Monday, August 23, 2010

مكرونة بالبشاميل دايت


إن كنت ممن كتب الله عليهم الدايت من أمثالي فيجب عليك التألقم على شئ هام جداً لن تستطيعي الإستمرار بدونه ، ألا وهو التحايل على القانون .. اقصد هنا القانون المطبخي بالطبع
فكل او معظم وصفات أكل الأباء والأجداد تودي فى داهية ريجيمية حدف ، وللإستمرار فى الدايت او الريجيم او الأكل الصحي مدى الحياة ( لأن فى ناس إتكتب عليهم كدة بجد ) يجب عليك التعود على كسر كل ما هو مألوف ومعتاد والتغيير والتعديل فى أي وصفة أياً كانت ، والفيصل النهائي الطعم والصحة طبعاً
إنسفي مطبخك القديم .. ولا تقلقي على الإطلاق إن كنتي لا تعلمين فنون وأصول الطبخ المبدأية وإتبعي المثل القائل " اللى ماعلمتوش أمه يعلمه الإنترنت " والأخ جوجل لا يتأخر الحقيقة وقايم نايم فى خدمتك

المكرونة بالبشاميل - على سبيل المثال لا الغلاسة - رائعة وتحفة وتجنن ولكن كيف نأكلها فى الريجيم؟ وكيف يكون ريجيمنا بدون حرمان؟ .. دعونا نتفق أولا إن أي أكلة يمكن صنعها بطريقة صحية ، فالرك على طريقة الطهي التي قد تجعل أكلة معينة صحية جدا وقد تجعل نفس الأكلة مضرة جداً ، وإن كنا لا نستطيع التخلص من كل السعرات الحرارية المصاحبة لأكلة معينة نظراً للمكونات الأساسية المستخدمة فعلى الأقل نحتفظ بالحد الأدنى من السعرات ولا نزيدها وقال على رأي المثل " نص العما ولا العما كله "

لا تتنازلي عن حقك فى أكل المكرونة البشاميل عزيزتي حواء ، إنظري الى نفسك فى المرآه اليوم وإبتسمي وتذكري يوم ما ضحكتي على حرس الجامعة ودخلتي بدون الكارنيه .. ياله من إحساس رائع!

دعي خيالك المريض هذا جانباً وركزي معايا .. إسلقى المكرونة ( القلم ماتفضحيناش ) ولو ماعندكيش مكرونة قلم او ماتعرفيهاش أصلا مش مشكلة ، الشيف قالك إتصرف ، لو عملتيها بالإسباجتي مش هتقولك لأ على فكرة ، المهم إسلقى المكرونة بقى بالطريقة المعتادة

وحضري العصاج فى طاسة تيفال بدون زيت او سمن ، لحمة مفرومة حمراء ( تتشوح الأول ) + بصل مبشور + جزر مبشور لو تحبي + بسلة + فلفل رومي .. كل ما تزودي خضار القيمة الغذائية هتزيد والطعم هيبقى أحلى .. وتضيفي بهاراتك وحركاتك كما يحلو لك .. صحصحى وانتي بتعملي العصاج عشان ماتعمليش زي صديقتي اللى سلقته على أساس إن مصير أي لحمة السلق على طول !

نيجي للطامة الكبرى .. البشاميل الذي نحوله بقدرة قادر إلى قنبلة تدميرية قادرة على الإنفجار فى أي لحظة ، فقد رأيت بأم عيني من يصنع هذا البشاميل بأكواب من السمن ولكي انت تتخيلي حجم الكارثة

طقطقيلي ودانك كدة وركزي فى هذا الجزء يا عزيزتي حواء كويس، ستحضري 2 ملعقة كبيرة دقيق وتضعيهم على نص لتر لبن خالي الدسم وتقلبيهم على البارد ثم ترفعيهم على النار وهاتك يا تقليب لحد ما تسمعي أصوات إستغاثتهم بأذنك ، ضيفي مكعب مرق وملح وفلفل وإستمري فى التقليب بلا هوادة حتى تحصلي على القوام المطلوب .. لو تقل تكملي تقليب وتزودي لبن او شوربة .. خفيفة تزودي دقيق وهكذا .. بس لازم تقلبي جامد عشان مايكلكعش ولو كلكع منك ما اعرفكيش

