Friday, February 20, 2009

الأسد فاااااااك


شئ غريب وعجيب ومحير جدا جدا جدا وغير طبيعى


فجأة وبدون أى مقدمات يخرج ايمن نور من السجن


ويصاب الإعلام بل الشعب المصرى بأكمله حالة من الذهول والدهشة والريبة والشك وعدم التصديق و تساؤلات غريبة من عينة :-ه


إشمعنى دلوقتى ؟؟؟


هيا الحداية بترمى كتاكيت؟؟؟


هو مين راح فين بكام؟؟؟


شئ فعلا خزعبلى فى بلد خزعبلى عجيب وبشكل كاميكازى مريب


الخبر كان صادم وغير متوقع لدرجة ان معظم صحف البلد لم تستوعب خروجه من السجن فصدرت معظم اعدادها فى اليوم الثانى من الإفراج عنه بلا ادنى خبر عن مثل هذا الحدث الغريب


ومعظم الأخبار والتحقيقات وحتى اللقاءات كنت احسها من نوعية : الأسد فاااااااااااك


ولذلك جاء الرد واضح وصريح من قبل ايمن نور بإنه لن يقوم بدور أمير الإنتقام


البعض يقول خرج بصفقة والبعض يكذب


اللى بستغربله بجد ان آخر مقالة لأيمن نور من السجن فى عموده اليومى " شباك نور " فى جريدة الدستور كان بعنوان الفارق بين السادات ومبارك واللى أشار فيه بشكل صريح عن أستحالة الإفراج الصحى عن السجناء فى عهد مبارك


في عهد الرئيس مبارك أصبح الإفراج الصحي عن السجناء لا يتم إلا بعد أن يسلم المسجون روحه لخالقها!! وتم إلغاء العفو في ثلث المدة، وتم تقليل تدريجي في عدد المستفيدين بقرارات العفو التي أصبحت تتعدل بالتقليص وليس بالزيادة!!ه


ألا تروا معى ان شئ غريب جدا ان يكون هذا هو كلامه قُبيل أيام قليلة من الإفراج عنه .. معقول تبقى صدفة؟؟؟


الأغرب هو اللى اتقال فى افتتاحية الواشنطن بوست يوم الاتنين 16 فبراير عن " الدعوة المشروطة " للرئيس لواشنطن ولكن بشرط الإفراج عن أيمن نور .. ويوم الأربع من نفس الأسبوع يخرج أيمن نور بالفعل؟؟


معقول كل هذا يكون بالمصادفة؟؟؟



حاسة ان البلد بقت عاملة زى فيلم كرتونى خرج فيه الأسد شامخاً منفوخاً متجهاً نحو "قصر الرئاسة " ليمسك الحكم فى وسط دهشة البعض وفرحة البعض وذعر البعض الآخر ، فى حين كل اهل القصر خدوا ديلهم فى سنانهم وطلعوا يجروا ويصوتوا : الأسد فاااااااااك

27 comments:

  1. اللى انا شيفاه عجيب ان فيه كتير حالتهم الصحيه فعلا محتاجه ده اشمعنى نور اشمعنى مش عارفه بكره هنعرف مبحبش انساق وراء المواضيع الا لما اشوف نهايتها

    ReplyDelete
  2. لا تعليق
    قلتى اكتر من ما استطيع قوله
    غير
    ربنا يستر على اللى جاى
    طالما فى تخبط يبقى فيه مصايب
    وربنا يسترها بجد

    ReplyDelete
  3. والله لفتي نظري للموضوع ده بشكل تاني
    فعلا هي حاجه غريبه
    بس بالنسبه لمصر مش حاجه غريبه
    احنا بلد غريب اصلا
    وحاجات تظهر حاجات تختفي

    بس قوليلي يعني ايه كاميكازى

    تحياتي

    ReplyDelete
  4. أنا زيك مش فاهم ..

    ونظرية المؤامرة مسيطرة عليا بس بقول كل شيء بكرة هيبان لواحدة

    ReplyDelete
  5. مانشيت خبر يقول
    "
    قبل زيارته الى واشنطن .. مبارك يطلق سراح ايمن نور
    "

    اعتقد انها كـ بادرة حسن نية من قبل النظام الغبي

    تحياتي

    ReplyDelete
  6. السلام عليكم
    يارب تكون بداية خير مش صدمة جديدة

    ReplyDelete
  7. فكرتيني بفلم محمد فؤاد
    الاسد هرب الاسد هرييييييييييب

    نياهاهاهاها

    نو كومنت

    بست وشز فور يو

    ReplyDelete
  8. كان فى السجن خرج من السجن مش هتفرق البلد خربانة خربانة

    ReplyDelete
  9. هناك اشياء محيرة .
    السؤال عنها يزيد الحيرة
    اما التغاضى عن مثلها يميت الافكار
    ومثل هذا النوع يجب ان تموت منه الافكار..
    ايه الكلام ده؟؟
    خلاص اتكتب ومعرفتش اشخبط عليه..
    بوست هايل
    وسلامى

    ReplyDelete
  10. بيتهيالي مبقاش لينا حق الاستغراب
    في البلد دي
    وايه فيها اللي ماشي
    من غير مفاجأت
    وبعدين بيقولوا ياخبر بفلوس
    بكره يبقي ببلاش :))

