ممكن جدا تكون ماشى فى الشارع وشايف واحدة ع الرصيف التانى ماسكة شنطتهاومدخلة راسها جواها وعمالة تحاول تتطلع حاجة معينة ومش عارفة
وطبيعى جدا بردو تكون فى اى محل وتلاقى بنت فاتحة شنطتها
وبتحاول تطلع لصاحب المحل اى حاجة وبردو مش عارفة
ويترسم على وشها كل علامات الدهشة والإستغراب
اللى تخليك على طول تفتكر جملة عبلة كامل الشهيرة فى مسرحية وجهة نظر
( كانت معايا ! .. كانت معايا فى الشنطة .. ثم تنخرط فى بكاء عميق ليسارع بالرد محمد صبحى مسائلاً:
هيا شنطة عربية ولا ايه؟؟؟)ه
مش عارفة كل البنات شنطهم زى شنطتى ولا لأ
بس ده حالى عموما
وحالى مع شنطتى حبيبتى الملقبة دائما وفى كل المحافل بشنطة حمزة
شنطة حمزة موجود فيها كل شئ
كلللللل شئ
مناديل
أقلام
أوراق
صور
مقلمة
محفظة
أدوات مكياج
كتب
مصحف
كتاب أذكار
دبابيس
أزايز مياه
كوباية
سبح
( يعنى اكتر من سبحة عشان لو ماعرفتش اوصل لواحدة آخد اللى قدامى على طول )ه
ريدار
فلاشة
إم بى فور
سبراي وبرفان
كاميرا ديجيتال
موبايل
مفاتيح
شيكولاتات وبومبونى
لبان
بسكويت
مصاصة
تفاح
زبادى
جزر
خيار
شاحن الموبايل
شاحن الكاميرا
شاحن الإم بى فور
شراب
جوانتى
اكسسوارات
المفكرة بتاعتى
مبرد
قصافة
مقص
مشط
توك شعر
فرشة سنان
معجون السنان
صابونة
فوطة
أدوية
مراهم
الساعة
كروت
ضمان الموبايل
سماعات
وما خفى كان أعظم
وربنا أمر بالستر!!ا
ده طبعا غير الزبالة اللى المفروض تترمى بس مش بلاقى باسكت قدامى
فبقوم حطاها فى الشنطة بدل ما اوسخ مصر اكتر ماهى متوسخة
شوفتوا الطيبة؟؟؟؟؟؟؟؟؟؟؟؟
كتير احس انها سلة زبالة ومتنكرة فى شكل شنطة
وزيادة فى التنكر بنطلق عليها إسم حمزة
لزوم التمويه يعني
طبيعى جدا ان شنطة حمزة تكون تقيلة جدا
ولو اديتها لحد يشلهالى يصوت
ولو حد ماشى معايا وحاول يرصد تصرفاتى مع الشنطة يركبه الإسبهلااااال
وطبيعى اوى بردو اكون فى موقف محتاجة فلوس وادور واقلب الشنطة
وملاقيش حاجة واول مااروح البيت وابص فى النور الاقى الفلوس ع الوش !ه
وطبيعى اقلب الدنيا ع البطاقة ومالقيهاش غير فين وفين
وطبيعى يبقى اسمها شنطة حمزة ... مش كدة؟؟؟
حاولوا كتير معايا يعرفوا سبب الكراكيب دى كلها اللى جوا الشنطة
بجد مش عارفة سبب واضح
وليه اصلا ممكن واحد يمشى من غير شنطة اساسا
والبنت يجرالها حاجة لو نزلت من غير شنطتها
والله ماعرف بردو
يمكن لان احتياجاتنا كتير؟؟؟
ممكن
بس اللى اعرفه انى مقدرش انزل من غير حاجة واحدة من الحاجات دى
ولو حصل ابقى حاسة ان فى حاجة نقصانى وانى ححتاجها
وفعلا سبحان الله بحتاجها فى اليوم اللى نسيتها فيها
بس بردو .. ماتستغربوش لو لاقتونى ماشية فى الشارع بالموبايل بس
خصوصا لو نازلة اعمل شوبينج
