Sunday, May 04, 2008

واحد شاى


المكان: اوضتى اللى جوا بيتنا وقدام كمبيوترى العجيب .. بيب بيب
الزمان: النهاردة الأحد 4 مايو
الحدث: الشعب عامل إضراب باين
عرفت منين: كنت نايمة الصبح فى الاوضة وسمعت بابا فى الصالة بيطلب من اخويا يعمله مشوار واخويا رفض انه ينزل النهاردة بالذات وقام قايل لبابا النهاردة عندى مسرح فى الجامعة وبكرة ابقى اروح مشوارك !، بابا قاله اشمعنى مش النهاردة ياد يا ياسر؟؟ .. قام اخويا رادد وقاله اصل النهاردة في إضراب يا بابا وخايف لايكون فى مظاهرات والشوارع تقف زى الاضراب اللى فات وكدة .. معلش يا بابا اروح النهاردة المسرح بتاعى وبكرة إن شاء الله اعملك مشوارك !ه
السؤال الكاميكازى: سمعت ده كله ازاى وانا نايمة؟ .. حكمة ربنا يا مؤمنين .. حنعترض؟
السؤال الأخطر : مين اللى قال لأخويا على حكاية الإضراب دى؟؟ .. علمى علمكم ياجماعة .. انا عندى استعداد اتبرى منه هو شخصيا لو طلع بيسمع عن الحاجات دى ... ماهو ده اللى كان ناقص كمان .. ايه الناس دى
رد فعلي ع الحدث العجيب ده: ولا حاجة .. حاسة ان عينى بتوجعنى شوية .. تفتكروا ان ده له علاقة بالموضوع التانى ده .. ولا ده موضوع وده موضوع .. ولا ايه الموضوع اصلا؟؟؟؟
بعمل ايه دلوقتى: ولا حاجة بردو .. بعمل واحد شاي .. بس نفسى البراد يبقى كبير شوية واعمل للشعب كله واحد شاي عشان يروق كدة .. بجد يا جماعة مش بهزر .. مش مصدقينى؟
.
طب خدوا الحكمة آدى مش اختكم هنادى (مين هنادى دي؟؟؟) .. كل ما تقفل فى وشك اعملك واحد شاي يابرنس واضربها طبنجة .. حتقولولي ايه العلاقة بين الحالة النفسية وكباية الشاي .. حقولكم طبعا العلاقة وثيقة جدا وماسكة فى بعضها بإتنين مشابك من الكبار الخشب دول .. عارفينهم؟
.
المهم من غير رغى كتير وكتر كلام .. نفسى نقدر نعمل زى كلمات اغنية واحد شاي ما بتقول .. بس حاسة انه صعب .. ولا انتوا ايه رأيكوا؟ .. شوفوا الكلمات كدة واحكموا انتوا بنفسكوا على نفسكوا.. بس قبل ما تقروا الكلمات عاوزة اقولكم على حاجة خطيرة جدا بجد .. انا من ساعة ما الاغنية دى نزلت وهى معلقة معايا اوى .. كل شوية اعمل فى واحد شاي وأربع فيه واغنيها .. لدرجة انى بقيت شبه فناجين الشاي التخينة ام ودن واحدة دى .. بس الفكرة انى فى الحقيقة بودنين مش ودن واحدة .. تفتكروا اودى فردة الحلق التانية دى فين؟؟؟؟؟؟
.
المهم بطلوا رغي بقا كلمات الاغنية اهيه

عبى جيوبه من الأفراح
و طاح فى الحزن بالضحكة
و جلجل صوته و قال يا جراح
أدينى قافل لك السكة

ما هواش فاضى
يضيع وقت على الماضى
عارف ان اللى راح موش جاى
قعد يشرب له واحد شاى
و روّق باله و بحاله صبح راضى

...........

اوعى تسيب الحزن فى قلبك ياكل حتة
حاول تانى ودور وانت تلاقى السكة
فى الإمكان تهزم حزنك مهما إن كان
بس اعمل زيه ودوب حزنك جوا الضحكة

ما هواش فاضى
يضيع وقت على الماضى
عارف ان اللى راح موش جاى
قعد يشرب له واحد شاى
و روّق باله و بحاله صبح راضى

رسم على وشه بالألوان
و رافع يافطة للأحزان
كتب فيها أنا الفرحان

و موش شاغل دماغه بهم
غلب حزنه بخفة دم
خسر دمعه طلع كسبان
طلع كسباااااااااااااان


السؤال اللى بيطرح نفسه دلوقتى بقا .. ممكن فعلا نضيع وندوب كل همومنا فى واحد شاي بجد؟ ولا الموضوع محتاج براد بحاله .. ولا نشترى قهوة فى الحسين من بابها ونقعد كلنا نأربع فى شاي لحد ما الشعب كله ينسى ويقول انا جدع ؟؟
.
نرجع لمرجوعنا ( ألا احنا كنا فين اصلا؟) من حكمدار المدونة الى مدونات العاصمة : كاميكاز إرجع .. المكان كله محاصر والإنكار مش حيفيدك .. يرضيك كدة تسيبنى؟ .. يرضيك تعذبنى؟ ..ما كفاية كدة يعنى .. وانا حعمل ايه بعدييييك
.
سؤال تانى اخطر من كل الاسئلة اللى فاتت : انا ايه اللى جابنى هنا؟؟؟؟؟؟؟
.
ملحوظة متخلفة: فى شوية نعناع كان الواد كوكو زارعهم على شباك المدونة ابقوا حطوا منها فى الشاي لزوم المزاج وكدة يعنى .. بس خدوا بالكوا كل واحد ورقة نعناعاية واحدة وبس .. بطلوا نصب بقا .. شعب مش طامر فيه بصحيح .. بلا بتاع

