Thursday, October 25, 2007

فوبيا الزواج


زمان من ثانوي كدة ابتديت احلم بفارس الأحلام اللى حيحبنى اوى واحبه اوى ونحب ربنا اوى ونجيب اطفال نحبهم اوى ويحبونا اوى ونحببهم فى ربنا اوى اوى اوى ، ده كان حلمى الوردى اللى لو فتشنا فى قلب اى بنت حنلاقيه ولو اختلفت تفاصيل وملامح الحلم ده بس حتلاقيه بردو موجود ، كنت مقبلة على الحياة اوى ايامها ونفسى مفتوحة زى مابيقولوا لحد ما شوفت فيلم أثر فيا اوى الصراحة اسمه " أسرار البنات " .. الفيلم ده عرفنى ان فى حاجة اسمها خطر وفى حاجة اسمها حذر من الخطر ده

دخلت الكلية وانا خايفة من العالم الجديد ومن اللى اى حد بيسمعه عن الجامعة والبلاوى اللى ممكن تكون فيها ، محور خوفى كان الجنس الآخر بصراحة لانى طول عمرى فى مدارس حكومية وتعاملى مع النوع ده كان فى اضيق الحدود .. عشان ابقى صادقة معاكوا كنت مرعوبة مش بس خايفة وإترجم رعبى ده لصلاة ودعاء عشان اهدى ، الحمد لله من كتر مادعيت تقريبا ربنا اكرمنى بكليتى .. وكليتى لمن لا يعلم معظمها بنات وقليل فيها جدا الولاد .. فرحت جدا بجد بالموضوع ده وحمدت ربنا عليه والحمد لله الجامعة مختلفتش كتير عن المدرسة .. اكنى لسة فى مدرسة بنات وبس وعلى مدار الأربع سنين فعلا كان تعاملى مع الشباب يكاد يكون معدوم الحمد لله

برغم فرحى بده إلا إن الحلم كان لسة موجود ومعترف بيه جوايا بس الحلم ده كان فيه حاجة غريبة جدا هى انه دايما كان بالنسبة لى حلم مُحرم او ممنوع .. يمكن عشان اختى اللى اكبر منى بتسع سنوات كانت لسة متجوزتش فمش من الطبيعى ابدا انى احلم بكدة ساعتها .. الأغرب والأعجب انها حتى بعد ما اتجوزت وربنا رزقها ببنتها لسة بردو الحلم جوايا مُحرم او ممنوع .. إزاى حتى افكر فيه وفى ملايين غيرى اكبر منى بكتير ولسة مرتبطوش .. لازم هما الأول وبعدين افكر فى نفسى

مع الوقت إبتدى يقل المنطق ده شوية وحسيت ان الحلم اللى كنت بحلم بيه من ثوانى ممكن اوى يحصل ويتحقق وفى أى وقت ... اللى مش حتصدقوه إنى مع قرب حدوثه إبتديت ابعد واخاف والخوف جوايا يزيد الى ان وصل الى درجة الرعب فعلا .. لاقيتنى بقولى فارس احلام ايه وبتاع ايه .. بلا وجع دماغ ، ايوة بقيت رافضة فكرة الزواج من اصله ومبقتش حتى اخليها تعدى كدة على راسى ولو على شكل فكرة بريئة ممكنة الحدوث .. السبب ؟؟؟ السبب هو المجتمع اللى بايقنا فيه والصح والغلط اللى تداخلوا اوى .. سهل جدا دلوقتى اى حد يتخدع خصوصا بالمظاهر او بوهم كبير اوى اسمه الحب اللى اصبح شئ قديم ومعنى غريب مش فاهماه .. وبقيت خلاص مش عايزة اتجوز مع انى عارفة ان حرام اقول كدة بس فعلا بقيت خايفة وقلقانة من كل الشباب ومش مطمنالهم ده غير انى معرفهومش اصلا .. اى شاب دلوقتى بقا عبارة عن علامة إستفهام كبييييرة ماشية على رجلين بتخوف .. عارفة انى بطريقتى دى بظلم ناس كتير على خُلق وناس كويسين بس متأكدة بردو ان فى شباب تانين بيفكروا نفس تفكيرى ده وبيقولوا فى قرارة نفسهم بلاش .. وديه ياجماعة تبقى الظاهرة المعروفة بـ" العزوف عن الزواج " او " فوبيا الزواج ".ه


كنت فكرانى انا بس اللى بقيت كدة .. خوف وقلق أدى الى انى اشيل الفكرة من دماغى خالص بل وارفضها كمان وبشدة لحد ما اتفرجت على حلقة فى برنامج آدم بعنوان فوبيا الزواج .. وقالوا فى الحلقة ان نسبة كبيرة جدا من الشباب والبنات فى الوقت الحالى رافضين فكرة الزواج شكلا وموضوعاً وبيفضلوا البعد عن الجنس الآخر تماما .. رغم إن الإحصائية اللى قالوها ومش فاكرة ارقامها كانت تحزن بس كنت فرحانة انى مش لوحدى وفى ناس تانية طلعت زيي


خلال الحلقة حاولوا يشوفوا ايه الاسباب اللى أدت الى ظاهرة الفوبيا دى .. واللى خلت معظم الشباب والبنات بجد تخاف تاخد الخطوة دى وتخاف من تحمل المسؤلية ، ولاقوا ان اهم الأسباب على الإطلاق هو البطالة والحالة الإقتصادية الصعبة فالشباب مش عندهم القدرة على الخطوة دى فبيقولوا بلاش والبنات شايفين الحال عامل ازاى فبيقولوا بلاشيين ... السبب التانى هو متمثل فى أزمة ثقة بين الشباب والبنات .. البنت شايفة ان معظم الشباب دلوقتى - مش كلهم عشان محدش يزعل - بقا غير قادر على تحمل المسؤلية بصورة او بأخرى ، مش عارفة نوع من الهيافة يمكن او بسبب البطالة يجوز الله أعلم ، وكمان الولد عنده أزمة ثقة فى البنات بسبب كتر الفساد المنتشر فى الجامعات والفديو كليبات واللى بيشوفه ويسمع عنه من المحيطين بيه أو عدم ثقة فى أهلها نفسهم وأنهم ممكن يغالوا فى الطلبات وهو مش عايز يحرج نفسه فبيبعد من سكات وخلاص

السبب التالت والأقوى فعلا هو الصورة السلبية جدا المتصدرة إلينا معشر السنجلز " الغير مرتبطين يعنى" من المتزوجين ومن وسائل الإعلام كمان واللى بتأكد وبقوة إن الزواج ده شئ وحش جدا جدا جدا ، وجمل بقا من نوعية " كان يوم اسود يوم ماشوفتك!" .. " كنتى فين يا لأ لما انا قلت آه! " .. " الجواز؟؟ بلا هم ياشيخة استمتعى كدة وشوفى حياتك احسن .. بلا جواز بلا هم " ..." متحسبوش يابنات ان الجواز راحة " .. " كان بدرى عليك عليك بدرى" ... بتأكد النظرية ان التعبيرات السلبية اللى زي دى كان ليها أثر كبير فى عزوف الشباب والبنات عن الزواج لأن مع إستبعاد العامل الأول والأكبر اللى هو البطالة وسؤ الحالة الإقتصادية حنلاقى فى نسبة عازفة بردو .. يعنى ناس قادرة تتزوج ومش عايزة او رافضة وده فى الغالب بيكون بسبب الصورة السيئة المتصدرة إلينا من أهلينا نفسهم او الإعلام او المحيطين بينا وهم جرَ

كلام جميل ولما طبقته عليا لاقيته انه صح جدا .. يعنى من الحاجات اللى كانت بتغير فكرة الزواج عندى هى حال اختى بعد زواجها وقد ايه بقت مطحونة فى البيت ومع البنت .. على النت استاذى العزيز طهقان وزوجته طهقانة قاموا بالواجب وزيادة الحقيقة هههههههه .. ده غير والدتى وكلامها على ان احلى ايام بجد كانت فى قعدتها فى بيت ابوها

بابا حبيبى كان دايما له رأى فى الموضوع ده .. تحبوا اقولهولكوا؟؟ .. حقوله طبعا مش مدونتى هههههههه
المهم بقا بابا كان زمان وانا فى مرحلة الحلم الوردى يقولى الزواج ده يابنتى حدث عارض فى الحياة ،ازبهل كدة واقوله عارض إزاى ياعم الحاج؟؟؟ .. يقولى يعنى ممكن اه بيحصل بس مش هو كل الحياة !!! ..اتنح كدة واسرح واتنهد - كنت رومانسية اصلى هههههههه - واقول فى نفسى " إزاى ده هو الحياة باللى فيها ياريس" وبعدين ارجع اركز معاه لاياخد باله من التنهيدة الاقيه بيقول انه قصده ان حتى الحيوانات بتتجوز ، يبقى معنى كدة ان الزواج هو فعلا أمر ضرورى بس مش هو الهدف .. هو وسيلة لا غاية ، يعنى الزواج يحصل وبعد كدة الواحد يكمل مشواره فى الحياة ويمشى فى طريق نجاحه وتحقيق اهدافه مع شريك حياته اللى اختاره ويعمر فى الدنيا وهو متزوج .. الجواز مش نهاية المطاف يابنتى اتنح كدة ويترسم على وشى علامة تعجب كبيرة واقوله: نظرية بردو!ا


