Saturday, May 10, 2008

تقـدر؟


تقدر فى عز لحظات الألم والوجع تخبى ومتعبرش؟

تقدر وانت جواك كلام كتير اوى تفضل ساكت وماتتكلمش؟

تقدر والدموع مالية عنيك تبتسم وتضحك وتفرفش؟

تقدر الصرخة تكون جواك نفسها تطلع وانت حابسها؟

تقدر الآه بصوتها العالى اوى محدش يسمعها غيرك؟

تقدر تكون فى مكانك وانت نفسك تهرب بعيد جدا لوحدك؟

تقدر تبقى مخنوق وشايف الاكسجين بعنيك ومش قادر تقوله تعالى؟

تقدر تتكلم وانت نفسك تسكت خالص؟

تقدر تبقى " عادى " وانت اللى جواك مش عادى ؟

تقدر تعيش مع اللى حواليك وانت مش مستحمل نفسك اصلا؟

تقدر تضحك وانت نفسك تبكى اوى؟


تقدر تبان مبسوط وانت من جواك زعلان اوى؟

تقدر تبقى هادى جدا وانت من جوا بتتقطع بجد؟

****

يمكن تقدر .. بس انا بجد مش قادرة

حعمل ايه؟ .. ولا حاجة

حدخل آخدلى دش ساقع يمكن افوق شوية!ه

39 comments:

  1. ايه الحكاية مرة كوباية شاى ومرة دش ساقع
    لالالالا كدا مش كويس
    انا رأيى تاخدى اجازة بعييييييييييييييييييييييد وتريحى وترجعى تانى بس المرة دى المشروب على حسابى
    دمتى بخير

    ReplyDelete
  2. لازم انتي كمان تقدري

    اوعي تستسلمي
    لازم تكوني انتي وبس
    لازم تكوني جبل مهما جه عليه اللي يجي لازم تكوني واقفة
    يوم ما تقعي لازم تكوني واقفة

    انتي قادرة ولازم تقدري
    خدي الدش الساقع بتاعك واتوضي وصلي ركعتين
    وانتي تلاقي نفسك ادها وادود
    واحشاني يا مفعوثة
    وحشاني ايام الفووووووو
    والعننننننننن

    ReplyDelete
  3. السلام عليكم
    في اوقات كتيرة ساعات الواحد ميقدرش يخبي اللي جواة
    ممكن ميقدرش يطلع قدام الناس
    بس مع نفسه ممكن يطلعة
    ممكن يعيط لو حاسس انه مخنوق بجد
    ممكن يقفل علي نفسة لو مضايق
    بس مش كل الناس تقدر تخبي ومش كل الناس تقدر تطلع

    ReplyDelete
  4. ايه ده اول تعليق كده :$

    ايه يا قمر مالك كده زعلان ليه ؟؟

    متعودناش نشوفك مكشرة كده يا ياسمين :(

    اقولك .. خدى دش ساقع وبعدها واحد شاى واضربى الدنيا طنااااااااش :)

    يا رب تكونى احسن ..

    ReplyDelete
  5. انا قريت ومعرفتش اقول تعليق ايه ..

    بس البوست عجبني اوي بكلماته .. لان الشعور ده لما بيحصل بيكون في ازمة جوا الواحد

    بس لو متضايقه اتنى ترجعي مبسوطه على طول

    تحياتي

    ReplyDelete
  6. نحاول ولو ان اللي انتي اللي قايله عليه ده صعب اوي اوي
    لكن
    نحااااااول

    ReplyDelete
  7. و انا كمان مقدرش

    بس تفتكرى الدش هوا الحل ؟؟

    يمكن

    ReplyDelete
  8. مش عارفة؟
    تعالي اعلمك ازاي...هدخل قريب بطولة الجمهورية في الموضوع ده..انا محترفة يابنتي:)

    بس الي اعرفه بقى ان مفيش حاجة كبيرة على ربنا..ربنا كبيييييييير قوي..قوي قوي

    ReplyDelete
  9. كلنا نقدر

    الأصح إننا مانعملش كده

    لكن لازم عشان نقدر نعيش في الدنيا دي على الأقل نحاول

    أنصحك بدل الدش

    بكوباية لبن دافي كبيرة

    ثم إلى السرييير

    ReplyDelete
  10. لازم تحاولي وأكيد هتقدري
    علشان تقدري تواجهي

    ReplyDelete
  11. مبنقدرش
    بس بنعمل كده اكيد
    هى دى الدنيا

    ReplyDelete
  12. من الرائع ان يتحدث الانسان مع نفسه حتي عندما تظلم الافاق

    وحتي عندما تضيق الصدور

    رائع ان يخترع مع نفسه سياسة الخروج من الوحا

    عن نفسي مقدرش

    لكن احاول

    ReplyDelete
  13. السلام عليكم
    كلمات جميلة وحاجات كتيرة ممكن نقدر وممكن مانقدرشى حاجات فعلا محتاجة دش ساقع

