Thursday, February 14, 2008

يوميات كاميكازية: عيد البتاع


( المشهد داخلى .. داخل المدونة .. ياسمين إنسانة تجلس خلف مكتب فخم واضعة ايدها على خدها ويبدو عليها أثر الهم والخنقة .. فى الحائط المقابل لهذا المكتب يقف كاميكاز متظاهراً بالإنشغال فى تلميع زجاج النافذة المواجهة لها بينما يسترق النظر إليها بين الحين والآخر .. وإذا كان جهاز الحاسوب الخاص بك جهاز عادى فستجد مكتب إنسانة على ايدك الشمال فى الركن البعيد الهادى فوق خالص ، أما إذا كان الحاسوب من النوع اللابتوب – إوعدنا يارب – فستجد إنها فى نفس المكان السابق ذكره لأنها مش حتفرق يا معلم ... يسود المدونة جو عام من الصمت الرهيب ، وفى هذه الأثناء دار بينهم هذا الحوار ...)ه

كاميكاز ( يغنى أغنية ردئية محاولاً إثبات وجوده وهو يلمع النافذة ) : انا قلبى فى إيديا .. ومافيش غالي عليا ، ولسةةةة ماتخلقش .. يابنى انت ماتخلقش اللى حيلعب بقلبىىىى .. إصحىىىىى .. فووووووق ( ثم ينظر إليها آملاً ان تكون قد خرجت من شرودها المعهود ، ولكنها لم تخرج هذه المرة فقد كانت يبدو عليها بعض الضيق .. وجد كاميكاز انه لابد من ان يتحدث معها مباشرة .. وهنا بدأت ملحمة " النحنحة " )ه

كاميكاز: إحم إحم .. إحمممممممممممم .. كح كح كححححح .. إحمممممم ( لم تجيب مرة أخرى .. ذهب الى ركن الأرشيف واخذ فى رزع البوستات على الأرض مما أدى إلى جذب إنتباهها بعض الشئ - يا مسهل يارب )ه

إنسانة : ايه يا كوكو عامل دوشة ليه؟

كاميكاز: مافيش يا ستو هانم انا بس شايفك مش هنا خالص قلت اشوف مالك يعنى .. خير فى ايه؟؟

إنسانة ( يبدو عليها بعض النرفزة ): وانت مالك انت؟؟ .. انت حتفضل طول عمرك حيشاري كدة .. قلتلك مليون مرة ماتحشورش نفسك فى اللى مالكش فيه وماتدخلش مناخيرك كدة فى كل حاجة .. قلت ولا ماقولتش؟؟؟

كاميكاز( ظاهراً عليه بعد آثار الدهشة ) : انا اسف يا إنسانة والله .. معلش حقك عليا مش حعمل كدة تانى

إنسانة : بطل رغى .. وروح نضف الارض فى المدونة كويس .. عايزاها تبرق وتلمع كدة .. حطفش الزباين مننا يا متخلف انت

كاميكاز ( مطقطقاً وجهه فى الأرض ) : حاضر

( يذهب كاميكاز ليكمل عمله ويبدو عليه أثر الحزن الشديد .. بينما تعود إنسانة لحالتها الشاردة ظاهراً عليها بعض الملل .. فهى تارةً تقلب فى التاجات اللى منفضلها ومش بتعملها .. وتارة تقرأ فى الجوجل ريدار بدون ان تعلق ، ثم نهضت من المكتب وذهبت لتنظر من النافذة .. لا جديد .. مدونات كثيرة فى الأفق والكل يتحدث .. شعرت للحظة ان الحياة تجرى سريعاً جدا فى حين تقف هى فى مكانها لا تدرى ماذا تفعل .. تركت النافذة وعادت للمكتب تتفقد تليفونها المحمول .. وتنظر إلى هذه الأرقام فى اعلى الشاشة والتى تخبرها بالساعة .. وبعض الإشارات التى تدل على ان الموبايل مشحون بشكل جيد وان الشبكة جيدة أيضا .. ولكنه كما كانت دائما تقول عنه " حتة حديدة " .. لا ميسد ولا اتصال .. وضعته فوق المكتب وجلست على كرسى المكتب من جديد .. ولكنها هذه المرة حاولت ان تتجاذب أطراف الحديث مع هذا الكاميكاز .. نعم فهي غالباً ما تفعل ذلك حينما لا تجد من تتحدث معه .. )ه

