Sunday, October 14, 2007

تاج وتاج يبقوا تاجين

10



20



30



40



50



100


أحمدك ياااااااااااارب


ايه يابنى مالك .. وايه الفلوس اللى بتعدها دى كلها


دى فلوس العيدية يابنتى .. الحمد لله بقيت من الأعيان المتكمكزين


ما شاء الله ما شاء الله .. ربنا يزيدك


متشكر


الله يفتحها فى وشك


ميرسي


إلهى يجبر بخاطرك قااااااااااادر ياكريم


يحنن


كدة؟؟؟ .. طب يلا غور من وشي


ماشى من غير ماتقولى بس قبل مامشى لازم اغيظك وارمى قنبلتين .. قصدى تاجيين فى المدونة واجرى


يالهوى تاجين حتة واحدة يا مفترى .. وماله اهم احسن منك .. امشى يلا من هنا .. هش


اشطة اروح اهيص انا واسيبك مع القنبلتين .. سلاااااااااااام


يلا اجرى .. ده ايه القرف ده ياخواتى .. إشحال ماكنت مشغلاه عندى فى المدونة وخليته يطلب العيدية اللى هو عايزها منكم كمان .. وقال على رأي المثل .. خيرا تعمل بطيخاً تلقى


التاج الأول ده من اختى تمر حنة هو دسم شوية بس ربنا يسهل .. يلا بسم الله


لو قالولك اختار عصر من عصور مصر علشان تعيش فيه تختار اى عصر و فى عهد اى حاكم .. واشمعنى؟
الخمسينات اعتقد كان جميل اوى .. على قد ما بسمع ان كان اى حد يتخرج يشتغل على طول وان مشاكل البطالة والعنوسة اللى موجودة دلوقتى مكنتش موجودة زمان على الإطلاق ... بس طبعا لو اطلعتم على الغيب لاخترتم الواقع فاللى الواحد فيه احسنله اكيد
.
اول اولويه فى حياتك عيلتك ولا شغلك ولااصحابك؟
لا عيلتى طبعا طبعا طبعا .. خيركم خيركم لأهله



ايه اكتر حاجه بتحبها فى رمضان؟
بحبه هو شخصيا وشحن بطاريتنا الإيميانية فيه الحمد لله .. الواحد بيخرج منه كأنه اتولد من جديد


اوصف ليا اجمل فطار ممكن تفطره
لا عادى اى حاجة .. الصايم مش بيركز اى حاجة بتشبعه وخلاص ، بس فى العموم انا بحب الأسماك اوى ومينفعش اسماك فى رمضان فأى حاجة بقا مش مشكلة



لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
حديهم القدرة على انهم يخالفونى ويعارضونى لو غلطت .. يعنى يسمعوا كلامى طول ما انا صح ولو غلطت يقوموني


اللى بيبوظ الحكام .. نفسهم؟ ولا الشعب؟ ولا الحاشيه المقربه؟
ممكن تقول كل ده مع بعضه بس العنصر الأقوى بيكون الحاشية على حد علمى


مين أكتر اعلامي مصري بتحترمه؟
منى الشاذلى وعمرو أديب ومعتز الدمرداش ومي الشربينى ومحمود سعد ..رغاية انا صح :$ه


قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
هه؟!!!!! .. لأ


لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
والله لسة مشتغلتش عشان اجاوبك ياريس


ايه تانى بلد تتمنى تعيش فيها بعد مصر؟
المدينة المنورة طبعا .. حلم حياتى انى اعيش فيها


اوصف ليا ترتيبات اجمل فرح ممكن تحضره
اجمل فرح فى رأيي اللى هو يبقى كتب كتاب ووليمة وبس على كدة .. الفرح بدوشته والهيصة وكل ده مبحبوش .. ذنوب وبعزأة فلوس ع الفاضى ومحدش بيرضى فى الآخر .. وبعدين ليه يبتدوا حياتهم بمعصية بدل ما يبدأوها بطاعة ... يحوشوا فلوس الفرح ويروحوا عمرة مثلا او يتصدقوا بيها .. كدة يعنى ، واكيد ربنا حيبارك فى اسرة بدأت حياتها بطاعة


