Friday, September 28, 2007

أشرقت نفسى



عرفت الوحدة طريقها لحياتى من فترة ، يمكن كان بشكل تدريجى بس فى النهاية هى الوحدة، احساس عارم ورهيب بالوحشة والفراغ القاتل وعدم الأنس بأى شئ ، واشعر بها قوية هذه الوحدة من الساعة 10 بالليل بالظبط فى رمضان ، لما ينام بابا وماما ويخرج اخويا وافضل صاحية منتظرة معاد السحور عشان اسحر والدى واصلى الفجر وانام ، وحدة تكاد تقتلنى .. ياااااااه .. هو انا ضيعفة اوى كدة
.
فى يوم اتصلت بواحدة من اقرب اصدقائى الى قلبى ، اتكلمنا شوية وابتديت احس ان الوحشة حتروح شوية بشوية ، فجأة لاقيت اختها بتناديها وعايزنها فى حاجة، استأذنت منى ونبقى نكمل كلامنا بعدين
ورجعت تانى لوحدتى ، حاولت اكلم باقى اصحابى حتى صديقة قديمة من ايام المدرسة .. مالقتش حد ، اللى مش موجودة واللى بايتة برا واللى جرس ومحدش بيرد..الحمد لله على كل حال
.
قعدت على النت من تانى رغم شعور الملل اللى بدأ يسيطر عليا تجاهه وتجاه التلفزيون ، لاقيت اخ واخت ليا اون لاين وحاولوا يعملوا كونفرنس ونتكلم كلنا سوا .. وقد كان وحكيتلهم على صحابى اللى مش لاقياهم وانى حاسة انى لوحدى فى الدنيا، حاولوا يخففوا عنى وقعدنا نتكلم حوالى ربع ساعة مش اكتر .. البنت اختها عايزة الجهاز ضرورى فأضطرت تقوم والولد جاله تليفون وحيقوم
.
جه فى بالى ساعتها صوت بيقولى : ليكى مين غيره؟؟ لا أب ولا أم ولا أخ ولا أخت ولا صحاب ولا اى حاجة بقيالك ، مالكيش فى الدنيا دى كلها غير ربنا ، ليه بتخبطى على ابواب تانية وناسية بابه هو؟؟ه
.
لاقيت نفسى بفتح المصحف وبقرا فيه كلامك ، ربنا اللى بيتكلم معايا .. ياااااااااااااااااااه ياالله
انا ليه بعدت وازاى بعدت ومين اللى بعدنى عنك
فين كنت انا من الجمال والحب والراحة والأمان ده
.
كنت مكروبة ورزقتنى بالحل ومشكلتى بتتحل اهيه بفضلك وكرمك
كنت بعيدة وموجوعة من بعدى وقسوة قلبى وبشتكى منها .. قربتنى ليك يارب
اخيرا الدموع عرفت طريق عينى ليك يارب .. اخيرا دوقت الطعم اللى احلى من الشهد يارب
.
سبحانك ولا تقال إلا لك
.
ليس العجب فى ان احبك وانا العبد الفقير ولكن العجب كل العجب فى ان تحبنى وانت الرب القدير
يارب .. ازاى مستشعرش عظمتك وانت قادر على كل شئ وانا امتك الضعيفة الفقيرة إليك
.
دينك نعمة وقرآنك نعمة وسيدنا محمد نعمة وحبي ليك وله نعمة ودموعى نعمة واهلى نعمة وخلقتى نعمة ورزقى من يوم ما اتولدت نعمة .. والله ما عارفة احصى نعمك يا الله
.
سلسبيل لما اتطعمت بحقنتين فى رجليها كانت تعبانة اوى .. البنت اللى كانت بتتنطط برجليها سبحانك مكنتش عارفة تحركهم وعمالة تعيط .. ساعتها قلت سبحانك يارب انت اللى قادر انك تخلينا نتكلم ونروح ونيجى وانت بردو قادر تخلينا مش قادرين على حاجة خالص .. يارب احنا فى نعمك ليل نهار ومش حاسين بيها .. يارب احنا وحشين اوى اوى وانت الغفور الرحيم
.
يارب ازاى محبكش وانت الكريم .. وازاى ابعد عنك وانت الودود اللطيف .. وازاى مدعيش وانت بتغضب على اللى مايدعيش
