Friday, January 25, 2008

فى مثل هذا اليوم


لا أدرى بوضوح لماذا أشعر بالسعادة فى مثل هذا اليوم !!ه

ألانى ألاحظ بعض الإهتمام والحب ممن حولي

أم لانى اتذكر اننى لازلت على قيد الحياة ولازلت قادرة على العطاء

بل وانى قد وُلدت من جديد

واستطيع ان امحى من ذاكرتى كل ما مضى من قصاصات سوداء تزعج مخيلتى

ام لما اشعر به من رياح طفولية تهب على أرجائى فتمحى الهم والتفكير

وتحملنى بعيداً عن كيانى الحالى لأعود صغيرة .. بريئة .. متحمسة .. كما كنت!ه


***********

اييييييييييييييه دونيااااااااااااااااااا

ايه اللى بتعمليه ده يابنتى .. بعد ماكان الموضوع كلاسيكى كدة تقومى داخلة بالعامية تعكى الدنيا

لااااااا الكلام ده انا لا اسمح بيه إطلاقا مطلوقا مطلقا .. بتاتن البتة .. فتاتن الفتة

ههههههههههه .. يابنى روح كمل تعليمك الاول وانت مش عارف تتكلم كدة

يا عم كاميكاز باشا النهاردة عيد ميلادى .. يعنى براحتى .. يعنى بمزاجى لامؤاخذة

ده غير انى مش عايزاك تنسى ان دى المدونة بتاعتى انا وانت مجرد حتة كاميكازلا رحت ولا جيت

عاااااااااااااا .. ربنا ع المفترى هه بس

بس ياعبيط

تعالى هنا

اعدل الكرافتة العجيبة بتاعتك دى .. الضيوف على وصول

حاضر برااااااحة

تعالى بقولك .. التورتة الكبيرة فى التلاجة؟؟

كله تمام يا معلمة

والحاجة الساقعة؟؟

موجودة يا معلمة

معلمة ايه يابنى احنا فين احنا .. ده بلوج محترم ده

المهم بص روح انت اقف ع الباب استنى الضيوف عقبال ما اخلص كام كلمة كدة عايزة اقولهم

لا ماليش دعوة انا عايز حتة جاتو من الكبيرة اللى فى التلاجة دى

اسكت يا شحات .. يقولوا عليا ايه انا دلوقتى؟؟ مجوعاك؟

هش كدة

انا مالى انا حقول لأمى بقا

متبرطمش ياد انت لأعورك



أوف عكر مزاجى الرخم

بصوا يا جماعة ده عيد ميلادى كدة بالصلاة ع النبى الـ 22 .. يعنى عجزت رسمى

وادى البوست بتاع عيد ميلادى الواحد وعشرين اهو .. ايام الشباب بقا

المهم يا جماعة الجاتو والتورتات اهم فى التلاجة والخير كتير اهو الحمد لله

الكل حياخد بس بالراااااحة واوعى تفطسوا الواد كوكو فى ايدكوا

بس خدوا بالكوا كويس .. كل واحد قطعة واحدة بس تورتة وواحدة كانز مافيش غيرها

ولو حد زور مثلا مسموحله ببق ماية

غير كدة لأ

اما بالنسبة للموضوع الحيوي اوى جدا خالص

ألا وهو الهدايا

يا جماعة وبقولهالكوا كدة من قلب الأحداث .. مش عايزة هدايا

لالالا مش قصدى مش عايزة هدايا .. قصدى انها ماتبقاش هدايا

بطل الموضوع ده من زمان على فكرة

دلوقتى بقا فلوس واانا وكوكو نجيب اللى نفسنا فيه

لانى بينى وبينكم عايزة اصلح الشباك اللى فى المدونة ده اصله اتكسر وبيدخل فيران بالليل

احم احم .. وبناءا عليه

قررنا نحن مدونة إنسانة تحت إدارة الواد كاميكاز وإشراف البت ياسمين الشهيرة بإنسانة ان نتقبل كافة التبرعات .. احم قصدى الإعانات .. يووووه قصدى الهدايا على الصندوق البريدى المتكمكز التابع للإدارة العليا الكاميكازية ش م مصر

