Wednesday, September 01, 2010

يعني ايه الحاجة زهرة؟



يعني ايه الحاجة زهرة؟ يعني تبقى جميلة وفِرعة لدرجة إن كل اللي يشوفك يحبك فوراً ويتهبل من جمالك يابنت المحظوظة .. من الآخر تبقى سوبر سوبريم وومن والأجر على الله

يعني ايه الحاجة زهرة؟ يعني تتجوزي مرة وإتنين وتلاتة وعشرين لو أمكن – هو الجواز حوروم؟ - فما إن تحصل أي مصيبة لزوجك حتى يأتي لك زوج جديد على الفور

يعني ايه الحاجة زهرة؟ يعني يتلهف الرجال على الزواج منك لهفة غير طبيعية .. تذكرني بلهفة الممسوك عليه ذلة

يعني ايه الحاجة زهرة؟ يعني كل ما جوزك يتبخر – يتسجن بقى يموت تجيله مصيبة تاخده مش مشكلتنا دلوقتي – يجيلك غيره هوا من غير ما يفكر ولو لثانية إنك ممكن تكوني نحس مثلا

يعني ايه الحاجة زهرة؟ يعني جوزك يموت محروق والعياذ بالله - ما انتى نحس بقى - ويرجع لك تاني بعد كام حلقة صاغ سليم من غير خدشة واحدة ، كل الحكاية إنه فاقد الذاكرة بس .. بسيطة نبعت نشتري له واحدة جديدة

يعني ايه الحاجة زهرة؟ يعني كل ما تتجوزي راجل جديد يعدي مشهدين وتضحكي فى خباثة مصطنعة وتقولي له ( أنا حامل ) .. كلما سمعت هذه الكلمة على لسان الحاجة زهرة شعرت إننا فى أزهى عصور الخصوبة

يعني ايه الحاجة زهرة؟ يعني تسع شهور الحمل يعدوا هوا ، وهوب تدخلي المستشفى هوب تزلطي العيل من دول ، هوب يختفي العيل عن الشاشة فى محاولة واضحة وصريحة لتهميش الدور الدرامي المحوري للرضيع (المزلوط لتوه) .. ولا أدري كيف تسكت أم الرضيع الموهوب الحقيقية على تهميش دور رضيعها الدرامي بهذا الشكل؟

يعني ايه الحاجة زهرة؟ يعني تزلطي العيل من هنا وترجعي رفيعة وأمورة وحلوة وغندورة تاني مشهد على طول ، ويتكرر هذا النهج الميتافزيقي مع كل حمل وكل ولادة ، وبالرغم من إن الزوجة الطبيعية " تفيص تفييصاً تاماً " مع ولادة العيل الثالث إلا إن المخرج عايز كدة .. حد له شوق فى حاجة؟

يعني ايه الحاجة زهرة؟ يعني يبقى عندك 3 أولاد فى سن حديثة ولا يطرف لك رمش عليهم ولا ترضعي ده ولا تسكتي فى ده ولا تشقري على ده ، ناهيكي بقى عن البامبرز والتكريع والتهشيك والذى منه ، أولاد الحاجة زهرة إنفيزيبول أول ذا تيم


يعني ايه الحاجة زهرة؟ يعني تفضلي طول الوقت مصيفة ولابسة - أو مش لابسة - صيفي ، رغم إن كل عيل من العيال التلاتة بياخد له كدة حسبة 9 شهور عقبال مايشرف ، يعني يمر عليه أمطار ورعود ورياح وبرد وحر وخريف وربيع .. لكن يبدو إن الحاجة زهرة متمسكة بنظرية العجل فى بطن أمه


يعني ايه الحاجة زهرة؟ يعني بالصلاة ع النبي كدة يبقى عندك خمس أزواج حتة واحدة ، مع إن كل تترات المسلسل تؤكد إنهم أربعة بس .. لكن نقول ايه؟ ماهو معاها فى نفس الموسم مسلسل عايزة أتجوز ، يعني حقها تخمس فى وشنا يا جماعة برضه .. حقها ولا مش حقها؟ .. حقها يا أبو كمال ، حقها ياخويا

42 comments:

  1. هاهاهاها ..مفكرتش ابداً اشوف المسلسل لأن توقعاتى مخرجتش أبداً عن اللى انتى كتبتيه ....

