Monday, March 16, 2009

أمهات فى الميكسر


بمناسبة عيد الأم - وكل سنة وكل أم بخير يارب - عايزة اكلمكم شوية فى الموضوع ده بس من منظور مختلف


طبعا منذ نعومة أظافرنا واحنا عارفين وسامعين وشاربين الجملة اللى بتقول " مصر أم الدنيا " .. وتكثر الأغانى فى هذا المنوال والسياق ( هيا أم الدنيا مصر - مصر هيا امى نيلها هو دمى شمسها فى سمارى ، ازاى والشمس مش سمرة اصلا بس ماشى - بلاااادى يا أم البلاد يا بلادى ) ه


بس بعد ما كبرت وبقيت الاحظ الدنيا ماشية ازاى بقيت احس ان مصر مش ام الدنيا ولا حاجة .. بل ممكن تكون ما تقربش للدنيا اصلا ولا عمرها شافتها
يقدر حد يقولى يا جماعة مصر ليه أم الدنيا؟؟؟ .. بأمارة ايه يعنى؟ .. بأمارة المجالات الكتيرة والخطيرة والكبيرة اللى فالحين فيها اوى يعنى؟؟



ما علينا .. مع الوقت ابتديت اشوف ان الأم الحقيقة والفعلية للعالم كله هيا " ماما أمريكا " .. فعلا هيا الأم .. دولة كبيرة وقوية .. مهيمنة ع العالم كله ومتدخلة وحاشرة مناخيرها فى كل دولة شوية ..والعالم كله فى منزلة الأطفال اللطاف الظراف المطيعين جدا لأمهم مهما عملت .. واكبر دليل على كدة حملة أمريكا فى " القضاء على الإرهاب " .. واللى محدش تجرأ يوقف فى وشها ويقولها " بم " لأن دى أم وكلنا عارفين قلب الأم طبعا والقطنة ما بتكدبش واكيد أمريكا كأم عارفة مصلحة العالم كله كويس
ه
ه
أمومية أمريكا يا جماعة مش بس ع المستوى السياسى والاقتصادى لأ دى كمان على المستوى الإجتماعى ، يعنى امريكا مش بس بتأثر فى حياة الدول سياسياً واقتصادياً لأ دى كمان بتأثر فى أهل البلاد دى ثقافيا وفكريا ، فنلاقى دول كثير اوى منتشرة فيها حركات الأمركة من بعض الشباب زى فى الهند والصين واليابان مثلا
ه
ه
ده غير الإهتمام الشديد باللغة الإنجليزية لدرجة ان فى مصرين ولاد مصريين وجدهم اسمه حنفى وجدتهم اسمها فاكيهة بيصروا اصرار كبير اوى على تعليم ولادهم الإنجليزى أولا قبل اى لغة تانية ويزعلوا اوى لو غلطوا فى تطليع لسانهم فى التى إتش .. كأنه لو مطلعش لسانه حياخد سيئات تدخله النار مثلا ، ولو الواد غلط فى العربى عادى مافيهاش معضلة يعنى



إذن أمريكا هيا الأم البيلوجية للعالم .. الأم اللى خلفت وعرفت تربى بصحيح .. بس مع الوقت ظهر لأمريكا أم بديلة .. أم خدت شعبية كبيرة جدا بين كل شعوب العالم .. الأم دى يا سادة يا كرام هيا " الصين " ه



الصين اللى كتر خيرها داب خيرها فى دمى وعايشين بيه .. فعلا ، فالصين لمن لم يأخذ باله حتى الآن هى أم اقتصادية من الطراز الأول ، أكبر ام على مستوى السلع ، بتصدر كل حاجة واى حاجة لمعظم البلاد خصوصا بلاد الشرق الأوسط .. حتى ماما أمريكا بنفسها ممكن لما تشترى منها اى حاجة تبص تلاقى مكتوب عليها عبارة ميد إن تشاينا
ه
ه
الصين بتصنع كل حاجة .. الملابس - فوانيس رمضان - سجادة الصلاة - السبحة - الاجهزة الكهربائية - ناقص يصدرولنا اطفال صينيين عشان اللى اتأخروا فى الإنجاب أو حتى يصدرولنا وظايف صينية للشباب عشان يحلوا مشكلة البطالة



