Thursday, September 06, 2007

انا جيييييييت :D

الله .. ياساتر يارب ايه العنكبوت اللى ع الباب ده ... ولا يا كميكااااااز انت يالاااااا

.

يا فتاح ياعليم يا رزاق ياكريم .. كل يوم الولية بتاعة اللبن الرخمة دى .. مش عايزين النهاردة يا ست

.

لبن ايه يا منيل ده انا إنسانة

.

إنسااااااااااااااااااااانة .. حمد الله ع السلامة يا شيخة عاش من شافك .. رجعتى امتى من السفر وايه اللى سمرك اوى كدة ده انتى مش باين منك غير السنان يا شيخة

.
هههههههههه الله يسلمك يا كوكو وحشتنى مووووووووووووت .. وبعدين انت حتقعد ترغى كدة وتسيبنى شايلة اللب على قلبى .. خدلك حبة اهو تتسلى بيهم وانت قاعد تحرس فى المدونة .. وطبعا اى ضيف يجيلك اديله ..انا مركبة كاميرات مراقبة والمكان كله محاصر .. انت فاهم؟؟


.
فاهم فاهم - هى هتذلنا ولا ايه - تسلميلى يا غالية .. تعيشى وتجيبى .. بس ايه الغيبة الطويلة دى بجد .. انتى قولتى اسبوع مش ست اشهر


.
ست اشهر بردو يا ضلالى .. بس الصراحة يعنى انا رجعت من السفر الجمعة اللى فاتت وكنت ناوية اجيلك وانزل بوست جديد والله بس انشغلت فى تنفيض البيت بعيد عنك والبت سولى كأنى انا خلفتها ونسيتها مثلا وكدة يعنى .. الحمد لله


.
الحمد لله .. بس ايه يابنتى اللى حصلك امبارح والنهاردة ده .. انا اتخضيت عليكى بجد


.
الحمد لله يا كوكو .. لالا متتخضش ولا حاجة انا بقيت كويسة الحمد لله كل الحكاية
انى فضلت واقفة من الساعة 6 بالليل لـ12 بنفض فى البيت وبنفض بالليل عشان نكسب وقت قبل ما سولى تيجى ومعرفش اعمل منها حاجة .. بس بقا حطيت السلم زى الشاطرة عشان انضف المروحة بتاعة السقف وكنت حقع من عليه بس ربنا ستر الحمد لله ،وبعدين خلصت وعملت لنفسى كوباية شاى بلبن وبعدها عينك ماتشوف الا النور، النوم راح من عينى خااااااااااااااالص .. نمت تانى يوم الساعة 9 الصبح يا كوكو تخيل؟


.
ياخبر وبعدين؟


.
ولا قابلين بقا قضيت الليلة اتكلم فى خدمة احسن ناس بتاعة موبينيل دى وبعدين نمت واختى جت الساعة 10 عشان تسيبلى سولى وتروح الشغل


.
يالهوى الساعة 10 الصبح !!!! يعنى كدة نمتى ساعة واحدة بس


.
ااااااااااه وبعيد عنك شنيور بينضرب فى نافوخى وبعدها نمت الساعة واحدة الا ربع ظهرا وصحيت لاقيت الساعة واحدة وربع


.
نص ساعة بس؟ .. هههههههههههههههههه


.
اضحك اضحك .. بعدها اتغديت وشربت شاى اخضر ونمت صحيت الساعة 6 بقا وعينك ما تشوف الا النور تانى


.
ليه خير؟؟؟

.
كنت بتطوح يا كوكو .. دوخة جامدة جداااااااااااا وجسمى سقع وبقيت اعرق جامد وقعدت اعيط من التعب وكلهم اتخضوا عندى فى البيت

.
يالهوى ليه ده كله

.
الضغط وطى جامد الحمد لله ... خدت البرشامة بتاعة الضغط واستنيت تعمل مفعول لاقيت نفسى بجرى ارجعها .. رجعت برشامتين وبردو مافيش تحسن

.
ياخبر

.
الحمد لله رب االعالمين .. كانوا حيودونى مستشفى وماما اتخضت عشان كنت لسة بهزر وبلعب مع سولى من شوية

