايه حتلمى علينا النمل كدة ههههههههه

    الله يبارك فيكى ياجميلة ومبروك عليكى انتى كمان

    على فكرة انا روحتلك المدونة لاقيتك بتلمى عزالك ومسافرة

    تروحى وترجعى بالسلامة ان شاء الله

    واكيد حنكون اصحاب
    سلام يازيزى
    :)


    ------------------

    No Fear

    وعليكم السلام ورحمة الله وبركاته

    ربنا كريم ويارب يفك كرب الناس كلها اللهم امين

    هههههههه بتتكتب كدة
    م أ ر ط
    ههههههههههه

    وانت طيب واهلا بيك دايما يا اخى


    ------------------

    أخف دم

    حمد الله ع السلاااااااااااامة
    فينك يا استاذنا روحت وقلت عدولى
    وكاميكاز بليد فى الحساب زى مانت عارف

    هههههههههههه الله براحتى مدونتى وانا حرة فيها

    امين يارب واياك
    ربنا يكرمك ويعزك يااااااارب


    ------------------

    أمــانــى

    امااااااانى ازييييييك
    ليكى وحشة والله
    عاملة ايه وازاى اسوان على حسك كدة؟؟

    اه يابنتى ده انا رجلى ورمت ودكنت بطلع دخان من ودانى

    الحمد لله على كل حال

    اميييين ياارب


    -------------------

    Epitaph

    امييييييييييييين
    ههههههههههه

    ------------------

    Marvel - واحد زهقان

    هههههههه ربنا يسامحه بقا

    اللهم امين واياك يا اخى

    اهلا بيك دايما

    سلام

    -----------------


    حبة حاجات (ايمان)

    ههههههههههههه ربنا يكرمك ياجميلة

    حلوة الحياة سنترال تليفونات دى

    اهلا بيكى فى اول زيارة وان شاء الله ماتكونش الاخيرة

    منورانى بجد
    :)

    ReplyDelete
  40. قصة كفاح بجد

    انت اتخرجتي الف مبروك
    روقي كده و لا اكتئاب و لا بتاع انت فلة و ان شاء الله الامور تتظبط و نسمع احلى ضحكة

    اوروفوار

    ReplyDelete
  41. طب ما البوست حلو وجميل اهه
    امال مالك بقى
    ايوه كده اضحكي وضحكينا

    اسف للتاخير في الرد
    واشكر ليكي زيارتك عندي

    ReplyDelete
  42. hehehehehehehehehehehehe
    ba3d keda ya mama 2eb2o shilo el telephone a7san
    bas matenkereesh ya simo bardo 2a3adtilek 3 4 sa3at khadty feehom el experiences beta3et sha3b masr kollo 676

    ReplyDelete
  43. بدأت رحلة الشقاء
    انت بعد التخرج فى كوكب شقاء

    أعانك الله

    ReplyDelete

الكلمـة نـور .. وبعـض الكلمـات قبـور