Thursday, June 17, 2010

إسفكسيا العرق


ركبت إمبارح الأتوبيس من المحطة وكان فاضي بيحمل ، قاعد فى أول كرسيين قدامي بنت وأمها فقمت قاعدة فى الكرسي اللى وراهم على طول ، فجأة ظهر شخص غريب الأطوار إكتشفت بعد لحظات إنه السيد البيه السواق ، داخل متنرفز ومتزرزر وغالباً مخنوق إن الأتوبيس اللى قبله مشي محمل على أخره وسابه فاضي إلا من الثلاث نساء اللى انا منهم طبعاً ، نفخ نفختين فى الهوا بغيظ وحمر عينيه ، ظبط ركنة الأتوبيس وقالنا وعينه ترمي بشرر: انا مش متحرك من هنا غير لما العربية كلها تكمل .. ويارب ما تكمل !!!ا

إستغربت جداً من طريقته ، هو حيذلنا ولا ايه؟ ، ايه الغلاسة دي ؟ ، ولسة حكمل سيل الرفض والثورة والإمتعاض و ...و... و.. ولاقيت تركيزي بيروح ناحية البنت وأمها اللى قاعدين أمامي ، الأم قالت لبنتها:
خلاص خدي الخمساية دي وانزلي اشتريلك باكو بسكوت وعصير وتعالي ، وما أن خرجت البنت من الأتوبيس حتى هرعت الأم فى إحتلال مكان البنت جمب الشباك !! ، لكن الأم كانت مهتمة جداً لتوجيه إبنتها ناحية نوع معين من البسكويت ، كانت حريصة قوي على أن البنت تشتري أى حاجة وخلاص ، البنت للأسف رجعت بخفي حنين وأمها إتضايقت جامد ، مش عارفة ليه ليه إتضايقت أوي كدة .. خيالي المريض حس إن الأم كانت طمعانة في باكو البسكوت ده !!!ا

المهم ربنا كرم والأتوبيس كمل والسواق جه وإضطر آسفاً إنه يسوق ، فى هذه الأثناء يا سادة يا كرام لم أر شيئا غريبا أو مختلفا حتى أصدعكم به هنا - كالعادة - ولكني شعرت بشئ لا تراه العيون ولا تسمعه الآذان ولا تلقطه الأقمار الصناعية ، شئ تخصص أنوف وفقط ، إنها رائحة العرق ، وما أدراكم ما رائحة العرق ، شعرت بها تتخلل الجموع الغفيرة فى الأتوبيس لتأتي وتستقر في أنفي أنا ، شعرت بأنها تحولت ليد مخبر غريب بيمد إيده حول رقبتي ليقبض روح روحي ، آآآآآآآآه مما شممت ، كنت أحتضر بإسفكسيا العرق النووي ، رائحة غريبة عجيبة نفاذة بشكل غير طبيعي ، تستهدف قتلك بشكل غير مبسوق وكأن حد مسلطها عليك

حينها فقط شعرت برغبة ملحة فى إرسال رسالة إستغاثة وشكر وتأييد للممثلة المشهورة اللى كانت بتعمل إعلانات ريكسونا .. أشكرها أولاً على المشاركة فى هذه الحملة الإعلانية ذات الأهداف النبيلة وأقترح عليها ثانياً أنهم يغيروا إسم المنتج بدل
ريكسونا .. يبقى إنقذونا!!!ا

خنقة العرق جعلتني أتقبل - على مضض - ظهورها المنفر في الإعلان ده بالذات رغم إنتقادي الشديد لهذه الحملة من البداية ، إزاي ترفع دراعها بكل بساطة كدة وتحط مزيل العرق قدام الناس والمخرج والمساعدين والمصورين؟ ، وبعدين أدقق شوية فى الشاشة وأقول:
طب ماهي مبينة دراعها كله من برا فرقت يعني من جوا؟ شوية يجي الفاصل تاني ويتذاع الإعلان تاني وأقعد أفكر وأفكر وأفكر وأفكر وفى الآخر أقول لنفسي - بعد ما الإعلان نفسه يكون خلص من زمان - وعلامات تعجب كبيرة تتراقص أمامي: طب حتى مش خايفة لحسن حد يزغزغها؟!!!ا

24 comments:

  1. هههههههههههههههههههههههههه
    بجد انتى مشكلة مشكلة

    وبجد فعلا الا رائحة العرق فى الاتوبيس
    يالهوى بجد
    بتبقى صعبة

    ياسمين
    انتى بجد رهيبة
    يابنتى لازم تنزلى كتاب بجد
    اسمه يوميات كاميكاز
    مع تنط انسانة
    :*)

    ReplyDelete
  2. hahahahaha :D ana kan y3gbni e3lan (Rakeb anf gadeda) cuz most probably you were sweating too !! embre7 kan la3naaaa bas rabna yestor

    ReplyDelete
  3. في ناس كتييير جداً بيموتوا من جوا باسفكسيا العرق :D
    تساؤلات مثيرة للاهتمام.. أنا عمري ما ركزت في اعلانات ريكسونا قبل كده..
    بس دايماً بتلفت انتباهي اعلانات جيليت.. زي بتاع حكم الماتش اللي مش عارف يرفع ايده ^^
    حملة اعلانات البوست على التويتر جامدة جداً :)

    ReplyDelete
  4. لم أفهم الجزء بتاع الأم والبنت، ماذا كانت تريد الأم من البنت ان تفعل بالضبط؟

    تدوينة رشيقة وخفيفة وأضحكتني
    برغم اني في المعتاد لا اطيق الكلام عن العرق لأنه مقرف إلي حد ما

    ReplyDelete
  5. w rabna enty gamda a5er 7aga enty moshklaaaaaaaaaaaaaaaaa w zay el sokar ...rabna ye7melk dema8ek

    ReplyDelete
  6. سلامو عليكو..
    فكرتينى باعلان قديم للعرق بطله شخصية اسمها عباس.
    عالعموم الحمد لله ان المشوار خلص وروحتى للبيت سالمة.
    لك تحياتى

    ReplyDelete
  7. يا دي الحر اللي هيودي الجميع في داهية ...

    ReplyDelete
  8. ههههههههههههههه
    جميل

    ReplyDelete
  9. هاهاهاهاهها...ربنا يسعدك يا ياسمين زى ما اسعدتينى و ضحكتينى

    ReplyDelete
  10. الاتوبيس
    ده مشكله بجد
    خليط من كل المجتمعات
    انا بركبه طبعا بس لما يكون فاضى ولما ينكبس بنزل فى محطه يكون فيها متروا
    اشم اكتر واكتر
    انزل من المترو اروح على الميكروباص بيكون اهون شويه
    ولما اكون فى الشارع اللى فيه البيت اخيرا اتمشى اجدد الرئه من اللى بيحصل لينا ده
    ناس شقيانه وتعبانه والجو مش مساعد واللى يشتروا بيه مزيل عرق
    يجيب بيه اكل للبيت
    ولا العيش ولا يوفرها فى المواصلات

    ده كله كوم
    واعلان ريكسونا كوم
    فاكره المشبك واعلانه
    لآ طيب

    اقولك على حاجه والله البنوته اللى بتجى فى الاعلان دى محترمه شويتين على اللى بنشوفه فى الشارع
    وعجبى على اللبس
    مدونه
    اكثر من
    رااااااائعه

    ReplyDelete
  11. اسفكسيا العرق دى مرتبطة ارتباطا وثيقا باسفكيا الخنق
    هو فيه خنق اكتر من كده
    اعوذ بالله
    انا اذكر انى ايام الكلية كنت بختار اصحابى على اساس ريحتهم ههههههه
    اصل الانسان الكويس بيبان من ريحته
    خصوصا لما تبقى الدنيا حر مووووت زى الايام دى كده
    وصاحبك ان كان هيخنقك يبقى بلاش منه احسن هههههههههه
    النظافة حلوة

    تحياتى

    ReplyDelete
  12. صباح الخيرانا كل يوم متعود اعدى على المطرح لقئتك فاتحه الشبابيك ورشه ميه قدامه وحاطه غنوه حلوه دمها خفيف حلوه حقيفي

    ReplyDelete
  13. أنا عندي تروحي مشي ولا تركبي الأتوبيس تخصص أنوف .. الله يعينك ويصبرك

    اصحى يا نايم ووحد الدايم ..

