Wednesday, April 09, 2008

انا فين؟؟



سلام عليكم الاول .. ازيكم عاملين ايه؟؟ .. يارب تكونوا كلكم بخير
مش حقول واحشينى تانى لانى قلتها قبل كدة ومش حقول النت واحشنى لانه اكيد عارف ولا حقول الواد كوكو واحشنى اوى لانه اكيد واخد باله يعنى .. الحمد لله على كل حال ، انا بخير الحمد لله ياجماعة بفضل الله .. طيب انا فين بقا؟؟ .. ده سؤال وجيه بيطرح نفسه فى كل المحافل الإنترنتية التى تعودت على وجودى الكاميكازى سواء على الماسنجرات بكل انواعها واشكالها او المدونات او المنتديات او الفيس بوك او او او !!!!ه
.
عمرك حسيت انك مش قادر تتكلم؟؟ .. عمرك جربت انك تبعد وبس؟ .. تبعد عشان عاوز تبعد وبس مش عشان اى سبب تانى .. تبعد عن كل حاجة .. لدرجة انك لو تعرف تبعد عن نفسك كمان كنت عملتها بس ماينفعش
.
هو مش سبب معين بردو خلانى ابعد .. هى مجموعة من العوامل تضافرت وادت للنتيجة دى ( حلوة تضافرت دى .. جاية من الضفاير مش كدة؟ ) .. عوامل كتيرة جدا منها ان بنت اختى بطلت تبقى معانا هى ومامتها ودخلت الحضانة والبيت فيضى عليا انا وماما وبابا .. وابتدى إحساس جديد وغريب يطرأ عليا واحس بيه .. الاحساس ده هو انى لازم اقضى اطول فترة ممكنة معاهم واعملهم اللى هما عاوزينه .. اخويا دايما فى شغله واختى مشغولة فى بيتها وبنتها وشغلها ومحدش مع ماما وبابا غيرى انا .. ابتديت احس انى بقيت الشخص الوحيد اللى بيآنس وحدتهم .. بابا من اول النهار وماما من بعد ما ترجع من الشغل .. بالظبط بقينا اربعة فى البيت دايما مع بعض .. ماما وبابا وانا والتليفزيون .. وهنا يتراجع دور النت بشكل نهائى .. بجد بقيت استخسر اى وقت اضيعه ع النت وماقضيهوش معاهم .. لدرجة انى لو قعدت ع النت شوية او انشغلت فى اى حاجة الاقى ماما جاية وقاعدة جمبى لحد ما اخلص .. بجد بتصعب عليا اوى هى وبابا ..بس الحمد لله انا فرحانة لانى صاحبتهم اوى بفضل الله ويارب يعينى ويقدرنى على برهم
.
ده سبب من ضمن الاسباب .. اه فى حاجات تانية .. منها ان معاش بابا لحد دلوقتى ماطلعش .. بابا طلع على المعاش من شهر سبتمر اللى فات .. فمشاوير المعاش بكل ما تحمله من بيروقراطية بقوم بيها .. سواء لوحدى او وبابا معايا لانه ماينفعش يخرج لوحده ... الشئ التانى هو مشاوير التأمين الصحى وجلسات الليزر بكل ما تحمله من بواخة وسماجة وكآبة .. بردو بقوم بيها مع بابا او لوحدى .. الحمد لله رب العالمين
.
دى المشاوير الصباحية .. بعد الضهر ده ملك لماما وبس .. وفى بعض الاحيان بيكون لبابا كمان بس الاصل لماما .. صاحبة ماما الاساسية هى اختى وبعد ما اختى اتجوزت ماما نفسيتها تعبت جامد بجد وقعدت فترة كبيرة عقبال ما قدرت تتأقلم .. ماما من النوع اللى بيحب الخروج لان جو الشغل الكئيب والبيت بيخنوقها فبتحب تروح عن نفسها وتخرج تتفرج ع المحلات او تتمشى وكدة ..بالإضافة الى انها كمان مش بتحب تخرج لوحدها واللى كانت دايما مطوعاها فى الموضوع ده زى ما بتقول هى اختى الكبيرة .. لانها بتحب الخروج زيها ... وبعد ما اختى اتجوزت ماما بقت تحس انها لوحدها اوى لانى مش زى ماما فى حاجات كتير .. يعنى مثلا لو ماما عاوزة تخرج وعايزانى انزل معاها ده بيطلب منها جهد كبير فى انها تتحايل عليا وتشرحلى قد ايه الخروجة دى مهمة واننا ممكن نلاقى حاجات كويسة ليا ونشتريها .. وممكن الامر يتعدى للسؤال الطبيعى من ناحيتى: تدفعى كام وانزل معاكى؟؟؟ .. لانى مش بحب الخروج بشكل عام .. شخصية بيتوتية جدااااااااا
.
بعد كدة جت سولي وسلتنى جامد انا وماما وبعد ما مشيت وراحت الحضانة مش بس ماما اللى حست بالوحدة لا وانا كمان وبابا .. عشان كدة لما بتقولى ننزل بوافق على طول رغم انى مش بكون عايزة انزل ولا حاجة .. بيدخل فى كدة مشاوير السوق والترزى والفرجة ع المحلات وهلم جرجر والحمد لله
