Monday, May 11, 2009

بـقـيـنــا إزاى كــــدة؟؟؟


دخلت امبارح جوجل ريدير اشوف اخر اخبار التدوين ايه والمدونات فلاقيت بوست شد انتباهى عند احدى المدونات المشهورة

كان عبارة عن فيديو بيظهر شاب وفتاة فى احدى الجامعات - واخدين راحتهم شوية - وفى واحد صورهم بكاميرا لمدة دقيقتين من غير ما يخدوا بالهم وفى الاخر خد المادة المصورة دى ونشرها على النت وفضح الدنيا بيه

اللى لفت انتباهى فى الموضوع ان صاحب المدونة بيلقى بمعظم اللوم على المتلصص اللى صورهم .. وفضلت امبارح طول اليوم الموضوع فى بالى .. مين اللى غلطان بالظبط؟؟ .. البنت ولا الولد ولا المتلصص؟؟

ولما صحيت النهاردة الصبح لاقيت مدونة اخرى مكتوب فيها عن نفس الموضوع .. ولفت انتباهى بردو ان صاحب المدونة غلط الولد والبنت ولكن اداهم مبرر الكبت ولم يعطى من قام بتصويرهم اى مبرر

انا قولت رأيي وعلقت فى مدوناتهم وحكتب التعليقين تانى فى التعليقات عندى هنا .. بس مهما كان الرأى الفكرة ان جريمة زى دى - انا بسميها جريمة - بتجنى على شبابنا وبررائتهم وصورتهم قدام نفسهم وقدام الغير .. اللى ضايقنى اكتر وغاظنى اكتر ان البنت محجبة وان بردو مالهاش اى مبرر لا هيا ولا الولد فى انهم يعملوا كدة بالعكس انا شايفة انهم استفذوا نفس المصور المريضة انها تفضحهم الفضيحة دى .. انا معاكوا ان مهما حصل المصور غلطان بس معلش بردو هما اللى ادولوا الفرصة انه يعمل كدة .. على الاقل المصور ده ما فبركش الفيديو عشان يفضحهم على حاجة هما ابرياء منها


الكل غلطان والكل غلط والكل مشترك بشكل او بآخر ان جريمة زى دى تحصل .. بداية من البيت اللى مابقاش يهتم اوى البنت لابسة ايه وهيا نازلة او اتأخرت ليه بالليل او نشوف مواعيد محاضراتها زى ماكانوا بيعملوا زمان .. لحد المدارس اللى لغوا منها التربية الدينية ووسائل الاعلام اللى بترفض وجود مذيعة محجبة وبتمنع حتى الكلام فى الدين كأننا مجتمع علمانى


المشكلة خطيرة وكبيرة بجد .. الولد والبنت دول ممكن يكونوا ولادك او اخواتك او قرايبك .. بلاش ، كفاية انهم ولاد بلدك ، انا حزنى وزعلى مش عليهم قد ماهو على براءتنا ونقاءنا اللى سقطوا منا سهوا او عمدا .. ومين اللى جنا علينا وخلانا كدة واحنا ازاى رضينا وسكتناله وقبلنا يكون ده مصيرنا .. شعب مشوه الملامح بلا هوية .ه

31 comments:

  1. السلام عليكم

    استاذ احمد اولا بحييك على موضوعاتك المفيدة وثانيا عايزة اقول انى حسيت بعد ما شوفت الفيديو بمشاعر غضب وغيظ وحزن ورغبة فى البكاء

    انا متغاظة من البنت اللى نفسها سهلة اوى كدة عليها وحسيت بالحزن ع المهانة اللى كانت فيها واللى خلت نفسها فيها بإديها

    ومتغاظة من الشاب اللى مافكرش ولو للحظة ان اخته ممكن تكون كدة .. داين تدان

    ومتغاظة من اللى فضحهم زى ماحضرتك بتقول

    ومتغاظة من المجتمع الفاسد اللى انتجلنا نماذج زى دى

    رغم ان عنصر الفضيحة قائم حتى بدون كاميرات لانهم يبدو انهم مش فى قاعة او حتى داخل مبنى الكلية واضح جدا انهم قاعدين برا .. وبرا ولو فى حتة متطرفة ممكن ناس تعدى وتشوفهم بدليل الدقيقتين اللى اتصورتلهم وهما قاعدين