    ReplyDelete
  14. لازم تخرجى كل مشاعرك متكتيمهاش حتى لوهتكتبيها فى ورقه خرجيها متكبيتهاش لانك فى يوم هتنفجرى وممكن متعرفش ترجعى لطبيعتك بسهوله بسس متديها أكتر من وقتها

    ReplyDelete
  15. قليلون جدا من يستطيعون هذا يا دعاء
    أنتي مالك
    طمنينا
    تحياتي

    ReplyDelete
  16. طبعا كلنا نقدر

    بس انا من رأيى انك بدل الدش الساقع تقعدى مع نفسك وتستحضرى الارادة
    هيا الحاجة الوحيدة اللى نقدر بيها كلنا

    تقبلى تحياتى

    ReplyDelete
  17. مش عايز ازاي بتسالي يا ياسمين وحواليكي ناس كتير عايشين كده
    طب ومين قالك اننا غير كده ومش عايشين غير بكده
    :(

    ReplyDelete
  18. والله يابنتى فى الزمن اللى احنا فيه دا مجبررررررررررين اصلا على كدا

    ReplyDelete
  19. انا زيك مقدرش لان اللى جوايا هو اللى بيكون واضح عليا
    انا كمان بعمل زيك
    دش وكوبايه شاى وموسيقى هاديه او اصلى وبسسسس

    ReplyDelete
  20. كلماتك عاملة زي شبابيك المشربية دقيقة الصنع متينة ومترابطة اسلوب جميل يخلي كل اللي يقرالك يحس بيكي

    ReplyDelete
  21. الكلام جميل

    والمضمون صعب

    بس كل حاجة وليها حاجة عشان تتحل

    فركى قبل الخطوة هتعملى اية


    وبعدين فينك مش باينة

    من ساعة خطبونا ياابوى هههه

    ربنا يكرمك ويوفقك

    تحياتى

    ReplyDelete
  22. والله فيه حاجات أقدر وبعملها فعلا
    وحاجات تانية مقدرش .. صعبة جدا ومستحيلة كمان

    بس هنعمل إيه
    أهى دنيا وعايشينها
    صدمة فى لطمة وقطمة

    يارب تكونى فوقتى بعد الدش الساقع
    دمتى بخير أختى
    سالى

    ReplyDelete
  23. أقدر أوي

    ساعات كتير لازم أعمل كدا
    بكون بتقطع وبموت
    ولازم اضحك ومحدش يعرف مالي

    الظروف بتحكم بقا

    ReplyDelete
  24. أقدر لو فيه أيد قعدة مستنية لما اتنفس عشان تكتم نفسى

    ReplyDelete
  25. بنقدر ... العجيب أننا بنقدر ..
    و الدش الساقع أكبر دليل على أننا نقدر..
    و للأسف كمان بنقدر ..
    تحياتي :)

    ReplyDelete
  26. عارفه ليه مش حتقدرى لانك انسانه طبيعيه الى جواه بيبان عليها مش بتقدر تزيف مشاعره وتكون متناقضه
    بعتزر جدا على التاخير بس الشديد القوى

    ReplyDelete
  27. اولا اهلا بيكى يا انسانة
    نقدر نستحمل انفسنا ونستحمل الاخرين
    ونستحمل الغلسين ونستحمل اكتر من كدة
    ولازم نستحمل كل الانماط والنوعيات
    وذلك بالتمرين والتدريب
    والصبروالاحتمال
    والحكومة واضعة برنامج على التدريب العملى لينا كتر خيرها
    ومع بداية الصيف غلت الاسعار
    علشان نغنى نار يا حبيبى نار
    يبقى الحل الدش البارد

    ReplyDelete
  28. Excellent post!
    Thank you and have a nice day

    ReplyDelete
  29. كلمات تعدت الوصف والتعبير

    وحروف تخترق كل الحجب لكي

    تلامس القلب والمشاعر
    تحياتي لكي اختي
    وسلم قلمك الجميل
    انتظر جديدك
    بشغف

