Saturday, February 09, 2008

دوام الحال


مسـافريـن علـى وش الدنيـا

بنوصـل بعـضينـا

أمـوات ولاد أمـوات




هكذا جاءت هذه الكلمات على لسان احدى شخصيات حديث الصباح والمساء لنجيب محفوظ .. لا ادرى لماذا كلما شاهدت هذا المسلسل اريد ان ابكى وبحرقة .. لا لشئ سوا لتعلقنا الزائف بهذه الحياة الفانية .. الرواية لا تقدم جديد .. هى فقط تُعلمك أن كل شئ إلى زوال لا محالة .. من هو صغير اليوم سيصبح رجلا غدا .. ومن هوا رجل اليوم سيصير شيخا غدا .. لن تنتظر طويلا لتسمع خبر وفاته !! .. نعم وفاة من كان بالأمس طفالا .. لا تندهش كثيرا .. فهذه هي الحياة!ه

حينما اشاهد هذه الحلقات لا اشعر بأنى اشاهد مسلسل وابطال وممثليين .. اشعر وكأننى اشاهد حالنا جميعا .. نبدأ لننتهى .. نولد ونكبر ونتعلم ونفرح ونتزوج وننجب ونربى ونشيب ثم نموت

دائما ما اتأمل شوارع بلدى .. ترى كم مرغيرنا على هذه الارض وكم سيمر بعدنا ؟! .. سبحان من له الدوام

الصبح طفل برئ ومساه يبان تجاعيد
وفوق طريق الايام تجرى الحياه مشاوير
ونشوف ملامح الزمن متعاده فى المواليد
واحنا البشر كلنا اعمار ورق بيطير
دايره تدور بالبشر وياّ الزمان بتفوت
دمعه على اللى مضى و دمعة فرح بالجاى
يا حىّ طول مانت حىّ مسيره ييجى الدور
دى حكايه متكرّره من يوم ولادة الضىّ

***
الصبح طفل برئ ومساه يبان تجاعيد

وفوق طريق الايام تجرى الحياه مشاوير
ونشوف ملامح الزمن متعاده فى المواليد
واحنا البشر كلنا اعمار ورق بيطير
ياللىّ انت عايش حياه بص لها تلقاها
سبحة هنا و تنفرط بالعمر مانشوفهاش
ولا شئ يعطّر حياتنا يمد فى مداها
غير سيره عاشت هنا
اكتر صاحبها ما عاش


تتر حديث الصباح والمساء
فؤاد حجاج


إنما الدنيا ســراب .. والســراب لا يطول
إنما العمـر سيفنـى .. هكذا الدهـر يقـول !ه


اللهم ارحم موتانا وخرجنا من الدنيا دى على خير يارب

18 comments:

  1. كلام كلو حكم
    مرسي يا ياسمين

    ReplyDelete
  2. رغم انه مسلسل زي اي مسلسل من حيث الطول و عدد الحلقات يعني, الا اني لما باشوفه باحس معاه اني باعبر ازمنه كتيره اوي, بامر بجيل الابن و الاب و الجد اللي هم كلهم في الاخر نفس الشخص...!
    مسلسل بيعيشني في حاله غريبه, باحس معاه اني داخل الة الزمن اللي عماله تاخدني وتمرجحني بين وقت و التاني, و بعيش معاها مراحل مختلفه, باشوف مرور الوقت في الحياه, الاشخاص و الاشياء...!

    ReplyDelete
  3. السلام عليكم ورحمة الله وبركاته


    والله يا ياسو واكنك اخدتي فكرة البوست ده من دماغي

    كنت بافكر اكتب حاجه بنفس المعني

    باحب المسلسل ده اوي والمعاني اللي وراه وكلمات اغنياته ، بصراحه ابداع من ابداعات نجيب محفوظ الرائعه


    ربنا يطلعنا منها علي خير

    ReplyDelete
  4. مش متأكد ان كنت اول تعليق و لا لا
    بسس التصفية اللي انتي عاملاها
    و اللي بسببها لما عملتها ساعات يكون اول تعليق و اعمل ببلش يقوم رايح تالت تعليق رابع تعليق
    وصاحبه يكون كاتب في اوله .. الحمد لله ، أول تعليق
    ههههههههههههه
    بوست جميل
    اول مصادر جماله انه جاي بعد غياب طويل من يوم عيد ميلادك 25 يناير
    المصدر الثاني انه بيعبر عن مسلسل انا شخصيا باحترمه جدا مسلس غريب لم عدد كبير من الممثلين اللي ما كانوش بيمثلوا زي ما قلتي دول كانوا عايشين وعيشونا معاهم المرحلة دي
    امبارح و توفيق عبد الحميد قاعد عند اخوه الرخم خالد النبوي وسمع الباشوات بيشتموا عرابي ، وقفته و غضبه ما كانش تمثيل كانه عايش اللحظة دي سنة 1882 والانجليز على مشارف مصر
    حقيقي راجل محترم وبيحترمنا على رأي دودو هههههههه

    خالص تحياتي
    احمد

    ReplyDelete
  5. مسـافريـن علـى وش الدنيـا بنوصـل بعـضينـا أمـوات ولاد أمـوات

    فعلا .. بس ياريتنا نعتبر ...
    كلنا بنخاف شويه و في الاخر بنرجع تاني
    لمكان ما كونا
    في الخوف الي كان ملينا ؟؟؟
    فين العهد الي عهدنا بيه نفسنا ؟؟؟
    ===

    من ثلاث ايام فقط ...
    توفي اخو صديقي ... اسلام
    22 سنه
    مات موته طبيعيه ..
    هبوط في الدورة الدمويه.
    دخل ينام و حط جسمه علي السريع
    كان خلال 5 دقايق جسد بلا روح
    مات و هو في غز شبابه
    مات و ماتت معاه احلامه
    مات و ساب حسرة اهلو عليه..
    ===
    اقول ايه ؟؟
    اموات ولاد اموات
    بكرة اكيد حد حيوصلني ...
    ==

    يا ريت تدعيله بالرحمه..و يتقبله عندو في جنات الفردوس يا رب امين ..