    ReplyDelete
  11. عجيب ايه وغريب ايه ما غريب في بلدنا الا الشيطان

    طبعا الصفقة معروفة للجميع وباينة جدا زمان وزيرة خارجية امريكا حلاوتهم قالت الافراج عن ايمن نور والكلام ده

    وطبعال ظاظا ريسنا حبيبنا مينفعش يفرج عنه ساعتها عشان برستيجه ادام محابيسه الي هما شعبه يعني

    كان لازم يخرج في الوقت ده بعد ااما انفض المولد الاعلامي كالعادة و هديت الناس وخرج ايمن نور من السجن عشان الناس تقوله اه ديه عندنا حكومة ديموقراطية
    بس من نوع ديموقراطية ندلعها وساعات كتير نلوي دراعها


    تحياتي

    ReplyDelete
  12. بجد البلد بتاعتنا اقوي بلد في التعتيم والتدبير واللف والدوران وحاجه الواحد مش فاهم من الصح ومين الغلط

    وربنا يستر بجد

    ReplyDelete
  13. كل الناس مستوعبتش خروجه لكنه بلفعل خرج كن حكاية ان الصحف نزلت تانى يوم ومفيش اخبار عن خروج ايمن نور فدا لأنه خرج تقريباً المغرب وكانت الطبعات الاولى للصحف اوريدى جهزت فملحقوش بس ينزلوا الخبر هههههه يعنى مش من وقع الصدمة وللا حاجة

    ReplyDelete
  14. اولا احب اهنيك على الكلام الجميل والرأي اللي فعلا دار في دماغ كل واحد له دماغ ولسه ماكبرها....بس انا لى بس ملحوظتين على كلامك ....اولا استخدام كلمة اسد كبيرة اوووي على الموقف ....وانا بصراحة ما فهمت مين تقصدي نور الغلبان؟ ولا الاسد الحاكم اللي فك من اوباما...التانية كاميكازى وهي كلمة يابانية تعني تفجير الطياريين انفسم
    في الاهداف ....ومش فاهم برضة مين هنا المقصود لان ايمن كان فاضله ظلتة ويطلع برة

    وفي راي مش ح يقدر يعمل حاجة....لانه اسخم من سيدي الا ستي...

    ReplyDelete
  15. هو فعلاً عملها علشان أوباما يرضى يقابله
    :)
    حاجة قلة قيمة ليه
    للريس يعني
    بس هو اتعود على كده

    ReplyDelete
  16. حااااااااااااااااااااسب الاسد
    مش عارفة اقول ايه
    حمد الله على سلامته اهم حاجة

    ReplyDelete
  17. يعنى محبوس مش عاجب
    مفروج عنه مش عاجب ؟

    ReplyDelete
  18. الأسد خلاص
    لا هيهش ولا هينش

    كل حاجة اتظبطت واترستأت

    وكله تمام يا فندم


    ودمتم
    وليد

    ReplyDelete
  19. والله ايمن نور يخرج يدخل مايهمناش فى حاجة

    ReplyDelete
  20. عزيزتى

    مفيش خاجه غريبه

    هو خلاص قرب ينتهى من مدته

    ومبارك مش عاوز تصادم مع اوباما من اولها

    بس ليه واشنطن مركزه على ايمن نور

    ومش بتركز على اللى اتحاكموا فى محاكم عسكريه

    ولا معتقليين بدون احكام

    فى الاول والاحر احنا اللى ممكن نأثر ونغير مش واشنطن

    سلام

    ReplyDelete
  21. مش عارف بس حاسس ان الموضوع ابسط من كل الكلام ده
    نور عملياً اصبح لا يستطيع فعل شئ
    لا يمكن يرشح نفسة لمجلس الشعب لانة مدان فى قضية جنائية وحتى لو ترشح مش ممكن ينجح لان مفيش اشراف قضائى
    ومش ممكن يترشح لرأسة الجمهورية تانى للسبب الجنائى وحتى لو فلت من الجنائى يقف عاجزاً امام شروط الترشح للرأسة
    اما عن وجوده خارج السجن والزعامة والمقاومة والمشاغبة
    فكل ده كلام فاضى البلد كلها بتتكلم لكن فعل مفيش والنظام حيخسر ايه لما اللى بيتكلموا يزيدوا واحد

    ReplyDelete
  22. فعلا

    الكل يضرب اخماس في اسداس للموضوع ده

    ReplyDelete
  23. هو فى حاجة مفهومة فى البلد دي !!

    سيبها لله

    ReplyDelete
  24. في بلد زي مصر يستحسن منسالش ليه وازاي وفين وامتي لان في النهاية مش حنوصل لحاجة خالص بكل أسف
    تحياتي

    ReplyDelete
  25. مستحيل يتم الإفراج عن نور بالشكل ده كده لله في لله أبدا ... أكيد وراء الموضوع ده حاجة وهنعرفها بعدين في وقتها

    لأن معظم ما يتم التدبير له في الخفاء لا نعلم عنه شيئا إلا بعد مدة من الزمن

    ReplyDelete
  26. لأ هو المشكله ضجة طلوعه ماكانتش زي ضجة دخوله
    يعني ناس كتير اكتشف بعد كام يوم انه خرج
    و يخلق ما لا تعلمون

    ReplyDelete

الكلمـة نـور .. وبعـض الكلمـات قبـور