    معنديش غير كام جملة اخيرة

    حسبى الله ونعم الوكيل

    اللهم اهدى شباب المسلمين

    يارب خرجنا من الدنيا على خير

    ReplyDelete
  2. احترم عدم اعتقادك لوجود اى مبررات اخرى يا اسلام - ازيك الاول

    بصراحة انا مزودة الولد والبنت دول لووم اكتر لأنهم مش فى مكان مغلق عشان لما تبص عليهم تبقى اتعديت خصوصيتهم

    انا طبعا مش موافقة على فكرة التصوير والنشر والفضيحة .. بس انا شايفة ان زى ما الولد شجع البنت .. البنت والولد شجعوا واحد نفسه مريضة زيهم انه يصورهم ويفضحهم

    اولا المكان مش مغلق .. واضح من تلصصاتهم وخوفهم من عيون الناس .. وكمان بدليل انهم اتشافوا ومش بس كدة دول اتصوروا كمان .. طيب لما يعملوا كدة فى مكان مغلق مفهومة .. ياما ناس بتعمل بلاوى اكتر من كدة كمان وبتتستر عشان هما فكروا فى الستر على معاصيهم وبعدوها عن عيون الناس

    لكن دول عملوا كدة فى العلن وقدام الناس .. مش عايزة نوصل لمرحلة الدول الغربية ونقول اللى عايز يعمل حاجة فى اى حتى مش مشكلة المهم انت ماتبصش عليهم وتجرح خصوصيتهم

    ثانيا وده اهم .. انهى كبت يا جماعة بتتكلموا عليه .. دول شباب فى الجامعة يعنى فى اوائل العشرينيات .. ماوصلوش للتلاتينات وهما مش عارفين يتجوزوا

    الولد ده لسة ماتخرجش من الجامعة اساسا عشان يبقى عنده كبت .. ده ابن امبارح جاله الكبت ده منين

    وبعدين طب مااحنا كلنا مرينا بالمرحلة دى وفى منا اللى لسة بيمر بيها .. مرحلة الجامعة بكل مغرياتها .. بس لا نقص منا ايد ولا رجل لما احترمنا نفسنا .. ولا تعبنا نفسينا وبقينا نشد شعرنا

    يا جماعة الرغبة الجنسية دى حاجة ممكن للإنسان التغلب عليها بعقله .. وده اللى بيفرق الإنسان عن الحيوان .. وكلنا شوفنا لما المجتمع لغى عقله فى سنة من السنين حصلت ظاهرة التحرش الجماعى بحجة احنا شباب مكبوت وسيبونا نعيش بقا

    دى مش حياة .. واللى بيعمل كدة مش عايش ولا مرتاح نفسيا ولا محترم نفسه ولا محترم اللى بتعمل كدة معاه .. وعلى فكرة الولد ده لو قال يا جواز عمره ما حيتجوز البنت دى عشان حيقول عليها سهلة ومش حيقول زى ما قولت انه هو اللى شجعها ومن غير تشجيعه ماكنتش حتعمل حاجة


    الوضع دلوقتى مختلف .. مش مهم مين شجع مين .. هما الاتنين غلطوا واللى دايقنى اكتر من غلطهم انهم فى الحرم الجامعى حتى مش مستخبيين فى اى حتة

    افرض اللى كان مكان اللى صور ده اخوها .. او ابوها .. او حد يعرفها


    انا معاك ان تصوير الموضوع ده فى حد ذاته فضيحة كبيرة .. بس فكر مع نفسك ولو للحظة ليه اتفضحوا .. من رأيي عشان هما حتى مافكروش يستروا نفسهم .. زى المجاهر بالذنب

    الجلد ليهم فى مدوناتنا ده ماهو الا جلد لذاتنا احنا بمجتمعنا الفاسد الضال الضائع المغيب

