إسفكسيا العرق

ركبت إمبارح الأتوبيس من المحطة وكان فاضي بيحمل ، قاعد فى أول كرسيين قدامي بنت وأمها فقمت قاعدة فى الكرسي اللى وراهم على طول ، فجأة ظهر شخص غريب الأطوار إكتشفت بعد لحظات إنه السيد البيه السواق ، داخل متنرفز ومتزرزر وغالباً مخنوق إن الأتوبيس اللى قبله مشي محمل على أخره وسابه فاضي إلا من الثلاث نساء اللى انا منهم طبعاً ، نفخ نفختين فى الهوا بغيظ وحمر عينيه ، ظبط ركنة الأتوبيس وقالنا وعينه ترمي بشرر: انا مش متحرك من هنا غير لما العربية كلها تكمل .. ويارب ما تكمل !!!ا

إستغربت جداً من طريقته ، هو حيذلنا ولا ايه؟ ، ايه الغلاسة دي ؟ ، ولسة حكمل سيل الرفض والثورة والإمتعاض و ...و... و.. ولاقيت تركيزي بيروح ناحية البنت وأمها اللى قاعدين أمامي ، الأم قالت لبنتها: خلاص خدي الخمساية دي وانزلي اشتريلك باكو بسكوت وعصير وتعالي ، وما أن خرجت البنت من الأتوبيس حتى هرعت الأم فى إحتلال مكان البنت جمب الشباك !! ، لكن الأم كانت مهتمة جداً لتوجيه إبنتها ناحية نوع معين من البسكويت ، كانت حريصة قوي على أن البنت تشتري أى حاجة وخلاص ، البنت للأسف رجعت بخفي حنين وأمها إتضايقت جامد ، مش عارفة ليه ليه إتضايقت أوي كدة .. خيالي المريض حس إن الأم كانت طمعانة في باكو البسكوت ده !!!ا

المهم ربنا كرم والأتوبيس كمل والسواق جه وإضطر آسفاً إنه يسوق ، فى هذه الأثناء يا سادة يا كرام لم أر شيئا غريبا أو مختلفا حتى أصدعكم به هنا - كالعادة - ولكني شعرت بشئ لا تراه العيون ولا تسمعه الآذان ولا تلقطه الأقمار الصناعية ، شئ تخصص أنوف وفقط ، إنها رائحة العرق ، وما أدراكم ما رائحة العرق ، شعرت بها تتخلل الجموع الغفيرة فى الأتوبيس لتأتي وتستقر في أنفي أنا ، شعرت بأنها تحولت ليد مخبر غريب بيمد إيده حول رقبتي ليقبض روح روحي ، آآآآآآآآه مما شممت ، كنت أحتضر بإسفكسيا العرق النووي ، رائحة غريبة عجيبة نفاذة بشكل غير طبيعي ، تستهدف قتلك بشكل غير مبسوق وكأن حد مسلطها عليك

حينها فقط شعرت برغبة ملحة فى إرسال رسالة إستغاثة وشكر وتأييد للممثلة المشهورة اللى كانت بتعمل إعلانات ريكسونا .. أشكرها أولاً على المشاركة فى هذه الحملة الإعلانية ذات الأهداف النبيلة وأقترح عليها ثانياً أنهم يغيروا إسم المنتج بدل ريكسونا .. يبقى إنقذونا!!!ا

خنقة العرق جعلتني أتقبل - على مضض - ظهورها المنفر في الإعلان ده بالذات رغم إنتقادي الشديد لهذه الحملة من البداية ، إزاي ترفع دراعها بكل بساطة كدة وتحط مزيل العرق قدام الناس والمخرج والمساعدين والمصورين؟ ، وبعدين أدقق شوية فى الشاشة وأقول: طب ماهي مبينة دراعها كله من برا فرقت يعني من جوا؟ شوية يجي الفاصل تاني ويتذاع الإعلان تاني وأقعد أفكر وأفكر وأفكر وأفكر وفى الآخر أقول لنفسي - بعد ما الإعلان نفسه يكون خلص من زمان - وعلامات تعجب كبيرة تتراقص أمامي: طب حتى مش خايفة لحسن حد يزغزغها؟!!!ا