Thursday, July 15, 2010

حلة محشي دايت



نعم محشي .. لا تصرخي فى وجهي عزيزتي حواء وتقولي لي بالفم المليان: مش حينفع اعمل محشي أصل انا عاملة ريجيم !! .. وانا عارفة انك لسة ضاربة شقتين سكلانس من عند الواد حودة اللى على ناصية الشارع بس مطنشة بمزاجي

لا تخافي عزيزتي فلن أفتن عليكي وأقول لأمك، ولكن سأدهشك بالحل العبقري اللوزعي غريب الأطوار والأنماط والأعراف الذي سأقدمه لكي من خلاصة تجاربي

الحل العجيب الحصري فقط من شركة الماسة .. احم قصدي مدونة إنسانة هو .. حلة المحشي الدايت ... أيوووووون داااااااايييييت

يأتيكي عزيزتي مع حلة المحشي الدايت كتيب توجيهات صغير لحلة عملاقة صحية

يفضل قبل الشروع فى عمل حلة المحشي الصلاة ركتين بنية التوفيق فى هذه الخطوة الخطيرة فى حياتك

كما يجب أن تتذكري جيداً عزيزتي إن أول طلعة جوية فتحت باب الحرية .. اقصد صنعت حلة محشي

ويجب عليكي ألا تنسي أبداً إنك من أحفاد الفراعنة بناءة الأهرام حماة المستقبل .. يعني بنت كفاءة وتسلك فى أي حلة بدون خسائر

يفضل مع البدء فى صنع حلة المحشي تشغيل أغاني كئيبة حتى تدخلي فى المود .. وينصح الخبراء بسماع أغنية شادية "والله يا زمن" من فيلم نحن لا نطبخ المحشي

اعلمي عزيزتي ان أهم شئ فى صنع المحشي هو النية الخالصة السليمة ودعاء الوالدين ، كما أقترح قراءة كتاب إخرج المارد الذي بداخلك .. ودخله فى حلة المحشي

من الأفضل صناعة المحشي على مراحل متعددة .. وأقترح فى الحر ده تعليق محلول جلوكوز حتى يمكننا حينها أن نضحي بحياتك فى سبيل حياة حلة المحشي

يجب عليك عزيزتي قبل البدء فى صنع حلة المحشي الذهاب إلى السوق لإختيار ما لذ وطاب من أصناف المحشي المختلف .. يفضل إختيار الكوسة فى المقام الأول أو الباذنجان نظراً توائمهم النفسي مع الدايت

لا تنسى شراء كمية لا بأس بها – كبيرة جداً - من "خضرة المحشي" وهي الشبت والكسبرة والبقدونس ، وإن كنتي لا تعرفين بالتحديد الفرق بينهم فأطلبي من البائع إحضارهم وخلاص .. لا يوجد مانع من إضافة بعض عيدان النعناع الأخضر ( وراور ) لزوم الطعم الجميل

عند العودة للمنزل يمكنك الشروع فى عمل المحشي بشكل فوري او تأخذي هدنة حربية لمدة لا تتجاوز الساعتين حتى لا تفقدي الذاكرة وتنسى ماذا كنتي ستفعلين أساساً

إياكي أن تتخيلي عزيزتي أن صنع حلة محشي أمر صعب، أبداً، فقط إنظري فى المرآة وتذكري إجتيازك لكل المراحل الدراسية بنجاح، هكذا المحشي

المرحلة الأولى: مرحلة غسيل الخضار .. إغسليه بالخل ولا ترحميه .. بثي فى غسيله كل همومك وعذاباتك اليومية الدورية الحلزونية .. اغسلي معه مخك من اي شخص او فكرة تحاول تعكير صفو حياتك

المرحلة الثانية: مرحلة تقوير (تأوير) المحشي .. ضعي المقوار فى قلب الباذنجانة من دول بغل كدة وكأنك تقتلين به كل من فرسك وعكنن عليكي عيشتك .. وعندما تنتهين من (قتل) الباذنجانة وتعذيبها وإخراج تلافيف تلافيفها ستشعرين براحة بالغة

المرحلة الثالثة: غسيل المحشي ووضعه فى مصفاة ( مخرمة طبعاً يا عزيزتي لا تشمتي آدم فينا )ه

المرحلة الرابعة والأخطر: صناعة الخلطة .. والخلطة صناعة .. تضعين فيها كل ما تحبين وبالطريقة التي تفضليها .. أهم شئ فى الخلطة حتى تكون دايت بحق هو ألا تكثري من الرز وأن تكثري بشكل مبالغ فيه من الخضرة وأن تقللي المادة الدهنية إلى الحد الأدنى .. كثيرا ما اضع فيها معلقة واحدة زيت وفقط