    وانا زيك والله لما شوفت الفيديو ده عند احمد شوقير نفسيتى تعبت جدا وحسيت ان احنا بقينا فى غابة وبناكل فى لحم بعض

    الولد استغل البنت واستمتع بيها والبنت قالت مافيش مانع وجه واحد من بعيد استغلهم هما الاتنين وصورهم وفضحهم


    دائرة شيطانية بنعيشها فى مجتمعنا على كل الأشكال والمستويات والنسب

    وحسبنا الله ونعم الوكيل

    ربنا يهدينا ويهدى كل المسلمين

    ReplyDelete
  3. أحسنت يا إنسانة أوافقك الرأي وأزيد على عبارتك الكل غلطان حتى المدونين اللي نشروا الموضوع وحاولوا يلتمسوا الأعذار مع الاختلاف في توزيع نسب الأعذار

    ReplyDelete
  4. السلام عليكم

    انا مش عارف اقول ايه بس الواحد متلخبط اخر لخبطه من الفيديو ده

    مش عارف الواد ولا البت اللي غلطانين ولا اللي صورهم ولا اللي فضحهم على اليوتيوب ولا اللي نشر عنهم في المدونة بتاعته ولا انا ولا غيري لما علقوا على الموضوع

    وانتوا اذيتونا بهذا المنظر القبيح

    يعني بصراحة موضوع يا ريت يتقفل
    وكفاية فضايح وكفاية كلام فيه

    اللهم استرنا يا رب العالمين

    ReplyDelete
  5. ياريتك ترفعى اللينك من عندك
    لانى عرفت الموضوع من عندك
    يعنى بلاش تدى أى اشارات تؤدى للمشاهده
    ستركم الله يوم القايمه

    ReplyDelete
  6. بصي يابنتي
    انا شايفه ان بعيدا عن مين عمل ايه
    بعيدا عن اطراف المشكله اساسا
    مش حاتكلم عن اللي اتعمل دا وصلناله ازاي وليه
    وليه بقى في انحطاط اخلاقي بالشكل دا
    وليه بقت الحيوانيه هي السمه الغالبه في البشر المتمثله في تحكم شهواتهم فيهم وعدم قدرتهم على السيطرة عليها
    وليه وليه وليه
    مش حاتكلم في كل دا
    ولا حتى في فعل التلصص والتصوير
    مش حابرر ولا حاتهم ولا حاغلط ولا ابرأ
    كل دا بالفعل خلاص حصل وتم
    تم الفعل السافل المنحط دا
    تم التصوير
    فخلاص
    وانا مش كواليفايد اني اناقش اسباب ومبررات ليها متخصصين يناقشوها
    انا بس عايزه اقول حاجه واحده
    ان ربنا سبحانه وتعالى ستير
    بيحب الستر
    مش حاجه زي دي تحصل بعد دقايق من حدوثها نلاقيها على النت من فيديوهات لمقالات وموضوعات بتتكلم وتحكي
    فانا بقدر اعتراضي طبعا ع الفعله الشنعاء دي انا باعترض بردو على فضحها
    فضح الفعل دا ونشره وتداوله
    لانه اول ما حيؤذي حيؤذينا احنا
    زي ما حصل معايا وحكيتلك لما عرفت بالموضوع
    بجد كم مشاعر سلبيه غير عادي من قرف لوجع لحزن لحاجات حستها يمكن مش عارفالها اسم حتى
    فحصلت فضيحه زي دي
    اضعف الايمان مانساعدش احنا بقى في زيادة انتشارها بكلامنا عليها والكتابه عنها وتداول الفيديو بشكل او باخر
    طب ليه
    ربنا ستير ياجماعه بيحب الستر
    لا حول ولا قوة إلا بالله
    أستغفرك يارب وأتوب إليك
    على الاقل نخلي الكلام للمتخصصين للي ممكن كلامهم يبقى له صدى ايجابي ويجيب نتيجه ايجابيه زي انه يضع ايده على سبب المشكله، يحاول يحلها او يحجمها ولو اني اشك في دا بردو انه ممكن يحصل اصلا او حتى بشكل ايجابي محترم :S
    مش اي حد يتكلم
    مش اي حد يحكي
    مش اي حد يفتي
    مش اي حد ينشر
    مش اي حد مايعملش حاجه غير انه يزود من انتشار الفضيحه ليس الا ويساعد على ان اللي معرفش يعرف والسلام
    أستغفرك يارب وأتوب إليك
    لا حول ولا قوة إلا بالله العلي العظيم
    ربنا يعفو عنا وعن المسلمين أجمعين يارب العالمين آمين
    اللهم إني أسألك العفو والعافية في الدين والدنيا والآخرة