إنسانة : احم احم ( لا يرد كاميكاز عليها هذه المرة .. فهو يخشى ان " تقلب عليه " كعادتها ولكنها لم تهتم وحاولت مرة أخرى ) ه

إنسانة : إلا قولى يا كوكو

كاميكاز: تحت أمرك يا ستو هانم

إنسانة: لا ستو ايه وبتاع ايه بس .. تعالى .. تعالى اقعد هنا ( تشير إليه لكي يجلس على الكرسى المقابل للمكتب )ه

كاميكاز: انا؟؟

إنسانة ( بنظرة تطق شرار): أومال انا؟؟؟؟ .. ( ثم تدرك سريعا انها غاضبة بلا سبب فما تلبث ان تعود لحالتها الرقيقة او لنقول تعود لحالة إدعاء الرقة !! ) .. طبعا يا كوكو .. اتفضل اتفضل .. ماتخافش تعالى

كاميكاز ( يذهب يقدم خطوة ويؤخر عشرات الخطوات إلى ان يذهب فى النهاية ويقف امام المكتب مرعوبا ولا يستطيع الجلوس ) : تحت أمرك

إنسانة : الأمر لله يا كوكو .. اقعد اقعد

كاميكاز( يجلس على إستحياء ) : خير يا فندم

إنسانة ( يبدو عليها الحماسة الشديدة ، متبعة اسلوب " السحلبة والدحلبة "!! ) : احم احم .. إلا قولى يا احلى كوكو فى الدنيا دى كلها .. محدش سأل عليا؟؟؟

كاميكاز: حد؟!!! .. حد مين؟

إنسانة : حد .. اى حد!ه

كاميكاز: لا يا فندم محدش عبرك خالص .. احم .. قصدى انه مافيش حد يعنى

إنسانة ( يبدو عليها أثار خيبة الأمل ) : اه .. طيب

كاميكاز ( نهض من مجلسه على الفور كأنه ما صدق ! ) : أقوم انا يا ستو هانم .. اى خدمة؟

إنسانة: إستنى بس متسربع على إيه ( تنهض هى الأخرة من خلف المكتب وتذهب لترغمه على الجلوس مرة أخرى .. بينما تأخذ هي فى اللف حول المكتب وبالطبع حول كاميكاز .. تفكر وتفكر وتفكر! .. ثم بدأت فى توجيه الأسئلة لكاميكاز المسكين متبعة أسلوب " المحقق كونان .. لا يخشى المحن " !! ) ه

إنسانة : تعرف النهادرة ايه يا كوكو؟؟؟

كاميكاز : اعتقد الخميس

إنسانة : حلوة تعتقد دى .. عايزة إجابة واضحة ومحددة .. النهاردة اييييييييييه؟؟؟؟

كاميكاز ( مرعوباً ) : الخميس .. الخميس يا ست الكل

إنسانة : اها .. الخميس .. لا يا كوكو النهاردة مش بس الخميس

كاميكاز ( مستغرباً ) : يالهوى .. هما ضموه ع الجمعة وانا معرفش؟؟؟

إنسانة : بطل هبل ياد انت واتعدل .. احم .. قصدى يعنى انه اه الخميس بس حاجة تانية كمان .. تعرفها؟؟

كاميكاز ( متظاهراً بالتفكير ) : بصراحة لأ يا هانم مش عارفها .. بس هو الخميس انا متأكد

إنسانة : طيب طيب .. لما نزلت النهاردة تجيب فينيك عشان تنضف بيه البلاط بتاع المدونة .. مخدتش بالك ان في حاجة متغيرة فى الشارع مثلا ؟؟

كاميكاز: امممممم ..اه افتكرت .. عم برعى بتاع الكبدة غير نشاطه .. بقا يبيع سجق حمير بدل الكبدة ( متأثرا وعلى وشك البكاء )ه

