انا جيييييييت :D

الله .. ياساتر يارب ايه العنكبوت اللى ع الباب ده ... ولا يا كميكااااااز انت يالاااااا

.

يا فتاح ياعليم يا رزاق ياكريم .. كل يوم الولية بتاعة اللبن الرخمة دى .. مش عايزين النهاردة يا ست

.

لبن ايه يا منيل ده انا إنسانة

.

إنسااااااااااااااااااااانة .. حمد الله ع السلامة يا شيخة عاش من شافك .. رجعتى امتى من السفر وايه اللى سمرك اوى كدة ده انتى مش باين منك غير السنان يا شيخة

.
هههههههههه الله يسلمك يا كوكو وحشتنى مووووووووووووت .. وبعدين انت حتقعد ترغى كدة وتسيبنى شايلة اللب على قلبى .. خدلك حبة اهو تتسلى بيهم وانت قاعد تحرس فى المدونة .. وطبعا اى ضيف يجيلك اديله ..انا مركبة كاميرات مراقبة والمكان كله محاصر .. انت فاهم؟؟

.
فاهم فاهم - هى هتذلنا ولا ايه - تسلميلى يا غالية .. تعيشى وتجيبى .. بس ايه الغيبة الطويلة دى بجد .. انتى قولتى اسبوع مش ست اشهر

.
ست اشهر بردو يا ضلالى .. بس الصراحة يعنى انا رجعت من السفر الجمعة اللى فاتت وكنت ناوية اجيلك وانزل بوست جديد والله بس انشغلت فى تنفيض البيت بعيد عنك والبت سولى كأنى انا خلفتها ونسيتها مثلا وكدة يعنى .. الحمد لله

.
الحمد لله .. بس ايه يابنتى اللى حصلك امبارح والنهاردة ده .. انا اتخضيت عليكى بجد

.
الحمد لله يا كوكو .. لالا متتخضش ولا حاجة انا بقيت كويسة الحمد لله كل الحكاية انى فضلت واقفة من الساعة 6 بالليل لـ12 بنفض فى البيت وبنفض بالليل عشان نكسب وقت قبل ما سولى تيجى ومعرفش اعمل منها حاجة .. بس بقا حطيت السلم زى الشاطرة عشان انضف المروحة بتاعة السقف وكنت حقع من عليه بس ربنا ستر الحمد لله ،وبعدين خلصت وعملت لنفسى كوباية شاى بلبن وبعدها عينك ماتشوف الا النور، النوم راح من عينى خااااااااااااااالص .. نمت تانى يوم الساعة 9 الصبح يا كوكو تخيل؟

.
ياخبر وبعدين؟

.
ولا قابلين بقا قضيت الليلة اتكلم فى خدمة احسن ناس بتاعة موبينيل دى وبعدين نمت واختى جت الساعة 10 عشان تسيبلى سولى وتروح الشغل

.
يالهوى الساعة 10 الصبح !!!! يعنى كدة نمتى ساعة واحدة بس

.
ااااااااااه وبعيد عنك شنيور بينضرب فى نافوخى وبعدها نمت الساعة واحدة الا ربع ظهرا وصحيت لاقيت الساعة واحدة وربع

.
نص ساعة بس؟ .. هههههههههههههههههه

.
اضحك اضحك .. بعدها اتغديت وشربت شاى اخضر ونمت صحيت الساعة 6 بقا وعينك ما تشوف الا النور تانى

.
ليه خير؟؟؟

.
كنت بتطوح يا كوكو .. دوخة جامدة جداااااااااااا وجسمى سقع وبقيت اعرق جامد وقعدت اعيط من التعب وكلهم اتخضوا عندى فى البيت

.
يالهوى ليه ده كله

.
الضغط وطى جامد الحمد لله ... خدت البرشامة بتاعة الضغط واستنيت تعمل مفعول لاقيت نفسى بجرى ارجعها .. رجعت برشامتين وبردو مافيش تحسن

.
ياخبر

.
الحمد لله رب االعالمين .. كانوا حيودونى مستشفى وماما اتخضت عشان كنت لسة بهزر وبلعب مع سولى من شوية

.
وروحتى المستشفى؟؟

.
لا مرضتش .. انا اصلا مبحبش لا الدكاترة ولا الأدوية ولا الحاجات دى خالص ، ماما لاقيتنى مابتحسنش وكنت داخلة على إغمائة فخدتنى بسرعة وبالعافية للصيديلة اللى تحتينا نقيس الضغط وآخد حقنة عشان القيئ