.
بصراحة وبينى وبينكم بقيت احس ان ماما وبابا اولى بأى وقت ممكن اديه لحد غيرهم .. حتى لو كان الوقت ده لعمل حاجة انا بحبها زى انى ادخل النت .. الفترة دى اللى ركزت فيها معاهم تحولت الى صوحبية مش بس علاقة بنت بأمها وابوها .. بحس انها كمان علاقة واحدة لسة فى بداية حياتها بزوج وزوجة ليهم خبرة كبيرة فى الحياة وكل يوم بتتعلم منهم حاجة جديدة ومفيدة جدا .. فالحمد لله انى بقضى معاهم وقت كبير كدة .. اكتسبت صحوبية جميلة ده غير البر بالوالدين الحمد لله .. فماما تحولت الى صحبتى .. نخرج سوا وننام سوا ونصحى نصلى الفجر سوا ونفضفض ونفتح قلوبنا لبعض ونقرا قرآن سوا .. وكتير احس انها فعلا صديقتى وان مافيش فرق السنين الكتير اللى بيننا وانها مش ماما ومش كبيرة .. لا دى واحدة صحبتى اوى وبتحبنى اوى .. مش بس بتاخد رأيي فى حاجات كتير .. لا دى كمان كتير بتمشى بالرأي ده لو لاقيته سليم
.
بقيت انا كمان الحدث الكبير فى حياتها .. بلاحظ الموضوع ده فى كلامها مع اى حد .. زى مثلا " دى ياسمين كانت تعبانة اوى امبارح " ، " ياسمين لسة مش لاقية شغل .. ربنا يفتح عليها يارب " , وهكذا ... الموضوع اتطور لدرجة انى بقيت اناديها بإسمها بدون ألقاب وهى بتاخد الموضوع عادى من غير زعل .. بس ساعة الجد هما ماما وبابا واحترامهم اهم شئ فى حياتى .. مرة كانت اختى عندنا وكنا بنتفرج ع التلفزيون فناديت ماما بإسمها .. اختى قالتلى عيب كدة .. فقولتلها مافيهاش حاجة .. إن كبرت ماماتك صحبيها ههههههههه .. الحمد لله رب العالمين ربنا يديهم الصحة وطولة العمر ياااااارب .. مين عارف .. مش يمكن موضوع انى الاقى شغل ده اتأخر مخصوص عشان اكون معاهم واقضى طلباتهم وأونسهم .. الحمد لله رب العالمين على كل شئ بجد
.
العامل التانى او التالت مش فاكرة هو ان الجهاز بقى غبى بجد .. كل مرة افتحه فيها لازم يقرفنى بحاجة .. مرة النت فاصل ومرة الجهاز بطئ جدا وميت من سنة .. ومرة اعمل ساين إن ع الماسنجر وبعد ما يقعد ساعة عشان يدخل يقوم عامل ساين أوت لوحده قبل ما اعرف مين اون لاين اصلا .. وهكذا دواليك
.
ماكذبش عليكم الامر لا يخلى من شوية رغبة فى الابتعاد بردو .. ليه وعشان ايه مش عارفة .. او احساس انه مافيش فايدة للكلام .. ما احنا ياما اتكلمنا وكل يوم الناس بتتكلم وبعدين ايه اللى حصل؟ .. ولا حاجة .. لسة بيأكلونا لحم حمير وكلاب وقطط واحصنة .. ولسة الأغانى ممكنة .. ممكنة .. وابقى علي صوتك بالنهيق بقا على ما تفرج .. وماتنساش تسلملى ع التروماي
.
صحيح .. اخبار البرد ايه معاكوا .. واخباركم ايه نفسيا مع ارتفاع الاسعار .. ومين راح فين بكام؟؟
.
اخيرا وليس آخر الواد كوكو واحشنى بجد .. حاسة انى نفسي اشوفه واخده بالحضن واقوله وحشتنى اوىىى .. وحقك عليا انا اسفة انى بعدت اوى كدة .. وماتزعلش منى .. حتقولولى ما تعملى كدة وايه اللى حايشك ؟! ... مش عارفة يا جماعة الواد كوكو اختفى فى ظروف غامضة .. جيت المدونة لاقيتها خربانة خالص ومتربة والاكل برا التلاجة وبايظ .. مع انه عارف اني لسة طابخة من كام شهر يعنى الاكل لسة طازة وملحقش يبوظ خالص
.
المهم لو شوفتوه قولولو ارجع يا كاميكاز .. إنسانة تناديك .. انا ليا مين غيرك؟؟ وحعيش لمين غيرك؟؟ .. وسلام مربع للست وردة وكل ازهار الجونينة ... صحيح .. اللى فيكوا ربنا فاتح عليه وبيشتغل صوحافي يبقى ينزل اعلان فى الجرنال نداء كاميكازي مني له .. يااااااااه .. المدونة ضلمة من غيره اوى .. ده غير انها ضلمة من الاول اصلا