إنسانة :حمير ايه يا حمارانت .. جاتك القرف .. احم .. بص يا كوكو .. سيبك من عم برعى ده خالص .. ركز فى الالوان مثلا .. الدنيا كانت الوانها ماشية ازاى؟؟

كاميكاز: والله يا ستو هانم الدنيا واخدة وش احمر النهاردة مش عارف ليه .. بيتهيألى كدة بيقولوا انه الزلانطايم تقريبا .. دوا كحة دة يا إنسانة؟؟؟

إنسانة ( بقرف ) : زلانطايم؟؟ .. دوا كحة؟؟ .. اعوذ بالله .. يا إبنى ركز ده اسمه الفلانتاين .. عيد الحب يا غبى

كاميكاز : اااااااااااااااااااااااااااااااه .. طب مش تقولى من بدرى كنت بعت للبت مرجانة اى حاجة حمرا كدة .. عندى فردة شراب حمرا جوا رحيتها ايييييييه .. مقولكييييييش

إنسانة: بس بس كجتك القرف يا مقرف .. بقا تجيب للبت بتاعتك فردة شراب بريحتها كمان فى عيد الحب .. ده ايه الرومانسية دى كلها؟

كاميكاز : اه اومال ايه .. منا مرة سمعت فى الراديو انهم بيقولوا ان اى حد بيحب حد لازم يعبرله عن حبه فى اليوم ده

إنسانة : كلام جميل وكل حاجة يا كوكو محدش قال حاجة .. انا بس معترضة على حاجة معينة فى الموضوع ده

كاميكاز: اللى هيا؟؟

إنسانة : انه يبقى فى يوم معين عشان الناس تفتكر تقول لبعضها انه بتحب بعضها .. اصل انت مش فاهم يا كوكو انا حفهمك

كاميكاز ( مرتسماً على وجهه بعض البلاهة ) : اه .. ايوة افهم وماله .. لهو انا صغير؟!ه

إنسانة: بص يا إبنى .. فعل الحب ده مش محتاج اى حاجة .. لا وقت ولا لون ولا أسلوب معين

كاميكاز ( يهرش فى رأسه مما يدل انه مش فاهم حاجة خالص ) : اه .. ممكن بردو

إنسانة : ابسطهالك .. يعنى انا مثلا مش محتاجة مناسبة معينة علشان اترمى فى حضن ماما وابوسها واقولها انا بحبك اوى يا ماما ونفسى ربنا يجمعنى معاكى فى الجنة ،الحمد لله انك أمى ، ربنا يجازكى عنا خير ويجمعك مع سيد الخلق عليه الصلاة والسلام فى الفردوس الأعلى يارب ، وكمان مش محتاجة وقت معين ولا مناسبة معينة عشان اروح ابوس بابا قبل ما ينام واقوله تصبح على خير يا حبيبى .. ربنا يخليك لينا يارب او فى موقف تانى اقولهم هما الاتنين يارب اموت وانتوا راضيين عني ، وبردو مش محتاجة مناسبة معينة ولا وقت معين عشان احضن اختى بعنف وازهقها من البوس واقولها بحبك اوىىىىىىىىىىى .. ومش محتاجة بردو وقت او مناسبة معينة عشان ابوس اخويا واسلم عليه واقوله : واحشنى يا برنس !! .. وبردو مش محتاجة وقت او مناسبة خالص عشان احضن سولي واهيص معاها واغنيلها : انت حبيبى وبس .. ولا أيام بعدك تتحس .. او اغنيلها الاغنية الخاصة بيها اللى ألفتهالها مخصوص

كاميكاز: ايه ده .. عايز اسمعها ماليش دعوة

إنسانة ( متقمصة دور المؤلف الجامد قوى ) : عينى ياسيدى .. بس كدة؟؟ .. مطلعها بيقول .. احم احم

سولي سولي سولي .. حلوة وعسولي

سولي حلوة خااااالص .. كبد وقوااااانص

سولي حلوة جداااااااا .. والديك بيداااااان

كاميكاز ( يصقف لها فى إنبهار بالغ ) : الله .. الله عليكى يا استاذتنا .. بتقولي درر يا ست الكل

