Wednesday, April 13, 2011

أنا الشعب


3 نوفمبر 2009 كنت خارجة من المستشفى بدون طفلي .. تحيطني العيون الباكية والقلوب المتأثرة والمعذية .. كنت أنظر لهم بلا مبالاة مُدعية الفرح قائلة: " الحمد لله .. إترحم من عهد مبارك " ، دائماً ما كانت تقابل هذه الكلمات بإندهاش واضح وصريح وكأن لسان حال المُتلقي يقول: هما ضربوها على دماغها وهي بتولد ولا ايه؟ الولية إتجننت

5 يناير 2011 خرجت من المستشفى مُنهكة .. الكل يبتسم ويهني وانا أموت فى الثانية ألف مرة من الإعياء .. بعد 20 يوم فقط من ولادة إبني الثاني (أنس) خرجت الثورة فى يوم ميلادي الذي كان فى يوم عيد الشرطة سابقاً عيد الثورة حالياً ، عندما أخبرت أصدقائي على تويتر أن يوم الثورة هو يوم ميلادي .. أجابني أحدهم : السنة دي هديتك مصر .. وكان راجل بمعنى الكلمة وحقق وعده

بعد سنتين من إنطفاء أول فرحتي عادت الفرحة .. عوضني الله بطفل آخر وعهد بلا مبارك فى آن واحد ولله الحمد .. والعجيب فى الأمر أن الطفل الجديد كان لا يكف عن البكاء إلا على أصوات الهتاف التي أظل أرددها له حتى يذهب فى النوم .. تغيير .. حرية .. عدالة إجتماعية .. يهدأ قليلاً ثم يصرخ معلناً عن حقه فى تغيير البامبرز فأغيره له وينام

ظلت غصة فى حلق أم الشهيد وهي القصاص العادل ، لم نكف عن الإبتسام والفرحة ونحن نرى فيديوهات ترحيل الحرامية لسجن طرة فنظل طوال اليوم نغنيها ونهلل عليها وكأنها رقصة العمر والفرح كله .. عندما يبكي أنس - إبن الثورة - نهرع إليه لإقافه عن البكاء ولساننا يردد : زكريا عزمي .. حراااااااااااااامي .. فيسكت ، ويذبهل ويندهش ثم يضحك فى الآخر

أتذكر كل ذلك الآن ولا أتمالك دموعي من الفرحة وحمد الله على كل شئ ، من فرحتي بخبر حبس مبارك وولاده حاولت تعلم التورتة لتكون حلاوة حبسهم .. بس بصراحة مش قيمتهم خالص وخسارة فيهم بجد .. إن شاء الله هتعلمها لما أنس يكبر عشان ياكل منها وأحكيله على مبارك وبلاويه

كان ياما كان

كان في حاكم فسدان

إسرائيل مسلطاه علينا

هو وماما سوزان

قتلنا كلنا

كُبار وصغيرين وشُبان

حرمنا بجد من كل حاجة

حتى الإحساس بالأمان

حكمنا على حكمه بالنهاية فى الميدان

والحمد لله عشنا لحد ما شوفناه

هو وولاده فى اللومان

وسمعنى أحلى سلام مصر تتحدث عن نفسها وتقول:

كايدة العُزال أنا من يومي .. إيوة آه

لولولولولولوليييييييييييي

وشرم رجعت سالمة لينا وشرم اليوم

تن تن تن تن

شرم اليوم فى عيييييييييد

هيييييييييييييييييييييييييه

26 comments:

  1. هههههههههه

    إستفسار صغير : هو ده قصة فانتازيا ولا حقيقة ؟؟

    ReplyDelete
  2. هههههههههههههههههههه حلو البوست ده يا ام انس والف مبرووووووووووك لانس انه طلع في ايام غير مباركية والله انا دايما اقول احنا خلاص مش مشكلة عمرنا راح مع عصابة مبارك اهم شئ ولادنا يطلعوا في عصر جديد

    ReplyDelete
  3. القصة حقيقية يا أستاذ أنس :D

    ReplyDelete
  4. يا رب يبارك لكم في أنس و يتربى في أحلى مصر
    مبروك علينا كلنا أخبار النهاردة

    منى

    ReplyDelete
  5. تسلم ايديكي و ربنا يعوضك و يعوضنا كلنا و يباركلك فى انس

    ReplyDelete
  6. حلو اوى وربنا يحفظلك ابنك

    ReplyDelete
  7. مبروك عليكي أنس ومصر
    وربنا يخللي انس ويجعلنا نشوف مصر احسن بلد ف الدنيا

    ReplyDelete
  8. الحمد لله اللي رحم الأول وكرم الثاني وفرح قلوبنا كلنا. برضه الحمد لله قلتها لما فقدت أول فرحتي بس الحمد لله...ربنا أراد إن بنتي تتولد بعيد عن نظام حسني كله..وبقت مغتربة بمحل الميلاد :)


