Tuesday, September 30, 2008

فى قلب العيد


فى قلب العيد

قلبى وحشاه سوكا ونفسه يلعب معاها

يا ترى يا سوكا يا حبيبتى مين حيلاعبك هناك؟

حد حيفتح باب الشقة ويعمل سباق معاكى فى الطرقة زى ما كنت بعمل؟

حد حياخدك ويحطك فى الأرض ويفضل يزغزغ فيكى ويضحكك زيي؟

حد حيرقص ويصقف معاكى زيي؟

حد حتجرى عليه وتقوليله (أوبا)عشان يشيلك؟

حتنبسطى ولا حتبقى خايفة منهم زى ما بتخافى من اى حد غريب؟

يارب يهنيكى ويجيبك لينا ولخالتوا ياسمين بالسلامة يارب

فى قلب العيد

حاسة انى لوحدى

نفسى اجيب بلالين زى كل عيد

بس العب بيها مع مين؟

نفسى ايام العيد تجرى بسرعة عشان الاجازة تخلص وابطل احس بالوحدة دى بقا

عارفة انى كئيبة ورخمة وتلاقيكوا بتقولوا مش داخلين المدونة دى تانى

طب خلاص مش تزعلوا

الواد كوكو حيعملكم أراجوز وياخد العديات من على الباب اهو

عيل بقا حنعمل ايه

صحيح قبل ما امشى

مش معنى انى مضايقة عشان بنت اختى مسافرة ووحشانى وحاسة انى لوحدى وكدة

انكوا تستغلوا الفرصة وتالكوا عليا العيدية انا والواد كاميكاز

لا يا جماعة

كان غيركم اشطر

حاخد العيدية زى كل مرة

ومش حتنازل عن حقى الكاميكازى ده ابدا

وبناخد العيدية نقداً او بشيكات

المهم ناخدها وخلاص

ايوة ماهو يبقاش انتوا وسواقين الميكروباص علينا كمان

كله هاتى هاتى مافيش مرة خدى؟

المهم من غير تقطيم انا عارفة انكوا كويسين وحتدفعوا العيدية بالزوق

انا ضد العنف

ومش بحب اتعامل بيه خالص

واد يا كوكو .. اللى يمشى من غير ما يحط عيدية فى صندوق الكاماكيز كتفه وحطله كمامة

لو شاورلك عشان يديك العيدية سيبه وفكه ومشيه

لو استعبط فيها وفضل عامل فيها مش واخد باله وكدة

طلع العصاية

وانت عارف حتعمل ايه بقا

بس ياريت من غير صوت عشان انت عارفنى

مش بحب العنف خاااالص

يلا كل سنة وانتوا طيبين يا حلوين
by at
Labels: ,

18 comments:

  1. Pixel مُتَنَّفَسْSeptember 30, 2008 at 3:18 PM

    كل سنة وأنتى طيبة
    وبلاش موضوع انا لوحدى ده :(
    قومى كلمى أصحابك و الناس اللى أنتى بتحبيهم و مش هتبقى لوحدك
    وأرمى نفسك فى أحضانهم و حسى بدفا قلوبهم
    و مش هتبقى لوحدك ..

    Pixel™

    ReplyDelete
  2. رئيس جمهوريه نفسىSeptember 30, 2008 at 3:39 PM

    كل سنة وانتى طيبة يا ياسمين وان شاء اللة ترجع ليكم بالسلامة العيد الجى وتقبل اللة صيامك وقيامك وصالح اعمالك ونحن اياك وسائر المسلمين
    العديات حاططها على باب البلوج عندى يبقى مدى ايدك انتى والكامكيازى بتاعك خدى اللى انتى عايزاة

    ReplyDelete
  3. سمر الشافعىSeptember 30, 2008 at 3:54 PM

    طب مش دااااااافعه

    وورينى هتعملى ايه بالعصايه دى هههههههههبس بينى وبينك وفالخباثه كدا هوا كاميكاز هيعمل بيها ايه عشان متفردش اوى وانا بتكلم

    احنا كبيرنا ضرب صح؟؟؟؟هههههههه

    المهم ياستى كل سنه وانتى طيبه وانا بنوته غلبانه زيك ومحيلتيش غير مرتبى المتواضع وبجرى على اربع عيال وابوهم هههههههه عشان كدا مش هسيب عيديه