    ReplyDelete
  7. ان لم تستحي فافعل ما شئت
    ما فيش غير كدة
    الولد و البنت لم يستحوا
    الى صورهم لم يسترهم حتى لو كانو اخطئوا
    الى نشر الفيديو لم يستحى من عرضة على النت
    و لذلك كلهم فعلوا ما شائو لغياب الحياء
    غريبة انا كنت لسة بتكلم
    عن الموضوع شبة دة
    http://kelmameny.blogspot.com/2009/05/blog-post_6663.html

    ReplyDelete
  8. طبعا الولد والبنت عليهم الغلط
    حتى لو المصور كان شخصية مش تمام
    ليه يدو لأى حد الفرصة انه يحطهم فى الموقف ده


    ........................

    بس خلينا واقعيين اكتر من كدة...

    لو انا مكان الولد ده واتحتطيط فى نفس الموقف فى الظروف اللى احنا فيها يعنى شاب وعندىبتاع 22/25 سنة هعمل ايه ؟!

    بصراحة ابقى كداب لو قلت انى عارف ايه اللى هيحصل
    انا مش بديله مبرر بس.....
    ايه الحل ؟!

    ربنا يهدينا

    ReplyDelete
  9. أنا ال معترضه عليه اصلا هو تناول الموضوع نفسه أو نشر فيديو زي ده علي مدونه ؟

    احنا كده بنساهم في نشر فضيحه ومن ستر مؤمنا ستره الله ف الدنيا والآخرة

    ماعلينا من أنهم غلطوا وماعلينا من أنهم ماستروش نفسهم ده مش مبرر لأننا نفضحهم
    ونساهم في نشر الموضوع هل احنا لما هنتكلم ف موضوع زي ده هيتحل الوضع
    كل واحد مسؤل عن نفسه امام الله وأمام الناس ولو البنت مخافتش علي سمعتها
    أو أتوهمت أن الولد ده لما يعمل كده يبقي بيحبها ؟ وواحد تالت ييجي يصورهم
    ومش خايف ان ربنا يعاقبه
    ويلاقي عقابه ف الدنيا أو ف الاخرة
    تبقي المشكله مش مشكله 3 أطراف وبس
    دي مشكلة مجتمع بأكلمه
    أفكاره وقيمه وحتي ثورته لدينه بقت فاسدة
    زي ما ستوته قالت لازم نبدأ من قاع الهرم
    بدل ما نجررح في قاع الهرم ونشوهه صورته نحاول نشده لفوق لان السقوط سهل أوي
    الاصعب هو الارتفاع والسمو لفوق

    وربنا يهدي شباب وبنات المسلمين يارب

    ويعف بنات وشباب المسلمين ويجعلهم آباء وأمهات وبنات وأبناء صالحين

    آسفه للتطويل
    تحياتي ,,,

    ReplyDelete
  10. الغلط على المدون اللى ساهم فى انتشار الفضيحة ... ان الله ستار حليم

    كان ممكن يكتب عن الموضوع بدون وضع الفيديو

    ReplyDelete
  11. ده كان تعليقي هناك على نفس الموضوع
    الست فرويد قالت كل اللي كنت عايز أقوله تقريباً
    و أنا برضه ما شفتش الفيديو و مش حأشوفه و شايف إن وجوده ملوش داعي و كلامك كفاية جداً

