Wednesday, December 09, 2009

لسة إنسانة



انا فاتحة المدونة دي من 2006


وفاضل كام يوم وحتم 3 سنوات


المدونة دي عاشت معايا فترات مختلفة ومتناقضة اوي من حياتي


عاشت فترة الدراسة ومتاعبها


وبعد التخرج والبطالة وحلم الوظيفة


وبعد الوظيفة ومتاعبها بردو



وقرار الاستقالة


وقرار الخطوبة والزواج


ووفاة ابني


طبعا اللى يعرفني من الأول يمكن يستغرب ويحس انى مش انا


اللى كان بيقرالها من زمان


كنت زمان بضحك ومقبلة ع الحياة


دايما كاميكاز موجود فى اى بوست


دايما بيهزر وبيضحك وبيضحكم


دايما بنتخانق مع بعض


ودايما بنضحك معاكم


انا كمان زيكم حاسة انى اتغيرت


يمكن اكثر نضوجا


او يمكن اكثر هما ومسؤلية من الاول


مش عارفة


وحتى الفرق فى السن مش جامد اوي


كنت عشرين وبقيت تلاتة وعشرين


يمكن كبرت فى التلات سنين دول تلاتين سنة مرة واحدة


مش عارفة


يمكن التجارب الكتيرة اللى مريت بيها خلال التلات سنين دول هما اللي عملوا كدة


على العموم مش انتوا بس اللى حاسين بكدة


ولا انا بس


كل اللى حواليا حاسين بكدة بردو


دايما شاردة وسرحانة


بتجيلي نوبات بكاء حادة فى اى وقت واى مكان


حالة من التصوف والزهد الشديد فى الدنيا

لا باكل ولا بنام تقريبا


دايما صاحية ودايما ماليش نفس للأكل



الحمد لله على كل حال


انا عارفة ان فى الفترة الاخيرة كانت معظم البوستات حزينة


بس والله دي لا شكوى ولا اعتراض على امر الله


يمكن اللى مش بقدر اقوله فى الواقع باجي اقوله هنا


ويمكن احتياجي للبوح والفضفضة هو اللي خلاني ارجع


افتح المدونة من تاني


ويمكن مستغربين انا ايه اللى خلاني اقفل المدونة


الموضوع ببساطة هو التعليق ده


Anonymous has left a new comment on your post "كان ليا حلم":
ربنا يهديك بص للمصايب اللى حواليك وانت تحمد ربنا بدل ما كل مدونتك شكوى كده الرحمه بالناس شويه



*********
ده تعليق جالي على البوست اللى قبل ده


وفعلا قعدت افكر


يعني ايه واحد صاحي الصبح مقبل ع الحياة


ويقوده حظه العثر لمدونتي ويقوم يكتئب


هي الناس ذنبها ايه فعلا بجد


اللى مات ده ابنى انا مش ابن حد تاني


واى حد بيقرا المدونة بجد مالوش اى ذنب فى اى حزن جوايا


فكرت افرفش عشان عزيزي القارئ ينبسط


بس اكدب عليكوا لو قولتلكوا اقدر


ممكن امثل الحالة دي فى الواقع وفى اماكن كتيرة


بس هنا جوا المدونة بجد مش بقدر


بحس انى جوا نفسي اوي وكأني قدام مراية وببص فيها


حتى وانا بكتبلكوا دلوقتى مش مرتبة حكتب ايه


بسيب صوابعي ع الكيبورد وقلبى يمليها الكلمات


سامحوني مش بإيدي


حاولت انساه بس مش قادرة


يمكن لأن فترة النفاس لسة ماخلصتش


يمكن لان كل حاجة فى جسمي بتفكرني بللي حصل


يمكن مش عارفة


الحمد لله على كل حال


انا بس كان نفسي اقول للأخ صاحب التعليق


ربنا وحده اللى يعلم انا راضية ولا ساخطة على امره وقضائه


وربنا وحده اللى يعلم باللي بيني وبينه


بس مافيش حاجة فى الدين بتقول ان الحزن يتنافى مع الرضا


والا ماكنوش سموا عام وفاة السيدة خديجة رضي الله عنها بعام الحزن


الحمد لله على كل حال


وقدر الله وما شاء فعل


نرجع بقا للسبب اللى خلاني افتح المدونة من تاني


السبب هو اندهاشي الشديد من شئ خطير


وحبيت اقوله عشان انبه غيري من خطورته



اللى حصل ان وفاة الطفل كانت بطريقة فجائية جدا


يوم الاحد فى السونار القلب بينبض وبيتحرك وزي الفل


تاني يوم ولا حركة ولا نبض


والدكتور المتابع مش عارف سبب الوفاة


وكل اللى قاله بعد الولادة ان الحبل السري خنقه


بس والدتي الله يبارك فيها صممت اني اروح لدكتور تاني


رحنا الحمد لله لدكتور ثقة وله اسمه فى القصر العيني ما شاء الله


المهم لما حكيناله اللى حصل


طلب مني تحاليل سكر صايم وفاطر


وطلب حاجة اسمها الهومجلبين السكري


وده بيبين هل السكر فى الدم اخر تلات شهور كان عالي ولا لأ


وعملت التحليل


واول ما شاف الورق برق واتخض


لاقى نسبة السكر صايم وفاطر عالية


والنسبة من تلات شهور كانت عالية بردو


وقالي معنى كدة ان سكرك من تلات شهور كان اكبر من الارقام دي بكتير


وقال ان سكر الحمل هو المرض الوحيد اللى بيسبب وفاة مفاجأة للجنين


يعني يوم صاحي وكويس وتاني يوم يتوفى من غير سبب


الحمد لله على كل حال


اللى مستغرباله دلوقتى ومش قادرة اتخيله


يعني ايه طبيب محترم تبقى المريضة اللى بيتابعها

عندها سكر حمل وواصلة لمراحل متأخرة منه

لدرجة انه تسبب فى انها تفقد طفلها

وهو لا يعرف ولا عنده فكرة اصلا؟

طول عمري بسمع عن اهمال الاطباء وخطورته


بس دي اول مرة اشوفه بعيني واجربه بنفسي


ويارب مايشوفه ولا يجربه حد يارب

ياريت محدش يزعل مني بسبب المود ده


وانا مهما كان ومهما حصل




مـجـرد إنــســانـة

فى وشهـا إبتسـامة فرحانـة


وفـى عنيهـا دمعـة حيرانـة

بتفـرح وتضحـك

بتزعـل وتحـزن

ومـن قلبهـا بتدعـى


تخـرج علـى خيـر من دنيـانـا

سمعوني آمين بقا
:)

65 comments:

  1. اللهم امييييييييييييييييييييييين

    يا حبيبتى انتى والله اجمل انسانة
    ربنا يصبرك يا حبيبتى ويعوضك خيرا عن كل اللى زعلتيه وحزنتى عليه