    بس هقسم معاكى بقى عشان العييال اليتامى دول

    ReplyDelete
  4. حزينهSeptember 30, 2008 at 3:55 PM

    كل سنه وانتى طيبه
    لوحدك ازاى امال احنا
    رحنا فين
    معاكى وبيكى يا حبيبتى


    حزينه

    ReplyDelete
  5. كـــيــــــــاراSeptember 30, 2008 at 4:03 PM

    كل سنه وانتي طيبه ياقمر وعيد سعيد عليكي

    بس ليه لوحدك

    اما البلالين

    تعالي نلعب سوا بيها
    ونفرق مصاصات علي العيال

    بلاش تحطي نفسك في قوقعه

    اضحكي وعيشي بجد هتفرحي

    ReplyDelete
  6. مهندس مصري بيحب مصرSeptember 30, 2008 at 4:27 PM

    امال لو كنتي هنا عندي
    مفيش اي مظهر من مظاهر العيد
    و اليوم بيمر عادي خالص بدون أي فرق عن يوم عادي و مقضي نصه نت و نصه تلفزيون و حبة نوم على الماشي

    كل سنة و انتي طيبة
    :)

    ReplyDelete
  7. قلم رصاصSeptember 30, 2008 at 4:44 PM

    ان شاء الله ترجع لك بالسلامة

    وتعيدي معاها احلى عيد الجي او اللي جي برضه
    ههههههههههههههههه

    وانا مش ناسي العيدية يا ياسمين يا اختي والله.. ايه رأيك حته بخمسه تنفع ؟
    ههههههههههههههههههههه

    كل سنة وانتي طيبة
    وعيد سعيد على عليكي وعلى كل المسلمين


    تقبلي مروري

    ReplyDelete
  8. محمدSeptember 30, 2008 at 5:05 PM

    كل عام وأنتم بخير

    من آداب العيد.. الاغتسال, الأكل قبل الخروج, التكبير, الذهاب إلى الصلاة من طريق والعودة من آخر, والتهنئة بـ”تقبل الله منا ومنكم”

    فتقبل الله منا ومنكم

    ReplyDelete
  9. http://kasperb4.blogspot.com/September 30, 2008 at 5:15 PM

    عديتك محفوظة انتي والحاج كاميكاز في الحفظ والصون
    وعدية سوكا كمان ولا تزعلي ههههههه
    كل سنة وانتو طيبين
    :)

    ReplyDelete
  10. zordeakSeptember 30, 2008 at 5:37 PM

    كل سنة وانتى طيبة يا ياسمين وربنا يجعله عيد سعيد عليكى باذن الله

    وربنا يفرحك ويسعد قلبك ويطمنك طول الوقت

    اللهم امين

    عيد سعيد

    :)

    ReplyDelete
  11. Ma 3linaSeptember 30, 2008 at 5:57 PM

    كل عيد و انتى طيبة :)))

    ReplyDelete
  12. AnonymousSeptember 30, 2008 at 8:22 PM

    كل عام وأنتم إلى الله أقرب وعلى طاعته أدوم
    تقبل الله منا ومنكم

    ReplyDelete
  13. ... amrSeptember 30, 2008 at 10:47 PM

    كل سنة و انتي طيبة .... و النسية للعيدية .... انا اول مرة اجي هنا ... بس ماتخافيش .... حقك محفوظ :))) كل سنة و انتي طيبة

    ReplyDelete
  14. أحمد سعيد بسيونيOctober 1, 2008 at 2:22 PM

    بسم الله

    كل عام وانتم بخير

    كل عام وانتم في صحة وسعاده وهناء دائمين

    كل عام وانتم الى الله اقرب

    تحياتي الخالصة

    ReplyDelete
  15. No FearOctober 2, 2008 at 2:30 AM

    السلام عليكم
    كل سنة وأنت طيبة
    و ربنا يرجعك سوكا بالسلامة بسرعة
    .
    حمدلله علي سلامة كيميكاز هو كان مسافر و لا أية الكم بوست اللي فاتوا
    أنا هأحترم نفسي و كرامتي و اسيب عيدية
    .
    كل سنة و أنت طيبة
    و حمد لله علي سلامتك

    ReplyDelete
  16. admelmasryOctober 2, 2008 at 8:17 AM

    كل سنه وانتي طيبة
    انت مش لوحدك يا قمر
    كل دول ناس بيقولوك كل سنه وانت طيبة

    ReplyDelete
  17. N35October 2, 2008 at 12:29 PM

    من يجديد التعبير عن أحزانه ..سيجيد التعبير عن الفرحة حين تطرق بابه.