واللى مش حيدفع .. حبعتله الواد كاميكاز يحدفله المدونة بالطوب ويبهدلهاله ويخليها خرابة

إنتهى البيان

دمتم فى رعاية الله وأمنه

وجزاكم الله خيرا بجد

وكل سنة وانتوا طيبين وفى كل خير يارب

استنوا رايحين فين
.
لسة حفلة عيد الميلاد ماخلصتش
.
اجرى اقفل باب المدونة ياواد يا كوكو
.
واللى يحاول يمشى جرى وراه شوية الفران اللى اصطادتهم ياد
.
محدش حيمشى من هنا غير لما يسمع القصيدة التحفة دى
.
فى القدس - لتميم البرغوثى
.
ايوة كل واحد ياخد الجاتو والحاجة الساقعة ويشدلوا كرسى ويستمخ بقا

وياريت كلنا ندعى لأخواتنا فى غزة بجد يا جماعة

سلام عليكم

by at
Labels: ,

44 comments:

  1. UnknownJanuary 24, 2008 at 6:14 PM

    كل سنه وانتى طيبه يا سمسمممممممه
    فين بقى الجتون

    ReplyDelete
  2. http://kasperb4.blogspot.com/January 24, 2008 at 7:36 PM

    ايه يا لماضة انا كل ما اروح ف حتة وافتكر اني اول تعليق الاقيكي سبقتي ههههههه
    ---------

    انسانة
    كل سنة وانتي طيبة وسعيدة .. ومن طاعة الله أقرب وعن معصيته أبعد بإذن الله
    ويارب السنادي تكون احسن من اللي قبلها وتقدري تحققي كل اللي بتتمنيه
    وربنا يبارك في عمرك

    ونفسي والله افضل ادعي لحد بكرة بس معلش بئا الفجر بيأذن
    :)

    ReplyDelete
  3. ma 3linaJanuary 24, 2008 at 10:36 PM

    كل سنة وانتي طيبة يا ست إنسانة هانم وعقبال 200 سنة
    ياااااه عدت سنة من أخر عيد ميلاد ليكي .. لا والله الأيام بتجري .. إن شاء الله السنة دي تكون فاتحة خير عليكي وتحققي فيها كل اللي انتي عايزاه

    بالنسبة للموضوع الحيوي اللي هو الهدايا ففيه واحد ع الباب قال إنه تبعك كده وإنه هو اللي بيلم الهدايا مش عارف اسمه كده .. كا مكوز .. كامكيز .. حاجة كده .. فدا مهاخ هديتك

    ودمتم في سلاااااام

    ReplyDelete
  4. موجةJanuary 24, 2008 at 10:44 PM

    ممكن ثواني من وقتك
    كلمة على انفراد لو سمحت
    يعني ايه ؟
    يعني ممكن تتفضل شوية يا كميكاز
    هش كده على راي ياسمين
    هههههههههه
    ايوه .. كده ممكن أبدأ
    معلش ياياسمين
    اصل الموضوع بينبع من كونه
    ايه ؟ ادخل في الموضوع ؟
    حاضر

    الموضوع باختصار ياياسمين ان المنطلق الفكري في كلامي ده لازما ينبع من احساسنا المنعكس بالتزام بقضايا معاصرة وماحدش يسالني ولا كلمة لاني مش فاهم اي حاجة

    اختصر .. حاضر بس لو وراكي حاجة خلصيها وتعالي

    عموما انا كل اللي كنت عاوز اقوله .. من غير رش مية ولا تحديف بالطوب ولا حرمان من بق المية الاخراني ..
    كل سنة و انتي طيبة ياياسمين .. بس كده
    وعقبال ميتين سنة
    هيا المية بقت رقم ههههههههه
    عقبال ميتين سنة طاعة ياياسمين يارب
    خالص تحياتي