لما كبرت لاقيت كلام بابا صح جدااااااااا وأصح لو طبقناه على الشغل كمان .. لو تلاحظوا دلوقتى لو سألتوا اى شاب ايه اهدافك حيقولك مثلا اشتغل الشغلانة الفلانية واتجوز .. والكلام ده غلط جداااااااا ، الشغل والجواز أحداث عارضة فى الحياة ، ومش معنى انك حصلت على الوظيفة التمام يبقى خلاص حققت هدفك .. لازم بعد ما تشتغل تبتدى تشوف تقدر تطور إزاى وتحسن إزاى من كفائتك فى الشغل اللى لو الكل فكروا بالطريقة دى حيتحسن مستوى وحال أمتنا أكيد ، واعتقد والله اعلم ان احدى اسباب تخلفنا فى مسار باقى الدول هو ان الزواج والمنصب من اهم اهدافنا .. لو تلاحظوا برا الزواج مش مشكلة اوى زى هنا وبتجوزوا فى سن صغير كمان وفى الشغل بيكون هدفهم جودة المنتجات نفسها مش مجرد منصب ومكتب وبدلة وكدة


مش حنهى الموضوع بنصيحة او بخاتمة ، هى بس مشكلة وحبيت احكيلكوا عنها .. ممكن يوافق عليها البعض ويرفضها البعض الآخر جملة وتفصيلا ، بس وافقنا عليها او لم نوافق ده مايمنعش انها ظاهرة موجودة وملموسة فى الوقت الحالى للأسف ، وفى النهاية طبعا لا يصح إلا الصحيح وهو أن الزواج هو سنة عن سيدنا محمد عليه الصلاة والسلام وحيفضل أمر ضرورى جدا لتعمير الأرض والإصلاح فيها

115 comments:

  1. السلام عليكم ورحمة الله وبركاته

    يااااااااااااااه كل ده شيلاه في نفسك وساكته ، الله يكون في عونك ،
    بس تعرفي انه تحليل منطقي جدا عن تاخر سن الزواج عند كتير اوي من الشباب والبنات

    عموما يا ستي ربنا يفرحنا بيك قريب وتنتهي من عندك فوبيا الزواج دي

    بس بيني وبينك الايام بتاع بيت العيله عمرها ما تتعوض

    ReplyDelete
  2. أنا عن نفسي مش ناوي أتجوز أبدا و مقتنع بكده مليون في الميه
    بس باذن الله ميكونش فيه مني كتييير
    :)
    تحياتي

    ReplyDelete
  3. بوست متميز, مش لازم ننظر للحاله على أنها ظاهرة سلبيه, الجيل الجديد يشهد عزوف متزايد عن الزواج نتيجة أزمة ثقه في عوامل كثيرة
    الحاله الإفتصاديه
    الوضع الإجتماعي
    قوالب المجتمع
    الإفتقار لهدف,,الجواز ليس و لا يمكن أن يكون هدفا
    عدم ثقة و كثيرا جدا حتى عدم الإحترام للطرف الآخر
    توقعات مغاليه,,عامل سلبي جدا

    والنتيجه, تأجيل إلى أجل غير مسمى و لا قريب
    بحد ذاته ده مؤشر على نضج المجتمع رغم كل مظاهر الهيافه المسيطره على المجتمع

    ReplyDelete
  4. بسم الله ما شاء الله .. الموضوع جيد جدا ومكتوب بطريقة فاجئتينا بيها

    طبعا الظروف الإقتصادية طرف في القضية بلا شك .. وكذلك الفساد المنتشر طرف آخر .. لكني ما زلت أشوف إن السببين دول مش دافع أبدا لأننا نكره الزواج ونعزف عنه

    وقبل ما أقول ليه أحب بس أعلق على
    موضوع صورة المتزوجين في الإعلام

    أحب أقول إن من المستحيل إن الواحد يجمع بين جميع المزايا لكل الحالات الإنسانية مع بعض .. يعني من المستحيل إننا نجمع بين مزابا العزوبية ومزايا الزواج في نفس الوقت

    فلكل مقام مقال .. والزوجين بإيديهم إنهم يخلوا الحياة الزوجية إما جنة وإما جحيم

    نرجع لموضوع العزوف عن الزواج .. أحب أقول إن الزواج في حد ذاته وبعيدا عن كل المشاكل اللي إتناقشت هنا فهم إطار إجتماعي عظيم ونعمة غالية أحلها الله عز وجل ما بعدها من نعمة .. وهو من أعظم أنواع الرزق .. وازم دايما نحبه ونعظمه ونحلم بيه حتى لو الظروف معاكسه

    ReplyDelete
  5. شوفى ياسمين طبعا كلامك جميل
    بس معلش الزواج من سنن الرسول الرسول قال
    الزواج من سنتى فمن رغب عن الزواج فليس منى
    والله لا يحب العبد العازب
    لانه بيكون معرض لفتن كتير وانه بيوأد اولادة فى ظهره
    دة اسمه الوأد الحديث
    والزواج نعهمه كبيره جدا
    وللاسف احنا الظروف الاقتصاديه فهمتنا الزواج غلط
    الزواج بقى صفقه لمعظم البنات واهل البنات واصبح للرجل انه يحصل على واحده زى هايفه وهبى وتفضل البت تبحث على الصفقه واشاب يبحث على هايفه وهبى وطبعا الاتنين بيفضلوا فى البحث لغايه لما يوصلوا للعمر ارذله
    شوفى كدة نعمه الزواج وانتى بتخافى على والدك او والدتك لما تمرض
    تفتكرى اللى مش اتجوز هايلاقى حد يقف جنبه ويخاف عليه زى اولادة
    لا ياسمين الجواز نعمه كبيره بس الناس هى اللى بدلت نعمه الله
    زى ما بدلوا نعم كتير قوى
    رزق كل بنات وشباب المسلمين الزواج والعفاف اللهم امين يارب العالمين

    ReplyDelete
  6. كويس أوى إن حضرتك تفضفضى

    ..

    أما عن الموضوع اللى بتحسى بيه ده

    أنا شايفه فترة و ح تعدى

    بس إدعى إن ربنا ...
    يرزقك بابن الحلال

    ReplyDelete
  7. البوست هائيل بجد ولو اعتبرنا الموضوع ده دعوه للناقش بصفتى شاب انا مش بفكر انى ارتبط حاليا على الاقل لا سباب كتير انا بعترف وبقر انى مريض بفوبيا الجواز
    يمكن علشان ضعف المعرف بالاخر يمكن علشان مش عايز اظلم بنت معايه فى ظروف يعلم بيها ربنا
    بس بجد لخصتى فى البوست ده تفكير اسباب كتير وتفكير شباب وبنات كتير تحياتى

    ReplyDelete
  8. علي فكرة انتي حليتيلي مشكلة كبيرة ولاقيت عندك الرد اللي اعرف اواجه بيه تعجب صديقاتي من اللي ف نفس سني لما بصدمهم برأيي المشابه لرأيك ف الموضوع ده
    انا شايفه ان ف العصر اللي اصبح فيه اغلب الشباب مالي راسه بتفاهات ..لدرجه ان الشاب اللي ف سني او اكبر مني بكام سنه الاقي تفكيري اعلي منه دي حاجه تقلق..دا غير ظاهره الفساد الاخلاقي عامة...والادمان والكيف وخلافه ..الواحد مابقاش عارف الشخص اللي بيتعامل معاه ده من جوا زي من بره..ولا مخبي بلاوي مايعلم بيها الا ربنا
    حاجه تانيه برضه احب اضيفها اعتقد انها ممكن تكون سبب ف المشكله دي
    هي الارتباط الشديد بين البنت او الولد باهلهم خاصه البنت لما تكون خايفه انها تنتزع من البيئه اللي عاشت فيها ودي فعلا سبب من اسباب احساسي انا شخصيا بالفوبيا دي
    لكن برجع وبقول
    الواحد لسه صغير واحتمال افكاره تتغير مييين عارف
    تحياتي ليكي ولمدونتك الجميله

    ReplyDelete
  9. السلام عليكم
    أولا احيكي علي الموضوع البديع والسطور الجميله التي سردت بأسلوب منمق وشيك

    انا هكلمك عن نفسي
    انا متزوج من 3 سنوات وعندي طفلين
    الزواج بالنسبه لي انه مرحله ومنعطف خطير ةولكن كل ما يبني علي اساس قوي تجني ثماره سريعا