    ويارب دايما اشوفك مبسوطة وفرحانة وتكون فعلا اخر احزانك

    بس صدقينى اخرجى من الحزن خرجيه منك ماتخليهوش يغلبك ولونى حياتك تانى بالفرحة والله هتفرحى وساعتها بقه هتجيبيلى شوكولاته وخلى بالك مش بسيب حقى هالبدلك ف الدرة قصدى هنا ههههههههههههههه ايون اضحكى للدنيا واكيد هتضحكلك

    يلا بقه لو سمحتى انا لابدة هنا لسه عايزة بوست من بتوع زمان

    انتى لسه هنا يلا ااا قومى بقه

    ReplyDelete
  2. ربنا يصبرك
    و آميين تعيشي في دنيانا سعيدة و كويسة و تخرجي منها على خير و بخاتمة حسنة
    أنا متفهم اللي كتبتيه ده تماماً
    ربنا معاكي
    و الإهمال الطبي بقى من الثوابت في بلدنا

    ReplyDelete
  3. مش حقدر اوصفلك انا قد اية حاسة بيكي و مقدرة شعورك
    لاني كنت بمر بوجع الفقد للضنا كل ليلة خلال شهور حملي الاخير كل ليلة اتخيل ان جنيني حيموت و اني حتسلخ من نفسي يوم ماافقده
    يمكن لاني من اول يوم عارفة ان ظروفي الصحية خطيرة و ان في رسك كبير اني احمل سواء على نفسي و على البيبي
    كنت كل ليلة بتخيل و اتصور و مع ذلك مش ممكن يحس بالالم الا اللي عايش فيه
    و زي المثل اللي ايده في المية مش زي اللي ايده في النار
    قلبي معاكي
    مش كلمة
    بجد قلبي معاكي
    عارفة ان النسيان مش بس صعب ده مستحيل
    بس احنا اية لزمتنا في الحياة لو مكناش نطبطب على بعض و ترمي راسك في صدري لما تتالمي و امسح وجعك
    و انا كمان لما افرح اجي ارمي فرحتي في اديكي نقسمها سوا و نفرح سوا
    يمكن اللي بيلومك ماعاش احساس انه يتبتر منه جزء و يتدفن و هو بيتفرج
    مش مقدر يعني اية فرحة بتكبر كل يوم و احلام وردية تتقطف في ثانية و تدبل و تتحول لكرة شوك بتجري في الدم و تشوه كل العروق
    اه يا انسانة
    اه من القلب
    العزاء الوحيد ان جنينك سبقك على الجنة يشفعلك يوم القيامة
    و ان ربنا يديلك العمر و الصحة و تحملي تاني و تالت و تكمل فرحتك بنونو جميل صحيح معافى ان شاء الله، تقدري تمسحي بضحكته جزء من وجعك

    انسانة انا حبيتك جدا و حابة اتكلم معاكي اكتر
    يا ريت تبقى تيجي اونلاين في الماسنجر نحكي سوا
    مش عارفة ليه حاسة انك شبهي

    اشكرك انك فتحتي مدونتك ليا علشان اعبر عن كلام كان محبوس جوايا
    و اشكرك انك اشرقتي من جديد و متاكدة ان الجاي احلى

    كل الحب
    و الود
    و خالص الدعاء
    طهقانة= سمباتيك

    ReplyDelete
  4. مدونتك من المدونات اللي من أول ما أنا بدأت أعرف يعني إيه تدوين كنت متابعها ... تعليقاتي قليلة جداً بل ممكن متتعداش 3 تعليقات خلال ال 3 سنين تدوين لكن متابعتي لحضرتك لم تنقطع
    مش من السهل ان يتشارك الكثيرون أحلامهم وحياتهم ومشاكلهم .... لكن حضرتك كنتي ف كل بوست بتخلينا نعيش فعلاً معاكي ... وقت الدراسة كان الكل بيتمنالك النجاح .. وقت التخرج ووقت الوظيفة كان قراءك بيدعولك كتير تلاقي وظيفة مناسبة وتسعدي بيها .. وقت الزواج وإلى آخر الأحداث اللي شاركتينا حضرتك فيها الحزن والفرح وكاميكاز الجميل
    أجمل شيء إن الانسان يكون على طبيعته وكتابات حضرتك كلها مليئة بحياة ومشاعر انسانة حقيقية
    ربنا يكتب لحضرتك السعادة والتوفيق في الحياة ويعين حضرتك على تخطي المرحلة الصعبة دي
    دمتي بكل الخير

    ReplyDelete
  5. حبيبتى حمدالله على سلامتك
    والبقاء لله فى وفاة أبنك وربنا يرحمه ويجعله سبب فى دخولك الجنة إن شاء الله
    وأكيد الحياه ما بتقفش ولكن أكيد الحزن والمود ده هياخد وقته وبكرة إن شاء الله ربنا يعوضك بأولاد تانيين
    أوعى تسيبى مدونتك أو تقفليها علشان أى حد
    ولأن بكل بساطة دى مدونة والمدونة شىء شخصى يخص صاحبها يعنى كل واحد حر يكتب اللى يريحه

    ReplyDelete
  6. ربنا يصبرك و تقابليه ف الجنة ان شاء الله
    :)

    ReplyDelete
  7. ربنا معاكي ...
    وإللي حصل ده حصل لناس كتير قبل كده وربنا صبرهم
    بس نصيحة بسيطة : حاولي تخرجي الهاجس الديني من دماغك
    ماينفعش حياة بدون دين طبعاً
    بس لو بدأتي تبصي للأمور علي واقعها حيناً
    وفي صلواتك حسب ما تريدين التعبير به لربك سيكون أفضل
    أرجوا أن تفهمي كلامي

    ReplyDelete
  8. ضحكت ..بكت ..ثم أقبلت تبتسم..قلت لعلها "إنسانة"..بالمناسبة المدونة دى حسيت ان هى ليها اسلاك موصولة جوانا علشان كدة مش بنعرف نقول غير اللى جوانا ...
    صدقينى ...اسم مدونتك متوافق جداً مع حروفك .
    ربنا يكرمك ويعفو عنك ويرزقك الجنة ويرحم ابنك والحمد لله على كل حال (ان مع العسر يسرا)...
    تحياتى

    ReplyDelete
  9. ربنا يصبرك ويكرمك خير ان شاء الله

    ReplyDelete
  10. ربنا يصبرك يا إنسانه
    ثقي ان ربنا كاتب اللي فيه الخير
    ده قضاء ربنا, لو كان ربنا عايز غير كده كان ممكن حد يقابلك في الشارع و يقولك انه يعرف حد عنده سكر الخمل و يلفت نظرك
    يعني مش اهمال الطبيب (الذي لا ننكره) هو السبب