.
وروحتى المستشفى؟؟

.
لا مرضتش .. انا اصلا مبحبش لا الدكاترة ولا الأدوية ولا الحاجات دى خالص ، ماما لاقيتنى مابتحسنش وكنت داخلة على إغمائة فخدتنى بسرعة وبالعافية للصيديلة اللى تحتينا نقيس الضغط وآخد حقنة عشان القيئ

.
ضغطك طلع كام؟

.
تمانين على ستيين ... ضغط فرخة مش بنى آدمة خااااااالص هههههههه

.
بتضحكى يا مصيبة وبعدين؟

.
ادانى حقنة عشان تظبط الضغط وانا مبحبش الحقن عااااااااااااااااااااااااااااااا

.
معلش يابنتى .. المهم انتى عاملة ايه دلوقتى؟؟

.
الحمد لله رب العالمين يا كوكو .. كل اللى يجيبه ربنا كويس واهو تكفير ذنوب الحمد لله رب العالمين .. استنى اما اضحكك ، ماما لما لاقيتنى بضيع كدة افتكرت ان اللى تعبنى اوى هو السهر عشان اتكلم فى التليفون فى خدمة احسن ناس ، المهم لاقيتها فى وسط لحظاتى العصيبة دى وانا بموت بتدعى وتقول: الله يخرب بيتك يا ساويرس حتموتلى البت !!!ه
.
ههههههههههههه .. والله طنط دى عسل .. الحمد لله يابنتى وربنا يديكى الصحة .. بس تعالى هنا انتى مش حتحكيلى عملتى ايه فى المصيف من غيرى ولا ايه ؟؟؟؟

.
احكى يا كوكو ومحكيش ليه يعنى

.
طب ظبطى نفسك عشان اشغل الكاميرا ومنك للجمهور وانا حقعد أأزأز براحتى بقا

.
اشطة .. احم احم .. كح كح .. كان اسبوع جميل فعلا يا جماعة وخلص بسرعة ووحشتونى اوى وانا هناك ووحشنى بيتى وكوكو والبت سولى بنت اختى .. بس كان اسبوع حلو اوى الحمد لله .. وانا هناك كنت عاملة زى الصحفية اللى عمالة تلقط الأحداث عشان اجى احكيلكم عليها هنا ، روحت مع قرايبى اللى هما خلاتى وبناتهم وركزوا على بناتهم دى لانى خدت خبرة جامدة منهم .. زى مانتوا عارفين انا بحب البنات اصلا وبحب المجتمع الأنثوى اللى بينا وبين بعض ده مش بتاع التلفزيونات والحركات دى .. عيلة ماما كلها بنات اصلا مافيهاش الا ولدين تلاتة كدة والباقى بنات ، البنات دول فيهم كل الحالات .. اللى متجوزة ومخلفة واللى مخطوبة واللى فرحها قرب واللى لسة مافيش حاجة زى حلاتى كدة .. حاسة ان الرحلة دى كانت رحلة تعليمية بالإضافة الى انها ترفيهية كمان .. اتعملت حاجات كتيييييييييييييييييييييييييييييييييييير

.

اتعلمت ان لو فى اى مشكلة بينى وبين زوج المستقبل - ربنا مايجيب مشاكل يارب - محكيهاش لأهلى ابدا واحاول اسوى أمورى بينى وبينه ومندخلش حد بيننا عشان الموضوع مايكبرش .. ده غير ان الأهل ممكن يشيلوا من جوز بنتهم .. اتعلمت انى استر على عيوب جوزى جامد اوى وابقى ستره وغطاه زى ما القرآن بيقول بالظبط ، اتعملت كمان ان الصبر حلو وان الواحد لازم يصبر ويدعى عشان ينول ، واتعلمت ان تربية الأولاد شئ مهم جدااااااااااااااا اكتشفت كمان انى فى نعمة كبيرة اوى ألا وهى انى لسة مش مرتبطة لان الإرتباط إلتزام ومسؤلية كبيرة اوى .. ومخبيش عليكوا انا بخاف اوى من الموضوع ده .. الحمد لله على كل حال

.