    الحمد لله اللى نجانى ..تستاهلوا انكم بتتفرجوا ع الحاجات دى :))

    حلو البوست كالعادة يا سمسم

    ReplyDelete
  2. ههههههههههههههههههههههههههههههههههههههههههههههههههه
    فظيغةةةةةةةةةةةة بجد
    هلكتيني من الضوحك
    هو انا حقيقي ماشوفتش المسلسل
    ولا ناوية يعني لاني عقبال عندكم جميعا خفيت من فيرس المسلسلات من 3 سنين كده
    بس اخدت عنه فكرة وافيه منك
    ههههههههههههههههههههههه
    ولتحيا الست زهرة ويموت ازواجها وولادها
    ههههههههههههههههههههه

    ReplyDelete
  3. عندك حق بجد

    وفعلا أنا مستغربة من كمية الرجالة المعجبين بيها بالشكل العبيط ده

    ولا العيال اللى بتختفى ولا تعرف عنهم حاجة

    جامد بجد البوست ده

    ReplyDelete
  4. هاهاه
    يا جامد انت
    موضوع الخمسة دا اكيد له اصل واساس
    امال ايه
    اصبرى انتى بس لاخر المسلسل
    :))

    ReplyDelete
  5. Great Post
    Keep going
    waiting 4 the next one :)

    ReplyDelete
  6. كانت تسلف عريس واحد منهم للي بتموت كل يوم وعايزة تتجوز دي

    ReplyDelete
  7. تسلمي بجد بجد جبتي اللي في نفسي
    مسلسل يفقع

    ReplyDelete
  8. واو
    هو طلع الموضوع كده؟
    طيب الحمد لله إني مش متابع حاجة
    صحتي ما بقتش تستحمل الحاجات اللي تجيب الضغط دي
    :-)

    ReplyDelete
  9. ادينا مع الكداب لحد بابا البيت
    لما نشوف اخر الحاجه زهرة واجوازها ايه

    تحليلاتك مطقيه ... بس اكيد المعنى فى بطن الشاعر... ولا ايه؟؟؟؟

    ReplyDelete
  10. يعني ايه تبقي الحاجة زهرة
    يعني جوزك يطلع طلاقك منه باطل وانتي لسه على ذمته ومع ذلك سايبك تجربي رجالة تانين وبيقول عاوزك تعرفي غلطك لوحدك وترجعي بمزاجك ولا بيطلقك ولا بتعتبري طول الحلقات زانية

    يعني ايه تبقي الحاجة زهرة
    يعني المسلسل يتعرض على الأزهر فيقول عادي وكول وأول سايز وماشي وممكن يتصور ويكون الأعلى مبيعا وتوزيعا وأعلاناتا في الوطن العربي الشريف ابن الشريف

    يعني إيه تبقي الحاجة زهرة
    تلطعي على ايد وشم العزيمة
    وعلى الإيد التانية وشم الإيمان
    وعلى صباعك وشم رقم سبعة علشان ده الحظاظة بتاعتك
    ولما يسألك عمرو اديب تقولي دول هم اللي ظاهرين وترقعي ضحكة ذات شجون ومعاني تحلل كل الجوازات بصراحة وتفهمنا ليه خمستي في وشنا


    كل سنة وانتي طيبة

    ReplyDelete
  11. ايه يا جماعه النفسنه دى الست حلوه واموره واثبتت بالشكل العملى ان ما فيش مشكله عنوسه عرفتوا بقى ليه هند صبرى مش لاقيه عريس لان زهره خدتهم كلهمانا خايفه بعد رمضان يقولوا ان المسلسل نجح نجاح غير عادى وهيعملوا جزء تانى فتحسبا لاى ظروف كل واحد يحافظ على جوزه ليروحوا يتجوزوه وبعدين نعمل ايه فى هند صبرى هنجيب لها عرسان منين

    ReplyDelete
  12. هههههههه
    عندك حق والله
    كل الحاجات اللى مجننانى
    انتى قولتيها ياياسمين
    وخصوصا كل ماتتجوز واحد هوووووووب تجيب منه عيل
    ههههههههه
    والاكاده ولا بيبان عليها
    وبعدين الزوج الخامس ده ......فزوره
    قالوا يستغلوا لبس وماكياج ورقص الحاجه
    ويبقى مسلسل وفزوره فى آن واحد
    ههههههههه
    والجايزه قميص وروب من فضله خير الحاجه

    ReplyDelete
  13. يعني ايه الحاجة زهرة؟ بقى
    هو فى إيه ؟
    سيبك من التفاصيل دى المهم هدف العمل
    اللى هو بقى؟

    ReplyDelete
  14. هههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    يخرب بيت شيطانك
    خلتينى افطس من الضحك على البوست
    انت تحفه

    اولا اعذرينى على تقصيرى معاكى
    بس ان شاء الله مش هسيب بوست الا لما اجى واقراه

    كل سنه وانت طيبة

    ReplyDelete
  15. تحفة بوست رائع جدا تسلم ايديك يا انسانة
    وكمان دكتورة ستيتة عندها حق تكملة رائعة جدا خصوصا موضوع الازهر ده مش عارفة موافقين على المسلسل ازاى
    ده مسلسل مستفز جدا

