Monday, May 30, 2011

عزيزي القارئ .. فاكرني؟



كاميكاز حبيبي .. سلامات ، كيفك كدة؟ إزاي الصحة؟ طيبون؟

انت مين ياست إنتى؟

إخص عليك يا كوكو خلاص نسيتني؟ ماكنوش كام السنة اللى نفضتلك فيهم دول .. عموما هفكرك ، انا اللى قعدت أرغي السنة اللى فاتت ومسكت ودانك وقعدت ألوك لوك فيها شهر بحاله ، يوم يوم .. حرف حرف .. زنجة زنجة

ايه؟ مالك؟ .. شايفاك كدة إتخضيت وزي ماتكون خايف من حاجة ، لا ماتخافش ده كل الحكاية إنى هرجع أدون يوماتي زي ما عملت السنة اللى فاتت بالظبط

يالهوي؟ حرام عليكي يا شيخة إنتى ماعنديكش كاميكازات صغيرين ولا ايه؟

إحم يلا ما علينا .. انا عارفة انك بتغلس عليا ومش قصدك كدة خالص وإنك منبهر ومندهش ومش مصدق نفسك من عبقريتي الكتابية الرهيبة ، مش كدة؟

لالالا انا ماقولتش كدة خالص بلاش تكتبي أحسن إلهـي ... ا

فجأة تقمصت دور مذيعين القناة الأولى لما بتحب تقاطع الضيف أول ما يلبخ ويخبط فى الحلل : أيوة أيوة فاهمة قصدك .. إنت طبعا تقصد تقولي ياريت أعملها طول السنة .. إنت عارف بقى مشاغلي بقى وكدة

لا بس أصل الصداع زيادة اليومين دول من حنفية الأخبار اللى مابتخلصش دي ومش ناقصة صداع الحكاية

يا شيخ خضيتني .. لا دي بسيطة خالص .. إشتري بنادول إكسترا!!! ، سيبونا ناخد فرصتنا بقى .. أكتب براحتي وابعبر عن مكنونياتي ويبقى الرغي للركب بقى وهييييه

مين ابن التيـــــت اللى فكرها بيا بس؟؟؟؟؟؟

ايه؟! تعالى هنا .. بتتنيل تبرطم تقول ايه؟

ولا حاجة ياست الكل .. ولا حاجة .. مدونتك ومطرحك

آه بحسب .. بعد بكرة من النجمة ألاقيك قاعد قدام باب المدونة مطرطق ودانك وغاسلها كويس ومتسني الدرر اللى هقولها .. آه وقبل ما أنسى .. طبعا مش محتاج أفكرك تنفض المدونة تنفضية العيد لإن حملة التدوين اليومي دي موسم وبتجي من السنة للسنة ومش عايزة الزباين وخصوصا عزيزي القارئ يجوا ويلاقوا المدونة متربة كدة .. وتنضف بزمة .. فاهم ياض؟ا

6 comments:

  1. من كاميكاز الأول إلي إنسانة
    أنا كمان قاعد لي شهور بانفض واروق وامسح المدونة وما فيش حد بيدخل ويسيب كومنت واحد. الظاهر ده بسبب النضافة الزايدة والناس بتخاف تسيب حاجة وراها في المدونة أحسن اطلع اجري وراهم. سعدت بقراءة البوست الجديد-شقي جداً- لك. برجاء الزيارة علي
    http://alasfouriah.blogspot.com/

    ReplyDelete
  2. والله وحشتيني يا انسانة ونفسنا من زمان نشوفك كل يوم ع النت وانتي بدوني وترغي في الفاضي والمليان وعلي راي اخونا كاظم كلك علي بعضك حلو تكتب حلو ترغي حلو

    ReplyDelete
  3. كنت جيت قبل كده
    ولقيت اخر بوست من زمان أوي

    بس واضح إن اللي غبت
    بس جيت أتبسطت أوي إنك رجعتي
    منورة :)

    ReplyDelete
  4. ههههههههههههههههه ... عجبتنى الصوره أوى .. حنزل حالاً أجيب بنادول إكسترا

    ReplyDelete
  5. السلام عليكم
    انا كمان نفسى اشارك معاكو السنة دى :
    مدونة بداية جديدة
    http://betternewstart.blogspot.com/
    شيماء جوده

    ReplyDelete
  6. أنا أكبر مُشجع لأن لا نهجر التدوين، لكنَّ موضوع أن ندوّن يومياً هو أمر صعب للغاية للكاتب والمُتابعين معاً، فعدد المدوَّنات أصبح من الكم الرهيب الذي يصعب مُتابعته يومياً، كما أن اعتصار الذهن لكتابة شيء ما كواجب يومي هو أمر مُرهق للغاية

    عموماً، أتمنى لكِ أن تواظبي على ذلك دون ملل، وأن تجدي كل يوم الجديد الذي تبدعين في كتابته

    أحمد القاضي
    يا مراكبي
    http://yamarakby.blogspot.com/

    ReplyDelete

الكلمـة نـور .. وبعـض الكلمـات قبـور