اتعملت كمان ان مش كل حاجة بالقلب ممكن العقل يتدخل ويبقى اختياره صائب وبعدين يبقى يجى الحب على مهله .. اكتشفت حاجات كتيرة فعلا واهم حاجة انى اكتشفت الناس نفسها على حقيقتها .. احساس غريب اوى لما تبقى متأكد انك تعرف فلان الفلانى كويس جدا وفى الاخر تكتشف انه غير الشخصية اللى ظاهرلك بيها وانه حد تانى خااااااااااالص وان الناس كلها عارفة وانت اخر من يعلم انه كدة .. احساس غريب اوى اول مرة اجربه وياريت محدش فيكوا يجربوا لانه وحش اوى

.
كانت صحبة حلوة مع بنات خالتى .. مكنتش اعرف انهم بيحبونى اوى كدة .. معرفش كانوا مستغربين شقاوتى كدة ليه بس اديهم شافونى على طبيعتى بتكلم وبضحك وبتنطط تهيييس ع الاخر يعنى .. بس اللى أثر فيا اوى حبهم وتمسكهم بيا .. الحمد لله رب العالمين يارب ارزقهم بكل خير .. واللى أثر فيا اكتر انهم فتحولى قلوبهم جامد اوى واطمنولى الحمد لله .. لدرجة انهم كانوا متخاصمين وكنت بحاول اصلح بينهم الحمد لله ولما روحت عجيبة دعيت جامد انهم يتصالحوا واتصالحوا الحمد لله .. انبسطت من نفسى اوى ساعتها لانى مكنتش بأوم الدنيا خالص .. بالعكس ده انا كنت بكدب عشان آلف بينهم .. يعنى اقول لفلانة ده انا لما بروح لعلانة بتقولى انها بتحبك اوى وانك اختها ومتقدرش تستغنى عنك ابدا .. وهى فى الحقيقة مش طايقة تبص فى وشها اصلا .. الحمد لله وسبحان مؤلف القلوب

.

حزنت جامد لما سألوا بنت خالى العروسة حتلبسى حجاب فى الفرح ولا ايه جاوبت وقالت لأ لاقيته مكبرنى وشكلى وحش فيه ، وحتجيب فستان كات من غير حمالات كمان ... بصراحة لاقيت فى دموع فى عنيا وقعدت اعيط بينى وبين نفسى ... بقا الحجاب اللى ربنا مميزنا بيه وتاج على روسنا مش مجرد طرحة يبقى بيكبر وبيخلى الشكل وحش!!! لا حول ولا قوة الا بالله

.
بس احلى ما فى الرحلة كان البت مرام بنت بنت خالتى .. عسسسسسسسسسسسسسسل .. ما شاء الله عليها 4 او 5 سنين تقريبا بس بحبها اوى .. قعدت تتنطط وتلعب فى الماية ولما باباها يسألها مالك بتتنططى كدة ليه تقوله انا حرفانة اوى يابابا حرفااااااانة ( ترجمة: فرحااااااااانة ) ههههههههههههه .. مبسوطة بالماية يا مرام .. ايوة يا بابا المية تفحة تفحة خااااااااالص ( ترجمة : تحفة ) هههههههههههههههه

.

كانت طالعة معايا السلم فى عجيبة وقلتلها تعرفى يامرام ان الجنة فيها حاجات احلى من كدة بكتييييير .. قالتلى يعنى فيها مراجيح والعاب وكل حاجة؟؟ .. قلتلها فيها كل اللى بتحبيه يا مرام ربنا يجعلك من اهلها ..اللهم آمين

.

فى يوم خرجت من البحر وكانت بردانة اوى .. لفتها بفوطة كبيرة وفضلت بردانة فخدتها فى حضنى عشان تتدفى .. اليوم اللى بعده كنا راكبين العربية مع باباها وكانت الدنيا المغرب وهى كانت بلبس البحر و قاعدة على حجرى والشباك مفتوح لما خلانى بردت .. قامت حضنانى جامد عشان تدفينى وعشان تدفى هى كمان.. وانا نازلة لاقيتها فى سابع نومة .. مكنش هاين عليا اسيبها واقلق منامها حبيبتى

.

يوم تانى كانت بتلعب معايا فسألتها انا احلى ولا انتى؟ .. قالتلى انتى طبعا .. قلتلها لأ مرام احلى .. قالت لأااااا انتى طبعااااااا .. قلتلها طب ايه الحلو فيا قالتلى وشك .. قلتلها طب ايه الحلو في مرام ؟؟ .. قالتلى انا؟؟ انا مافييش حاجة حلوة انا كلى شرررررر ههههههههههه ... قمت شايلاها وخليتها تفرد دراعتها وقعدت ادور بيها وهى تضحك

.