    ReplyDelete
  6. آمين
    وارزقنا حسن الختام يارب

    ReplyDelete
  7. اللي يدرك المعنى ده يستريح اوووووي
    لكن قلما نجد من يدركه
    ربنا يصلح أعمالنا وأحوالنا جميعا ويرزقنا الصبر ويعافينا من فتن الدنيا اللي عايشينها دي

    ReplyDelete
  8. الحقيقة مركزتش مع الفيلم اوى كدا يا ياسو بس الاغتية رااائعة

    و حمد الله على سلامتك التدوينية و سلميلى على كاميكاز :))

    ReplyDelete
  9. ياه
    بجد انا بموت فعلا فى المسلسل ده .. و المشكله انى لما بقول لحد كده منهم اللى بيقولى دا بايخ و الكتير بقى بيقول احنا مش فهمين منه حاجة

    بس كويس انى لقيت حد فاهم اللى أنا فهماه
    تحياتى و اعذرنى على التقصير

    ReplyDelete
  10. غاية المراد من رب العباد

    ReplyDelete
  11. دوام الحال من المحال .. والتغير سنة الحياة

    أرجو ألا ينقلك الله إلا من خير إلى خير ومن الدنيا إلى الجنة

    ReplyDelete
  12. أحييكى على هذه التدوينة الجميلة

    اللهم أحسن ختامنا جميعا

    ReplyDelete
  13. رغم إن التدوينة جميلة وترتيبها وفكرتها مبتكرين للغاية لكن المود مش حلو كده

    إعمل لدنياك كأنك تعيش أبدا

    وإعمل لآخرتك كأنك تموت غدا

    ReplyDelete
  14. يااااااااااااااااااااه ده أنا بموت فالمسلسل دهو كل حاجة فيه جميلة الموسيقة النقشبندي عبلة كامل ليلى علوي كلهم كانوا هايلين المسلسل الوحيد اللي مش بشبع منه صحيح زي ما قلتي مفيهوش حاجة جديدة لكن صياغة الحديث كتابة السيناريو شخصيات القصة سرعة الأحجاث اللي بتخلي الواحد يحس بزهد أكتر من رائع قوليلي والنبي هو بيتذاع اليومين دول ولا ايه

    ReplyDelete
  15. السلام عليكم
    الغريب إننا كلنا عارفين ده كويس قوي بس مش بنتعلم منه و مش بنرضي بحالنا مش عارف ليه

    ReplyDelete
  16. السلام عليكم

    أحياناً الإنسان يحزن ويبكى , وبعد بعض البكاء وإنهمار الدموع , يهدأ الإنسان ويبدأ يتأمل حياته والدنيا , ويفكر بهدوء يصل لحقيقة أن الدنيا ليست إلا دار عمل وتعب وشقاء وليست دار فرح أو سعادة , فنحن نضحك ساعة ونبكى عشرة , نفرح يوم ونحزن عشرة

    والدنيا أصبحت نمر بسرعة كبيرة فتذكرت موقف من طفولتى وعدت بنفسى للماضى , ثم عدت لأرض الواقع وقلت يااااه كنت صغير وطفل والآن كبرت وكأن السنين أيام ولحظات , تلك الدنيا دنية
    ولا تساوى جناح بعوضة عند الله

    فلازم نعمل ونشتغل ونؤدى رسالتنا فى الحياة ونرضى ربنا فى أعمالنا وتصرفتنا وندعى إن ربنا يحسن ختامنا وفى الجنة إن شاء الله نفرح بجد ونرتاح بعد ما تعبنا وعانينا فى الحياة

    وأشكرك أختى الكريمة ياسمين على كتابتك الراقية والرائعة , والتى تؤثر فى نفسى كثيراً وأفضل شئ فى كتابتك هى اللمسة الإيمانية الجليلة والمؤثر فى كل نفس مؤمنة بالله تأثير كبير

    جزاك الله خير

    ReplyDelete
  17. ياسمين ياقمر
    هي دي فعلا سنه الحياه
    ولكنها تتزامن بشكل غريب
    ولكن هي دي الحياه
    واحنا اتخلقنا عشان نتمسك بيها
    ونجاهد للبعد عنها
    وده مش غلط منا ولكن دي خلقتنا
    و(بست وشز فو يو)0

    ReplyDelete
  18. ازيك يا ياسمين ويارب تكونى بخير
    عارفه انا كنت مشدوده للمسلسل ده
    رغم انى كنت بعده بشعر بخوف وان
    النهايه مهما طالت فهى قريبه وكنت
    بنقبض حقيقى بيجسد لنا انه كله
    فانى خصوصا المقدمه ومنظر السحاب والكتاب
    ربنا ينور بصيرتنا ويجعلنا
    نفعل ماامرنا به ونكون من اهل الجنه
    جميعا يارب
    هايله ياياسمين ماشاء الله عليكى
    ربنا يوفقك

    ReplyDelete

الكلمـة نـور .. وبعـض الكلمـات قبـور