    ReplyDelete
  5. mohamedJanuary 25, 2008 at 12:35 AM

    :D
    كل سنة وانتي طيبة يا ياسمين

    (G)
    معلش اصلي ماشي بالموضه اللي بطلت خلاص
    ولا اقولك ابعتي الكمي كيز لصراف الخزنة بتاع المدونة بتاعتي يصرفله اللي هو عايزة

    وعقبال 100سنة

    ReplyDelete
  6. خمسة فضفضةJanuary 25, 2008 at 1:30 AM

    السلام عليكم ورحمة الله وبركاته

    عيد ميلاد الليله مين
    عيد ميلاد ياسمييييييييييين
    هنفرح ست الحلوين
    و نشيلها فى عيونــــــــــــــا

    هييييييييييييييييييه

    يلا حالا بالا حيو ابو الفصاد
    يبييييييييييييي
    هيكون عيد ميلاده اللية اسعد الاعياد
    يبييييييييييييييييي
    فلتحيا ابو الفصاد


    كل سنة وانتي طيبة يا يويو وعقبال كده ماتكبري وتبقي عروسه ... إنتي هتبقي كبيرة فعلا بس لسه شويه علي كده ، عيشي ايامك اللي يارب تكون كلها فرح وسعاده

    ربنا يوفقك يا قمر وتحققي كل امانيكي الحلوه وعقبال 100 سنه


    يويو الواد كاميكاز خد الهديه ورقه جديده من ام 200 جنيه وضربها في جيبه ومش راضي يديني حته من التورته ولا واحدة كانز

    ماليش دعوه انا عاوزه حتة تورته

    عااااااااااااا

    ReplyDelete
  7. رفقة عمرJanuary 25, 2008 at 4:05 AM

    كل سنه وانت طيبه ياجميل وعقبال ميه سنه عطاء وقرب من الله ويارب تحققى كل ما تتمنيه ويارب اشوفك احسن الناس وافضلهم
    ربنا يخليكى لبابا وماما وربنا يخليهم ليكى
    وربنا يخليكى ليا يارب
    انتى عارفه انتى حبيبتى
    وبحبك قد ايه ربنا يكرمك يارب

    ReplyDelete
  8. No FearJanuary 25, 2008 at 5:29 AM

    السلام عليكم
    كل سنة و أنت طيبة و عقبال مية سنة
    و زي السنة اللي فاتت عزومة مدونية بس مفيش حاجة بجد يبقي أدي الفلوس و صلت و لا لسه و كله كلام في كلام
    :)
    كل سنة و انت طيبة

    ReplyDelete
  9. мσнη∂ιšJanuary 25, 2008 at 9:04 AM

    سنة سعيدة يا نسرين

    ReplyDelete
  10. kokaJanuary 25, 2008 at 9:29 AM

    كل سنة وانتى طيبة يا ياسمين .. وعقبال كده مليون سنة يا رب

    ومش تقولى عجزت والكلام الغريب ده

    ربنا يحميكى ويحرسك يا رب :)


    اما اروح بقى اسمع القصيدة ..

    ReplyDelete
  11. دنيتى الجميلهJanuary 25, 2008 at 9:53 AM

    كل عام والفرح يشعل شموعه بدنيتك
    كل عام والهنا تزهر وروده ببسمتك
    كل عام وانتى الى الله اقرب
    وعن المعاصى ابعد

    ReplyDelete
  12. mohandJanuary 25, 2008 at 10:09 AM

    السلام عليكم

    كل سنه وانتي بالصحة والسلامة

    وعقبال ميلون سنه

    ReplyDelete
  13. أحمد فتح البابJanuary 25, 2008 at 11:38 AM

    كل سنة وانت طيبة..ويا رب دائما في صحة وسعادة

    :)

    ReplyDelete
  14. يا مراكبيJanuary 25, 2008 at 1:06 PM

    أنا عرفت موضوع عيد الميلاد ده من الفيس بوك .. لكن ما قلتيش هناك على حكاية لم الفلوس والحاجات دي .. إيه المقالب دي؟ أنا هأدفع مضطر المرة دي علشان أخرج من المزنق ده لكن بعد كده مش هأحضر أي مناسبة في المدونة دي .. دي حتى المدونة فيها فيران