    و رداً على طالب ثانوي
    =====================
    صحيح يا فاروق الحد الشرعي هو للزنا فقط
    لكن هناك حرية متروكة للقاضي و للحاكم في فرض عقوبة تعزيرية فيما لم يرد فيه حد من الجرائم
    و قد تكون بالحبس او الجلد او الإقامة الجبرية في المنزل أو خلافه


    و أخيراً
    تصوير الفيديو ده و نشره غلط و حرام
    و اللي بيحصل فيه غلط و حرام برضه

    و التلاتة غلطانين
    هو و هي و المصور
    و أنا مش شايف أي داعي للتعاطف معاهم

    البنت لو عفيفة و شريفة و متربية صح و عارفة دينها صح عمرها ما كانت خلت حد يلمس منها شعرة قبل الزواج

    و الحجاب ليس دليل على شئ
    خصوصاً لو كان مجرد قماشة على الرأس لا تستوفي شروط الحجاب الشرعي الصحيح
    من أن لا يصف و لا يشف و يغطي الجسد كله ما عدا الوجه و الكفين و لا يكون زينة في نفسه
    و المحجبات مثلهن مثل غيرهن فهن لسن معصومات خصوصاً لو لبسن الحجاب كمجرد عادة و تقليد بدون فهم لمغزاه الديني

    و الولد لو يعرف ربنا و دينه و بيفكر في إنه : إفعل ما شئت كما تدين تدان
    و إن ده حيترد له في أخته أو أمه أو بنته أو زوجته ما كانش عمل كده

    و المصور لو يعرف عقوبة ربنا للمتجسسين زيه و بيخاف من ربنا و يتقيه ما كانش يقدر يعمل كده

    كلهم غلطانين
    و لا داعي للتعاطف معهم

    إنتشار الخطأ لا يجعله سهلاً و لا بسيطاً و لا عادياً
    و بالتأكيد لا يجعله صواباً أو يدعو للتعاطف

    فرصة الخطأ و الذنب متاحة لنا جميعاً لكن كم منا يتقى الله عندما يكون وحده و لا يراه سوى من خلقه و الملكين الكاتبين

    كل ما نملكه هو دعوة هؤلاء المذنبين إلى التوبة
    و الحديث معهم بالحكمة و الموعظة الحسنة
    و التوقف عن التشهير بهم حيث أن هذا هو إثم عظيم و قد يصدهم أيضاً عن باب التوبة الذي فتحه الله سبحانه و تعالى لجميع عباده

    ReplyDelete
  12. بقينا كده واصعب من كده
    المشهد ده بيتكرر في كل مكان
    سواء في جامعه او في شارع
    او اي حته المفروض انه يكون فيها حرمات
    بس مش بيقدروا الكلام ده
    وفي الاخر يقولوا كلام ملوش لازمه
    عن الكبت ومش عارفه
    كبت ايه اللي يخلي الناس تبقي كده
    وفين اسلامنا
    ربنا يهدي :S

    ReplyDelete
  13. ظنى انها حكاية معموله قصد
    شوفوا البنت آخر لقطه بتبص على الكاميرا
    واعداء الاسلام كتييير

    ReplyDelete
  14. الحقيقه اٍن المدونين كمان اللى نشروا الكليب غلطانين جدا لأنهم ساعدوا على نشر الموضوع و فضح البنت و الشاب ..
    حأقول أيه بس مش عارف و الله ده أمر يحزن و يوجع القلب و يخوف فى نفس الوقت ربنا يستر على الجميع ..
    تقبلى تحياتى و تقديرى ..

    ReplyDelete
  15. حقك وانا معاكى الولد والبنت ذنبهم كبير صحيح هما مش فى

    مكان مغلق عشان يعملوا اللى على كيفهم .. وحتى لو فى مكان

    مغلق ليس هذا تصريح لهم بفعل كهذا ولكن ناتى للحدث الواقع

    وهو انهم فى مكان مفتوح بل فى حرم جامعى
    مكان له قدسيته له نفس حرمة المسجد والكنيسة
    مكان طلب العلم له حرمته ... وليس ملاذا لاصحاب النفوس