    اما صاحب التعليق فانتي حرة فيما تكتبين كئيب او متفائل و اللي مش عاجبه ميقراش
    :)

    اسعد الله ايامك و ثبتك

    ReplyDelete
  11. انا شخصيا سعيدة بأن أكون اول من يقرأ كلماتك الحزينة يوميا لأنها أكبر دليل على انك سوف تتعافين تدريجيا من الحزن الذي داخلك لن تنسي ولكن سوف تتعايشين مع فقدانك واتمنى لا انا متأكدة بأن ربنا سوف يعوضك و تذكري ان لكل شيء سبب وكل شيء قضاء و قدر و نصيحتي الوحيدة لك تذكري كل المشاعر السعيدة التي كنتي تحسين بها وهو داخلك ..تذكري كل الفرحة التي لم تسع الدنيا عندما سمعتي هذا الخبر من الدكتور وحاولي تذكر كل هذه اللحظات و تقديمها لإبنك ، ونحن على استعداد لمساعدتك بأفكار ممتازة نذكر فيها ابنك الله يرحمه ، اذا عندك صور له بالسونار أو أي فكرة يمكن نخلد فيها ذكرى سعيدة له ، اتمنى ان تنال الفكرة رضاك وانا على استعداد للمساعدة..لأنني فقدت عزيز من قبل وتمنيت بعد فترة طووويلة من العذاب ان نصحني احد بهذه النصيحة مبكرا

    ReplyDelete
  12. انسانة
    صاحب التعليق دا ربنا كافف بصيرته
    و قلبه
    و معرفش يقرى البوستات كويس
    و لا يشوفها صح
    احنا معاكى رغم أى حزن
    مش عاوز يقرى
    ميدخلش تانى
    محدش بيسحبه من ايده
    و يجيبه غصب عنه
    يتكلمش بلساننا بمناسبة إيه؟؟؟
    و ليه يوصلك للحالة دى
    انتى مش ناقصاه أصله
    و حزنك مبرر و جدااااا
    و كلنا مقدرين دا جداااا
    وعيشيه لأقصى درجة
    و متشيليش هم حد
    احنا اللى لمفروض نشيل معاكى همك
    ربنا يقويكى و يعوضك خير
    و نصيحتك دى ناقوس خطر
    و جزاك الله خيراً إنك بتنبهى
    و سامحينى لو مش عارفة أقولك حاجة
    أطبطب بيها عليكى
    بس بدعيلك من قلبى
    ربنا يصلحلك الاحوال و يطيب جرحك
    يا رب

    ReplyDelete
  13. قدر الله وماشاء فعل
    بالنسبة للى سابلك التعليق ده
    انا لو منك اسيبنى منه
    اللى عايز يقرا يقرا
    اللى مش عايز يتفضل

    الناس هنا بيحبوكى وهيستحملوكى ياستى
    متاخديش فى بالك وكويس انك فتحتى المدونة تانى

    ربنا يصبرك ويصلح احوالك ان شاء الله

    اخوكى الصغنن فولتاا

    ReplyDelete
  14. البقاء للة اولا

    واخدة بالك

    البقاء للة وحدة
    فكري في دي بالراحة كدا

    مكتئبة وحزينة طبيعي فالامتحان صعب

    بس اصبري شوية

    واكيد سمعتي من الاحاديث ما يصبر قلبك ولو قليلا

    بس هقول لك حاجة واحدة

    أكثر الناس ابتلاء كان مين؟

    بالذات في فقد ابناءة

    سيدنا محمد علية الصلاة والسلام




    وبعدين كل الابتلاء يدور في انصبر ام نكفر

    انتي بتقولي صابرة


    الحقيقة لأ


    لان الصبر يعني تسليم الامر للة

    شدي حيلك وهاتي عيلين تلاتة تسعة

    والحياة بيد خالقها

    بتنتهي بارادتة وتبدا بارادتة

    حتى لو مش عاجبنا
    فحضرتك ربنا اختارك للبلاء العظيم دا لسبب يعلمة سبحانة وتعالى




    حكاية الدكتور المهمل

    فليها وجهين الاول تعددت الاسباب والموت واحد

    الثاني الاهمال المستشري في كل حياتنا

    ReplyDelete
  15. ربنا يصبرك ويعوضك خير يا رب
    قولي الحمد لله على كل شىء لعله خير من ربنا
    شوفي انتي كنتي متابعه الحمل ومع ذلك ربنا أراد تقعي تحت ايد الدكتور ده
    وانا ستات بيجولي ببقى هبوس اديهم يتابعوا الحمل وفيه منهم مبتروحش لدكتور الا وهي بتولد
    كل شىء وليه سبب
    انتي اخدتي بالاسباب وعملتي الي عليكي
    بس ده قضاء ربنا
    يبقى اكيد خير
    سلمليلي على كيميكاز الي كنت هموت واعرف مين ده ومفكراه اخوكي الصغنن

    ReplyDelete
  16. انسانة
    بصى انا لسه مضحكتنيش و لا نكدتى عليا :-) لسه زبونة طازة، اصل فطوم حيص بيص هى الى زقنا عليكى

    بس عندى كلمتين من نفسى
    انا بدات برضة اكتب فى المدونة و بعتبرها صفحة اكتب فيها الى على مزاجى مش على مزاج الناس
    كفاية باك اشرب و البس و اتكلم على مزاجهم ، التدوين كمان
    قولى الجواكى و التعليقات ده انشاء الله تبطل تهوب عندك
    اكتبى
    و لو حزينة بشاركك و نحاول نزغزغك و لو مفسوطة و احنا المتنكدين يبقى كسبتى فينا ثواب :-))

    ثانيا انا مش دكتورة بشرى بس صيدلانية و تعاملت مع الدكترة صغيرين و كبار و مشاهير
    بصراحة و منغير زعل المتعلم طب على حق منهم قليل اصل ده علم كبيييييرررر و صعب و الله يكون فى عون الى بيحبه و دماغه مش جايب يستوعب كل حاجة فى وقت واحد لعلمك الدكتروة الصغيرين بتعلموا من الكبار بس الدنيا دلوقتى تلاهى و الكبير مش فاضى الا لوحد او اثنين و الصغير الدنيا واخداه و مابيركز الا فى قشور
    و لعلمك الكبار و المشاهير كمان مش كلهم كبار على حق و فيهم القشرة و فيهم الذهب الاصلى

    حتقوليلى اخر الصداع ده
    اقولك روحى لنقابة الاطباء و قابلى مسئول و احكيله و شوفى موضوع شكوى سوء التشخيص

    عارفة ان ممكن ميعرفش الصغير موضوع سكر الهيموجلوبين ده بس لازم يتقرص علشان يلحق الستات و الاطفال الثانين
    و فى نفس الوقت اديك وعيتى الى ممكن تحمل بعدك تركز فى التحليل ده و هى الى تسال الدكتور عنها