.
ضغطك طلع كام؟

.
تمانين على ستيين ... ضغط فرخة مش بنى آدمة خااااااالص هههههههه

.
بتضحكى يا مصيبة وبعدين؟

.
ادانى حقنة عشان تظبط الضغط وانا مبحبش الحقن عااااااااااااااااااااااااااااااا

.
معلش يابنتى .. المهم انتى عاملة ايه دلوقتى؟؟

.
الحمد لله رب العالمين يا كوكو .. كل اللى يجيبه ربنا كويس واهو تكفير ذنوب الحمد لله رب العالمين .. استنى اما اضحكك ، ماما لما لاقيتنى بضيع كدة افتكرت ان اللى تعبنى اوى هو السهر عشان اتكلم فى التليفون فى خدمة احسن ناس ، المهم لاقيتها فى وسط لحظاتى العصيبة دى وانا بموت بتدعى وتقول: الله يخرب بيتك يا ساويرس حتموتلى البت !!!ه

.

ههههههههههههه .. والله طنط دى عسل .. الحمد لله يابنتى وربنا يديكى الصحة .. بس تعالى هنا انتى مش حتحكيلى عملتى ايه فى المصيف من غيرى ولا ايه ؟؟؟؟

.
احكى يا كوكو ومحكيش ليه يعنى

.
طب ظبطى نفسك عشان اشغل الكاميرا ومنك للجمهور وانا حقعد أأزأز براحتى بقا

.
اشطة .. احم احم .. كح كح .. كان اسبوع جميل فعلا يا جماعة وخلص بسرعة ووحشتونى اوى وانا هناك ووحشنى بيتى وكوكو والبت سولى بنت اختى .. بس كان اسبوع حلو اوى الحمد لله .. وانا هناك كنت عاملة زى الصحفية اللى عمالة تلقط الأحداث عشان اجى احكيلكم عليها هنا ، روحت مع قرايبى اللى هما خلاتى وبناتهم وركزوا على بناتهم دى لانى خدت خبرة جامدة منهم .. زى مانتوا عارفين انا بحب البنات اصلا وبحب المجتمع الأنثوى اللى بينا وبين بعض ده مش بتاع التلفزيونات والحركات دى .. عيلة ماما كلها بنات اصلا مافيهاش الا ولدين تلاتة كدة والباقى بنات ، البنات دول فيهم كل الحالات .. اللى متجوزة ومخلفة واللى مخطوبة واللى فرحها قرب واللى لسة مافيش حاجة زى حلاتى كدة .. حاسة ان الرحلة دى كانت رحلة تعليمية بالإضافة الى انها ترفيهية كمان .. اتعملت حاجات كتيييييييييييييييييييييييييييييييييييير

.

اتعلمت ان لو فى اى مشكلة بينى وبين زوج المستقبل - ربنا مايجيب مشاكل يارب - محكيهاش لأهلى ابدا واحاول اسوى أمورى بينى وبينه ومندخلش حد بيننا عشان الموضوع مايكبرش .. ده غير ان الأهل ممكن يشيلوا من جوز بنتهم .. اتعلمت انى استر على عيوب جوزى جامد اوى وابقى ستره وغطاه زى ما القرآن بيقول بالظبط ، اتعملت كمان ان الصبر حلو وان الواحد لازم يصبر ويدعى عشان ينول ، واتعلمت ان تربية الأولاد شئ مهم جدااااااااااااااا اكتشفت كمان انى فى نعمة كبيرة اوى ألا وهى انى لسة مش مرتبطة لان الإرتباط إلتزام ومسؤلية كبيرة اوى .. ومخبيش عليكوا انا بخاف اوى من الموضوع ده .. الحمد لله على كل حال

.

اتعملت كمان ان مش كل حاجة بالقلب ممكن العقل يتدخل ويبقى اختياره صائب وبعدين يبقى يجى الحب على مهله .. اكتشفت حاجات كتيرة فعلا واهم حاجة انى اكتشفت الناس نفسها على حقيقتها .. احساس غريب اوى لما تبقى متأكد انك تعرف فلان الفلانى كويس جدا وفى الاخر تكتشف انه غير الشخصية اللى ظاهرلك بيها وانه حد تانى خااااااااااالص وان الناس كلها عارفة وانت اخر من يعلم انه كدة .. احساس غريب اوى اول مرة اجربه وياريت محدش فيكوا يجربوا لانه وحش اوى