يعنى حشترى
يعنى حشيل تقيل
والشنطة لوحدها تقلة .. تيجى كام كيلو كدة
يبقى حشيل الحاجات ولا اشيل الشنطة؟؟؟
لدرجة انى مرة كنت مع ماما واشترينا كتير وبقت ياعينى مش قادرة تشيل
ولا انا كمان من تقل الشنطة
قمت مدياها شنطتى بس تشيلها وشلت انا الباقى عشان اعرف اكمل المشوار
ورجعنا هلكانين ومن يومها بقيت اتسوق بالموبايل بس
وطبعا حبيبة قلبى ماستغناش عنها
شنطة حمزة
شنطة كل الاوقات
وكل المشاوير
وكل المسافات
وكل السفريات
بس بجد ياجماعة
سؤال زهقنى من كتر ما سألته ومافيش رد
مين حمزة ده اللى انا شايلة شنطته ؟؟؟؟؟؟؟؟؟؟؟؟
ده انتي شايله كارفور في ايدك
ReplyDeleteيسعدنى انى اكون اول تعليق
ReplyDeleteل
رومانسى
ممكن ما يوكنش اول تعليق
ReplyDeleteبس هقرى وارجع
لا بجد الله يكون فى عونك كل دا بتشيليه لوحدك فى شنطه حمزه انا بحمد ربنا ان مش عندى شنطه حمزه ولا حاجه بس احلى حاجه شيلها فى شنطتك
ReplyDeleteشيكولاتات وبومبونى
تفاح
زبادى
جزر
خيار
كلها حاجات مغذيه وكمان انتى عامله حسابك انك تغسلى سنانك بعد الاكل
وبعدين مين حمزه اللى انتو ظلمتوه دا
لا انا شنطتى مش كل ده انا منظمه شويه
ReplyDeleteعنك حولى تفصلى اما عن حمزة فوالله ما اعرفه ان شاالله اطفحه يا رب ههههههههه
اللى انا واثق فية بصراحة انى مع تقل الشنطة حمزة بيدعى ليكى انك ريحتية من الشنطة وبعد ما قريت البوست احمدك يارب على نعمة الجيب الخلفى للبطنلون والموبيل فى اليد وكفا اللة المومنين شر القتال
ReplyDeleteماشاء الله
ReplyDeleteفي عندي اقتراحات أخرى
إبرة
خيط
فوطة
صابونة
فوطة صفرا (أيوة بتاعة التاكسي)
أكياس مناديل
ألبوم صور.. لا تنسي أن تجعليه مملوء لآخره
كتاب أو مجلة أو كلاهما
مصحف
كتاب أذكار
وأخيرا.. شخص يحمل لك الشنطة
ربنا يعينك
:)
هادي مش بس شنطة حمزة
ReplyDeleteهادي شنطة حمزة وعلي ومحمد واحمد والحارة كلها
:p
ايه يا بنتي !!
معقول بتحتاجي كل هادي الاشياااااء ؟؟؟
أنا ماليش ف مواضيع البنات دى
ReplyDeleteبس بعد اللى قريته بحمد ربنا انه خلقنى راجل
و لا حمزه بقى و لا غيره
البنطلون ع القميص و لو لحسة كريم شعر يبقى رضا قوى
و انزل اشق طريقى ف هوا الشارع اللذيذ
و كمان أنا مخلوق ليلى و الليل ياما بيدارى
و اذا كان ع الكرش مافيش غيره
هاداريه ليه
و لو حاولت هاداريه بإيه
أهو عاملى شخصيه برضه
أنا بقى بدل شنطة حمزه شايل كرش حمزه و اتقل من الشنطه كمان
ههههههههههه
ReplyDeleteلا كده اوفر يا ياسمين
دا كله لييييييييييه
ههههههههههه
أنا مبدأتش أشيل شنط الا السنة دي
:\
ربنا يعينك ياااااااارب
:D
اه يا بنتى تفاح ايه و شكولاته و عصير
ReplyDeleteانتى شايلة التلاجة مهاكى !!
