Sunday, December 09, 2007

حبة خوف وحبة ضحك

يامما .. ايه الرعب ده ؟؟

معلش استحملوا مانتوا اللى قعدتوا تقولوا تعالي بسرعة ومش عارفة ايه فجيت .. زى القرش البراني تسيبه يجيلك تانى .. المهم ركزوا معايا كدة فى الكام كلمة اللى جاية اصدعكم بيهم دول عشان مهمين اوى

خرجت النهاردة انا واختى نجيب شوية حاجات وفى وسط اجواء من البرد والمد عشان البت فى البيت ممكن تعيط لو اتأخرنا عليها - البت دى تبقى بنت اختى سولي - مع العلم انها قاعدة مع ماما اساسا يعنى ان شاء الله مش حتعيط .. المهم خلصنا خلاص قوم ايه اختى تشبط فى بيبى جونسون الشامبو اللى من غير دموع ده للبت سولي قال ايه عشان العيد قرب !!

جبناه وجينا نمشى لاقينا راجل طويييييييييييل وعريييييييييييض وشكله موريب حبتين .. الراجل ده بقا بيعمل ايه ؟ بيقرب من كل عربية ويقف جمب المراية اللى ع الجمب ويخبطها بعنف لحد ما تتدشدش وتبقى ولا ليها لزمة .. عربيات يا جماعة ع الزيرو ، خدت بالى منه فى الاول وشهأت جامد من المشهد ده - الشهئة دى فعل بيطلع غالبا عند عمايل الملوخية - وحكيت لاختى .. المهم بقا واحنا ماشين اختى قالتلى تركبى ولا نمشيها .. قلتلها والله انتى مستعجلة عشان بنتك فنركب عادى .. قالتلى خلاص يبقى نمشيها !!!

جينا نمشى لاقينا صاحبنا إياه واقف بين عربيتين فى حتة ضلمة وانتوا عارفين نظرة المجنون بتبقى عاملة ازاى .. اختى سألتنى سؤال واحد ماتنتوش .. الراجل ده هو اللى كان بيكسر العربيات؟؟ بصيت عليه لاقيته بيبصى ما اخبيش عليكوا قلبوا وقع فى رجليا .. قلتلها اه وانا مرعوبة .. وعينكوا ماتشوف الا النوووووووور

اختى من النوع اللى بيترعب من المجانين جداااااااااااا يعنى لو شافت مجنون ممكن تعدى العربيات من غير ما تبص حتى وتعرض نفسها للخطر ولا انها تعدى جمب مجنون .. لاقيتهالكوا بتشدنى من ايدى وهوب عايزة تعدى .. فى نفس ذات اللحظة دى لمحتلكوا مواصلة فاضية وبتحمل .. قولتلها يلا نركب العربية وهى تشدنى من ايديى عشان اعدى الشارع بالعافية وانا صوتى رايح اصلا من اثار البرد فعاملة زى البطة المبحوحة اللى حد مزعلها وعمالة تزعق ومحدش فاهم منها حاجة !!!.. المهم عدينا ونجينا بأعجوبة من قدام عربية مرسيدس سريعة .. وفضلت تشد فيا وبقيت اخبط فى الناس اللى واقفة وواحدة كانت حتقع وحكاية .. فى الحين ده بردو ابتدى نشاط عم المجنون يزييييييييد وابتبدى يكسر فى عربيات تانية كتير لدرجة ان الشارع كله خد باله منه ومن عمايله

بس وعديت انا واختى وفضلت تمد جااااااااااااااااامد ومتوترة جدا وحالتها حال وانا عمالة اجرى عشان احصلها ومش عارفة اتكلم صوتى رايح
إهدى يابنتى شوية
قولي اي حاجة عشان تبعد الشر
تبعد الشر؟؟ !! .. إبعد يا شر
إقرى آية الكرسى بسرعة
قريتها ولاقيتها بتمد اكتر وبتسبقنى بكتييييييير
ايه يابنتى انتى سبتينى اقرا آية الكرسى وحتهربي وتسبينى ولا ايه
يالهوي ياياسمين لو كان عملنا حاجة
الحمد لله ربنا ستر
كنا ساعتها بقا نطلعله البيبى جونسون وندلقه فى وشه .. بس يا خسارة مكنش حيعمل فيه حاجة ده مش بيحرق العين !