    ReplyDelete
  16. يا جماعة الزوج الخامس دا هايعملوا عليه سحب في اخر رمضان و اللي هايكسب يتجوزها و يعيش في خيرها .ْْالحق و اتصل ب 0900900900900900

    ReplyDelete
  17. هههههههههههههههههههههههههههههههههههههههههههههه

    موتيني من الضحك بجد

    عادي المخرج عاوز كدااا

    ReplyDelete
  18. النفسنه والحقد بقى على زهره هههههههه

    ReplyDelete
  19. بوست هايل :))

    بس نسيتى تقولى إن الحاجة زهرة يعنى حسن يوسف يرجع للتمثيل بعد "إمام الدعاه" بقضيتك الاجتماعية الخطيرة اللى مفيش أهم ولا أبرز منها فى المجتمع

    ReplyDelete
  20. السلام عليكم
    متابعة مدونتك من زمان ، بس أول مرة أرد فيها : )

    أكتر حاجة خنقتني في السلسل دا هو الأطفال المهمشين دول اللي ملهمش صوت ، دا غير إن المسلسل كله يفقع !
    صدقتي !

    ربنا يكرمك يارب يا إنسانة :)

    ReplyDelete
  21. انتى بلوى :D
    فعلا زهرة بتنقطنى !

    "الكلمـة نـور .. وبعـض الكلمـات قبـور"
    باحب القصيدة دى اوى :)

    مدونتك جميلة
    هاجى هنا كتير .. ان شاء الله
    كل سنة وانتى طيبة
    :)

    ReplyDelete
  22. انا محولتش اتفرج ع المسلسل من البدايه الواحد مش ناقص فقع مراره
    دى فاكرة نفسها سوبر وومان مش الحاجه زهرة!!!!!
    قال حاجه قال

    ReplyDelete
  23. مسلسل قمه الوضاعه والسوء قائم علي الابتذال والهلس

    بالظبط زي الحاج متولي

    المصريين مشغولين بامور تعدد الزوجات والازواج لان عندهم هوس بالجنس لكنهم مابيقولوش ده صراحه ابدا
    ربنا يشفيهم

    ReplyDelete
  24. :D
    ابلتي زهرة دي اسطورة زيها زي سوبر مان مستر اكس .. احمد عدوية
    حاجة خارقة للطبيعة والاحياء والكيميا العضوية ..

    ReplyDelete
  25. هههههههههههه
    فكرتيني بواحدة صاحبتي
    كانت مسمياها زفتة وازواجها الخمسة
    ههههههههههههههههه
    (:
    كل سنة وانتي طيبة

    ReplyDelete
  26. بجد بجد إنتى كدة مجاملاها أصلاً .. ز كجاملة المسلسل ..
    المسلسل ده لو اتعملوا نقد من الألف للياء هيحتاج مجلدات ..


    وكل سنة و حضرتك طيبة جدا :)

    ReplyDelete
  27. والله أنت عسل ضحكينى موووووت
    على فكرة أنا ماشفتش غير مشهد فى أخر حلقة وجالى ذهول
    بس بجد أنت عسل
    نورتينى لما جيتى المدونة
    يارب تنورينى دايما

    ReplyDelete
  28. عجبتني كلمة انه عيالها انفيزبول أول ذا تايم ههههههههه

    لاحظت كل كلامك ده من أول ما شفت المسلسل في رمضان .. والله ما كنت ناويه أشوفه لكن للاسف تابعته من خلال اختي و متابعتها له

    شايفه علامة الاستفهام اللي في التتر من بداية المسلسل و عايزه اعرف بس مين الزوج الخامس .. اشتريت كيلو ليمووووووون و بقيت كل يوم اعصر على نفسي لمونه لغاية ما اشوف مين الزوج الخامس

    خلص رمضان و خلص المسلسل - أشهد أن لااااااااا إله الا الله - و طلعت نهايته سخيفه جدا مع خالد يوسف المخرج .. حسيت كأنه حد خبطني على دماغي أو قال نكته بايخه خلتني وقعت في الارض أسبوع
    :D

    هي عامله كل المسلسل ده عشان تتجوز خالد يوسف ؟؟ طب ما تروح تتجوزه و ترحمنا من الاستهبال اللي شفناه من الاول !! حتى كانت وفرت عليا كيلو اللمون اللي جبته هههههههه

    ده مش منظر مسلسل .. و حكم القاضي من الاول كان معروف عنها .. مش حالة مستعصيه او كانت متعمداها .. بس هي تكملة لسلسلة سوبر مان لكن على وومن
    :D

    غاده عبد الرازق ظاهره في المسلسل بس عشان تحس انه مفيش حد يجي عندها وما يحبهاش .. ده غير استعراض الازياء و نفخ السيليكون و الذي منه
    :D