    اتفق معكي ان الزواج الان مشكله كبيره نظرا للحاله الاقتصاديه التي نعيش فيها ولكن لما لا نجعلها هدف ونزيل كل تلك جبال الاوهام التي نعيش خلفها

    الزواج مرحله هامه لابد منها لكل من يبحث عن الاستقرار

    ReplyDelete
  10. اممممممم معاكي حق ...بسس هو السبب الرئيسي في عدم الجواز هو عدم وجود ثقه وتفاوت الطبقات اوي ...فصعب انك تحبي واحد وتلاقيه من نفس الطبقة بتاعتك او العكس انك لاقي حد مناسب بس مش حباه ... يمكن كل اللي قالوا ان الجواز مش حدث لازم يحصل ده للتهوين عن عدم الجواز ...لأن في ناس بيعيشوا علشان يتجوزوا بيكون ده اكبر هدف فلما حد يقولك انه شئ مش مهم هو مش يقصد المعنى ده ... هو يقصد انك مش تعيشي حياتك وانتي مستنيه تتجوزي وشكراً :)

    ReplyDelete
  11. موضوع شيق اوي
    وفيه جوانب كتيره جدا

    لكن المهم في الامر القناعات الشخصيه

    انتي بتبصي ازاي للامر ؟؟؟؟

    عموما ربنا يهديلك الحال

    ReplyDelete
  12. هههههههه
    والله يا سمسمه انتى عسل
    واضح فعلا ان فى قاسم مشترك فى اللماضه بينا
    لان الموضوع ده كان لسه على بالى امبارح
    بس مش هقولك عليه دلوقتى
    خليه شويه هتقريه بنفسك

    ReplyDelete
  13. أنا لسه ما قريتش لأني مشغول
    بس ححجز مقعد
    أشوفك بعدين
    سلام

    ReplyDelete
  14. ابنتي الإنسانة إنسانة
    أكرمك الله وأسأل الله أن يجعل هذه التدوينة في ميزان حسناتك

    وأيضا أن يفرج عن نفسيتك بها
    بس الموضوع كبير جدا
    وله اسباب عديدة أنت ذكرت بعضها

    ولكن الزواج ليس حدث عارض إلا لوفرضنا أن العمل حدث عارض والبلوغ حدث عارض والصحة ضد الإعاقة حدث عارض وفي كل مراحل عمر الإنسان هو عبد لله يحاول أن يتحرك وفق مراد الله ويلجأ إليه ويستخيره ويحسن فيما بينه وبين الله والله يكون يده التي يبطش بها ورجله التي يسعى بها وعينه التي يبصر بها

    قد يكون عنصرا هاما في هذه الظاهرة
    انتشار العنوسة وعليه تلجأ الفتاة إلى الهروب بالعزوف من باب أنا تيجي مني أنا أحسن
    وايضا انتشار الطلاق ومحور ذلك هو نشر ثقافة السخرية من الزواج وتضخيم المشاكل الزوجية وقد عتبت على طهقان وطهقانة ذلك في تدوينة لي
    قلت
    وإن كنت أنا ضد السخرية المنتشرة من الزواج بوجه عام والتي تسهم بشكل أو آخر في الصد عن الزواج أو إعطاء انطباع لمن لم يتزوج أنه مقبل على مرحلة اللا حرية ومرحلة اللاعودة ومرحلة الطهقان المستمر

    ReplyDelete
  15. الله ينور
    انتي قلتي ان فيه مشكله
    وكمان دورتي على الاسباب وجبتيها
    ونقلتي كلام ناس مجربه
    والكلام مدعوم باحصائيات

    احنا نعمل بقى ايه
    لاتكوني عايزانا نقول مش هانتجوز
    لاااااااااااااااا
    ربنا يسهل
    بس فعلا مش انتي بس
    انا ليا صاحبي تقدري تقولي انتي بس على ولد
    نفس الدماغ بالظبط
    ويقولك مانا ف بيت ابويا واكل شارب نايم والحياه زي الفل
    انا قادر اتحمل مسئوليه نفسي عشان اشيل هم حد تاني
    فعلا هو ده التفكير السائد دلوقت
    بس انا مش منكوا انا حلو وعايز اتجوز مش زي الوحشين التانيين
    ربنا يهديكوا انتوا واللي زيكوا
    عملتكوا مرضى
    هههههههههههه

    ReplyDelete
  16. بوست جميل جدا


    بس اكتر حاجه عجبتنى نظريه باباكى

    فعلا بجد انا فكرت فيها اوى لاقيته متطلعش الا من رجل حكيم

    وعلى فكره مدونتك ما شاء الله جميله جدا تقبلى مرورى

    ReplyDelete
  17. اية دة كلة يا سمسه عموما الواقع غير وانك تحلمي وتخافي من حاجة غير

    بس هو فعلا الايام دي محتاج الاختيار الصح لكل شئ لان فية حجات كتير من كلامك صح

    بس في النهاية الزواج دة نعمة من عند ربنا لكل انسان سواء بنت او ولد

    اسرة استقرار هدف في الحياة عارفة حلمك لبكرة في حياتك عن طريقة
    يعني لولا الزواج مش هتكون فية حياة صح هيكون كل شئ زي ساعه بتلف بالعكس
    ربنا يكرم الجميع بالحياة الصح

    ReplyDelete
  18. لا بصي انا شاكة فيكي

    ايه يا بنتى

    انتى كتبتى بجد اللى كنت عايزة اكتبه

    غريبة !!!!!!!!!!!!!

    المهم

    انا كمان عندى
    فوبيا الزواج :)

    صحيح انا لسه صغننه :)))))))
    بس بفكر فى الموضوع
    وفعلا انا مش عايزة اتجوز وبقول لماما كده كتير جدا

    لانى مؤمنه ان فترة الخطوبة دى مش كفاية علشان اتنين يعرفوا بعض مش لانها فترة قصيرة لا بس لانها مش حقيقية من الاساس

    كل حد بيظهر باحسن احواله

    يعي مجرد خدعة كبيرة اتنين عايشينها وكمان عارفين انها خدعة

    مش عايزة اتجوز لانى مش مقتنعه انى ممكن الاقى حد مناسب احلامه زى احلامى او على الاقل متوافقه معاها واهدافه زي اهدافى

    مش مقتنعه انى ممكن الاقى حد يفهمنى ولو لقيت هل هايقدرنى ولا لا

    هل هايكون عندى فرصه انى يكون لى احلامى الخاصه واهدافى الخاصة لما اتجوز ولا هابقى زى اى واحدة كانت شخصية متميزة قبل ما تتجوز وبعد الجواز بقت مجرد حلة و معالق وشوك وسكاكين

    هل الجواز فعلا مقبرة الطموح

    هل هاتجوز انسان عنده طموح من الاساس ولا هايبقى كل همه المرتب يكفى الاكل والشرب واللبس ومصاريف العيال ورايح الشغل وجاى من الشغل

    بالنسبة لى بجد الموضوع من اوله لآخره علامة استفهام كبيرة مش بس الاناسن اللى حياتى هاترتبط بيه لا كل الحكاية

    انا مؤمنة ان الجواز حاجة عرضية مؤمنة بنفس راي باباكي بالظبط

    هل بقى هالاقى حد مؤمن بنفس الراي ؟؟؟؟؟؟؟؟؟؟


    علامة استفهام كبيرة واكتر حاجة الانسان بيخاف منها

    هى المجهول

    وبجد بحييكي قلتى اللى كنت عايزة اقوله

    ReplyDelete
  19. فوبيا الزواج!!!!!
    اسم مرضى صح؟ يبقى لازم يتعالج مش نقول فى ناس كتير كدا و نفضل كدا
    على أساس انها موضة و ماشية فى البلد يعنى
    أصل ماينفعش ربنا عاوزنا نعمر الأرض و ان شاء الله هانعمرها طالما ده فى مقدورنا بلاش تشاؤم
    و بعدين يا ياسمين انتى نفسك قولتى ان ربنا كرمك فى حاجات كتير و كنتى بتدعى و بتصلى عشان الحاجات دى تحصل يبقى طول مانتى بتدعى و تصلى لربنا عشان يكتبلك الخير و يرزقك بالزوج الصالح و الزرية الصالحة ان شاء الله ربنا يستجيب و مايخيبش أملك أبدا
    بلاش النظرة دى احنا مش ناقصين كآبة :'(
    يعنى اللى الشباب الكويس راح فين ماهم موجودين الحمد لله و ربنا يجعل واحد منهم من نصيبك يا سيمو
    لا تقلقى ولا تخافى يا حبيبتى و اللى فيه الخير ربنا هايقدمه ان شاء الله

    ReplyDelete
  20. مش عارفه اقول ايه؟

    لسه كده بس؟.