29 comments:

  1. بقى حد يبلغ عن اخوه كده ويشردله على الانترنت ويقول انه من القلة المندسة اللي بتأيد الاضراب
    :)))

    الشاي بيعدل دماغ الناس..لكن معرفش هل له علاقة بتهدئتهم..ولا يمكن لو شاي ب ليمون..الا هي ايه علاقة عصير الليمون بهدوء الاعصاب

    لكن ارجع واقول ان الشعب هدي بجد بعد ما اخد "الشاي" بتاعه من الريس في عيد العمال

    وكل اضراب وانتي بخير

    والف مبروك على الخطوبة...مش عارف اذا كنت باركت قبل كده ولا نسيت

    ReplyDelete
  2. انا عن نفسي قابله العزومة
    بس انا بحب الشاي خفيف سكر مزبوط
    وانا رايي متفق معاكي تماما
    والاغنية في مكانها
    بلا وجع قلب

    تحياتي

    ReplyDelete
  3. انا موافقة عالشاي
    وقابلةالعزومة
    بس شاي خفيف سكر مزبوط لو سمحت
    والاغنية فعلا جميلة

    على الاقل احنا لو روقنا دماغنا وشربنا شاي
    هنفضل برضه فايقيين
    هنروح اشغالنا ونشوف دراستنا ومصالحنا
    واهو كله سعي
    المشكله ان فيه ناس غيرنا بيشربوا حاجات تانيه عشان يتوهو خالص

    تحياتي

    ReplyDelete
  4. الله يكون في عونك يا ياسر
    :))
    فين الشاي؟
    يعني اجيب المج واجي

    ReplyDelete
  5. طيب اللي مش بيشرب الشاي زي حلاتي ...

    الحل مش هينفع بالشاي الا لو كان عليه لبن .. واكتر من الشاي كمان

    ReplyDelete
  6. انسي
    واحد بوست في الخمسينه يا بنت يا ياسمينه
    حلو السجع مش كده برضه
    انا طول عمري باقول انا فنان بس مدفونه موهبتي دي
    :)
    ايش الاخبار؟
    كله تمام
    انا اغيب شويه كده والاقي الدنيا كلها فايتاني كده وحاجات بالهبل ورايا عشان اقراها
    معلش يا ياسمين اعذريني الفترة اللي فاتت دي ماكنتش عارف اعمل اي حاجه ومش فاضي بجد
    بس ادينا احنا فيها اهوه
    اولا يا ستي الف مبروك على الخبر الجميل اللي سمعته ده
    ربنا يكرمك يا رب ويوفقك ويتمم لك على خير ان شاء الله
    ثانيا يا ستي انتي بجد فكرتني بكوبايه الشاي بتاعتي والبراد بتاع بيتنا
    ثالاثا بقي يا عم احجزيلي في اول صف ع الشارع في القهوه اللي هتشتريها في الحسين دي
    بوست رائع كالعاده
    تحياتي

    ReplyDelete
  7. ممكن كوباية شاى بالنعناع لو سمحتى

    ReplyDelete
  8. ههههههههههههههههه مين هنادى دى انا اتخضيت اما شفت اسمى ههههههه
    بالنسبة للشاى بقا فساعات بيجيب توتر وارق بالذات لو الواحد عنده امتحان كمان بيموت الحديد فى الجسم عشان كده لا يفضل شربعه بعد الغذاء مباشرتا هههههه بعدها بساعه ولا حاجة بس منقدرش ننكر انه بيعمل دماغ :D

    ReplyDelete
  9. انا كتبت تعليق قبل كدا هو اتشال ولا ماالنت قطع ولاايه؟

    ReplyDelete
  10. اوك انا اخدت النعناعية بتاعتى

    تحياتى على الاغنية هايلة بجد

    ReplyDelete
  11. فيه مشكلة عظيمة يا ياسو







    انا مابشربش الشاي
    اشرب ازوزة انا

    :D

    ReplyDelete
  12. :)
    انا مع تعليق محمد
    شاي بلبن احسن كتير

    حد يبلغ عن اخوه يا ياسمين وامتي في يوم مفترج زي ده وعندنا عيد ميلاد في الغابة

    في حد حس بالاضراب بجد المرة دي؟
    انا حتي اتكسفت احد اجازة من الشغل، محدش مجمع ان في اضراب زي المرة اللي فاتت

    ReplyDelete
  13. حقيقى أن الشاى بيساعد على الإسترخاء بس الجديد اللى اتعلمته منك انه ممكن وأنا بشر ب الشاى أشرب أخويا أجدعها مقلب وما أحلى اللعب مع الكبار

    بس بعيدا عن كل الأحداث دى أحب أوضح أنى بحبه خفيف سكر زياده زى المدونه دى بالضبط

    ReplyDelete
  14. ياريت كوباية شاى هاتبقى هايلة دلوقتى...