ماما الصين أم حنونة جدا .. بدليل انها مش قادرة تسيبنا لوحدنا ابدا ولازم تتطمن علينا وتبعتلنا اخواتنا - اللى من اب تانى - الصينين يعيشوا معانا ويتوغلوا فينا وكمان يلفوا علينا فى البيوت بيت بيت عشان ينشروا روح الأمومة فى البيوت المصرية عن طريق طرق الأبواب المغلقة والسؤال المعتاد والدائم: ماما موجودة؟؟؟!!!ه



وبما إن الأم يعنى حنان .. يعنى حب .. يعنى عطف .. يعنى رعاية واهتمام .. اعتقد وأظن ان المواطن المصرى حاليا حاسس انه لاقيط و يتيم .. لأن مصر مابقيتش هيا أمه زى زمان خلاص بقت مرات ابوه اللى كل همها ازاى تزهقه وتقرفه فى عيشته او حتى تخلص خالص منه
ه
وبقى المواطن المصرى يحاول أن يستعيض نقصه لحنان الأم وكرهه لمرات ابوه اللى مطهقاه وقرفاه فى عيشته عن طريق اللجوء لأمهات تانية بديلة وغير شرعيين زى امريكا والصين وأم أربعة وأربعين. ه

23 comments:

  1. مامتي يامامتي ياحلوه يامامتي
    (A)

    كل سنه وامهات المسلمين بالف خير وصحه وعافيه ورضا وحب من ربنا ياااااااااااااارب

    ReplyDelete
  2. احيكي بجد على تناولم لامنا مصر من الناحية المنطقية فعلا مصر ديه لام الدنيا ولا حاجة زي ما قولتي انا كنت مصدق ان مصر ديه لام الدنيا ولا حاجة بس بجد بعدت عنها شهر واحد براه طلعت الامارات طبعا دبي بقا وفيينا العرب والنظام والشوارع النضيفة والناس الكويسة ومفيش شتايم ولا ميكروباصات ولا تكاتك ولا اي حاجة ممكن تضايقك ابدا هناك بس والله العظيم بعد مرور اسبوعين بس على سفري حسيت ان مصر وحشاني جدا جدا عايز اشوف النيل اشوف صحابي و اقعد على الكافيه بتاعنا اسمع ضحك اصحابي و ككل الحاجات الي بتعمليها ديه و كمان الاهم اشوف طيبة المصريين يا عيني عليهم شايل هم الدنيا ولا حد حاسس بيهم قولت يمكن عشان كده المصرييين هم ام الدنيا
    ممكن اكون صح وممكن اكون غلط


    ولتاني مرة احيكي على تناولك للموضوع
    تحياتي

    ReplyDelete
  3. و الله عندك حق في كل اللي قلتيه

    بس اهم حاجه شدتني في المقال

    الناس المصريين اللي جدهم اسمه حنفي

    ههههههههههههههههههههههههه

    حقيقي دي ام المصايب عندنا

    الفرنجه

    و كل عام و جميع الامهات بخير

    ReplyDelete
  4. و الله الواحد شمتان فى امريكا ..بيشجع الصين عند يعنى
    اذكر عندما عاد اخى من امريكا فوجدنا كل الهدايا
    "made in china"

    ReplyDelete
  5. عزيزتى
    أولا احييكى على المقال وقد تكون فعلا مصر بقت مراة الاب
    لكن بنظرة منطقية هى ايه مصر دى هى حكومة بس

    من الواضح أنها حكومة بس هههه
    لكنى عزيزتى مصر هى حكومة وشعب
    والشعب ده يطلع مين انا وانتى وغيرنا
    والامهات اللى ذكرتيهم زى امريكا والصين قد يكون حقا توغلهم فى عقولنا وسياستنا واقتصادنا حقيقى

    لكن من صنع تلك الدول حكوماتها
    لا
    شعبها ايضاً
    هنييجى لأمريكا وقوتها العظمى وهى قعلا أم
    بس دى بقى بينطبق عليها المثل ال بيقو سألو فرعون ايه فرعنك قال ملقتش حد يلمنى حقيقى مش فاكرة المثل بس هى يلمنى انسب حاجة ليها

    وتيجى للصين هتلاقى فيها الناس كلها بتشتغل فى اى شغل حتى لو كان بمرتبات ذهيدة عشان كده هى أكبر دول منتجة