المهم بعدنا عن مكان المجنون الحمد لله وبعدها عملنا اكبر جريمة ممكن يتصورها عقل .. وقبل ما نرتكب الجريمة دى بصينا لبعض شوية وغمزنا لبعض غمزة تنم عن نية لفعل شئ خطيييير للغاية .. روحنا عند الفرن - يعنى مع سبق الإصرار اهوه - واشترينا فطيييييييييييييييييييييير .. اكبر جريمة ممكن تتعمل فى الحقل الرجيمى فى التاريخ اصلا .. كانت الاول رافضة عشان الامانة بس .. بس انا قعدت اغريها فجيبنا واحدة كبيرة وبعدين اغريتنى هى فجيبنا واحدة صغيرة كمان واستعبطت انا فى الاخر وقلت للراجل هات اتنين صغيرين وواحدة كبيرة ياعم!

بس ومشينا ورحنا للسوبر ماركو والراجل قعد يشتكيلى من ان الشيبسى غلى وكله حيبقى بتلاتة جنيه مالين الكيس هوا ومعرفش ايه .. اييييه دونيا

وفى آخر المطاف كان الراجل بتاع الجرايد اللى دايما اغلس عليه واقعد اتفرج ع الدفيفيديهات عنده ولا بشترى ولا بنيل .. وعلى طول اسأله انا واختى على مسرحية عروسة تجنن .. بتاعة إسعاد يونس
اختى وقفت بعيد عشان هى عارفة اللى حيحصل .. بصيت ع المسرحيات اللى عنده وبصيتله كدة بكل ثقة : هى مسرحية عروسة تجنن لسة مجاتش؟
قالى : انهى دى ؟
قلتله :اللى إسعاد يونس كانت طالعة فيها هبلة!!!
سمعت ساعتها صوت اختى وهى بتكتم ضحكتها من المنظر
قالي : لا والله ده انا حتى سألت عليها فى الشركة مالقيتهاش
قلتله: ايوة ماهى شريطها ضايع من التلفزيون ذات نفسه تلاقيهم سجلوا عليه ماتش كورة ولا توم وجيرى ولا حاجة
قالى : لا ان شاء الله لو لاقيتها حبقى اجيبهالك
تجيبهالي ؟!! .. اه شكرا .. سلام عليكم

وانتهى الموقف واختى حتموت من الضحك .. قلتلها اسكتى ده بيقول حيبقى يجيبهالي .. يالهوى لوعملت زى النكتة بتاعة ايس كريم بالكوسة

استنوا اما احكيهالكوا منا قاعدة فاضية بقا ... مرة واحد كان فى سوبر ماركت تحتيه كل شوية وهو نازل يسأل الراجل : عندك ايس كريم بالكوسة ؟
ايه .. لا مش عندى
ازاى معندكش انا عايز ايس كريم بالكوسة
وهو طالع نفس الكلام
عندك ايس كريم بالكوسة ؟؟؟
لا يابنى والله ماعندى
لا حول ولا قوة الا بالله .. ازاى ده مشهور جدا انا عايز منه
كل يوم لمدة شهر كل شوية يسأل فى الراجل ع الايس كريم بالكوسة .. الراجل قال مابدهاش بقا انا اروح الشركة واللى يحصل يحصل .. راح الشركة وقالهم ان فى طلب كبير جدا على النوع ده ومعرفش ايه وفعلا الشركة اقتنعت وانتجت منه
الواد عدى تانى ع البياع وسأله : عندك ايس كريم بالكوسة؟؟
قاله: اه
قاله: يع!!!