اخواتها الاتنين ريم ومريم ماسابونيش فى حالى بردو دى على يمنى ودى على شمالى وعملولى تحقيق جامد اوى

ريم: انتى عندك كام سنة؟؟

إنسانة: 21

مريم: طب فى سنة كام؟؟

إنسانة : خلصت

ريم: إنتى عايزة تتجوزى؟؟

إنسانة فى سرى " حتى انتى ياريم" !!!!: هههههههه... ربنا يسهل

مريم: انتى سمرة كدة من الشمس؟؟

إنسانة: لأ انا مولودة كدة هههههههههههه

.
نسيت اقولكم ان ماما من مواليد مرسى مطروح وان باباها كان له صديق هناك من البدو .. الراجل ده توفى وجدى توفى بس فضلت ماما واخواتها يودو ( جاية من الود ) ولاد صاحب باباهم لحد النهاردة وكل مانروح هناك لازم نزورهم ، كنت اول مرة ازورهم فيها وبجد انبهرت جامد اوىىىىى .. حياة بسيطة جدااااااااا مافيش عفش فى البيت خااااااااالص كله حصير وبالكتير اوى فى سرير ودولاب فى الأوض .. اللى بهرنى اكتر اخلاقهم اللى فوق الوصف بجد .. زوجات الولاد مايرودوش ع التليفون لو رن ابدااااااااااا .. لازم راجل اللى يرد لو الرجالة اللى فى البيت مش موجودين محدش يرد نهائى .. مافيش تلفزيون فى البيت .. منتقبات ومش بيخروجوا من البيت من اساسه .. حماهم ميعرفش شكل مرات ابنه ايه يا جماعة .. ما شاء الله جمال ايه واخلاق ايه وادب ايه وكرم ايه وذوق ايه .. ما شاء الله بجد

.
تكاليف الزواج هناك بسييييييييييطة جداااااااااا .. مجرد اوضة فى بيت الأب للولد وبس والعروسة تيجى بشنطتها ودمتم ... الأم لما تروح فرح مثلا تختار العروسة لإبنها والأفراح عادة بتكون الظهر مش بالليل زيينا

.
عجبتنى اوى كوباية الشاى الصغننة اللى عندهم .. شاى اخضر وشاى احمر بالنعناع والكوباية يجى بوق صغير تشرب ويتصبلك تانى .. قعدت اصور فيها كدة زى العبيطة ههههههههههه
.






استنوا اما احكيلكم على الحسنة اللى فى ايدى اليمين دى .. زمان وانا صغيرة لما كان حد من صحابى يسألنى ايه دى اقولهم ده بابا عاملى علامة عشان ماتوهش !!! ولما كبرت شوية اختى قالتلى انها حسنة .. فلما العيال سألونى تانى قولتلهم دى حسنة قالولى لأ دى كبيرة اوى دى اكيد سيئة مش حسنة !!!!!!ه
.
***********
.

مطروح نفسها تجنن يا جماعة .. عجيبة غير طبيعية بجد ولا منظر الغروب بجد جنان فى الغرام .. مش عارفة ليه المرة دى كنت حاسة انى نفسى اجى تانى بس ابقى مع حد تانى لوحدينا .. تيرا را را تيرا را .. صورتلكوا شوية صور لعجيبة والغروب والغرام شوفوهم كدة وحتلاقوا عندى حق



دى عجيبة يا جماعة .. سبحان من خلق وابدع .. والصورة اللى قبلها فى الغرام

.

استغربت اوى هناك من التاكسيات .. معظمها بجد هيونادى أكسنت .. نااااااادر اوى لما تلاقى ماركة غيرها .. سبحان الله

.

