Wednesday, March 23, 2011

استقروا يرحمكم الله


كلما سمعت كلمة: انا صوتت بنعم عشان الإستقرار ، وقبل منها: ربنا يستر بقى خلى البلد ترجع تستقر زي ماكانت .. أتحسس لساني وآخذ فى وصلة دعاء مستمرة على الرئيس المخلوع مبارك لما فعله فينا

هذا الرجل الذى شربنا الإستقرار بالمعلقة لمدة 30 عام .. إستقرار عائم فوق بركة من العفن والفساد والسرقة والقتل والتعذيب والغش والفساد السياسي والإذلال والإبتذال وكل ما شئت من معاني مهينة جعلت المصري يعيش فى بلده وخارج بلده بلا كرامة ، بلا حقوق ، بلا معنى ، بلا لازمة

مبارك شربنا الإستقرار لحد ما اتكرعنا .. أدمنا الإستقرار .. أصبحنا نعيش ونتغذى على الإستقرار ، نشربه شرباً ونأكله أكلاً .. مرة بالجبنة ومرة وباللحمة ومرة بالصلصة ، ننشده ونبحث عنه ونرغب فيه أكثر مما نرغب فى تنظيف البلد من الفساد وإستكمال الثورة ، مبارك يمشى والفساد يخف بس والنبي سيبولي الإستقرار ده انا ماليش غيره .. أنا مستقر إذن أنا موجود

ماذا جلب لنا الإستقرار 30 سنة؟ لا شئ .. 30 عام ستذكرهم كتب التاريخ كأن شيئاً لم يكن .. وإن كانت كتب تاريخ عندها ضمير شوية هتوصف الفترة دي بأبشع الأوصاف 

كيف نبحث عن الإستقرار فى حين يضرب ويهان مواطن مصري حاصل على جائزة نوبل فى عز النهار؟ ، نبحث عن الإستقرار وآمناء الشرطة كل ما يحبوا يتظاهروا تحصل حريقة .. مظاهرة إشعال ذاتي يعني


ثم نستمر فى البحث وهناك تسريبات أمنية عن نية رجال العادلى فى قتل بعض الرموز المصرية وتأديب البعض الآخر .. هل بطئ المجلس الأعلى للقوات المسلحة هو الإستقرار المرجو والمنشود؟ هل شباب الثورة اللى حرروا مصر أصبحوا كخة الآن وثورجية وعايزينها تولع واوعوا تسمعوا كلامهم؟ لا ينقصنا سوى ان يضرب كل أب على يد إبنه ويوبخه على إستمراره فى الثورة قائلاً: فى شاب مؤدب مستقر يعمل اللى انت بتعمله ده؟!!!!ا

 ومع التنقيب عن الإستقرار نفاجئ بمن يخلط الدين بالسياسة بشكل يخدم مصالح أفراد بأعينهم كما تفعل مثلا قناة الحياة فى كل فاصل من فواصلها التي تذيع فيه كلمة للشيخ الشعراوي متحدثاً عن ضرورة ترك الثائر لثورته بعد أن تحقق الثورة مطالبها .. فين المطالب دي اللى اتحققت عشان نخلص الثورة؟ الشيخ الشعراوي نفسه لو كان عايش كان هيقول الثورة لسة ما كملتش أساساً

على كل حال إطمئنوا فقد وصل الإستقرار إلى الثورة والكل يعمل على إخمادها جاهداً حتى تستقر هي الأخرى ، إشمعنى هي يعني؟ ، لذلك أرجوك عندما تشعر بإستقرار الثورة وضرورة توقفها تذكر شنب صفوت الشريف ونظرة سوزان مبارك وضحكة جمال مبارك ومناخير زكريا عزمي .. إفتكر إن كل دول لسة بيمرحوا وبيبرطعوا فى البلد كأي مواطن مصري صالح وإنت تستقر من جواك خالص وتحلم بيه وإنت نايم كمان

شوية إستقرار ع الماشي بقى: إبقى وقع على هذا البيان الحقوقي للمطالب للقبض على صفوت الشريف وفتحي سرور وزكريا عزمي وخلي كل معارفك يوقعوا عليه

ولمزيد من الإستقرار إقرا مقال بلال فضل بتاع النهاردة

7 comments:

  1. الاستقرار لا يفنى ولا يستحدث من العدم ..

    نظرية برضوا ...

    ReplyDelete
  2. افتكر ان قيادتنا لازم تتحلى بالعقل .. محتاجين خطوات سليمة مدروسة فى كذا اتجاه

    يعنى اتجاه إلى الاستقرار .. اتجاه فى محاسبة كل سارق .. اتجاه إلى تسليم السلطة كما اراد الجيش والشعب .. اتجاه إلى توعية الشعب

    اتجاهات تخمد الحرب الفكرية التى يشنها كثييير .. وللأسف إلى الأن نجحوا بطريقة كبيرة

    ربنا يعدى الفترات دى على خير إن شاء الله

    ReplyDelete
  3. صحيح خلونا نتكرع إستقرار
    بس انهي إستقرار
    إستقرار قانون منع التظاهر و الإعتصام و لا إستقار إقتحام الشرطة العسكرية بالمدرعات لجامعة القاهرة و فضها بالقوة لإعتصام طلاب كليتي الإعلام و دار العلوم

    دا الأمن المركزي في عزه عمره ما إقتحم الجامعةو كان بيسيب المظاهرات جواها بشرط ما تطلعش للشارع بره

    دا احنا بايننا حنشوف إستقرار ما يعلم بيه إلا ربنا

    ReplyDelete
  4. مجرد اقتراح إلي كل من يملك منبراً لتثقيف الناس ورفع درجة وعيهم بما يتناسب مع المرحلة الحالية وما نحن مقبلون عليه من إعادة تكوين دولة وتشكيل ثقافة وطن بالكامل. ثقفوهم يرحمكم الله. النداء الأخير لكل الشرفاء من مثقفغي ومدوني وإعلاميي مصر الغالية قبل إقلاع الفرصة

    ReplyDelete
  5. بوست رائع ياانسانة
    رغم اني قلت نعم برضه علشان الاستقرار
    ومؤمن بصحة موقفي وقوايا العقلية ههههههههه
    لكن البوست جميل
    خالص تحياتي
    موجة
    منتظر زيارتك لموجة
    احمد

    ReplyDelete
  6. ياجماعة كل واحد فى مجالة اذا كان صعب دلوقتى الانضمام لهيئات أو عمل مؤتمرات توعيه يبقى كل واحد مننا فى مجال شغله يوضح الرؤية للناس بدون تعقيد لأن للأسف فيه موظفين وناس عادية مش عارفة ايه اللى بيحصل عايزيين نركز شويه لأن الوقت ضيق .. لازم نبذل مجهود اكتر من كده فى الواقع مش على المدونات بس ... و ربنا يحمى مصر

    ReplyDelete

الكلمـة نـور .. وبعـض الكلمـات قبـور