.
لا اجيد الدعاء وانت أعلم بي مني .. لما كنت ابقى عايزة ادعى الاقي يجى على بالى بسرعة دعاء سيدنا آدم عليه السلام
.
اللهم انك تعلم سري وعلانيتي فاقبل معذرتي ، وتعلم حاجتي فإعطني سؤلي ، وتعلم ما في نفسي فإغفر لي ذ نوبي ، اللهم ان أسألك إيمانا يباشر قلبي ويقينا صادقا حتي أعلم أنه لم يصيبني الا ما كتبته علي والرضا بما قسمته لي يا ذا الجلال والإكرام
.
ودايما بدعى بيه وبحبه اوى لأنك العليم وتعلم حاجتى وسؤالى ، بعدها قريت الحديث المذكور فيه الدعاء
.
قالت عائشة رضي الله عنها :لما اراد الله عز وجل أن يتوب علي آدم عليه الصلاة والسلام طاف بالبيت سبعا وهو يومئذ ليس بمبني بل ربوة حمراء ثم قام فصلي ركعتين ثم قال : ( اللهم انك تعلم سري وعلانيتي فاقبل معذرتي ، وتعلم حاجتي فإعطني سؤلي ، وتعلم ما في نفسي فإغفر لي ذ نوبي ، اللهم ان أسألك إيمانا يباشر قلبي ويقينا صادقا حتي أعلم أنه لم يصيبني الا ما كتبته علي والرضا بما قسمته لي يا ذا الجلال والإكرام ) فأوحي الله عز وجل اليه أني قد غفرتلك ولم يأتني أحد من ذريتك فيدعوني بمثل الذى دعوتني به الا غفرت له وكشفت همومه ونزعت الفقر من بين عينيه وأتجرت له من وراء كل تاجر وجائته الدنيا وهي راغمة وان كان لا يريدها .ه
.
سبحانك يارب .. بتفكرنى بيه عشان اخد الثواب ده كله .. وشرحت صدرى للقرآن والدعاء والبكاء عشان تنجينى ..يارب انا مش عارفة حكون من الناجين ولا لأ .. بس ظنى فيك خير مش عشان انا اهل النجاة انا مقرة ومعترفة بكل ذنوبى وتقصيرى بس عشان انت ارحم الراحمين واكرم الكرمين
.
عايشين فى الدنيا وبنجرى فيها وماسكين فيها بإدينا وسنانا يا جماعة وهى مش بتاعتنا ، والله العظيم ما بتاعتنا .. لسة قارية خبر وفاة عضوة من اعضاء منتدى الأستاذ عمرو خالد .. بنت لسة فى الجامعة توفت هى واهلها وخطيبها فى حادث
.
بالله عليكم الدنيا دى دامت لمين؟؟ .. واحنا ليه ماسكين فيها اوى كدة مع انها مش بتاعتنا، كل شئ وله نهاية وزى ما قولنا خبر وفاة شيماء الله يرحمها فى يوم حيجى يوم وحيقولوا خبر وفاة كل واحد فينا والحياة حتستمر باللى فيها والكل حينساك ،سبحان الله اهلك اشد الناس حبا فيك حيبقوا احرص الناس على دفنك يوم وفاتك .. الكل حينسى والله .. اهلنا واصحابنا وازواجنا وعيالنا .. مش حيفضل معانا غير أعمالنا بس
.
اقفوا مع نفسكوا شوية يا جماعة وفرصة اننا فى رمضان .. شوف انت مسؤل عن ايه ومضيعهوش .. شغلك ، ابوك وامك ، اطفالك ، زوجتك / زوجك ، اهلك ، جيرانك
.
عيشوا بما يرضى الله يا جماعة .. إن البر شئ هين ، وجه طليق ولسان لين ، دعاء ناس ليك بعد وفاتك كنت بتعاملهم كويس ممكن ينجيك ، خير كنت بتعمله ، بر بأهلك وبأبوك وأمك
.
اتقوا الله واعملوا للآخرة حتكسبوا الدنيا والآخرة
.
والله انا بذكر نفسى معاكم وبالله عليكم ادعولى بالهداية والمغفرة والنجاة
اللهم إنك عفو كريم تحب العفو فاعفو عنا جميعا يارب العالمين اللهم آمين
السلام عليكم ورحمة الله تعالى وبركاته