    تعالى عندنا بقى هتلاقى الشباب متركن فى الشوارع ليه لأن مش شايفة فايدة انه يشتغل بمرتب ذهيد لو مؤقتاً أو كل الوظايف الفاضية مش بتناسب مؤهلاته طيب ماهو ده الموجود فى السوق
    يعنى المراتب اللى كسبتها الصين دى مش من فراغ ده بتعب وجهد وكمان مرتبات صغيرة

    ويمكن متكونش مصر لسه هى ام الدنيا بس على الاقل أهى مراة اب مبلوعة شوية

    وكل سنة وكل الامهات بخير ميعادا امريكا واعوانها


    وتحياتى لك أختى على البوست الرائع واللى دمه خفيف

    سعدت كثراً بزيارتى مدونتك

    ReplyDelete
  6. بالرغم من انه لي الشرف أن هذا هو التعليق الأول لي في مدونتك..إلا أنني أختلف معكي قليلا حتى في تعريف الأمومة وقياسك الذي قولتيه
    أنتي حين تتحدثين عن الأمومة تنظرين الى الجانب السياسي منها والرسمي فقط..الا أن الأمومة ليست بهيمنة أمريكية وسطوة عسكرية ولا بإغراق صيني لكن ود الشعب ونزعته الدينية ووسطية فكرة بالرغم من كل ما يشوبه تلك هي الأمومة
    قروات ونعم وخير جنود الأرض تلك هي حماية الأمومة
    ولم يكن القياس يوما على قيادة سياسية لأنها بطبيعة الحال لا تعبر عن السواد الأعظم
    حتى ما يسمى بالأمركة ذلك لاننا ننظر الى جانب واحد فقط وهو للأسف الفارغ من الكاس
    في جانب آخر يوجد من يتمسكون بتقاليدهم وقيمهم مهما هاجروا ورحلوا
    لن يشعر أحد بحنينه وشوقة الى أمه الحقيقة إلا من سافر ولو لبضع ساعات

    الحارة سد

    ReplyDelete
  7. يا بنتى مش الشمس هى الى بتجيب السمار و بعدين دة كلام و دايما بيقولوا هو الكم بفلوس ولا حيقدم ولاحيئخر ييبقى خلاص...مصر ام الدنيا

    ReplyDelete
  8. :D:D:D:D:D:D:D

    سيت دول بس
    ;)))))))
    :D

    ReplyDelete
  9. الا صحيح
    هي كانت "أمهات في المنفى" ولا "أمهات في الميكسر"؟؟؟
    ^o)

    ReplyDelete
  10. كل عام وكل ام تكون بخير وانشاء الله كل واحده نفسها تبقى ام ربنا يحققلها امنيتها

    ReplyDelete
  11. وياريت كل الناس تجيب هدايا وتحب امهاتهم طول السنه

    ReplyDelete
  12. بداية اييك على اسلوبك الادبى الراقى
    وحسن اختيار مواضيعك
    بس على فكرة مصر زمااااااااااااااان اوى كانت ام الحضارات
    يعنى ام الدنيا
    (زى مابندرس فى كتاب التاريخ بتاع الوزارة)
    احم
    بس لما نكون موضوعيين شوية
    ونفتح عنيننا على بعض الكتابات المحترمة نعرف انها لا ام الحضارات ولا يحزنون
    كل الحكاية انها كانت حضارة عظيمة وسط حضارات اخرى عظيمة
    بس احنا لازم نقول اننا اعظم
    وبعدين بقى
    شمسها فى سمارى
    يعنى السمار اللى بيكتسبه الانسان من تعرضه للشمس

    وبالنسبة لماما امريكا وماما الصين
    فدى امهات بالغصب


    امهات بالدراع


    امهات.................
    والسلام عليكم

    ReplyDelete
  13. انا مالى امريكا مش مامتى خالص مامتى رقده جوة اهى

    كل سنه وكل امرأه وام بخير بمناسبه عيد الامهات

    تحياتى

    ReplyDelete
  14. احييك على الأسلوب أولا
    ثانيا نفرق بين مصر وحكومة مصر حاجة هفضل اقولها طول عمرى
    يمكن مصصر اتجوزت فعلا زوج أب خاين وفاسد مع الزوج دا وأولاده اللى جاى بيهم مصريين برده بس تحسى انه مش من هنا ولا عايش هنا
    بس هتفضل مصر هيا مصر انا بحب امى دى اللى بتضربنى بالجذمة بحس دا اما بخرج برا مصر بحس انى محتاج ليها لرائحة البلد
    تقبلى احترامى وتقديرى واتمنى التواصل بالمدونات