ههه انا برده كدا بس اخر حاجة اشلها الاكل و شاحن الموبايل :))
امال لو مسافرة هتحطى فى الشنطة ايه؟
ReplyDeleteالسلام عليكم ورحمة الله وبركاته
ReplyDeleteمش عارفه مين حمزه
يا بنتي حمزه ده صاحب الشنطه
:)))))))))
عادي يا يويو كلنا حمزه وعندنا نفس الشنطه
ههههههههه
سلام يا قمر
انتي شايلة كارفور متنقل في ايدك فعلا
ReplyDeleteممكن تستغني عن حاجات بسيطة زي المكياج والبرفان ... مش ليهم اي لازمة برة في الشارع
تحياتي
مش عارف لية كده انك نسيتى حاجة
ReplyDeleteد|على
safenatno7.wordpress.com
يبقى حمزه عمال يضور على الشنطه وهى هنا معاكى ياااااا
ReplyDeleteحرام عليكى هو فى حد بيحط كل ده فى شنطته يا بنتى
عمود الفقرى عامل ايه
طيب هو مفيش اطفال جوه الشنطه
ههههههه يعنى ممكن كل اللى ضايعله طفل يدور فى شنطتك
سكر يا ياسمين
ههههههههههههه
ReplyDeleteوليه الفضايح دي يا ياسمينه؟
بس والله بينفعوا يعنى لا مانع من دبابيس وابره وخيط ومسط وتوكه وياسلام لو شويه ادويه
والله بينفعوا اما عن حمزه فده اكيد راجل كان مراته بتشيل شنطه فيها الحاجات دي وهو كان بيشيلها لها
ههههههههههههههههههه
سلامي
يا بنتى انتى اصلا حاطه البيت كله معاكى
ReplyDeleteبس مش انتى وبس كل البنات
لكن تيجى بقى على الصبيان تلاقيهم بالمحفظه والموبايل
بوست جميل
حزينه
السلام عليكم ورحمة الله وبركاته
ReplyDeleteهههههههههههه
دمك زى السكر
مين حمزه الى انتى شيلاله شنطته
دا حمزة صاحب الشقه الى انتى شيلاها على كلامك دا دى مش شنطه خالص
دومتى طيبه
والسلام عليكم ورحمة الله وبركاته
السلام امانه لحمزة
ReplyDeleteمعاكى حق يا ياسمين احيانا بغطس فى الشنطه
ReplyDeleteوالاقى نفسى فى حاجه مش لاقيها دلوقتى لما بشترى شنطه بحرص انها تكون فيها اكتر من فاصل ولازم سوسته . انتى واخده البيت فى الشنطه. انا كمان مش عارفه مين حمزه
وحشتينى اوى
الله يكون في عون الشنطة
ReplyDeleteالمدونة الفاضله : :
ReplyDelete..نتمني لكِ مزيدا من التقدم والنجاح
وان تكون مدونتك معبرة عن صوتك في كل مكـــــان
.. .. .. ... ..
سعيا منا بأن نجعل من علاقتنا روحاً اكثر حباً وتواصلاً
وبأن نجعل من صوتنا قوة أكثر انتشـــاراً وتأثيــراً .. ..
وبأن نرتقي بفكرنا ...وثقافتنا ...وعلمنا ...وخلقنا ..
.. .. .. ... .. .. ..
ندعوكي للمشاركة معنا في رابطه همســات . . .
...أول رابطه عامة تختص بالفتيات المدونات .....
شاركينا الانطلاقه ..وكوني احدي اعضاء همسات وشاركينا
اجتماعنا الاول ...لتكون همسات .. قلب واحد يجمعنا
فمعاً . . . . . نلتقي .. لنرتقي
تحياتنا ::
(( فريق العمل بهمسات ))
عزيزتى انسانة
ReplyDeleteاسعدنى الحظ فى دخول مدونتك عن طريق احدى المدونات .. وقرأت بوست شنطة حمزة وطبعا عشان انا كان عندى 6 اخوات بنات وحاليا زوجتى فأنا عارف مدى اهمية شنطة حمزة لكن .. وبصراحة يمكن هى اقرب ما تكون لجيب الحاوى الذى يحوى ما لايخطر على بال .. البوست ظريف والمدونة اظرف
واسعدنى المشاركة واتمنى صداقتك قريبا
والسلام عليكم
ههههههههههههههههههههههههههههه
ReplyDeleteكل ده
ليه
شنطة ايدك شنطة سموسونايت ولا ايه ؟؟
طب الجمارك ايه نظامك معاها؟؟؟
هههههههههههههه
ReplyDeleteكده اقنعتيني ا بقي حرامي شنط
شايله " لبنان " فى شنطتك ؟؟؟
ReplyDeleteالسلام عليكم
ReplyDeleteالمحفظة والمفاتيح والتليفون بس
وبكره الشتا عشان ببقي مطر اشيل علبة مناديل كمان
دا انتي لو حرامي سرق شنطتك يتعذب يا بنتي