إنسانة ( يشوبها بعض الغرور ) : ميرسي ميرسي .. طول عمرى يابنى ( ثم تعود الى سياق الحديث من جديد ) بس ياسيدى زى ما قولتلك .. الواحد لما يحس انه عايز يعبر عن حبه او اى مشاعر ايجابية جواه المفروض يعبر عنها على طول .. يعنى مثلا ساعات اتصل بواحدة من صحباتى واقولها انتى وحشانى اوى على فكرة .. كدة من غير مناسبة لا عيد ميلادها ولا عيد العمال حتى .. ومافيش مناسبة معينة عشان الواحد يبقى من جواه بجد بيحب الناس كلها وبيتمنالهم الخير .. ولا وقت معين عشان يشكر ويقدر كل زواره وقرائه فى المدونة ويقولهم انه بيحبهم كلهم فى الله .. بشكل عام الكلمة الحلوة احلى حاجة بجد .. لان قلوب الناس مزارع فأغرس فيها الكلمة الطيبة .. فاهم يا كوكو؟؟

كاميكاز ( يبدو عليه بعض الإقتناع ) : فاهم فاهم .. يعنى انا مش محتاج مناسبة معينة عشان ابعبر فيها عن مكنونياتى ومشاعيري .. صح؟

إنسانة : إنت جبت مشاعيري دى منيييين؟؟ ( على طريقة عادل إمام فى مدرسة المشاغبين : إنتي جبتى لغاليغوا دى منين؟؟!! ... ثم أخذت فى الضحك بإنشكاح بالغ ! ) .. ايوة صح يا كوكو .. ما شاء الله عليك ابتديت تفهم

كاميكاز: اشطة خلاص حبقا ابعبر لمرجانة على طول .. بقولك يا فندم بما انك منشحكة كدة ومزاجك رايق

إنسانة ( مبتسمة ومقبلة ع الحياة ) : خير يا كوكو

كاميكاز: احم احم ..ماهو بس أصـ أصـ أصل

إنسانة : متأصأصش يا كوكو .. خير؟؟؟

كاميكاز: أصل بصراحة كدة ومن غير لف ولا دوران .. حنفية المطبخ بتاع المدونة بايظة وغرقت الدنيا جوا .. وانا مخبى عليكى من الصبح عشان الجيران اللى تحت اشتكوا وراحوا عملولنا محضر فى القسم الكاميكازى

إنسانة ( وعيناها تطق شرار مجدداً ) : نعمممممممممممم؟؟؟ .. وسايبنى ارغى من الصبح يا مدهول على عينك .. نهارك مش فايت .. خد

طاااااااااخ .. طووووم ... طشششششش ( تنهال عليه ضرباً مبرحاً ولا أكنها شمشون الجبار فى زمانه )ه

كاميكاز : ااااااااااااااااااي .. حرام عليكى يا إنسانة كفاية ضرب بقا .. ده انتى حتى اسمك انسانة يعنى

إنسانة : انت لسة شوفت حاجة؟؟ .. كنت فين ده كله مش تتكلم من بدرى يا مغفل؟.. يلا انجر قدامى نشوف حنعمل ايه فى المصيبة دى .. كله من تحت راسك يا حماااااااار

كاميكاز( باكياً من أثر الضرب – بصراحة إيدها تقيلة – المبرح ) : عااااااااااااااااااااااااااااااا

إنسانة ( تسحب كاميكاز بعنف متجهة نحو باب الخروج – اللى على إيدكوا اليمين – وهى تحدث نفسها ) : الحمد لله اهو الواحد لاقاله حاجة تسليه فى اليوم العجيب ده .. قال زلانطايم قال .. بلا نيلة

كاميكاز( بينما يتمتم كاميكاز ببعض الكلمات بنبرة غريبة يصعب إستيعباها ويبدو عليه المذلة والهوان – اعوذ بالله ) :ايه الضرب ده كله .. دى أكنها ما صدقت .. معقدة البت دى شكلها .. بس يلا قسم قسم .. اهو اخرج اشم هوا من المدونة المضلمة دى الواحد قرف .. وإن كان ع الضرب بسيطة ... واهو الضرب من إيد إنسانة زى أكل البتنجانة !ه