    ReplyDelete
  15. AnonymousJanuary 25, 2008 at 5:28 PM

    ايه المصاريف دي

    بس عشان خاطر حركة في القدس دي

    ليكي عندي ربع جنيه

    :P

    Happy Birthday ya Yasso

    God bless your path..and grant you happiness...:)

    ReplyDelete
  16. محمد عبد الغفارJanuary 26, 2008 at 4:14 AM

    كل عام وانت لله اقرب

    ReplyDelete
  17. ساعد نسرين الايمنJanuary 26, 2008 at 4:23 AM

    كل سنة وانتي طيبة يا انسانة

    وعقبال 222222 سنة يا عسل انتي يا عسل

    وياليت تقولي لينا نبعت الهدايا ازاي؟

    والاهم ازاي ناخد التورتة بتاعتنا

    بجد عالمك جميل اوي انسانة
    انت انسانة بجد
    ربنا يكتر من امثالك

    ReplyDelete
  18. البِـئرُ والظمّأْJanuary 26, 2008 at 7:26 AM

    كل سنه و انتي طيبه
    و كاميكاز مخنوق


    هههههههههه
    زيزي

    ReplyDelete
  19. عاشقة الوطنJanuary 26, 2008 at 2:38 PM

    السلام عليكم

    ازيك ياياسو ياقمر
    كل سنة وانتى طيبة وبخير يااارب

    وبعدين الولد كوكو مش بيسمع الكلام ليه

    وبعدين ايه حكاية انك عجزتى رسمى ده
    يابنتى ده كلهم 22 سنة بس
    امال لما توصلي لل30 هيبقي ايه بقي

    كل سنة وانتى طيبة وبخير يااارب
    وخلاص انا مخدتش غير نصيبي فى التورتة والكنز ومخدتش زيادة

    وسمعت كمان تميم البرغوثي
    تحفة

    شكرا على الديه اللى انتى جبتيها لينا فى عيد ميلادك ده كان واجب علينا احنا يابنتى

    كل سنة وانتى طيبة
    كل سنة وانتى احلي من السنة اللى قبلها
    كل سنة وانتى جميلة زى ماانتى


    تحياتى

    ReplyDelete
  20. mariamJanuary 26, 2008 at 4:29 PM

    22كل سنه و انتى طيبه
    عقبال 100 سنه
    فين بقى التورته؟

    ReplyDelete
  21. klmatJanuary 27, 2008 at 3:26 AM

    كل سنه وانت طيبه
    وعقبال 1000 سنه
    وبعدين ده انت صغنونه خالص
    امال الناس اللى اولد زيى يقولوا ايه
    وبعدين محتفظه بالفيران للهجوم
    على اللى حايمشى ده انا كان ورايا
    مشوار مع مسعد على شارع الترماى
    ماشى الحق حته جاتو بس بالشيكولاته
    معلش بفلوسى انا دافعه كويس
    حقيقى بوست دمه خفيف جدا
    ربنا يسعك ويديكى طول العمر
    ويفكها عن اخوانا فى غزه
    حتى فى فرحتك مش ناسيه التعبانين
    انت انسانه جميله
    تحياتى وسلامى