    الناس يتظاهرون بالفرح وقت حزنهم ، ويبذلون مجهودًا خرافيًا لإظهار عكس ما يشعرون ،
    هؤلاء يتحطمون نفسيًا ويموتون بالبطيء ويخلقون حالة من الانفصام بين الداخل والخارج ..فتصبح شخصياتهم أقرب الى شخصية (الكومبارس) الذي يلعب دورًا ليس له ويقف على منصّة من وهم .


    بقدرت ما لمست هنا من حزن ، بقدر ما لمست من صفاء نفس وصدق.

    وقاك الرحمن شرّ الهمّ ورزقك السكينة .

    بخصوص العيدية..
    سأعلن الفرار من هنا فور كتابة التعليق :)
    كل عام وانت بخير

    ReplyDelete
  18. mando4everOctober 2, 2008 at 1:43 PM

    يمكن العيد ده مختلف بالنسبة لي....
    لانه اول عيد من سنين اكون فيه حر نفسي....
    بمعنى اني اجازة زي خلق الله العاديين...
    زمان كنت بشتغل في مهنة عز شغلها هو الأعياد والمواسم...
    الفارق هنا أن آخر عيد كنت حر نفسي فيه...
    كان يمكن من 6 سنين...
    ساعتها كنت مجنون صغير في ثانوي عام وعايش لوحدي برضو...
    وكنا لسة بشتري هدوم جديدة بمناسبة العيد...
    وحاجة مهمة كمان كنت لسة في شبرا...
    انا واصحابي ننزل كالعادة...
    ونخرج هنا وهنا واحنا كتير...
    على أمل اننا يومنا ينتهي ببنت جميلة في ايد كل واحد....
    وطبعا ده اللي عمره ما حصل في أي عيد لسبب بسيط هو ان عددنا بيكون 5 مثلا ومش عارف هنلاقي خمس بنات ينفعولنا ماشيين لوحدهم ازاي....
    ده ناهيكي عن فشلنا كلنا في فن المعاكسة لأسباب مختلفة....
    انا فاكر ان العيد ده ساعتها شوفت بعيني اول حادثة تحرش حقيقي في البلد....
    وكانت بشرية على كورنيش النيل وعساكر الامن مش قادرين يعملوا حاجة قدام الجماهير دي.....
    انا رغاي زيادة عن اللزوم....
    اللي عايز اقوله ان بعد السنين دي كلها....
    السنة دي رجعلي نفس الاحساس...
    ان انا لوحدي....
    اعرف ناس كتير وحياتي اتغيرت بشكل كامل....
    بس لقيت نفسي يوم الوقفة في بيتي ومتخيلتش شكل اني مش اصلي العيد في شبرا ونفرش الحصر في الشارع بطول شارع جزيرة بدران والناس تقعد تكبر.....
    صحيح رحت قعدت الوقفة في شبرا....
    بس جه العيد ولاني بمشي في الشارع واشوف البلد زحمة....
    وكل واحد ماشي في ايدو حبيبتو...
    وبصرف النظر عن كل اللي في دماغي وكل حاجة فعلا انا مقتنع بيها لكن الحتة دي حزت فيا حقيقي ....
    لقيتني تاني يوم اللي هو النهاردة...
    اقوم من النوم المغرب عشان اقعد في الضلمة لحد دلوقتي على حجري جهاز....
    ومعملش حاجة غير اني اكتب واسمع منير واشرب سجاير وكفايين ....
    لحد الساعة حداشر بالليل دلوقتي...
    حسيت قد ايه انا تعيس ...
    صحيح بواسي نفسي بان آلام الوحدة اقوى بكتير من آلا حياة افتراضية تتخلق عشان مزاجي ورغبتي....
    بس برضو حسيت ان انا تعيس واني عايز العيد يعدي...
    عشان ارجع شغلي واتلهي في اي موال....
    .
    .
    ولو اني الاحساس دايم برضو بس بيتعب قوي في المناسبات :)
    .
    .
    كل سنة وانتي متصالحين مع نفسكو....

    ReplyDelete

الكلمـة نـور .. وبعـض الكلمـات قبـور

Subscribe to: Post Comments (Atom)