الحق اجرى انا بقا قبل مااتحدف بالطوب عشان النكتة الحمضانة دى والبوست العجيب اللى مش باينله ملامح ده

ملحوظة كاميكازية اخيرة قبل حدف الطوب معلش: كل الأحداث المتكمكزة السابق ذكرها حدثت فى اغلس شوارع مصر، شارع فيصل .. توب علينا يااااااااااارب

واقعدوا بالعافية .. فى مصر !ا

32 comments:

  1. !!أول تعليق

    جيت احجز مكان جنب السبورة

    هروح أقرا واجى

    :)

    ReplyDelete
  2. طب ما البوست حلو اهو امال بيخوفونا منه ليه بس

    النص الاولانى انا كنت قاعد ميت فى جلدى وخايف

    اصل هقولك على سر

    انا بخاف من الحكايات الرعب

    :(

    وخاصة ان كلماتك عملت جو مرعب كدة مع الصورة بيبقى الموضوع صعب على الاطفال امثالى

    اما النص التانى بتاع الراجل بتاع الجرايد واضح ان الراجل ده صبور اوى وعلانياتة

    اما بالنسبة للنكتة انا هحدف بيض وطماطم لانها قديمة اوى اوى انا اصلا سمعتها قبل ما اتولد هههههههههه

    بس بوست لذيذ اوى

    تسلم ايديكى

    وياريت ما تختفيش كدة


    تحياتى

    ReplyDelete
  3. جميل
    :)

    وجميل النيولوك للمدونة
    :)

    ReplyDelete
  4. العزيزة ياسمين

    كل مراية من المرايات اللى اتكسرت وحسب ماركة العربية الجديدة مش حتقل عن مائة دولار ـ يعنى حوالى 600 جنية مصرى دة غير التركيب يعنى الرجل دة دة كسر كام الف جنية ـ

    واضح ان محدش كلف خاطرة وطلب البوليس من تليفونة المحمول ـ ويمكن علشان الناس عارفة ان البوليس مش راح يجى من الاصل فوفروا على نفسهم المكلمات

    الحقيقة شئ مؤسف ان يترك رجل مختل عقليا او بلطجى ـ وبيمثل على الناس الجنان ـ يتلف فى اموال الناس بهذة الصورة

    الحاجة المهمة اللى كلنا لازم نتعلمها ان ساعة الخطر لابد ان نتغلب على الشعور بالخوف لان الخوف يؤدى الى شل التفكير ـ اما التحكم فى الخوف يؤدى الى حسن التصرف ـ وحادث كلية الدراسات الاسلامية فى مدينة الزقازيق اللى ادى الى مقتل اربعة من الطالبات جزء منه نتيجة عدم السيطرة على النفس اثناء الخطر ـ مش معنى كلامى انا الواحد ميخفش لان الخوف شعور طبيعى لكن الاهم ان الواحد يحكم عقلة علشان يعرف يتصرف ـ لان العمر واحد والرب واحد

    نكتة الايس كريم بالكوسة اول مرة اسمعهاوهى لذيذة فى فكرتهاـ تحياتى

    ReplyDelete
  5. اى دة بس؟.
    اختك بتخاف من المجانين لى؟
    دول لطاف اوى
    هى سابتك تقراى اية الكرسى ومشيت ؟
    ههههههههههههههههههه
    اى الشجاعة دى؟
    وبخصوص النكتة الحمضانة
    مش عارف اقولك اى ؟
    بس بعد كل الرعب دة تعكرى مزاجنا بنكتة
    زى دى هههههههههههه


    تقبلى تحياتى

    ReplyDelete
  6. حمدا لله على سلامتك
    وانا زعلان جدا على المرايات على فكرة المجنون بيكون خواف جدا زي الطفل يعني لو كنتم قلتوا له بخ بس ولا بس ولا أي حاجة كان جري ووفرتم على البشرية فلوس المرايات دي