    الشعب...يريد...تغيير الحفاض... وبعد كده يترمي على حسني :)

    بقولك إيه, لو عايزة اغنية تانية لأنس...شوفي "الثورة زمانها جاية" ;) حبتعتهالك على تويتر

    ReplyDelete
  9. مبروك ولادة أنس ومبروك ولادة مصر من جديد

    ReplyDelete
  10. انا ام اياد واياد عنده 3 سنينكل يوم كنت بخاف عى مستقبله واقول هيعيش ازى فى الزمن ده ,والحمد الله فضل ربنا وشكرا لكل شهيد سقط فى عهد مبارك ,وربنا يسكنهم فسيحة جناته يا رب

    ReplyDelete
  11. بجد بوست تحفة وانتى اول حد اعرف منه بما انى لسة صاحية من النوم و يخليلك انس وتعيشى وتحكيله

    ReplyDelete
  12. الله يحميه ويخليهولك ويجعله من الصالحين علي فكره انا كمان بعمل كده مع بنتي عندها سنه وبتسكت وتتضحك على الهتافات وترقص على اغنية ازاي .. انشاءالله هيطلع جيل ثورجي صح عشان هيتربى على ايدنا .. انه يقول الحق ومايرضاش بالظلم ومايخافش من التخين طالما معاه الحق .. ربنا يقوينا على اصعب مهمه وهي تربيتهم عشان يصلحوا الامه كلها باذن واحد احد

    ReplyDelete
  13. يا ريت بقى لما تحبي تخليه ينام قولي له:ـ

    نام نام واسجن لك باقي الغربان

    ****
    ربنا يبارك لك في أنس ابن الثورة وينشأ ابن بار بيكي وبأبوه وبمبادئ الثورة :)

    ReplyDelete
  14. صراحة لا أجد تعليق يناسب موضوع فلقد أدمعت عيني وأنا اقرا كلماتك تسلم يديك علي هذا الموضوع وربنا يبارك لك في أنس ومن حقه كده إنه يصدع دماغك بالشخشيخة

    ReplyDelete
  15. شوفتى بقى ربنا كبير ازاى:)

    ReplyDelete
  16. علي رأيك شرم اليوم في عيد

    ReplyDelete
  17. اوعي تحكيلي قصة انس الفقي طيب

    لحسن يقلدة هههههههه ربنا يخلي انس ويكبر ويلاقي كل الخير الي اتحرم جيلنا منة وعلي رأي الراجل التونسي دة
    هرمنا هرمنا

    ReplyDelete
  18. ربنا يخللكم أنس يا رب ويعيش حياة كريمه معاكم ويتربه ف عزكم بعد الريس السابق ما شلناه ...

    ReplyDelete
  19. ربنا يبارك لك في انس
    و اللي بعد انس ان شاء الله
    و يحفظ لك اجرك في الصبر علي الفقيد الاول
    التفاؤل اصبح سمة سادت بين المصريين عكس التشاؤم الذي ساد قبلها و حتي قيام الثورة
    الحمد لله علي كل الاحوال

    ReplyDelete
  20. :D

    ربنا يباركلك فى أنس
    و يسعدنا ديماً ببلدنا
    ويبارك فيها من غير مبارك ولا أشباه مبارك :))

    ReplyDelete
  21. اولا الف مبروك لانس ويتربى ف عزك وعز والدو يا رب ثانيا انا بحبك جدا بجد وكنت متابعاكى لكن وقفت فترة ورجعت ادور على مدونتك لانها مش مجرد مدونة بضحكنا وبتفرحنا لا لانها كمان بتخلينى اعرف حاجات كتير نمكنتش عارفاها ولانك بتجسدى معنى الانسانية فارجوكى تقبلي اعتذارى لعدم متابعتك ف الفترة الاخيرة وانا عارفة ان قلبك كبير..شيماء اسماعبيل

    ReplyDelete
  22. أول مرة أزور مدونتك القيمة .. تهنئتي لك على المجهود المبذول والرائع..

    ReplyDelete
  23. جميلة جداً .. استمتعت بقراءتها ..
    وبهذه المناسبة اتمنى النصر لكل الشعوب المظلومة .. ليبيا واليمن والبحرين

    ReplyDelete
  24. ألف مبروك قدوم أنس
    واللي على وشه غار مُبارك
    وشك حلو يا أنس

    المُباركة دي متأخرة لكن أنا بحب أكتبها للتوثيق بس

    خليكوا فاكرين

    :-)

    ReplyDelete
  25. ربنا يخليهولك و تكون حياته احسن من حياتنا من غير مبارك و لا حد شبهه

    ReplyDelete

الكلمـة نـور .. وبعـض الكلمـات قبـور