    انا عارفة لو انا دكتورة محبش حد يشتكينى كففاية ضميرى الى حيفضل يوجعنى ، بس كفايانى انا سلبية الحق حق و الثواب ثواب و العقاب عقاب

    و انتى انسانة و احنا ناس و بنتونس ببعض :-)
    و كل ما تحزنى افتكرى انه فى احتمال كبير تتقابل انتى و طفلك فى الاخرة :-) مهما الدنيا خذتك هو حيكون مستنيكى

    ReplyDelete
  17. بداية الحمد لله على سلامتك وربا يصبرك وابنك لو صبرتي وأحتسبتيه عند الله حيأخد بيدك ويدخلك الجنة ان شاء الله فقولي دائما لله ما أعطى ولله ماأخذ وانا لله وانا اليه راجعون

    ReplyDelete
  18. ربنا يصبرك ويرضيك
    ويرزقك الذرية الصالحة
    ويفرحك بيهم
    ويجعل الامك واحزانك فى ميزان حسناتك
    مدونتك جميلة جدا على فكرة
    انا متابعاها من فترة
    من ايام مشكلة هبة نجيب
    وشدتنى جدا
    المدونة دى برغم ظروف نشرها
    لكن هى شى ء شخصى جدا
    اكتبى ياحبيبتى
    وفضفضى
    ربنا يوفقك

    ReplyDelete
  19. ربنا يقويكي
    بصي هوه اكيد انا جوايا رغي كتير
    بس مش عارفة اقوله صراحة
    فربنا يهون عليكي ي رب

    ويسعد قلبك
    وايامك من جديد

    سلامٌ عليكِ

    ReplyDelete
  20. ربنا يصبر قلبك
    ربنا يزيح عنك اي حزن
    كلامك لانه حقيقي اوي وصل للقلب اوي
    وحسيته جدا
    بتمنى ربنا يقدرك على الخروج من دائرة الحزن ويلهمك الصبر... ويعوضك خير ان شاء الله
    تحياتي
    تقبلي مروري

    ReplyDelete
  21. اللهم آمين يارب

    ربنا هيكرمك ان شاء الله وتتحسن كل احوالك

    في امان الله

    ReplyDelete
  22. ربنا يصبرك يارب

    ويعوضك خير ان شاء الله قريبا

    عارفه كويس اوى ان مهما قلنا بردو مش هانعرف نشيل الالم من جواكى ومقدرة كويس اوى شعورك لانى مريت بيه لما فقدت توأم في الشهر الخامس بسسب انى سخنت فجأة
    وكان اول حمل ليا وكنت فرحانة اوى بيه وعارفه كويس اوى انتى حاسه بايه

    لكن ابنك ان شاء الله ملاك في الجنة

    وربنا هايعوضك زى ما عوضنى ببناتى باذن الله

    واكتبي براحتك وبالطريقة اللى تعجبك وحقك علينا اننا نسمعك

    وربنا معاكى يارب ويحقق لك كل ما تتمنيه وتعدى المرحلة دى على خير ان شاء الله

    ReplyDelete
  23. انا اول مرة ادخل هنا بس لانك انسانة سمحت لنفسي اني اعلق

    انا ام عندي طفلين والحمد لله وفقدت جنين في الشهر الثاني من الحمل انا لا شفته ولا عرفته بس كان جوايا وحزنت كتير واكتئبت

    انتي من حققك تحزني وتبكي من حقك هو كمان الحزن عايز تصريح

    ابكي واشكي لربنا وخدي وقتك واكتبي زي ما انتي عاوزة امال انشاء الله احنا بني ادمين ازاي؟؟؟
    بس برضه ارجعع واقول ربنا كرمني بابني التاني وربنا هيكرمك لصبرك ده

    ماتخافيش هو الرسول مش بكى على ابنه وقال القلب يحزن والعين تدمع وهو الرسول والنبي والانسان طيب بقى ده البكا والحزن ده من الانسانية

    ده اصعب وانبل حزن هو حزن الام على ابنها

    هو حزنك ماله ومال المصايب اللي حواليكي لا انتي السبب فيها ولا المك هيخفف الم غيرك

    ابكي واحزني بس ادعي ربنا يصبرك ويعوضك خير واحمديه ربما لو كان عاش كان هيبقى مريض او تتعودي عليه وتحبيه وفجاة يروح

    واحتسبي عند الله
    والله العظيم ربنا هيعوضك
    ساذكرك في صلواتي
    تقبلي مروري

    ReplyDelete
  24. الحياة مليئة بالفاجآت يا إنسانة .. فلا تيئسي منها أو تستلمي أبدا

    ReplyDelete
  25. اول مرة اجى المدونة بس بجد ربنا يصبرك ويرزقك باذن الله الذرية الصالحة ويعوضك عنه باذن الله
    سعيدة جدا لقراءة كلماتك لانها من القلب جدا ووصلت للقلب بسرعة على فكرة انا دايما بكتب عن ضيقى وحزنى واكتئابى بس بجد انا اللى بحس بيه ميجيش اى حاجة قدام حزن الناس
    المدونة دى انتى والمكان اللى بترتاحى فيه اكتبى براحتك وزى ما تحبى واكيد محدش مضايق من كلامك واللى يضايق يبقى ميدخلش يقرا لكن مش من حقه يحجر على احاسيسك ومشاعرك
    ربنا يصبرك دايما يارب وسعيدة انى عرفت مدونتك

    ReplyDelete
  26. ربنا يصبرك
    ويكرمك ان شاء الله
    على فكرة اختى توفى منها طفلين بنفس السبب لانها مش متابعة مع دكتور ولما حدثت حالة الوفاة عرضناها على دكتور سكر واتعالجت والحمد لله جابت مولود جديد وسمته خالد كماان
    بعد ما توفى منها مولودين كاملين النمو ولحد قبل الولادة كانوا كويسيين جدا
    بس الحمد لله على كل حال ربنا عوض صبرها خير
    عقبالك انتى كمان
    تحياتى
    خالد

    ReplyDelete
  27. ربنا يا رب يلهمك الصبر والسلوان ... وإن شاء الله تبقى آخر الأحزان

    ReplyDelete
  28. ربنا يصبر قلبك,,,

    عاوزه اقولك حاجه,اولا قدر الله وماشاء فعل....

    ثانيا: ربنا كاتب ان البيبى ده مش هيعيش,
    احمدى ربنا ان ربنا كان رحيم بيكى واسترد
    امانته وانتى لسه مشوفتهوش,
    ربنا كان رحيم بيكى اوى بدل مكان يديهولك وتشوفيه وتسمعى عياطه وتضميه وتتعلقى بيه...