    ReplyDelete
  15. هههههههههههههههه........موضوعك جديد وفكرته حلوة
    هو احنا لينا بركة الا ماما أمريكا اللي مدلعانا ومهنيانا
    ماما صين برضه مدلعانا بس بطريقتها..دول حتي منسيوش فوانس رمضان
    حنلاقي دلع أكتر من كده فين
    :)
    تحياتي

    ReplyDelete
  16. كل سنة وانت طيبة

    وكل ام حقيقية طيبة

    أنم مرات الاب اللي بتزهق العيال علشان يطفشوا ويهجو في بلاد الله


    وربنا يلطف بعبيده


    تحياتي
    وليد

    ReplyDelete
  17. مصر أم الدنيا من الناحية التاريخية فقط .. الماضي يعني

    أما الحاضر فزي ما إنتي عارفه .. لا أم الدنيا ولا حاجة

    المهم بقى مش الماضي ولا الحاضر .. المهم هو المستقبل .. ياترى بنفكر (أو فيه حد فوق بيفكر) يرجع مصر تبقى أم الدنيا زي زمان؟ وألا المستقبل هيبقى إمتداد للحاضر وهنتسول كل شوية أم؟

    ReplyDelete
  18. اول زيارة بش مصر هتفضل امي و الزمالك في دمي
    :))

    ReplyDelete
  19. كل عام وانت بخير يا احلى ام
    ثنك يو انسانة مدونة رائعة

    ReplyDelete
  20. كل سنه و ماما امريكا امي القديمه و ماما الصين امي الجديده بالف خير
    و ربنا ينتع امنا الاصليه و يعدي حالتها الصعبه دي بالسلامه

    ReplyDelete
  21. يعنى مصر ماطلعتش ام الدنيا ولا حاجه؟؟؟
    طيب مرات ابوها ولا ايه؟؟؟
    وبعدين مالها ماما امريكا؟؟؟
    ماهى مدلعانا وكافيانا وكاسيانا وواكسانا اهى

    ReplyDelete
  22. ام الدنيا
    ؟؟

    الدنيا فانية

    ReplyDelete
  23. سيدتي
    يسعد مساك في الاول
    اول مرة ازور مدونتك عن طريق مدونة الراحلة شيماء
    تحليل واقعي للامور اكيد ديما اقرا في الكتب مصر ام الدنيا و بسمعها في المسلسلات
    بس في الاونة الاخيرة و مع حكم الاستبداد و المطلق في مصر اصبحت في تراجع كبير لها كدولة عربية قوية و اصبح الشعب المصري يعاني بشكل فضيع على مختلف الاصعدة
    و هذا حالنا في كل البلدان المتخلفة و المستبدة
    امريكا سيطرت على العالم بقوة السلاح و الاقتصاد و بنهج سياسة الشركات المتعددة الجنسيات و كمان بنهجها لفرق تسد و ده اللي بتحاول تزكيه في العالم المتخلف و بتحاول تصنع حروب اهليه في مجموعة بلدان علشان تبقى هي دائما الاقوى
    السياسات الاستعمارية لامريكا ده من طبيعتها كدولة راسمالية همها الوحيد الربح و بس بغض النظر على الوسيلة المتبعة
    عشان كده لازم كل الاحرار في العالم يناهضوا سياستها و يتكتلوا في تيارات سواء على المستوى المحلي او على المستوى الدولي
    في دلوقتي منظمات مناهضة للعولمة و لسياسات امريكا و للراسمالية عموما هدفها توعية الشعوب و انتزاع مكاسب الشعوب من هذه الانظمة و محاولة الانعتاق من اظطهاد الراسماليين عبر العالم و السبيل الى ذلك هو النضال و لا شيء غير النضال من اجل التغيير
    مودتي
    دعوة للتواصل مع مدونتي

    ReplyDelete

الكلمـة نـور .. وبعـض الكلمـات قبـور