المرحلة الخامسة: مرحلة حشو المحشي .. لا تجعلي مخك يسرح بعيداً ويذكرك بأحلامك الضائعة وإحبطاطك اللانهائية .. فقط إحشي بصبر وفى هدوء ورددي فى سرك المقولة الخالدة (( يا جبل ما يهزك ريح )) ثلاث مرات

المرحلة السادسة: رصي المحشي فى الحلة بأناقة وعذوبة – كأن شيئاً لم يكن – لا تخشي أي شئ فالمحشي لن يبوح بأفكارك السودوية لأحد

المرحلة السابعة والأخيرة ( احمدك يارب) : ضعي الحلة على النار غير مأسوف عليها مع قليل من الشوربة او الماء

لا تنسى عزيزتي حواء عندما تنتهي من صنع حلة المحشي ووضعها على النار أن تظلي رايحة جاية تدعي بكل إخلاص: يارب المحشي يطلع حلو

يمكنك أثناء إنتظار حلة المحشي ضرب شوب موز باللبن ساقع عشان تنسي

إذا شممتي رائحة شياط وإتضح إن حلة المحشي إتلسعت منك لا تشعري بالفزع ، كما قولت لك أهم شئ الثقة فى النفس ودي مجرد شكليات ، ايه يعني أكلة باظت ماانتى ياما بوظتي كتير جت على دي؟

بعد ما حرقتي المحشي إجري ع المراية وإبتسمي .. وتذكري دائما إن محاولات النجاح دائما ما تأتي فوق جبال من الفشل



عارفة إنك مش ضامنة هو إستوى ولا لأ .. عارفة إن البتنجان بيشد والرز بيقرقش .. بس ليه ماتقوليش إنك إخترعتي طريقة جديدة للمحشي؟

كفاكي بكاء يا حبيبتي ... كفاية إنك توصلتي لطريقة فاشلة لعمايل المحشي .. مش معنى كدة إنك فاشلة فعلا – بدأت أشك فيكي على فكرة – لا معناه إنك بتحاولي ويا عالم ممكن في يوم من الأيام تنجحي .. قادر على كل شئ

لو إتحايلتي على أمك إنها تاكل من الحلة ولو من باب المجاملة وباعتك عند أول ملف برضه ماتزعليش، إبتسمي وشغلي إغنية عيني ع الأم وحنان الأم بسرعة

ولو موضوع ماما ده حازز فى نفسك أوي ممكن تشغلي كمان أغنية محمد فوزي: ليه ياماما تعذبيني وأشتريكي وتبعيني يجرا ايه لو ترحميني وتدوقي المحشي؟؟؟؟

ولا يهمك يا عزيزتي حواء .. فقط أنصحك بالإبتسامة وقراءة كتاب دع القلق وابدأ الحياة بدون محشي



وفي قعر هذه الحلة .. اقصد نهاية هذا الموضوع أدعوكي للإسترخاء وإغماض عيناكي وأخذ نفس عميق جدا من معاميقك ولنتجرع كؤوس الماء المثلج ونلقي بمرارة الفشل فى ذاكرة النسيان لكن مش عارفة ليه يوهيألي يا حورية إنك ما اتوضتيش قبل ما تدعي إن المحشي يبقى حلو ... تذكري دايماً عزيزتي إن حلة المحشي محتاجة قدر كبير من صفاء النفس ونقاء السريرة

18 comments:

  1. هاهاهاهاهاها .... قلبتى عليا المواجع يا ياسمين ...

    اول محشى عملته فى حياتى كان نفس اللى بتحكيه بالضبط عشان كده مكررتهاش حفاظاعلى ارواح المواطنين هاهاهاها

    الله يخرب بيته اللى بدع الدايت ..الجوع كافر يا عالم

    ReplyDelete
  2. ما عنه ما اتاكل :p

    بغض التظر في رأيي الشخصي في اكلات الاربع ساعات تجهيز وتلات دقايق بلع (المضغ بيحذف من العملية)
    البوست بيموت من الضوحك :D

    تحياتي

    ReplyDelete
  3. بصي يا ياسمين رغم انك بتهرجي كثير في النص بس الموضوع بجد مهم
    :)
    ولي تعليقين
    الأول يخص المرحلة الرابعة
    تكثري الخضرة وكذلك تكون الطماطم قطع مش عصير وكمان ممكن تضيفي أجزاء من اللي طلع من القلب يعني مثلا قطع كرنب صغيرة جدا
    أو قطع قلب الباذنجان أو قطع قلب الكوسة
    وكذلك يمكن اضافة اللحم المفروم لأن اللحم سعراته ممكن تكون اقل من الأرز للناس اللي فصيلة دمهم أو بالذات

    التعليق الثاني وهو يخص المرحلة السابعة
    وهي ليس اضافة القليل من الشوربة بل بالعكس الكثير من الشوربة أو الماء على أن يكون تقديم المحشي في وضع شبه سائل شوية وهو ما يعطيه حجما أكبر وشبع مبكر
    وبالهناء والشفاء