    صدقينى قضاء ربنا فيه رحمه كبيره اوى,
    وكان ممكن يجى تعبان وتشوفيه بيموت ادامك فى الثانيه مليون مره..

    وان شاء الله ربنا هيعوضك,,,,

    واكتبى اللى انت عاوزاه دى مدونتك وانتى حره فيها

    ReplyDelete
  29. السلام عليكم
    حبيبتى
    ممكن موش اقدر اوصلك انا حاسه بيكى اد ايه وكمان موش ممكن تتخيلى انى بجد عارفه كل مشاعرك اللى بتمرى بيها دلوقتى
    بس اللى اقدر اقولهولك ربنا يقويكى يارب ياحبيبتى ويجعلها اخر الاحزان يارب

    ReplyDelete
  30. ان شاء الله خير وياخد بايدك إلى الجنة

    فى الأول وفى الأخر دى مدونتك تضحكى تعيطى تصوتى حاجة تخصك محدش ليه انه يقولك تكتبى ايه ومتكتبيش ايه معجبوش المدونة يقدر يقفلها بسهولة

    ReplyDelete
  31. ربنا يصبرك ويعوض عليكِ
    حاسة بيكِ جدا فقد فقدت ابنتى ايضا ولذلك عارفة ان مفيش كلام ممكن يخفف عليكِ أو يهون اللى أنتِ فيه
    بس مش عايزاكِ تنسى الدعاء" إنا لله وإنا إليه راجعون اللهم أجرنى فى مصيبتى واخلفنى خيرا منها"
    وستدخلين الجنة من باب الحمد بإذن الله
    انظرى للجانب المشرق فزوجك معك وبإذن الله تقدرى تجيبى طفل واتنين وتلاتة كمان:)

    ReplyDelete
  32. اللهم أمين يارب

    دي أول مرة أزورك ، بس مش حاسة بجد انك في السن ده ، حاسة إنك أكبر بكتير ، بس هيا كده الأيام وتجاربها ، علشان تعلمنا ، لازم تعلم فينا

    وكلنا كده ،، ولعله خير

    تحياتي

    ReplyDelete
  33. البقاء لله وحده


    وربنا يكرمك يارب عاجلا بطفل امرو يكون قره عين لكى ولاولادك

    وافتكرى ان اننا بايدنا نرضى ونقول دايما اليس الله باحكم الحاكمين


    سبحانه دايما ليه حكمه احنامش فاهمنها بفهمنا القاصر


    لكن له حكمه سبحانه

    ربنا يصبرك ويسعدك ويكرمك باطفال كتيييييير يارب

    ReplyDelete
  34. بصراحة اول مرة ادخل على مدونتك ودة اول بوست اقرئة ليكى
    كانة تلخيص لحياتك كلها

    مش عارفة اقوللك اية اقوللك ربنا معاكى ربنا يصبرك الكلام العادى اللى بيتقال دة ولا اقوللك اية

    مش عوزة اقوللك حاجة عادية حاجة ولا حاجة كدة والسلام لانى بجد قريت البوست وحسيت بية اوى

    هية ايام وهتعدى وتيجى ايام احسن منها بكتير شدى حيللك وتماسكى دلوقتى ازعلى اسرحى عيطى صرخى طلعى حزنك عيشى فترة حزنك خدى وقت فى الحزن طلعية من قلبك
    وان شاله بعد كدة هترتاحى وتصفى الدنيا بعد كدة



    ملحوظة انتى قولتى انك قفلتى المدونة عشان تعليق واحد قللك اية الكائبة دى كلها حرام عليكى

    بصى يابنت الحلال دى مدونتك اكتبى فيها كل حاجة اكتبى اللى يعجبك مدونتك انتى اكتبى فيها اللى يريحك مش اللى يريح الناس الواحد بيكتب عشان يفضفض
    مع حبى ياانسانة

    ربنا يسعدك يارب ويشرح صدرك

    ReplyDelete
  35. امين يا رب
    حمدلله على سلامتك
    انا حاسه بيكى اوى بجد الضنا غالى
    بس الحمد لله انتى احسن من غيرك كتير شالوا ولادهم وربوهم و كبروا و كلموهم و تعبوا منهم و محدش نجدهم علشان برضو نفس صنف الدكتور ده معرفش الولد عنده ايه
    احمدى ربنا انك ملحقتيش تتواصلى معاه اكتر كانت هتبقى صعبه اوى اوى
    ربنا ما يحكم علينا بيها يا رب
    ربنا يعوض عليكى و تجيبى دسته تخلى حياتك كلها فرح و سرور

    ReplyDelete
  36. كل سنه ومدونتك بخير وحضرتك بخير
    انا المجهول صاحب التعليق
    وانا متابع حضرتك
    ولاحظت ان كل بوستات حضرتك شكوى
    دورت على بوست لجوازك زى ما بتقول فلم اجد
    زى ما بتشاركى الناس احزانك شاركيهم فى افراحك
    اشعر ان حضرتك تريدين استثارة عطف الاخرين
    و بعدين هو اى مدون يجيلة تعليق مش على هواها يقوم يقفل مدونته
    هو المفروض كل الناس تطبطب عليكى
    انا بقى مش حابب شكوتك المستمرة دى
    دة الرسول قال اذا بليتم فاستتروا
    ادعى ربنا يصبرك
    اقولك كلمة بصراحه انا لما ادخل مدونتك اكون عاوز اقرأ بوست من بوستاتك الممتعة وليس المضحكة ااقصد مواضيعك الجادة اللى اتكلمتى فيها عن السياسة ومواضعيك الاجتماعية
    ممكن لما تندمجى فى مشاكل الاخرين يمكن وقتها ربنا يخف عنك احزانك
    وارجوك بلاش نبرة الاكتئاب واليأس دى
    بلييييييييييز
    وبعدين انا متابعك على الفيس بوك
    انت لطيفة هناك وبتقولى كلام حلو
    اشمعنا هنا ولا هو الانسان ممكن يكون بكذا مود فى وقت واحد
    تحياتى لحضرتك

    ReplyDelete
  37. قال واحد صاحي الصبح مقبل على الحياة قال
    الناس نوعان
    نوع بيصحى الصبح مكتئب جاهز
    ونوع مابيصحاش الصبح أصلاً

    ReplyDelete
  38. مش عارف اعزيك ولا اهنأك
    معنى فقدان لطفلك أن هناك من سيشفع لك فى أخراك

    =============
    لكن الحياه بتأخذ منا وتعطينا وعلى قدر صبرنا يكون الجزاء
    دوما يحضرنى هذه الاية فى مثل هذه المواقف