وخلصت الشغلانة .. إجري زي الشاطرة إحضري صينية للمكرونة وضعي فى الأرضية شوية بشاميل ( أرضية الصينية مش أرضية المطبخ ماتخلنيش أفطر عليكي ) عشان المكرونة مايلزقش ، ضيفي طبقة مكرونة ثم طبقة اللحمة المفرومة ثم طبقة مكرونة أخرى ثم البشاميل فى النهاية على الوش .. إحفظي هذا الترتيب كويس حتى لا تعملي نفس عملة صديقتي التي وضعت طبقة البشاميل فى النص!


على الوش ممكن تدلعي نفسك بقى – جبنة موتزاريلا ( مكتوبة صح كدة؟ ) قليلة الدسم او جبنة رومي أو أي جبنة خالية الدسم عندك أو فى ناس بتضرب بيضة بملح وفلفل وتفردهم على الوش .. إنتى وذوقك بقى



وبخ على كدة ناقص بس الوش يحمر .. حطي الصنية فى الفرن وإطلعي إجري .. إجري إعملي سلطة طبعا ولا ناوية تبلطجي وماتعمليش سلطة كمان؟ .. والله أعورك


تعالى هنا رايحة فين؟ .. خلاص مكرونة دايت وهيصة وواخدة بعضك بالصنية وفرحانة اوي؟ .. لا مش معنى انها دايت او قليلة السعرات انك تلهطى الصنية كلها لواحدك .. لا طبعا .. كفاية اوي قطعة واحدة مع سلطة وشوربة والبروتين وكفاية اوي على كدة .. بلطجة مش عايزة ياعزيزتي إنتى.. سامعة؟


ملحوظة رفيعة
صورة الصنية اللى فوق دي مش عمايل إيديا ولا حاجة
لاطشاها من الشيف جوجل عندك مانع؟

29 comments:

  1. أرضية الصينية مش أرضية المطبخ ماتخلنيش أفطر عليكي

    جامدة يا جميل
    من الاكلات اللى بحبها فعلا
    بالهنا والشفا عزيزتى حواء

    ReplyDelete
  2. الله عليكى يا ياسمبن .. تسلم ايدك .. بس قوليلى واللى عايزين يتخنوا شويه قولى شويتين يعملوا ايه؟
    مشمشه

    ReplyDelete
  3. اول تعليق يا رندا تكسبي جايزة المطبخ البصلاية العجيبة اللى من غير دموع
    :D

    ReplyDelete
  4. شيماء

    اللى عايزين يخسوا يهشوا من هنا ههههههههه لالا مايصحش من جالك مدونتك جاب الحق عليك .. بصي ياستي عندك كل المراحل زودي فيها سمنة او زبدة زي ماانتى عايزة .. ممع تحطي فى العصاج وممكن مع البشاميل وتبقى ليلة يا عمدة
    :D

    ReplyDelete
  5. هههههههههه...برافو على البوست وعلى المكرونه بالهنا ..بس فى مشكله انا جربت حكايه معلقتين الدقيق على كبايه اللبن وطلعت خفيفه موت و كانت ماساه من الاخر...طلعت معاكى مظبوط؟

    ReplyDelete
  6. بتنفس حرية

    الموضوع بسيط لو لاقيتيها خفيفة زودي الدقيق .. لاقيتيها تقيلة زودي اللبن .. محلولة لا تقلقي وهناكلها يعني هناكلها
    :D

    ReplyDelete
  7. يعنى المعادلة الصعبة بين الدقيق واللبن

    ReplyDelete
  8. لو كالكاعيت ، حطيها في الخلط
    أنا ساعات باستخدم النشا بدل الدقيق، بس معرفش الفرق