عملت دماغ مصاصة فظييييييييييعة .. اصل انا مدمنة مصاصة بعيد عنكم .. لفيت البلد كلها ادور عليها فين وفين اما لاقيت وكل ما اروح لحد يبصلى من فوق لتحت ويضحك!!!!ه

.
الحمد لله رب العالمين .. اسيبكم بقا دلوقتى لحسن ماما معتقدة ان الكمبيوتر ده اللى تعابنى اصلا .. ربنا يستر ... المهم كل سنة وانتوا بألف خير وربنا يبلغنا جميعا رمضان ونخرج منه مغفورلنا جميعا اللهم امين .. وربنا يكرم كل اللى تمنالى السلامة وانا فى السفر .. جزاكم الله خيرا جميعا ويبارك فيكم ياااااارب .. سلاااااام عليكم
.
استنى انتى حتنهى البوست قبل ما اقول كلمتنى
.
اتفضل واخلص
.
احم احم .. ياجماعة بجد تحية مني خاصة جدا جدا جدا لكل من وصل لاخر البوست الطويل الممل الرخم اوى ده
.
كدة يارخم ؟.. طب هات حبة اللب دول خسارة فيك

37 comments:

  1. هههههههههههههه انا مش عارفه اعلق ع ايه ولا ايه هو بوست متعدد الافكار يعنى بداية حمدلله ع سلامتك المدونة كانت مضلمة
    عجبنى بردو الخبرة الى اكتبتيها بخصوص ان محدش يدخل بينك وبين زوجك ان شاء الله لان ده فعلا الى بيخرب
    وبالنسبة لحتة الحجاب بردو ان الناس اغلبها اخدها عادة مش عبادة فبقو بيلبسوها وقت الحاجة بس يعنى الواحد تتحجب كام سنة وتيجى فى يوم تخلع الحجاب وتلم ذنوب سنين بالامة الى بتتفرج عليها
    وصور الغروب كمان تحفة اوى ربنا يكرمك عليها بجد
    كفاية كده انا قربت اتوه واتوهك معايا ههههههههه ربنا يخليلك بنت اختك يارب

    ReplyDelete
  2. ازيك ياسمسمه عامله ايه حمدلله ع سلامتك وع فكره مطروح دى انا بموت فيها بعشقها جدااا والخبره الى انتى اتعلمتيها فعلا عندك حق اهم حاجه ان الى بينك وبين جوزك ان شاء الله ميطلعش براعتبه باب الشقه عشان الموضوع ميتعقدش وفعلا بردو فى ناس كتير كنت فكراهم ملاك زى مابيقولو بس للاسف اتغدعت فيهم بردو ومكنتش مصدقه نفسى ان دول الى صاحبتهم قبل كده وصور الغروب جامده جدا مش بتاعت عجيبه يبقى اكيد هتبقى عجيبه ههه وربنا يخليلك ولاد اخواتك وخالاتك وكل سنه وانتى طيبه ياجميل والسلامه عليكى وبعد كده ابقى خدى بالك وانتى طالعه السلم ههه تحياتى لكى

    ReplyDelete
  3. lol maramram ana 2olt ih el gabny hinak fe marsa matroo7

    3la fekra kol el esmohom maram 3asel we taybeen :)))


    glad u had that fun we salmtek ya 2amr malhom b2a el saydlieen zai el fol aho

    da3'tek kam ya lahwy rabna sater we alf slama

    ReplyDelete
  4. ههههههههههههه لحقتوا تعلقوا يا عفاريت .. ده البوست لسة طازة .. يلا ما علينا

    HoNdA

    ماتعلقش على حاجة يا معلمى كفاية انك قريتى البوست وعجبك يا باشا

    احنا نحب نخدم بس ههههههههه

    منورة المدونة دايما وربنا يبارك فيكى يارب



    -----------------

    D◎◎dy §okara

    الله يسلمك ياجميلة انا الحمد لله كويسة انتى عاملة ايه وطمنينى على ماما الله يكرمك والف الف سلامة عليها

    هو انا متخدعتش فيهم ولا حاجة بس طلعوا شكل تانى او ليهم جانب انا مكنتش اعرفه عنهم خالص وعرفته بعد كدة
    مش خداع يعنى ودعونى انتقم والحاجات دى ههههههههه


    كل سنة وانتى بألف خير يارب

    تحياتى وخالص حبى

    ------------------

    Ma-3lina

    ازيييييييييك ... نفسى تغلطى مرة وترنيلى يابت

    لا طبعا مالهوش الصيادلة بس انا مفيش بينى وبينهم عامر يعنى ههههههه

    الله يسلمك .. تفتكرى حعيش؟؟هههههههههههه

    كل سنة وانتى طيبة ياجميلة

    ReplyDelete
  5. الحمد لله انك انبسطي يا انسانة وعقبال السنة الجاية وانتي لوحدك انتي واللي ف بالك
    :)