بتراعي كلام الناس والقيل والقال؟ لو اه او لو لا قول لى ليه؟
فى الغالب لأ ده لو ع الناس التانية ولو الكلام عليا بحاول بقدر المستطاع ارضى ربنا فلو كلامهم وإنتقادهم على حاجة حلال ولا بهتم لكن لو حاجة فعلا غلط بحاول اراجع نفسى اكيد


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
الحمد لله بعرف اتأقلم


السعاده هى؟
الأنس بالله وراحة البال


عندك أمل ؟؟ أسبابك ؟
أكيد .. اسبابى ان ربنا هو ربنا .. يعنى بالثقة فى الله ورب الكون وانه قادر على كل شئ بحوله وقوته .. لو اى حد له رب قادر اوى وعظيم اوى كدة ازاى ميكونش عنده أمل؟


لما تحب تهرب من كل شئ بتروح فين؟
بروح لربنا .. أصلى وأدعى



امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
لا قلتها كتير السنة دى .. لما تميت 21 سنة ولما اتخرجت من الكلية ولما اختى خلفت وبقيت خالة ولما اختى نزلت الشغل وبقت تسيبلى سولى وابقى مسؤلة تماما عنها لحد ما امها تيجى من الشغل


لما بتعمل عمل خيرى بيكون ايه هو دافعك الاول؟
الدار الآخرة


بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لأ الحمد لله .. مش عارفة فى ظاهرة فعلا غريبة اليومين دول ان بنات كتيرة جداااااااااااااااااااااااااااااااااااااااااااااا بيشربوا سجاير ومن كل الأعمار والطبقات ومحجبات وغير محجبات ، والأغرب ان البنت بتكون باينة فى الأول حمل وديع بجد وقطة مغمضة وحاجة كدة لو قولتلها بخ تتسرع مثلا .. وفى الاخر تكتشف انها حريفة شرب سجاير لأ وبتشرب زى المعلمين شيشة ياجدعان كمان ،الأنكت هو انى سمعت مرة حكاية ان بنت واحد قريبها كان بيحبها اوى وكان متمسك بيها جدا جدا جدا كانت مترددة فى الاول بس وافقت فى الاخر وبعد ما وافقت قالها انتى عارفة انا متمسك بيكى ليه .. لأنك خام وقطة مغمضة وعلى نياتك ع الآخر !!!! .. اللى ميعرفوش الباشا انها بتشرب سجاير من ثانوى من ورا أهلها ولو فى شيشة على اى قهوة مع صحبتها مافيش مانع ،نفسى اعرف بيشربوها ليه وسألت واحدة منهم فعلا قالتلى هروب!! .. لاحول ولا قوة الا بالله ، الموازين اتقلبت يا جماعة بجد ومحدش بقى عارف فين الصح من الغلط .. مين الكويس ومين الوحش ، المظاهر بجد بقت اونطة واى كلام ع الآخر .. مش عارفة انصح الشباب يستخيروا ربنا كويس قبل ما ياخدوا اى خطوة جدية تجاه اى بنت ولا انصح البنات تستخير ربنا كويس قبل ما توافق على اى شاب ..ولا ندعى احسن ونقول يارب ألطف بينا وخرجنا من الدنيا دى على خير

بتعرف ايدك اليمين من الشمال ازاي؟
ده سؤال ذكى جدا لأنى فعلا مش بعرفهم من بعض بإعتبار إنى شولة ، بس لما اتزنق وابقى عايزة اعرف مين فيهم ايه بكتب ع الهوا .. الإيد اللى بتكتب تبقى الشمال والتانية تبقى اليمين طبعا مش محتاجة ذكاء يعنى

ايه اكتر اله موسيقيه بتحبها ؟
الطبلة

فى رأيك ليه الذوق والنخوه اتعدموا؟
هما متعدومش اوى الصراحة عشان الواحد يبقى حقانى بس ، هما قلوا شوية كتيييييييير .. قلوا ليه بقا مش عارفة .. يمكن فايروس؟؟؟؟

ايه الحاجه اللى لو حصلتلك تبقى سعيد قوى؟؟؟
حاجات كتيرة بصراحة ... يارب اللى دعيت بيه فى رمضان يتحقق حبقى سعيدة اوى ان شاء الله