    بس دي فعلا بقيت ظاهره

    ماتقلقيش يابنتي حالتك مش خطيره اووي

    لسه في أمل يعني

    ReplyDelete

  21. تسعين في المسة من كلامك صح
    خاصه موضوع علامه الاستفهام ده

    موضوع اختيار شريك الحياة ده صعب جدا سواء للبنت او للولد

    بس انا مقتنع بمبدئين هيلخصوا وجهه نظري في الموضوع ده


    لو انتي شايفه بعض التصرفات الي الزوجات كلهم بيعملهوا
    حاولي انتي لما ربنا يكرمك بزوج صالح متعمليهاش

    ثانيا
    مينفعش تفتحي الشمسيه بتاعتك وتستني المطر

    لما تبقي تمطر ياسيتي ابقي افتحيها

    ReplyDelete
  22. هو انا انتمى للسنجلز بس حاسة ان الزواج يعنى ليه مفهوم مختلف شوية
    الزواج استقرار وبناء اسرة وزوجة اتحمل اسم زوجها وزوج مسؤل عن زوجة واولاد
    ربنا يوفقك ويرزقك بالزوج الصالح والذرية الصالحة
    وانا كمان

    ReplyDelete
  23. دي اول زيارة لمدونتك الجميلة دي واسمخيلي انها ماتكونش الزيارة الاخيرة
    كمان ممكن تشرفيني في مدونتي
    بالنسبة لفوبيا الزواج دي موجودة سواء عند الصبيان او عند البنات
    اما بسبب الخوف من الجنس الاخر وممكن تكون بسبب الخوف من تحمل المسئولية وممكن تكون الخوف من الحياة الجديدة على اساس ان اي جديد له رهبة
    ولكن سيبي الدنيا تمشي زي ماربنا رايد لكي هتلاقي ان كل حاجة بتمشي بسلاسة
    تحياتي واحتراماتي

    ReplyDelete
  24. السلام عليكم
    انسانة الجميلة اد ايه شرفتيني بزيارتك ويشرفني اني تعرفت على شخصية ومدونة جمال كدا ان شاء الله تدوم الزيارة وشكلي جيت على موضوع مهم وجه على الجرح ودلوقتي عرفت ان احنا فعلا مشتركين فى حاجات كتير بس انا الموضوع بالنسبة ليا كبير قوي
    ومليان لخبطة وبدعي ربنا يفكها من عنده وربنا يرزق الجميع بالازواج الصالحين والزوجات الصالحات
    وانتي اولهم ان شاء الله
    اتمنى تشرفيني دايما
    واتمنى نتعرف اكتر
    السلام عليكم

    ReplyDelete
  25. السلام عليكم

    اقل ما يقال انك بجد حللتي المشكلة وسبل حلها بطريقة جميله جدا

    وانا موافقك في كل اللي قولتيه فعلا

    تحياتي

    ReplyDelete
  26. فكرة الخوف أوالفوبيا بحد ذاتها من الناس بتفكرني
    أنا مش هخاف م المصير ولا خايف م القدر
    ومخوفتش من ماضيا لكن بخاف م البشر

    أما عن هذا الموضوع
    وأنا حاسس من الأول إنك ليكي وجهة نظر فيه
    مش غلط ولكن مش صح أوي, موضوع الابتعاد ده غلط والاختلاط برضه غلط لكن المفروض الولد والبنت يكون في حياتهم الجنس الآخر
    ده لازم علشان الواحد ميطلعش بعد كدة خايف أو مكسوف أوي أو حتى سافل ومحروم ويعمل الحاجات اللي عارفينها
    لكن الواحد ميفكرش أوي في الموضوع ده كتير وفي نفس الوقت ميستبعدوش من تفكيره
    يعني ربنا هو اللي في إيده الكلام ده
    نستنى ولو جت حاجة نجرب علشان لو غلطنا نتعلم ومنغلطش تاني ولو طلعت صح يبقى الحمد لله
    مع أطيب تمنياتي بالتغلب على فوبيا الزواج
    تحياتي

    ReplyDelete
  27. عزيزتى
    شوفى انا شايف الجواز دى مقدرة وقدره على تحمل المسئوليه من الرجل وقبول لهذه المسئوليه من المراه وتحملها معه
    وكل واحد فينا سواء رجل او ست ليه اسبابه واللى من غيرها مش هيتمنا الزواج فيه اللى عاوز الذريه والاولاد فيه اللى عاوز الاستقلاليه وفى اللى عاوز يفرح اهله بيه وباولاده وفيه اللى بيحب ولازم يتجوز حبيبه وفى ميت حاله الانسان بيها يتمنا الجواز
    واللى رافض الجواز اكيد الحالات دول مش مهتم بيهم مؤقتا بس اكيد فى وقت هيحتجهم ويتمناهم من حب واولاد وفرحه وعيله واستقلاليه
    واظن اى حد عندوا فوبيا زواج وهو مرتاح ماديا لوقابل انسانه حبها الفوبيا دى هتروح فى لحظة
    والبنت كمان رفضها للزواج كلمه بتقولها بس لو قبلت راجل بجد حتى لو محبتهوش اكيد هتقبله زوج ليها كفايه انها تحترمه وباحترامها ليه هتحبه
    واكيد الدين عمل حاجات كتير لحل ازمه العنوسه والزواج بس للاسف الناس بتضيع اولادها علشان حاجات ملهاش قيمة ومش عارفين احلى شئ ان رجل وامراه يكونوا سكن لبعض
    موضوع جميل بس محتاج كلام كتير اووووووووووووووووووووووى
    تحياتى يا انسانه
    سلااااااااااااااااااااااااااام

    ReplyDelete
  28. السلام علايكم
    فوبيا الجواز
    في عوامل كتيرة بتخلي الواحد بيعرض عن الجواز واهمها طبعا العوامل الاقتصادية
    بس انا بحب اقول حاجة
    ي ناس مش بتهم ب>لك العامل بل العكس انا اعرف اشخاص فوبيا اجواز عندهم موجوده بدرجة عالية جدا
    ومش مهتين بالعمال الاقتصادي
    ماشين بمبدا اعقلها وتؤكل
    بس هي في الاخر بتخلف من شخص لشخص

    ReplyDelete
  29. ازيك يا انسانة
    على فكرة انتى كلام صح
    بس هوا العزوف عن الزواج بقى من ناحية الشباب اكتر من البنات
    ولاسباب كتير مختلفة
    انا اعرف شباب مقتدر ومش عايز يتجوز مع انه لو عايز هيتجوز من الصبح
    المشكلة فى فكرة الجواز نفسها
    دى مشكلة خطيرة بجد
    العزوف عن الزواج بيعمل مشاكل اجتماعية خطيرة وربنا يسترها على شباب وبنات المسلمين

    ReplyDelete
  30. انا واخوى واختى نعانى نفس المشكله

    فقط انا استجمعت قواى واقتحمت ولا اندم رغم المشكلات ورغم قلة السعاده فعلى الأقل عندى مشروع اعكف عليه

    انما السيد الوالد حكيم اوى اضيف فقط على ما قاله اننا نقبل على الزواج والعمل بصوره ذهنيه وليس بصوره واقعيه

    ReplyDelete
  31. السلام عليكم
    ..........
    ربنا يرزقك بالزوج الصالح يا رب
    الموضوع جميل اوى
    تحياتى

    ReplyDelete
  32. انسانه يا قمر
    ازيك وحشتينى
    طبعا انا زعلانه انك عندك فوبيا من الزواج بس تحلييلك ماشاء الله منطقى جدا
    بس انا هقولك على حاجة بسيطه اوى توضح اللى انا عايزة اقوله ايام ما كنا فى المدرسه فى ابتدائى كنا زعلانين جدا وبنقول عاااااااااااا عايزين نقعد فى البين ولما انتقلنا لاعدادى قولنا عاااااااااا ياريتنا ضلنا فى ابتدائى
    وهكذا لحد ما بتتخرجى من الجامعه وتشتغلى تقولى عاااااااااا ياريتنى فضلت اذاكر
    دى سنه الحياه ان الانسان مش بيرضى خالص باللى هو فيه يعنى لما هتكونى قاعدة فى البيت تفضلى زهقااااااانه وتقولى امتى اتجوز ولما تتجوزى تقولى ياريتنى فى بيت ماما وبابا ...دا مش معناه ان الجواز شىء وحش او مرهق هى مرحله من ضمن مراحل حياتنا بنمر بيها ولما بنتأقلم عليها بتكونى فى منتهى السعادة ...مش علشان بس الاستقرار النفسى والمادى اللى انتى بتعشيه فى بيتك مع زوجك واولادك ان شاء الله لا لان الهدف اكبر
    المفروض ان هدفنا من الزواج يكون ارضاء الله سبحانه وتعالى واننا نعف انفسنا واننا نعمر الارض بالمسلمين حطى النوايا دى وادعى ان ربنا يرزقك بزوج صالح الموضوع هيفرق اوى والله
    طبيعى ان يحصل تعب ومشاكل لان هى الدنيا عموما مش الجواز خصوصا
    انا رغيت كتير اوى بس يارب اكون وضحت وجهه نظرى تسلم ايدك على البوست ويارب يارب اسمع عنك كل خير يارب