    والحمد لله على سلامتك من اللي حصلك النهاردة

    وياريت بلاش حكاية السلم دي الله يكرمك
    هههههههههه

    ReplyDelete
  6. اولاً حمداً لله علي السلامة

    وثانياً شفاكي الله وعافاكي

    في نقط كتير اكلمتي عنها


    منها العلاقات الزوجية واللي مشاكلها بتظهر وخصوصا لو في اجازة واكتر من اسره موجوده ..دايما ممكن يحصل مشكلة بين اتنين او أكتر
    دا بيكون ليه أكتر من سبب بس النتيجة وحده انه نكد وعكننه
    والصح اني مسمحش لدا يحصل


    نقطة الحجاب وخوصا في يوم الفرح للاسف في ناس كتير بيستغنوا عنها ربنا يعفينا ويهدي الجميع ..


    مطروح بقى اجمل بلد عشت فيها واكتر بلد بتحملي ذكريات غير سعيدة

    رغم ان كان في النص حلت حاجات اقدر اقول عليها كويسه

    وكمان البدو واكلهم جميل جداً وخصوصاً الشربه العجيبة دي اللي نفسي اعرف بيعملوها ازاي

    اما موضوع التاكسيات دا فعشان هي جايا من لبيا من غير جمراك ولا حاجة فبتكون رخيصة فبيعملوها تاكسي

    ومن الاشياء الجميله ان يكون معاككي حد زي ميرام ربنا يحفظها

    بوست جميل يا أنسانة

    ReplyDelete
  7. بوست حلوه مووووووووووت لانها منك يا انسانه وبجد انا حبيت مدونتك اوى وكاميكازا كمان.
    ماذا اكتب وماذا اقول وقلمى حائر بين السطور.
    البوست رااااااااااااااااائعه
    وانتى قدرتى تخلينا نكملها للخر ومش زهقنا
    والصور بات عجيبه جميله اوووووووى لانها منك يا قمرزوحمد على سلامتك لانك وحشتينا

    ReplyDelete
  8. ألف حمدالله ع السلامة منورانا دايما، و ميرسي بزاااااااااااااااااف على البوسط الحلو ده

    ReplyDelete
  9. حمد الله ع السلامة يا انسانة
    وكل سنة وانتي كده مبسوطة وسعيدة ومشرقة ع الحياه

    محمد سمير

    ReplyDelete
  10. الحمد لله على سلامتك يا انسانة


    واضح ان الرحلة كانت جميلة ما شاء الله


    بالنسبة للشاي في مطروح.............فعلا هي كوباية صغيرة خالص ومش بتكمل شفتطين تلاتة وتلاقيها بح



    بس على فكرة عجيبة كانت احلى السنين اللى فاتت....يظهر التلوث بدا يوصل لها مع الزحمة كل سنة والتانية


    ربنا يهدي العباد


    والسلام

    ReplyDelete
  11. السلام عليكم ازيك يا انسانه يا احلى انسانه انا اول مره اعلق على بوست ليكى رغم انى من فتره وانا متابع مدونتك وقريتها كلها وعجبنى جدا اسلوبك فى المدونه بتاعتك بس انا كنت قلقت عليكى لانك اخدتى فتره كبيره جدا ماتكتبيش والحمد لله النهارده اطمنت انك بخير والف والف سلامه عليكى يا انسانه وبخصوص كاميكاز فهو كان تمام ومسلينا وكان بيلعب معايا شطرنج اللى كنت حطاه فى البوست اللى قبل كده
    تحياتى

    ReplyDelete
  12. السلام عليكم
    كل عام وانت بخير
    بمناسبه رمضان واللهم أجعلك من عتقاء هذا الشهر وان يتقبلك الله بقبول حسن
    والاسره الكريمه بكل خير وصحه وسعاده
    وان يجعل هذا الشهر شاهد لنا لا علينا