---------------

إقرأ المزيد

عادى خاااااااااااالص

قصة للحب الحقيقي

صور كاس الأمم الأفريقية من منازلهم

37 comments:

  1. اولا ازيك ويارب تكونى بخير
    وبجد عندك حق اننا مش محتاجين يوم محدد علشان نقول للناس اللى بنحبهم اننا بنحبهم بس تقدرى تقولى ان الناس اتعودت على كدا لازم حد يفكرها بالحاجه اللى المفروض انها تعملها

    بس عارفه كمان ان الناس فاكرة ان الزلانطايم على راى كوكو هو بس للناس
    couples
    مش لكل الناس باعتباره اسمه عيد الحب
    مش عيد الحب للمرتبطين
    يلا هابى فلانتين عليكى وقولى لكوكوو بردة هابى زلاناطيم:D
    وبطلى تتأمرى عليه وتضربيه دا غولبان خالث:)

    ReplyDelete
  2. ههههههه
    حلوة منك يا ياسمين مع إن البوست طويل حبيتين بس مفيش مشكله
    هههههههه

    ReplyDelete
  3. ههههههههههه

    حلوة قوي قوي

    خصوصا الاغنية الحلمنتيشي اللى كتبتيها

    وياريت تغيري لون المدونة علشان كاميكازي الغلبان مايتكعبلش في الضلمة وهو داخل خصوصا بعد حنفية المية ماغرقت المدونة

    هههههههههههههه

    بس وحياتك بلاش لون احمر

    هههههههههههههههه

    ReplyDelete
  4. حراااااااااام عليكى يا انسانه
    كاميكاز اتدغدغ فى عيد الحب واتكسرت ضلوعه
    كل ده علشان الحنفيه ؟؟؟
    كل عيد حب وانتى طيبه

    ReplyDelete
  5. اووووووووول مرة اكون اول تعليق ايه الجمال دا ....انا كمان شايفة ان احنا ممكن نخلي كل يوم عيد حب مش شرط يوم معين مش هاستني يوم عيد الحب بالذات علشان اقول كلمة حلوة لاهلي او قرايبي او اصحابي.نورا

    ReplyDelete
  6. كنت قاعد زي عوايدي و قلت اشقر الاقي موضوع بيتكلم عن نفس اللى كنت باكلم بيه نفسي
    عيد الزعبلاطاين
    عيد الهجص
    معلش في دي الكلمة لاني ماليش فيه
    ( مش في العيد انا قصدي في الحب (
    لاني ماعنديش حد يحبني
    و مابقيتش احس بطعم حاجة اسمها الحب
    الا هو طعمه ايه اليومين دول؟
    و هل فيه بالقشطة و العسل؟
    فيه ناس بتحتفل بعيد الحب لانها بتحب و بتتحب
    لكن اللى زيي ما بيعرفش يحتفل بيه لانه بيحب و مش بيتحب
    انا مش محتاج احب انا محتاج اتحب
    في مكان ما من ارض الله
    و من جسم انسان له احساس
    و من قلب حائر ضايع
    و من جسد يوم ما فاني
    ادعوا لكم بالتوفيق
    اقعدوا بالعافية

    ReplyDelete
  7. البوست رائع جدا ولكن كان مطولا بعض الشيء وقد قرأته كاملا تعويضا لقلة تدويناتك
    :)

    ReplyDelete
  8. هههههههههههه
    سلام يا ياسمين ازيك
    بوست جميل زي كل مرة ومناسبة كانت تستحق الكلام ده لان ما فيش حقيقي يوم او لون للحب
    احنا عندنا عيد الفطر فرحته انه جاي بعد صيا
    فعيد الحب مش لازم يكون معناه انه جاي بعد كره أو غفلة او قطيعة او فتور في العلاقة بين الاحبة سواء زوجين او اخوات
    بس كاميكاز ده انتي بتطلعي عليه خبايا الرغبات الدفينة القابعة في ميتافيزيقيا العقل الباطن حرام يا ياسمين اللي بتعمليه فيه ده و لا علشان هو ذكر عايزة تزليه و خلاص هههههههه

    خالص تحياتي
    احمد
    كل سنة و انتي طيبة بالزلانطايم

    انتي كاتبة سيناريو نمرة واحد وحرام تضيعي الموهبة دي أنا رأيي تتفرغي لكتابة الافلام و المسلسلات .. ديتها سيناريو واحد وتلفي بيه على المخرجن و المنتجين .. بي تضيفي شوية اكشن و شوية ............