    آبَآؤُكُمْ وَأَبناؤُكُمْ لاَ تَدْرُونَ أَيُّهُمْ أَقْرَبُ لَكُمْ نَفْعاً

    وايضا
    فخشينا ان يرهقهما طغيانا وكفرا

    احمدى الله من كل قلبك

    بارك الله فيكم
    وثبتك

    ReplyDelete
  39. اسأل الله ان يكون لكي ولزوجك شفيعاً لكما

    ReplyDelete
  40. السلام عليكم

    بسم الله الرحمن الرحيم

    ( والذين إذا أصابتهم مصيبة قالوا إنا لله وإنا إليه راجعون )

    صدق الله العظيم

    أول مره أشوف مدونة حضرتك وأحب أقول لك
    متشغليش بالك بالتعليق اللي ضايقك
    كل واحد بيدخل يتكلم بينظر للأمور من وجهة نظره
    ومش بيراعي الحاله اللي فيها صاحب المدونه
    وكان من الأفضل الأخ اللي قال كده يواسي حضرتك ولو بكلمة عزاء بدل النصائح التي لا داعي لها

    ربنا يصبرك

    بس أنا أختلف مع حضرتك في موضوع إن الناس ملهاش ذنب تصحي الصبح من النوم علي موودك الحزين

    المدونات هي أصلها المشاركه وإننا كلنا ( المدونين ) نكون أصدقاء في القلم

    نكتب ونسمع من بعضنا البعض
    واللي مش فاهم كده مش ده ذنبنا

    أسف إذا كنت إتكلمت كتيير

    تقبلي مروري

    ReplyDelete
  41. بصى ياقمر
    الاول صلى على النبى
    عليه الصلاة والسلام
    مفيش حاجه بايدنا نعملها
    واما انتى تكونى زعلانه واحنا نقرالك ده لان ربنا عايز كده وعايزنا نقف جمبك ف محنتك عشان مسيرنا هنحتاج وقفتك جمبنا
    متزعليش من التعليق ده هو مكانش قصده اكيد
    هو تلاقى صاحبه كان مخنوق وجه كمل عليكى بس والله مش قصده رغم انى معرفهوش
    بالنسبه لابنك انا صح متجوزتش لسه بس عارفه يعنى ايه احساس الامومه
    عارفه عرفته ازاى؟؟
    مش هقولك ولاد اخواتى ال16
    ولا هقولك انى ربيت منهم كتير زى ولادى رغم انى ادك ف السن
    هقولك بس انى مدرسة حضانه
    يعنى عندى 200ولد
    بحبهم زى عنيا
    وحافظاهم اسم اسم
    ولو تعب واحد منهم بقعد ابكى جمبه
    وبحس انى امه
    واما بيغيب حد بسال عنه وبقلق عليه
    وعارفه ازاى انك تحبى حد اوى
    الله يعينك والله
    انا بحمد ربنا انك متماسكه شويه وشدى حيلك يا حبيبتى وانا معاكى ان الاهمال ف مصر شديد جدا وده اللى بحاول اوضحه ف مدونتى
    واوعدك انى هبقا اكتب عن موضوعك ده
    وربنا يسمعنا عنك كل خير ويعوضك عنه ان شاء الله

    ReplyDelete
  42. ربنا ياسعدك
    كل ما الانسان بيكبر بيفهم اكتر ويحس بالحياة اكتر
    ويمر بتجارب اكتر ايام بتكون سعيدة وايام حزينه
    لكن كله بيعدى
    عقبال السنه الخمسين للمدونه
    ربنا يوفقك

    ReplyDelete
  43. مش مهم
    يمكن الكلمة دي تحسي إنها مش في وقتها ، لكن إسمحي لي أقول لك إنه بجد مش مهم ، اكيد طبعا مش بأقصد الجنين ، لأن الجنين إنسان و الإنسان مافيش أهم منه ، بالذات لما يكون ضنا ، لكن إللي مش مهم هو الحزن ، ولا الغضب من الدكتور المهمل ، المهم بجد إنك تفكري حاتعملي إيه في اللي جاي
    شوفي بقى يا ستي ، ما أخطأك لم يكن ليصيبك ، يبقى إللي حصل حصل ، إبكي و عيطي و إقلبي الدنيا ، بس بعد كده إرجعي إعدليها تاني ورتبيها و إمسحي دموعك و فكري دايما إن ده الخير
    ربنا مش بيعمل غير الخير
    ولا بيكتب علينا غير الخير
    ولا بيرتب لنا غير الخير
    حتى لو إحنا بعقلنا العبيط حسينا إننا خسرنا بنكون بنكسب كتير بس منغير ما ناخد بالنا
    الشيخ الشعراوي كان بيقول في دعاء
    يارب يا من تصلح الدعاء بعدم الإستجابة للدعاء لا تكلني إلى نفسي طرفة عين
    فكري في إللي جاي
    وإعرفي إنك مسؤولة أمام الله و زوجك وعائلتك وأصحابك و إحنا كمان
    مسؤولة بأيه ؟
    مسؤولة بإنك تعلمينا حاجة جديدة
    تفهمينا معلومة
    توجهي تفكيرنا بشكل معين مثلا
    تلفتي نظرنا لحاجة مهمة
    كلنا كده ، مسؤولين أمام بعضنا ، هي دي عظمة التفاعل الإنساني و الترابط الفكري و التواصل المستمر من خلال الشاشات إللي قاعدين قدامها ليل و نهار دي نخبط على الكيبووردات
    إننا نفيد بعض و نخفف عن بعض و نوجه بعض و ننصح بعض و ننقد بعض
    رغم إننا في أرض الواقع يمكن مانعرفش بعض ولا حانعرف بعض ، بس الأحساس بإن إللي بنقوله لبعض متشاف و مسموع من مليون إنسان غيرنا بيجبرنا إننا مانقولش غير إللي بنشوفه صح و مفيد
    آسف على إني طولت عليكي
    لكن تقبلي تعازيا و خالص إحترامي و تقديري
    KING TOOOT

    ReplyDelete
  44. امين يا حبيبتى و ربنا يعوضك خير ان شاء الله و يبدلك فى مصيتك خيرا منها ،، انتى فعلا انسانه جميله اول مره ازور مدونتك بس بجد حبيتك اوى

    ReplyDelete
  45. سلام عليكم ،،

    أول مرة أزور المدونة دي .. مدونة رائعه من شخصيه أروع نحسبك علي ذلك ان شاء الله

    ربنا يكرمك ويوفقك في حياتك ويزيل عنك كل الهموم ويجمعك به في الاخره امين

    تقبلي مروري :)

    ReplyDelete
  46. حبيبتى ,,
    مش عارفة اقولك ايه بس انا حاسة والله بصبرك من خلال كلماتك
    وفقد الولد شئ مش هين
    الرسول بكى لفقد ابنه
    ومشاعرك ده لا يلومك عليه احد لانك ام ولو كان شعورك مختلف كان هايبقى هو ده اللى مش طبيعى ..
    الحمد لله رب العالمين انك حملتى وده معناه انك هاتحملى تانى ان شاء الله وتجيبى اولاد حلويين جمال
    وفوق ده كله كمان هاتدخلى الجنة ان شاء الله بولدك ده
    ..