    ReplyDelete

  13. حمد الله علي السلامه

    خساره فيه اللب
    متتدهوش حاجه تاني

    ReplyDelete
  14. عزيزتى
    ك سنه وانتى طيبة
    على السلامه
    طبعا الميه والهوى
    ناقص ايه
    مفيش احلا من البحر
    ربنا يجعل ايامك كلها سعيدة
    ويجعل دنيتك كلها خير وسعاده
    والناس كلها تحبك زى ما بتحبيهم
    سلام

    ReplyDelete
  15. ياااااااه
    كل ده حصل ف اسبوع
    طب كويس انك ماطولتيش اكتر من كده
    انا طول عمري باقول ان مافيش احسن من الطبيعه البدائيه
    المناظر دي تحفه ومن اكتر الصور اللي باحبها هي البحر ساعه الغروب
    ده كان السبب اني استمريت ف شغلي 6 شهور بعد ماقررت اسيبه
    بلدنا جميله اوي واهلها اجمل واجمل
    حمد الله على السلامه
    المدونه قنبله والحاج كوكو ده اللي مش عارف تصنيفه ايه لذيذ
    سعيد بمعرفتك

    ReplyDelete
  16. السلام عليكم ورحمه الله وبركاته
    كل عام وانت اللى الله اقرب وعن المعصيه ابعد ان شاء الله
    كل عام وانتم با الف خير

    ReplyDelete
  17. انتي كنتي هناااااااااااااااك

    والله وانا كمان ومحضر شويه صور هنا للبوست بس النت يشتغل


    حمدا لله على السلامه

    ReplyDelete
  18. السلام عليكم
    أنا بصراحة تعبت من البوست الطويل ده ف تعليقي بسيط
    حمد لله علي السلامة
    و ألف سلامة
    و بوست جميل
    و كل سنة و أنت طيبة
    و هاتي شوية لب

    ReplyDelete

  19. لا متديهاش اللب

    ايه البوستات الرخمة دي :P

    بس عارفة

    حمدالله على السلامة وربنا يكرمك يا رب

    تحياتي لك من ماناساس البلد

    ReplyDelete
  20. انتي حد زعل حضرتك في حاجة عان تكتبي البوست الطويل أوي دا
    ..
    أحببت أن أرد التحية
    وكل عام وأنتم بخير
    وشكران
    ..

    ReplyDelete
  21. السلام عليكم
    اولا حمداَلله على سلامتك ،ثانيا مبرووووووووووووك التخرج ولو انها متاخره بس عقبال ماعرفت الخبر وادي زغرووووووووطه .......(;

    انا مش هعلق على موضوع معين بس احب اقولك ان مدونتك من اروع المدونات اللى اعرفها ، انا قرأت من اول الموضوع ده الى موضوع الشباب المطحون والنحت على الضخر اللى مش لاقيه (: ، بجد اسلوبك تحفة وجميل جدا وربنا يزيدك ويسعدني اني عرفت مدونتك وفي النهاية ادعوا الله ان ينولك ما تريدين وان يجمعنا واياكم في الجنة

    ReplyDelete
  22. كل سنه وانت طيبه

    ربنا يتقبل منك صالح الاعمال اللهم امين
    رمضان كريم

    ReplyDelete
  23. أختى الحبيبة
    كـل رمضان وانتى بخير وياااااارب يكون رمضان سعيد عليكى ويكون فيه الخير كله يااااااارب آمـــــــين

    ReplyDelete
  24. أنا بأشكر التحية الجامدة اللي في آخر البوست لأني من الأحرار اللي إستحملوا لحد آخر البوست

    ههههههه

    بس هو بوست مش ممل ولا حاجة بالعكس كان مشوق إلى حد ما

    آخر مرة شفت فيها مرسى مطروح كان سنة 2002 أو 2003 على ما أعتقد .. مش فاكر قوي

    ياللا .. كل سنة وإنتم طيبين

    ReplyDelete
  25. الى احسن انسانة

    جيت ارد زيارتك واقول كل سنة وانتى طيبة ورمضان الجاى باذن الله تحققى كل احلامك ـ وانا سعيد انك معانا فى اول رمضان ليكى فى التدوين وعبال ميت سنة تدوين وانت دايما فى صحة وسعادة وراحة بال ـ تحياتى

    ReplyDelete
  26. كل سنه وانتى طيبه يا ياسو
    رمضان كريم
    ربنا يعوده عليكى بالخير ان شاء الله
    آميـــن

