Sunday, January 31, 2010

سوق الخضار الحضاري


آخر ما كنت اتوقع سماعه فى سوق الخضار هو اغنيتي المفضلة " سهر الليالي " لفيروز، حينما قام بغنائها بائع الطماطم " المعفصة " متباهياً بقدراته الصوتية الفاذة وبذوقه الفني العالي ، أفقت من صدمتي عليه يستعرض بأحباله الصوتية جميع الأغنيات الحديثة والجديدة فهو تارة يغني لمحمد فؤاد ثم " يلضم " اغنيته بأغنية أخرى لمغنية مجهولة المصدر ولا اعلم اسمها حتى الآن ، محاولأ التأكيد على انه يسمع القديم ولكنه يشجع الجيل الجديد ولا يقف ضد الحداثة

لم استغرب بعد قليل هذه الثقافة الموسيقية العريضة عند بائع الطماطم حيث يقع امامه محل دجاج تنبعث من داخله أصوات الأخت العزيزة إليسا مشغولة فى غناء ألبوها الجديد ، لم افكر فى الصدمة مرة أخرى ولكني حاولت إيجاد سبب مقنع لأستمتع بهذا الجو الثقافي المميز أطول فترة ممكنة فسألت بائع الدجاج عن الأسعار ووجدت انها أرخص من السوبر ماركت الكبير فقررت الشراء

للأسف لم يكن بائع الدجاج على نفس قدر الموقف الثقافي الخضاري الرائع إذ إنه لم يكن يلبس قفاذات ، فجأة تذكرت ان هناك مرض يسمى انفلوانزا الطيور - ربنا يشفيها منه يارب - وتقافزت فى ذهني كل الإعلانات الإرشادية للأخ الأستاذ شعبان عبد الرحيم والأخت انتصار محذرين فيها النساء من شراء الدجاج الطازج من البائعين ، تخيلت كيف سيكون رد فعل الدكتور حاتم الجبلي وزير الصحة لو علم بما ارتكبته كإنسانة مصرية غشيمة

هي زيارة ثقيلة على النفس على اى حال ولكن ماذا افعل كمواطنة عاطلة عن العمل؟ ، ثم اننى لا أدري لماذا يُصرون على وصف هذه الحالة بالبطالة وليس العطالة ، فأنا عاطلة عن العمل أينعم ولكني لست باطلة بأي حال من الأحوال فأنا مواطنة مصرية اتغذى على الخضار الملوث وأركب الميكروباص
نعم مصرية رغم اختلاف بشرتي عن بشرة أهالي القاهرة والأسكندرية وكل محافظات وجه بحري ، ولكني مازلت مصرية رغماً عن الجميع ورغم انف البلد نفسها ، حتى أننى متأكدة من انه إذا تم البحث فى سلالتي جيداً قد يحدث الإكتشاف العلمي الكبير ويجدوني حفيدة للبشمهندس الكبير " مينا " موحد القطرين شخصياً ، ولما لا واختى حنيما ترغب فى تدليعي دائما ما تناديني بـ"مينا" .. أليس هذا دليلاً كافياً؟

8 comments:

  1. هههههههههههههه بجد دمك عسل أول مره أدخل وعجبني كلامك بجد مصريه مصريه في حفة دمك وشقاوتك


    وبعدين يعني مش ممكن بردو يكون بائع الطماطم ده بجد عنده موهبه لكن الزمن مش بيساعده ووقفت عند حد الخضاااار ههههههههههه موضوعك لذيذ ويارب يشفينا من جميع الامراض أصغرها قبل أكبرها........

    تسلمي يا قمر

    ReplyDelete
  2. بجد دمك خفيف اوى و اسلوبك شيق
    :)

    دمتى بالف خير و ربنا يوفقك و تلاقى شغل

    ReplyDelete
  3. مش عارف يعني علشان هما بتوع خضار عايزاهم يسمعوا خضرة محمد خضر ويبطلوا فيروز وإليسا ولا إيه؟؟
    يبدو أنك أحد أعداء التطور الحضاري للإنسان المصري في عصر السماوات المفتوحة ع البحري


    تحياتي

    إنســان افتراضي
    ده تشابه أسماء على فكرة... مش أكتر

    ReplyDelete
  4. ده دليل كافي جدا إنك مصرية أصيلة
    أنا كنت بأدلع أخويا حاتم و أقول له "توماس" ودلوقتي هو مواطن أسترالي محترم
    ههههههههههههههه
    خالص تحياتي و سعادتي بروحك المعنوية العالية
    ________________
    KING TOOOT

    ReplyDelete
  5. وحشتينا ليكي فترة غايبة كل يوم ادخل المونة ادور علي موضوع جديدليكي يا ريت ما تغيبيش اكتر من يومين لاني بجد باشتاااااق

    ReplyDelete
  6. بجد اسلوبك خفيف ورائع
    حبيت مدونتك جدا على فكرة

    ReplyDelete
  7. خد بالك من الفراخ لو جالها في يوم زكام..
    وفضي العشة خالص من البط ومن الحمام..
    لو شفت وزة دايخة..
    خد بالك منها..
    أو أمسك التليفون وبلغ عنها

    وهييييييييه ... مساء الفل

    ReplyDelete
  8. ضحكتينى موت
    بوست لذيذ اوى
    عارفة فى سوق الخضار فى الغردقة ساعات بلاقيهم مشغلين اجنبى
    والله بجد

    هيعملو ايه اديهم بيسلو نفسهم واللى حواليهم

    تحياتى neven

    ReplyDelete

الكلمـة نـور .. وبعـض الكلمـات قبـور