عاوز خريطة عشان يعرف مكان الفلوس
انا حاسه انك بتتكلمي عن شنطتي
ReplyDeleteانا لازم
مناديل(كل الأشكال)و الأحجام
اسدال الصلاه
شنطة العدسات
جراب النضاره
زبدة كاكاو
الموبايل اللي علي طول بيتوه
الام بي فور
الفلاش ميموري
لبان
بونبوني
دوا الصداع
اساتك شعر بزياده
زجاحة بارفان
و مشط
وورق
و قلم
و طبعا ورق الرمرمه الفاضي عشان نحافظ علي نظافة مدينتنا اللي مفيهاش باسكت زباله
عادي متستغربيش انا كمان شايله شنطة ابراهيم اخو حمزه
و يا سلاااااااااام بقي لما اكون عايزه اطلع حاجه
و لا الموبايل يرن و ادور عليه
ببقي بلعب في السيرك
دا انت ناقص تطلعي من الشنطة أرنب
ReplyDeleteيا ريت الرجالة كمان عندهم شنطة زي دي
انا كل الحاجات اللي قلتيها دي
(ماعدا المكياج والملقاط )
موجدوودة معايا حاطتها في تابلوه العربية
تحياتي:)
زورونا تجدو ما يسركم
ReplyDeleteالحق الاوكازيون
انتهز الفرصه
لبس حماده خلي حماده يلعب
لولولولولولولولولولولولوييييييييييييي
676
طبعا ياجميل كله موجود ماعدا الاكل بصراحه
ReplyDeleteواوحش موقف بقي لما الموبايل يرن وتيجي تطلعيه من وسط المعركه دي ..
انا عمرى ما بشيل شنطة الا فى المناسبات لانى بكرهها وبشيلها اضطرارا عشان الشكل العام بس بصراحة ربنا معاكى دى على راى محمد صبحى دى شنطة عربية ربنا يعينك وانتى شايلاها
ReplyDeleteياااااااااااااااه كل دى حاجات على راى محمد صبحى دى شنطة عربية بس هو ليه كل ده تعرفى انا خلاص فاضلى سنة واخلص جامعة ومش بشيل الشنطة دى الا فى الافراح فقط اصلى بكره الشنط موووووت مش عارفة ليه.....تحياتى لكى ياسمين
ReplyDeleteكل سنه وانت طيبه ياسمين
ReplyDeleteعقبال ما تشيلى بامبرز كمان وببرونه وبودره تلك بقى كدة مش حرمتى حمزة من حاجه
اللى هو ايه الريدار دة
دة زى جوجل رايدار كدة ولا ايه
شنطة حمزه دى من اصعب تجارب حياتى
ReplyDeleteتعرفى
مفيش مره اكون شيلها الا لما اتفتش
مع ان مفهاش الالوحات وكتابات وكده
بس بظهر من خلالها انى ارهابى
كويس انتى كده احمدى ربنا
ههههههههههه
نزلى بوست جديد بقى :(
ReplyDeleteعندي فكرة هايله ليكي..
ReplyDeleteانتي ممكن تزودي الشنطة شوية حاجات كمان..قصافة..بطاريات الواحده بنص جنية..و في اي اتوبيس او في المترو...وزعى على الركاب..ان شاء الله ربنا هايرزقك من وسع...
طريقتك في الكتابة حلوة
والله سؤال واجيه
ReplyDeleteلو كان حمزة رجلاً لقتلته
علشان ترتاحي منه
متهيئلي الواحد يحمد ربنا إنه مش بنت علشان الشنطة دي بقى على كده
بس اللي بيحصلك ده بيحصل معايا على صغير شوية .. في المحفظة بتاعتي
بس أكيد موصلتش إنها تبقى
محفظة حمزة
وربنا يعينك
على الشنطة
وعلى حمزة
تحياتي
وليد
تعرفي انا شنطتي زيك وأكتر وبأعمل زي كل البنات ماتعمل أنا مسميها الجراب
ReplyDeleteوحشتيني يا انسانه
هههههههههههههههه
ReplyDeleteده عادى جدا انا كمان كده وماما دايما تتريق عليا و كمان بعد ما اكون نزلت تلاقينى راجعة عشان نسيت حاجة
تقبلى مرورى
كل سنة و إنتى طيبة يا عزيزتى
ReplyDeleteعيد سعيد عليكى
و على أسرتك و كل من تحبين
تحياتى الخالصة
كل ده في الشنطة؟؟
ReplyDeleteده ممكن تكون شنطتي في الحالة ده لو انا مسافرة مثلا ولا انهاردة رايحة ابات عند حد من قرايبي
لكن كل يوم كده؟
ليييييييييه
:)
بس حكاية الزبالة ده انا زيك فيها بالضبط
هههههههه
والمية كمان
وصحيح كمان.. اليوم اللي اشيل الشاحن مثلا فيه من الشكنطة الاقيني احتجتله رغم اني رايحة جاية بيه كل يوم من غير ما اعبره!!!