    امضاء متزوجه :D

    ReplyDelete
  33. هههههههههه ايوة عندك حق انا من المروجين للفوبيا دي و متبنية مبدا
    بلا جواز بلا هم

    يعني نغشكم مش اللي اتلسع من الشوربة ينفخ في الزبادي
    و لا نسيبكم على عماكم و ترجعوا تقولوا ليه موعتوناش

    تحياتي

    ReplyDelete
  34. نظرا لتميز مدونتك تمت أضافتها لدليل الصباغ للمدونات

    ===============================

    شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

    لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

    شارك وأدعم فكرة تخصيص يوم 30 أكتوبر يوما للجرائم الأمريكية


    أحمد الصباغ

    ReplyDelete
  35. بصى يا حبيبتى لازم تعرفى ان اولا كلمة اوى دى مش من السهل استخدامها لانها بتعبر عن حالة مبالغ فيها لازم تكونى قاصداها علشان تيجى

    و انا شايفه ان كل واحد لازم يسأل نفسه هو هيتجوز ليه علشان يبقى اب \ ام و سنة الحياه و للا عشان لقى شريك حياته

    بقولك فين كشك الرغى يا بنت ؟



    تابعى عندى عشان كتابى خلاص هينزل و عايزاكى تيجى حفلة التوقيع طبعا

    ReplyDelete
  36. الاحلام لاتتغير بمرور السنين


    ولكن ممكن ان تاخذ شكل اخر

    واهتمام بجوانب عن اخرى

    ودة بيشكلها التحام الانسان مع الدنيا والحياة


    تحياتى

    ReplyDelete
  37. فوبيا ايه بس وايه الكلام الكبير ده
    ده نصيب ياخوانا والله واللي بيجي دوره بيعدي
    وغالبا بيرجع يندم
    :D

    بس مفيش شك ان دي حاجة جميلة وكلنا نفسنا فيها برغم كل الظروف اللي بتمنعنا منها او بتقف اصادنا في سبيل تحقيقها

    لكن مش عارف ليه انا شايف ان حكاية الفوبيا دي واسعة شوية والموضوع ابسط من كده بكتير

    ReplyDelete
  38. الزواج الزواج

    ده كل اللى بيشغل شريحه كبيره اوى من البشر

    بس لو يعرفوا ايه اللى بعد الزواج

    صدقينى رغم ان دى ممكن تكون اول زياره ليا هنا

    بس بجد موضوع جميل

    اتمنى لكل اللى عايز يتزوج ربنا يوفقه

    واللى عنده فوبيا ربنا يهديه

    زواج ؟؟؟

    ReplyDelete
  39. فوبيا الزواج والله موضوع حلو
    بس تعرفى ممكن سالسبب فى فوبيا الجواز كمان غير اللى انتى قلتيه
    حالة الياس نفسها
    ده الواحد على ماربنا يكرمه
    ويبتدى يقول هتجوز
    المفروض يااما معاه ورث ويعمل بيه مشروع
    يااما يكون شغال وده امر صعب جدا
    يااما يسافر برة
    عشان يشتغل
    وطبعا الشباب بتوعنا فافى اوى
    وحتة البعد عن بابى ومامى
    هتسبب لبابى قلق
    وماما ارق
    فطبعا
    يقعد جنبهم
    يااما شغل فى شركة خاصة
    الشغل اه
    ممكن
    الى انتى قلتى عليها البطالة
    صح
    والبنات
    برضه
    ميتوثقش فيهم الصراحة
    مش كلهم يعنى بس الاغلبية العظمى
    بجد
    تحياتى للبوست

    ReplyDelete
  40. هههههههههه

    ايه يا بت يا انسانة انتى شكل كاميكاز عملها و ناوى يتجوز و يسيبك

    و لو سابك انا موجودة هروح فين

    لا بجد اشغلى نفسك و ربنا معاكى فى الشغل بجد

    اما عن موضوع الفوبيا فانتى عارفة انا مكبرة برده جت جت مجتش يبقى هييييييييييييه

    ReplyDelete
  41. ايه يا بنتي كل ده

    اختصري

    هاتي من الآخر

    كل ده بوست

    مشكلتنا اننا عرب

    بس

    عادات و تقاليد مزروعه جوانا و بيكمل عليها الأعلام المتخلف بتاعنا

    و عموما يعني لو بنات مصر كلهم هيتجوزا ده معناه ان كل راجل هيتجوز اربعه

    و ده مستحيل الحدوث لن اساسا مش كل الرجاله هتتجوز

    يعني من الآخر اكتر من تلت تربع بنات مصر مش هيتجوزا

    تحياتي

    ReplyDelete
  42. السلام عليكم

    الموضوع كبير و لي فيه بعض الاراء .. قلت أحجز مكان قبل الزحمه اللي عندك - ما شاء الله - عشان لما ارجع خلال يومين ان شاء الله مالاقيكيش حطيتي بوست جديد قبل ما أرد

    لكن سامحيني انا مش معاكي في حكاية الفوبيا .. جايز قلق من المستقبل لكن مش للدرجه دي
    :)

    ReplyDelete
  43. لو هنتكلم عن تاخر سن الزواج يبقي حكاية الفوبيا دي هتبقي اخر سبب

    في اسباب كتير جدا زي الحالة الاقتصادية والبطالة والتفكك المجتمعي واسباب تانية

    بالنسبة للخوف سيبي الكلام ده للاعلام الهابط والبرامج الفاشلة اللي بيحاولوا يروجوا اسباب وهمية ويبعدونا عن اساس المشاكل

    انا ملاحظ جدا لمحة التدين في كلماتك يبقي فين الأخذ بالأسباب والنتايج مش بتاعتك

    شاب متقدم مثلا لفتاة بتسأل عنه اخلاقيا ودينيا وأسرته ومش عيب عن مادياته وهتقعد معاه مرة واتنين وتعمل استخارة مرة واتنين

    وتحكم ع الموضوع وتتوكل علي الله لانه موضوع خير طبعا


    ممكن بعد كل الاخذ بالاسباب يطلع النتايج مش زي ماحنا عايزين

    بس تفتكري ربنا بيكرم المتقين واللا لأ؟؟؟

    أكيد بيكرمهم وبيريح بالهم ويسعدهم ان اجلا او عاجلا

    ReplyDelete
  44. انا مش شايفه مشكله
    انا متاكده انك لسه بتحملى داخلك مواصفات فارسك

    وحين ياتى او تلمحيه من بعيد
    ستتغير هذا المنطق

    ولكن حين ياتى لابد
    من صلاه الاستخارة

    فقد شرع الله لنا صلاه الاستخارة
    ليكون معنا فى امورنا

    فما بالك يمن استشار علام الغيوب ومالك كل شى

    ادعو الله من كل قلبك انا يرزقك بالحب الابدى

    فلا يرد الله داع له
    ولا يخيب ابدا من استشارة

    تحياتى

    ReplyDelete
  45. السلام عليكم

    بصراحة انا مش عارف اعلق على ايه ولا ايه ؟

    عموماً وإجمالاً .. ان افكارك دى كانت عبر مراحل من عمرك .. والواحد فعلاً ممكن يغير طريقه تفكيرة من من سنه لسنه وناس من شهر لشهر .. وواحد زييى من يوم ليوم

    وبصراحة كلام الحاج الوالد جاب من الآخر .. وربنا يخلهولك .. وياريت تركزى فى كلامه بعد كده

    ReplyDelete
  46. انا الحمد لله خفيت من الفوبيا وهتجوز ياختي
    بس فعلا معاكي حق
    الناس بقت مش عارفه تتجوز طيب تقولي ايه لو قلتلك ان فيه ناس لسه مخطوبين يعني المفروض عدى خلاص مرحلة الفوبيا
    وبقاله فتره خاطب ومع ذلك بسبب الظروف اللي الناس بقت فيها بيقولك انا حاسس اني اتسرعت

    مش عارف الناس تعمل ايه بس

    الجواز مش وحش زي ما احنا بنسمعهم يحكولنا عنه
    عارفه هم بيكرهوا الجواز ليه لأنه اتبنى اصلا على فكره غلط
    فكرة ان الحب مش مهم وانه هيجي اكيد مع العشره
    ايوه العشره حلوه وفيه علاقه حب بتنشأ لكن بتكون غير الحب اللي المفروض يكون بين الزوجين
    يعني تقريبا بيكون نوع من التعود وبينهار عند كل مشكله او اختلاف بينهم وكل واحد يكره التاني
    بس العشره والتعود بتمنعهم انهم يسيبوا بعض
    علشان كده بيفضلوا متجوزين
    وفي نفس الوقت مبيبطلوش شكاوي من قرف الحياه الزوجيه
    وبعدين سيبك من طهقان وطهقانه دول سمن على عسل بس بيخزوا العين عنهم