23 comments:

  1. نورتى يا ياسمين

    انا عارفة انى مقصرة فى حقك بس متزعليش حقك عليا

    متغبيش تانى باه علينا

    ReplyDelete
  2. السلام عليكم رحمة الله وبركاته

    حمد الله علي السلامه يا ياسو
    ولا ده مجرد بوست بتحنسينا بيه وبعدين تغطسي تاني

    ربنا يعينك علي بر والديك بالطريقه اللي ترضيهم ويارب يكونوا سبب في دخزلك الجنه

    بس برضو يا بنتي ممكن تخلي يوم اسبوعي تنزلي فيه تدوينه او تخشي بس اقولي انا بخير الحمد لله و تطمنينا عليكي

    وايه حكاية الواد كامي ده هو ان غاب القط العب يافار لا ما ينفعش كده انتِ لازم اول ماتلاقيه تعاقبيه عقاب شديد عشان يحرم يعمل كده تاني
    هههههههههههه

    ربنا يسعد ايامك ياياسمين ويحقق لك كل امانيك

    سلام يا قمر

    ReplyDelete
  3. كلنا بقينا كده

    بقينا في الخلاط

    الحالة اللي انتي بتمري بيها دي
    اناكمان بامر بيها


    اختي اتجوزت واخوية سافر برة

    البيت عمال يفضى كل شوية اكتر


    تحياتي وربنا معاكي

    ReplyDelete
  4. ايون كده احنا كنا بنقطع بعض علي بابا المدونة عشان ندخل نعرف انتي فين
    يا هلا برجوعك
    بجد كنت بدخل ديما اطل يمكن الاقيكي دخلة بتتسحبي كده ولا كده
    بالنسبة للبوست ربنا يعزك ويكرمك
    نعمة الوالدين دي مفيش بعدها
    عارفة بالصدفة البحتة كنت كتبة عندي بوست عن صديقتي الي فقدت امها ابقي ادخلي اقريه
    اد ايه انتي فرحتيني بأهتمامك بأسرتك
    ربنا يكرمك بجد علي معاملتك ليهم
    متتأخريش علينا يا هانم تاني
    تحياتي

    ReplyDelete
  5. حمدا ع السلامه يا ياسو
    والله وحشتينا ويريت مش تغيبى علينا تانى اوى كدا اصل انتى بتوحشينى انتى وكوكو
    وحاولى تدورى عليه يابنتى دا عشرة عمر بردة بينكوا انتوا الاتنين
    ويارب يارب ربنا يخليلك بابا وماما وتفضلى معاهم ع طول ان شاء الله
    وربنا يكرمك ان شاء الله ويوفقك فى حياتك كلها:):)

    ReplyDelete
  6. جميل قوى الجو اللى انتى عايشة فيه دلوقتي

    وبعدين الانسان بيحتاج من وقت للتاني انه يبعد عن الجو اللى عايشه ويجرب يعيش حاجة تانية

    وساعات بيحصل مع ناس العكس بيسيبو الدنيا شوية ويقعدوا ع النت

    اعتبريها فترة اجازة بدون مرتب من المدونة

    (:

    بس مطوليش

    ReplyDelete
  7. حمدلله علي سلامتك والحمد لله انك بخير


    ورضي ربنا من رضي والديكي

    يا رب يكونوا دايما راضيين عنك

    تحياتي

    ReplyDelete
  8. عارفه نفسي اوي اني اخد رقم موبايلك واكلمك بجد سبحان الله انا بجد بتعجب بحس ان فى بيننا صلة غريبة
    يعني مثلا

    بنحس بحاجات شبه بعضها فى اوقات شبه بعضها وظروف شبه بعضها

    لما بتاخر عن الكتابة وارجع وانا عندى فكرة بوست بلاقيكي منزلاها :) سبحان الله

    كمان هاضحكك عملت اختبار كده ظريف عن ايه الاسم اللى المفروض يكون اسمي طلع ياسمين :)))) واسمي هو اكتر اسم انتى نفسك يكون اسمك

    غريبة صح :D

    اتمنى تردى عليا وده ايميلى ياريت لو تضيفيني ونتكلم واخد رقم موبايلك اوك

    ftataljanna@yahoo.com

    مستنياكي

    ReplyDelete
  9. السلام عليكم
    فعلا الواحد احيانا بيكون عاوز يبعد عن اشياء كتيرة جدا
    وبكيكون عاوز يكون فيها مع نفسه
    ويكفي انك مشغولة مع والديك في اشياء كثيرة وبتساعدي والدك في البيوقراطية العقيمة اللي احنا عايشين فيها
    ربنا يكرمك ان شاء الله

    ReplyDelete
  10. وحشتينا بجد يا يسمينا
    وفعلا التدوين كله كان
    ضلمه منغيرك انتي وكاميكاز
    وانا فرحانه لانك فرحانه
    بعلاقتك وحبك لاهلك
    ويدمها عليكي ربنا
    حياه سعيده معاهم
    وعشان خاطري ابقي انزلي
    مع ماما منغير وجع قلب
    مش هيبقي انتي والزمن
    يلا يا قمرايه يا
    وحشاني(بست وشز فور يو)0
    وسلميلي ع كاميكاز وانا هبقي اعمله نداء في الاذاعه وربنا يرجعه بخير يا رب

    ReplyDelete
  11. حمد الله ع السلامة و ع العموم نحب انها ما تتكررش تانى برده الفضفضة بتريح اكتر من الانسحاب و الصمت

    مودتى و احترامى

    ReplyDelete
  12. اذيك يا جاسى
    واحشانى اوى اوى اوى
    عودُ احمد
    حمد الله على سلامتك
    ربنا يخليلك بابا وماما واختك ويخليكى ليهم
    الاهل فعلا احنا مش بنختارهم وف نفس الوقت الى يعرف قيمتهم يعرف انهم ميتعوضوش
    وانهم اد ايه بيحبونا وبيخافوا علينا
    ربنا يكرمك وتلاقى شغل وربنا يكتب لك الخير
    ادينى الميل بتاعك وانا اول ما الاقى فرضه شغل ابعت لك
    انا بيوصلنى ميلز كتير اوى شركات طالبه شغل
    وقولى لى عايزة تشتغلى فين وايه
    وبالتوفيق ان شاء الله
    ربنا يكتب لك الخير حيث كان ويجبر بخاطرك يا قمرة
    سلام مؤقت

    ReplyDelete
  13. السلام عليكم
    بجد برافو عليكى جدا
    امك ثم امك ثم امك
    ربنا يخليكوا لبعض ياررررب
    لما هتتجوزى كمان هتتمنى انك بس تقعدى معاها يوم من الايام دى
    ربنا يكرمك ببرهم يارب يا سمسمه

    ReplyDelete
  14. حمد الله على السلامة

    الحمد الله انك بخير

    وربنا يوفقك ويكرمك يارب


    تحياتى

    ReplyDelete
  15. أولاً مدونتك روعة أسلوبك جميل جدا

    ثانيا بالنسبة للتغيير أو الوضع الجديد اللي أنتي فيه الأيام دي فأنا كنت كده برضو بعد جواز أختي الصيف اللي فات ، مكنتش طايق البيت وكنت مضايق وحاجات كتير إتغيرت وأثرت عليا، يعني حالتك زي حالتي ومش بس كده دول حتى صحابي كل شوية واحد يسافر يشتغل