    ReplyDelete
  27. السلام عليكم ورحمة الله وبركاته

    كل عام وانت إلى الله أقرب

    غفر الله لنا ولك فى رمضان

    و ثبتنا على الخير بعد رمضان

    ReplyDelete
  28. بقي كدة مابتحبيش الدكاترة؟

    ماشي ماشي يا ياسمين
    أمال انا مين اللي هينفعني في العيادة ان شاء الله
    :)))

    بعد الشر عليكي ياجميلة من الضغط لسة صغيرة ياحبيبتي و80 علي 60 ده ضغط واحد ميت يابنتي

    انتي لما تحسي انك دايخة كلي حاجة حادقة وماتجهديش نفسك ماكانش تنضيف شقة ده اللي عمل فيكي كدة وكمان قلة النوم

    الا قوليلي هي بنت اختك اسمها سولي دلع ايه سالي؟

    وأنا أقول هي مختفية فين أتاريكي بتصيفي

    أنا انهارة داخلة وباقول عايزة أدخل عند ياسمين أشوفها فين وزي مانتي عارفة المدونات دي لما بتدخلي مدونة تبصي تلاقي نفسك في الآخر في حتة تانية خالص ومش فاكرة ايه اللي جابك فيها
    بس الحمد لله وصلت

    ألف سلامة عليكي يا ياسمين

    ReplyDelete
  29. حمد لله على السلامه يا ياسمين

    تصدقى انك اسلوبك جميل اوووووووووووى انا استمتعت معاكى وبكلامك اوووووووووى

    والف سلامه عليكى يا قمر والحمد لله انك بخير
    ويارب دايما تفضل الابتسامه على وشك مرسومه ويكرمك يارب

    ReplyDelete
  30. حمدالله علي السلامه

    وكل سنة وانت طيبه

    ورمضان كريم (:

    ReplyDelete
  31. السلام عليكم
    كل سنه وانتى طيبه
    وربنا يجعله خير على المسلمين اجمع

    ReplyDelete
  32. كلامك جميل


    كل سنة وانتي طيبة

    ReplyDelete
  33. kol snaa wenty tayeba ya yasso :))
    w b3ooda al ayaaaam :
    ramadaaaaaaaaaaaaaaaaan kareeeeeeeeeeeeeeeeeeeeeeeeeeem

    ReplyDelete
  34. دى اول مرة ليا هنا


    عموما

    انسانة

    كل سنة و انتى طيبة

    ReplyDelete
  35. دى اول مرة ليا هنا


    عموما

    انسانة

    كل سنة و انتى طيبة

    ReplyDelete
  36. حمدا لله عالسلامة وكل سنة وانت طيب يا جميييييييييييييل

    ReplyDelete
  37. ay 7aga b2a manty keda keda betef2eseny kol marra :DSeptember 30, 2007 at 3:57 PM

    انا اول ماجيت عند اللب اللي كان على قلبك زي ماتكوني فكرتيني :D و قمت نزلت جري اجيب كيس اللب و السوداني اللي تحت بس مالقيتش السوداني :S اتغزت و اتنرفزت اوي و قلت في سري "يخربيت ام الطفاسه :@" و قمت واخده الكيس و طلعت اوطتي جري تاني و قعدت اكمل البوست اللي خلاني كالعاده اعده ادحك لوحدي زي الهبله في الاوضه و خايفه لاحد يدخل عليه يلاقيني بادحك كده زي الهبله و انا عماله أأزأز في اللب يقولو البت قلبت قرد ولا حاجه و زي ماانت عارفه طبعا الواحد مش ناقص :S ...

    miss u awy bgd w nefsy konna netkalem delwa2ty bs enty 3arfa tab3an "el natana tab3" loooooool
    l2 bgd mesh yenfa3 delwa2ty tab3an 3ashan el wa2t et2a5ar, bas enty tab3an law 3ayza tekalemeny fe el wa2t da aw 7ata ba3d keda, it's ok tab3an, talama enty elly 7atetloby yeb2a etkalemy enshalla el fajr w yarab tesa7y el bet kolo, manty elly talba b2a :D loooooooooool

    ReplyDelete

الكلمـة نـور .. وبعـض الكلمـات قبـور