    لو كانوا جابوا المحامي بتاعها هو اللي بقى جوزها كانت هاتبقى اهون بكتير .. هايكون مسلسل بايخ بس على الاقل ما ينتهيش بقصه من قصص الخيال العلمي ههههههه

    تسلمي على البوست الجميل ده
    ;)

    ReplyDelete
  29. والله انا كل شوية اقول هو فين عيال الست دى؟ كأنها مش مخلفة خالص ... ولا حتى اتبنتهم .. ولا لقتهم قدام باب الجامع ... هم فعلا انفيزابول يا بنتى .... والغرابة ان ام الحاجة زهرة بقى كان مفروض يعنى تشيل العيال .. او هكذا يبدو للمشاهد .. انما على مين؟؟؟ الظاهر الكاتب كان راجل

    حلو البوست

    ReplyDelete
  30. يعني يبقى عندك 3 أولاد فى سن حديثة ولا يطرف لك رمش عليهم ولا ترضعي ده ولا تسكتي فى ده ولا تشقري على ده ، ناهيكي بقى عن البامبرز والتكريع والتهشيك والذى منه

    ، أولاد الحاجة زهرة إنفيزيبول أول ذا تيم


    هههههههههههههه
    عثل والله يارب يبارك فيكى
    كلامك سكر
    استأذنك
    فى اضافه مدونتك
    والمتابعه


    دعوه خاصه ليكى

    elbanany.blogspot.com

    ReplyDelete
  31. من عجائب القدر في رمضان

    ان المسلسلين الأكثر مشاهدة

    واحدة طول مسلسل 30 حلقة بتدور على عريس

    و التانية طول مسلسل 30 حلقة بتغير في عرسان و لا كأنها بتغير في هدومها

    بس المشترك ان الاتنين قمة الإسفاف و الإستخفاف و الإستظراف

    يعني اية الحاجة زهرة
    يعني رايحه تحج بملابس الاحرام و فول ميك اب روج و احمر خدود و مكحلة عيونها كحل يكحل عائلة بحالها
    و نص شعرها باين من تحت غطاء راسها

    يعني اية الحاجة زهرة؟؟

    والأدهى و أمر بقى يعني اية الحاج فرج ابو اليسر

    يعني حاج يعرف ربنا و بيزور بيت الله و السبحه مابتفارقش ايدة
    و طول المسلسل مافيش في بقى الا كلمة "تاخد كام و تخلع" لكل زوج علشان يسيب مراتة "للحاج" يتجوزها

    الراجل دة ماسمعش ان "ولا يخطب احدكم على خطبة أخية"

    و مخدرات و حرق مخازن و حرق بضاعه في السوق لإضرار ناس و افلاسهم

    صورة قميئة لكل نصاب متخفي في عباءة الدين

    تحياتي

    ReplyDelete
  32. ههههههههههههههههههههههههههههههههههههههههههههههههه اول نقد يدخل دماغى كدا
    برافو عليكى
    تحفة والله

    ReplyDelete
  33. أسلوبك جامد جدا
    ربنا يوفقك

    ReplyDelete
  34. ربنا يجعل كلامنا خفيف عليكي قبور ايه يا حببتي بس هههههه

    اولا كلامك مبزوط اوي
    تحفة ناقدة بارعه انت مفروض من افضل النقاد النقاد اللي بجد مش اللي يقلك اصل المش عارف ايه ماكنش متوافق مع المش عارف ايه
    بجد برافو و هو المسلسل باين من عنوانو بس بجد بوزو علينا عايزة اتجوز مفروض كان مسلسل هند صبري ياخد الصدارة لوحدو لانو واقعي و محترم اكتر من مسلسل اللعب باصول الدين ده

    عايزة منك تزوريني فمدونتي و تديني رايك يا ناقدة لان عاملة سلسلة حكايات واقعية بس بطريقة قصصية كوميدية و عايزة راي الكبار زي حضرتك مستنياكي

    ReplyDelete
  35. هو المسلسل ده ان دل دل على تفاهه اه بجد .. واحده طلعه تعمل ديفليه بلبسها وعيونها وجمالها الفتاك والمصيبه بقى تيجى تساليهم يقولولك بنقدم رساله وفن
    طيب بقى ايه الرساله من ده مسلسل
    انا اقولك انا الراجل يبص لمرته يقولها شايف الستات ياختى ويطلقها ويدور على حج زهره وتتجوزوا ويبقى السادس هههههههه

    ReplyDelete
  36. مدونتك عجبتنى جدا بجد ويشرفنى انك تنورى مدونتك واعرف رايك فيها
    http://day-from-mylife.blogspot.com

    ReplyDelete
  37. ممتاز اختى عمل رائع
    http://hend-moments.blogspot.com/

    ReplyDelete

الكلمـة نـور .. وبعـض الكلمـات قبـور