    ReplyDelete
  22. بنت أبيهاJanuary 27, 2008 at 5:24 AM

    الو .. الو

    يا جدعان ايه المايك الخربان ده

    هنتكلم ازاى

    ايوة كده يا كميكاز شاطر ظبطه

    كل سنة وانتى قمر وسكر وعثل على طول

    وبهذه المناسبة السعيدة انا هقرالك الكف مجانا

    يلا اى خدمة

    خط العمر طويل .. يلا امليه بالطاعة

    وخلى بالك ايه ده طريق مش مرصوف

    لازم تروحى تشكى للمحافظ

    وايه كمان يا ستو

    ااااه ما تخافيش مش هتترمى من اقرب شباك

    بس كفاية عليكى كده

    هوه يعنى عشان مجانا بقى ولا ايه

    سلامووز

    ReplyDelete
  23. son's egyptJanuary 27, 2008 at 10:53 AM

    لسلام عليكم
    كل سنه وانتي طيبه
    ويكون عام سعيد عليكي

    ReplyDelete
  24. zordeakJanuary 27, 2008 at 3:13 PM

    كل سنة وانتى طيبة يا ياسميييييين

    وعقبال 1000000 سنة وانتى باحسن صحة واحسن حال

    وتفضلى متكمكزة كده من القلب زى ما انتى

    ربنا يفرحك يا رب ويسعدك دايماااا

    انا عايز حتة الجاتوه اللى بالشيكولاتة دى

    ايووووووووووووون الحتة دى

    وشوية بيبسى بقى وتبقى كده عملتى الواجب وزيادة

    :D

    ReplyDelete
  25. Ahmed MostafaJanuary 27, 2008 at 3:50 PM

    This comment has been removed by the author.

    ReplyDelete
  26. raspoutineJanuary 27, 2008 at 5:09 PM

    كل سنة وانتى بخير وفـ سعادة ان شاء الله

    ReplyDelete
  27. صوت من مصرJanuary 27, 2008 at 7:29 PM

    كل سنه وانتى طيبه على فكره انا اكبر منك بسنه ويوم كامل والحمد لله انى انا يوم 24 مش 25 بتاع عيد الشرطه وخلى كوكو يجيب حته جاتوه ولا ايه

    ReplyDelete
  28. محمدJanuary 29, 2008 at 12:14 AM

    غفر الله لك ما مضى .. وبارك لك فيما بقى

    ReplyDelete
  29. عابد الرحمنJanuary 29, 2008 at 11:18 AM

    كل سنة وحضرتك طيبة وان شاء الله يكون عام مضي مغفور وعام قادم منصور باذن الله
    القصيدة روعة بس بصراحة انا مش عارف ليه سعات بحس ان الصورة بتوصل لينا من معاناة بحس انها اكبر من الحقيقة واللي بيحسسني بده كتير من الشباب الفلسطيني اللي بكلمهم وعايشين في فلسطين ومرتاحين ورايقين وبجد بحس اني مهتم بالقضية اكثر منهم انفسهم
    الله اعلم برضه

    ReplyDelete
  30. AnonymousJanuary 29, 2008 at 2:32 PM

    كل سنة و انت طيبة

    بقيتي راشدة و تميتي سن الرشد ... الف مبروك

    كل سنة لازم نستغلها اوي اوي اوي لان اللي بيروح مش بيرجع تاني

    سلام يا قمر

    ReplyDelete
  31. MKSARAT - SAYED SAADJanuary 29, 2008 at 11:03 PM

    اول مرة ازور مدونتك بجد جميلة وهادية قوي وكل سنة وانتى طيبة وبصحة
    تحياتي
    صاحب المكسرات

    ReplyDelete
  32. a7madJanuary 30, 2008 at 9:44 AM

    كل سنة وحضرتك طيبة وعقبال 99 سنة ونص(حلوين يعني مبعدناش كتير عن 100)

    ReplyDelete
  33. AnonymousJanuary 31, 2008 at 3:02 AM

    كل سنه و انت طيب ياد يا جيري يا جن :D

    ياااااااه معقوله رشقتي خلاص يا بت في ال22 و انا لسه ماحصلتش حتى ال21 لسه :S
    بجد كده بقى شكلي وحش اوييييييي :$

    ابقى احكيلي عن تجاربك بقى مع ال21 و كان ايه اخبارها معاك يا عم الجيري, منكم نستفيد برضه, ماانا كمان عايزه استعدلها عشان كمان قربت اوي عندي ;)

    ReplyDelete
  34. AHMED SAMIRJanuary 31, 2008 at 6:47 AM

    كل الاحتفال دة علشان عيد الشرطة؟
    معقول كدة؟
    كل سنة وانتى طيبة يا ياسمين

    ReplyDelete
  35. mo'men mohamedJanuary 31, 2008 at 1:38 PM

    كل عام و انت بخير
    كل عام و انت الى الله اقرب
    اللهم أنصر المسلمين المجاهدين فى كل مكان
    اللهم امتنا مجاهدين شهداء فى سبيلك يا أرحم الرحمين
    السلام عليكم