تختار يبقى عندك...ارض زراعيه ولا احسن عربيات و لا كام عماره و لا فلوس فى البنك؟؟؟؟
اتعلمنا فى الإقتصاد ان الفلوس مع الوقت قيمتها بتقل بسبب التضخم وكدة .. فأى أصل بيكون احسن من الفلوس النقدية بشكل عام ..لكن يبقى عندى ايه بالظبط من الأصول دى الله اعلم .. اللى ربنا رايده هيكون إن شاء الله

البحر و لا النيل؟؟؟
لا ده ولا ده .. البحر غدار والنيل متلوث وطالع عينه

مركب و لا طياره؟؟
طيارة وربنا يستر

مجنون و لا عاقل؟؟
الإتنين وبحب الحالتين جدا

تقرأ كتاب و لا تتفرج عليه فيلم؟
الاتنين .. ده طعم وده طعم

تمرر التاج لمين؟؟
اللى حيعلق حيجاوب يا جماعة .. اللى أوله شرط آخره بنوووووووووووووور


التاج التانى تاج مزاج عالى اوى جايلى من اخويا مبرمج حر .. رغم ان هو والواد كوكو مش بيطيقوا بعض خااااااااالص .. لكن طبعا زى مانتوا عارفين انى طيبة وبحاول اصالحهم على بعض دايما

التاج اسمه " لما احب " .. وانا بصراحة لما احب حاجة احب اعملها بمزاج .. يلا خدوا نفسكوا واقروا اللى جاي بمزاج بقا

لما أحب اعمل بحث عن حاجة معينة بفتح جوجل طبعا ..لكن لو عايزة كتاب او حاجة معينة بدور فى موقع اسمه " فور شيرد " حلو جدا ودايما بلاقى اللى انا عايزاه الحمد لله

لما أحب اعمل دماغ بجد .. امسك القلم واكتب او ادور فى النت على الحكم والكلمات المأثورة

لما أحب اعمل دماغ عالية اوى يعنى .. امسك كتاب حلو واقراه او اشوف اى ندوة لدكتور إبراهيم الفقى او اضلم النور واتفرج على فيلم اجنبى حلو .. يعنى مايكونش رعب وميكونش أكشن جاف ورخم

لما أحب اتبسط .. اهيس جامد او اخرج مع اختى ، اى خروجة معاها تعتبر متعة بالنسبالى خصوصا لو خدنا البت سولي معانا وقعدت تتفرج ع الدنيا والناس بإنبهار بااااااالغ ، رغم ان اختى بتقعد اليوم بطوله تتحايل عليا عشان اخرج معاها اصلا

لما أحب ادخل عالم داخل عالم اروح الكوافير .. فعلا عالم تانى خااااااالص بجد

لما أحب العب لعبة حلوة بلعب مع سولي

لما أحب افصل خالص بقا بغسل المواعين .. لا ده بجد غسيل المواعين فعلا بيخلى المخ ينشغل بحاجة تانية غير الواقع ودايما اى افكار جديدة تجيلى بتجيلى وانا بغسل المواعين واجرى اكتبها بالماية والصابون زى ماهما كدة

لما أحب افرفش واضحك واهيص وكدة حاجة من الاتنين يا اتصل بصحبتى ونقعد نتضحك على اى حاجة وكل حاجة .. او اروح لبنات خالتى ونهيصة لغاية ما جرانهم يفتكروا ان فى واحدة منهم اتخطبت واحنا بنهصيلها ههههههههه