    ReplyDelete
  7. أولا : حمدا لله على السلامة
    و عسى انك تكوني بخير و انه يكون غياب عادي و اعتيادي
    ثانيا : ايه البوست ده .. دي عودة قوية بعد غياب طويل
    ثالثا : انا مش شايف خالص ان النكتة حمض1انة و قعدت اضحك عليها فعلا و ما اكتشفتش انها حمضانة الا لما فكرت أقولها لواحد صاحبي هههههههههههههه
    تحياتي
    بس هو الراجل ده الشرطة كانت سايباه و خصوصا انك بتقولي ان ده كان في وسط البلد

    ReplyDelete
  8. ازيك يا انسانة

    علي فكرة انا زعلانة منك جدا

    لاني كان نفسي نبقي صحاب و انتي مردتيش علية

    ======================

    عجبني بوستك كمان المرة دي

    و ربنا يشفي كل مريض

    بالنسبة للريجيم

    انا كمان بوظت ريجيمي


    معلش هو الشتا كدة

    كل سنة وانتي طيبه

    :))))

    ReplyDelete
  9. دا بقى اللي بيسموه سمك لبن تمر هندي

    هههههههههههههههههه

    عارفه انا قعدت اضحك لدرجه ان زمايلي قالولي انت اتجننت ولا ايه
    فاضطريت اترجم البوست عشان افهمهم ايه اللي مكتوب
    روحي هاتي بقى ايس كريم بالبدنجان
    يجنن جميل اوي

    تحياتي يا انسانه ضحكتيني ربنا يسعدلك ايامك

    ReplyDelete
  10. السلام عليكم

    ايه دا بقي
    مجنون سايبينه في الشارع ؟


    بلغوا عنه



    بالنسبة للمسرحية
    هي اسمها كده فعلا؟

    مش فاكر انا كنت فاكر اسم تاني

    ReplyDelete
  11. Ahmed Al-Sabbagh

    ههههههههه والله من فرحتى بأول تعليق بيبقى نفسى اول مانزل البوست اروح اعلق
    :D

    ربنا يكرمك واهلا بيك يااخى

    تحياتى


    -----------------
    وضـّاح

    ربنا يكرمك يا استاذ وضاح .. جزاك الله خيرا


    ---------------
    جدووووووو

    منورنى والله العظيم

    بصراحة العربيات كان شكلها يقطع القلب وهو عمال يكسر فيها كدة

    بوليس !!! .. واضح ان حضرتك ماجيتش مصر من زمان يا جدو .. خلاص البوليس شال إيده مننا تمامااااااا وسايبنا فى غابة بناكل فى بعضينا

    ايوة انا شوفت تقرير عن الحادثة دى فى جامعة الزقازيق وبجد شئ مؤسف جدا .. والله حاولت امنع اختى انها تعدي الشارع كدة بس للأسف مكنتش عارفة تسمعنى اصلا صوتى مش طالع وصعب عليا انا نفسى انى اسمعه .. بتعامل معاه بالنية هههههههه

    والله لو كنت اقدر اقولكم النكتة كدة وتشوفنى وانا بقولها صوت وصورة كنت عملتها .. لانها فى منتهى البواخة بجد ههههههههههههههه


    نورتى والله ياجدو ومتبقاش تبعد عننا تانى الله يكرمك
    :)))

    ReplyDelete
  12. no chance

    ههههههههه معلش اهو كله برتقال ههههه

    اهلا بيك يا نو تشانس وميرسى جدا على الكونت ع البوست اللى فات والبوست ده

    خالص تحياتى وتقديرى
    :))

    ------------------
    استاذى عصفور المدينة

    الله يسلمك ويباركلك يارب

    لا انا كمان بقيت اترعب انتوا - كرجال يعنى - قلبكوا اجمد شوية لكن من البلاوي اللى الواحد بقا يسمع عنها بقا يكش فى جلده من اى حاجة وكل حاجة

    :(((


    --------------
    موجة

    الله يسلمك ويكرمك .. جزاك الله خيرا

    قوية ايه بس قول يا باسط ... ده بوست خنيق اوى ههههههه

    لا ده كان فى الشارع الغبى شارع فيصل .. خد بالك بقا لا تلاقيه على باب بيتكوا ولا حاجة ههههههه