    ReplyDelete
  36. ولــــــــــوJanuary 31, 2008 at 10:18 PM

    اولا انا كنت جايب هديه لكن لما دققت ف التاريخ لقيتك مولودة ف يوم عيد الشرطة وبناء عليه انا قمت رجعت الهديه تاني انا بصراحه مش باحب الشرطه ولا عيدهم معلش بقى باباكي هو اللي عمل كده كان لازم يسجلك ف يوم الشرطه وبعدين فيه حد يتولد ف البرد ده
    المهم كل سنه وانتي بألف خير ويارب دايما على طول
    ومش تخافي مش هاخد حاجه من التلاجة انا اصلا مش عارف اوصل
    ابقى سيبيلي حته من اي حاجه لو عرفتي توصلي

    ReplyDelete
  37. david santosFebruary 1, 2008 at 1:15 PM

    Excelent posting, thank you.
    have a good weekend

    ReplyDelete
  38. momkenFebruary 3, 2008 at 6:38 AM

    كل سنه وحضرتك طيبه
    ودمك زى السكر

    ونفرح بيكى السنه الجايه انتى وكيميكاز
    واضح انه بيغير عليكى وعينه منك

    تحياتى

    ReplyDelete
  39. SooooFebruary 3, 2008 at 5:38 PM

    ماتبرطمش ياد انت لأعورك
    -------
    يااااه .. انا كنت عارف من زمان انك انسانه رومانسيه جدا
    "ماتبرطمش"
    الله
    لا وشوف اللي جايه
    "ياد انت"
    ياسيدي
    "لأعورك"
    ايه الحلاوه دي




    كل سنه وانتي طيبه
    ويارب السنه الجايه تكوني اقرب لربنا وتحققي كل اللي بتحلمي بيه يارب

    ReplyDelete
  40. WaelFebruary 4, 2008 at 12:40 PM

    هو انا اول مرة ليا هنا
    بس بجد ضحكت من قلبى
    كل سنه ونتى طيبه
    وعقبال 23 سنه :D

    ReplyDelete
  41. UnknownFebruary 5, 2008 at 9:55 AM

    كل سنة و انتى طيبة يا معلمة و منوارانا كده دايما انتى و كاميكاز باشا و ما تبقيش تكسفيه كده يا شيخة خليه يكلم براحته و يبدى أراءه مش تقولييله ده بلوجى و حيالة حتة كاميكاز

    :))))))))))))9

    ReplyDelete
  42. AnonymousFebruary 5, 2008 at 4:35 PM

    يااااااااااااااااااه

    دة انا كنت لسة محتفله بعيد ميلاد قريب

    لحقت السنة تجري كدة

    عمر تاني
    يعني انا اعرفك من سنة كاملة

    ذكريات بقي

    كل سنة وانتي طيبة يا ياسمين

    ويا نجاتي انفخ البلالين عشان عيد الميلاد

    وبالنسبة للهدية
    مانتي عاراني علي اد حالي واللي جاي علي اد اللي رايح
    كفاية اهديلك قلبي يا ست الكل
    هههههههههههه

    كل سنة وانتي معانا يا مينا

    ReplyDelete
  43. sasoFebruary 11, 2008 at 12:54 PM

    كل سنة وانتي طيبة يا بنتي
    :)
    يارب دايما بخير وكل عيد ميلاد تفرحي بيه اكتر من اللي قبله

    ReplyDelete
  44. حمامةFebruary 17, 2008 at 10:27 AM

    أولا كل سنة وانتى طيبة
    ثانياً طريقة كتابتك لذيذة اوى
    ثالثاً بقى القصيدة روووووووووووعة
    تسلمى :)

    ReplyDelete

الكلمـة نـور .. وبعـض الكلمـات قبـور

Subscribe to: Post Comments (Atom)