لما أحب امشى بمشى فى الجامعة على مهلى خااااااالص واحط سماعة الراديو فى ودنى وامشى مزغللة عينى عشان مشوفش حد او امشى ابص على الشجر والسما واسرح
.
لما أحب ابقى فرحانة اقول اى حاجة تضحك اللى قدامى .. بفرح اوى لما اخلى اى حد يضحك الحمد لله
.
لما أحب ادخل مكان يريحنى بجد اروح اى مكتبة او اى بيت من بيوت الله
.
لما أحب استعيد همتى ونشاطى اقرا او اسمع اى حاجة فى التنمية البشرية على طول
.
لما أحب احس ان روحى اتردت ليا تانى آدى البت سولي حضن كبييييييييير .. مبعرفش اعيش وهى بعيد اساسا
.
لما أحب افتكر احلى سنين عمري اجرى على صورى انا وصحابى فى الكلية وافتكر كل دكتور وكل صاحبة وكل ركن كان بيجمعنا سوا .. وحشونى اوى العيال دى
.
لما أحب احس انى بعرف اعمل حاجة اتكلم مع اجانب بالإنجليزى وافرح اوى لما نبقى فاهمين بعض وعارفين نتواصل الحمد لله
.
لما أحب اضحك من قلبى بجد اتفرج على اى مسرحية لمحمد صبحى
.
لما أحب ابعد عن الدنيا واعرفها على حقيقتها وانها مجرد مرحلة ورايحة اقرا كتاب الروح لإبن القيم
.
لما أحب اهرب من كل شئ واى شئ فى الدنيا .. بتوضى وبصلي
.
لما أحب اعيش جوايا شوية بفتح أرشيف المدونة هنا واقعد اقرا فى مواضيعى القديمة .. مش عارفة ليه بستريح اوى لما اعمل كدة ، بقرأ كل كلمة كتبتها بإندهاش جدا كأنى مش انا اللى كاتبة وساعات استرغب انا كتبت الكلام ده ازاى ، وساعات اضحك اوى لما افتكر موقف حلو كتبت عنه وساعات ابقى حعيط لما افتكر موقف تانى أثر فيا وكتبت عنه او مود معين او مشكلة كنت فيها والحمد لله ربنا اكرمنى وبقيت احسن ، الأهم من ده كله انى بحس انى واقفة قدام مراية بتجيبنى فى مواقفى وأوقاتى كلها مش بس دلوقتى وكأنى بقرانى فى كتب التاريخ ، بحس انى لسة عايشة وان اللى عيشته زمان كان له أثر حتى لو الأثر ده محدش حاسس بيه غيري ، عشان كدة بحب اكتب حتى لو البوست طويل لأنى ببقى عارفة ان بعد فترة حرجع اقرا واستمتع باللى فضفضته مع نفسى تانى .. بفرح جدا لما حد يعجبه المدونة بتاعتى وحريص انه يعلق على كل موضوع فيها ، بس بصراحة مش بزعل لو فى حد المدونة مكنتش عجباه او مش مهتم انه يعلق فيها .. بيكفينى ساعتها انى حباها واعتقد انها هى كمان بتحب انى احبها او على الأقل ابقى راضية بيها وعنها ... الحمد لله رب العالمين
.
وبكدة يكون خلص التاج المزاج .. وزى ما اتفقنا قبل كدة .. اللى حيعلق حياخد التاجين ويجاوب عليهم ، انا قلت ونبهت اكتر من مرة .. انتوا احرار بقا

30 comments:

  1. محدش عايز يعلق عشان ما ياخدش تاجين وهو مروح .. هههههههههه .. عموما أنا يسعدنى ويشرفنى أن أجاوب على التاج الأول

    :))

    سلام

    ReplyDelete
  2. صراحة رائع
    وخاصة إجابتك المفصلة في موضوع التدخين والذي تم الولوج منه إلى موضوع الزواج وحسن الاختيار والتاج التاني فيه نقط جميلة جدا
    وخاصة موضوع غسيل الأطباق دي

    ReplyDelete
  3. لالالا متقوليش
    بقي انا اول تعليق؟؟؟؟
    علي العومو كل سنة وانتي طيبة مع انها متأخرة شوية

    اول تعليق؟؟؟؟؟
    مش مصدق نفسي

    انا جاوبت التاج الاول علي فكرة بس حاخد التاج التاني واجاوبه

    ياخسارة كاميكاز مش هنا عشان اسلم عليه ابقي سلميلي عليه انتي بقي

    مش معقول..اول تعليق؟؟؟

    ReplyDelete
  4. هههههههههههههههههههههههه
    احلى حاجه الحوار اللي قبل التاجات
    اجاباتك مميزه
    بجد والله

    يلا كل تاج وانتي طيبه
    وبلش تعدي العيديه كده اونلاين عشان الحسد والقر

    وش بيضحك

    ReplyDelete
  5. اجابات مميزة
    ربنا يبارك فيكى

    ويستجيب دعواتك اللى فى رمضان

    ReplyDelete
  6. عجبني جدا الردود واللي عجبني اكتر اني عرفت انك لا مؤاخذه يسرا
    مش عارف اجيب مؤنث اشول
    يعني طلعنا قرايب
    انا بصراحه باحب جدا اني اعرف الناس الشول عشان ماحسش بغربه وسط الناس العاديه بتوع اليمين
    لكن ربنا يجعلنا من اهل اليمين دي حاجه تانيه
    بالنسبه للتاج التاني
    روعه كله على بعضه روعه
    ربنا يكرمك يا رب ويوفقك