    -----------------
    No Fear

    وعليكم السلام ورحمة الله وبركاته
    :)))

    ReplyDelete
  13. MerMaid

    ياخبر ابيض مقدرش على زعلك ابدا .. ده شئ يشرفنى طبعا اننا نبقى صحاب وانا اسفة انى مردتش كنت بعيدة بقالي فترة .. على اى حال ايميلى فى البروفايل ويسعدنى نتكلم فى اقرب فرصة أكيد

    بالله عليكى ماتزعلي ياقمرة
    :)

    --------------
    اسكندرانى اوى

    ههههههههههههه

    تصدق بالله؟ .. انا كنت مسترخمة البوست جدا بس بعد تعليقك ده حمدت ربنا انى كنت سبب فى الضحك ده .. الحمد لله

    ربنا يحلي ايامك ويارب تبقى فى سعادة وخير دايما .. اللهم آمين

    ---------------

    mohand

    ايه يا استاذ مهند انت مش من مصر ولا ايه .. المجانين اكتر من العاقلين اللى ماشيين فى الشارع .. ده انا كل شوية اتكعبل فيهم وانا ماشية
    :(

    ايون لما كانت بتحب يوسف شعبان وكان بيدرسلها نجاح الموجى

    وكان يوسف شعبان يبصلها ويقول : شايفة الشعاع الروحانى .. اللى نابع من اعماق اعماااااقيييي

    تقوله عماميق عماميقك .. ياحلييييييلة وتقوم دابة صوباعها فى عينه على طول

    ههههههههههههه

    انا بحب المسرحية دى جدا ونفسى اوى اشوفها

    ReplyDelete
  14. هههههههههه

    الحمدلله انكم رجعتم بالسلامه

    وحمدالله علي سلامتك

    والحمدلله ان النت اتصلح

    وطلعي عينا ولا يهمك طبعا

    ReplyDelete
  15. يافقررررررررررررية بس انا فعلا بحب الايس كريم بالكوسة وباكله كل يوم بس من ساعة ما سبت المريخ وجيت الارض وانا مش لقيه متعرفيش بيتباع فين ... فكرتيني بالشيبسي الي غلي والكنز ربنا يسمحهم بقى ... دمك مسكر ياسكر

    ReplyDelete
  16. ههههههههههههههههههههه
    البوست جميييييل جدا
    على فكرة انا بموت م الخوف لما بشوف واحد مجنون
    مبنقدرش نخمن ممكن يعملوا ايه
    ههههههههههههه
    بس كويس ربنا سترها
    وبالنسبه للمسرحية
    قولى يارب ممكن يجيبها فعلا
    ههههههههههههه

    ReplyDelete
  17. أختي ياسمين
    الراجل ده لو كان مجنون فده من اللي شافه
    و على كده دا يبقى ضحية زينا بالظبط في عالم مجنون ..
    أيوه عالم يشغى بالجنون .. كل شيء فيه يدفع للجنون الذي أنا شخصيا أصبحت على حافته
    الأسعار مجنونة في إرتفاعاتها و قيمة الإنسان مجنونة في إنخفاضاتها ..
    كل يوم عالمي لحموم الانسان و انتوا بالف صحة و خير
    تحياتي

    ReplyDelete
  18. السلام عليكم ورحمة الله وبركاته
    ...........................