    ReplyDelete
  9. بجد انتى عسل يا ياسو
    بس بصى بقى يا ستى
    انا فاهمه كويس انتى عايزه توصلى ايه
    وان فعلا الحب مش محتاج يوم معين ولا مناسبه معينه علشان يتعبر عنه
    بس الفلانتين مش ده المقصود بيه وبس
    الحياه فيها كتير اوى والجرى فى الحياه العمليه ومحاوله اثبات الذات والجرى ورا لقمه العيش والحياه المستقره وكل الكلام ده
    فى بعض الاحيان بيخلى الناس من كتر مشاغلها بتنسى نفسهاواللى حواليها
    هى بتكون بتحبهم بس مفيش وقت علشان تعبر فيه عن الحب ده الدنيا بتجرى والناس بتجرى وراها
    فالفلانتين معمول كيوم نحاول ناخد فيه اجازه من دوامه الحياه ونتفرغ للحب
    نعبر فيه عن كل اللى نسينا نعبر عنه فى زحمه الحياه
    نقول بحبك للناس اللى بجد بنحبهم
    نجدد عهد الهوى من تانى ونعيد الامضاء علي عقوده
    فاهمانى يا ياسو
    هو مش بيقولك بقيت الايام متحبيش
    بس بيقولك لو انشغلتى فاليوم ده خدى اجازه للحب
    كل عيد حب وانتى طيبه يا قمر
    (F)

    ReplyDelete
  10. الله بجد على البلوج بتاعك

    ReplyDelete
  11. السلام عليكم
    فعلاالواحد مش محتاج وقت يفكرة بالحب اوي اي حاجة تانيه
    لان الحاجات ديه مش محتاجة لكل ده
    اللي بيحب بيكون فاكر علي طول مش محتاج يوم يبفكره بالحب
    حاجة تانيه ابقي خفي ايديك شويه علي كوكو علشان بجد صعب عليه شويه

    ReplyDelete
  12. ده قصر زلانطايم يا إنسانة

    ههههههه

    الظاهر كل المدونين عندهن نقص في الزلانطايم جامد جدا

    كلهم بيشتكوا نفس الشكوي

    ReplyDelete
  13. ana awel marah 2agy hena o geet belsodfah el ba7tah:
    2eh ya 3am dah bas kol dah darb f kabekazy,ya benty el bala3' tele3 kazeb o el nas ely kan 3andaha tasarob mn fo2 homa geranko ely fo2 mesh elly ta7t zalamty el ragel
    3omoma2 ya andem
    happy zalantaym
    o isa el sana el gayah kolena nezaltam
    el 3awaf ya ahl el modaanah

    ReplyDelete
  14. انت فيييييييييييين من كتير يا انسانة وحشتينى ايه اخبارك واخبار كميكاز التدوينة رائعة علي الرغم من طولها بس شكل المدونة جميل تسلم ايديكى وخلي بالك علي كميكاز

    ReplyDelete
  15. السلام عليكم ورحمة الله وبركاته

    هههههههه

    طبعا ماقدرش اقول حاجه الا حرام عليكِ كده تكسري الواد كامي في عيد الزلانطيم ، بقي دا اسمه كلام برضو؟؟؟

    عجبتني صورة البت المقروفه اللي فوق دي
    بجد حلوه اوي جايباها منين ؟؟

    ReplyDelete
  16. شراب وبريحه
    ده ع اساس انها هتفهمها ازازه برفان من النوع الغالي
    بس يلا كل سنه وانتو طيبين
    وانتي بالذات
    كل سنه وانتي عسوله
    و(بست وشز فور يو)0