    ReplyDelete
  7. تاجين مرة واحدة
    ما شاء الله
    ربنا يعينك على اللي جاي
    بس التاج التاني ده بيفكرني بـ
    "أنا لما بحب أتسلى مبحبش أقزقز لب"
    تحياتي

    ReplyDelete
  8. انسانه
    ازيك كل سنه وانتى طيبه يا قمر
    وحشتينى اوى
    اجابتك اكثر من رائعه ياقمر

    ReplyDelete
  9. كل دة تاج


    كل سنة وانتى طيبة

    ربنا يوفقك ويكرمك

    تحياتى

    ReplyDelete
  10. كل عام وانت بخير اختى الكريمه
    اجوبتك ممتازه فعلا
    بس الموضوع طويل جدا جدا
    ياريت متخليش مواضيعك طويله كده علشان الوقت والمجهود
    ونلحق نقراه كله ونزور مدونات اخرى
    جزاك الله كل خير

    ReplyDelete
  11. عزيزتى
    صريحه ومحدده ومباشره
    وعجبنى اوى اجابتك عن مشكلة عصرنا
    مشاكل البطالة والعنوسة
    لانى بجد شايف ان اكتر مشكله بتقابل الرجل المصرى هى البطالة او الشغل اللى براتب تعبان
    ومشكلة المراه العربيه
    هى العنوسه بجد قهر لاحساس الرجل والانثى معا
    بس ربنا موجود ورحيم بعباده
    تحياتى يا افندم
    سلام

    ReplyDelete
  12. يا مكتر من تيجانجك
    بالف هنا و شفا
    كل سنة و انتى طيبة ... و اه
    ليه يعنى
    لا البحر و لا النيل
    كمان حلوة قوى حته طالع عينة دى
    تحياتى
    تمر حنة

    ReplyDelete
  13. مبروك عليكى التاجين واجاباتك منطقيه والظاهره انى الحمد لله معنوياتك عاليه جدا دائما يارب

    ReplyDelete
  14. السلام عليكم

    اجاباتك عجبتني .. و البلوج بتاعك برضو
    ;)

    ما شاء الله عليكي

    اما موضوع تدخين البنات ده خلاني افتكر لما رحت انا و أهلي نفطر في رمضان .. لقيت بنت محجبه داخله و أعجبت بشكلها الهادي .. كان معاها واحد شكله اكبر منها و طلبوا شيشه .. من غير ما ألاحظهم توقعت بشكل بديهي انه الشيشه له .. بعد شويه لمحتهم لقيته حاطط ايده على كتفها و هي اللي ماسكه الشيشه ولا أجدع معلـّم
    :S :S :D

    بقيت متنحه و فعلا اتأكدت للمره المليون انه الحكم مش بالمظاهر .. ربنا يهديها ويهدي كل اللي زيها


    احم احم .. يعني ينفع آخد التاج منك و اجاوب عليه ؟
    :$
    برضو الواحد لازم يستأذن
    :D

    ReplyDelete
  15. بعد السلام عليكم

    اول مرة في حياتي ادخل مدونة الاقي فيها تاجين مرة واحدة في بوست واحد

    يالا ربنا يديكي الصحة بقي

    التاج الاول اجاباتك عليه جميلة جدا .. اوضحت انك انسانة ملتزمة اهم حاجة عندك رضا ربنا
    ربنا يوفقك و يوفقنا لما يحبه و يرضاه

    ربنا يتقبل دعواتك الرمضانية

    اما التاج التاني فظريف جدا ده غير أنه جديد وأول مرة أشوفه .. وأجاباتك جميلة و ظريفة

    وبما أنك طلعتي مهتمة وقارئة في التنمية الذاتية .. انصحك بقراءة كتاب لماذا من حولك أغبياء للدكتور شريف عرفه .. هذا أن لم تكوني قرأتيه
    هوه فعلا كتاب رائع

    تحياتي

    ReplyDelete
  16. السلام عليكم

    كل سنه وانتي طيبه


    اجاباتك علي التاج الاول جميله جدا

    تحياتي

    ReplyDelete
  17. تو تاجز
    انا كمان بحب المدينة كفاية انها مثوى الرسول صلى الله عليه و سلم