30 comments:

  1. اتشرف اني اكون اول واحد يعلق على البوست الرائع ده

    ربنا يجعل هذه التذكره في ميزان حسناتك ياااااااااااااااارب

    بوست جميل اوي
    مش عارف اقول حاجه اكثر من كده

    ReplyDelete
  2. وعليكم السلام ورحمة الله وبركاته

    معتقدش ان بعد الكلام ده تبقي لسة حاسة بالوحدة

    ربنا يهدينا ويهديكي ويغفر لنا ولكي ويكتب لنا جميعا حسن الخاتمة والنجاة من النار والفوز بالجنة

    ReplyDelete
  3. الوحدة شئ طبيعي وخصوصا في الفترة ما بعد الجامعه كل واحد بيكون مشغول في الشغل والحياة واللي خطب واللي اجوز وووو

    واحسن شئ يكون الواحد هو كمان مشغول عشان ميحسش الشعور دا ..
    لحد أما ربنا يرزقه باللي يؤنس وحدتة ..

    الأنس بالله شئ جميل ولكن لازم ندرك ان ربنا خلقنا وجعل فينا أننا منعش لواحدنا وجعل فينا احتياج لبعضنا البعض

    فا احنا نقرب من نفسنا اكتر وفي نفس الوقت ندور علي اللي نقوي بيه علاقتنا الأنسانية والأجتماعية ..

    البوست جميل جداً يا أنسانة

    ReplyDelete
  4. في ايه يا انسانه ماااالك

    لا السؤال مالنا
    كلنا مضلمينها ليه كده

    طبعا مافيش لينا غير ربنا نلجأ له في السراء والضراء

    ربنا يفرج همومنا جميعا

    ReplyDelete
  5. البوست بتاعك آلمنى اوى
    فعلا الدنيا زايلة مش عارفة بنتمسك بيها اوى كده ليه مع انها فى لحظة اقل من ثانية ممكن نروح منها
    كلنا عايشين برحمة ربنا
    ربنا يغفرلنا ويرحمنا
    فعلا ملناش غير ربنا سبحانه رحيم غفور اقرب للعبد من امه
    ربنا يتقبلنا من الصالحين ويهدينا
    اللهم اهدينا
    اللهم اهدينا
    اللهم اهدينا

    ReplyDelete
  6. ربنا يؤنس وحدتك يا انسانة ويهديكي دايما للي فيه الخير

    رمضان كريم وكله رحمة

    وحيده ازاي بس

    كل سنة وانتي طيبة

    ReplyDelete
  7. السلام عليكم ورحمة الله وبركاته

    هذه زيارتي الأولى..متابعة لمدونتك دائما..أشعر بسعادة وأنا أقرأ كتاباتك..أسأل الله أن يديم عليكي السعادة وحب الناس..

    الوحدة هذه شعور قاتل...دائما ما أشعر بما وصفتيه في البداية..

    لكن القرب من الله تعالى فعلا ينسي الإنسان همه ويشعره بالأنس..

    يارب يتقبل منك صالح الاعمال ويثبتك ويهديكي لما فيه الخير والرشاد..