    ان حد يستنقد ما انتى فيه شئ غريب ..
    نفسى نتعلم احترام شعور الاخرين
    وان كان اعظم ابتلاءاتهم دخول فار فى الشقة ..

    ReplyDelete
  47. اول مرة ادخل مدونتك

    البقاء لله في طفلك يا حبيبتي ومن حقك تزعلي وتحزني واحتسبيه عند ربنا سبحانه وتعالى وان شاء الله ثوابك كبير جدا عند ربنا واللي يصبرك شوية ان ابنك دلوقتي في الجنة ويوم القيامة هياخد بإيدك للجنه

    بالنسبة للمود دي مدونتك اكتبي فيها براحتك
    اللي عايز يقرأ يقرأ واللي مش عايز ميقرأش ناس غريبه

    ReplyDelete
  48. ابنتى الحبيبة الغالية
    اول مرة اعرف الطريق الى مدونتك
    واقولك انتى فعلا انسانة بكل ماتحمل الكلمة
    اكتبى وقولى مافى نفسك ياحبيبتى
    فما مريتى به ليس بالامر السهل
    وقد جعلنا الله لبعضنا رحمة ولقد مرت عليا ظروف مرض شديدة لازلت اعانى منها لم يخففها عنى غير كلمات ودعوات اولادى واخواتى من المدونين
    استعينى بالصبر والصلاة فى ابتلاءك حبيبتى
    واعلمى ان قطعة منك قد سبقتك الى الجنة
    واطلب من الله الا يحملك مالا طاقة لكى به
    تحياتى

    ReplyDelete
  49. آمين يارب العالمين

    ربنا يصبرك يا حبيبتى يارب وتخرجى من المحنة دى سريعا ويعوضك عن صبرك خير
    بالنسبة للتعليق
    مدونتك ملكك ومساحتك الخاصة .. اكتبى فيها كل اللى عايزة تقوليه .. صبى فيها كل احزانك لتنفسى عنها وتعودى لحياتك من جديد مشرقة .. ان شاء الله الحزن ينقضى سريعا ليس استخفافا بالحدث ولكن قوة ايمان وصبر ورضا وسكينة يمنحهما لنا الله فى هذه الاوقات العصيبة لتقوينا وتجدد حياتنا

    ربنا معاكى يا ياسمين
    دعواتى ليكى بالرضا والصبر والعوض

    ReplyDelete
  50. اول حاجه ربنا يصبرك انا كنت متابع مدونتك من زمان يمكن اخر حاجه فاكرها البطاله بس انقطعت فتره كبيره عن متابعه المدونات ودلوقتي لما اشوف مدونتك الاقي الحزن ده انتي فعلا انسانه وكل انسان بيعكس الي جواه والي عاوز يتفاعل مع الانسان بيختار عاوز حد يضحك بس ولا عاوز يشوف انسان في كل حالاته احكي عن كل الي عاوزاه نكد او ضحك المهم يكون طالع من قلبك اننا بشر و ده طبع البشر


    تحياتي

    ReplyDelete
  51. ربنا يصبرك يارب ويعوضك خير عن مولودك اللهم امين
    بجد احنا حاسين بيكى اوى ربنا معاكى يارب وعلى فكرة المدونة دى مكان بنحاول نفضفض فيه عن نفسنا وعن كل اللى بيحصلنا ومن حق كل واحد فينا انه يكتب ما يشاء وما يحلو له
    اكتبى واكتبى كل اللى بتحسى بيه وخرجى كل اللى جواكى يمكن يكون مريح ليكى ده سواء ان حد رضى عن ما تكتبينه او لا
    تحياتى لكى وربنا يصبرك
    شفقة

    ReplyDelete
  52. الهم امين يارب
    ربنا يصبر قلبك يارب ويعوضك بطفل خير منه
    وحاله الحزن الى انتى فيها امر طبيعى جدا لاى انسان عادىمن لحم ودم فلا تلومى نفسك كثيرا
    ربنا يكرمك ويسعدك يارب ويفرحك بابن ليكى قريب جدا

    ReplyDelete
  53. ana yemken bagy hena 3altol w matb3a mn ayam el kemkaz fe3lan w 3arfa enk lesa ensana 7lewa awiii
    asbory w ahtsby ana momken mkonsh 7asa bely enty 7asa ebh bes bshof daymen odamy en wag3 el ebn mafesh zayo wag3 w hwa 7eta menk bes ely 3wza a2olo en ely enty 7azena l fora2o da hwa ely hyshd b2eedk l el gana isa w hykon 2orat 3enk f el 2a5ra isa
    be7bk mn badery w yemkn ma3rfesh 3'er fadfdetk atwkely 3la allah w ensy hmomk

    ReplyDelete
  54. يااااااسمين
    معلش انا قريت التعليقات
    و منها طبعااا تعليق
    الأخ المجهول برضو
    ---------------
    عاوزة بس أرد عليك
    يعنى اولا
    جزاك الله خيراً على رأيك
    بس فيه حاجة فى تعليقك مهمة
    و لازم اعلق عليها
    الرسول عليه الصلاة و السلام قال
    إذا بليتم فأستتروا
    مش إذا أصابكم مصيبة.. فإستتروا؟!!!
    فيه فرق رهيب بين انك تعمل بلوة
    و المفروش تتدارى
    و إنك تصاب بالبلاء ...و وقتها إسمحلى
    تتدارى من إيه مش فاهمة
    هوه انت عامل عملة؟؟؟
    انا مليش فى الفيس بوك الصراحة
    بس افترض دايما إنه مش فى حميمية المدونات
    و بعدين ياسمين حرة
    تختار المكان اللى يناسبها
    لبث حزنها و شكواها ...
    ليه بتفترض حضرتك انك
    وصى على افكارها و أسلوبها
    ليه ؟...بمناسبة إيه؟؟؟
    عموماً رأيك يحترم
    لكنه للأسف من قسوته
    ينطبق عليه الجملة
    التى نتشارك فيها انا و ياسمين
    بكل حب عن غير قصد
    و بنكتبها فوق صندوق التعليقات
    للجميل عبدالرحمن الشرقاوى
    الكلمة نور ....
    و بعض الكلمات قبور
    و للأسف تعليق حضرتك و إسمحلى
    ينطبق عليها الشطر التانى من الجملة
    -----------
    طمنينا عليكى يا ياسمينا
    احنا فى إنتظارك يا حبيبتى
    و خدى وقتك بما يكفى
    و اكتبى
    إكتبى
    إكتبى
    لحد ما الحزن ينقسم علينا كلنا
    و يتفتت و يتلاشى ..إن شاء الله

    ReplyDelete
  55. الحمد لله على كل حال وقدر الله وما شاء فعل

    والمهم دلوقت انك رجعتي المدونة بعد ما اتمسحت

    والأهم زي ما قلتلك قبل كده .. ان كاميكاز يرجع والضحكة ترجع ترن هنا من تاني

    ReplyDelete
  56. اللهم إني لا أسألك رد القضاء ولكني أسألك اللطف فيه .