    ReplyDelete
  9. نوشة

    لا يوهيألي ان النشا هيخلي البشاميل ماسك نفسه بزيادة زي المهلبية كدة ولوح دخلت التلاجة وطلعت تسخن لتاني بيتهيألي هيفضل جامد برضه

    ReplyDelete
  10. بايركس مكرونةهوّ ونزل فى الوقت المناسب نصف اهل تويتر

    حيفطروا مكرونة بالباشاميل،جميل حقيقى اللة ينور

    ReplyDelete
  11. بارك الله فيكي اختي ~

    ReplyDelete
  12. الله الله الله
    ريحتها حلوووووووووووووووووووه
    هههههههههه
    تسلمى يا قمر

    ده دعوه للضحك من القلب
    http://jokes-egyptian.blogspot.com/

    ReplyDelete
  13. اممممممممممممممم ..جوعتينى

    ReplyDelete
  14. على فكره..كل الوجبات اللى انت بتكتبى عنها دى ما تنفعش دايت خالص هههههههه
    وانت هتكونى السبب فى طلاق نص ستات مصر

    ReplyDelete
  15. انتي بجد متأكدة من ان الوصفة دي هتؤدي الى مكرونة بالبشاميل بجد في الآخر؟ أنا بجد شاكك فيكي وصعبان عليا جوزك بجد

    شوفي كده الوصفة دي .. شكلها ممكن تطلع مكرونة بالبشاميل في الآخر .. احتمال يعني

    http://tayarawara2.blogspot.com/2010/08/blog-post_24.html

    ReplyDelete
  16. تصدقى انى فعلا يومها اكلت مكرونة بالباشميل :))
    كانت مفاجأة ليا

    ReplyDelete
  17. وصف حلو اوى
    وبالنسبه لكلمة موتزاريلا
    فهى تكتب
    Mozzarella
    وتنطق بالإيطالية الشعبيه
    موتساريلا Mootsarella
    هذا والله الموفق

    ReplyDelete
  18. اصحى يا نايم ووحد الدايم

    أرجوا من المدونين الموقرين أن يضعوا شعار الحملة واسمها فقط فوقها

    (حملة الجسد الواحد)

    في الشريط الجانبي لمدوناتهم كدلالة على وحدة صف أمة محمد

    http://dndanh111.blogspot.com/2010/06/blog-post_14.html

    ومن أجل قيام الولايات المتحدة الإسلامية

    http://dndanh111.blogspot.com/2010/06/blog-post_17.html

    جعله الله في ميزان حسناتكم .. آمين

    ReplyDelete
  19. تسلم ايديكي
    و لو الصورة ملطوشة من جوجل
    مش مشكلة :)
    المهم إن المعلومات و الوصفة صحيحين :)

    ReplyDelete
  20. الف هنا ياحبيبتي

    انا بموت فيها بس مش بقدر اكل اصلا غير قطعه واحده

    ReplyDelete
  21. السلام عليكم
    اللي احلى من الوصفه روحك المرجه الحلوة
    ان شاء الله بنطبق الوصفه

    ReplyDelete
  22. والله عسل .. تسلم ايديكي :)

    ReplyDelete
  23. اهلا وسهلا بكم عملائنا الكرام كل عام وانتم بخير نقدم لكم افضل خدمات غسيل وتنظيف المفروشات والمجالس والكنب بافضل جودة وباسعار خيالية متوفرة فقط لدي مغاسل الجبر بالمنطقة الشرقية والتي تقدم لعملائها الفروع والخدمات الاتية

    مغسلة الجبر
    مغاسل الجبر
    مغسة الجبر للتنظيف
    مغاسل الجبر للتنظيف
    شركة الجبر للتنظيف
    مغسلة الجبر لغسيل المفروشات

    ReplyDelete

الكلمـة نـور .. وبعـض الكلمـات قبـور