نفسي ارجع زي ايام ماكنت في ثانوي و اخرج من غير شنطة
فيه حاجة استغربت قوي لما لقيتك عاملاها فيالبوست وهي انك بتحطي حرف (هاء) فيالسطور الللي فيها قوسين عشان السطر ما يقلبش
كنت فاكرة اني بس اللي بعمل كده
ههههههههههههه
كل سنة وانت طيبة و بألف خير
وعيد سعيد
تحياتي
كل سنه وانتى طيبه يا ياسمين عيد سعيد عليكى وعلى جميع اهلك ان شاء اللة
ReplyDeleteمحمود
تفاح
ReplyDeleteزبادى
جزر
خيار
طيب وسبتي حلة المحشي ليه في البيت ؟؟؟ ينفع كده برضه ؟؟!!!!
كل سنة وانتي طيبة
******** For SALE ********
ReplyDeleteHP Pavilion ZE5639ea Notebook PC
--------------------------------
• 80 GB HDD - 1 year guarantee ( New Hard disk ) .
• Intel Pentium 4 Processor 2.8 GHz.
• 15.0" XGA TFT Active Matrix Display.
• 256 MB Memory ( with capability to add extra chips of RAM ) .
• Up to 64 MB Shared Video Memory.
• DVD/CD-RW Combo Drive.
• Microsoft Windows XP Server Backup Edition ( Installed & on CD ) .
• Ability to record any thing from TV to DVD or CD.
• Lithium-ion Battery Module.
• Wireless.
• Bluetooth
***************
Price : 1??? E.P
السعر حسب المفاهمة
****************
للاستفسار , الاتصال على
Mobile
0120644261
القاهرة
كل سنه وانتي طيبه
ReplyDeleteتحياتي
هو السؤال اللي ف بالي من يوم ما قرأت البوست
ReplyDeleteأمال أيام المدرسة كنتي بتشيلي شنطة حجمها ايه وجواها ايه؟؟؟
أسعد الله أيامك
ايه يا بنتى فينك
ReplyDeleteايه الغياب دة كله
طمنينى عليكى
حزينه
هو عم حمزة دة مش حياخد شنطتة من هنا علشان تكتبي بوست جديد؟
ReplyDeleteياسمين
ReplyDeleteمش تبطلى شر بقى وتطمنينا عليكى وتشوفى مدونتك الغلبانه دى اللى التراب ملها طب تعالى هويها ونضفيها
الله يكون فى عونها اكيد حزينه من اهمالك ليها
وبعدين هو كميكاز هايفضل هربان كدة كتير ولا ايه
يابنتى حاولى توعديه انك هاتخدى بالك منه وتاكليه كويس علشان يرجع تانى
على العموم كل سنه ومدونتك بخير
دة شهر ميلاد مدونتك
يارب تفتكريه
مش طولنا اوي كده كفاية
ReplyDelete:)
نوري مدونتك بقي تاني
miss u, jerry :(
ReplyDeleteبس تصدقي فعلا مش خت بالي قبل كده من حركة الـ"ه" اللي بعد الاقواس دي
عامله زي الزلطه اللي زانقه القوس لايفلت
:D:D lol
السلام عليكم
ReplyDeleteكل سنه وانتي طيبة
و يارب يجعل السنه الجديده خير علينا كلنا
الهم انصر اخوننا في غزه يارب العالمين
و اتمنى زيارتك الي مدونتي المتواضعه
*******************
تحياتي
***************
القلب المنكسر
****************
دمتي بكل خير و سعاده
******************
و السلام عليكم و رحمه الله و براكته
********************************
و موضوع جميل اوووي و مميز
**************************
ايه كل الكشك ده ؟؟
ReplyDeleteبسسسس،
ReplyDeleteممكن سؤال، شيلتي كل ده في الشنطة، و كمان رميتي التهمة على حمزة و سكتنا. بس ممكن حضرتك تقوليلي شيلة معاكي لبنان اذي في الشنطة. هو صحيح لبنان صغير و أكيد شنطة حمزة كبيرة. بس كمان اكيد مش كيبرة أوي كدااا .