    الضعيفة .. ولكنى كلما حملت الشاب والفتاه الذنب اجدنى اعود

    مرة اخرى للتفكير فى مصور هذا المشهد هذا المتلذذ بالفضيحة
    المتلصص على الناس المستمتع باذلالهم فى لحظات ضعفهم ..
    نعم هذه اللقطة نتيجة لحظة ضعف جمعت بين هذا الشاب وتلك

    الفتاة .. وهيأت فى ذات الوقت الفرصة لهذا الشخص السادى
    لان يقوم بفعلته ويفضح سرهما

    اختلف معاكى فى النقطة الثانية وهى ان الفعل ده مش بسبب

    الكبت .. الكبت لا يرتبط بسن خاصة فى شعوبنا العربية
    بالعكس انه يرتبط بالشاب منذ بلوغه
    وعدم مقدرته على التحكم فى نفسه
    العيل من دول عنده 14-15 سنة وملهوش كلام مع اصحابه

    الا على الافلام الاباحية ومعاكسة البنات
    والافلام اللى بالهبل ويتناقلها من هم فى هذا السن واصغر على

    تليفوناتهم المحموله - الا من رحم الله - تسألى عن الكبت
    الكبت عند شباب الجامعة اللى مبيصدق واحدة تسأله الساعة كام

    يحس انه قطع السمكة وديلها
    ولا لو سالته على حاجة فى المحاضرة يبقي كده الواد ده يااااي

    سحر عيونه ونظراته .. اعذؤينى على تهكمى من واقعنا المرير

    ولكنها حقيقة صدقينى الكبت موجود .. بصي فى الشوارع على

    عيون الشباب عند مرور اى شيء اخره تاء مربوطة - اقصد

    اى فتاة - جميلة او مش جميلة لابسه عادى
    او ملفت هتلاقي كل العيون عليها ده اسمه كبت صدقينى مش

    مرتبط بسن الكبت موجود عند الشباب والفتيات ايضا
    ظاهرة الاصحاب والبنت اللى عاوزة تعمل اى حاجة عشان صاحبها
    حتى ولو على حساب كرامتها بس ميسبهاش وعلى سبيل التجربة بالمرة .. كل ده مش كبت

    الرغبة الجنسية ممكن الواحد يتغلب عليها ده صحيح والا مكناش طلعنا من الجامعة وعدينا المراحل دى كلها ولكن بالقرب من الله ليس لها حل اخر .. قوليلي بقي فى المجتمع اللى احنا فيه ده الشباب هيقربوا من ربنا فين وهما بالمنظر ده
    هيقربوا من ربنا وهما فى دماغهم هيفا وجوازها .. صاحبته ويجبلها ايه فى عيد الحب
    لست ملاكا من السماء ولست شيخا من شيوخ الزمان
    بس اللى بقوله ده معروف ولا يحتاج لسفسطة

    وليس معنى انى بقول ان الشباب عندهم كبت اننا نسيبهم يعملوا اللى على مزاجهم بالعكس - على راى اللمبي ابسيليوتلى - لكن ندور على حل نحاول به نشد انتباهم لشيء ارقى واسمي
    من الكبت والانشغال بالشهوات .. وهنا اعانى انا من التشوش
    فلا اجد دافع للشباب سوي بالخطاب الدينى الاجتماعى
    ولكن مع التجديد .. افشل هنا فى تحديد هوية التجديد او المجددين ..

    مجتمعنا فاسد نعم .. ضال اينعم .. مريض بالثلث
    ولكن لسنا هنا لجلد انفسنا كما تقولين نحن هنا لمداواة او محاولة ايجاد دواء لمثل هذا السلوك

    ReplyDelete
  16. انا شفت نفس الفيديو عند واحد اخر غير المدونين المذكورين عندك و علي الفيس بوك و حزنت جدا ان جامعه ممكن يحصل فيها شيء مماثل لكن محتمل يكون خارج مباني الجامعه فعلا في مكان معزول لكن اللوم لا يقع علي المصور اولا بل علي البنت في الاول لانها سمحت لنفسها تتحط في موقف كهذا و الولد و بعدين اللي صورهم اللوم يقع عليه في مرتبه ادني لان المكان كما ذكرتي مفتوح
    و دول كان حقهم قضية اداب
    خوفا من شيوع ما حدث و استسهال تكراره