    تحياتي يا انسانه وربنا يرزقك بزوج صالح يحبك وتحبيه بجد

    سلاااااااااااااااااااااام

    ReplyDelete
  47. عشان كده بشجع المدارس المختلطة و مادام المدرسة سمعتها كويسة يبقى خلاص عشان البنت تتعامل مع زميلها على انه زميل عادى و تبقى متعودة على كده من صغرها فى بنات بتتربى من صغرها فى مدارس منفصلة و لما بيدخلوا الجامعة بيتعرضوا لمشاكل بسبب الموضوع ده انا أعرف بنت كانت كده كل ما كان ولد زميلنا فى الجامعة يسلم عليها أو يصبح تفتكره معجب بيها


    اما عدم الثقة ما بين الجنسين بسبب ظروف العصر دى بقى مشكلة حقيقة مش عارفين حلها أيه

    ReplyDelete
  48. الحمد للة على العزوبية
    الواحد عايش كدة ملك

    ReplyDelete
  49. إيه ده مفيش جديد برضه؟
    يارب الفوبيا دي تنتهي قريباً
    منتظر حضرتك في آخر بوست
    تحياتي

    ReplyDelete
  50. التدوينة دى هايلة يا انسانة والموضوع مطروح بشكل جيد جدا ومحسوس بس انا لي تعليق علي موضوع صورة المتزوجين في الاعلام من امتى الاعلام بيظهر حاجة بالصوة الصحيحة الاعلام والزواج علشان يكون ناحج لازم يكون الطرفين عايزين ينجحوا زى اى علاقة انسانية وبصراحة الزواج نعمة ان يكون لك بيت بتاعك واولاد وزوج يخاف عليك ويحنو عليكى وفي اى وقت محتاجاه تلاقيه جنبك سبحان الله الذي فطرنا علي اننا محتاجين لبعض رزقك الله وبنات المسلمين بالزوج الصالح اللي يكون سند لك بجد ويكون اخ واب وابن وصديق وعلشان يكون كده لازم تكونى انت كمان له زوجة وام واخت وصديقة

    ReplyDelete
  51. احم احم احم

    بسم الله الرحمن الرحيم وبه نستعين وعليه نتوكل

    احم احم

    4 3 2 1 نبدأ تجارب الصوت

    ايوة

    ايوة

    الووووو

    فراشة الحاج زكى بوستيج تتمنى لكم حفل زفافى بهييم

    اتفضل يا دكتور احمد المايك معاك اهو اتكلم

    ايوة الاول انا بحب أشكر السيد المزكوم اللى قدمنى

    واحب اعلق على كلام الست الباشمهندسة الانسانة

    هوا انا لو هعلق على الكلام لازم الاول اذكر الحكمة الشهيرة اللى بتقول

    العروسة للعريس والجرى للمتاعيس

    :p

    ابطل هزار بقى واتكلم جد شوية

    هوا انا بصراحة مش موافق على كلامك يا ياسمين

    اولا فى حكاية فوبيا الزواج انا ماشى مقتنع ان الحكاية دى موجودة فعلا بس انا مش موافق عليها

    الجواز ده ربنا عامله مش علشان حفظ السلالة وبس

    الجواز ده ليه اهداف كتيرة جداااا

    فى الاول فكرة التعارف وادماج عيلتين فى بعض وانهم يكونو عيلة واحدة

    فكرة ان اتنين يسكنو لبعض ويكونو اقرب لبعض من كل الناس

    سيدنا ادم كان فى الجنة

    ومكانش محتاج حاجة

    بس ربنا شاف انه محتاج حد يكون معاه

    خلقله ستنا حوا

    ليسكن اليها

    مع انه كان فى الجنة

    بس ربنا كان عارف انه محتاج ست

    مش اى حد كمان

    ولما الشيطان دخل لسيدنا ادم عن طريقها ونزلو من الجنة

    كان ممكن يزعل منها

    بس لا الاتنين دورو على بعض لحد ملقيو بعض وكملو حياتهم

    فمهما كانت الظروف مش مساعدة او الحالة بايظة ومتسرش

    او الناس بتقول الجواز وحش

    ده ميخليناش نخاف منه

    وميخليناش نبعد عنه

    بالعكس ده على الرغم من انه مش شرط يبقى هدف بس انا شايف انه امنية لازم تكون موجودة

    ودافع من الدوافع اللى بتخلى الواحد يشتغل وينتج بشكل احسن وبنفس اكتر

    الواحد لو عايز البلد تبقى احسن واشتغل علشان خاطر ده

    هتبقى احسن لمين

    مش لولاده

    لما يكون له ولاد هيكون نفسه البلد تبقى احسن علشان خاطرهم

    وان الواحد يكون عارف ان فيه واحدة بتخاف عليه وبتحبه ومستنياه

    ولما هيا تكون عارفة ان فيه واحد بيحبها وبيخاف عليها ومستعد يحميها ويحتويها

    اكيد الحياة بيبقى ليها طعم تانى

    وسيبك بقى من كل اللى بيقولوه فى التلفزيوم دول

    كل واحد فيهم متجوز وبيرجع مبسوط لمراته

    سيدنا محمد (ص) بيقول من استطاع منكم الباءة فليتزوج

    بيتهيألى ده امر

    ولا ايييييييييييييه ؟؟؟

    وفى اخر الكلام

    احب ارجع المايك للحاج زكى بوستيج

    واحب اهنى العروسين

    بهذا الفرح المهيب

    وسمعنى سلام الستر من عنده

    أحد أحد

    :D

    ReplyDelete
  52. تحياتي



    قال تعالى : { وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ} (21) سورة الروم .

    الامر الطبيعي ان يتخوف الانسان او يحتاط الانسان من الاخر... لكن الطبيعي ايضا ان نفكر في الاخر..و نتعامل معه
    و ننتقي من بين الاخرين من نشعر بأنه أهل لثقتنا و محبتنا....
    عموما القلب له أحكام...و أحيانا يلغي العقل لفترة ما...لكن في النهاية لا يصح الا الصحيح...

    فكرة الزواج نفسها أعتقد أنها ضرورية
    للجنسين... و الا لما ذكرها الله في كتابه
    وجعل المودة و الرحمة و السكن ثمرة هذه
    العلاقة...

    اتركي و اسلمي امرك الي الله تعالي و ادعوه ان يزقك الزوج الصالح الذي يخشي الله فيك و يتقيه...
    تمنياتي لك و للجميع بالسعادة الدائمة.

    تحياتي

    ReplyDelete
  53. فكرتينى بالذى مضى

    بس حاليا بحاول اساعد نفسى عشان اتخلص من الفوبيا
    او بمعنى اصح.. افكر صح.. عشان اللى ممكن يتفرض عليا فى يوم.. يكون باختيارى من دلوقتى ومش اختيار عبيط يعنى
    ابدأ الاحظ وادقق واستوعب واستنتج وافهم

    بجد... الجنس الآخر فى الآخر زى كتاب.. يا تقرئيه يا تتخمى
    :S

    ReplyDelete
  54. اييييه دااا كله ايييييه دااا كله

    ايييه التطور الطبيعى للحاجة الساقعة اللى انا شايفاه دا

    انسانة بتتكلم عن الجوااااز مرة واااحدة
    يابنتى لما انتى عندك فويبا بتجيبى سيرة الجواز ليه بس
    اللهم بعيد بعيد عننا وعن السامعين.. قولى آآآآآآمييين

    لا بجد انا من مؤيدى عدم التفكير فى الزواج الى ان يشاء الله
    جه جه مجاش يبقى ربنا كاتبلى الخير انه ماجاش:))

    بس ازاى مفيش جواز اليومين دول
    امال انا عندى هنا ماشاء الله فرحين وشبكتين وكلهم لاصدقاء ليا.. يعنى جيل الشباب الصاعد

    يعنى ربنا مبارك اهه امال بس بتقولو فوبيا ولوبيا ليه الناس الحمدلله فاتحة مصنع مسمينه معا لزواج افضل:)

    عموما ياستى ربنا يصلح الحال وكل اللى عاوز يتجوز يتجوز واللى ملوش نفس تفضل نفسه مسدودة:))

    والى لقاء

    بس بجد

    كلام كبير
    كلام معقول
    وادينى قلت حاجاااااات عنه:))

    ReplyDelete
  55. الزواج ده يابنتى حدث عارض فى الحياة
    صح جدا

    بس من غير ماحد يقول عليا من مضهدي المراه
    الزواج يا انسانه حدث عارض في حياه الرجل
    وليس المرأه
    يعني والدك بيتكلم عن نفسه ووالدتك هيكون لها راي تاني
    دي طبيعه في المرأه فطرت عليها
    سيبيه بس يجي في وقته وماتوقفيش حياتك
    عليه
    حلو العنوان بجد