    ReplyDelete
  30. الحفيقه لفت نظرى اسم مدونتك انسانه وبما انك انسانه يبقى على راى ال قال نقدر نزغزغ بكره لو كشر ولو عافر نعمل سحابه ونمطر نقدر نضحك عصعب ولو نقدر نضحك ماالقلب والمر نحليه سكر نقدر مادم جونا الانسان مش جبان اكيد هنقدر سعيده بمعرفتك

    ReplyDelete
  31. طبعا ااقدر لما اكون مش عاوزة اهين كرامتى لما اكون فى عز لحظات ضعفى مش عاوزة حد يشوفنى ضعيفه
    لما يكونوا اللى حواليا مش هايحسوا بيا يبقى احتفظ بالامى لوحدى
    يمكن اظهر كل دة امام الله وحدة
    لان هو وحدة اللى هايساعدنى ويغوثنى فى اوقات ضعفى وازمتى
    ربنا يفرج كربك ويزيل همك ويبدل حزنك فرحا اللهم امين يارب العالمين

    ReplyDelete
  32. هو إحنا مش بنقدر .. لكن بنضغط على نفسنا علشان نقدر أو نبان إننا بنقدر

    هي الدنيا كده .. تمثيل في تمثيل

    أنا حتى في تعليقي ده .. بأمثل أنا كمان

    ReplyDelete
  33. كل انسان بتجيلوا فترة خنقه
    ودا عادى مش تقلقى
    ...
    المهم ان الفترة دى بتعدى عادى
    متضايقيش نمفسك اوى واشغلى نفسك بإى شىء
    وعايزة اقولك قربى اوى من ربنا هيخفف عنك كتير اوى اوى اوى
    ---
    الا بذكر الله تطمئن القلوب
    ---
    قولى لا حول ولا قوة الا بالله
    ولا اله الا الله
    يا حى يا قيوم برحمتك استغيث اصلح لى شأنى كله ولا تكلنى الى نفسى طرفه عين
    اللهم دبر لى فإنى لا احسن التدبير
    ---
    ربنا يصلح لك حالك يا حبى
    والبوست لجاى تقولى لى انك بقيتى بخير والحياة وردة
    ربنا يجبر بخاطرك يارب ويسعد ايامك
    سلام مؤقت

    ReplyDelete
  34. مش بقدر
    بس بحاول اغير من نفسي
    عشان اقدر
    تقبلي تحياتي

    ReplyDelete
  35. و الله حضرتك بالرغم من صعوبة الكلمات ديه بس للاسف لازم نقدر

    لازم نقدر
    و الا بئى نستسلم و نموت
    لازم تتدركي ان بالرغم من ان كل الاحسايس ديه صعبة علينا كبشر لكن لازم نتعامل معاها و منسمحش ليها ابدا انها تهزمنا

    صدقيني تقدري
    زي ما كل شخص يقدر
    بس المهم ان هوا يؤمن بقدرته في ان هوا يتحمل كل ده

    تحياتي لحضرتك

    ReplyDelete
  36. طبعا أقدر .. لكن ساعات مابقدرش!

    ReplyDelete
  37. عيني رأت مولود علي كتف أمه
    يصرخ تهنن فيه يصرخ تضمه
    قالتله يابني ما تنطق كلام
    داللي مايتكلمش يكتر همه
    عجبي!!!


    عاوزه أقولك يا ياسو ان انا كنت زيك
    بطلت كتابه و حتي المدونه
    مبكتبش فيها خلاص
    لكن الرباعيه اللي فاتت حسسنمي بالالم و الاسي و الحسره و الذنب تجاه قلمي
    و عرفت بل تأكدت
    ان لا ينادي بسقوط القلم إلا الأساتيك


    حاولي تبقي قلم مش أستيكه
    متغلطيش غلطتي و تصدقي اللي يقولك
    nvr show ur emotions
    لا مشاعرك طالما ماهيش ذنب و كلمتك طالما مبتجرحش أعتقد ان الواحد يصرخ و يرتاح محدش من اللي بيقولك كده
    هيفيدك بشيء لما تبقي حابسه الكلمه جواكي .. و ماحدش فيهم هيحس انتي كنتي عامله ازاي لما صرختي
    أصرخي

    الكلمه إيد الكلمه رجل الكلمه باب
    الكلمه نجمة كهربيه في الضباب
    الكلمة كبري صلب فوق بحر العجاب
    الجن يا أحباب ما يقدر يهزمه
    فا إتكلموا إتكلموا

    ياسمين
    أو كما يقال لي : ميس دوت
    أسفة اني طولت

    ReplyDelete

الكلمـة نـور .. وبعـض الكلمـات قبـور