    ReplyDelete
  17. لقد جائتنى نفس التعليقات التى تسألنى عن الفارق بينى وبين مصور اللقطة

    اقول لكم الفارق
    .. كطبيب النسا يصور المرأة وهى فى عملية الولادة تفتح ارجلها لتخرج مولودها يصورها لتعليم تلامذته ... ليس كالقواد الذى يصور نساءه لعرضهم على راغبي المتعة الحرام

    هل وصل الفارق ... ام ما زلنا ندفن رؤوسنا فى الرمال .. لم انشر الفيديو ولكنى عرضت صور منه لتوصيل ما اود قوله
    لم اقصد التشهير ولا الايذاء

    عزيزتى انسانة هذا الكلام غير موجه لكى ولكن لمن يترك الاصل ويعيب على الفرع .. واحترامى للجميع
    دمتم جميعا بخير

    ReplyDelete
  18. أتفق معك.. إلا أني كنت سأعلق تعليق أخي عصفور المدينة.. فناشر الفيديو نفسه شارك في الجريمة .. إن صح التعبير
    هدانا الله وإياهم

    ReplyDelete
  19. أول مرة أدخل المدونة بعد أما أبيضت
    كدا شكلها ألطف كتير

    بالنسبة لموضوع البوست

    أحنا عندنا ولد وبنت في موقف معين وهوا أنهم بيعبروا عن مشاعرهم المشكلة في الشكل اللي بيعبوا بيه والمكان اللي هما فيه دا بغض النظر عن صدق المشاعر دي من عدمه

    ونيجي للكابتن اللي صور
    ممكن يكون حد معدي وممكن يكون حد يعرفهم وقاصد يعمل دا يعني بيصيد ليهم وعايز يفضحهم
    وممكن يكون الولد متفق مع حد يصوره مع البنت لغرض ما أو عشان يفرح بنفسه
    او البنت هي اللي متفقه مع حد عشان برضه غرض ما

    أما لو كان حد معدي بالصدفة فكون أنهما بيعملوا شيء مش مظبوط ميديش الحق لحد أنه يتعدى على خصوصيتهم تحت أي سبب

    ReplyDelete
  20. المشلكة مشترك فيها اكثر من جهة

    واكثر من مسئول عنها

    زي ما قلتي

    ربنا يهدي شبابنا وبناتنا

    ReplyDelete
  21. جزيت الفردوس الأعلى لرفعك الرابط
    ربى يحفظك ويسترك ويستر كل بنات وابناء المسلمين

    ReplyDelete
  22. هو الحقيقة اللى صور اذنب فى انة فضح حد ودة فى حد ذاتة ذنب صعب
    والاتنين اللى عملوا كدة دول فعلا ملهمش أهل لان لو كان لهم أهل كانوا على الاقل عملوا حساب لأهلهم
    ربنا يعافينا من ذنوب الدنيا وشرها
    تحياتى يا قمر

    ReplyDelete
  23. البيت مش بياخد باله من لبسها ازاي انتي مش بتقولي محجبه؟؟؟؟؟؟؟؟؟؟

    انا معاكي في ان التلاته مشتركين في الغلط
    و اللي صورهم ده
    هتتردله في عزيز لديه او حتي فينفسه و زي هو ما سترش عليهم ربنا مش هيستر عليه

    اما الولد و البنت يا ريت يتعظوا بقي كل اللي زيهم

    ReplyDelete
  24. في الحقيقة الموضوع فيه مجموعة ضخمة من الأطراف .. الولد والبنت والمصور والمكان الجامعي .. الأخلاق والجرأة والوقاحة وحب الفضائح .. إلخ

    كل كمية التناقضات دي بتكشف لينا قد إيه المجتمع منهار من غير ما نآخد بالنا

    أيوة بقينا كده

    ReplyDelete
  25. السلام عليكم
    الصورة جرحتنى
    والكلام جرحنى اكتر
    ومش قادرة اقول غير
    ربنا يهدى الولد
    ويهدى البنت
    ويهدى المتلصص