أنا عارف إنك تقصدي لبان. شكراً على الموضوع الظريف.
تقبلي كل احترامي وتقديري
صلاح الدين
كل دا في الشنطه وازاي بتقدري تشيليهاربنا معاكي يااااااااارب وشوفي لتكوني ناسيه حاجه تانيه
ReplyDeleteياسمينا اتاخرتى كتير علينا
ReplyDeleteيارب تكونى بخير
تقبلى تحياتى
وحشتينا اوى يارب تكونى بخير
ReplyDeleteطمينينا عليكى وفى انتظارك
سلاااااااااام
امين الهنيدي
ReplyDeleteمش ممكن يا انسانة
ReplyDeleteمش ممكن تكون فى شنطه بالمواصفات ديه
يا لهوى بجد
السؤوال العجيب
شنطه ايه اللى تشيل ده كله
شنطه سفر من ام عجل
حمال اسية حمزة ده والله
ReplyDeleteأصل كل واحد شايل شنطة كبيرة بيتقال عليها شنطة حمزة
بس هو انا سمعت عن حاجات كتيييير اوي جوه الشنط لكن في حاجات عندك عجيبة شوية انها تكون موجودة دائما !!! عموما هو كويس بصراحة بحيس ميبقاش نفسك في حاجة ابداً
اول زيارة ليا وعايز اي حاجة من الشنطة بتاعتك دي
يا بنتي ايه ده كله
ReplyDeleteبصراحة بقى ده امتع بوست قريته في حياتي
لدرجة اني مش عايزاه يخلص
لاني كنت حاسة اني حد بيتكلم عني
بس انا الحقيقة ما وصلتش معايا خيار وطماطم وكرنب زيك كده ولا حتى زبادي ومايونيز
بس كنت في النهاية مستنية منك حل سحري لهذه النملية المسماه شنطة اللي بنشضيلها على قلبنا ومنقدرش نستغنى عنها
لدرجة كل اللي يشيلها في مكان عشان يناولها لي او ياخد منها حاجة يقولي ايه ده يابنتي انتي حاشياها زلط؟
يالا كله زايل بس بجد امتعتيني وضحكتيني لحد البكاء
ااه نسيت اقولك انك نسيت الكنبة بتاعة هاي بوينت فيرنيتشر لانها اساس يصعب فراقه
ReplyDeleteلازم تحطيها معاكي في شنطتك محدش ضامن الظروف
تحياتي يارب ترجعي بسرعة بقى
يالهوي عليكي ها شنطة ديه منفدة على الدولاب على راي احمد حلمي بس بجد اكيد في حاجة واحدة ناقصة ناقصلك لبس للبيت افرض بيتي عندك عمتك ولا خالك ولا اي حد من قرايبكوا مش يبقى عاملة حسابك صدقيني انا زهقت من كتر قراية الحاجات الموجودة ربنا يكون في عونك وقريب ان شاء الله نلاقيكي واخدة بطولة مسك الشنط
ReplyDeleteتحياتي
يعني اذا الواحد بيكون رايح سفرة بريت البلد بيحط كل هاي الاشياء طبيعي اما صعب هيك الشغلات هاي اثقل من وزني !!
ReplyDeleteيانهار ابيض هو الشنطه دى منفده على سوبر ماركت ولا ايه
ReplyDeleteبجد ووالله ربنا يكون فى عون حمزه
دا الواحد يحمد ربنا ع النعمه اللى هو فيها
دا ساعات بخرج من البيت شايل البطاقه كده لوحدها سلط ملط من غير اى حاجه خالص دا حتى مفاتيح الشقه بخبيها ع السلم عشان ما اشيلهاش رايح جاى
:D
ياياسمسن ابدعتى