    ReplyDelete
  17. جميل اوى الحوار اللى بينك
    وبين كوكو كتير بعملها مع نفسى
    معاكى حق انتى قولتى اللى انا
    حاساه بس ماكنتش اعرف انك جااامده
    كده كوكى غلباااان
    بس انتى زى السكر
    رائعه ربنا يوفقك

    ReplyDelete
  18. عرفت معلومة جامدة جداا من البوست ده يا انسانة

    بئا المعلم كاميكاز عندو مرجانه؟

    حتى كاميكاز يا جدعااان

    اوعدنا ياااااارب
    :D

    ReplyDelete
  19. بعد السلام
    والله انتى تخدى الكاس فى طولة البال
    بس سيبك انتى البت دى زى القمر .. تبارك الخالق
    تحياتى

    ReplyDelete
  20. yalla happy Valentine ya kamikaz :D

    t3eesh w takhod gherha

    ur blog 7elwa ya ensana :)

    ReplyDelete
  21. ياسمين هانم
    ازيك يا ستو هانم
    انتي ايه ما صدقتي قعدتي ع الكرسي و نزلتي بهدله وتقطيع في الواد الغلبان ابو العيال كاميكاز
    ده انتي شكلك هتظبطي الناس اللي تحتيكي لو مسكتي منصب
    ربنا يستر
    :-)
    وهابي فلانطااااين يا ياسمين
    وكل سنه وكل الناس ومصر والمصريين بخير

    ReplyDelete
  22. انتى فطستينى من الضحك
    دة نتيجه للحرمان اللى بيصاحب اليوم
    دة ولا ايه
    واخبار كيمكاز ايه دلوقتى
    سلميلى عليه كتير

    ReplyDelete
  23. ههههههههههههه...ده أنتي و الكاميكاز حكايه لوحدكوا
    :)
    بس بجد البوست علي قد ما هو لذيذ و مسلي بس فيه أفكار حلوه جدا بخصوص أن الحب مش ممكن يقتصر علي يوم
    تحياتي و يا رب تبقي حياتك حب في حب و سيبي بقي كاميكاز في حاله

    ReplyDelete
  24. السلام عليكم ورحمة الله وبركاته

    يا خبر يايويو والله يابنتي كل شويه ادخل ابص لصورة البت المقروفه دي وافضل متنحه قدامها ، والله حبيتها جدا ..عسووووله

    جايبها منين ياياسو

    ReplyDelete
  25. :D
    حلوة بجد
    ولذيذة وممتعه
    وخاصة كمان ان فيها فكرة وهى اننا مش منتزرين فلانتين ولا غيره
    علشان نعبر فيه عن حبنا وتقديرنا للناس اللى بنحبهم ونعبرلهم عن فرحتنا
    بوجودهم جمبنا غير انها مش من الأسلام اصلاً

    بس بقولك ايه
    ابقى خفى ايدك ع الواد شوية
    حرام عليكى :D

    ReplyDelete
  26. هههههههههههههههههههههههههه

    سكر والله , فعلا ضحكتينى اوووووووووى , لأ وعيشت القصة كأنى فيها تمام , حتى لما كنتى بتقولى المدونة هادئة كنت باسكت هههههههههههههههههه , اسلوبك جميل فعلا, باحييكى

    ReplyDelete
  27. انا مقدرتش اكمل البوست للاخر لكنى راجع تانى عشان اقراه بعد ما اخلص شغل

    تحياتى

    ReplyDelete
  28. ههههههههههههههههههههه
    بوست طويل لكن جامد وبيقول حاجة مهمة

    وأحب أضيف كلمة عن عيد الحب , فى البداية حبيبنا وسيدنا محمد ( صلى الله عليه ) وسلم قال لصحابته وكان للعرب يوما يحتفلون فيهما فقال : كان لكم يومان تلعبون فيهما وقد أبدلكم الله بهما خيراً منهما يوم الفطر ويوم الأضحى

    فأول حاجة نحن لنا عيدان فقط والله قال فى كتابه ( مَنْ يُطِعْ الرَّسُولَ فَقَدْ أَطَاعَ اللَّهَ )