    حزينه

    ReplyDelete
  26. السلام عليكم ورحمة الله وبركاته

    ازيك يا يويو

    اول ما دخلت ماكنتش مصدقه اني عند انسانه

    امال فين ياخوانا اللون الاسود والعتمه اللي كانت ماليه المدونه هههههههه

    شكلي كده كنت في القمقم بقالي فتره ومعرفش اخبار الدنيا حواليا
    يادوب باطلع اخد نفسي كام دقيقه وارجع تاني للقمقم بتاعي والمطحنه اللي انا فيها اليومين دول

    بس تصدقي بالله ان اللون كده احلي واكتر اشراق مبروك النيولوك

    وحشاني يايويو يارب تكوني بخير

    بالنسبه للموضوع ده انا قريت البوست عند استاذ احمد بس ماعلقتش لاني لو كنت علقت كنت هاقول حاجات ماتعجبش ناس كتير واولهم استاذ احمد ففضلت اني اقرا واخرج من غير تعليق

    اعذار ايه اللي بيلتمسوها ولمين
    سواء الولد والبنت او اللي صورهم الكل غلطان ومافيش ليهم اي اعذار

    رسولنا الكريم قال يا معشر الشباب من استطاع منكم الباءة فليتزوج ومن لم يستطع فعليه بالصوم فإنه له وجاء
    ما قالش من لم يستطع وعنده كبت يروح يعمل كده
    ومافيش كلام بعد كلام سيدنا محمد صلي الله عليه وسلم

    عارفه كويس اوي ان الفيديو ده مايجيش واحد علي ميه من اللي بيحصل بين الشباب في الجامعه وبرا الجامعه دا غير مصيبة الجواز العرفي بس ده مش عذر ليهم يعني خصوصا انهم في الجامعه

    ربنا يهدينا ويهدي الجميع

    سلام يا قمر

    ReplyDelete
  27. الفساد منظومه بتكمل بعضها
    مجتمع مليء بالمشاكل الإجتماعية والماديةفي غياب الرادع الديني يفرز شباب يتصرفوا بهذه الطريقة
    ويفرز من يتلصص على خصوصيات الناس
    ولا داعي لأن ننشر تلك المشاهد يكفي أن نتحدث على السلبيات ونحاول تقديم الحلول
    تحياتي

    ReplyDelete
  28. ربنا يرحمنا برحمته ويهدينا ويهدي شباب المسلمين يارب



    تحياتي

    ReplyDelete
  29. حاجة تقرف فعلا يا دعاء
    يعني إذا كان الشاب والفتاة غلطوا،فاللي صورهم ونشر وفضحهم مصيبته أكبر
    مش عارف الناس دي بتفكر إزاي أو هو استفاد ايه من كده بس
    ويا عيني عليكي يا طيبة
    تحياتي

    ReplyDelete
  30. الجميع أخطأ اولهم الولد ثانيهم البنت ثالثهم المصور
    انا لم اشاهد الفيديو لكنى فهمته من كلامكم
    بالنسبه بقى للتصوير
    انا متضايق من الموضوع ده شويه
    لانى باحس اننا العرب بنصر على ان نثبت جهلنا وغبائنا
    ونصر على ان نثبت ان الاستفاده الوحيده للموبايل ذو الكامير والانترنت
    ان الناس تصور نفسها بتعمل حاجه غلط او تصور ناس تانيه بتعمل حاجه غلط وتحطها على النت تهيلوا شعوب بتفكر بالمنطق ده وبتستخدم التكنولوجيا فى كده بس فى اكثر الاحيان هتوصل لايه
    ربنا يستر

    ReplyDelete
  31. عام هجري سعيد عليكم وعلى الأمة الإسلامية جميعها
    عام يحدوه أمل جديد
    ونسال الله عز وجل أن يكون عام نصرة للإسلام
    تحياتي

    ReplyDelete

الكلمـة نـور .. وبعـض الكلمـات قبـور