    اوروفوار

    ReplyDelete
  18. أنا لا جيت ولا عديت ولا قريت ولا علقت ولا ليا دعوة بالتاج ده من أساسه واصل

    قال عصر الخمسينات قال .. فيه حد يقول كده؟

    أحلى عصر هو العصر اللي إحنا متهنيين فيه ده

    :-D

    ReplyDelete
  19. السلام عليكم
    اجابات زى الفل :)
    ولو ان فيه أسئلة غريبة :)
    ومعلش بقى مليش انا فى موضوع التاجات ده ولو ان فكرتها عجبانى
    تحياتى :)

    ReplyDelete
  20. انت بتحبى تعيشى فى المدينه المنوره
    انا نفسى اموت فى المدينه

    ReplyDelete
  21. هاى
    انا مستنياكي ... شوفى الجديد

    ReplyDelete
  22. مبرمج حر

    هههههههههههه معلش بقا مانت شريك فى الجريمة التاجية دى

    اوكى حستنى إجاباتك إن شاء الله

    سلام

    --------------------
    عصفور المدينة

    ربنا يكرمك استاذى الفاضل .. شهادة اعتز بيها بجد
    جزاك الله خيرا

    ---------------------
    أحمد عيسى

    لا مش اول تعليق
    :D
    وانت طيب

    لا مش اول تعليق بردو
    :D
    حستنى اجابات تانى تاج ان شاء الله

    يوصل سلامك إن شاء الله

    والله العظيم تلاتة ماهو اول تعلييييييييق

    ههههههههههههه

    ReplyDelete
  23. اسكندرانى اوى

    يااااااه هو انا اطول اخد عيدية زى كاميكاز
    يلا الحمد لله على كل حال
    اهلا بيك دايما اخى الكريم

    --------------------------

    alqassam

    اللهم آمين وإياك
    جزاك الله خيرا اخى الكريم

    --------------------------

    ولــــــــــو

    هههههههههههه خلاص احنا نعمل جمعية الشول المتحدة .. حاجة كدة جامدة يعنى بعون الله اصلنا طلعنا كتير اوى وكمان اخويا اشول زيي

    والله الواحد كان بيتبهدل فى البنشات والديسكات على مدار سنين حياته الدراسية بجد
    يلا الحمد لله على كل حال

    اهلا بيك اخى الأيسر
    :D

    --------------------

    الأستاذ

    ههههههههههههه عندك حق والله بس نعمل ايه فى تيجان الأستاذ مبرمج .. يلا ربنا يسامحه بقا حنعمله ايه يعنى ، كوكو راح كسرله المدونة فى مرة عشان يبطل التيجان بتاعته دى وهو أبداااااااا

    :D

    اهلا بيك دايما يا استاذى

    -----------------------

    رينــــا

    عروستنا الحلوةةةة

    وانتى طيبة ياجميلة انتى وحشانى اكتر والله

    يارب تكونى بخير وفى افضل حال يااااااارب


    --------------------

    Tamer Nabil

    شوفت الإفترى
    :(

    اللهم أمين وحضرتك طيب يارب

    --------------------

    ابوزياد الفاتح

    وحضرتك بخير يافندم

    والله مش ببقى قاصدة الموضوع يبقى طويل ، كل الحكاية انى بحب افضفض معاكوا ودى بتبقى النتيجة فى الآخر
    :D

    اهلا بيك دايما وجزاك الله كل خير

    -------------------

    احساس برضوا حى

    ربنا يكرمك ويعزك
    فعلا البطالة والعنوسة بقوا من مشكلات العصر والقنابل الموقوتة فعلا

    ربنا يرحمنا برحمته قادر ياكريم

    سلام واهلا بيك

    ------------------

    تمر حنة

    ههههههههه معلش ماهى دى الحقيقة بردو

    ربنا يكرمك حبيبتى اهلا بيكى

    --------------------

    Solitude

    wa fekom barak Allah
    :)