    رمضان كريم

    ReplyDelete
  8. جميل اووي ياياسوو

    فكرتيني ببوست بحبك اووي اللي كان عنده

    ربنا يكرمك يارب(:

    ReplyDelete
  9. لا اله الا انت سبحانك انى كنت من الظالمين....
    عارفه ساعات تبقى الدنيا مقفله تقفيل مقفل فى وش الواحد بس بجد اول مابقول الدعاء ده الاقينى بابتسم....
    ربنا معاكى ويعينك .... وتفضلى دايما قريبه من ربنا ...
    من كان الله معه وحتى لو رحلت عنه الدنيا فما فقد شئ...
    بس خلاص

    سلامو عليكووووووووو

    ReplyDelete
  10. اللهم اهدنا و اغفر لنا و ارحمنا يا أرحم الراحمين و إياكى يا ياسمين
    ربنا يثبتك و إيانا على الهدى و القرآن و طريق الفلاح

    ReplyDelete

  11. وعليكم السلام ورحمة الله وبركاته

    اللهم ارحمنا فوق الأرض و يوم العرض عليك يا رب العالمين

    اللهم أسكنها واسرتها فسيح جناتك وتقبلهم في الصالحين وألحقنا بهم يا رب العالمين

    اللهم اغفر لنا ذنوبنا وكفر عنا سيئاتنا وتوفنا مع الأبرار

    ReplyDelete
  12. بجد بوست رائع و كلام في قمة التأثير و تأمل غاية في الجمال .. تحياتي بجد علي موضوعك
    و بجد مش لاقي كلام اعبر بيه .. بس موجود إحساس قوي من بعد قرايتي للبوست ربنا يجعله في ميزان حسناتك و يوفيك أجر التذكرة الجميلة دي

    و بنا يهديكي و يؤنس و وحدتك و و يغفرلك و ينجيكي من كل شر

    تحياتي

    ReplyDelete
  13. واحده من أقرب أصدقائك إلى قلبك ;)October 1, 2007 at 12:58 PM

    آسفه يا ياسمين اني ماقدرتش أقلل وحشتك يوميها غير فتره قليله :) ...

    بس بجد مش عارفه ليه بتخطري على بالي و بفكر فيكي كتير اوي اليومين دول, يمكن قلقانه و قلبي واكلني عليكي عشان عارفه انك تعبانه. الله يخليكي يا ياسمين خللي بالك من نفسك و من صحتك كويس عشان خاطري و عشان اطمن عليكي, عايزاكي دايما تطمينيني عليكي و انك كويسه بفضل ربنا. صحتك ماتهميكيش لوحدك عشان تبقي عارفه :)

    ReplyDelete
  14. البعد وحش اوي

    والغرور وحش اوى

    والدنيا وحشة اوى

    والنفس وحش اوى

    وحب الله جمييييييييييل اوى
    والطاعة جمييييييييييلة اوى
    والنور فى القلب والوجه جمييييييييييل اوى

    ياااااااااااااااه اد ايه الواحد متعذب

    ادعى لى معاكى
    امانة

    ReplyDelete
  15. ربنا يكرمك ويرزقك بالخير حيث كان ويرضيكى به

    تحياتى

    ReplyDelete
  16. لستى الوحيدة فى الشعور بالوحدة
    وهى الموضوع الاساسى لمدونتى
    اتمنى ان تعودى لاصدقائك سريعا
    تحياتى

    ReplyDelete
  17. ما احسنها من مناجاه
    وما اكرمها من نصيحه
    وما اعظمها من تذكره

    حقا القران هو طب القلوب ودوائها

    جزاكي الله خيرا وجعلها ف ميزان حسناتك
    ربنا يهديكي ويغفرلك
    ربنا يكرمك بليله القدر وتخرجي من رمضان مغفور ليكي برحمه ربنا انشاء الله
    انه على كل شئ قدير

    والف سلامه
    تحياتي

    ReplyDelete
  18. بوست رائع يا ياسمين

    انتى قلتيها

    لما الواحد يكون حاسس بالوحدة زى مكنتى حاسة .., المفروض انه ميلجأش لعبد .., المفروض انه يلجأ لربنا وهيلاقى عنده كل الراحة