.
كانت صحبة حلوة مع بنات خالتى .. مكنتش اعرف انهم بيحبونى اوى كدة .. معرفش كانوا مستغربين شقاوتى كدة ليه بس اديهم شافونى على طبيعتى بتكلم وبضحك وبتنطط تهيييس ع الاخر يعنى .. بس اللى أثر فيا اوى حبهم وتمسكهم بيا .. الحمد لله رب العالمين يارب ارزقهم بكل خير .. واللى أثر فيا اكتر انهم فتحولى قلوبهم جامد اوى واطمنولى الحمد لله .. لدرجة انهم كانوا متخاصمين وكنت بحاول اصلح بينهم الحمد لله ولما روحت عجيبة دعيت جامد انهم يتصالحوا واتصالحوا الحمد لله .. انبسطت من نفسى اوى ساعتها لانى مكنتش بأوم الدنيا خالص .. بالعكس ده انا كنت بكدب عشان آلف بينهم .. يعنى اقول لفلانة ده انا لما بروح لعلانة بتقولى انها بتحبك اوى وانك اختها ومتقدرش تستغنى عنك ابدا .. وهى فى الحقيقة مش طايقة تبص فى وشها اصلا .. الحمد لله وسبحان مؤلف القلوب

.

حزنت جامد لما سألوا بنت خالى العروسة حتلبسى حجاب فى الفرح ولا ايه جاوبت وقالت لأ لاقيته مكبرنى وشكلى وحش فيه ، وحتجيب فستان كات من غير حمالات كمان ... بصراحة لاقيت فى دموع فى عنيا وقعدت اعيط بينى وبين نفسى ... بقا الحجاب اللى ربنا مميزنا بيه وتاج على روسنا مش مجرد طرحة يبقى بيكبر وبيخلى الشكل وحش!!! لا حول ولا قوة الا بالله

.
بس احلى ما فى الرحلة كان البت مرام بنت بنت خالتى .. عسسسسسسسسسسسسسسل .. ما شاء الله عليها 4 او 5 سنين تقريبا بس بحبها اوى .. قعدت تتنطط وتلعب فى الماية ولما باباها يسألها مالك بتتنططى كدة ليه تقوله انا حرفانة اوى يابابا حرفااااااانة ( ترجمة: فرحااااااااانة ) ههههههههههههه .. مبسوطة بالماية يا مرام .. ايوة يا بابا المية تفحة تفحة خااااااااالص ( ترجمة : تحفة ) هههههههههههههههه

.

كانت طالعة معايا السلم فى عجيبة وقلتلها تعرفى يامرام ان الجنة فيها حاجات احلى من كدة بكتييييير .. قالتلى يعنى فيها مراجيح والعاب وكل حاجة؟؟ .. قلتلها فيها كل اللى بتحبيه يا مرام ربنا يجعلك من اهلها ..اللهم آمين

.

فى يوم خرجت من البحر وكانت بردانة اوى .. لفتها بفوطة كبيرة وفضلت بردانة فخدتها فى حضنى عشان تتدفى .. اليوم اللى بعده كنا راكبين العربية مع باباها وكانت الدنيا المغرب وهى كانت بلبس البحر و قاعدة على حجرى والشباك مفتوح لما خلانى بردت .. قامت حضنانى جامد عشان تدفينى وعشان تدفى هى كمان.. وانا نازلة لاقيتها فى سابع نومة .. مكنش هاين عليا اسيبها واقلق منامها حبيبتى

.

يوم تانى كانت بتلعب معايا فسألتها انا احلى ولا انتى؟ .. قالتلى انتى طبعا .. قلتلها لأ مرام احلى .. قالت لأااااا انتى طبعااااااا .. قلتلها طب ايه الحلو فيا قالتلى وشك .. قلتلها طب ايه الحلو في مرام ؟؟ .. قالتلى انا؟؟ انا مافييش حاجة حلوة انا كلى شرررررر ههههههههههه ... قمت شايلاها وخليتها تفرد دراعتها وقعدت ادور بيها وهى تضحك

.