    الاغنية جميلة جدااا

    ReplyDelete
  15. يااااااااااااااااااه

    من موقعى هذا...

    اعزمك على واحد شاى ندوب فيه كلام البوست الطويل ده..وننسى :D

    مبروك عالخطوبة ولونها جت متأخر

    ReplyDelete
  16. نسيتي حاجه مهمه الشاي بالياسمين ربنه يخليك يا محسن ياللي مهنينا

    ReplyDelete
  17. واضح إن الأغنية مأثرة معاكي جامد ...على العموم شاي لذيذ وبالهنا والشتا
    .....
    بس ماتكتريش عشان هاتزهقي...سواءاً من الشاي أو الأغنية

    ReplyDelete
  18. اهم ما في الموضوع الشاي فتله ولا سايب
    هههههههههههههههههههههههه

    ReplyDelete
  19. إنـســـــانـة
    موضوعك جميل جدا


    السؤال اللى بيطرح نفسه دلوقتى بقا .. ممكن فعلا نضيع وندوب كل همومنا فى واحد شاي بجد؟ ولا الموضوع محتاج براد بحاله .. ولا نشترى قهوة فى الحسين من بابها ونقعد كلنا نأربع فى شاي لحد ما
    الشعب كله ينسى ويقول انا جدع ؟؟

    والحل مش فى واحد شاى ولا براد شاى
    الحل فينا احنا
    احنا الا وصلنا لنفساالا احنا فية
    ومهما شربنا شاى مش هيحل حاجة
    تحياتى لكى بنت النيل

    ReplyDelete
  20. من غير سكر وحياتك

    ويكون فى مج زجاج

    مش بحب الصينى

    ههههههه

    الراجل ضحك علينا وثبتنا

    وفى الاخر ادانا على قفانا

    لاء واحنا زى الهبل

    فرحنا وهللنا

    هههههههه

    تعرفى احلا حاجه فعلا ايه

    هى كوباية الشاى

    ابونعناع

    تحياتى

    احمد سكر

    ReplyDelete
  21. مش ممكن اسلوبك الجميل دا ف الكتابه يا انسانه
    معلش بتأخر عليكى بالرد لزوك التناكه
    لا والله انا مشغوله ف شغلى شويه اليومين دول
    معنش معنش
    سامحنى يا قمر
    الا الشاى صحيح الى بيسطل دا
    بيبقى خفيف ولا تقيل
    ----
    الناس عايزة تموت خميس وجمعه وهما هيبقوا تمام التمام....ربنا يلطف بينا

    ReplyDelete
  22. مدونتك جميلة قوى ... و اسلوبك عجبنى ... استمرى بقى ... و على قد ما أقدر هتابعك ... و لأنى لسة جديد فى موضوع التدوين ده ... محتاج اتفرج بس فى الأول لحد ما أتعلم
    يللا سلام

    ReplyDelete

  23. وعندك واحد شاي معاكي وصلحه

    جيت أسلم بس

    تحياتي

    ReplyDelete
  24. طيب انا مش بحب الشاي ممكن نسكافيه
    :)

    اوروفوار

    ReplyDelete
  25. حلو كتير هالفنجان ومهضوم
    وبعدين هذا هو السؤال المهم والاهم

    ReplyDelete
  26. حلوة جدا، وتلقائية
    بس واضح يا انسانة
    انك مخبية حزن كبير
    وعقل بيفكر كتير

    د.زيوس

    ReplyDelete
  27. 3 معالق سكر و من غير نعناع لو سمحتى ادينى وفرت عشان غيرى برده
    انا دخلت مدونتك بالصدفة كنت بدور على واحد ابن حلال كاتب كلمات اغنية واحد شاى جاهزة بدل ما اتعب نفسي و ادخل المطبخ اكتبها قصدى اكتبها على الكيبورد بس شدنى موضوع المدونة و الاسلوب ان فى توارد خواطر و لو صغنتوت بين موضوعك و طريقتى فى التفكير
    اتمنى انك تنورينى بزيارة كطده سريعة على الماشى لمدونتى انسان اوف لاين
    و معلش مش حقدر اضايفك و اشربك اى حاجة
    انا لسه صارف التموين قريب بالبطاقة الذكية بس انبوبة البوتاجاز فاضية و مش عارف اغيرها بقالى مدة فلو سمحتى هاتى انبوبتك معاكى على العنوان ده
    www.emadiab.blogspot.com

    ReplyDelete

الكلمـة نـور .. وبعـض الكلمـات قبـور