Wednesday, December 30, 2009

2009: كورس مكثف فى الصبر


فكرة الورقة والقلم اتعلمتهم من زمان وحبيتهم من زمان وهى انى اطلع كل اللى جوايا فى الورقة والقلم ، لما بمسكهم بحس انى عايشة وانى بتنفس وانى اقدر اتعدى كل المصاعب وانى حقدر اكمل واوصل ، عشان كدة جميل اوى انك اخر كل سنة تقعد مع نفسك وتعمل عصف ذهنى على الورق وتكتب كل حاجة اتعلمتها ومريت بيها وايه الصح اللى عملته ونفسك تثبت عليه وايه الغلط اللى عملته ونفسك ماتكرروش تاني ، اعتقد لحظة زي دي تعتبر لحظة مهمة فى حياة كل واحد فينا ومش لازم يضيعها من ايده ... لحظة المحاسبة والمراجعة والفهم للذات

كل سنة بتعدي فى حياتنا بيبقى ليها معنى وشكل ولون ، بنتغير معاها ، بنكبر ، بنفهم ، بندرك ، بنتعلم ، مواقف وتجارب كتيرة اوي ممكن تعدي عليك خلال سنة من عمرك وبتيجي فى يوم فى اخر السنة تقعد مع نفسك وتشوف انت ابتديت السنة ازاى ودلوقتى انت عامل ازاى وانت فى نهايتها ، عامل ازاى وجسديا ونفسيا واجتماعيا ودينيا واخلاقيا وكل حاجة
الفين وتسعة سنة عجيبة ... طويلة جدا وقصيرة جدا فى نفس الوقت مليانة احداث ومراحل واشخاص ومواقف تقريبا عمرى ما حنسى اى حاجة حصلتلى فى السنة دي بالذات ، المهم مش حطول عليكوا قولوا طولي ، حكتب فى نقاط سريعة كدة اتعلمت ايه
*****

كبرت فى 2009 أضعاف عمري الحقيقي

السنة اللى فاتت كنت بتمتع بسذاجة رهيييييييبة بحاول اتجنبها السنة دي ان شاء الله ... جعلوني ناصحاً

السنة اللى فاتت عشتها كأن حد مغميلي عيني ... على نياتي لأقصى درجة

اتعلمت السنة اللى فاتت ان الطيب سهل أوي يتاكل .. او الطبيعي انه يتاكل ... واللى شوكته قوية وقادر ياخد حقه ولو حتى بلسانه بيتعمله ألف حساب

اتعلمت يعني ايه حد مايعبركش طول ماهو مش محتاج منك حاجة

واول ما تلوح له مصلحة عندك فى الأفق يبقى ناقص يحطك فوق دماغه

اتعلمت يعني ظلم وقد ايه هو احساس بشع بجد

واتعلمت يعني ايه اللى ظلمك ده يحاول يتعامل معاك ويضحك فى وشك

ومن ضهرك هو بجد لا بيحبك ولا بيطقك

*****

اتعلمت من السنة اللى فاتت انك لو معندكش خطة لحياتك غصب عنك ومش بمزاجك حتبقى جزء من خطط الآخرين

اتعلمت من السنة اللى فاتت ان عمر ماحد حيقتنع انى مهمة طول ما انا نفسي مش مقتنعة بكدة

اتعلمت من السنة اللى فاتت يعني ايه قضاء وقدر ويعني ايه لطف فى القضاء والقدر

اتعلمت يعني ايه اسم الله القدير .. مهما الناس اتكلمت هو قادر يخلف ظنونهم جميعا

اتعلمت يعني ايه غربة ويعني ايه يتم ويعني ايه وحدة ويعني ايه خوف

اتعلمت يعني ايه حد يكرهك أوي

واتعلمت انك لو عايز تعرف مين بيحبك ومين بيكرهك بجد شوفه وقت الشدة حيتصرف معاك ازاى