    هههههههههه
    ايه المغامرات دى كلها يا بنتى

    بوست لذيذ بجد
    تحياتى

    ReplyDelete
  19. ههههههههههه
    هههههههههههههه
    ههههههههههههههههههه
    ايه ده ايه ده؟؟؟
    ايه الكلام الكتير ده
    والكلام الكبير ده
    هههههههههههه
    كوسة؟؟؟
    والمكنون كوه على رأي هنيدي
    هههههههههه
    طبيعي يبقى شارع فيصل
    هههههههههه
    لأ أنا بحب آكل البنكرياس بالدقيق ... مع اضافة حبة كاتشب بجد توووووحفة
    هههههههههههه
    تحياتي

    ReplyDelete
  20. هو المجنون ده لسه موجود
    علشان انا بعدى بالعجله بتاعتى من هناك
    وانتى عارفه
    العجله مرايتها بالشىء الفلانى
    يعنى مرايه واحده بتمن اربع عربيات مرسيدس
    من اللعبه

    ReplyDelete
  21. السلام عليكم
    جزاكي الله كل خير
    و
    كل سنة و أنت طيبة

    ReplyDelete
  22. هههههههههههه
    اصلاً دى اول زياره ليكى .. المدونه كله خوف و مرعبه
    حلوه المدونه و أن شاء الله هبقى دائم عندك
    اتمنى تزورينى

    ReplyDelete
  23. انا لو كنت معاكى كنت خليتة مات فى جلدة
    لانى مجنونة اكتر منة

    تحياتى
    مدونة جميلة جدا

    ReplyDelete
  24. مش عارف كل ما اجي هنا اقرا كلمة كاميكاز و مشتقاتها و مش عارف معناها بصراحه و شكلها كده شفره تدوينيه مع الشله
    المهم
    انا فعلا حسيت ان الكلام مبعثر و مش مربوط
    لكن خدي بالك من المجانين بعد كده لانهم مليين شوارع مصر بعد ما المستشفيات اكتظت بهم عن اخرها
    و هم للاسف ناس مساكين جدا

    ReplyDelete
  25. الصورة لوحدها قمه الرعب
    انا قولت بقى خلاص الموضوع فعلا هنزله تحت البطانية بعد ما نقراه
    ما علينا
    المهم الفطير ايه اخباره اجيب اتنين كبار على ضمانتك ولا ايه؟
    ومعلش تاني على سوء التفاهم اللي حصل

    واسود برده .....ماشي هههههه

    ReplyDelete
  26. حصلي موقف مع واحد مجنون برضه مرة أيام ما كنت في ثانوي
    واحد مجنون برضه طويل القامة عريض المنكبين مشرئب الفلنكات شلولخ (هم كلهم بيبقوا كده ليه )واحد صاحبي شافه و قعد يغلس عليه لغاية ما إتعصب و صاحبي جري و أنا اللي ماليش علاقة بالموقف بقيت قدامه لوحدي بس عادي يعني أنا أعرف أسد معاه

    ReplyDelete
  27. ازيك يا ياسمين
    كل سنه وانت طيبه
    الناس اللى ياحرام مش عاقلين
    بيضعبوا علياجدا جدا بس طبعا
    الواحد يبعد بس حرام كل المرايات دى وماحدش يحاول يعمل حاجه الحمد لله ربنا ستر
    طريقه سردك جميله ودمها خفيف جدا
    وضحكتنى اختك مستعجله وتعرضى الركوب
    وتمشى وياعينى على الريجيم
    تدوينه جميله
    وعلى فكره جربى الايس كري
    بالملوخيه
    هههههه تحياتى وسلامى

    ReplyDelete
  28. عسللللللللللل يا سمسمة
    عسللللللللل

    ReplyDelete
  29. لا بس النكته دي انت عايزالك عضضةةةةةة عليها
    حمضانة فعلا يعني
    هههههههه

    ReplyDelete
  30. بوست زي العسل يا إنسانة .. قال طول بعرض وارمي عليه بيبي جونسون .. دانتي ترميه بانبوبة بوتاجاز .. واكيد اكيد .. اختك مش حتساعدك في شيلها .. لان شكلها كانت خلصانة خالص

    ReplyDelete
  31. طحت عليكي صدفه هههههههه
    بس نايس

    يالله بالتوفيق يارب
    <<< حتمر من فتره لفتره تشوف الجديد

    ReplyDelete

الكلمـة نـور .. وبعـض الكلمـات قبـور