    ReplyDelete
  24. رئيس جمهورية نفسى

    الله يبارك فيك ويكرمك

    واهلا بيك دايما اخى الكريم

    --------------------

    Zo0oZ

    وعليكم السلام ورحمة الله وبركاته

    ربنا يكرمك ده من زوقك

    لا تدخين البنات بقى ظاهرة فعلا اليومين دول مستفزانى اوى

    ده انا مرة دخلت كوافير حسيت انى قاعدة فى غرزة مش فى كوافير ابدا

    لا حول ولا قوة الا بالله

    بستأذنى يابنتى طبعا اتفضلى وفوقيه بوسة كمان
    :D

    اهلا بيكى دايما حبيبتى

    -------------------

    abo salah

    وعليكم السلام ورحمة الله وبركاته

    هههههههههه معلش إفترا شوية

    ربنا يكرمك ويعزك ويجعلنى خيرا مما تظنون ويغفر لى مالا تعلمون
    اللهم آمين

    اها تاج اختراعات اخويا المبرمج ، لا مقريتهوش .. ياريت تعمل فيا جميلة وتقولى اجيبه منين يبقى كتر خيرك بجد

    اهلا بيك دايما وجزاك الله خيرا بجد

    -----------------

    mohand

    استاذنا عدو المرأة اللى خطب
    :D

    وحضرتك بألف خير والف مبروك مرة تانية ربنا يتمملكوا بخير ياااااااارب

    -----------------

    طهقااااانة

    منورة البلوج بجد والله

    فعلا بلد الحبيب عليه الصلاة والسلام ربنا يكتبلنا نروح يارب

    اوروفوار يافندم ورحمة الله وبركاته


    -------------------

    يا مراكبي

    الله اومال مين اللى كاتب التعليق ده .. العفريت؟؟؟؟؟

    هههههههههه اوكى طالما حضرتك شايف كدة يبقى ماشى .. عصر الحفريات اللى احنا فيه مش وحش بردو
    ههههههههه

    سلملي على مها وامها ياابو مها
    :D

    --------------------

    YHYيــوســف الـمصـرى

    وعليكم السلام ورحمةالله وبركاته

    ربنا يكرمك .. كلنا مالناش فى التاجات بس حكم القوي بقا حتجاوب يعنى حتجاوب معلش
    :D

    اهلا بيك دايما اخى الكريم

    ----------------------

    رأفــــتلــوجيــا الأغــانى للرأفتانى

    يارب يرزقنا بالحياة والموت هناك جمب الحبيب المصطفى عليه الصلاة والسلام

    اللهم آميييييين

    اهلا بيك اخى المهاجر وربنا يعينك على غربتك اللهم آمين

    ----------------

    تمر حنة

    جيالك ياجميلة مسافة السكة حاضر
    :)

    ReplyDelete
  25. علي فكره (بعض الكلمات قبور) كلمه جامده وأنا والله بعدها خايف أكتب حاجه عندك ..وعلي العموم ربنا يجازيكي خير

    ReplyDelete
  26. ياسر مدني ...دينامو الإخوان

    :)
    يا أخى اهلا بيك واكتب براحتك وانا متأكدة ان كلمتك حتكون نور إن شاء الله

    انا بس كاتبة كدة لأن فى تعليق من مجهول وحش جدا جدا جدااااااا جالى قريب ومن بعدها وانا عاملة مودريشن للتعليقات كلها وكاتبة الجملة دى لعل صاحب التعليق يتقى الله ويرجع إليه

    على العموم اهلا بحضرتك دايما اخى الكريم

    ReplyDelete
  27. ده مش أنا برضه

    إنتي مسيحالي في كل البوستس بتوعي على موضوع مها ده وشكلك كده ليكي علاقة بالحاجة مراتي أو تقربيلها

    هأروح أمسح تعليقاتك كلها قبل ما أتقفش بقى

    ReplyDelete
  28. يا مراكبى

    كدة ياابو مها تهون عليك بنتك؟؟؟

    تلاقيها بتوأ وأ دلوقتى وبتقول باباااا باباااا

    :D

    ReplyDelete
  29. الشكر مش كفاية على مساندتك ليا رغم أنك ما تعرفنيش

    مدونتك جميلة أوى و موضوعاتها هادفة و زوقك حلو أوى فى الصور ذوق فنانين

    اجاباتك جميلة على التاجين و يا رب ربنا يحققلك الى دعيتى بيه فى رمضان و أدعيلى أنا كمان و النبى با ين عليك قلبك طيب :)

    كل حبى و أحترامى

    ReplyDelete

الكلمـة نـور .. وبعـض الكلمـات قبـور