    يمكن احنا حاولنا نخفف ونهزر .., بس زى ما انتى قلتى ., مفيش حد هيقدر يفهمك زى ربك

    مفيش حد هيقدر يحسسك انه جنبك فى كل وقت وفى كل اوان زى ربك

    مبسوط اوى وانا بقرى كلامك دلوقتى يا ياسمين

    ما شاء الله عليكى بجد

    بتحبى ربنا كتيييييييييييييييير

    بس هو بيحبك أكتر

    علشان كده دايما بيهديكى ليه

    سيبيها على الله دايما وهو مش هيضيع توكلك عليه ابدا

    اللهم إنك عفو كريم تحب العفو فاعفو عنا جميعا يارب العالمين اللهم
    امين

    ReplyDelete
  19. اشرقت نفسي
    الله عليكي
    على فكرة كل اللى انت كتبتيه دة جوايا بس انتى بجد بتعرفي تحركي حاجة مدفونة من زمان قوى
    ربنا يوفقك و يقبل دعائك
    تحياتى تمر حنة
    اه على فكرة عدى كدة عندى شوفى كدة يمكن يكون في حاجة كدة تعجبك

    ReplyDelete
  20. ليس العجب فى ان احبك وانا العبد الفقير ولكن العجب كل العجب فى ان تحبنى وانت الرب القدير

    تكفي هذه الجمله يا ياسمين
    جزاك الله خيرا

    ReplyDelete
  21. تصدقي وتؤمني بالله
    انا كنت ناوي فعلا ابعتلك تعليق اقوللك قربي من ربنا .. وهتلاقي ان حياتك كلها هترتاح
    وياريت كلنا نقرب من ربنا
    والله العظيم والله العظيم والله العظيم
    لو قربنا من ربنا خطوة واحده بس .. هنحس براحه رهيبه
    اللهم ثبتنا على طريق الهدايه يارب
    وجزاكي الله خيرا عن البوست الهايل ده
    وربنا يوفقك ويثبتك يارب على طريق الخير

    ReplyDelete
  22. ميرسى اوى على البوست الجامد ده كلامك رقيق

    ReplyDelete
  23. السلام عليكم
    أختي العزيزه
    كل عام وانتي بخير وعيد سعيد عليكي وعلي الاسره كلها
    وربنا يجعلك ممن قبلوا في رمضان وممن يدخلون الجنه بخير حساب
    وان يديم عليكي نعمه الصحه وراحه البال
    وكل عام وانت بخير

    ReplyDelete
  24. ازيك ياسمين هامله ايه
    كل سنه وانت طيبه
    عيد سعيد عليكى وعلى الاسرة

    ReplyDelete
  25. كـل عيـد وانتم بخير واعاده الله عليكم وعلى الامـة الاسـلامية بالخير واليمن والبركات
    يااااااااااااااااارب آمــــــــــــين

    ReplyDelete
  26. واا بقرا البوست اللي كتبتيه كانت حالتي زي حالتك بالضبظ.زهقان وشعور بالوحدة مميت. ولكن بعد ماقريت البوست قلبي انشرح عشان هبقا مع ربنا بقرا قران واصلى ركهتين شكر ليه وهفتكر مل مرة لو جاني الشعور بالوحدة اني مش لوحدي واحد بس هو اللي يستحق اني اكون معاه الله سبحانه وتعالى
    ربنا يكرمك بالثواب وبعد اذنك انا هاخود البوست انقله في البلوج بتاعي مع عنوان البلوج بتاعك عشان انا طمعان في ثواب يمكن اخده لما حد يقراه
    شكرا جدا

    ReplyDelete
  27. اللهم ارزق اختى بكل خفقة قلب فرجا وبكل طرفة عين مخرجا وبكل دعاء استجابة

    ReplyDelete

الكلمـة نـور .. وبعـض الكلمـات قبـور