    ReplyDelete
  56. خمسة فضفضة

    وعليكم السلام ورحمة الله وبركاته

    ههههههههههه ايوة كدة اعترفى انها كانت احلى ايام .. يبقى نسمتع بيها ولا لأ؟؟

    اللى بيضايق بجد يا فضفضة ان البنت ممكن تبقى قعدتها مع اهلها دى احلى ايام عمرها فعلا وهى تقضيها زعلانة ومضايقة وكارهة الدنيا عشان لسة النصيب مجاش

    طب وليه مانستمتعش بكل لحظة فى حياتنا ونسيب النصيب وقت مايجى وكله على الله

    منورانى دايما يا دكتورة
    :)

    ReplyDelete
  57. micheal

    هههههههههههههه اجدع ناس

    تحياتى انا كمان يافندم

    ReplyDelete
  58. Aardvark EF-111B

    كلامك صح ومنطقى جدا بس مش فاهمة ازاى كل العوامل دى تكون مؤشر على نضج المجتمع؟؟

    على اى حال اهلا بيك دايما

    بس هو يعنى ايه
    Aardvark EF-111B ؟؟؟

    :D

    ReplyDelete
  59. يا مراكبى

    يااااه شهادة اعتز بيها والله يابشمهندس

    والله كلامك جميل جدا خصوصا ان واحد متزوج هو اللى بيقوله

    جزاك الله خيرا وربنا يكرمك

    ReplyDelete
  60. رفقة عمر

    آمين يارب .. كلامك فكرنى بكلامنا سوا وانتى كل شوية تقاطعينى وتقوليلى قولي لنفسك الكلام ده ههههههههههه

    ربنا يكرمك ويعزك يارفقة يارب

    بارك الله لك وعليك اللهم آمين

    ReplyDelete
  61. جمعاوى روش طحن

    بارك الله لك وعليك
    جزاك الله خيرا اخى الكريم

    ReplyDelete
  62. رئيس جمهورية نفسى

    طب كويس اعضاء الفوبية كتروا اهوه ههههههههههه

    ربنا ييسرلك كل خير سيدى الرئيس اللهم آمين

    تحياتى

    ReplyDelete
  63. سلسبيل

    اسم حبيبى قلبى سولي بنت اختى

    للأسف يا سلسبيل الظروف والعوامل بتحيط بينا ولمسنها فى كل مكان لدرجة تسد النفس
    :S

    تحياتى ليكى ياجميلة نورتينى
    :)

    ReplyDelete
  64. محمد مفيد

    وعليكم السلام ورحمة الله وبركاته

    مش عارفة المتزوجين طلع رأيهم إيجابى كدة ليه .. بس حسمع كلامك واهو على رأي اسأل مجرب
    :D

    مبروك المولود الجديد ويتربى فى عزوكوا وفى طاعة الله اللهم آمين

    ReplyDelete
  65. batresya

    صح هو يقصد كدة فعلا

    شكرا لمرورك ورأيك واهلا بيكى دايما
    :)

    ReplyDelete
  66. اسكندرانى اوى

    انا ببصله كدة هو
    :D

    آمين يارب .. منورنا

    ReplyDelete
  67. لماضة

    ههههههه ربنا يكرمك ياقمر

    اشطة حجيلك اقراه ان شاء الله

    ReplyDelete
  68. المهندس سري

    اهلا بيك دايما يااخى
    (:
    سلام

    ReplyDelete
  69. عصفور المدينة

    اللهم آمين ربنا يكرمك

    معاك ان الزواج مؤسسة كبيرة ومش معقول تبقى حاجة عارضة .. بس وجهة النظر بتاعة والدى كانت بتركز على استمرار الحياة وتحقيق الأهداف مع شريك الحياة بعد الزواج

    بس وجهة نظر حضرتك صحيحة وتحترم طبعا
    جزاك الله خيرا ياستاذى وربنا يبارك لك وعليك اللهم آمين

    ReplyDelete
  70. ولــــــــــو

    ههههههههه ماهو صحبك اللى دماغه زى دماغى ده من ضمن المشكلة .. الخوف من تحمل المسؤلية او التقيد بأى قيد زوجى او خوض التجربة نفسها .. اخويا زييه بالظبط بردو

    ههههههههههه ماشى ياعم السليم ربنا يسعدك دايما يارب

    ReplyDelete
  71. dr.nour

    شرفنى مرورك يادكتور نور واهلا بيكى دايما

    معاكى ان بابا حكيم .. بيدى حقن
    :D

    نورتينى ياقمر

    ReplyDelete
  72. كراكيب عادل

    حلو تعبير ان الحياة تبقى زى ساعة بتلف بالعكس ده اوى

    اللهم آمين .. شكرا لرأيك ومرورك استاذى المبدع

    :)

    ReplyDelete
  73. ftataljanna

    هههههههههه خضتينى شاكة فيا ايه بس حتودينى فى داهية ياشيخة

    تصدقى وانتى قلتى فى التعليق اللى كنت عايزة اقوله ومقولتوش فى البوست

    ربنا يستر بصراحة الوضع غير مطمئن خااااالص

    بس ادعى دايما وقولي اللهم ارزقنى زوجا من نفسى .. حتلاقى ربنا رزقك بزوج عنده نفس طموحاتك وبيقدرك وحتلاقوا نفسكوا ماشيين فى طريق واحد بجد ان شاء الله

    يارب اسمع عنك كل خير دايما اللهم آمين

    ReplyDelete
  74. نوووووسة

    انا مقولتش نفضل كدة يا نوسة انا وضحت ان فى مشكلة وبس وسبت الموضوع للنقاش

    هههههههههه بتزقى ليه بس كدة يا نوسة؟؟ يكونش عندك عريس؟؟؟ هههههههههههه

    ربنا يكرمك يا إيناس ويبارك ليكى وعليكى يارب ويرزقك زوجا من نفسك اللهم آمين

    بس تعزمينى يابت انتى .. فاهمة؟؟؟
    :D

    ReplyDelete
  75. esraa

    ههههههه اكيد فى أمل يا إسو .. مش كدة ولا ايه؟؟؟

    ;)

    ReplyDelete
  76. محمود على

    بصراحة رأيك حلو اوى بجد .. ربنا يسهل واقدر اعمل بنصيحتك ان شاء الله

    اما بالنسبة لموضوع المطر فهى إبتدت تندع الحقيقة ههههههههههههههه

    ReplyDelete
  77. Desert cat

    اكيد الأسرة هى اساس اى مجتمع وغلطان اللى يقول غير كدة .. بس ربنا يصلح الحال اللهم آمين

    اهلا بيكى دايما ونورتينى ياجميلة

    ReplyDelete
  78. A.SAMIR

    اهلا بحضرتك فى المدونة شرفتنى .. وانا زورت مدونة حضرتك اكتر من مرة فعلا

    الله المستعان .. جزاك الله خيرا على نصيحة ربنا يكرمك

    اهلا بيك دايما المدونة مدونتك
    :)

    ReplyDelete
  79. بنات افكارى

    وعليكم السلام ورحمة الله وبركاته

    الشرف ليا والله ياحبيبتى اهلا بيكى دايما وربنا يفكلك كل اللخبطة والعقد واى حاجة من عنده اللهم آمين

    نورتينى بجد
    :)

    ReplyDelete
  80. mohand

    ربنا يكرمك ويعزك والف الف مبروك ع الخطوبة ربنا يتمم بخير اللهم آمين

    ReplyDelete
  81. الأستاذ

    رأيك جميل ويحترم بجد

    جزاك الله خيرا وبارك الله لك وعليك

    شرفتنى
    :)

    ReplyDelete
  82. احساس لسة حى

    تحليلك للموضوع منطقى ومعقول جدا
    جزاك الله خيرا وربنا يكرمك ويعزك

    وعليكم السلام ورحمة الله وبركاته
    :)

    ReplyDelete
  83. son's egypt

    وعليكم السلام ورحمة الله وبركاته
    الوفبيا دى للأسف موجودة وبدرجة عالية فعلا ولأسباب متعددة .. وبرغم اهمية العامل الإقتصادى إلا انه فى احيانا كتيرة بيكون مش هو السبب ومش مشكلة تذكر للشاب بس بردو رافضين

    ربنا ييسر الحال ويصلح حال الجميع يارب

    اللهم آمين

    ReplyDelete
  84. ربنا يكرمك يارب
    ويرزقك بالزوج الصالح
    بس نفسى اعرف ليه بتكتبى مواضيع طويله كده جدا
    بالراحه شويه يا ستى

    ReplyDelete
  85. البنت الشلبية

    الحمد لله ياجميلة ازيك انتى؟
    عندك حق هى فعلا مشكلة ومشكلة كبيرة كمان
    ربنا يسترها ع الجميع يارب

    نورتينى
    :)