اتعلمت يعني ايه مايبقاش قدامك خيار غير انك تعيش حياتك بنفسك

وتفرح نفسك بنفسك ، وتشغل نفسك وتعلمها وتمدلها إيدك وتساعدها

عشان لو معملتش كدة لنفسك ممكن الدنيا ماتوفرلكش حد يعملك كدة

اتعلمت ان الفرحة مش بضاعة ممكن تستوردها من الآخرين

اتعلمت ان الفرحة حلاوتها لما تطلع منك انت وتشع بيها لكل اللى حواليك

*****

اتعلمت يعني ايه صبر ويعني ايه عبادة ويعني ايه دعاء ويعني ايه ربنا

اتعلمت انى عمرى ما حرفعله ايدي واقوله يارب من قلبى وحيسيبنى أبدا

اتعلمت يعني ايه أمومة ويعني ايه حمل وايه هي آلامه

ويعني ايه تقعد 270 يوم قايم نايم وفى حد بيتحرك جواك وعايش معاك

يعني ايه تصلي وتقرا قران وهو جواك هادي وساكن مطمن بكلام ربنا

حد لو عليت التليفزيون شوية يتحرك وكأنه بيعترض او مبسوط

ولو طنشت وجبة يتألم ويحسسك بألمه عشان تقوم تاكل

يعني ايه ملامح انسانة كلها تتغير لوجود طفل فى احشائها

اتعلمت يعني ايه ولادة ويعني ايه غرفة عمليات

اتعلمت يعني ايه موت وألم ووحشة وفراق

اتعلمت يعني ايه صدمة

ويعني ايه الصبر عند الصدمة الأولى

اتعلمت يعني ايه طبيب مهمل

اتعلمت يعني ايه احساسك انك عشت الفترة دي كلها مع ملاك ربنا اصطفاه ورحمه من دنيتنا

اتعلمت يعني ايه تمشى وفى كائن حي ملك الموت جاله وقبض روحه وهو جواك

وموقف بشع جدا وانت حاسس انك قبر ماشي على رجليه

*****

اتعلمت يعني ايه حد يشتمك وتقرا شتيمتك بعينك

اتعلمت يعني ايه حد يفتري عليك ويتهمك انك بتتألى على الله وافتكرت انك ضمنت الجنة

ويعني ايه تبكي لما تقرا الكلام ده خجلا وحيائا من الله عز وجل

ويعني ايه بعدها بأسبوع واحد كل اللى يشوفك يقولك الطفل ده مش حيرضى يدخل الجنة الا لما ياخدك انتى وابوه فى ايده

اتعلمت يعني ايه اسم الله الحق والعدل

*****

اتعلمت يعني ايه مايبقاش ليا نفس ابدا للأكل

اتعلمت يعني ايه اخاصم النوم

اتعلمت يعني إيه أم تزعل لزعلي وتفرح لفرحي

اتعلمت يعني ايه حزن أب على فراق ابنه اللى كان مشتاقله جدا

عرفت يعني ايه اب يروح يدفن اول فرحته

وشه اتغير مش نفس الشكل اللى اعرفه

قولتله مالك، قالي مافيش

دفنت ابني اللى كنت بتمناه من الدنيا

سمعت صوته وانا طالعة من غرفة العمليات وهو بيعيط فى طرقات المستشفى

الكل كان بيبكي حتى الممرضات

ولاقيت ناس غريبة معرفهاش داخلين يطمنوا عليا ويحضنوني ويبوسوا فيا

عرفت يعني ايه تتنقذ من الموت

وتخرج من عملية تقول يارب .. انا نفسي اخش الجنة

عرفت يعني ايه ابني يدفن من غير ما اشوفه

وكل اللى يشوفه يقولي كان شبهك اوي

عرفت يعني ايه حرقة قلب ام على ابنها

بحس ان حد ماسك قلبي وبيعصره جامد بلا رحمة

وبحس صوتك قلبي وهو بيأن من الألم

والمس بلل دموعه بين إيديا

*****

اتعلمت يعني ايه حب واتعلمت يعني ايه عكس الحب ده

اتعلمت يعني ايه محنة وبردو يعني ايه منحة

اتعلمت يعني ايه اصدقاء مهتمين يخففوا عنك ألمك ولو حتى مايعرفوكش ولا عمرهم شافوك

اتعلمت يعني ايه حب خالص لله فى لله

اتعلمت يعني ايه مسؤلية فتح بيت اللى كنت مشفقة منها جدا

اتعلمت يعني ايه لما تزعل حد يطبطب عليك

وشوفت لما تزعل ممكن بردو حد يقولك انت بتعيط على ايه .. مش للدرجة دي يعني .. عادي عيل وراح

وشوفت ان اللى ممكن يقول كدة يكون على درجة قرابة كبيرة باللى انت زعلان على فراقه ... سبحان الله

*****

اتعلمت انى لازم ماابقاش على الهامش وانى لازم اكون البطلة الأولى فى حياتي لانها ببساطة حياتي انا

حسيت بمتعة انك تعمل اللى على مزاجك والصح ومايهمكش كلام اى حد

اتعلمت يعني ايه حد يحاول بشتى الطرق انه يسيطر على حياتك ويتدخل فيها

اتعلمت يعني ايه حد يوعد ومايوفيش

اتعلمت يعني ايه حد يتكلم وماينفذش

*****

السنة اللى فاتت اول مرة اقفل فيها المدونة

السنة اللى فاتت اول مرة ادمن تويتر أوي كدة

لو حبيت اكتب شعار للسنة اللى فاتت حقول ببساطة

إذا سألتنى: ماذا فعلت فى العام الذى مضى؟

سأقول لك: كنت أتعلم الصبر

19 comments:

  1. ربنا يصبرك ان شاء الله

    ولله ما اخذ ولله ما اعطي

    ReplyDelete
  2. اتعلمتي كتير و الأهم إنك تستفيدي باللي إتعلمتيه و تستعمليه صح

    ربنا يأجرك في مصيبتك و يخلفك خيراً منها إن شاء الله

    ReplyDelete
  3. أول تعليق

    بجد بوست جامد جدااااااا
    ياااااااه بقالى كتير معلقتش هنا
    بقالى شويه كتير بقرا حاجات كتير من اللى فات

    2009 بجد انتى اتكلمتى عنها بعمق اوى

    هيا عندى كمان كانت عميقه

    حاولت أكتب عنها انهارده بس معرفتش بس يمكن ارجع اكتب عنها

    انسانه

    عوضك الله الخير ورزقك بطفل جميل زيك وبروح الإنسانه
    وربنا يسعدك ويوفقك
    تصدقى انا لسه عارفه انك اتجوزتى من كام يوم مت تويتر انا من ايام الهسكوس شكلى

    تحياتى

    ReplyDelete
  4. ربنا يصبرك يا عسل ما بلاكي و ان شاء الله الخيرة فيما اختاره الله
    ما تحميلش هم لان اللي ييجي من عند ربنا كله خير و الحمد لله
    اما عن 2009 فمش هنقدر نقول عنها حاجة غير اننا ندعي ان ربنا يكون كتبلنا فيها حسنات اكتر و ربنا يرضى عننا اكتر و نكون قريبين من ربنا اكتر و اكتر

    شكرا ليكي يا قمر و شكرا على كلامك الرقيق اووووووووي
    مع خالص حبي

    ReplyDelete
  5. ان شاء الله السنه اللى جايه تبقى أحسن بإذن الله
    ربنا يصبرك ان شاء الله و لله ما أخذ و لله ما أعطى وكل شئ عنده بمقدار

    ReplyDelete
  6. فعلا أهم حاجة أتعلمتيها واللى لازم كل الناس تتعملها هيا الصبر

    ReplyDelete
  7. bgd 2ntii 3asoola awii

    2ntii asartii feya awii bgd ana kont 5alas ba3ayat

    bgd rabena ma3akii w 5oodi balek men nafsek


    w 23tebriini kare2a dayma le postatek :D

    ReplyDelete
  8. اتعلمت انى لازم ماابقاش على الهامش وانى لازم اكون البطلة الأولى فى حياتي لانها ببساطة حياتي انا

    عجبتنى دى قووى

    ReplyDelete
  9. اظن على ادما هى كانت سنة مؤلمة بالنسبة لك ..
    على اد ما اتعلمتى فيها فعلا حاجات كتير اوى كانت محتاجة سنين لتعلمها ..

    ربنا يوفيكِ صبرك خيرا
    ويجعل كل ابتلاء اتعرضتيله فى ميزان حسناتك


    دمتِ بخير حبيبتى

    ReplyDelete
  10. يا رب تكون السنين الجايه سنين طيبه وتكون السنه ديه اخر سنه تزعلك والحمدلله على كل شيء

    ReplyDelete
  11. واضح انك اتعلمتى كتير من 2009
    ويارب تستفادى من دا فى 2010

    ReplyDelete
  12. سنه ميلاديه سعيده

    زاخره بطاعة الرحمن

    اتمناها لك غاليتي

    ReplyDelete
  13. ممكت تبقى صحبتى؟
    لانك بجد بتتكلمى باللى انا بحسه
    ممكن؟

    ReplyDelete
  14. اتمنى انك متكرريش اخطاءك و نحب اننا نتعلم منك كمان

    ReplyDelete
  15. انتى اتعلمتى الصبر
    وانا اتعلمت حاجات تانية اخرها الصبر

    ربنا يصلح احوالك

    ReplyDelete
  16. جميلة

    تدوينة رائعة

    ربنا يصلح اموركم وييسر حالكم

    تقبلوا مرورى

    ReplyDelete
  17. لله ما أخذ ولله ما أعطي وكل شيء عنده بمقدار

    " إنما يوفي الصابرون أجرهم بغير حساب " دة جزاء الصابرين

    ReplyDelete
  18. حلوه اوى اوى اوى اوى

    والكل اتعلم منها مش انتى بس

    بس انتى لسه متعلمتيش حاجه لما تتعلميها هتحسى انم ملكتى الدنيا كلها وانك مش فارقه معاكى حاجه

    لما تتعلمى قول الله تعالى (وعسى ان تكهروا شيئا وهو خيرا لكم وعسى ان تحبوا شيئا وهو شر لكم)

    وتتعلمى ان ما اصابك ما كان ليخطئك وما اخطائك ما كان ليصيبك

    ساعتها بقى تحسى برضا

    واهم حاجه الرضاااااااااااااا

    وانا بشكرك بجد انك خلتينى اقرا حاجه حلوه اوى زى كده

    ReplyDelete

الكلمـة نـور .. وبعـض الكلمـات قبـور