    ReplyDelete
  4. نور
    لا يابنتى المحشي بيتاكل مع الدايت وبيبقى مفيد كمان .. اهم شئ تقللي الرز والمادة الدهنية وتزودي الخضار .. بالذات الكوسة مفيدة جداً

    ReplyDelete
  5. علا من غزة

    حبيبتي ربنا يكرمك .. احلى تعليق بجد .. ما عنه ما اتاكل فعلا هههههههه

    ReplyDelete
  6. عصفور المدينة .. الموضوع فعلا مهم بس اسمحلي الضحك أهم خصوصا في الوقت الحالي
    :)

    بالنسبة للمرحلة الرابعة بفضل معلقتين معجون طماطم عشان الطعم خصوصا اننا تقريبا مش حاطين اي دهون

    أما المرحلة السابعة فده حسب التذوق واعتقد انه مش حيفرق اوي فى الريجيم .. انا عن نفسي مش بفضله بشكل سائل ومتعودة على تسويته بقليل من الشوربة عشان الرز يشربهم ويبقى طري من جوا وفى نفس الوقت مش سائل أوي .. خصوصا لو كان محشي مشكل مش كوسة لوحدها

    لان فى أكلات تانية ممكن تملى المعدة فى نفس الوجبة غير المحشي .. زي السلطة طبعا والشوربة والملوخية

    وبألف هنا وشفا
    :)

    ReplyDelete
  7. بالهنا والشفا ياياسمين
    لفينية منابي في ورق سلوفان
    حأخده وانا مروح ههههههه
    خالص تحياتي
    موجة

    ReplyDelete
  8. انا اول مرة عملت فيها محشى مش عاوزة اتكلم ولا اقول اساسا مافكرتش انى ادوقها بس والله احسن انها باظت لانى اساسا مش بحب المحشى
    مدونتك حلوة اوى

    ReplyDelete
  9. ننوسة ازيك
    ياترى فاكرانى ولا اييييييه

    ReplyDelete
  10. المحشى وما ادراكى ماالمحشى
    لايخلو اى بيت فى مصر من المحشى حتى اللى عاملين دايت فيوم الخميس بيبوظ الدايت هههههه

    تحياتى لكى وبجد بوست جميل وخلتينى اضحك وانا مليش نفس هههههه

    ReplyDelete
  11. طب وعلى إيه ده كله
    من قلة عربيات الكبدة يعني ؟

    ReplyDelete
  12. اصحى يا نايم ووحد الدايم

    (حملة الجسد الواحد)

    أرجوا من المدونين الموقرين أن يضعوا شعار الحملة واسمها فقط فوقها (حملة الجسد الواحد) في الشريط الجانبي لمدوناتهم كدلالة على وحدة صف أمة محمد، ومن أجل قيام الولايات المتحدة الإسلامية

    لمزيد من المعلومات

    http://dndanh111.blogspot.com/2010/06/blog-post_14.html

    جعله الله في ميزان حسناتكم .. آمين

    ReplyDelete
  13. ليه كدة ؟ بتفكريني بيها تاااااااني ليه

    ReplyDelete
  14. دمك خفيف ما فيش فى ده خلاف.بس ياريت التدوينه يكون فيها معلومات جديده على القارئ،يعنى لو كنتى قلتلنا ازاى نفرق بين البقدونس والكزبره كانت تبقى معلومه بمليون جنيه.انتى حاطه التدوينه تحت عنوان اكلات ضاحكه وده شئ جميل وجديد،ياريت تكملى فيه وتوصفى الاكله بذمه وتمليها معلومات .شغلك حلو حقيقى

    ReplyDelete
  15. ههههههههههه

    بصي بقي الساعه دلوقتي احده ظهرا وميعاد غدا بقي ممكن بس لو سمحني اخد حلة المحشي حتي ولو كانت شايطه هههههه

    بوست خفيف ولذيذ زي المحشي


    تحياتي

    ReplyDelete
  16. شكرا على المدونه الجميله

    يعطيكوا العافيه

    ReplyDelete
  17. دي وصفة سهلة
    دي وصفة هايلة
    بصي
    انتي بعد كده كله يبقى ديليفري واشتري نفسك وجوزك وبيتك وبلاش تخربي على نفسك
    :-)

    ReplyDelete
  18. حبيت اشكرك على اختيارك لمدونتي كواحده من المدونات اللي انتي متبعاها...شكرا كتير! مدونتك لطيفه و دمها خفيف كتير
    الف مبروك عليكي الشهر الفضيل و على الامه الاسلاميه
    سلام

    ReplyDelete

الكلمـة نـور .. وبعـض الكلمـات قبـور