    ReplyDelete
  86. Mohamed A. Ghaffar

    هههههههههه ححستنى انك حتنط فى الغريق مش حتتجوز يا استاذ محمد
    هههههههههههه

    ربنا يكمل حياتك بالسعادة وميبقاش فى مشاكل اللهم آمين

    ReplyDelete
  87. YHYيــوســف الـمصـرى

    وعليكم السلام ورحمة الله وبركاته

    اللهم آمين واياك يارب بس تبطل قهوة وسجاير الاول
    :D

    ReplyDelete
  88. رينـــــــــــا

    انتى اكتر والله
    كلامك ووجهة نظرك مهمة جدا يا رينا ومنطقية بجد

    فاهمة الخير اللى قصدك عليه يالئيمة ههههههههههه

    نورتينى والله
    :)

    ReplyDelete
  89. Sampateek

    ههههههههههههههههه امسككككككك واحدة من المروجيين للفوبيا اهيه

    ماشى يا كبوزتى ياجميلة متشكرين على حملة التوعية اللى بتنورينا بيها

    ربنا يخليكى لمصر
    :D

    ReplyDelete
  90. Ahmed Al-Sabbagh

    ربنا يكرمك يا اخى

    ده ياريت السنة كلها تبقى ذكرى للجرائم الأمريكية التى لا تنتهى
    :(

    ReplyDelete
  91. أنـــا حـــــــــرة

    شيلت كشك الرغى يا ياسمينتى
    :(

    طبعا اجيلك يا جميلة بس قوليلى امتى ان شاء الله

    ReplyDelete
  92. Tamer Nabil

    مممممم نظرية بردو

    تحياتى يا استاذ تامر اهلا بيك دايما

    ReplyDelete
  93. آلام وآمال

    منقدرش ننكر انه بسيط جدا عند ناس بس بجد عند ناس تانية بيعتبر من اكثر الأمور تعقيدا فى الحياة بأسرها

    حلوة اسرها دى
    :D

    ReplyDelete
  94. samo

    هههههههههههه محسسنى انه اختراع مثلا

    زواج !!!

    هههههههههههههه

    ReplyDelete
  95. doha

    ضحى اهلا بيكى ياجميلة
    شوفى هو حال البلد اتدهور فى كل المجالات اقتصاديا وسياسيا واجتماعيا وكل حاجة بجد

    ربنا يسترها ع الجميع اللهم آمين

    نورتينى ياقمر
    :)

    ReplyDelete
  96. Ma-3lina

    هههههههههههههههههه ايوة منا بقيت زييك
    شوفتى اخرة اللى يصاحبك ويسمع كلامك يبقى ايه؟؟؟

    هييييييييييييييه
    ههههههههههههههههههه

    ReplyDelete
  97. •«ρяoιd»•™

    اختصر ليييه هو انا ورايا حاجة هههههههه

    الله براحتى .. ايه المعاملة دى بس
    :D

    اشطة جدا انت جبت من الاخر بجد

    شكرا وتحياتى اوى
    (",)

    ReplyDelete
  98. ده ايه ده يا بنتى
    بجد اثرتى فيا اوى
    طيب كنتى شايله كل ده فى قلبك وساكته
    يلا ربنا يهنيكى ويسعدك فى حياتك ومتفتكريش الايام القديمه دى علشان مبتتعوضش
    تحياتى
    علاء

    ReplyDelete
  99. Zo0oZ

    حبيبتى اهلا بيكى تيجى وتشرفى وتكتبى فى اى وقت
    :)

    ReplyDelete
  100. مصراوي أوي

    ربنا يسمع منك وكل حكاوى الزواج تمشى بسلاسة كدة زى مابتقول

    اللهم آمييييين

    ReplyDelete
  101. semsem

    كلامك رسم ابتسامة كبيرة على وشى يا سمسمة .. ربنا يكرمك ويسمع منك بجد

    اللهم آمين

    تحياتى وخالص حبى وتقديرى

    ReplyDelete
  102. ياسر سليم

    اهلا بيك يا صاحب الكلمات نورت والله
    حاضر حركز دونت وررى يافندم
    (",)

    ReplyDelete
  103. الشنكوتي الكبير

    هههههههههههههههه طب مبروك انت جاي تغيظ ولا ايه

    مش عارفة يمكن كلامك يكون صح وممكن يكون مش صح لانى مجربتش الحب اللى انت والناس كلها بتحكي عليه والله

    بس مين عارف ممكن تكونوا صح وانا الغلطانة الله اعلم

    اللهم آمين ربنا يكرمك ويسعدك دايما يا شنكوتى يارب آمين

    ReplyDelete
  104. عاليا حليم

    للأسف يا عاليا معظم المدارس المخلطة دلوقتى مليانة قصص غرامية
    وزى مانتى قلتى مش عارفين الحل فين
    :(

    ReplyDelete
  105. ربنا يرزقك بابن الحلال اللي يريح قلبك و بالك ويرزقكم بالذرية الصالحة و السعادة في الدنيا و الآخرة
    صدقيني مرحلة و هتعدي سيبك انتي بس من كلام أي حد
    لو اتقيتي الله في حياتك و في أسرتك صدقيني هتعرفي اذاي تبقي سعيدة في حياتك

    ReplyDelete
  106. البوست حلو اوى زى ما عودتينا يا انسانه وبجد مش عارفه اقول ايه تانى؟
    بس نفسى بجد تزورينى على مدونتى لانى نفسى اعرف رأيك
    www.drdareenofislam.blogspot.com

    ReplyDelete
  107. البوست جميل جدااااااااااا
    بس احنا لازم نفكر بجد ليه دا بيحصل بس رغم الفوبيا دى فى ناس مازالت عاوزه تتزوج وتنشأ اسره مسلمه تطيع ربنا وانا بجد شايفه ان الاعلام بيلعب دور كبير جدا
    بجد موضوع رائع كعادتك يا انسانه

    ReplyDelete
  108. ياساتر يا ساتر

    أنا مكنتش أعرف إنى فى ناس عقد كدة

    هههههههههههه
    أنا بهزر


    كل الناس زيك مش إنتى لوحدك

    زى ما غنتى قولى دى فوبيا الزواج


    بس ممكن التغلب عليها

    نتجوز بس وبعدها عادى

    عادى بقة
    أودى عاوز يتجوز

    ReplyDelete
  109. انا اسف انى مش هعلق ع الموضوع لانى مش هلحق اقراه دلوقتى لان عندى مشاكل ف الجهاز ومش هلحق اقراه
    بس انا كنت مهتم انى اقولك انى فخووووووووووووووووور جدا انك استخدمتى لوحتى فى مدونتك الرائعه بشهاده الجميع
    بجد ده شرف كبييييييييييير ليا
    انا اشكرك

    ReplyDelete
  110. يا الله
    لا يوجد حب
    وكن يقول سيدى صلى الله علية وسلم لم ارى للمتحابين الا النكاح اى الزواج

    لايست فوبيا ولا شى
    ولاكن امر الله لم يات بعد
    فكل شىء مكتوب

    تحياتى لك

    ReplyDelete
  111. إنسانة ... انا رديت على البوست بتاعك ببوست على مدونتي .. ارجو انكو تقولو رايكو فيه

    http://engmah.blogspot.com/

    ReplyDelete
  112. السلام عليكم
    أنا مبسوطه جدا بموهبتك فى كتابة القصه القصيره وكمان بآرائك فى كل القضايا الأجتماعيه اللى بتهم الشباب
    أما عن رأيى فى فوبيا الزواج
    فبالرغم من المشاكل اللى بتواجه الشباب فى الزواج
    لكنى بجد عاوزه ارتبط
    أولا لأنى نفسى ابقى أم
    وعشان أكون أم ناجحه لازم أختار انسان بجد يحبنى ويخاف عليا عشان يقدر يبنى معايا البيت اللى بتمناه
    أما عن الشك والخوف من وضع الشخص اللى ممكن ترتبطى بيه ويطلع حاجه تانيه غير اللى متصورنها
    فربنا حسم الموضوع ده لما قال عز وجل الطيبون للطيبات والخبيثون للخبيثات
    يبقى الصح انك متدوريش على الأخلاق
    لأنك ببساطه لو كويسه حترتبطى بحد كويس
    لكن الأهم انك تركزى على الطبع
    هو ده اللى تهتمى بيه
    وبرنا يجعل نصيب كل البنات فى الطيب
    وأشوفك دايما بألف خير
    سلام

    ReplyDelete
  113. http://wantchange.blogspot.com/

    ياريت تدينى رأيك فى بوست رحله الى القاهره

    ReplyDelete
  114. انتي وصفتي الحالة اللي عندي بالضبط
    أنا كنت فاكرة نفسي حالة غريبة
    أول ما أحس إن فيه أي موضوع هيكمل أكون عايزة ينتهي بأي طريقة وبأحس فعلا إن انا مستريحة ومبسوطة لما ما يكملش
    التجارب اللي حواليا مش مشجعة دا غير إن الواحد متعود طول دراسته عن إنه بعيد عن الاختلاط
    تفتكري برضه ان احنا محتاجين علاج فعلا؟

    ReplyDelete

الكلمـة نـور .. وبعـض الكلمـات قبـور