    المهم إن الفترة دي حتعدي وحتتعودي على الوضع وأهم شئ رضاهم عنك ورضا الله ودعوة منهم تفتحلك حاجات كتيرة

    وبالنسبة لموضع الشغل ده ذكرتي كلمة جميلة جدا إن ممكن يكون شغلك إتأخر عشانهم مين عارف مش ممكن ربنا يرزقك بشغل في مكان كنتي تحبي تشتغلي فيه ( زي بعض في النقطة دي )

    وإنك حاسة انك عاوزة تبعدي شوية ده إحساس طبيعي بيمر علينا كلنا ، ممكن يكون ملل أو ممكن عشان حصلت تغيرات في الحياة فأثرت على الواحد في أكتر من سبب ، المهم إننا نستفاد من الفترة دي كأننا بنظبط حياتنا من جديد ونرجع أفضل إن شاء الله

    ربنا يعينك على برهم ويقويكي ويبارك في عمرهم ويديهم الصحة ، ويوفقك لما يحب ويرضى

    خالص إحترامي وتقديري لشخصك الكريم

    ReplyDelete
  16. ياسمين
    ♥ ♥ ♥
    حمدا لله على السلامة
    نورتي مدونتك و نورتي عالم التدوين
    كنا قلقانين عليكي و كنا منتظرين منك ما يكمنا عليكي لكن ما كتبتيه زاد من قلقنا و من حرصنا
    فاما قلقنا فزاد من ان ما كتبتيه يشير الى امكانية ان يطول غيابك عنا
    و اما حرصنا فقد زاد على ان نطمأن عليكي و على تلك الظروف التي تضافرت ( حلاوة تضافرت دي هههههه) لتتسبب في بعدك عن مدونتك
    اتمنى ان تعودي و ان لا يكون لتلك الظروف ما يعوق دون ان نطمان عليكي فقط

    خالص تحياتي
    احمد

    ReplyDelete
  17. ربنا يباركلك كل اللي بتعمليه ويجعله ف ميزان حسناتك
    انتي بصراحة خليتيني ازعل من نفسي جدا لن تقريبا انا ظروف البيت زيك بالظبط مع الفارق اني باشتغل كمان نص الشهر فموضوع اني ابقى متواجد ده بقى صعب شوية لكن بجد انتي عرفتيني اهلي اد ايه محتاجينلي ف الوقت ده بالذات
    انا مش عارف اشكرك ازاي
    انتي السبب ف اني هاعتزل التدوين واتفرغ لاهلى

    باهزر طبعا بس فعلا علمتيني حاجات وعرفتيني حاجات مش كنت واخد بالي منها او كنت باستعبط وعامل نفسي مش واخد

    خللي بالك من باباكي ومامتك وصدقيني عن تجربه موضوع شغلك ده فعلا اتاخر علشان ربنا يكافئك بحاجه اكبر من اللي انتي بتطلبيه بكتير وكمان بعد ماتكوني عملتي كل الخير والبر باهلك اللي انتي فيه دلوقت واللي ان شاء الله يستمر بعد كده
    ربنا يخليكي لاهلك ويخليهم ليكي ومش مشكلة اي حاجه تانيه
    لكن برده طالما فيه امكانيه ياريت مش تحرمينا من كلامك الجميل
    على فكرة مدونتك اشيك مدونه انا شفتها من ساعه ما عرفت بلوجر
    ياريت تخللي بالك منها
    سلام

    ReplyDelete
  18. احيانا بيبقى بعدنا هروب من الواقع

    ReplyDelete
  19. بوست طويل عريض وبرضه ما عرفناش إنتي فين

    أنا عرفت إنتي كنتي فين من الفيس بوك

    ألف مبروك

    ReplyDelete
  20. ألف مبروك علي الخطوبه ياياسمين

    ReplyDelete
  21. مبروك الخطوبة يا جميلة

    ReplyDelete
  22. الف الف الف مبروك
    بارك الله لكماوبارك عليكماوجمع بينكما في خير
    وربنا يتمم بخير

    ReplyDelete
  23. السلام عليكم
    أولا حمد لله علي السلامة
    ربنا يكرمك يارب
    و أهم حاجة إننا أطمنا عليكي و إنك بخير
    و الدنيا الحمد لله أحسن يارب السعادة الخير و الفرح اللي أنت فيهم يدوموا و يزيدوا يارب

    ReplyDelete

الكلمـة نـور .. وبعـض الكلمـات قبـور