Monday, May 23, 2011

صوتي يا بهانة المجلس بيستعمانا


لسة حاسة بالقهر ولوي الدراع بعد الثورة من المجلس العسكري .. إحنا عملنا ثورة عشان الشعب يكون له الكلمة الأولى ويتسمع كلامه ومايبقاش مهمش زي زمان .. بس للأسف إحنا لسة زي ما أحنا .. كل اللى حصل بس هو إنتقال للسلطة من مبارك للمجلس العسكري

كل اللى بيحصل دلوقتي مالوش غير معنى واحد بس .. إن إرادة الحاكم أهم وأقوى من إرادة الشعب وده اللى مش ممكن نرضى بيه أو نوافق عليه بعد الثورة تاني أبداً ، ناس كتير رفضت حكم المجلس العسكري للبلاد وطالبت بمجلس رئاسة مدني وماحصلش ، رفضنا وجود يحيى الجمل كنائب لرئيس الوزراء ولسة موجود لحد النهاردة ، قولنا التعديلات الدستورية مش هتنفع وقالوا لأ هي دي الصح وبعد ما خد موافقة الأغلبية عليها طلعولنا إعلان دستوري بـ60 مادة !

طب نخلي وضع الدستور الجديد قبل إنتخابات الرئاسة .. لأ برضه ، طب ليه التعديلات الدستورية من الأساس تتعمل فى غرف مغلقة ونجبر عليها .. مالكوش دعوة .. طب ليه تمشوا وزير الخارجية نبيل العربي الوحيد اللى خلى للمصري كرامة والشعب حبه وعمل مصالحة فلسطينية .. خليكوا فى حالكوا ، طب ليه بتحاكموا مبارك وحكومته والظباط اللى قتلوا المتظاهرين مدني وفى نفس الوقت بتقولوا على النشطاء بلطجية وتحاكموهم عسكرياً .. إطلعوا منها وهي تعمر .. طب حتى شاركونا فى صناعة القرار! .. إنت هتخرس ياض ولا أعورك؟

8 comments:

  1. حسبي الله ونعم الوكيل

    ويمكرون ويمكر الله والله خير الماكرين

    الناس دي بتعمل في الشعب كدا ليه
    الناس دي مش عارفه إن الشعب له صبر زي ما لهم صبر

    ReplyDelete
  2. اه احنا بالنسبة لهم عيال ومش فاهمين حاجة وهما عارفين مصلحة البلد اكتر مننا

    طب يعرفوا مصلحتها اكتر مننا ازاي ؟ هما شافوا اللي احنا شناه ؟ حد فيهم اتهان في قسم ؟ولا راحت عليه وظيفة عشان الواسطة ؟يعرفوا ايه عن الشعب ؟

    تحية لك سيدتي .. واتمنى ان يوفق الله مصر واهلها

    ReplyDelete
  3. هخرس يا باشا

    احم احم
    سلامو عليكو

    للاسف المجلس العسكري ما اتعلمش من غلطات النظام السابق
    وهي انه برضو لسه مهمل ارادة الشعب
    ومش مصدق اننا زي ما غيرنا النظام ممكن نعمل اي حاجة
    واللي كان مستحيل خلاص بقي عادي
    وبقي ممكن يتعمل
    اتمني المجلس العسكري يبص مرة لمصلحة الشعب ومصلحة مصر
    يخافو عليها بجد زي ما بيفهمونا

    وعشان خاطر كل مواطن مصري

    حاكمو المجرم

    سلامو عليكو

    ReplyDelete
  4. هم يراهنون علي نفاذ صبر الشعب المصري .. مما يحدث .. حتي يترحم علي ايام المخلوع .. - الله ربنا يخلعه من الدنيا علي ايدين عشماوي - .. ولايرون الصورة كما هي واضحة .. ان الشعب المصري الذي مل من الظلم والطغيان .. لن يرجعه عن طريقه مهما حدث
    وقلنا سابقا ان الثورات لا تموت ... كل ما هناك انها تهدأ .. لتعود مرة اخري اكثر هدرا .. واكثر قوة حتي تحقيق اهدافها ... يارب يفهموا الكلام ده .. ويجنبوا مصر .. مزيدا من الويلات
    تدوينة جميلة ومعبرة رغم انها قصيرة وموجزة
    ربنا يوفق مصر وثوار مصر .. وثورة مصر ... والسلام عليكم

    ReplyDelete
  5. لأننا نحبك ........مش هنستناك 30 سنة

    عشان بنحبك مش عايزين نعمل عليك ثورة ،عشان كده لازم تسمعنا
    مينفعش تصدر قانون وتاني يوم نتحاور عليه
    مينفعش نقول عايزين محاكمة مبارك نلاقي غموض بالونات تقول ايه رأيكم نعفو عنه
    ...مينفعش مصابو الثورة والشهداء يستجدوا عطف الحكومة وعطفكم
    مينفعش نأمن ماتشات الدوري والكنايس بتتحرق وتشتعل الفتن بيننا
    مينفعش في أول حاجة نعبر فيها عن نفسنا أما سفارة الصهاينة يبقي أول حاجة نشوفها منك الرصاص الحي والشرطة تقولنا انزل علي ركبك يا ابن ......
    مينفعش نبقي مش عارفين دايما هو بكره في ايه وكل واحد بيجتهد وانت في الآخر بتفذ اللي انت شايفه صح

    عشان كل ده وحاجات تانية كتير وعشان نفضل حلوين مع بعض لازم يكون في مجلس مدني نقدر نتكلم معاه ونضيف ونشيل منه أكيد انت عارف كويس إن مش بعد ما الناس ماتت واتصابت هنفرط في أغلي حاجة نملكها أو يمكن ما نملكش غيرها وعشان كده كفاية جدا 3 شهور ومتحلمش بأكتر من كده

    ReplyDelete
  6. الله المستعان ربنا يصبركم

    ReplyDelete
  7. حالك يصعب على الكافر يامصر
    ربنا ينجيكى
    http://www.4exvision.com

    ReplyDelete

الكلمـة نـور .. وبعـض الكلمـات قبـور