    ولو عاوزين ننصر نبينا فلازم نسمع كلامه , وكمان عيد الحب فى الأصل كان عيداً للرومان ثم أخذه المسيحين وفلانتين لمن لا يعرفه هو شخص وقسيساً

    ثم أتفق مع إنسانة إننا مش محتاجين يوم علشان نعبر للناس الى بنحبها حبنا وانا أتكلم عن الحب الحقيقى ليس ما أراه على الكبارى وتحت الأشجار بين الشباب والفتيات وفى الغرب هذا العيد هو ببساطة يوم الإباحية

    وفى النهاية لغاية إمتى حنفضل نقلد العالم فى كل حاجة فى اللبس وفى الكلام وفى الأكل وفى الأعياد وفى الأفكار وفى كل حاجة لحد إمتى حنفضل تابعين للغرب

    وأنا لا أقول لا تتعلموا من الغرب فى علومه , ويارتنا كنا بنقلده فى تقدمه العلمى والتقنى لا بنقلده للآسف فى الهايفة والسهلة

    فى الختام بعتذر لو كنت ضايقتكم بكلامى لكنى أنا زعلان من أحوالنا وتأخرنا العلمى وضعف أمتنا وأصبح نبينا يهان ويسب هنا وهناك ومش عارفين نعمل حاجة

    وأشكرك على البوست الرائع

    ReplyDelete
  29. مش عارق اقولك ايه غير
    هايل طبعا

    ReplyDelete
  30. ارجو الاهتمام بذلك الموضوع الموجود بالمدونه وارجو التضامن معى وشكرا

    ReplyDelete
  31. ياسمين
    وبعدين
    عايزين جديد
    ماينفعشى كدة
    منتظرينك

    ReplyDelete
  32. السلام عليكم ورحمة الله وبركاته
    ............................
    ههههههه والله حرام عليكى الى بتعمليه فى كوكو ده !
    بطلى افترى بقى هههه
    بوست لذيذ اوى
    تحياتى

    ReplyDelete
  33. يابنتي انتي مبهدله كاميكاز كده ليه؟

    حرام عليكي والله

    مش كفاية انك مستعبداه ومش بتديه مرتب؟

    يعني انتي مش لو كنتي دخلتيه مدرسه لغات كان عرف ينطق الزلانطيم صح دلوقتي؟؟؟

    ReplyDelete
  34. loooooooooooooooool
    welli kaan 3ndo l koleya kolaha labseen eswed yoom 3eeed l betaa3:D
    we lw 7ad nata2 w aal happy valentine l nas twalla3 feeeh :D:D:D
    nice post
    we thank u 3l ta3deya 3l modawana taba3y ana ;;-D

    ReplyDelete
  35. جميل أوي أوي أوي

    مش قادرة أتكلم يعني

    ماشاءالله

    انا دخلت المدونة صدفة وربنا

    لزقت فيها كام ساعة

    وشكلي كدا مطولة :D

    أتمنى أكون ضيفة خفيفة عليكي

    بجد المدونة جميلة

    وكلامك جميل بيجذب القراء

    والله مش عارفا أقول إيه

    بس

    الصمت في حرم الجمال جمال

    سلمت يدااااااااكي ...

    لك من الشمس قبلة

    ومن القمر وردة

    ومن قلب عصفورة الحرمان أرق دعوة

    //
    //
    \\
    \\

    ReplyDelete
  36. رائعة واسلوبك حكاية
    فعلا رائعة
    بصي انا عوزاكي بجد تيجي تزوريني برغم اني مش بطلبها من حد بس انا عوزاكي تيجي ونكون اصدقاء كمان
    هستناكي
    اسلوبك رائع

    ReplyDelete
  37. هههههههههههههههههه
    اديكى لقيتى حاجه تسليكى فعلا
    ده الواحد يخاف منك هو التسليه عندك بالضرب يا اختى
    فعلا يا جميل فعل الحب مش محتاج هدايا و لا اغانى
    هو يتحس و بس
    عيد حب سعيد عليكى و علينا

    ReplyDelete

الكلمـة نـور .. وبعـض الكلمـات قبـور