اخواتها الاتنين ريم ومريم ماسابونيش فى حالى بردو دى على يمنى ودى على شمالى وعملولى تحقيق جامد اوى

ريم: انتى عندك كام سنة؟؟

إنسانة: 21

مريم: طب فى سنة كام؟؟

إنسانة : خلصت

ريم: إنتى عايزة تتجوزى؟؟

إنسانة فى سرى " حتى انتى ياريم" !!!!: هههههههه... ربنا يسهل

مريم: انتى سمرة كدة من الشمس؟؟

إنسانة: لأ انا مولودة كدة هههههههههههه

.
نسيت اقولكم ان ماما من مواليد مرسى مطروح وان باباها كان له صديق هناك من البدو .. الراجل ده توفى وجدى توفى بس فضلت ماما واخواتها يودو ( جاية من الود ) ولاد صاحب باباهم لحد النهاردة وكل مانروح هناك لازم نزورهم ، كنت اول مرة ازورهم فيها وبجد انبهرت جامد اوىىىىى .. حياة بسيطة جدااااااااا مافيش عفش فى البيت خااااااااالص كله حصير وبالكتير اوى فى سرير ودولاب فى الأوض .. اللى بهرنى اكتر اخلاقهم اللى فوق الوصف بجد .. زوجات الولاد مايرودوش ع التليفون لو رن ابدااااااااااا .. لازم راجل اللى يرد لو الرجالة اللى فى البيت مش موجودين محدش يرد نهائى .. مافيش تلفزيون فى البيت .. منتقبات ومش بيخروجوا من البيت من اساسه .. حماهم ميعرفش شكل مرات ابنه ايه يا جماعة .. ما شاء الله جمال ايه واخلاق ايه وادب ايه وكرم ايه وذوق ايه .. ما شاء الله بجد

.
تكاليف الزواج هناك بسييييييييييطة جداااااااااا .. مجرد اوضة فى بيت الأب للولد وبس والعروسة تيجى بشنطتها ودمتم ... الأم لما تروح فرح مثلا تختار العروسة لإبنها والأفراح عادة بتكون الظهر مش بالليل زيينا

.
عجبتنى اوى كوباية الشاى الصغننة اللى عندهم .. شاى اخضر وشاى احمر بالنعناع والكوباية يجى بوق صغير تشرب ويتصبلك تانى .. قعدت اصور فيها كدة زى العبيطة ههههههههههه

.

استنوا اما احكيلكم على الحسنة اللى فى ايدى اليمين دى .. زمان وانا صغيرة لما كان حد من صحابى يسألنى ايه دى اقولهم ده بابا عاملى علامة عشان ماتوهش !!! ولما كبرت شوية اختى قالتلى انها حسنة .. فلما العيال سألونى تانى قولتلهم دى حسنة قالولى لأ دى كبيرة اوى دى اكيد سيئة مش حسنة !!!!!!ه

.
***********

.

مطروح نفسها تجنن يا جماعة .. عجيبة غير طبيعية بجد ولا منظر الغروب بجد جنان فى الغرام .. مش عارفة ليه المرة دى كنت حاسة انى نفسى اجى تانى بس ابقى مع حد تانى لوحدينا .. تيرا را را تيرا را .. صورتلكوا شوية صور لعجيبة والغروب والغرام شوفوهم كدة وحتلاقوا عندى حق

دى عجيبة يا جماعة .. سبحان من خلق وابدع .. والصورة اللى قبلها فى الغرام

.

استغربت اوى هناك من التاكسيات .. معظمها بجد هيونادى أكسنت .. نااااااادر اوى لما تلاقى ماركة غيرها .. سبحان الله

.

عملت دماغ مصاصة فظييييييييييعة .. اصل انا مدمنة مصاصة بعيد عنكم .. لفيت البلد كلها ادور عليها فين وفين اما لاقيت وكل ما اروح لحد يبصلى من فوق لتحت ويضحك!!!!ه

.
الحمد لله رب العالمين .. اسيبكم بقا دلوقتى لحسن ماما معتقدة ان الكمبيوتر ده اللى تعابنى اصلا .. ربنا يستر ... المهم كل سنة وانتوا بألف خير وربنا يبلغنا جميعا رمضان ونخرج منه مغفورلنا جميعا اللهم امين .. وربنا يكرم كل اللى تمنالى السلامة وانا فى السفر .. جزاكم الله خيرا جميعا ويبارك فيكم ياااااارب .. سلاااااام عليكم

.

استنى انتى حتنهى البوست قبل ما اقول كلمتنى

.

اتفضل واخلص

.

احم احم .. ياجماعة بجد تحية مني خاصة جدا جدا جدا لكل من وصل لاخر البوست الطويل الممل الرخم اوى ده

.

كدة يارخم ؟.. طب هات حبة اللب دول خسارة فيك