    هنا فضائك ، كل شيء هو ملك لك ، كل كلمة وكل حرف ، هو ملكيتك تكتبيه من أجلك قبل أن يكون من أجل أي قارىء أو متصفح أو زائر أو حتى صديق .

    عليك بالإقتراب أكثر من زوجك ، وأنت لا تزالين في مقتبل العمر وهذه الحالة أمر طبيعي ، أنصحك اخيرا بقراءة القليل في علم النفس ليمكنك تحليل كل شيء بسهولة من حولك ، وأتمنى لك كل التوفيق .

    ReplyDelete
  57. الاسامى هى هى والقلوب اتغيرت
    جرح ورا جرح
    ونسيان ورا نسيان
    واستحمل يا قلبى

    ReplyDelete
  58. انا اول مرة اشوف المدونة بتاعتك

    ربنا يصبرك

    بس فكري في الجانب الكويس من اللي بيحصل

    يعني كان ممكن الطفل يتولد و يكون عنده لا قدر الله مرض و يتوفى بعد وقت تكوني اكتر تعلقا به

    الاعمار بيد الله ..... و كتير قضاء الله بيكون في رحمة من احداث تانية ممكن تكون اشد

    و ان شاء الله ربنا يعوضك عنه كل خير

    ReplyDelete
  59. انا جيت امبارح وعلقت هنا بس واضح ان الكمبيوتر هنج عندي وضاع كلامي

    المهم

    عايز اقولك حاجة

    بالرغم من ان التواصل بينا كمدونين مش نشط اوووي

    يعني بكون هنا على فترات

    إنما ده مش راجع غير لأزمة الوقت مش اكتر

    إنما كل ما تسمح الظروف بكون موجود عندك لمتابعة جديدك

    وده لأن مدونتك جديرة بالاحترام والتقدير

    وعلشان كده مهما طالت مدة الغياب إلا أني حريص على متابعتك

    وللأسباب دي ياريت تفضلي موجودة وتكتبي اي حاجة سواء مبهجة أو حزينة مش مهم المهم القيمة

    لأني مش مفروض أجي اقرا نكت هنا علشان اضحك

    وأخيرا

    إن شاء الله ربنا يحقق لك كل أحلامك وأمانيكي

    وربنا يوفقك للخير دايماً

    وعايز اقولك حاجة أخيرة

    افتكري الجزء اللي في سورة الكهف

    بتاع الولد اللي خشى الخضر أن يرهق أبويه الصالحين

    وأراد الله أن يبدلهما خيراً منه



    صديق مدونتك
    وليد

    ReplyDelete
  60. مش عارف أقولك إيه ..ربنا يصبرك ويديكي القوة بس أنتي بجد إنسانة روحها جميلة أوي
    تحياتي وتمنياتي بالسعادة

    ReplyDelete
  61. دي احلى مدونة دخلتها ف حياتي التدوينية على الإطلاق .. ومهما غبت ومها هيا او صاحبتها غابوا عننا لازم برجع ازورها .. ودايما افتخر إني ليا فيها بصمة ف صورة ف بوست او هيدر .. أو حتى تعليق

    إنسانة
    حديث سمعته من الشيخ محمود المصري أول مرة اسمعه بس عجبني جدا
    أنقله كما قاله

    " بيقول ان يوم القيامة سيؤذن بين الناس إن من له عند الله دّيـن يتقدم للأمام، فيستغرب الناس جدا من النداء .. مين ده اللي مداين ربنا؟، فينادي المنادي مرة أخرى .. من ابتلاه الله بمصيبة في حياته الدنيا، فيتقدم أناس كثر، فتنادي الملائكة .. من ابتلاه الله بمصيبة ـ وصبر عليها ـ أولئك من لهم دّين عند الله. فاليوم سيجزيهم الله على صبرهم، فيرجع من الناس الكثير ويتبقى منهم قلة، هم من صبروا على بلاء الدنيا"

    فأبشري .. فإن الله لا تضيع ودائعه
    وأسأله سبحانه وتعالى أن يجعلنا من الصابرين
    :)

    ReplyDelete
  62. عزيزتي كلماتك مؤثرة لكن اود ان اوضح ان فكرة المدونة مختلفة عن الوقع الالكترونى فقى المدونة اكتبى ما تشعري به...فضفضى ولا يعنيكى ان كان ده ح ينكد على القارىء ام لا ....المدونة مكان نعبر فيه عن ما بداخلنا و مش مطالبين نمثل او نفرفش الناس....البقية فى حياتك فى ابن و ربنا يصبرك

    ReplyDelete
  63. السلام عليكم
    انا اول مره ازورك
    وربنا معاكى وبعدين احنا
    بنكتب على مزاجنا مش على مزاج غيرنا
    واللى مضايق ما يقرأ ماحدش اجبره
    على دخول المدونه اصلا
    ان شاء الله خير وابنك يوم القيامه
    هيدخلك الجنه بايديه
    ربنا يعوض عليكى خير
    اتمنى انك تزورينى
    تحياتى حنين

    ReplyDelete
  64. السلام عليكم..اختي العزيزة.. إنسانة..هذه اول زيارة لي لمدونتك..وأعذريني لقد أخطات..أخطأت يوم أغلقت مدونتك أستجابة لتعليق..أجعلي مدونتك ساحة للتعبير عن آلامك ومشاركتها مع الآخرين ولا تكتميها..ولا تستجيبي لأي شخص..أدعو الله أن يخلف عليكي كل خير في أبنك ويرزقك الذرية الصالحة..وتذكري أنه حتماً ستأتي لحظات فرح وسعادة..فلا تبخلي بها أيضاً فتلك حال الدنيا ننتظر المزيد من كلماتك مهما كان نوعها ودمت في طاعة الله

    ReplyDelete
  65. ربنا يصبرك يا رب و يعوضك خير انشاء الله
    و قولى ...
    إنا لله وانا اليه راجعون اللهم اجرني في مصيبتي واخلف لي خيرا منها
    و تذكرى الصحابية اللى كل اولادها الاربعة اتوفوا
    مش فاكرة اسمها الصراحة ..ربنا يعوضك يا انسانة بجد بجد بجد انسانة رقيقة جدا زى معرفتك من كتاباتك

    ReplyDelete

الكلمـة نـور .. وبعـض الكلمـات قبـور