    (حملة الجسد الواحد)

    أرجوا من المدونين الموقرين أن يضعوا شعار الحملة واسمها في الشريط الجانبي لمدوناتهم كدلالة على وحدة صف أمة محمد

    لمزيد من المعلومات

    http://dndanh111.blogspot.com

    جعله الله في ميزان حسناتكم .. آمين

    ReplyDelete
  14. السلام عليكم
    ههههههههههههه
    فظيعة بجد واضح ان الاسفكسيا دى هاتخلص على الشعب المصرى كله

    بوست جامد جدا
    تقبلى تحياتى

    ReplyDelete
  15. عندى مشكله اكبر
    وانا صغيرة فى الجامعه كنت بركب المترو
    كان اكتر شئ بيزعجنى من انى قصيرة...مش متضايقه انى قصيرة ..انا متضايقه ان منخيرى عند باط وكوع الناس
    طول ما الناس داخل خبطه فى راسى ووشى
    وحشرة لمناخيرى نحت باط حد

    اوحش حاجه انك تكونى قصيرة وتركبى موصلات زحمه
    الضرب كله فى الجون

    ReplyDelete
  16. :-)))

    حلوة الفقرة الإعتراضية بتاعة الإعلان دي في آخر البوست


    بس فعلا ثقافة العرق دي عندنا غريبة جدا .. ما فيش أي اهتمام بالنقطة دي خالص .. وممكن فعلا حد يجيله سكتة دماغية من الريحة البديعة دي

    المهم حمدالله على سلامتك .. ولسه الصيف طوييييل

    ReplyDelete
  17. جربي بقا المترو من الجيزة لحلوان و هاتعرفي التطور الطبيعي للعرق عامل ازاي :) :) :)
    بجد أول مرة حد يضحكني بالطريقة دي خصوصا علي عبارة الزغزغة ، لإني دايما كنت اما اشوف الإعلان احس ان في حد بيزغزغني انا :)
    لكي كل ود و احترام...

    ReplyDelete
  18. :)))
    لا محدش هيزغزغها ما تخافيش
    أنا مش عارفة مين الممثلة اللي بتتكلمي عليها لأن في ممثلات كتير عملوا إعلانات مزيلات عرق لأكثر من ماركة
    بس يظهر مفيش فايدة

    أكتر إعلان كان مختلف بتاع عباس متأخر ع الجامعة وواخدها جري
    كان جميل والله
    بس تقريبا الناس يا إما بتنسى تشتريه يا إما بتنسى تحطه
    أقترح الإعلان الجاي يكون عن واحد كل يوم بينسى يحط مزيل العرق لغاية ما جاب مزيل عرق اسمه "8 الصبح" ومن يومها وهو كل يوم أول ما الساعة تدق 8 بيحط مزيل العرق
    أو ممكن يبقى إعلان مزيل العرق "أنقذونا" عن واحد بيعمل مذكر أعمال على الموبايل ويكتب فيه لا تنسى وضع مزيل العرق :)

    حلو التدوينة في وسط الجو اللطيف اللي احنا فيه
    الحر المادي والجحيم المعنوي
    ربنا يجيرنا من الاتنين

    ReplyDelete
  19. هههههههههه..بجد بوست حلو جدا وضحكتني الطريقة والتعبيرات اللي فيه..
    وعلى فكرة كلنا بنعاني من الحكاية دي مش بس في المواصلات خاصة اني تخصص أنوف انا كمان وديما باحب كل حاجة ريحتها حلوة مهما تكلف الامر :)

    عجبني قوي تعبير (العرق النووي) :) :)

    ReplyDelete
  20. دمك خفيف جدا وبتكتبي حلو أوي

    مصريه بتتنفس ضحكه

    ReplyDelete
  21. ده و بلا مبالغة موقف تافه جداً

    المترو بقي أجارك الله !! و ياسلام بقي لو زحمة موت، و تبقي محشور كده و مش عارف حتي تاخد نفسك، و نهار ماتعرف تشم هو تلاقي ملوث :S

    ReplyDelete
  22. مش يمكن تكون مبتغيرش؟
    أنت لاسعة لاسعة. أنا الحمد لله مش بركب أتوبيسات ولا مواصلات ولا عندي حتة فرصة إنني أركبها لأنها منقرضة شوية عندنا، فده كله بيصب في مصلحتي. ومش بنزل شغل كمان فمن الآخر مناخيري مني إلي.

    ReplyDelete
  23. يع يع يع يع .. طب أنتى شميتى الريحة وخلاص أمرك إلى الله .. ذنبا إحنا أيه توصفى لنا الموقف بالتفصيل المستمل ؟؟؟ وكمان جايبه لنا صورة .. رحماك يارب :) :) :)

    ReplyDelete

الكلمـة نـور .. وبعـض الكلمـات قبـور